Ikpehe 9
Nte Nnyịn Isan̄ade Idiọn̄ọ ke Idu ke “Ukperedem Ini”
1, 2. Nnyịn ikeme ndisan̄a didie mfiọk m̀mê nnyịn idu ke ukperedem ini?
DIDIE ke nnyịn ikeme ndifiọk nte ke nnyịn idu uwem ke ini emi Obio Ubọn̄ Abasi edinamde n̄kpọ aban̄a ndutịm ukara owo emi odude kemi? Didie ke nnyịn ikeme ndifiọk nte ke nnyịn imenen̄ede ikpere ini emi Abasi edidade utịt ọsọk kpukpru ukwan̄ido ye ndutụhọ?
2 Mme mbet Jesus Christ ẹma ẹyom ndifiọk mme n̄kpọ oro. Mmọ ẹma ẹbụp enye se ididide “idiọn̄ọ” edidu esie ke odudu Obio Ubọn̄ ye “eke akpatre ini eyo emi.” (Matthew 24:3) Jesus ama ọbọrọ ke nditịn̄ ke itie ke itie mme n̄kpọntịbe ye mme idaha ẹmi ẹdinyen̄ede ererimbot oro ẹdidianade kiet ndiwụt nte ke ubonowo ama odụk “utịt ini,” kpa “ukperedem ini” eke editịm n̄kpọ emi. (Daniel 11:40; 2 Timothy 3:1) Nte nnyịn ke isua ikie emi imokụt ntan̄-ndian idiọn̄ọ oro? Ih, nnyịn imokụt, ata ediwak!
Mme Ekọn̄ Ererimbot
3, 4. Didie ke mme ekọn̄ eke isua ikie emi ekem ye prọfesi Jesus?
3 Jesus ama ebemiso etịn̄ ete ke “idụt eyedaha an̄wana ye idụt, obio edidem kiet eyenyụn̄ adaha an̄wana ye obio edidem efen.” (Matthew 24:7) Ke 1914 ererimbot ama akabade abuana ke ekọn̄ oro okokụtde editan̄ oro ẹketan̄de ediwak idụt ye obio ndidem ẹdian ọtọkiet ke usụn̄ oro ekenyenede ukpụhọde ye ekọn̄ ekededi mbemiso emi. Ke ndidiọn̄ọ akpanikọ oro, mme ewet mbụkeset ke ini oro ẹkekot enye Akwa Ekọn̄. Enye ekedi akpa utọ ekọn̄ oro ke mbụk, kpa akpa ekọn̄ ererimbot. N̄kpọ nte mbonekọn̄ ye mbio obio 20,000,000 ẹma ẹduọk uwem mmọ, otịmde awak akan eke ekọn̄ ekededi ke mbemiso.
4 Ekọn̄ Ererimbot I ama onịm ntọn̄ọ ukperedem ini idiọn̄ọ. Jesus ọkọdọhọ ete ke emi ye mme n̄kpọntịbe eken ẹdidi “ntọn̄ọ ubiak uman.” (Matthew 24:8) Oro ekedi akpanikọ, nte Ekọn̄ Ererimbot II akakam akamade n̄kpa akan, n̄kpọ nte mbonekọn̄ ye mbio obio 50,000,000 ẹduọkde uwem mmọ. Ke ọyọhọ isua ikie-20 emi, ẹmewot se iwakde ikan owo 100,000,000 ke ekọn̄, awakde utịm ikanan̄ akan ediwak ibat oro ẹkewotde ke isua 400 oro ẹkebede ke ẹtan̄de ẹdian ọtọkiet! Nso ata akamba edibiom ukara owo ikpe!
Mme Uyarade Efen
5-7. Nso idi ndusụk uyarade efen oro ẹwụtde ke nnyịn idu ke ukperedem ini?
5 Jesus ama esịn mme n̄kpọ efen ẹmi ẹdisan̄ade ye ukperedem ini: “Ikpọ unyekisọn̄ ẹyedu; akan̄ ye mme idiọk udọn̄ọ [udọn̄ọ ẹmi ẹtarade usọp usọp] ẹyenyụn̄ ẹdu ke nsio nsio ebiet.” (Luke 21:11) Oro otịm ekem ye mme n̄kpọntịbe ọtọn̄ọde ke 1914, nte akwa n̄kọri mfụhọ odude oto mme utọ afanikọn̄ oro.
6 Ikpọ unyekisọn̄ ẹdi mme n̄kpọntịbe ofụri ini, ẹdade ediwak uwem. Udọn̄ọ efiomnsa ikpọn̄ ama owot n̄kpọ nte owo 20,000,000 ke etienede Ekọn̄ Ererimbot I—ndusụk ibat oro ẹkerede edide 30,000,000 m̀mê akande oro. AIDS amada uwem ke ediwak tọsịn ke mme itie ikie onyụn̄ ekeme ndida ke ediwak miliọn efen ke n̄kpet n̄kpet ini iso. Ke isua kiet kiet ediwak miliọn owo ẹsikpan̄a ke ntak udọn̄ọ esịt, cancer, ye mme udọn̄ọ eken. Ediwak miliọn efen ẹkpan̄a idop idop n̄kpa otode biọn̄. Ye unana eyịghe ‘mme awat enan̄-mbakara eke Ediyarade’ ye mme ekọn̄, unana udia, ye udọn̄ọ mmọ oro ẹtarade usọp usọp ẹsịbe akpakịp ibat ekpụk ubonowo ẹfep ọtọn̄ọde ke 1914.—Ediyarade 6:3-8.
7 Jesus n̄ko ama ebemiso etịn̄ aban̄a n̄kọri ke ubiatibet oro ẹsobode ke kpukpru idụt. Enye ọkọdọhọ ete: “Sia mme ukwan̄ido ẹditọtde, ima ediwak owo eyesụhọ.”—Matthew 24:12.
8. Didie ke prọfesi oro ke 2 N̄wed Timothy ibuot 3 ekem ye eyo nnyịn?
8 N̄ko-n̄ko, prọfesi Bible ama ebemiso etịn̄ aban̄a n̄wụre ido uwem oro otịmde owụt idem ke ofụri ererimbot mfịn ete: “Ndiọkeyo ẹyedu ke ukperedem ini. Koro mme owo ẹyedi mme ama idem, ye mme ama inyene; ẹnyụn̄ ẹbụre idiọk mbụre, ẹseri iseri, ẹsụn̄i isụn̄i, ẹsọn̄ ibuot ye ete ye eka, ẹnana esịtekọm, ẹnana uten̄e Abasi, ẹnana ima uduot owo; ẹnyụn̄ ẹbiat un̄wọn̄ọ; ẹma ebiari, ẹyak idiọkitọn̄ akan mmọ ubọk, ẹtie obom obom, ẹnyụn̄ ẹsua se ifọnde; mmọ ẹdi mme ada owo nnọ mme asua, ye mbon idiọk iwụk, ye mbon n̄kohodeidem; mmọ ẹma mbre ẹkan Abasi; ẹnyene enyọn̄ enyọn̄ ido uten̄e Abasi, edi isan̄ake n̄kpọ ye odudu eke odude ke uten̄e Abasi. . . . Ndiọi owo ye mbon abian̄a ẹyedọdiọn̄ ẹdiọk ẹkaiso.” (2 Timothy 3:1-13) Kpukpru ẹmi ẹmesu ke enyịn nnyịn.
N̄kpọ Efen
9. Nso ikotịbe ke heaven oro ekedide ke ukem ini ye ntọn̄ọ ukperedem ini ke isọn̄?
9 N̄kpọ efen odu emi edide ntak akwa n̄kọri ke ndutụhọ ke isua ikie emi. Ke otịbede ke ukem ini ye ntọn̄ọ ukperedem ini ke 1914, n̄kpọ ama otịbe emi esịnde ubonowo ke itiendịk oro akam okponde akan. Ke ini oro, nte prọfesi kiet ke akpatre n̄wed Bible obụkde: “Ekọn̄ otịbe ke heaven; Michael [Christ ke odudu eke heaven] ye mme angel esie ẹn̄wana ekọn̄ ye dragon [Satan]; dragon ye mme angel [mme demon] esie ẹnyụn̄ ẹn̄wana ekọn̄, edi mmọ ikanke. Ufan̄ inyụn̄ idụhe aba inọ mmọ ke heaven. Ndien ẹsio akwa dragon ẹduọk ke isọn̄, kpa akani urụkikọt oro ẹkotde enye ẹte, andidori ikọt Abasi ikọ ye Satan, andibian̄a ofụri ererimbot; ẹsio enye ẹduọk ke isọn̄, ẹnyụn̄ ẹsion̄o mme angel esie ẹduọn̄ọ ye enye.—Ediyarade 12:7-9.
10, 11. Didie ke okotụk ubonowo ke ini ẹkesiode Satan ye mme demon esie ẹduọn̄ọ ke isọn̄?
10 Nso ikedi mme utịp inọ ekpụk ubonowo? Prọfesi oro akaiso ete: “Mbọm isọn̄ ye inyan̄, koro andidori ikọt Abasi ikọ ama osụhọde etiene mbufo; enye asan̄a ye akwa ifụtesịt, sia enye ọdiọn̄ọde ete ini imọ edi ibio.” Ih, Satan ọdiọn̄ọ ete ke editịm n̄kpọ imọ ke asan̄a ekpere utịt esie, ntre enye ke anam kpukpru n̄kpọ oro enye ekemede man ọwọn̄ọde mme owo ọkpọn̄ Abasi mbemiso ẹsobode enye ye ererimbot esie ẹfep. (Ediyarade 12:12; 20:1-3) Mme edibotn̄kpọ eke spirit oro ẹbiara didie ntem koro mmọ ẹkedade ifụre uduak mmọ ẹnam n̄kpọ ke idiọk usụn̄! Mme idaha enyene-ndịk didie ntem ke isọn̄ ke idak odudu mmọ, akpan akpan ọtọn̄ọde ke 1914!
11 Eyịghe idụhe Jesus ekebemde iso etịn̄ aban̄a eyo nnyịn ete: “Editịmede esịt eyenyụn̄ omụm mme idụt isọn̄, oto ke nnanenyịn . . . idem eyeyemede owo oto ke ndịk ye edikama enyịn nse mme n̄kpọ eke ẹdiwọrọde ẹnọ ekondo.”—Luke 21:25, 26.
Utịt Ukara Owo ye eke Demon Ekpere
12. Nso idi kiet ke otu mme akpatre prọfesi ẹmi ẹsụhọde ndisu mbemiso utịt editịm n̄kpọ emi?
12 Prọfesi Bible ifan̄ ẹsụhọ ndisu mbemiso Abasi osobode editịm n̄kpọ emi odude kemi efep? Ata esisịt! Kiet ke otu akpatre oro odu ke 1 N̄wed Thessalonica 5:3, emi ọdọhọde ete: “Ke adan̄aemi mmọ ẹsụk ẹnemede ẹban̄a emem ye ifụre, inikiet inikiet nsobo osịm mmọ.” (The New English Bible) Emi owụt ete ke utịt editịm n̄kpọ emi editọn̄ọ “ke adan̄aemi mmọ ẹsụk ẹnemede.” Ke ererimbot mîbemke iso ida ikụt, nsobo eyedi ke ini esisịt ibatowo ẹkedoride enyịn, ke ini ntịn̄enyịn mme owo owụhọde ke emem ye ifụre oro mmọ ẹkedoride enyịn ẹyom.
13, 14. Ewe ini afanikọn̄ ke Jesus ekebemiso etịn̄ aban̄a, ndien didie ke enye edisịm utịt?
13 Ini ke okụre ọkpọn̄ ererimbot emi odude ke idak odudu Satan mi. Ibịghike enye eyesịm utịt esie ke ini afanikọn̄ emi Jesus ọkọdọhọde ete: “Ke ini oro akwa ukụt eyedu, orụk eke akanam mîdụhe toto ke editọn̄ọ ererimbot tutu osịm emi, eke mîdịnyụn̄ idụhe aba.”—Matthew 24:21.
14 Ata utịt “akwa ukụt” edidi ekọn̄ Armageddon Abasi. Oro edi ini emi prọfet Daniel eketịn̄de aban̄a emi Abasi “[edinuakde] onyụn̄ ama kpukpru mme idụt ẹmi.” Emi ediwọrọ utịt kpukpru itie edikara owo ẹmi ẹdude kemi ẹmi ẹdade ke idem ẹkpọn̄ Abasi. Ukara Obio Ubọn̄ esie ke heaven adan̄aoro eyekara ofụri mbubehe owo ọyọhọ ọyọhọ. Daniel ama ebemiso etịn̄ ete ke tutu amama, owo idiyakke odudu ukara inọ “mbio efen.”—Daniel 2:44; Ediyarade 16:14-16.
15. Nso iditịbe inọ odudu Satan ye mme demon esie?
15 Ke ini oro kpukpru odudu Satan ye mme demon n̄ko ididụhe aba. Ẹyesobo mme ọsọn̄ibuot edibotn̄kpọ eke spirit oro ẹfep man mmọ ẹkûkeme “[ndibian̄a] aba mme idụt.” (Ediyarade 12:9; 20:1-3) Ẹma ẹbiere ikpe n̄kpa ẹnọ mmọ ẹnyụn̄ ẹtie ẹbet nsobo. Nso ubọhọ ke edidi ntem ọnọ ubonowo ndibọhọ mbiara odudu mmọ!
Mmanie Ẹdibọhọ? Mmanie Mîdibọhọke?
16-18. Mmanie ẹdibọhọ utịt editịm emi, ndien mmanie mîdibọhọke?
16 Ke ini ẹdin̄wan̄ade ubiereikpe Abasi ẹduọk ererimbot emi ke idem, mmanie ẹdibọhọ? Mmanie mîdibọhọke? Bible owụt ete ke ẹyekpeme mbon oro ẹyomde ukara Abasi ndien ke mmọ ẹdibọhọ. Owo idikpemeke mbon oro mîyomke ukara Abasi edi ẹyesobo mmọ ke adianade ye ererimbot Satan.
17 Mme N̄ke 2:21, 22 ọdọhọ ete: “Mbon edinen ido [mbon oro ẹsụkde ibuot ẹnọ ukara Abasi] ẹyedụn̄ ke obio, mmọ eke ẹfọnde ẹma ẹyenyụn̄ ẹbịghi ke esịt. Edi ẹyesobo mme idiọkowo [mbon oro mîsụkke ibuot inọ ukara Abasi] ke isọn̄ ẹfep, ẹnyụn̄ ẹsọhi mbon abian̄a ẹfep ke esịt.”
18 Psalm 37:10, 11 n̄ko ọdọhọ ete: “Osụk esisịt idiọkowo ididụhe . . . Edi mbon nsụkidem ẹyeda isọn̄ ẹnyene; ediwak emem ẹyenyụn̄ ẹnem mmọ esịt.”Psalm 37 Ufan̄ikọ 29 adian do ete: “Nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.”
19. Ewe item ke nnyịn ikpekere iban̄a ntotụn̄ọ ntotụn̄ọ?
19 Nnyịn ikpenyene ndikere ntotụn̄ọ ntotụn̄ọ mban̄a item eke Psalm 37:34 (NW), emi ọdọhọde ete: “Dori enyịn ke Jehovah nyụn̄ nịm ido esie, ndien enye eyemenede fi man ada isọn̄ enyene. Ke ini ẹdisịbede mme idiọkowo ẹfep, afo eyekụt.”Psalm 37 Ufan̄ikọ 37 ye 38 ọdọhọ ete: “Tịn̄ enyịn ke owo eke ọfọnde ama, nyụn̄ se edinen owo: koro eti utịt anade ọnọ owo emem. Ẹyenyụn̄ ẹsobo mme idiọkowo ọtọkiet: ẹyesịbe eti utịt mme idiọkowo ẹfep.”
20. Ntak emi nnyịn ikemede ndidọhọ nte ke mmọemi ẹdi ini inemesịt ndidu uwem-e?
20 Edi n̄kpọ ndọn̄esịt didie ntem, ih, edemede ukpọn̄ didie ntem ndifiọk nte ke Abasi enen̄ede ekere aban̄a ye nte ke ibịghike enye eyeda utịt ọsọk kpukpru ukwan̄ido ye ndutụhọ! Edi n̄kpọ inemesịt didie ntem ndifiọk nte ke mme ubọn̄ ubọn̄ prọfesi oro ẹyesu ke ekpri ibio ini!
[Ndise ke page 20]
Bible ama ebemiso etịn̄ aban̄a mme n̄kpọntịbe oro ẹdinamde “idiọn̄ọ” ukperedem ini
[Ndise ke page 22]
Ibịghike, ke Armageddon, ẹyesịbe mbon oro mîsụkke ibuot inọ ukara Abasi ẹfep. Mbon oro ẹsụkde ibuot ẹnọ ẹyebọhọ ẹdụk edinen obufa ererimbot