Biọn̄ Utọn̄ ke Ntịn̄nnịm Ikọ Abasi
“Ẹma ẹdọdiọn̄ ẹsọn̄ọ ikọ mme prophet ẹkan ẹnọ nnyịn; ndien mbufo ẹyetịm ẹnam, edieke mbufo ẹdibiọn̄de utọn̄ ke ikọ oro.”—2 PETER 1:19.
1, 2. Mme uwụtn̄kpọ ewe ẹban̄ade nsunsu messiah ke afo ekeme ndinọ?
KE EDIWAK isua ikie, mme nsunsu messiah ẹmedomo nditịn̄ ini iso. Ke ọyọhọ isua ikie ition E.N., owo emi okokotde idemesie Moses ama anam mme Jew ke isuo Crete ẹnịm ke akpanikọ ẹte ke imọ ikedi messiah ye nte ke iyosio mmọ ke ufịk. Ke usen emi ẹkenịmde ẹnọ edisio mmọ ke ufụn, mmọ ẹma ẹtiene enye ẹka n̄kokon̄ ebiet emi akasakde iso ese Inyan̄ Mediterranean. Enye ama ọdọhọ ete ke mmọ n̄kukụre ẹkenyene ndiduọn̄ọ ndụk inyan̄, ndien inyan̄ ayabahade. Ata ediwak owo ẹmi ẹkeduọn̄ọde ẹdụk mmọn̄ emi ẹma ẹkpan̄a, ndien nsunsu messiah oro ama efehe.
2 Ke ọyọhọ isua ikie 12, “messiah” kiet ama ọwọrọ edi ke Yemen. Caliph, m̀mê andikara, ama obụp enye idiọn̄ọ itie-messiah esie. “Messiah” emi ama ọdọhọ ete yak caliph emi anam ẹbịghi imọ ibuot. Enye ama etịn̄ ntịn̄nnịm ikọ ete ke imọ iyọsọp iset ke n̄kpa ndien yak emi edi idiọn̄ọ. Caliph ama enyịme ye ndutịm emi—ndien oro ekedi utịt “messiah” oro.
3. Anie edi ata Messiah, ndien nso ke utom esie okowụt?
3 Mme nsunsu messiah ye mme ntịn̄nnịm ikọ mmọ ẹsikpu ofụri ofụri, edi ndibiọn̄ utọn̄ ke ntịn̄nnịm ikọ Abasi idehede ida ikesịm edikpu. Ata Messiah, Jesus Christ, ekedi odu-uwem andisu ediwak ntịn̄nnịm ikọ Bible. Ke uwụtn̄kpọ, ke okotde oto ntịn̄nnịm ikọ Isaiah, Matthew andiwet Gospel ekewet ete: “Isọn̄ Zebulon ye isọn̄ Naphtali, usụn̄ inyan̄, ke edem Jordan oko, Galilee mme Gentile. Mbio oro ẹketiede ke ekịm ẹkụt akwa un̄wana, ama edi mmọ ẹketiede ke isọn̄ mfụt n̄kpa, un̄wana ayama ọnọ mmọ. Toto ke ini oro Jesus ọtọn̄ọ ndikwọrọ, ndinyụn̄ ndọhọ, ete, Ẹkabade esịt; koro Ubọn̄ Heaven ke ekpere.” (Matthew 4:15-17; Isaiah 9:1, 2) Jesus ekedi “akwa un̄wana” oro, ndien utom esie ama owụt ete ke enye ekedi Prọfet emi Moses ekebemde iso etịn̄ aban̄a. Ẹyesobo mbon ẹmi ẹsịnde ndikpan̄ utọn̄ nnọ Jesus.—Deuteronomy 18:18, 19; Utom 3:22, 23.
4. Didie ke Jesus okosu Isaiah 53:12?
4 Jesus n̄ko ama osu mme ntịn̄nnịm ikọ Isaiah 53:12: “Enye [akan̄wan̄a] ukpọn̄ esiemmọ ọnọ n̄kpa: ẹnyụn̄ [ẹbat] enye ẹsịn ke otu mme anam-idiọk; enye onyụn̄ obiom mme idiọk ido ediwak owo, oyonyụn̄ anam n̄kpeubọk ọnọ mme anam-idiọk.” Ke ọfiọkde ete ibịghike enye ọmọn̄ ọnọ uwem esie eke owo nte ufak, Jesus ama ọsọn̄ọ mbuọtidem mme mbet esie. (Mark 10:45) Enye ama anam emi ke n̄wọrọnda usụn̄ ebe ke edikpụhọde mbiet.
Edikpụhọde Mbiet Ọbọp Mbuọtidem
5. Ke ikọ idemfo, didie ke afo ekpetịn̄ nte edikpụhọde mbiet eketiede?
5 Edikpụhọde mbiet oro ekedi ntịn̄nnịm n̄kpọntịbe. Jesus ọkọdọhọ ete: “Eyen owo ọmọn̄ edidi ke ubọn̄ Ete Esie ye mme angel Esie . . . Ke akpanikọ ke ndọhọ mbufo nte, ndusụk owo ẹdu ke otu mmọ ẹmi ẹdade mi, ẹmi mîditabike n̄kpa, tutu mmọ ẹkụt Eyen Owo edide ndida ubọn̄.” (Matthew 16:27, 28) Nte ndusụk mme apostle ẹma ẹnen̄ede ẹkụt Jesus edide ndida ubọn̄? Matthew 17:1-7 ọdọhọ ete: “Ekem ke usen itiokiet ẹma ẹkebe, Jesus ada Peter, ye James, ye John eyen-eka esie, ọdọk ke akwa obot ke idem mmọ: ndien mbiet Esie okpụhọde ke iso mmọ.” Nso ndyọ ndyọ n̄kpọntịbe ke emi ekedi ntem! “Iso Esie asiaha nte utịn, edisịne-n̄kpọ Esie onyụn̄ akabade afia nte un̄wana. Ndien sese, Moses ye Elijah [ẹbiọn̄ọde] mmọ ke iso ẹneme nneme ye Enye.” N̄ko, “nyayama ikpa-enyọn̄ ofụk mmọ,” ndien mmọ ẹkop uyo Abasi ọdọhọde ete: “Emi edi edima Eyen Mi, emi [nnemde esịt] ye Enye; ẹkop uyo Esie. Ekem ke ini mbet ẹkopde uyo oro mmọ ẹduọn̄ọ ẹkịbi iso ke isọn̄, ndịk onyụn̄ anam mmọ eti eti. Edi Jesus edi editụk mmọ, ete, Ẹdaha ke enyọn̄, ẹkûfehe.”
6. (a) Ntak emi Jesus okokotde edikpụhọde mbiet n̄kukụt? (b) Edikpụhọde mbiet ekedi ntabinse nso?
6 Etie nte enyene-uten̄e n̄kpọntịbe emi akada itie ke kiet ke otu mme ibombom Obot Hermon, emi Jesus ye apostle ita oro ẹkedan̄de ke okoneyo. Nte an̄wan̄ade, edikpụhọde mbiet oro akada itie ke okoneyo, anamde enye etetịm an̄wan̄a. Ntak kiet emi Jesus okokotde enye n̄kukụt ekedi nte ke Moses ye Elijah ẹmi ẹma ẹkekpan̄a ke anyan ini ikodụhe do ke ata ata usụn̄. Christ ikpọn̄ okodu ata edidodu. (Matthew 17:8, 9) Utọ ndyọ ndyọ n̄kpọntịbe oro ama ọnọ Peter, James, ye John n̄wọrọnda ntabinse ubọn̄ ubọn̄ edidu Jesus ke odudu Obio Ubọn̄. Moses ye Elijah ẹda ẹban̄a nsan̄a mme ada udeme ye Jesus ẹmi ẹyetde aran, ndien n̄kukụt oro ama afiak ọsọn̄ọ uyarade oro enye ọkọnọde ke okopodudu usụn̄ aban̄a Obio Ubọn̄ ye itie edidem esie eke ini iso.
7. Nnyịn isan̄a didie ifiọk ke Peter ama eti edikpụhọde mbiet oro in̄wan̄în̄wan̄?
7 Edikpụhọde mbiet ama an̄wam ndisọn̄ọ mbuọtidem apostle ita ẹmi ẹkenyenede udeme ndida usụn̄ ke esop Christian. Nyayama iso Christ, nsem nsem edisịnen̄kpọ esie, ye uyo Abasi ọdọhọde ete ke Jesus ekedi edima Eyen Imọ emi mmọ ẹkpekpan̄de utọn̄ ẹnọ—ofụri emi ama ọyọhọ uduak esie ata uforo uforo. Edi ikanaha mme apostle ẹtịn̄ n̄kukụt emi ẹnọ baba owo kiet tutu Jesus eset ke n̄kpa. N̄kpọ nte isua 32 ke ukperedem, n̄kukụt emi okosụk ododu in̄wan̄în̄wan̄ ke ekikere Peter. Ke etịn̄de n̄kpọ aban̄a enye ye se enye ọwọrọde, enye ekewet ete: “Koro nnyịn ikeyịreke ikpîkpu mbụk, eke owo ẹdade mbufiọk ẹtịbi, ke adan̄aemi nnyịn inamde mbufo ẹfiọk odudu ye edidi Ọbọn̄ nnyịn Jesus Christ; edi nnyịn ke idem nnyịn iketie ise ubom Esie. Koro Enye ọkọbọ ukpono ye ubọn̄ ke ubọk Abasi Ete, ke adan̄aemi uyo otode ke akakan ubọn̄ oro esịm Enye ntem, ete, Emi edi Eyen Mi, Eyen ima Mi, emi esịt enemde Mi ye Enye: nnyịn ke idem nnyịn ikokop uyo oro, nte otode ke enyọn̄ ọwọrọ, ke ini nnyịn idude ye Enye ke edisana obot oro.”—2 Peter 1:16-18.
8. (a) Se Abasi akatan̄ade aban̄a Eyen esie okowụk ntịn̄enyịn ke nso? (b) Obubịt enyọn̄ emi okodude ke ini edikpụhọde mbiet oro okowụt nso?
8 Se ikedide ata akpan n̄kpọ ekedi se Abasi akatan̄ade ete: “Emi edi edima Eyen Mi, emi [nnemde esịt] ye Enye; ẹkop uyo Esie.” Ikọ emi owụk ntịn̄enyịn ke Jesus nte Edidem emi Abasi odoride ke ebekpo, emi anade ofụri edibotn̄kpọ ẹsụk ibuot ẹnọ. Obubịt enyọn̄ emi okofụkde ebiet oro okowụt ete ke edisu n̄kukụt emi edidi se enyịn mîkwe. Mbon oro ẹkụtde “idiọn̄ọ” edidu Jesus ke odudu Obio Ubọn̄ oro enyịn mîkwe ẹfiọk n̄kukụre ke enyịn ikike. (Matthew 24:3) Ke akpanikọ, Jesus nditeme mmọ ete ẹkûsian owo ndomokiet n̄kukụt oro tutu imọ iset owụt ke itoro ye ubọn̄ esie ẹdidi ke enye ama ekeset ke n̄kpa.
9. Ntak emi edikpụhọde mbiet ọkpọsọn̄ọde mbuọtidem nnyịn?
9 Ke ama eketịn̄ aban̄a edikpụhọde mbiet oro, Peter ama ọdọhọ ete: “Ndien ẹma ẹdọdiọn̄ ẹsọn̄ọ ikọ mme prophet ẹkan ẹnọ nnyịn; ndien mbufo ẹyetịm ẹnam, edieke mbufo ẹdibiọn̄de utọn̄ ke ikọ oro, nte owo esese utuenikan̄ eke ayamade ke n̄kịmn̄kịm ebiet, tutu eyo esiere, utịn [“ntantaọfiọn̄ usen,” NW] onyụn̄ asiaha ke esịt mbufo; sia mbufo ẹfiọkde ke akpa itie, ẹte, baba ikọ prophet kiet ke N̄wed Abasi idịghe se owo ekemede ndisiak ke usụn̄ esie mmọ. Koro akanam baba ikọ prophet itoho ke uduak owo: edi mme owo ẹtịn̄ ikọ eke otode Abasi, nte Edisana Spirit esịnde mmọ ẹtịn̄.” (2 Peter 1:19-21) Edikpụhọde mbiet owụt nte ntịn̄nnịm ikọ Abasi edide se ẹkemede ndiberi edem. Ana nnyịn ibiọn̄ utọn̄ ke ikọ oro ndien inaha nnyịn iyịre ke “ikpîkpu mbụk, eke owo ẹdade mbufiọk ẹtịbi” oro mînyeneke nsọn̄ọ m̀mê unyịme Abasi. Edikpụhọde mbiet ekpenyene ndisọn̄ọ mbuọtidem nnyịn ke ntịn̄nnịm ikọ koro n̄kukụt emi anyande ubọk owụt ubọn̄ Jesus ye odudu Obio Ubọn̄ akabade edi ata idem n̄kpọ. Ih, nnyịn imenyene uyarade emi owo mîkemeke ndineni nte ke Christ odu mfịn nte okopodudu Edidem eke heaven.
Nte Ntantaọfiọn̄ Usen Asiahade
10. Anie m̀mê nso idi “ntantaọfiọn̄ usen” oro Peter eketịn̄de aban̄a, ndien ntak emi afo ọbọrọde ntre?
10 Peter ekewet ete: “Mbufo ẹyetịm ẹnam, edieke mbufo ẹdibiọn̄de utọn̄ ke [ikọ mme prophet], nte owo esese utuenikan̄ eke ayamade ke n̄kịmn̄kịm ebiet, tutu eyo esiere, [ntantaọfiọn̄ usen, NW] onyụn̄ asiaha.” Anie m̀mê nso idi “ntantaọfiọn̄ usen”? Ikọ oro “ntantaọfiọn̄ usen” odu ini kiet kpọt ke Bible, ndien enye ọwọrọ ukem n̄kpọ ye “ntantaọfiọn̄ usenubọk.” Ediyarade 22:16 okot Jesus Christ “ediyama ntantaọfiọn̄ usenubọk.” Ke ndusụk ini ke isua, mme utọ ntantaọfiọn̄ ẹmi ẹsidi akpatre ndisiaha ke ikpehe n̄kan̄ edem usoputịn. Mmọ ẹsisiaha mbemiso utịn asiahade, ndien mmọ ke ntem ẹsitọt ke eyo esiere. Peter akada ikọ oro “ntantaọfiọn̄ usen” nditịn̄ mban̄a Jesus ke Enye ama ọkọbọ odudu Obio Ubọn̄. Ke ini oro, Jesus ama asiaha ke ofụri ekondo, esịnede isọn̄ nnyịn! Nte Ntantaọfiọn̄ Usen edide Messiah, enye owụt ke obufa usen, m̀mê ini, esiere ọnọ okopitem ubonowo.
11. (a) Ntak emi 2 Peter 1:19 mîwọrọke ite ke “ntantaọfiọn̄ usen” asiaha ke ata ata esịt owo? (b) Didie ke afo akpanam 2 Peter 1:19 an̄wan̄a?
11 Ediwak edikabade Bible ẹsịn udọn̄ ẹnọ ekikere oro nte ke mme ikọ apostle Peter oro ẹwetde ke 2 Peter 1:19 ẹtịn̄ ẹban̄a ata ata esịt owo. Esịt akwa owo odobi ke gram 250 esịm 300 kpọt. Didie ke Jesus Christ—emi idahaemi edide ubọn̄ ubọn̄ edibotn̄kpọ eke spirit oro mîkemeke ndikpa ke heaven—akpasiaha ke n̄kpri ndido idem owo ẹmi? (1 Timothy 6:16) Ke akpanikọ, ndamban̄a esịt nnyịn ẹnyene ebuana ke n̄kpọ emi, koro edi mmọ ke ida ibiọn̄ utọn̄ ke ntịn̄nnịm ikọ Abasi. Edi tịm se 2 Peter 1:19, ndien afo oyokụt nte ke New World Translation ada kọma iba abahade ubak udịmikọ emi, “tutu eyo esiere ndien ntantaọfiọn̄ usen asiaha,” ọkpọn̄ mme ikọ ẹmi ẹkebemde iso ke ufan̄ikọ oro onyụn̄ abahade ọkpọn̄ ikọ oro, “ke esịt mbufo.” Ẹkeme ndisịn ufan̄ikọ emi ke usụn̄ emi: ‘Ẹma ẹdọdiọn̄ ẹsọn̄ọ ikọ mme prophet ẹkan ẹnọ nnyịn; ndien mbufo ẹyetịm ẹnam, edieke mbufo ẹdibiọn̄de utọn̄ ke ikọ oro, nte owo esese utuenikan̄ eke ayamade ke n̄kịmn̄kịm ebiet, oro edi, ke esịt mbufo, tutu eyo esiere ndien ntantaọfiọn̄ usen asiaha.’
12. Nso idi idaha esịt owo ke ofụri ofụri, edi nso idi akpanikọ iban̄a mme ata Christian?
12 Nso idi idaha ndamban̄a esịt anamidiọk ubonowo ke ofụri ofụri? Kamse, esịt mmọ odu ke ekịm eke spirit! Nte ededi, edieke nnyịn idide mme ata Christian, etie nte n̄kpọ eke utuenikan̄ ayamade ke esịt nnyịn, emi ekpedide ekịm ke ẹsiode oro ẹfep. Nte mme ikọ Peter ẹwụtde, ebe ke ndibiọn̄ utọn̄ ke ntịn̄nnịm ikọ Abasi oro esịnde un̄wana ke mme ata Christian ẹdidu ke edidemede ẹnyụn̄ ẹtịm ẹfiọk usiere obufa usen. Mmọ ẹyediọn̄ọ ẹte ke Ntantaọfiọn̄ Usen ama asiaha, idịghe ke mme esịt ata owo, edi asiaha ọnọ ofụri edibotn̄kpọ.
13. (a) Ntak emi nnyịn ikemede nditịm mfiọk nte ke Ntantaọfiọn̄ Usen ama asasiaha? (b) Ntak emi mme Christian ẹkemede ndiyọ n̄kpọsọn̄ idaha oro Jesus ekebemde iso etịn̄ aban̄a eyo nnyịn?
13 Ntantaọfiọn̄ Usen ama asasiaha! Nnyịn imekeme nditịm mfiọk oro ebe ke ndibiọn̄ utọn̄ ke akwa ntịn̄nnịm ikọ Jesus aban̄ade edidu esie. Mfịn, nnyịn imokụt edisu esie ke mme utọ n̄kpọntịbe nte mme anana-mbiet ekọn̄, akan̄, unyekisọn̄, ye edikwọrọ eti mbụk ke ofụri ererimbot. (Matthew 24:3-14) Okposụkedi n̄kpọsọn̄ idaha oro Jesus ekebemde iso etịn̄ aban̄a ẹtụkde nnyịn nte mme Christian n̄ko, nnyịn imekeme ndiyọ ke emem ye idatesịt. Ntak-a? Koro nnyịn imọbiọn̄ utọn̄ ke ntịn̄nnịm ikọ Abasi inyụn̄ inyene mbuọtidem ke se enye ọn̄wọn̄ọde ọnọ ini iso. Nnyịn imọfiọk ite ke nnyịn imekpere mfọnn̄kan ini koro nnyịn inen̄ede idu ke ata “utịt ini”! (Daniel 12:4) Ererimbot odu ke nnanenyịn emi ẹkebemde iso ẹtịn̄ ke Isaiah 60:2: “Sese, ekịm oyofụk ererimbot, ọkpọsọn̄ ekịm oyonyụn̄ ofụk mme idụt.” Didie ke owo ekededi ekeme ndikụt usụn̄ ke ekịm emi? Ana owo ke nsụhọdeidem ọbiọn̄ utọn̄ ke ntịn̄nnịm ikọ Abasi idahaemi, mbemiso ini ebede akaha. Oyom mbon esịt akpanikọ ẹwọn̄ọde ẹbịne Jehovah Abasi, Ebiet uwem ye un̄wana ẹtode. (Psalm 36:9; Utom 17:28) Edi n̄kukụre ke ndinam emi ke owo ekededi ekeme ndikụt ata un̄wana nnyụn̄ nnyene idotenyịn edinyene utịbe utịbe ini iso oro Abasi aduakde ọnọ okopitem ubonowo.—Ediyarade 21:1-5.
“Un̄wana Ama Edi ke Ererimbot”
14. Nso ke ana nnyịn inam man ikụt nte mme utịbe utịbe ntịn̄nnịm ikọ Bible ẹsude?
14 N̄wed Abasi anam an̄wan̄a nte ke Jesus Christ ke akara idahaemi nte Edidem. Ke ntak emi enye ọkọbọde ukara ke 1914, mme utịbe utịbe ntịn̄nnịm ikọ ẹyesu ke ini iso. Man ikụt nte mmọ ẹsude, nnyịn inyene ndiwụt nte ke idi mbon nsụkidem ẹmi inyenede mbuọtidem ke Jesus Christ, ituade n̄kpọfiọk iban̄a mme idiọk edinam ye mme idiọkn̄kpọ oro ikanamde ke unana ifiọk. Nte ededi, mbon oro ẹmade ekịm idibọhọ nsinsi uwem. Jesus ọkọdọhọ ete: “Emi edi ikpe oro, ete, un̄wana ama edi ke ererimbot, edi owo ẹmama ekịm ẹkan un̄wana; koro utom mmọ ọdiọkde. Koro kpukpru owo eke ẹnamde idiọk ẹsasua un̄wana, inyụn̄ iwọrọke idi ke un̄wana, mbak ẹdibiom se mmọ ẹnamde. Edi owo eke anamde se idide akpanikọ ọwọrọ edi ke un̄wana, man ẹyarade utom esie, ẹte, enye etie ke Abasi ananam mmọ.”—John 3:19-21.
15. Nso iditịbe edieke nnyịn ifụmide edinyan̄a oro Abasi ọnọde ebe ke Eyen esie?
15 Un̄wana eke spirit odụk edi ererimbot ebe ke Jesus, ndien ndikpan̄ utọn̄ nnọ enye edi akpan n̄kpọ. Paul ekewet ete: “Abasi, emi akadade mme prophet etịn̄ ikọ n̄kpụhọ-n̄kpụhọ ye ke nsio-nsio usụn̄ ọnọ mme ete nnyịn ke eyo oko, ke ukperedem ini emi ama etịn̄ ọnọ nnyịn ke Eyen; emi Enye ekemekde enịm, ete edidi andinyene kpukpru n̄kpọ.” (Mme Hebrew 1:1, 2) Nso iditịbe edieke nnyịn ifụmide edinyan̄a emi Abasi ọnọde ebe ke Eyen esie? Paul ama aka iso ọdọhọ ete: “Edieke ikọ eke ẹkedade mme angel ẹtịn̄ ọsọn̄ọde ada, ndien kpukpru ndudue ye ntụtutọn̄ ẹbọde ufen eke ekemde; nnyịn idinam didie ibọhọ edieke nnyịn isịnde edinyan̄a eke okponde ntem? eke Ọbọn̄ ekebemde iso etịn̄, mmọ ẹmi ẹkekopde Enye ẹnyụn̄ ẹsọn̄ọ ikọ oro ẹnọ nnyịn; Abasi onyụn̄ ada mme idiọn̄ọ ye mme utịbe n̄kpọ, ye nsio-nsio n̄kpọ odudu, ye edinọ Edisana Spirit, nte Enye amade, etiene mmọ etie ntiense.” (Mme Hebrew 2:2-4) Ih, Jesus edi akpan owo ke editan̄a ntịn̄nnịm ikọ emi.—Ediyarade 19:10.
16. Ntak emi nnyịn ikemede ndinyene ọyọhọ mbuọtidem ke kpukpru ntịn̄nnịm ikọ Jehovah Abasi?
16 Nte ẹwụtde, Peter ọkọdọhọ ete: “Baba ikọ prophet kiet ke N̄wed Abasi idịghe se owo ekemede ndisiak ke usụn̄ esie mmọ.” Mme owo ke idemmọ ikemeke nditịn̄ ata ntịn̄nnịm ikọ, edi nnyịn imekeme ndinyene ọyọhọ mbuọtidem ke kpukpru ntịn̄nnịm ikọ Abasi. Mmọ ẹmi ẹtọn̄ọ ẹto Jehovah Abasi ke idemesie. Ebede ke edisana spirit enye anam mme asan̄autom esie ẹfiọk nte mme ntịn̄nnịm ikọ Bible ẹsude. Ke akpanikọ, nnyịn imọkọm Jehovah nte ke nnyịn imokụt ediwak utọ ntịn̄nnịm ikọ oro ẹsude toto ke isua 1914. Ndien nnyịn imetịm inịm ke akpanikọ ite ke kpukpru ntịn̄nnịm ikọ oro ẹsụhọde ẹmi ẹban̄ade utịt idiọk editịm n̄kpọ emi ẹyesu. Edi akpan n̄kpọ nte nnyịn ika iso ibiọn̄ utọn̄ ke mme ntịn̄nnịm ikọ Abasi ke adan̄aemi iyakde un̄wana nnyịn ayama. (Matthew 5:16) Nnyịn iwụt esịtekọm didie ntem nte ke Jehovah ke anam ‘un̄wana asiaha ọnọ nnyịn ke ata ekịm’ oro ofụkde isọn̄ mfịn!—Isaiah 58:10.
17. Ntak emi nnyịn iyomde un̄wana eke spirit emi otode Abasi?
17 Ata ata un̄wana anam nnyịn ikeme ndikụt n̄kpọ. Enye n̄ko anam mfri oro ẹnọde nnyịn uwak nsio nsio udia ẹkọri. Nnyịn ikemeke ndidu uwem ke ata ata un̄wana mîdụhe. Nso kaban̄a un̄wana eke spirit? Enye ọnọ nnyịn ndausụn̄ onyụn̄ owụt nnyịn ini iso nte ẹkebemde iso ẹtịn̄ ke Ikọ Abasi, kpa Bible. (Psalm 119:105) Jehovah Abasi ke ima ‘ọdọn̄ un̄wana esie ye akpanikọ esie utom.’ (Psalm 43:3) Ke akpanikọ nnyịn ikpenyene ndiwụt ntotụn̄ọ esịtekọm nnọ mme utọ enọ oro. Ẹyak nnyịn ke ntre isịn ofụri ukeme ndibọ un̄wana ‘ifiọk ubọn̄ Abasi’ man enye anam ndamban̄a esịt nnyịn ayama.—2 Corinth 4:6; Ephesus 1:18.
18. Nso ke Ntantaọfiọn̄ Usen Jehovah eben̄e idem idahaemi ndinam?
18 Nso n̄kpọ inemesịt ke edi ntem nnyịn ndidiọn̄ọ nte ke 1914, Jesus Christ, Ntantaọfiọn̄ Usen, ama asiaha ke ofụri ekondo onyụn̄ ọtọn̄ọ ndisu n̄kukụt edikpụhọde mbiet! Ntantaọfiọn̄ Usen Jehovah odu idahaemi, eben̄ede idem ndinam uduak Abasi ke n̄kaiso edisu edikpụhọde mbiet oro—“ekọn̄ akwa usen Abasi, Andikara kpukpru n̄kpọ.” (Ediyarade 16:14, 16) Ke ẹma ẹkekpọri akani editịm n̄kpọ emi ẹfep, Jehovah oyosu un̄wọn̄ọ esie aban̄ade “obufa enyọn̄ ye obufa isọn̄” emi nnyịn ikemede nditoro enye ke nsinsi nte Ọbọn̄ Andikara ekondo ye Abasi ntịn̄nnịm ikọ akpanikọ. (2 Peter 3:13) Tutu esịm akwa usen oro, ẹyak nnyịn ika iso ndisan̄a ke un̄wana Abasi ebe ke ndibiọn̄ utọn̄ ke ntịn̄nnịm ikọ Abasi.
Didie ke Afo Ọkpọbọrọ?
• Didie ke afo ekpetịn̄ nte edikpụhọde mbiet Jesus eketiede?
• Didie ke edikpụhọde mbiet ọbọp mbuọtidem?
• Anie m̀mê nso idi Ntantaọfiọn̄ Usen Jehovah, ndien ini ewe ke enye akasiaha?
• Ntak emi nnyịn ikpọbiọn̄de utọn̄ ke ntịn̄nnịm ikọ Abasi?
[Ndise ke page 13]
Nte afo emekeme ndinam se edikpụhọde mbiet ọwọrọde an̄wan̄a?
[Ndise ke page 15]
Ntantaọfiọn̄ Usen ama asasiaha. Ndi ọmọdiọn̄ọ nte enye akasiahade ye ini?