Uwem ye Utom Jesus

Idiọn̄ọ Utịt Eyo

UWEMEYO Tuesday edi emi. Nte Jesus etiede ke Obot Olive, owụkde enyịn ese temple ke isọn̄ isọn̄, Peter, Andrew, James, ye John ẹdi ẹbịne enye ndịbe ndịbe. Se ibehede mmọ edi temple, sia Jesus osụk okụrede ntịn̄nịmikọ oro nte ke owo ‘idikpọn̄ke itiat ke enyọn̄ itiat efen eke mîdidorokede enye iduọk.’

Edi nte an̄wan̄ade, mmọ ẹnyene se ikponde ikan oro ke ekikere nte mmọ ẹkade ẹbịne Jesus. Urua ifan̄ emi ẹkebede, enye ama etịn̄ ọnọ mmọ aban̄a “edid[u]” esie, kpa ini “emi Eyen Owo ediyararede idem.” Ndien ke idaha kiet ko ke edem, enye ama asian mmọ aban̄a “akpatre ini eyo emi.” Ntre mme apostle ẹmi ẹtịm ẹyom ndidiọn̄ọ.

Mmọ ẹdọhọ ete, “Sian nnyịn ini mme n̄kpọ ẹmi ẹdidide [osụn̄ọde ke nsobo Jerusalem ye temple esie]; nso idinyụn̄ idi idiọn̄ọ edid[u] Fo, ye eke akpatre ini eyo emi?” Ke akpanikọ mbụme mmọ edi ikpehe ita. Akpa, mmọ ẹyom ndidiọn̄ọ nsobo Jerusalem ye temple esie, ekem edidu Jesus ke ukara Obio Ubọn̄, ndien ke akpatre utịt ofụri editịm n̄kpọ emi.

Ke anyan ibọrọ esie, Jesus ọbọrọ mbụme mmọ ofụri ikpehe ita oro. Enye ọnọ idiọn̄ọ kiet emi owụtde ini emi editịm n̄kpọ mme Jew editrede; edi enye ọnọ se ikande oro. Enye n̄ko ọnọ idiọn̄ọ kiet emi edinamde mme mbet esie ke ini iso ẹdu ke edidemede nte ke mmimọ idu uwem ke ini oro enye odude, n̄ko ke imekpere utịt ofụri editịm n̄kpọ emi.

Nte mme isua ẹbede, mme apostle ẹtọn̄ọ ndikụt edisu prọfesi Jesus emi. Ih, kpa mme n̄kpọ oro enye ekebemde iso etịn̄ ẹtọn̄ọ nditịbe ke eyo mmọ. Ntem, nsobo editịm n̄kpọ mme Jew ye temple esie ibuatke-buat mme Christian oro ẹdude uwem ke isua 37 ke ukperedem, ke 70 C.E.

Nte ededi, edidu Christ ye utịt editịm n̄kpọ emi idaha itie ke 70 C.E. Edidu esie ke ukara Obio Ubọn̄ ada itie ke ata anyanini ke ukperedem. Edi ini ewe? Edidụn̄ọde prọfesi Jesus ayarade emi.

Jesus ebemiso etịn̄ ete ke ẹyekop ẹban̄a “ekọn̄ ye etop ekọn̄.” “Idut eyedaha an̄wana ye idụt,” akan̄, unyekisọn̄ ye mme idiọkudọn̄ọ ẹyedu. Eyesua enyụn̄ ẹwot mme mbet esie. Mme prọfet abian̄a ẹyedaha ẹda ẹnyụn̄ ẹda ediwak owo ẹwaha ẹkpọn̄ usụn̄. Ubiatibet eyekọri, ndien ima ediwak owo eyesụhọde. Ke ukem ini oro, ẹyekwọrọ eti mbụk Obio Ubọn̄ ke ofụri isọn̄ nte ntiense ẹnọ kpukpru idụt.

Okposụkedi prọfesi Jesus okosude ekpri ekpri mbemiso nsobo Jerusalem ke 70 C.E., akamba akamba edisu prọfesi emi ada itie ke ini oro enye odude ke utịt editịm n̄kpọ emi. Ndidụn̄ọde mme n̄kpọntịbe ererimbot ye ntịn̄enyịn toto ke 1914 ayarade nte ke akpan prọfesi Jesus emi ama ọtọtọn̄ọ edisu akamba akamba toto ke isua oro.

Ikpehe efen ke idiọn̄ọ oro Jesus ọnọde edi edibiọn̄ọde eke “n̄kpọ mbubiam nsobo.” Ke 66 C.E., n̄kpọ mbubiam emi ama owụt idem ke mbiet “mbonekọn̄ Rome oro ẹkekande Jerusalem ẹkụk ẹnyụn̄ ẹwụride ibibene temple. “N̄kpọ mbubiam nsobo” ama ada ke ebiet em mîkpadaha.

Ke akamba akamba edisu idiọn̄ọ oro n̄kpọ mbubiam emi edi andida itie Esop Ediomi M’idụt, kpa Esop Edidiana M’idụt Christendom ese esop emem ererimbot emi nte enyeemi adade ke ibuot Obio Ubọn̄ Abasi. Didie ke edi mbubiam n̄kpọ ntem! Nte ini akade, ke ntre, mme ukara ukaraidem ẹmi ẹbuanade ke Esop Edidiana M’idụt ẹyewọn̄ọde enyịn ẹse Christendom (mbiet Jerusalem) ẹyenyụn̄ ẹsobo enye.

Jesus ke ntem ama ebemiso etịn̄ ete: “Akwa ukụt eyedu, orụk eke akanam mîdụhe toto ke editọn̄ọ ererimbot tutu osịm emi, eke mîdinyụn̄ idụhe aba.” Ke adan̄aemi nsobo Jerusalem ke 70 C.E. ekedide akwa ukụt ke akpanikọ, ẹtọtde n̄kpan̄a akawakde ebe owo million kiet, enye ikokponke ikan ukụt mmọn̄ Ukwọ ofụri ererimbot eke eyo Noah. Ntre akamba akamba edisu eke ikpehe prọfesi Jesus emi ikadaha itie kan̄a. Matthew 24:2-22; 13:40, 49; Mark 13:3-20; Luke 21:7-24; 19:43, 44; 17:20-30; 2 Timothy 3:1-5.

◆ Nso ikada mbụme mme apostle idi, edi nte an̄wan̄ade, nso n̄kpọ efen ke mmọ ẹkenyene ke ekikere?

◆ Ewe ikpehe prọfesi Jesus ikosu ke 70 C.E., edi nso mîkadaha itie adan̄aoro?

◆ Ini ewe ke prọfesi Jesus ekebemiso osu, edi ini ewe ke enye osu akamba akamba?

◆ Nso idi n̄kpọ mbubiam nsobo oro ke akpa ye akpatre edisu esie?

◆ Ntak emi akwa ukụt mîkosụhe akpatre ke nsobo Jerusalem?