Ẹkenọ Asan̄autom Jehovah ‘Unan ke Ntak Idiọk Ido Nnyịn’
“[Ẹkenọ enye unan ke ntak] mme idiọk ido nnyịn. . . . Inia esie ọkọk nnyịn.”—ISA. 53:5.
1. Nso ke ikpekere iban̄a nte inịmde Editi, ndien ewe ntịn̄nnịm ikọ edin̄wam nnyịn ikere iban̄a emi?
NNYỊN isinịm Editi man iti n̄kpa Christ inyụn̄ iti kpukpru ufọn oro n̄kpa ye ediset ke n̄kpa esie ẹnamde ẹnọ nnyịn. Editi n̄kpa Christ eti nnyịn ke Jehovah kpọt odot ndikara ubonowo, onyụn̄ eti nnyịn nte ẹdinamde enyịn̄ esie asana, ye nte ẹdinamde uduak esie—emi esịnede edinyan̄a ubonowo. Etie nte idụhe ntịn̄nnịm ikọ en̄wen ke Bible oro enen̄erede etịn̄ n̄kpọ aban̄a uwa Christ ye se uwa oro anamde nte ntịn̄nnịm ikọ Isaiah 53:3-12. Isaiah ama etịn̄ nte Asan̄autom Jehovah emi edikụtde ukụt onyụn̄ etịn̄ nnennen nnennen nte Christ edikpade, ye mme edidiọn̄ oro n̄kpa esie edidade ọsọk nditọete esie oro ẹyetde aran ye “mme erọn̄ en̄wen.”—John 10:16.
2. Nso ke ntịn̄nnịm ikọ Isaiah owụt, ndien didie ke ntịn̄nnịm ikọ emi editụk nnyịn?
2 Jehovah ama ọnọ Isaiah spirit ndiwet ntịn̄nnịm ikọ n̄kpọ nte isua ikie itiaba mbemiso Jesus edimana, ete ke Asan̄autom oro Imọ imekde ayanam akpanikọ idem ke ini osobode akakan idomo. Emi owụt ọyọhọ mbuọtidem oro Jehovah ekenyenede ke idem Eyen esie. Eyenen̄ede enem nnyịn ndidụn̄ọde ntịn̄nnịm ikọ emi, oyonyụn̄ ọsọn̄ọ mbuọtidem nnyịn n̄ko.
‘Ẹsịn Enye ke Ndek Inyụn̄ Ibatke Enye ke Owo’
3. Ntak emi mme Jew ẹkpekedarade Jesus-e, edi didie ke mmọ ẹkenam n̄kpọ ye enye?
3 Kot Isaiah 53:3. Kam kere utọ n̄waidem oro ikpọn̄-ikpọn̄ edibon Eyen Abasi akanamde ndikpọn̄ Ete esie ke heaven ndi isọn̄ ndinọ uwem esie nte uwa man anyan̄a ubonowo osio ke idiọkn̄kpọ ye n̄kpa! (Phil. 2:5-8) Enye akawa uwem esie man ẹfen mme idiọkn̄kpọ owo, kpa se uwa unam oro ẹkesiwade ke Ibet Moses ẹkedade ẹban̄a. (Heb. 10:1-4) Nte ikpakanaha ubonowo ẹdara enye, akpan akpan mme Jew oro ẹketiede-tie ẹbet Messiah oro ẹken̄wọn̄ọde? (John 6:14) Edi mme Jew ẹkekam “ẹsịn enye ke ndek” kpa nte Isaiah ọkọdọhọde, “inyụn̄ ibatke enye ke owo.” Apostle John ekewet ete: “Enye ama aka obio emana esie, edi mbon esie idarake enye.” (John 1:11) Apostle Peter ọkọdọhọ mme Jew ete: “Abasi mme ete ete nnyịn, amada ubọn̄ ọnọ Asan̄autom esie, Jesus, emi mbufo, ke akpanikọ, ẹkedade ẹnọ ẹnyụn̄ ẹkan̄de ke iso Pilate, ke ini enye ekebierede ndisana enye nyak. Ih, mbufo ẹma ẹkan̄ edisana ye edinen owo oro.”—Utom 3:13, 14.
4. Didie ke Jesus ekemehe ye udọn̄ọ?
4 Isaiah ama etịn̄ n̄ko ke Jesus ‘eyemehe ye udọn̄ọ.’ (NW) Ke ini Jesus okodude ke isọn̄, enye ama esikpa mba ndusụk ini, edi n̄kpọ ndomokiet idụhe ndiwụt ke enye ama ọdọn̄ọ. (John 4:6) Nte ededi, ama emehe enye ndikụt mbon oro ẹdọn̄ọde ke ini enye ọkwọrọde ikọ. Mbọm mmọ ama anam enye, enye onyụn̄ ọkọk ediwak mmọ udọn̄ọ. (Mark 1:32-34) Jesus ama osu ntịn̄nnịm ikọ emi: “Ke akpanikọ edi mfụhọ nnyịn ke enye akada, edi ubiak nnyịn ke enye okobiom.”—Isa. 53:4a; Matt. 8:16, 17.
“Ise Ite ke Abasi Ọkọtọ Enye”
5. Didie ke ediwak mme Jew ẹkeda n̄kpa Jesus, ndien ntak emi ọkọdiọn̄de-diọn̄ otụhọde enye?
5 Kot Isaiah 53:4b. Ediwak mbon eyo Jesus ikọfiọkke ntak emi enye okokụtde ndutụhọ onyụn̄ akpa. Mmọ ẹkekere ke Abasi akamia enye ufen. (Matt. 27:38-44) Mme Jew ẹkedọhọ ke Jesus osụn̄i Abasi. (Mark 14:61-64; John 10:33) Jesus ikedịghe anamidiọk ikonyụn̄ isụn̄ike Abasi. Edi ke ntak akwa ima oro enye amade Ete esie, ke ini enye eketiede ekere nte imọ idikpade nte owo emi ẹdọhọde ke osụn̄i Abasi, oro ama enen̄ede otụhọde Asan̄autom Jehovah emi. Kpa ye oro, enye ama enyịme uduak Jehovah ada itie.—Matt. 26:39.
6, 7. Didie ke Jehovah ‘akanuak’ anam-akpanikọ Asan̄autom esie, ndien ntak emi akadatde Abasi esịt-e?
6 Ekeme ndidi ikpaha nnyịn idem ke ini ntịn̄nnịm ikọ Isaiah ọdọhọde ke mme owo ‘ẹkese ẹte ke Abasi ọtọ’ Jesus udọn̄ọ, edi ekeme ndikpa nnyịn idem ndikop Isaiah ọdọhọde ke “Jehovah ama enye ndinuak.” (Isa. 53:10) Sia edide Jehovah ke idemesie ọkọdọhọ ete: “Se owo mi, . . . se edimek owo mi emi adatde mi esịt,” Jehovah ndien akpasan̄a didie “ama enye ndinuak,” oro edi, okop inemesịt ndiyak enye okụt ukụt? (Isa. 42:1) Didie ke emi akadat Jehovah esịt?
7 Man ntịn̄nnịm ikọ emi an̄wan̄a nnyịn, akpana iti ke ini Satan ọkọdọhọde ke Jehovah idotke ndikara ekondo, ke enye n̄ko ama anam ẹtọn̄ọ ndiyịk m̀mê asan̄autom Jehovah ekededi ke heaven ye ke isọn̄ ọyọsọn̄ọ ada anam n̄kpọ Jehovah. (Job 1:9-11; 2:3-5) Jesus ndikọsọn̄ọ nda tutu esịm n̄kpa ama enen̄ede owụt ke owo ekeme ndisọn̄ọ nda nnam n̄kpọ Abasi. Ntre, okposụkedi emi Jehovah akayakde mme asua ẹwot Christ, eyịghe idụhe nte ke ama enen̄ede abiak Jehovah ndikụt nte ẹwotde edimek Asan̄autom esie. Edi ke ini enye okụtde Eyen esie enen̄erede ọsọn̄ọ ada, emi ama adat enye esịt etieti. (N̄ke. 27:11) Ke adianade do, ndifiọk se n̄kpa Eyen esie edinamde ọnọ mbon oro ẹkabarede esịt ama enen̄ede adat Jehovah esịt.—Luke 15:7.
‘Ẹkenọ Enye Unan ke Ntak Idiọk Ido Nnyịn’
8, 9. (a) Didie ke ẹkenọ Jesus ‘unan ke ntak idiọk ido nnyịn’? (b) Didie ke Peter ọkọsọn̄ọ emi?
8 Kot Isaiah 53:6. Nte erọn̄ oro osopde usụn̄ oyomde eke edinyan̄ade imọ, ubonowo ke ẹyo ẹyom eke edinyan̄ade mmimọ isio ke idiọkn̄kpọ ye n̄kpa oro ikadade ito Adam. (1 Pet. 2:25) Sia kpukpru nnyịn idide mme anana-mfọnmma owo, idụhe eyen Adam ndomokiet oro ekemede ndifiak nnọ owo se Adam ọkọduọkde. (Ps. 49:7) Nte ededi, ke ntak akwa ima esie, “Jehovah ada idiọk ido nnyịn kpukpru odori [Eyen esie] ke idem.” Christ ama obiom mme idiọkn̄kpọ nnyịn ke eto onyụn̄ akpa ke ibuot nnyịn ke ndinyịme ẹnọ imọ unan ke ntak idiọkido nnyịn, nnyụn̄ nyak ẹnuak imọ ke ntak mme ukwan̄n̄kpọ nnyịn.
9 Apostle Peter ekewet ete: “Ẹkekot mbufo kaban̄a ntak emi, koro Christ ama akam okụt ukụt kaban̄a mbufo, ọkpọn̄de uwụtn̄kpọ enịm ọnọ mbufo man ẹtiene nde ikpat esie ketket. Enye ke idemesie okobiom mme idiọkn̄kpọ nnyịn ke eto, man nnyịn ikeme ndibọhọ idiọkn̄kpọ inyụn̄ idu uwem edinen ido.” Ekem Peter ama okot oto ntịn̄nnịm ikọ Isaiah ete: “Ndien ‘ẹma ẹkọk mbufo udọn̄ọ ebe ke mme nde unan esie.’” (1 Pet. 2:21, 24; Isa. 53:5) Emi ama anam mme anamidiọk ẹkabade ẹtie ke emem ye Abasi, nte Peter akade iso ọdọhọ ete: “Christ akakam akpa ini kiet kpọt kaban̄a mme idiọkn̄kpọ, edinen owo ke ibuot mmọ eke mînenke, man enye akpada mbufo ọsọk Abasi.”—1 Pet. 3:18.
“Ẹda Enye nte Eyen-Erọn̄ Ẹka, Ẹte Ẹkewot”
10. (a) John Andinịm Owo Baptism okokot Jesus didie? (b) Ntak emi enyịn̄ oro John okokotde Jesus okodotde?
10 Kot Isaiah 53:7, 8. John Andinịm Owo Baptism ọkọdọhọ ke ini okokụtde Jesus asan̄ade edi ete: “Sese, Eyenerọn̄ Abasi oro emende mme idiọkn̄kpọ ererimbot efep!” (John 1:29) Enyene ndidi se idude ke Isaiah 53:7 akanam John okot Jesus Eyenerọn̄. Itien̄wed oro okot ete: “Ẹda enye nte eyen-erọn̄ ẹka, ẹte ẹkewot.” Isaiah ọkọdọhọ ke “enye [akan̄wan̄a] ukpọn̄ esiemmọ ọnọ n̄kpa.” (Isa. 53:12) N̄ko-n̄ko, ke okoneyo oro Jesus ọkọtọn̄ọde Editi n̄kpa esie, enye ama ọnọ mme anam-akpanikọ apostle esie 11 wine ke cup onyụn̄ ọdọhọ ete: “Emi ada aban̄a ‘iyịp ediomi’ mi, emi ẹdiduọkde kaban̄a ediwak owo man ẹfen mme idiọkn̄kpọ.”—Matt. 26:28.
11, 12. (a) Isaac ndikenyịme ẹwa imọ owụt nso aban̄a uwa Christ? (b) Nso ke ikpeti iban̄a Akamba Abraham, Jehovah, ke ini idụkde Editi?
11 Jesus ama enyịme ẹwa imọ man uduak Jehovah ada itie kpa nte Isaac ekenyịmede ẹwa imọ. (Gen. 22:1, 2, 9-13; Heb. 10:5-10) Okposụkedi emi edide Isaac ekenyịme ẹwa imọ, owo emi akakam oyomde ndiwa uwa oro ekedi Abraham ete esie. (Heb. 11:17) Kpasụk ntre, Jesus ama enyịme ndikpa, edi Jehovah akam edi Owo emi akanamde ndutịm ufak oro. Uwa Eyen esie okowụt ke enye enen̄ede ama ubonowo.
12 Jesus ke idemesie ọkọdọhọ ete: “Abasi ama enen̄ede ama ererimbot tutu enye ọnọ ikpọn̄-ikpọn̄ edibon Eyen esie, man owo ekededi eke ọbuọtde idem ye enye okûtak edi enyene nsinsi uwem.” (John 3:16) Apostle Paul ekewet ete: “Abasi owụt ima eke enye amade nnyịn ke emi Christ akakpade ke ibuot nnyịn ke adan̄aemi nnyịn isụk idide mme anamidiọk.” (Rome 5:8) Mmọdo, ke adan̄aemi ikponode Christ ke nditi n̄kpa esie, ikpanaha ifre ke enye emi akakam anamde ndutịm ufak oro edi Akwa Abraham, Jehovah. Nnyịn isidụk Editi man ikọm enye.
Asan̄autom Emi “Anam Ikọ Asana Ediwak Owo”
13, 14. Didie ke Asan̄autom Jehovah anam “ikọ asana ediwak owo”?
13 Kot Isaiah 53:11, 12. Kop se Jehovah eketịn̄de mi aban̄a Asan̄autom esie: ‘Edinen owo mi ayanam ikọ asana ediwak owo.’ Didie? Utịt utịt ufan̄ikọ 12 anam ifiọk ibọrọ mbụme emi. Enye okot ete: “[Asan̄autom mi] oyonyụn̄ anam n̄kpeubọk ọnọ mme anam-idiọk.” Kpukpru nditọ Adam ẹkedada idiọkn̄kpọ ẹmana, ke ntre, akana mmọ ẹbọ “n̄kpọ eyenutom idiọkn̄kpọ,” oro edi, n̄kpa. (Rome 5:12; 6:23) Ntak edi oro okoyomde ẹnam n̄kpọ man mme anamidiọk ẹfiak ẹdidu ke emem ye Jehovah. Isaiah 53 etịn̄ ediye ediye nte Jesus ‘anamde n̄kpeubọk ọnọ mme anam-idiọk,’ ete: “Ufen odoro enye ke idem man nnyịn ikụt emem; ndien inia esie ọkọk nnyịn.”—Isa. 53:5.
14 Ke ndinyịme ndibiom mme idiọkn̄kpọ nnyịn nnyụn̄ n̄kpa ke ibuot nnyịn, Christ “anam ikọ asana ediwak owo.” Paul ekewet ete: “Abasi ama okụt ete ọfọn ofụri uyọhọ ndidụn̄ enye [Christ] ke idem, nnyụn̄ nda enye nnam kpukpru n̄kpọ eken ẹfiak ẹdidu ke emem ye enye ebe ke ndida iyịp oro enye ọkọduọkde ke eto ndutụhọ nnam emem, ye mmọ ẹdide mme n̄kpọ eke ẹdude ke isọn̄ m̀mê mme n̄kpọ eke ẹdude ke heaven.”—Col. 1:19, 20.
15. (a) Mmanie ẹdi “mme n̄kpọ eke ẹdude ke heaven” emi Paul eketịn̄de aban̄a? (b) Mmanie kpọt ẹdot ndita uyo nnyụn̄ n̄n̄wọn̄ wine Editi, ndien ntak-a?
15 Mme Christian oro ẹyetde aran, oro ẹditienede Christ ikara ke heaven ẹdi “mme n̄kpọ eke ẹdude ke heaven” oro iyịp Christ anamde mmọ ẹdu ke emem ye Jehovah. Ẹbat mme Christian oro ẹdide “mme andibuana ke ikot eke heaven” ‘nte ndinen owo oro ẹdotde ndinyene uwem.’ (Heb. 3:1; Rom. 5:1, 18) Jehovah ada mmọ nte nditọ esie eke spirit. Edisana spirit etie ntiense nte ke mmọ ẹdi mme ‘anditiene Christ nnyene udeme,’ emi ẹmekde ẹte ẹdidi ndidem ye mme oku ke Obio Ubọn̄ heaven. (Rome 8:15-17; Edi. 5:9, 10) Mmọ ẹkabade ẹdi Israel eke spirit, m̀mê “Israel Abasi,” ẹnyụn̄ ẹda mmọ ẹsịn ke “obufa ediomi.” (Jer. 31:31-34; Gal. 6:16) Nte mbon obufa ediomi, mmọ ẹnyene unen ndita uyo nnyụn̄ n̄n̄wọn̄ wine Editi, emi Jesus ọkọdọhọde ete: “Cup emi ada aban̄a obufa ediomi eke ebede ke iyịp mi, emi ẹdiduọkde kaban̄a mbufo.”—Luke 22:20.
16. Nso idi “mme n̄kpọ eke ẹdude ke isọn̄,” ndien didie ke ẹnam ikọ asana mmọ?
16 Mme erọn̄ en̄wen emi ẹnyenede idotenyịn ẹdidụn̄ ke nsinsi ke isọn̄ ẹdi “mme n̄kpọ eke ẹdude ke isọn̄.” Mmọ ke edimek Asan̄autom Jehovah anam ikọ asana ke iso Jehovah. Jehovah abat mmọ nte ndinen owo sia “mmọ ẹmeyet ekụra mmọ ẹnam afia ke iyịp Eyenerọn̄,” oro edi, ke mmọ ẹbuọt idem ke uwa ufak Christ; edi emi iwọrọke ke Jehovah abat mmọ nte nditọ esie eke spirit, edi abat mmọ nte mme ufan esie, onyụn̄ ọnọ mmọ utịbe utịbe idotenyịn edibọhọ “akwa ukụt.” (Edi. 7:9, 10, 14; Jas. 2:23) Sia mme erọn̄ en̄wen mîdụhe ke obufa ediomi, mînyụn̄ inyeneke idotenyịn edika heaven, mmọ isitaha uyo inyụn̄ in̄wọn̄ wine Editi, edi ẹsitie ukpono ukpono ẹse.
Ekọm ye Itoro Ẹnyene Jehovah ye Asan̄autom Esie Oro Enye Amade!
17. Didie ke ntịn̄nnịm ikọ Isaiah oro aban̄ade Asan̄autom Abasi etịm nnyịn idem ọnọ Editi?
17 Ndụn̄ọde oro inamde mi ke ntịn̄nnịm ikọ Isaiah iban̄a Asan̄autom Abasi enen̄ede etịm nnyịn idem ọnọ Editi n̄kpa Christ. Enye anam nnyịn “[iwụk] enyịn ise Jesus, Akpan Isụn̄utom ye Andinam mbuọtidem nnyịn ọfọn ama.” (Heb. 12:2) Nnyịn imekpep nte ke Eyen Abasi isọn̄ke ibuot. Enye itiehe nte Satan, edi amama Jehovah ekpep imọ n̄kpọ, onyụn̄ ọfiọk ke Jehovah edi Ọbọn̄ Andikara ekondo. Nnyịn imokụt ke ini Jesus ọkọkwọrọde ikọ ke isọn̄, ke enye ama esitua mbon oro enye ọkọkwọrọde ikọ ọnọ, mbọm, ọkọk ediwak mmọ udọn̄ọ, onyụn̄ anam mmọ ẹtie ke emem ye Abasi. Enye okowụt se imọ idinamde ke ini ididide Edidem Obio Ubọn̄ Messiah ke obufa editịm n̄kpọ, emi imọ ‘idinamde edinen ikpe odu ke ererimbot.’ (Isa. 42:4) Ifịk oro enye akadade ọkwọrọ Obio Ubọn̄, nte “un̄wana mme idụt,” anam mme anditiene enye ẹfiọk ke akpana ikwọrọ eti mbụk ifịk ifịk ke ofụri isọn̄.—Isa. 42:6.
18. Ntak emi ntịn̄nnịm ikọ Isaiah anamde nnyịn ikọm Jehovah ye anam-akpanikọ Asan̄autom esie?
18 Ntịn̄nnịm ikọ Isaiah anam nnyịn inen̄ede ifiọk akwa n̄waidem oro Jehovah akanamde ke ndikọnọ edima Eyen esie edi isọn̄ edibọ ufen onyụn̄ akpa ke ibuot nnyịn. Okposụkedi emi esịt mîkenemke Jehovah ndikụt nte Eyen esie ọbọde ufen, esịt ama enem enye ndikụt Jesus enen̄erede ọsọn̄ọ ada tutu esịm n̄kpa. Akpana nnyịn itiene Jehovah idat esịt, ikụt ofụri se Jesus akanamde man owụt ke Satan edi osu nsu, anam enyịn̄ Jehovah asana, onyụn̄ owụt ke enye odot ndikara ekondo. Ke adianade do, Christ ama emen idiọkn̄kpọ nnyịn obiom onyụn̄ akpa ke ibuot nnyịn. Emi anam ekpri otuerọn̄ oro ẹyetde aran ye mme erọn̄ en̄wen ẹkeme ndinyene eti idaha ke iso Jehovah. Nte nnyịn idisopde idem iti n̄kpa Christ, nnyịn ikpakam inen̄ede ikọm Jehovah ye anam-akpanikọ Asan̄autom esie.
Ndụn̄ọde
• Didie ke Jehovah ‘akama ndinuak’ Eyen esie?
• Didie ke ẹkenọ Jesus ‘unan ke ntak mme idiọk ido nnyịn’?
• Didie ke Asan̄autom Jehovah akanam “ikọ asana ediwak owo”?
• Didie ke ntịn̄nnịm ikọ Isaiah oro aban̄ade Asan̄autom Abasi etịm nnyịn idem ọnọ Editi?
[Ndise ke page 26]
“Ẹsịn enye ke ndek, nnyịn inyụn̄ ibatke enye ke owo”
[Ndise ke page 28]
‘Enye akan̄wan̄a ukpọn̄ esiemmọ ọnọ n̄kpa’
[Ndise ke page 29]
Mme “erọn̄ en̄wen” isitaha uyo inyụn̄ in̄wọn̄ wine Editi, edi ẹsitie ukpono ukpono ẹse