Nte Afo ke Anam Uduak Abasi?

KE UTOM mmọ eke ufọk ke ufọk, Mme Ntiense Jehovah iba ẹma ẹsobo ye oku Ufọkabasi Episcopal. Enye eketie nte owo oro etiede ufan ufan, enyene ntan̄ebek, ọsọn̄de ke n̄kpọ nte isua 60, esịnede ọfọn̄idem oro ẹwetde enyịn̄ ufọkabasi esie. Ye unana ubiatini, enye ama ọdọhọ ete: “Ubaha-⁠e nte ekpedide mbon ufọkabasi nnyịn ẹsịn ifịk nte mbufo ẹsịnde ke ndisuan Ikọ, edi nnyene ndisian mbufo nte ẹkûsudi ufọk mi aba.”

Ih, odu ediwak owo oro ẹmade utom Mme Ntiense Jehovah ẹnyụn̄ ẹtorode mmọ ẹban̄a ifịk ye ifiopesịt mmọ. Edi, mmọ inyeneke udọn̄ ndomo esisịt ke se Mme Ntiense ẹmi ẹnamde, m̀mê mmọ ndikere ndinam utom oro ke idemmọ. Nte ededi, in̄wan̄în̄wan̄ ntuaha oro odude ke mme idaha emi idịghe obufa n̄kpọ. Jesus ama okụt emi ke eyo esie, ndien enye ama ọsọn̄ọ etịn̄ akpan n̄kpọ emi ebe ke edemede-owo ekikere n̄ke kiet.

“Mbufo ẹse didie? Owo kiet ekenyene nditọiren iba; enye onyụn̄ etiene akpan ete, Eyen mi, ka kanam utom ke in̄wan̄ vine mi mfịn. Ndien enye ọbọrọ ete, [Nyeka] ete; edi ikaha. Ete etiene udọ ọdọhọ enye kpasụk ntre. Edi enye ọbọrọ ete, N̄kaha; edi ama ekem, enye atua n̄kpọfiọk, aka. Anie ke otu mmọ mbiba anam se ete esie oyomde?”​—⁠Matthew 21:​28-⁠31.

Ibọrọ ana in̄wan̄în̄wan̄. Ukem nte otuowo oro ẹkekpan̄de utọn̄ ẹnọ Jesus, nnyịn ikpọbọrọ ite, “Udọ.” Edi ke akade anyan akan in̄wan̄în̄wan̄ ibọrọ oro, ebede ke n̄ke oro, Jesus akanam nnyịn ifiọk nte ke ndinam se ete okoyomde ekedi akpan n̄kpọ. Okposụkedi udọ ọkọdọhọde ke imọ idikaha, enye nte ededi ama aka ndien ẹma ẹtoro enye ke oro. Ndinam nnennen orụk utom edi akpan n̄kpọ kpasụk ntre. Udọ ama anam n̄kpọ aban̄a oro ke ndinam utom ke in̄wan̄ vine ete; enye ikọkpọn̄ke ikanam utom ke in̄wan̄ vine esie.

Nso ke kpukpru emi ẹwọrọ ẹnọ nnyịn? Nso ke Abasi oyom oto mme andituak ibuot nnọ enye mfịn? Nso ke nnyịn ikeme ndikpep nto uwem Jesus oro edin̄wamde nnyịn ndinam uduak Ete esie? Mmọemi ẹdi mme akpan mbụme, ndien nnyịn ndinyene nnennen ibọrọ ediwọrọ nsinsi mfọnọn̄kpọ ọnọ nnyịn, sia “owo eke anamde se Abasi amade [“uduak Abasi,” NW] ododu ke nsinsi.”​—⁠1 John 2:17; Ephesus 5:17.

Nso Idi “Uduak Abasi”?

Ẹwet ikọenyịn̄ oro, “uduak” utịm ike-⁠80 ke Comprehensive Concordance of the New World Translation of the Holy Scriptures. Ke n̄kpọ nte utịm ike-⁠60 (m̀mê n̄kpọ nte mbahade 75 eke ikie ke otu ibat oro enye odude) ẹtịn̄ ẹban̄a uduak Abasi. Mme ikọ utọ nte “uduak Abasi,” ye “uduak Ete Mi,” ẹdu awak ebe utịm ike-⁠20. Ọkọn̄ọde ke emi nnyịn imekeme ndikụt nte ke uduak Abasi ekpenyene ndidi akpan n̄kpọ nnọ nnyịn. Ndinam uduak Abasi ekpenyene ndidi akpan n̄kpọ oro ebehede nnyịn ke uwem.

Ke Ikọmbakara ikọenyịn̄ oro, “uduak” ọwọrọ ‘udọn̄, se ẹyomde, ubiere, n̄kpọ oro owo amade, akpan akpan edimek m̀mê ubiere owo oro enyenede odudu m̀mê ukeme.’ Ntre ndien, Jehovah, kpa Akakan Andikara, enyene uduak, udọn̄ m̀mê ubiere. Nso ke enye edi? N̄wed Abasi asian nnyịn nte ke ubak ubak “Uduak [Abasi] edi nte kpukpru orụk owo ẹkpenyene edinyan̄a ẹnyụn̄ edinyene nnennen ifiọk akpanikọ.” (1 Timothy 2:4, NW) Jesus Christ ye mme akpa Christian ẹma ẹnam utom ofụri ukpọn̄ man ẹda nnennen ifiọk emi ẹsọk kpukpru owo.​—⁠Matthew 9:35; Utom 5:42; Philippi 2:​19, 22.

Mmanie ẹnam uduak Abasi mfịn? Ke otu mme owo oro ẹkperede ndisịm biliọn iba ẹmi ẹdọhọde nte itienede Jesus Christ, owo ifan̄ ebiet udọ eke n̄ke Jesus, emi akakade akanam uduak ete esie? Isọn̄ke ndinyene ibọrọ. Mme ata anditiene nde-ikpat Jesus Christ ẹyenam utom oro enye ọkọdọhọde ke mmọ ẹyenam: “Ẹnyene ndibemiso n̄kwọrọ gospel nnọ kpukpru mme idụt.” (Mark 13:10) Mme Ntiense Jehovah, ẹmi ibat mmọ awakde ebe miliọn inan̄ ye ubak ke ofụri ererimbot, ke ẹkwọrọ eti mbụk Obio Ubọn̄ ifịk ifịk ẹnyụn̄ ẹkpep mbon en̄wen, ẹnyande ubọk ẹwụt Obio Ubọn̄ nte n̄kukụre idotenyịn ubonowo kaban̄a emem ye ifụre. Nte afo ke enyene ọyọhọ ebuana ke ndinam uduak Abasi? Nte afo ke ọkwọrọ eti mbụk Obio Ubọn̄ nte Jesus akanamde?​—⁠Utom 10:42; Mme Hebrew 10:7.

Ndikop Idatesịt ke Ndinam Uduak Abasi

Ke adan̄aemi idatesịt odude ke ndikpep mban̄a se uduak Ete edide, akwa idatesịt odu ke ndikpep mbon en̄wen uduak Abasi. Jesus ama okop idatesịt ke ndikpep mme owo mban̄a Ete esie. Enye eketie nte udia ọnọ enye. (John 4:34) Nnyịn n̄ko iyenyene ata inemesịt edieke nnyịn inamde nte Jesus akanamde, oro edi, ndikwọrọ nnyụn̄ n̄kpep mme n̄kpọ oro enye ekekpepde, kpa mme n̄kpọ oro enye ọkọbọde oto Ete esie. (Matthew 28:​19, 20) Nte Jesus ọkọn̄wọn̄ọde, “edieke mbufo ẹfiọkde mme n̄kpọ ẹmi, ọfọfọn ọnọ mbufo ke ẹnamde mmọ.”​—⁠John 13:17.

Ke ndinam an̄wan̄a: Eka nditọ kiet emi akafiakde odụk utom usiakusụn̄ uyọhọ-ini ke ndondo emi ọkọdọhọ ete: “Ndikụt iso nditọ ukpepn̄kpọ Bible ayamade nte nsio nsio akpanikọ Bible otụkde esịt mmọ edi n̄kpọ oro akamade nduaidem! Otịm edi n̄kpọ idatesịt ọnọ mi ndikụt eyen ukpepn̄kpọ kiet ewetde kpukpru itien̄wed ke ata ubọkn̄wed esie mbemiso ukpepn̄kpọ onyụn̄ ewetde mme n̄kpọ ke ini ukpepn̄kpọ man enye ekpekeme ndibọrọ mbụme ndụn̄ọde ekededi ke ukperedem.” Efen ke otu nditọ ukpepn̄kpọ Bible esie okokụt akpanikọ ke ntọn̄ọ ntọn̄ọ ini uyen esie. Ke ama ọkọdọ ndọ idahaemi onyụn̄ ese aban̄a ndusụk ọkpọkpọ mfịna, ama ọdọn̄ enye ndikụt Mme Ntiense. Enye okokop inemesịt didie ntem ke ini eyenete an̄wan edide asiakusụn̄ okosobode ye enye! N̄kaiferi emi ama okop nduaidem ndifiak ntọn̄ọ ukpepn̄kpọ Bible esie.

Ndisọn̄ọ Mmụm Idatesịt eke Edinam Uduak Abasi N̄kama

Edidem David eke Israel eset ekedi kiet emi okoyomde ndinam uduak Abasi ke ofụri uwem esie. Kpa ye ekese nsọn̄ọn̄kpọ ye mfịghe oro ẹkedade ẹtiene enye, ẹma ẹnọ enye odudu nditịn̄ nte: “Mmama ndinam [uduak fo, NW], O Abasi mi, mbet fo ẹnyụn̄ ẹdu mi ke esịt.” (Psalm 40:8) Ndinam uduak Jehovah okodu ke ata ukpọn̄ David, ke ata idem esie. Oro ekedi ntak idatesịt oro mîkemeke ndisụhọde oro enye ekenyenede ke ndinam uduak Jehovah. Ndinam uduak Abasi ikedịghe ọkpọsọn̄ n̄kpọ inọ David. Utu ke oro, enye ekedi n̄kpọ inemesịt, n̄kpọ oro okotode enye ke esịt. Ke ofụri uwem esie, enye ama an̄wana ndinam ofụri ukeme esie ke ndinam n̄kpọ Abasi esie, Jehovah, idem okposụkedi enye ke ndusụk ini ekesinamde idiọkn̄kpọ onyụn̄ eduede.

Ke ndusụk idaha, idatesịt nnyịn ekeme ndisụhọde. Nnyịn imekeme ndikop mfekuwem m̀mê iduọesịt. Ekeme ndidi mme n̄kpọ oro ẹketịbede ke ini edem ke ẹkaiso ndifịna nnyịn, ubieresịt nnyịn afịnade nnyịn aban̄a ndusụk idiọkn̄kpọ ikanamde ke anyanini emi ekebede. Ediwak ini, nnyịn imekeme ndikan mme ntụk ẹmi ebe ke nditịm n̄kpep Ikọ Abasi. Nnyịn imekeme ndidomo ndisịn ibet Abasi ke “esịt” nnyịn, nte David akanamde. Edieke nnyịn idomode ndinam uduak Abasi ke ofụri ukpọn̄, oro edi, ke ofụri ukeme nnyịn, enye eyenọ nnyịn utịp nte ekemde koro enye edide anam akpanikọ.​—⁠Ephesus 6:6; Mme Hebrew 6:​10-⁠12; 1 Peter 4:19.

Nte enemde, ke Mme Hebrew 10:​5-⁠7, apostle Paul ama okot oto mme ikọ David oro ke Psalm 40:​6-⁠8 onyụn̄ ada mmọ etịn̄ aban̄a Jesus Christ. Ke ndinam ntre, Paul okowụt nte Jesus ekekperede Ete esie. Ikọ Hebrew oro adade ọnọ “uduak” ọnọ ekikere ‘idatesịt, udọn̄, uma, m̀mê inemesịt.’ Ke ntre, ẹkeme ndikot Psalm 40:8 ntem ẹban̄a Christ: “Ami mmadara ndinam se inemde fi esịt, O Abasi mi.”a Jesus okoyom ndinam se inemde Ete esie esịt. Jesus ama aka anyan akan ndinam se ẹkeyomde eto enye. Enye akanam se ikodude ke esịt Ete esie, ndien enye ama okop inemesịt ndinam oro.

Ofụri uwem Jesus ọkọkọn̄ọ ke ndikpep mbon en̄wen se idide uduak Abasi ye se anade mmọ ẹnam man ẹnyene edidiọn̄ Abasi. Enye ekedi ọkwọrọikọ uyọhọ-ini ye andikpep onyụn̄ enyene akwa idatesịt ke ndinam utom oro. Ke ntre utịp edi nte ke adan̄a nte nnyịn inamde utom Jehovah, ntre ke nnyịn idinyene idatesịt. Nte afo n̄ko emekeme ndinam utom uyọhọ-ini ke utom ukwọrọikọ man otodo idatesịt fo n̄ko okpokpon?

N̄kaiso un̄wam oro odude ke ndimụm idatesịt n̄kama ke ndinam uduak Abasi edi ndiwụk enyịn nse ini iso. Oro edi se Jesus akanamde. “Kaban̄a idatesịt oro ẹkenịmde enye ke iso enye ama ọyọ eto ndutụhọ, ese esuene ke usụhọde n̄kpọ.” Ye enye, idatesịt oro ekedi ke ndinam akpanikọ nnọ Abasi tutu osịm utịt ndien ekem ọbọ utịp itie edidem ke ubọk nnasia Ete esie.​—⁠Mme Hebrew 12:2, NW.

Kere ban̄a idatesịt eke ini iso oro mbon oro ẹkade iso ndinam uduak Abasi edinyenede. Mmọ ẹyekụt nsobo mbon oro ẹsọn̄ọde ẹyịre ke ndinam ibụk ibụk uduak idemmọ idem ọkpọkọm emi adada ufen ọsọk mbon oro ẹdomode ndinam uduak Abasi. (2 Thessalonica 1:​7, 8) Kere ban̄a idatesịt oro mbonima oro ẹdinamde ẹset ẹdinyenede ke ndinyene ifet ndikpep nnyụn̄ nnam uduak Abasi. Mîdịghe kere ban̄a uduak Abasi ndinam isọn̄ akabade edi Paradise. Ndien ke akpatre, kere ban̄a ubọhọ oro edisụn̄ọde oto ọyọhọ nsobo oro edisobode Satan, kpa andibiọn̄ọ uduak Jehovah.

Ih, ndinam uduak Abasi mfịn ekeme ndida akwa idatesịt ndi idahaemi ye anana-utịt inemesịt ke ini iso. Inamke n̄kpọ m̀mê mme owo ẹnam n̄kpọ didie ye nnyịn ke utom ukwọrọikọ, ẹyak nnyịn ikpebe uwụtn̄kpọ Jesus ke ndikop idatesịt ke ndinam uduak Ete esie.

[Mme Ikọ idakisọn̄]