‘Mbufo Ẹma Akpanikọ ye Emem’!

“Uyo Jehovah mme udịm osịm mi, ete. . . . Mbufo ẹma . . . akpanikọ ye emem.”—ZECHARIAH 8:18, 19.

1, 2. (a) Nso idi mbụk ubonowo adan̄a nte emem abuanade? (b) Ntak emi ererimbot emi odude kemi mîdikwe ata emem tutu amama?

“AKANANAM ererimbot inyeneke emem. Ke ebiet kiet—ndien ekese ini ke ediwak ebiet ke ukem ini—ekọn̄ esin̄wana kpukpru ini.” Ntre ke Prọfesọ Milton Mayer eke Ufọkn̄wed Ntaifiọk Massachusetts, U.S.A. ọkọdọhọ. Nso mfụhọ mfụhọ ikọ ke ẹtịn̄ ntem ẹban̄a ubonowo! Edi akpanikọ, mme owo ẹyom emem. Mme ebre mbre ukara ẹmedomo kpukpru orụk usụn̄ ndimụm enye n̄kama, ọtọn̄ọde ke Pax Romana eke eyo Rome tutu osịm edinam “Idotenyịn Nsobo Edem Mbiba” ke ini En̄wan Ukaraidem. Nte ededi, ke akpatre ofụri ukeme mmọ ama okpu. Nte Isaiah eketịn̄de ke ediwak isua ikie ẹmi ẹkebede, ‘mme isụn̄utom emem ẹmetua eyet eti.’ (Isaiah 33:7) Ntak edide ntre?

² Emi edi koro emem oro ebịghide enyene ndiwọrọ nto unana usua ye idiọkitọn̄; ana enye ọkọn̄ọ ke akpanikọ. Emem ikemeke ndikọn̄ọ ke nsu. Ntak edi oro Jehovah ke ini ọkọn̄wọn̄ọde edifiak ntan̄ mbok ye emem ọnọ Israel eset ọkọdọhọde ete: “Sese, ami mmọn̄ nnyanade emem nnọ enye nte akpa mmọn̄, ye ubọn̄ mme idụt nte idịm mmọn̄ eke ọyọhọde ada mben.” (Isaiah 66:12) Abasi eyo emi, Satan kpa Devil, edi “owotowo,” ofụnobom, ye “osu nsu, ye ete nsu.” (John 8:44; 2 Corinth 4:4) Didie ke ererimbot emi enyenede utọ abasi oro ekeme ndinyene emem tutu amama?

3. Nso n̄wọrọnda enọ ke Jehovah ọnọ ikọt esie, kpa ye mmọ ẹdude uwem ke ererimbot oro odude ke ndutịme?

³ Nte ededi, ke edide n̄wọrọnda, Jehovah ọnọ ikọt esie emem idem ke adan̄aemi mmọ ẹdude uwem ke ererimbot Satan emi ekọn̄ abaharede. (John 17:16) Ke ọyọhọ isua ikie itiokiet M.E.N., enye ama osu un̄wọn̄ọ oro enye ọkọn̄wọn̄ọde ebe ke Jeremiah onyụn̄ ọnọ san̄asan̄a idụt esie “emem ye akpanikọ” ke ini enye akafiakde atan̄ mmọ obok ke isọn̄ emana mmọ. (Jeremiah 33:6) Ndien ke ukperedem ini emi, enye ọnọ ikọt esie “emem ye akpanikọ” ke “idụt,” m̀mê idaha eke spirit eke isọn̄ mmọ, idem okposụkedi mmọ ẹdude uwem ke ndiọkn̄kan ini afanikọn̄ oro ererimbot emi akanam okụtde tutu osịm emi. (Isaiah 66:8; Matthew 24:7-13; Ediyarade 6:1-8) Nte nnyịn ikade iso ke nneme nnyịn ke Zechariah ibuot 8, nnyịn iyenen̄ede ikụt emem ye akpanikọ emi Abasi ọnọde mi inyụn̄ ikụt se inyenede ndinam man imụm udeme nnyịn ke enye ikama.

“Yak Ubọk Ẹsọn̄ Mbufo”

4. Zechariah ekesịn udọn̄ ọnọ Israel ete ẹnam n̄kpọ didie edieke mmọ ẹkeyomde ndinyene emem?

⁴ Nte ọyọhọ utịm ikotiokiet ke Zechariah ibuot 8, nnyịn imokop aduai-owo-idem ikọ otode Jehovah: “Ntem ke Jehovah mme udịm ọdọhọ, ete, Yak ubọk ẹsọn̄ mbufo ẹmi ke mme usen ẹmi ẹdikopde ikọ ẹmi ke inua mme prophet oro ẹkedude ke usen oro ẹketọn̄ọde ndibọp ufọk Jehovah mme udịm, kpa temple, man ẹdiọn̄ enye. Koro ke mîka-ikemke kan̄a ke mme usen oro, n̄kpọ eyenutom owo ikodụhe, n̄kpọ eyenutom unam ikonyụn̄ idụhe; nnanenyịn oro ikonyụn̄ iyakke baba owo kiet eke odụkde onyụn̄ ọwọrọde, okụt ifụre: ndien ndọn̄ kpukpru owo, nte ẹn̄wana kiet ye kiet.”—Zechariah 8:9, 10.

5, 6. (a) Ke ntak mmemidem nditọ Israel, nso idaha ikodu ke Israel? (b) Nso ukpụhọde ke Jehovah ọkọn̄wọn̄ọ ọnọ Israel edieke enye onịmde utuakibuot esie akpa?

⁵ Zechariah eketịn̄ ikọ ẹmi ke ini ẹkesụk ẹbọpde Jerusalem. Mbemiso oro, nditọ Israel ẹmi ẹketode Babylon ẹnyọn̄ ẹma ẹkop mmemidem ẹnyụn̄ ẹtre utom edibọp temple. Sia mmọ ẹkewọn̄ọde ntịn̄enyịn mmọ ẹnọ ndọn̄esịt idemmọ, mmọ ikenyeneke edidiọn̄ ikonyụn̄ inyeneke emem otode Jehovah. Idem okposụkedi mmọ ẹkefụn̄de isọn̄ mmọ ẹnyụn̄ ẹsede ẹban̄a in̄wan̄ vine mmọ, mmọ ikoforoke. (Haggai 1:3-6) Eketie nte n̄kpọ eke mmọ ẹkenamde utom ye unana “n̄kpọ eyenutom.”

⁶ Kemi ẹma ẹkefiak ẹbọp temple mi, Zechariah ama esịn udọn̄ ọnọ mme Jew ete ‘ẹsọn̄ ubọk,’ ẹnịm utuakibuot Jehovah akpa ye uko. Nso ikotịbe edieke mmọ ẹkenamde ntre? “Kemi ami ndinamke ye mbio ẹmi ẹsụkde, nte emi n̄kanamde ke akpa ini: emi edi uyo Jehovah mme udịm. Koro n̄kpasịp [“mfri emem,” NW] eyetọt; vine eyenọ mfri esie, isọn̄ eyenyụn̄ ọnọ mbun̄wụm esie, ikpaenyọn̄ eyenyụn̄ ọnọ mbara esie; ndien nyenam mbio ẹmi ẹsụhọde ẹda kpukpru n̄kpọ ẹmi ẹnyene. Ndien ama ekem, kpa nte mbufo ẹkedide n̄kpọ isụn̄i ke otu mme idụt, O ufọk Judah, ye ufọk Israel: kpa ntre ke ndinyan̄a mbufo, ndien mbufo ẹyekabade ẹdi n̄kpọ edidiọn̄. Mbufo ẹkûfehe ndịk: yak ubọk mbufo ẹsọn̄ọ.” (Zechariah 8:11-14a) Edieke Israel akanamde n̄kpọ ye ubiere, enye ama oforo. Ke mbemiso, ke ini mme idụt ẹkeyomde ndinọ uwụtn̄kpọ mban̄a ufen, mmọ ẹma ẹkeme ndinyan ubọk n̄wụt Israel. Idahaemi Israel ekedi uwụtn̄kpọ edidiọn̄. Nso ata eti ntak ‘mmọ ndisọn̄ ubọk’!

7. (a) Mme ukpụhọde ewe ẹmi ẹduaide owo idem ke ikọt Jehovah ẹkenyene, emi ẹkekụrede ke isua utom 1995? (b) Ke esede ibatutom isua, ewe idụt ke afo okụt nte ẹnyenede n̄wọrọnda ibatutom ke mme asuanetop, mme asiakusụn̄, ibat hour ke ẹbaharede ukem ukem?

⁷ Nso kaban̄a mfịn? Ọfọn, ke mme isua oro ẹkebemde 1919 iso, ikọt Jehovah ẹma ẹnana ifịk ke ndusụk udomo. Mmọ ikenen̄ekede ida san̄asan̄a ke akpa ekọn̄ ererimbot, ndien mmọ ẹma ẹnyene ntụhọ editiene owo utu ke nditiene Edidem mmọ, Jesus Christ. Nte utịp, ndusụk owo ẹma ẹkop mmemidem ẹto mfịghe oro okotode esịt esop ye an̄wa. Ekem, ke 1919, ye un̄wam Jehovah mmọ ẹma ẹsọn̄ ubọk. (Zechariah 4:6) Jehovah ama ọnọ mmọ emem, ndien mmọ ẹma ẹforo akamba akamba. Ẹkụt emi ke mbụk mmọ eke isua 75 ẹmi ẹkebede, ẹmi ẹkụrede ke isua utom 1995. Nte ikọt, Mme Ntiense Jehovah ẹsọn ufreidụt, ufre ekpụk, asari, ye kpukpru n̄kpọ eken oro ẹdide ntak usua. (1 John 3:14-18) Mmọ ẹnam n̄kpọ Jehovah ye ata ifịk ke temple esie eke spirit. (Mme Hebrew 13:15; Ediyarade 7:15) Isua oko ikpọn̄, mmọ ẹma ẹbiat se ibede biliọn hour kiet ke ndineme ye mbon efen mban̄a Ete mmọ eke heaven! Ke ọfiọn̄ kiet kiet, mmọ ẹma ẹnịm ukpepn̄kpọ Bible 4,865,060. Owo 663,521 ẹkebuana ke utom usiakusụn̄ ke ọfiọn̄ kiet kiet ke ẹbaharede ukem ukem. Ke ini mme asan̄autom Christendom ẹyomde ndinọ uwụtn̄kpọ mban̄a mme owo oro ẹnen̄erede ẹnyene ifiopesịt ke utuakibuot mmọ, mmọ ndusụk ini ẹsinyan ubọk ẹwụt Mme Ntiense Jehovah.

8. Didie ke Christian kiet kiet ekeme ndibọ ufọn nto “mfri emem”?

⁸ Ke ntak ifịk mmọ, Jehovah ọnọ ikọt esie “mfri emem.” Owo kiet kiet oro ọtọde mfri oro eyekụt emem ọkọride ke esịt esie ye ke uwem esie. Kpukpru Christian oro onịmde ke akpanikọ oro ebịnede emem ye Jehovah ye ekemmọ mme Christian abuana ke akpanikọ ye emem ikọt enyịn̄ Jehovah. (1 Peter 3:11; men James 3:18 domo.) Nte oro idịghe utịben̄kpọ?

“Mbufo Ẹkûfehe Ndịk”

9. Nso ukpụhọde ke mme edinam esie ye ikọt esie ke Jehovah ọkọn̄wọn̄ọ?

⁹ Idahaemi nnyịn imọn̄ ikot ọyọhọ ikọ itiaba otode Jehovah. Nso ke enye edi? “Ntem ke Jehovah mme udịm ọdọhọ, ete, Kpa nte n̄kerede ndinam idiọk ye mbufo ke ini mme ete mbufo ẹkeyatde mi esịt, Jehovah mme udịm ọdọhọ, ndien ntuaha n̄kpọfiọk: kpasụk ntre ke n̄kekere ke ini emi ndifọn ido ye Jerusalem ye ufọk Judah. Mbufo ẹkûfehe ndịk.”—Zechariah 8:14, 15.

10. Nso mbụk aban̄ade Mme Ntiense Jehovah owụt ke mmọ ifeheke ndịk?

¹⁰ Idem okposụkedi ẹkesuande ikọt Jehovah ke usụn̄ifiọk eke spirit ke ini akpa ekọn̄ ererimbot, ke esịt mmọ mmọ ẹkeyom ndinam se inende. Ntem, Jehovah, ke ama ọkọnọ ndusụk ntụnọ, ama okpụhọ usụn̄ emi enye akanamde n̄kpọ ye mmọ. (Malachi 3:2-4) Mfịn, nnyịn imafiak ise edem inyụn̄ ikọm enye ke ofụri esịt iban̄a se enye akanamde. Edi akpanikọ, ‘mme idụt ẹsua’ nnyịn. (Matthew 24:9) Ẹmedọn̄ ediwak ke ufọk-n̄kpọkọbi, ndien ndusụk owo ẹma ẹkam ẹkpan̄a ke ntak mbuọtidem mmọ. Nnyịn imesiwak ndisobo unana udọn̄ ye nsọn̄ido. Edi nnyịn ifeheke ndịk. Nnyịn imọfiọk ite ke Jehovah okop odudu akan ubiọn̄ọ ekededi, oro ẹkụtde ke enyịn m̀mê oro enyịn mîkwe. (Isaiah 40:15; Ephesus 6:10-13) Nnyịn iditreke ndinam ikọ ẹmi: “Bet Jehovah: sọn̄ idem, ndien enye eyesọn̄ fi esịt.”—Psalm 27:14.

“Ẹtịn̄ Akpanikọ Kiet ye Kiet”

11, 12. Nso ke nnyịn owo kiet kiet ikpenyene ke ekikere edieke nnyịn iyomde ndibuana ọyọhọ ọyọhọ ke mme edidiọn̄ oro Jehovah ọnọde ikọt esie?

¹¹ Man ẹbuana ọyọhọ ọyọhọ ke mme edidiọn̄ ẹtode Jehovah, mme n̄kpọ ẹdu oro nnyịn inyenede nditi. Zechariah ọdọhọ ete: “Mme mmọemi ẹdi n̄kpọ eke mbufo ẹdinamde: ẹtịn̄ akpanikọ kiet ye kiet; ẹnyụn̄ ẹkpe ikpe akpanikọ ye emem ke inuaotop mbufo: mbufo ẹkûnyụn̄ ẹkere idiọk kiet ye kiet, ke esịt mbufo; ẹkûnyụn̄ ẹma un̄wọn̄ọ nsu: koro kpukpru n̄kpọ ẹmi ẹdi se ami nsuade, Jehovah ọdọhọ.”—Zechariah 8:16, 17.

¹² Jehovah akpak nnyịn ete itịn̄ akpanikọ. (Ephesus 4:15, 25) Enye ikopke akam mbon oro ẹkerede idiọk, ẹdịpde akpanikọ ke ntak ọkpọkpọ udori, m̀mê ẹn̄wọn̄ọde un̄wọn̄ọ nsu. (Mme N̄ke 28:9) Sia enye asuade nsọn̄ibuot, enye oyom nnyịn isọn̄ọ iyịre ke akpanikọ Bible. (Psalm 25:5; 2 John 9-11) N̄ko-n̄ko, ukem nte nyobiowo ke inuaotop Israel, mbiowo oro ẹkpede ikpe ẹkpenyene ndikọn̄ item ye ubiere mmọ ke akpanikọ Bible, idịghe ke ekikere idemowo. (John 17:17) Jehovah oyom mmọ ẹkpe “ikpe akpanikọ,” ẹdomode, nte mme ekpemerọn̄ Christian, ndifiak nsịn emem ke ufọt mme owo oro ẹtọhọde ẹnyụn̄ ẹn̄wam mme anamidiọk oro ẹkabarede esịt ẹfiak ẹnyene emem ye Abasi. (James 5:14, 15; Jude 23) Ke ukem ini oro, mmọ ẹkpeme emem esop, ẹsiode mbon oro ẹtịmerede emem oro ebe ke ndikokoi n̄kọbọ ke idiọk edinam, ẹfep uko uko.—1 Corinth 6:9, 10.

“Idara ye Mbre”

13. (a) Nso ukpụhọde kaban̄a utre udia ke Zechariah eketịn̄ ke prọfesi? (b) Nso utre udia ke ẹkenịm ke Israel?

¹³ Idahaemi, nnyịn imọn̄ ikop ọyọhọ uku uku ikọ itiaita: “Ntem ke Jehovah mme udịm ọdọhọ, ete, Utre udia ọyọhọ ọfiọn̄ inan̄, ye utre udia ọfiọn̄ ition, ye utre udia ọfiọn̄ itiaba, ye utre udia ọfiọn̄ duop, ẹyedi ini idara ye mbre ufọk Judah, ye nti usọrọ. Mbufo ẹma ndien akpanikọ ye emem.” (Zechariah 8:19) Ke idak Ibet Moses, nditọ Israel ẹma ẹsitie utre udia ke Usen Usio-Isop ndiwụt mfụhọ mban̄a idiọkn̄kpọ mmọ. (Leviticus 16:29-31) Eyedi ẹkesinịm utre udia inan̄ oro Zechariah eketịn̄de aban̄a man ẹtua ẹban̄a mme n̄kpọntịbe oro ẹkenyenede ebuana ye edikan ye nsobo Jerusalem. (2 Ndidem 25:1-4, 8, 9, 22-26) Idahaemi, nte ededi, ẹma ẹtọn̄ọ ntak ẹbọp temple ẹnyụn̄ ẹfiak ẹdụn̄ọ ke Jerusalem. Ẹma ẹkpụhọ ntuan̄a ẹsịn ke mbre, ndien utre udia ẹmi ẹma ẹkabade ẹdi mme ini usọrọ.

14, 15. (a) Didie ke usọrọ Editi ekedi ntak akwa idara, ndien nso ke emi ekpeti nnyịn aban̄a? (b) Nte ẹkụtde ke ibatutom isua, ewe idụt ẹkenyene n̄wọrọnda ibat mme andidụk Editi?

¹⁴ Mfịn, nnyịn inịmke mme utre udia oro Zechariah eketịn̄de aban̄a m̀mê utre udia oro Ibet etemede. Sia Jesus akawade uwem esie ke ntak idiọkn̄kpọ nnyịn, nnyịn ke idara mme edidiọn̄ Usen Usio-Isop oro okponde akan. Ẹfụk mme idiọkn̄kpọ nnyịn, idịghe sụk ke ekpri usụn̄, edi ọyọhọ ọyọhọ. (Mme Hebrew 9:6-14) Ke nditiene ewụhọ Akwa Oku eke heaven, Jesus Christ, nnyịn inịm Editi n̄kpa esie nte n̄kukụre uku uku usọrọ ke n̄wed usenọfiọn̄ mme Christian. (Luke 22:19, 20) Nte nnyịn ‘isidarake inyụn̄ ibre’ nte nnyịn isopde idem ọtọkiet ke isua ke isua kaban̄a usọrọ oro?

¹⁵ Isua oko, owo 13,147,201 ẹkesop idem ọtọkiet ẹnịm usọrọ Editi oro, adade owo 858,284 awak akan eke 1994. Nso akwa udịmowo! Kere ban̄a idara oro okodude ke esop 78,620 eke Mme Ntiense Jehovah nte akwa ibatowo emi awakde akan nte akanam edide ẹkebụn̄ọde ẹdụk mme Ufọkmbono Obio Ubọn̄ mmọ kaban̄a usọrọ oro. Ke akpanikọ, ama onụk kpukpru owo oro ẹkedụkde ‘ndima akpanikọ ye emem’ nte mmọ ẹketide n̄kpa Enyeemi edide “usụn̄ ye akpanikọ ye uwem” onyụn̄ akarade idahaemi nte akwa “Ọbọn̄ Emem” Jehovah! (John 14:6; Isaiah 9:6) Usọrọ oro ama enen̄ede enyene se ọwọrọde ọnọ mbon oro ẹkenịmde enye ke mme idụt oro ndutịme ye ekọn̄ ẹnọmọde. Ndusụk nditọete nnyịn ẹma ẹsobo ọkpọsọn̄ ndịk oro inua mîkemeke nditịn̄ ke 1995. Edi, ‘emem Abasi, emi ayan̄ade ifiọk owo, ama ekpeme mmọ esịt ye ekikere ke Christ Jesus.’—Philippi 4:7.

‘Ẹyak Nnyịn Ikpe Jehovah Ubọk’

16, 17. Didie ke mme owo ẹtode mme idụt ẹkeme ‘ndikpe Jehovah ubọk’?

¹⁶ Nte ededi, m̀mọ̀n̄ ke ofụri miliọn owo oro ẹkedụkde Editi ẹketo? Ọyọhọ ikọ Jehovah usụkkiet anam an̄wan̄a ete: “Ntem ke Jehovah mme udịm ọdọhọ ete, Ediwak owo ye mme andidụn̄ ediwak mme idụt ẹyesụk ẹdi: ndien mme andidụn̄ obio kiet ẹyeka obio eken, ẹte, Ẹyak nnyịn ikûtre ndika n̄kekpe Jehovah ubọk, ndinyụn̄ nyom Jehovah mme udịm: ami n̄ko nyenyụn̄ n̄ka. Ndien ediwak owo ye n̄kpọsọn̄ mme idụt ẹyedi ndiyom Jehovah mme udịm ke Jerusalem, ndinyụn̄ n̄kpe Jehovah ubọk.”—Zechariah 8:20-22.

¹⁷ Mme owo oro ẹkedụkde Editi ‘ẹkeyom Jehovah mme udịm.’ Ediwak ke otu mmọemi ẹkedi mme asan̄autom esie oro ẹma ẹkeyak idem ẹnọ, ẹna baptism. Ediwak miliọn eken oro ẹkedụkde ikesịmke kan̄a idaha oro. Ke ndusụk idụt mme andidụk Editi ẹma ẹwak utịm ikanan̄ m̀mê ikotion ẹkan ibat mme asuanetop Obio Ubọn̄. Ediwak mbon oro ẹnyenede udọn̄ mi ẹyom un̄wam man ẹka iso ẹnam n̄kọri. Ẹyak nnyịn ikpep mmọ ẹdara ifiọk oro nte ke Jesus akakpa ke ntak mme idiọkn̄kpọ nnyịn ndien ke akara idahaemi ke Obio Ubọn̄ Abasi. (1 Corinth 5:7, 8; Ediyarade 11:15) Ẹnyụn̄ ẹyak nnyịn isịn udọn̄ inọ mmọ ite ẹyak idemmọ ẹnọ Jehovah Abasi ẹnyụn̄ ẹsụk ibuot ẹnọ Edidem oro enye emekde. Ke usụn̄ emi mmọ ‘ẹyekpe Jehovah ubọk.’—Psalm 116:18, 19; Philippi 2:12, 13.

“Owo Duop eke Ẹtode ke Kpukpru Usem Mme Idụt”

18, 19. (a) Ke ndisu Zechariah 8:23, anie mfịn edi “eyen Jew”? (b) Mmanie mfịn ẹdi “owo duop” ẹmi ‘ẹmụmde eyen Jew kiet utọn̄ ọfọn̄idem’?

¹⁸ Ke akpatre ini ke ọyọhọ ibuot itiaita eke Zechariah, nnyịn ikot ite: “Ntem ke Jehovah mme udịm ọdọhọ, ete.” Nso idi akpatre ikọ Jehovah? “Ke mme usen oro ke owo duop eke ẹtode ke kpukpru usem mme idụt ẹdimụm eyen Judah [“Jew,” NW] kiet utọn̄ ọfọn̄idem, ẹte, Ẹyak nnyịn ika ye mbufo: koro nnyịn imokop ite ke Abasi odu ye mbufo.” (Zechariah 8:23) Ke eyo Zechariah, Israel eke obụk ekedi idụt oro Abasi ekemekde. Ke akpa isua ikie, nte ededi, Israel ama esịn Messiah Jehovah. Ntem, Abasi nnyịn ama emek “eyen Jew”—obufa Israel—nte san̄asan̄a ikọt esie, kpa “Israel Abasi” oro mme Jew eke spirit ẹnamde. (Galatia 6:16; John 1:11; Rome 2:28, 29) Akpatre ibat mmọemi ekenyene ndidi owo 144,000, oro ẹmekde ẹto otu ubonowo man ẹkara ye Jesus ke Obio Ubọn̄ esie eke heaven.—Ediyarade 14:1, 4.

¹⁹ N̄wakn̄kan ke otu 144,000 ẹmi ẹma ẹkpakpan̄a ke edinam akpanikọ ẹnyụn̄ ẹkebọ utịp eke heaven mmọ. (1 Corinth 15:51, 52; Ediyarade 6:9-11) Ibat ibat ẹsụhọ ke isọn̄ ndien mmọemi ẹdara ndikụt nte ke “owo duop” oro ẹmekde ndika ye eyen “Jew” ke akpanikọ ẹdi “akwa otuowo . . . eke ẹtode ke kpukpru obio ye esien ye idụt ye usem.”—Ediyarade 7:9; Isaiah 2:2, 3; 60:4-10, 22.

20, 21. Nte utịt ererimbot emi otịmde asan̄a ekpere, didie ke nnyịn ikeme nditie ke emem ye Jehovah?

²⁰ Nte utịt ererimbot emi asan̄ade ekpere nte owo mîkemeke ndifep, Christendom etie nte Jerusalem ke eyo Jeremiah: “Nnyịn idori enyịn ke emem, ndien eti n̄kpọ idụhe: idori enyịn ke ini ukọk, ndien, sese, akwa ndịk!” (Jeremiah 14:20a) Ndịk oro eyesịm ata-utịt ke ini mme idụt ẹdiwọn̄ọde ẹn̄wana ye ido ukpono ẹnyụn̄ ẹda enye ẹkesịm afai afai utịt. Esisịt ini ke oro ebede, mme idụt ke idemmọ ẹyekụt nsobo ke akpatre ekọn̄ Abasi, kpa Armageddon. (Matthew 24:29, 30; Ediyarade 16:14, 16; 17:16-18; 19:11-21) Nso ini ndutịme ke oro edidi ntem!

²¹ Ke ofụri emi, Jehovah eyekpeme mbon oro ẹmade akpanikọ ẹnyụn̄ ẹkọride “mfri emem.” (Zechariah 8:12, NW; Zephaniah 2:3) Ẹyak nnyịn, ndien, idu ke ifụre ke idụt ikọt esie, isịnde ifịk itoro enye an̄wan̄wa inyụn̄ in̄wamde adan̄a ediwak owo nte ikekeme ‘ndikpe Jehovah ubọk.’ Edieke nnyịn inamde ntre, nnyịn iyedara emem Jehovah kpukpru ini. Ih, “Jehovah [eyenọ] ikọt esie odudu; Jehovah eyeda emem ọdiọn̄ ikọt esie.”—Psalm 29:11.

Nte Afo Emekeme Ndinam An̄wan̄a?

◻ Didie ke ikọt Abasi ‘ẹkesọn̄ ubọk’ ke eyo Zechariah? Mfịn?

◻ Nnyịn inam n̄kpọ didie iban̄a ukọbọ, usua, ye unana udọn̄?

◻ Nso ibuana ke nnyịn ‘nditịn̄ akpanikọ kiet ye kiet’?

◻ Didie ke owo ekeme ‘ndikpe Jehovah ubọk’?

◻ Nso akwa ntak idara ke ẹkụt ke edisu oro Zechariah 8:23 osude?

[Ndise ke page 18]

Isua oko, Mme Ntiense Jehovah ẹma ẹbiat hour 1,150,353,444 ke nditịn̄ nnọ mme owo mban̄a Obio Ubọn̄ Abasi