Ndinam Utom Nte Mme Isụn̄utom Emem Abasi
“Ukot owo . . . eye didie ke enyọn̄ ikpọ obot! ukot owo eke ọkwọrọde emem.”—ISAIAH 52:7.
1, 2. (a) Nte ẹkebemde iso ẹtịn̄ ke Isaiah 52:7, nso eti mbụk ke ẹnyene ndikwọrọ? (b) Nso ke mme ikọ prọfesi Isaiah ẹkewọrọ ẹnọ Israel eset?
ODU eti mbụk oro anade ẹtan̄a! Enye edi mbụk aban̄ade emem—ata emem. Enye edi etop edinyan̄a oro enyenede n̄kpọ ndinam ye Obio Ubọn̄ Abasi. Anyan ini ko ke edem prọfet Isaiah ama ewet aban̄a enye, ndien ẹtịm mme ikọ esie ẹnịm ẹnọ nnyịn ke Isaiah 52:7, ke ebiet nnyịn ikotde: “Ukot owo eti mbụk eye didie ke enyọn̄ ikpọ obot! ukot owo eke ọkwọrọde emem, eke obụkde eti n̄kpọ, eke ọkwọrọde edinyan̄a; ọdọhọ Zion, ete, Abasi fo ada ubọn̄!”
2 Jehovah ọkọnọ prọfet esie Isaiah odudu spirit ndiwet etop oro ke ufọn Israel eset ye kaban̄a ufọn nnyịn mfịn. Nso ke enye ọwọrọ? Ke ini oro Isaiah ekewetde mme ikọ oro, ekeme ndidi mbon Assyria ẹma ẹtatan̄ obio ubọn̄ edem edere Israel ẹka ntan̄mfep. Ekem, ẹma ẹtan̄ mme andidụn̄ obio ubọn̄ edem usụk Judah ẹka ntan̄mfep ke Babylon. Mmọ oro ẹkedi mme usen iduọesịt ye ndutịme ke idụt oro koro mme owo oro ikosụkke ibuot inọ Jehovah ndien ke ntre ikodụhe ke emem ye Abasi. Nte Jehovah ọkọdọhọde mmọ, edu idiọkn̄kpọ mmọ ama ọtọ ubahade ke ufọt mmọ ye Abasi mmọ. (Isaiah 42:24; 59:2-4) Nte ededi, ebede ke Isaiah, Jehovah ama ebem iso etịn̄ ete ke edikem ini mme inuaotop Babylon ẹyeberede. Ikọt Abasi ẹyenyene ifụre ndifiak nnyọn̄ obio emana mmọ, man ẹkefiak ẹbọp temple Jehovah do. Ẹyefiak ẹwụk Zion, ndien ẹyefiak ẹtọn̄ọ utuakibuot ata Abasi ke Jerusalem.—Isaiah 44:28; 52:1, 2.
3. Didie ke un̄wọn̄ọ aban̄ade edifiak ntan̄ Israel mbọk ekedi n̄ko prọfesi emem?
3 Un̄wọn̄ọ edinyan̄a emi ekedi n̄ko prọfesi emem. Mmọ ndifiak nnyọn̄ idụt oro Jehovah ọkọnọde nditọ Israel edidi uyarade mbọm Abasi ye edikabade esịt mmọ. Emi okowụt ete ke mmọ ẹma ẹdu ke emem ye Abasi.—Isaiah 14:1; 48:17, 18.
“Abasi Fo Ada Ubọn̄!”
4. (a) Ke nso usụn̄ifiọk ke ẹkeme ndidọhọ ke ‘Jehovah ama akabade edi edidem’ ke 537 M.E.N.? (b) Didie ke Jehovah akanam n̄kpọ ke mme ukperedem isua kaban̄a ufọn ikọt esie?
4 Ke ini Jehovah akanamde edinam edinyan̄a emi ke 537 M.E.N., ẹma ẹkeme ndinọ Zion ntọt nte odotde ẹte: “Abasi fo ada ubọn̄!” Edi akpanikọ, Jehovah edi “nsinsi Edidem.” (Ediyarade 15:3, NW) Edi edinyan̄a emi enye akanyan̄ade ikọt esie mi ekedi obufa usụn̄ ndiwụt itie edikara esie. Ke n̄wọrọnda usụn̄, emi okowụt nte odudu esie ẹdide akakan ọnọ mme okopodudu-n̄kan obio ukara owo ẹmi ẹkedude tutu esịm ini oro. (Jeremiah 51:56, 57) Nte utịp edinam spirit Jehovah, ẹma ẹbiat mme odu eken oro ẹkedụkde ẹban̄a ikọt esie. (Esther 9:24, 25) Ndien ndien Jehovah ama esisịbe odụk ke nsio nsio usụn̄ man anam ndidem Media ye Persia ẹdiana kiet ke ndinam akakan uduak esie. (Zechariah 4:6) Ẹwet mme utịbe utịbe n̄kpọntịbe oro ẹkedade itie ke ini oro ẹnọ nnyịn ke n̄wed Ezra, Nehemiah, Esther, Haggai, ye Zechariah eke Bible. Ndien ndidụn̄ọde mmọ ẹsọn̄ọ mbuọtidem didie ntem!
5. Mme akpan n̄kpọntịbe ewe ke ẹsio ẹwụt ke Isaiah 52:13–53:12?
5 Edi, se ikadade itie ke 537 M.E.N. ye ke oro ebede ekedi ntọn̄ọ kpọt. Ndondo oro ke ama eketịn̄ prọfesi aban̄a edifiak n̄wụk ke ibuot 52, Isaiah ama ewet aban̄a edidi Messiah. (Isaiah 52:13–53:12) Ebede ke Messiah, emi ekedide Jesus Christ, Jehovah ọyọnọ etop edinyan̄a ye emem oro akam enyenede se ọwọrọde akan se iketịbede ke 537 M.E.N.
Akakan Isụn̄utom Emem Jehovah
6. Anie edi n̄kponn̄kan isụn̄utom emem Jehovah, ndien ewe utom ke enye eketịn̄ nte imọ inyenede ndinam?
6 Jesus Christ edi akakan isụn̄utom emem Jehovah. Enye edi Ikọ Abasi, ọkpọkpọ Etịn̄ikọ ke ibuot Jehovah. (John 1:14) Ke n̄kemuyo ye emi, esisịt ini ke enye ama akana baptism ke Akpa Jordan, Jesus ama adaha ada ke synagogue ke Nazareth onyụn̄ okot utom esie uyo ọwọrọ oto Isaiah ibuot 61. Utom oro ama anam an̄wan̄a nte ke se ẹkedọn̄de enye edikwọrọ ama abuana “uwọrọ-ufụn” ye “edikụt usụn̄,” ọkọrọ ye ifet edinyene unyịme Jehovah. Kpa ye oro, Jesus ama anam n̄kpọ akan editan̄a etop emem. Abasi ama ọdọn̄ enye n̄ko ete edinọ isọn̄ kaban̄a emem oro edibịghide.—Luke 4:16-21.
7. Nso isụn̄ọ ito edidu ke emem ye Abasi oro ẹnamde ẹkeme ndinyene ebe ke Jesus Christ?
7 Ke ini Jesus akamanade, mme angel ẹma ẹwụt mme ekpemerọn̄ idem ẹkpere Bethlehem, ẹtorode Abasi ẹnyụn̄ ẹdọhọde ẹte: “Ubọn̄ enyene Abasi ke ata enyọn̄. Emem onyụn̄ odu ke isọn̄ ke otu owo ẹmi Enye enende iso ye mmọ.” (Luke 2:8, 13, 14, sịghisịghi ubọkn̄wed edi eke nnyịn.) Ih, emem oyodu ọnọ mbon oro Abasi enende iso ye mmọ koro mmọ ẹkenyenede mbuọtidem ke ndutịm oro enye akanamde ebe ke Eyen esie. Nso ke oro ediwọrọ? Enye ediwọrọ nte ke okposụkedi mme owo ẹkemanade ke idiọkn̄kpọ, mmọ ẹkeme ndinyene edisana idaha ye Abasi, itie ebuana oro enye ọnọde unyịme. (Rome 5:1) Mmọ ẹkeme ndidara ifụre ekikere, kpa emem, oro owo mîkemeke ndinyene ke usụn̄ efen ekededi. Ke ini oro Abasi emekde, ẹyefak owo ẹsion̄o ke kpukpru utịp idiọkn̄kpọ oro ẹkedade ẹmana ẹto Adam, esịnede udọn̄ọ ye n̄kpa. Mme owo ididịghe aba nnan m̀mê inan m̀mê mbụn̄ọ. Ẹyesio mmemidem oro esinamde ẹkụt edikpu ye akama-iduọesịt udọn̄ọ ibuot ẹfep ke nsinsi. Ẹyekeme ndidara mfọnmma uwem ke nsinsi.—Isaiah 33:24; Matthew 9:35; John 3:16.
8. Mmanie ke ẹnọ emem Abasi?
8 Mmanie ke ẹnọ emem Abasi? Ẹnọ kpukpru mbon oro ẹbuọtde idem ke Jesus Christ. Apostle Paul ekewet ete ke ‘Abasi ama enyịme ndinam kpukpru n̄kpọ eken ẹkabade ẹtie ke emem ye enye ebe ke Christ ke ndinam emem ebe ke iyịp Jesus oro ẹkeduọkde ke eto ndutụhọ.’ Apostle oro ama adian do ete ke edifiak nnam emem emi ayabuana mme “n̄kpọ eke ẹdude ke enyọn̄”—oro edi, mbon oro ẹdidide nsan̄a mme ada udeme nnyene ye Christ ke heaven. Enye n̄ko ayabuana “n̄kpọ eke ẹdude ke isọn̄”—oro edi, mbon oro ẹdinyenede ifet edidu uwem ke nsinsi ke isọn̄ emi ke ini ẹdinamde enye enyene ọyọhọ ọyọhọ idaha Paradise. (Colossae 1:19, 20) Ke ntak mmọ ndibọ ufọn nto ufọn uwa Jesus ye ke ntak nsụkibuot mmọ ke ofụri esịt nnọ Abasi, kpukpru mmọemi ẹyedara ufiop ufiop itie ufan ye Abasi.—Men James 2:22, 23 domo.
9. (a) Ndidu ke emem ye Abasi otụk mme itie ebuana ewe? (b) Ye uduak edinam nsinsi emem odu ke kpukpru ebiet, nso odudu ke Jehovah akayak ọnọ Eyen esie?
9 Ndinyene utọ emem oro ye Abasi edi akpan n̄kpọ didie ntem! Ke emem ye Abasi mîdụhe, emem oro ebịghide m̀mê oro enyenede ufọn ikemeke ndidu ke itie ebuana efen ekededi. Ndidu ke emem ye Jehovah edi itiat idakisọn̄ ọnọ ata emem ke isọn̄. (Isaiah 57:19-21) Nte odotde, Jesus Christ edi Ọbọn̄ Emem. (Isaiah 9:6) Jehovah amayak odudu edikara ọnọ enyeemi ebede ke enye ẹkeme ndinam ubonowo afiak edidu ke emem ye Abasi. (Daniel 7:13, 14) Ndien kaban̄a mme utịp edikara oro Jesus akarade ubonowo, Jehovah ọn̄wọn̄ọ ete: “Emem ididopke.”—Isaiah 9:7; Psalm 72:7.
10. Didie ke Jesus ekenịm uwụtn̄kpọ ke ndikwọrọ etop emem Abasi?
10 Ofụri ubonowo ẹyom etop emem Abasi. Jesus ke idemesie ama enịm ifịk ifịk uwụtn̄kpọ ke ndikwọrọ enye. Enye ama anam ntre ke ikpehe temple ke Jerusalem, ke enyọn̄ obot, ke mbenusụn̄, ọkwọrọ ọnọ n̄wan Samaria ke mben obube mmọn̄, ye ke ufọk mme owo. Ke ebiet ekededi eke mme owo ẹkedude, Jesus ama afak ifet ndikwọrọ mban̄a emem ye Obio Ubọn̄ Abasi.—Matthew 4:18, 19; 5:1, 2; 9:9; 26:55; Mark 6:34; Luke 19:1-10; John 4:5-26.
Ẹnọ Ukpep Ndisan̄a ke Nde-Ikpat Christ
11. Jesus ọkọnọ mme mbet esie ukpep ndinam nso utom?
11 Jesus ama ekpep mme mbet esie ndikwọrọ etop emem Abasi. Kpa nte Jesus ekedide “ata ntiense akpanikọ” Jehovah, mmọ ẹma ẹfiọk ẹte ke mmimọ n̄ko imenyene mbiomo nditie ntiense. (Ediyarade 3:14; Isaiah 43:10-12) Mmọ ẹkese Christ nte Adausụn̄ mmọ.
12. Didie ke Paul okowụt nte utom ukwọrọikọ edide akpan n̄kpọ?
12 Apostle Paul ama ọkọk ibuot ke nte utom ukwọrọikọ edide akpan n̄kpọ, ọdọhọde: “N̄wed Abasi ke ọdọhọ ete, Owo ekededi eke ọbuọtde idem ye Enye idikwe bụt.” Oro edi, owo ekededi eke ọbuọtde idem ye Jesus Christ nte Etubom Asan̄autom edinyan̄a Jehovah idikwe bụt. Ndien ekpụk ekededi oro owo otode idịghe se inamde owo okûdot, koro Paul ama adian ete: “Ubahade idụhe ke ufọt Jew ye Greek: koro Ọbọn̄ kiet edide Ọbọn̄ mmọ kpukpru, onyụn̄ enyene ọyọhọ mfọnido ye kpukpru mmọ eke ẹsemede ẹkot Enye. Koro, Owo ekededi eke edisemede okot enyịn̄ Jehovah eyebọhọ.” (Rome 10:11-13) Edi mme owo ẹdisan̄a didie ẹkpep ẹban̄a ifet oro?
13. Nso ke ẹkeyom man mme owo ẹkop eti mbụk, ndien didie ke mme Christian eke akpa isua ikie ẹkenam n̄kpọ ẹban̄a se ẹkeyomde oro?
13 Paul ama eneme aban̄a ediyom oro ẹyomde mme ọkwọrọ eti mbụk ke ndibụp mme mbụme oro ẹfọnde asan̄autom Jehovah kiet kiet ndikere mban̄a. Apostle oro okobụp ete: “Mmọ ẹdinam didie ẹseme ẹkot Enye emi mmọ mîkọbuọtke idem ye Enye? Mmọ ẹdinyụn̄ ẹnam didie ẹbuọt idem ye Enye emi mmọ mîkokopke iban̄a? Mmọ ẹdinyụn̄ ẹnam didie ẹkop, ke ọkwọrọ-ikọ mîdụhe? Mmọ ẹdinyụn̄ ẹnam didie ẹkwọrọ, ke mîbọhọke ẹdọdọn̄ mmọ?” (Rome 10:14, 15) N̄wetnnịm n̄kpọ eke ntọn̄ọ ntọn̄ọ Ido Ukpono Christ ọnọ in̄wan̄în̄wan̄ uyarade nte ke iren ye iban, n̄kpri ye ikpọ, ẹma ẹtiene uwụtn̄kpọ oro Christ ye mme apostle esie ẹkenịmde. Mmọ ẹma ẹkabade ẹdi ifịk ifịk mme anditan̄a eti mbụk. Ke ẹkpebede Jesus, mmọ ẹma ẹkwọrọ ikọ ẹnọ mme owo ke ebiet ekededi eke mmọ ẹkekemede ndikụt mmọ. Ye udọn̄ editre ndibe n̄kpọn̄ owo ekededi, mmọ ẹma ẹnam utom ukwọrọikọ mmọ an̄wan̄wa ye ke ufọk ke ufọk.—Utom 17:17; 20:20.
14. Didie ke ekedi akpanikọ nte ke “ikpat” mbon oro ẹtan̄ade eti mbụk “ẹye”?
14 Nte ededi, idịghe kpukpru owo ẹkedara mme Christian ẹkedide mme ọkwọrọikọ. Kpa ye oro, se Paul okokotde oto Isaiah 52:7 ama osu. Ke ama okobụp mbụme oro, ‘Mmọ ẹdinam didie ẹkwọrọ, ke mîbọhọke ẹdọdọn̄ mmọ?’ enye ama adian ete: “Kpa nte ẹwetde ẹte, Ikpat mmọ ẹmi ẹdade etop nti n̄kpọ ẹye adan̄a didie!” Ata ediwak nnyịn ikereke ke ikpat nnyịn ẹye. Ntre, ndien, nso ke emi ọwọrọ? Edi ikpat ẹsinam owo asan̄a nte enye akade ndikwọrọ ikọ nnọ mbon en̄wen. Utọ ikpat oro ẹda ẹban̄a owo oro. Ndien nnyịn imekeme nditịm nnịm nte ke mme akpa Christian ẹmi ẹma ẹye ke enyịn ediwak owo oro ẹkekopde eti mbụk ẹto mme apostle ye mme mbet Jesus Christ eke akpa isua ikie eken. (Utom 16:13-15) Akan oro, mmọ ẹkedi ọsọn̄urua ke enyịn Abasi.
15, 16. (a) Didie ke mme akpa Christian ẹkewụt ẹte ke mmimọ ikenen̄ede idi mme isụn̄utom emem? (b) Nso ikeme ndin̄wam nnyịn ndinam utom ukwọrọikọ nnyịn ke ukem usụn̄ oro mme Christian eke akpa isua ikie ẹkenamde?
15 Mme anditiene Jesus ẹkenyene etop emem, ndien mmọ ẹketịn̄ enye ke emem emem usụn̄. Jesus ama ọnọ mme mbet esie mme item ẹmi: “Ufọk ekededi eke mbufo ẹdụkde, ẹbem iso ẹdọhọ ẹte, Yak emem odu ke ufọk emi. Ndien edieke eyen emem odude do, emem mbufo eyedoro enye ke idem: edi edieke eyen emem mîdụhe, emem mbufo eyefiak etiene mbufo.” (Luke 10:5, 6) Sha·lohmʹ, m̀mê “emem,” edi ekọm mme Jew. Nte ededi, mme item Jesus ẹma ẹsịne ekese ẹkan emi. Nte ‘mme isụn̄utom ẹmi ẹdade ke ibuot Christ,’ mme mbet esie oro ẹyetde aran ẹma ẹkpe ye mme owo ẹte: “Ẹkabade ẹtie ke emem ye Abasi.” (2 Corinth 5:20) Ke n̄kemuyo ye mme item Jesus, mmọ ẹma ẹneme ye mme owo ẹban̄a Obio Ubọn̄ Abasi ye se enye ekemede ndiwọrọ nnọ mmọ nte owo kiet kiet. Mbon oro ẹkekpan̄de utọn̄ ẹma ẹbọ edidiọn̄; mbon oro ẹkesịnde etop oro ẹma ẹtaba.
16 Mme Ntiense Jehovah ẹnam utom ukwọrọikọ mmọ ke ukem usụn̄ oro mfịn. Eti mbụk oro mmọ ẹdade ẹsọk mme owo idịghe eke mmọ; enye enyene Enyeemi ọkọdọn̄de mmọ. Utom nnyịn edi nditịn̄ enye. Edieke mme owo ẹnyịmede enye, mmọ ẹsịn idemmọ ke udịm ndibọ mme utịbe utịbe edidiọn̄. Edieke mmọ ẹsịnde enye, mmọ ẹsịn ndidu ke emem ye Jehovah Abasi ye Eyen esie, Jesus Christ.—Luke 10:16.
Nditie Emem Emem ke Ntịme Ntịme Ererimbot
17. Idem ke ini isobode mme owo oro ẹsụn̄ide nnyịn, didie ke nnyịn ikpanam n̄kpọ, ndien ntak-a?
17 Inamke n̄kpọ m̀mê mme owo ẹnam n̄kpọ didie, edi akpan n̄kpọ mme asan̄autom Jehovah ndinyene ke ekikere nte ke mmimọ idi mme isụn̄utom emem Abasi. Mme owo ererimbot ẹkeme ndisịn idem ke ọkpọsọn̄ utọk ẹnyụn̄ ẹwụt iyatesịt ebe ke nditịn̄ mme uyat uyat ikọ m̀mê ke ndisụn̄i mbon oro ẹyatde mmọ esịt. Ekeme ndidi ndusụk nnyịn ima isinam oro ke mme ini edem. Nte ededi, edieke nnyịn ima ikemen obufa owo isịne mînyụn̄ idịghe aba eke ererimbot idahaemi, nnyịn idikpebeke mme usụn̄ mmọ. (Ephesus 4:23, 24, 31; James 1:19, 20) Inamke n̄kpọ m̀mê mbon en̄wen ẹnam n̄kpọ didie, nnyịn iyanam item oro ọdọhọde: “Edieke usụn̄ odude, ẹn̄wana, nte mbufo ẹkekeme, ndidu ke emem ye kpukpru owo.”—Rome 12:18.
18. Didie ke nnyịn ikpanam n̄kpọ edieke akwa owo ukara anamde n̄kpọ ye nnyịn ke nsọn̄ido, ndien ntak-a?
18 Utom ukwọrọikọ nnyịn ndusụk ini ekeme ndida nnyịn nsịm iso ikpọ owo ukara. Ke ndiwụt odudu ukara mmọ, mmọ ẹkeme ‘ndibụp nnyịn’ ntak emi nnyịn inamde ndusụk n̄kpọ m̀mê ntak emi nnyịn itrede ndibuana ke ndusụk edinam. Mmọ ẹkeme ndiyom ndifiọk ntak emi nnyịn ikwọrọde etop oro nnyịn ikwọrọde—etop oro ayararede nsunsu ido ukpono onyụn̄ etịn̄de aban̄a utịt editịm n̄kpọ emi odude kemi. Ukpono oro inyenede inọ uwụtn̄kpọ oro Christ ekenịmde oyonụk nnyịn ndinam n̄kpọ ke sụn̄sụn̄ ido ye ntotụn̄ọ ukpono. (1 Peter 2:23; 3:15) Ediwak ini, utọ ikpọ owo ukara oro ẹsidu ke idak mfịghe otode mme ọkwọrọ ederi mîdịghe ekeme ndito mme eteutom mmọ. Sụn̄sụn̄ ibọrọ ekeme ndin̄wam mmọ ndifiọk nte ke utom nnyịn idịghe n̄kpọndịk inọ mmọ m̀mê ndidi nnọ emem n̄kann̄kụk. Utọ ibọrọ oro anam mbon oro ẹnyịmede enye ẹnyene edu ukpono, edidianakiet, ye emem.—Titus 3:1, 2.
19. Ke mme edinam ewe ke Mme Ntiense Jehovah akananam mîsịnke idem?
19 Ẹdiọn̄ọ Mme Ntiense Jehovah ke ofụri isọn̄ nte mme owo oro mînyeneke ubọk ke en̄wan ererimbot. Mmọ ibuanake ke en̄wan ererimbot aban̄ade orụk, ido ukpono, m̀mê mbre ukara. (John 17:14) Sia Ikọ Abasi etemede nnyịn ete ‘isụk idem inọ mme enyene-odudu ẹmi ẹkarade,’ nnyịn idikam ikereke-kere ndibuana ke mme edinam nsọn̄ibuot mbio obio ndibiọn̄ọ mme edinam ukara. (Rome 13:1) Akananam Mme Ntiense Jehovah idianake ye n̄ka ekededi emi aduakde ndidorode ukara mfep. Ke ntak mme idaha emi Jehovah enịmde ọnọ mme Christian asan̄autom esie, mmọ ikereke-kere ndibuana ke orụk uduọkiyịp m̀mê afai ekededi! Ikụreke ke mme ata Christian nditịn̄ mban̄a emem; mmọ ẹdu uwem ke n̄kemuyo ye etop oro mmọ ẹkwọrọde.
20. Kaban̄a emem, nso mbụk ke Akwa Babylon enyene?
20 Ke edide isio ye mme ata Christian, mbon oro ẹdade ke ibuot mme esop ido ukpono Christendom inọhọ uyarade nte ke mmimọ idi mme isụn̄utom emem. Mme ido ukpono Akwa Babylon—mme ufọkabasi Christendom ye mme ido ukpono oro mîdịghe eke Christian—ẹmefụmi, ẹnọ ibetedem, ẹnyụn̄ ẹnen̄ede ẹda iso ke mme ekọn̄ idụt. Mmọ n̄ko ẹmesịn nsọk ẹnọ ukọbọ idem ye ediwot mme anam-akpanikọ asan̄autom Jehovah. Kaban̄a Akwa Babylon, Ediyarade 18:24 ke ntre atan̄a ete: “Ẹma ẹkụt iyịp mme prophet ye nti ikọt Abasi, ye iyịp kpukpru mmọ ẹmi owo ẹkewotde ke isọn̄.”
21. Didie ke ediwak mbon esịt akpanikọ ẹsinam n̄kpọ ke ini mmọ ẹkụtde ukpụhọde oro odude ke eduuwem ikọt Jehovah ye eke mbon oro ẹtienede nsunsu ido ukpono?
21 Ke mîbietke mme ido ukpono Christendom ye mme ikpehe Akwa Babylon eken, ido ukpono akpanikọ edi eti odudu oro anamde ẹdiana ọtọkiet. Jesus Christ ọkọdọhọ mme ata anditiene enye ete: “Mbufo ẹma ẹma kiet eken, kpukpru owo ẹyeda oro ẹfiọk ẹte mbufo ẹdi mbet Mi.” (John 13:35) Oro edi ima emi akande mme adan̄a idụt, eke n̄kaowo, eke ndutịm uforo, ye eke orụk oro ẹbaharede ubonowo eken. Ke ẹkụtde emi, ediwak miliọn owo ke ofụri ererimbot ke ẹdọhọ mme asan̄autom Jehovah oro ẹyetde aran ẹte: “Ẹyak nnyịn ika ye mbufo: koro nnyịn imokop ite ke Abasi odu ye mbufo.”—Zechariah 8:23.
22. Didie ke nnyịn ise utom unọ ikọ ntiense oro osụk oyomde ẹnam?
22 Nte ikọt Jehovah, nnyịn imenen̄ede idara ke se ẹnamde, edi utom emi ikụreke kan̄a. Ke ama ọkọtọ n̄kpasịp onyụn̄ ọdiọn̄ in̄wan̄ esie, ọtọ-in̄wan̄ isitreke utom. Enye esika iso anam utom, akpan akpan ke ata ini idọk. Ini idọk esiyom ọkpọsọn̄ ukeme oro akade-ka iso. Ndien idahaemi ke ẹdọk n̄kponn̄kan idọk eke mme andituak ibuot nnọ ata Abasi akan nte akanam edide. Emi edi ini idara. (Isaiah 9:3) Edi akpanikọ, nnyịn imesisobo ubiọn̄ọ ye unana udọn̄. Nte owo kiet kiet, ekeme ndidi nnyịn ke idomo ndiyọ ọkpọsọn̄ udọn̄ọ, n̄kpọsọn̄ mfịna ke ubon, m̀mê nsọn̄ọn̄kpọ ndutịm uforo. Edi ima oro inyenede inọ Jehovah onụk nnyịn ndiyọ. Etop oro Abasi ọnọde nnyịn edi n̄kpọ oro anade mme owo ẹkop. Ke akpanikọ, enye edi etop emem. Enye edi etop emi Jesus ke idemesie ọkọkwọrọde—eti mbụk Obio Ubọn̄ Abasi.
Nso Idi Ibọrọ Fo?
◻ Nso edisu ke Isaiah 52:7 ekenyene ke Israel eset?
◻ Didie ke Jesus okowụt nte ke idi n̄kponn̄kan isụn̄utom emem?
◻ Didie ke apostle Paul akabuan Isaiah 52:7 ye utom emi mme Christian ẹtienede ẹbuana?
◻ Nso ibuana ke ndidi mme isụn̄utom emem ke eyo nnyịn?
[Ndise ke page 13]
Ukem nte Jesus, Mme Ntiense Jehovah ẹdi mme isụn̄utom emem Abasi
[Mme ndise ke page 15]
Mme Ntiense Jehovah ẹsinam n̄kpọ emem emem inamke n̄kpọ m̀mê mme owo ẹnam n̄kpọ didie ẹban̄a etop Obio Ubọn̄