Ndisan̄a Ye Abasi—Ye Nsinsi Ini Ke Ekikere
“Nnyịn iyonyụn̄ isan̄a ke enyịn̄ Jehovah Abasi nnyịn ke nsinsi-nsinsi.”—MICAH 4:5.
1. Ntak ẹkemede ndikot Jehovah “nsinsi Edidem”?
JEHOVAH ABASI ikenyeneke ntọn̄ọ. Nte odotde ẹkot enye “Andisọn̄ọ Usen,” sia edidu esie anyanarede esịm anana-utịt edem. (Daniel 7:9, 13) Jehovah oyodu ke nsinsi ini iso n̄ko. Enye ikpọn̄ edi “Nsinsi Edidem.” (Ediyarade 10:6; 15:3, NW) Ndien ke enyịn esie, tọsịn isua ẹtie “nte n̄kpọn̄ ke ini enye ebede, ye nte [ini ukpeme] efen ke okoneyo.”—Psalm 90:4.
2. (a) Nso idi uduak Abasi kaban̄a mme okopitem ubonowo? (b) Nnyịn ikpenyene ndikọn̄ idotenyịn ye ndutịm nnyịn ke nso?
2 Sia Andinọ uwem edide nsinsi, enye ama ekeme ndinọ akpa owo iba oro, Adam ye Eve, idotenyịn anana-utịt uwem ke Paradise. Nte ededi, ke ntak ntụtutọn̄, Adam ama ọduọk unen ndidu uwem nsinsi, ayakde idiọkn̄kpọ ye n̄kpa ọnọ mme andito ubon esie. (Rome 5:12) Kpa ye oro, nsọn̄ibuot Adam ikabiatke akpa uduak Abasi. Edi uduak Jehovah mme okopitem owo ndidu uwem ke nsinsi, ndien enye ọyọyọhọ uduak esie ye unana edikpu. (Isaiah 55:11) Do, odot didie ntem ndikọn̄ idotenyịn ye ndutịm nnyịn ke ndinam n̄kpọ Jehovah ye nsinsi ini ke ekikere. Ke adan̄aemi nnyịn inyenede “usen Abasi” ke ekikere, edi akpan n̄kpọ nditi nte ke utịtmbuba nnyịn edi ndisan̄a ye Abasi ke nsinsi.—2 Peter 3:12.
Jehovah Anam N̄kpọ ke Edimek Ini Esie
3. Nnyịn isan̄a didie idiọn̄ọ ite ke Jehovah enyene “edimek ini” ndiyọhọ mme uduak esie?
3 Nte mbon oro ẹsan̄ade ye Abasi, nnyịn imenyene ọkpọsọn̄ udọn̄ ke ndiyọhọ uduak esie. Nnyịn imọdiọn̄ọ ke Jehovah edi Akwa Enịm-Ini, ndien nnyịn imenyene mbuọtidem nte ke tutu amama enye iditreke ndiyọhọ uduak esie ke edimek ini esie. Ke uwụtn̄kpọ, “ke adan̄aemi ekemde uyọhọ ini, Abasi osio Eyen Esie ọdọn̄.” (Galatia 4:4) Ẹma ẹdọhọ apostle John ẹte ke “edimek ini” odu ọnọ mme ntịn̄nnịm n̄kpọ oro enye okokụtde ke idiọn̄ọ ndisu. (Ediyarade 1:1-3, NW) ‘Edimek ini odu ndikpe ikpe mme akpa-n̄kpa.’ (Ediyarade 11:18) Ke se iwakde ibe isua 1,900 ẹmi ẹkebede, ẹma ẹnọ apostle Paul odudu nditịn̄ nte ke Abasi “emenịm usen eke Enye edikpede ikpe ọnọ ererimbot ke edinen ido.”—Utom 17:31.
4. Nnyịn isan̄a didie idiọn̄ọ ke Jehovah aduak ndida utịt nsọk idiọk editịm n̄kpọ emi?
4 Jehovah ayada utịt ọsọk idiọk editịm n̄kpọ emi, koro ẹsuene enyịn̄ esie ke ererimbot mfịn. Mme idiọk owo ẹmesiaha. (Psalm 92:7) Ebede ke ikọ ye edinam mmọ, mmọ ẹsọn̄ enyịn ye Abasi, onyụn̄ abiak enye ndikụt ẹsụn̄ide ẹnyụn̄ ẹkọbọde mme asan̄autom esie. (Zechariah 2:8) Eyịghe idụhe Jehovah ọnọde uyo ete ke ẹyesọp ndida utịt nsọk ofụri ndutịm Satan! Abasi ama ebiere nnennen ini oro emi editịbede, ndien mme prọfesi Bible ndisu ẹnam an̄wan̄a nte ke nnyịn idu ke “utịt ini” idahaemi. (Daniel 12:4) Enye ọyọsọp anam n̄kpọ kaban̄a edidiọn̄ mbon oro ẹmade enye.
5. Didie ke Lot ye Habakkuk ẹkese mme idaha oro ẹkekande mmọ ẹkụk?
5 Ama ọdọn̄ mme asan̄autom Jehovah eke ini edem ndikụt utịt idiọkido. Edinen Lot ama ‘ofụhọ aban̄a mbukpo ido mme anam-idiọk.’ (2 Peter 2:7) Ke ofụhọde aban̄a mme idaha oro ẹkekande enye ẹkụk, prọfet Habakkuk ama eben̄e ete: “O Jehovah, adan̄a didie ke ndiseme, ndien afo ukopke! nditua afai nnọ fi, ndien unyan̄ake! Nsinam afo owụtde mi idiọk ido, onyụn̄ esede ukụt? Nsobo ye afai ẹnyụn̄ ẹdu mi ke iso; utọk onyụn̄ odu, en̄wan onyụn̄ emen idem.”—Habakkuk 1:2, 3.
6. Nso ke Jehovah eketịn̄ ke ibọrọ akam Habakkuk, ndien nso ke nnyịn ikeme ndikpep nto emi?
6 Jehovah ama ọbọrọ Habakkuk ubak ubak ke mme ikọ ẹmi: ‘N̄kukụt ana kan̄a ọnọ ini emi ẹnịmde; ndien enye oyosioro uyo ke utịt, idinyụn̄ isụhu nsu: enye ama ebịghi, bet enye; koro enye mîditreke ndidi, mîdinyụn̄ ibehe ini.’ (Habakkuk 2:3) Abasi ke ntem ama anam ẹdiọn̄ọ nte ke imọ iyanam n̄kpọ ke “ini emi ẹnịmde.” Okposụkedi ekemede nditie nte ke anam ubịghi, Jehovah ayanam uduak esie—ye unana edikpu!—2 Peter 3:9.
Ndinam Utom ye Ọkpọsọn̄ Ifịk
7. Okposụkedi Jesus mîkọdiọn̄ọke nnennen ini oro usen Jehovah edidide, didie ke enye akanam utom esie?
7 Ndi ndidiọn̄ọ nnennen ini oro Jehovah edinamde n̄kpọ edi se ẹyomde man nnyịn isan̄a ye Abasi ifịk ifịk? Baba, idịghe. Kere ban̄a ndusụk uwụtn̄kpọ. Jesus ama enen̄ede enyene udọn̄ kaban̄a ini emi ẹdinamde uduak Abasi ke isọn̄ nte ẹnamde ke heaven. Ke akpanikọ, Christ ama ekpep mme anditiene enye ndibọn̄ akam ete: “Ete nnyịn emi odude ke heaven: yak ikpono enyịn̄ Fo, yak Ubọn̄ Fo edi; yak inam uduak Fo; nte ẹnamde ke heaven, yak inam ke isọn̄ kpasụk ntre.” (Matthew 6:9, 10) Okposụkedi Jesus ọkọdiọn̄ọde ete ke ẹyebọrọ eben̄e esie, enye ikọdiọn̄ọke nnennen ini emi mme n̄kpọ ẹditịbede. Ke akwa prọfesi esie aban̄ade utịt editịm n̄kpọ emi, enye ama ọdọhọ ete: “Edi baba owo kiet ifiọkke iban̄a usen oro m̀mê hour oro, kpa mme angel ke heaven, Eyen inyụn̄ ifiọkke, ke mîbọhọke Ete ikpọn̄.” (Matthew 24:36) Sia Jesus Christ enyenede akpan udeme ke edisu uduak Abasi, enye ayabuana nnennen ke ndisobo mme asua Ete esie eke heaven. Nte ededi, ke ini Jesus okodude ke isọn̄, enye ikakam ifiọkke ini emi Abasi edinamde n̄kpọ. Ndi oro ama anam enye etek ke ifịk ke ndinam n̄kpọ Jehovah? Ke akpanikọ ikanamke! Ke ẹkụtde Jesus esịnde ifịk ke ndinam temple asana, “mbet Esie ẹti ẹte ẹma ẹwet ẹte, Ufụp ufọk Fo ayadia mi.” (John 2:17; Psalm 69:9) Jesus ke idemesie ama ọyọhọ kpukpru ini ye utom oro ẹkedọn̄de enye edinam, ndien enye akanam oro ye ọkpọsọn̄ ifịk. Enye n̄ko akanam n̄kpọ Abasi ye nsinsi ini ke ekikere.
8, 9. Ke ini mme mbet ẹkebụpde ẹban̄a edifiak n̄wụk Obio Ubọn̄, nso ke ẹkedọhọ mmọ, ndien didie ke mmọ ẹkenam n̄kpọ ẹban̄a oro?
8 Emi ekedi ntre n̄ko ye mme mbet Christ. Jesus ama osobo ye mmọ esisịt ini mbemiso ọkọdọkde ke heaven. Mbụk oro ọdọhọ ete: “Mmọdo, ke ini mmọ ẹbonode ọtọ kiet, mmọ ẹbụp Enye ẹte, Ọbọn̄, nte Afo ọmọn̄ ọtọn̄ọ ntak ayak Obio Ubọn̄ ọnọ Israel ke emi?” Ukem nte Eteufọk mmọ, mmọ ẹma ẹyom Obio Ubọn̄ edi. Edi, Jesus ọkọbọrọ ete: “Inaha inọ mbufo ndifiọk ini m̀mê eyo, eke Ete ekenịmde akama ke ubọk Esiemmọ. Edi mbufo ẹyebọ odudu, ke Edisana Spirit ama edi edidoro mbufo ke idem: mbufo ẹyenyụn̄ ẹdi mme ntiense Mi ke Jerusalem, ye ke ofụri Judæa ye Samaria, tutu esịm utịt ererimbot.”—Utom 1:6-8.
9 Idiọn̄ọ baba kiet idụhe nte ke mme mbet ẹma ẹkop mmemidem ke ibọrọ emi. Utu ke oro, mmọ ẹma ẹnen̄ede ẹsịn idem ke ndinam utom ukwọrọikọ ifịk ifịk. Ke ufọt urua ifan̄, mmọ ẹma ẹyọhọ Jerusalem ye ukpepn̄kpọ mmọ. (Utom 5:28) Ndien ke ufọt isua 30, mmọ ẹma ẹtat utom ukwọrọikọ mmọ ẹsịm udomo oro Paul ekekemede ndidọhọ ke ẹma ẹkwọrọ eti mbụk “ẹnọ kpukpru owo ke idak ikpa-enyọn̄.” (Colossae 1:23) Okposụkedi owo ‘mîkayakke Obio Ubọn̄ inọ Israel’ nte mme mbet ke ukwan̄ usụn̄ ẹkedoride enyịn, ndien mîkonyụn̄ iwụkke enye ke heaven ke eyo uwem mmọ, mmọ ẹma ẹka iso ẹnam n̄kpọ Jehovah ifịk ifịk ye nsinsi ini ke ekikere.
Ndidụn̄ọde Mme Uduakesịt Nnyịn
10. Nditre ndidiọn̄ọ ini emi Abasi edisobode editịm n̄kpọ Satan anam nnyịn isọn̄ọ nso?
10 Ọdọn̄ mme asan̄autom Jehovah eke eyomfịn n̄ko ndikụt nte idiọk editịm n̄kpọ emi esịmde utịt. Nte ededi, idịghe edinyan̄a nnyịn nsịn ke obufa ererimbot emi Abasi ọn̄wọn̄ọde edi akpan n̄kpọ oro ebehede nnyịn. Nnyịn iyom ndikụt nte ẹnamde enyịn̄ Jehovah asana ẹnyụn̄ ẹwụtde unen itie edikara esie. Ke ntak emi, nnyịn imekeme ndidat esịt nte ke Abasi isianke nnyịn ‘usen m̀mê hour’ emi ẹnịmde ndisobo editịm n̄kpọ Satan. Emi ọnọ nnyịn ifet ndisọn̄ọ nte ke nnyịn imebiere ndisan̄a ye Abasi ke nsinsi koro nnyịn imade enye inyụn̄ idịghe koro nnyịn inyenede mme ibụk ibụk utịtmbuba eke ibio ini.
11, 12. Ke nso usụn̄ ke ẹkemia ata ẹban̄a nsọn̄ọnda Job, ndien didie ke n̄kpọ-ata oro abuana nnyịn?
11 Ndimụm nsọn̄ọnda nnyịn n̄kama ye Abasi an̄wam n̄ko ndisọn̄ọ nte ke Devil ama akwan̄a ke ini enye ọkọdọhọde ete ke edinen Job—ke ntem ye mme owo ẹbietde enye—ẹnam n̄kpọ Abasi ke ntak ibụk ibụk udọn̄. Ke Jehovah ama eketịn̄ aban̄a asan̄autom esie Job nte eren emi ọfọnde ama, enende, onyụn̄ abakde Abasi, Satan ama odori ikọ idiọk idiọk ete: “Nte Job abak Abasi ke ikpîkpu? Nte afo usịnke ọkọ ukan enye, ye ufọk esie, ye kpukpru se enye enyenede, ukụk? Afo ọmọdiọn̄ se ubọk esie anamde, inyene esie omonyụn̄ ọtọt ke isọn̄? Edi kam nyan ubọk fo, tụk kpukpru se enye enyenede; enye iditreke ndikpọn̄ fi an̄wa-an̄wa.” (Job 1:8-11) Ebede ke ndimụm nsọn̄ọnda esie n̄kama ke idak idomo, Job ama owụt ke ubi ubi edori ikọ emi ekedi nsu.
12 Ebede ke ndimụm nsọn̄ọnda n̄kama ukem ntre, nnyịn imekeme ndiwụt ke edori ikọ Satan ekededi nte ke nnyịn inam n̄kpọ Abasi n̄kukụre koro nnyịn ifiọkde ite ke utịp emekpere edi nsu. Nditre ndifiọk nnennen ini emi Abasi edisiode usiene ọnọ idiọk editịm n̄kpọ emi ọnọ nnyịn ifet ndisọn̄ọ nte ke nnyịn imenen̄ede ima Jehovah inyụn̄ iyom ndisan̄a ke usụn̄ esie ke nsinsi. Oro owụt ete ke nnyịn imanam akpanikọ inọ Abasi inyụn̄ ibuọt idem ke mme usụn̄ esie ndise mban̄a mme n̄kpọ. Akan oro, nditre ndifiọk usen ye hour an̄wam ndinam nnyịn idu ke ukpeme inyụn̄ itaba idap ke n̄kan̄ eke spirit koro nnyịn imọfiọk ite ke utịt ekeme ndidi ke ini ekededi, nte inọ ke okoneyo. (Matthew 24:42-44) Ebede ke ndisan̄a ye Jehovah ke usen ke usen, nnyịn inam esịt adat enye inyụn̄ inọ n̄kpọ ndida mbọrọ Devil, emi osụn̄ide enye.—Mme N̄ke 27:11.
Nam Ndutịm Nọ Nsinsi Ini!
13. Nso ke Bible owụt kaban̄a edinam ndutịm nnọ ini iso?
13 Mbon oro ẹsan̄ade ye Abasi ẹfiọk ẹte ke owụt ọniọn̄ ndinam mme ndutịm oro ẹwụtde eti ibuot nnọ ini iso. Ke ẹfiọkde ẹban̄a mme mfịna ye mme unana ukeme oro ẹsan̄ade ye usọn̄, ediwak owo ẹdomo ndida nsehe uyen ye odudu mmọ nnam n̄kpọ ke eti usụn̄ man otodo mmọ ẹkpenyene okụk ke ini mmọ ẹsọn̄de. Nso, ndien, kaban̄a ini iso eke spirit nnyịn oro akam edide ata akpan n̄kpọ akan? Mme N̄ke 21:5 ọdọhọ ete: “Ekikere mme ọsọp-ubọk ẹkọ uwak ikpọn̄-ikpọn̄: edi kpukpru owo ibụmede ẹkọ unana ikpọn̄-ikpọn̄.” Ndinam ndutịm ye nsinsi ini ke ekikere enen̄ede enyene ufọn. Sia nnyịn mîfiọkke nnennen ini emi utịt editịm n̄kpọ emi edidide, oyom nnyịn ikere iban̄a mme n̄kpọ oro nnyịn idiyomde ke ini iso. Edi ẹyak nnyịn ida ukem ukem inyụn̄ inịm mme udọn̄ kaban̄a n̄kpọ Abasi akpa ke uwem nnyịn. Mme owo oro ẹnanade mbuọtidem ẹkeme ndibiere nte ke owo ndiwụk mme udọn̄ esie ke ndinam uduak Abasi edi unana edikụt n̄kpọ anyan usụn̄. Edi ndi edi ntre?
14, 15. (a) Nso n̄ke ke Jesus okotop kaban̄a edinam ndutịm nnọ ini iso? (b) Ntak emi owo inyene oro ke n̄ke Jesus mîkekwe n̄kpọ anyan usụn̄?
14 Jesus ama otop n̄ke emi esịnde un̄wam ke afan̄ emi. Enye ọkọdọhọ ete: “In̄wan̄ owo inyene kiet ọfọn n̄kpọ eti-eti; enye onyụn̄ eneni ke esịt esie ete, Ndinam nso n̄kpọ? koro nnyeneke ebiet eke mbonde n̄kpọ mi. Ndien enye ọdọhọ ete, Nyanam emi: nyowụri mme ufọk-ubon-udia mi, nnyụn̄ mbọp se ikponde ikan; do ke ndibon kpukpru mfri ye inyene mi. Ndien nyọdọhọ ukpọn̄ mi nte, Ukpọn̄ mi, omobon ediwak n̄kpọ nte edikemde ediwak isua; da nduọk-odudu, dia, nyụn̄ n̄wọn̄, nyụn̄ dat esịt. Edi Abasi ọdọhọ enye ete, Afo anana ibuot, ẹyekpak ukpọn̄ fo ke ubọk fo ke okoneyo emi; ndien anie edidia n̄kpọ eke ọkọkọde enịm? Ntem ke etie ye owo eke ọkọde inyene ọnọ idem esie, edi mînyeneke inyene ke n̄kan̄ Abasi.”—Luke 12:16-21.
15 Ndi ikọ Jesus ọkọwọrọ ke owo inyene oro ikpakanamke utom ke ukeme oro enye ekesịnde man enyene se idikemde ke ini iso? Baba, koro N̄wed Abasi esịn udọn̄ ọnọ ọkpọsọn̄ utom. (2 Thessalonica 3:10) Ndudue owo inyene oro ekedi nte ke enye ikanamke se ẹkeyomde man enyene “inyene ke n̄kan̄ Abasi.” Idem edieke enye ekpekekemede ndidia inyene obụkidem esie ke ediwak isua, ke akpatre enye akpakakpa. Enye ikekwe n̄kpọ anyan usụn̄, ikekereke iban̄a nsinsi ini iso.
16. Ntak emi nnyịn ikemede ndinyene ọyọhọ mbuọtidem ke Jehovah kaban̄a ini iso oro enyenede ifụre?
16 Ndisan̄a ye Jehovah ye nsinsi ini ke ekikere ọfọn onyụn̄ edi edikụt n̄kpọ anyan usụn̄. Enye edi mfọnn̄kan usụn̄ ndinam ndutịm nnọ ini iso. Ke adan̄aemi owụtde eti ibuot ndinam nti ndutịm kaban̄a uka n̄wed, utom, ye mme mbiomo ubon, nnyịn ikpenyene nditi kpukpru ini nte ke akananam Jehovah ikpọn̄ke mme anam-akpanikọ asan̄autom esie. Edidem David ọkọkwọ ete: “N̄kedi eyenọwọn̄, ndien ndi ebiowo n̄ko; n̄kanam n̄kwe nte ẹkpọn̄de eti owo, nte ubon esie ẹnyụn̄ ẹsan̄ade inọk.” (Psalm 37:25) Kpasụk ntre Jesus ama ọnọ nsọn̄ọ ete ke Abasi ọyọnọ se inanade kpukpru mbon oro ẹbemde iso ẹyom Obio Ubọn̄ ẹnyụn̄ ẹsan̄ade ke ndinen usụn̄ Jehovah.—Matthew 6:33.
17. Nnyịn isan̄a didie idiọn̄ọ ke utịt ekpere?
17 Okposụkedi nnyịn inamde n̄kpọ Abasi ye nsinsi ini ke ekikere, nnyịn isụk inyenyene nte usen Jehovah ekperede ke ekikere. Nte prọfesi Bible osude ọsọn̄ọ in̄wan̄în̄wan̄ nte ke usen oro ekpere. Mme ekọn̄, ndiọi udọn̄ọ, mme unyekisọn̄, ye unana udia, adianade ye edikọbọ mme ata Christian ye edikwọrọ eti mbụk Obio Ubọn̄ Abasi ke ofụri ererimbot ẹnịm isua ikie emi idiọn̄ọ. Kpukpru ẹmi ẹdi mme ikpehe utịt ini idiọk editịm n̄kpọ emi. (Matthew 24:7-14; Luke 21:11) Ererimbot ọyọhọ ye mbon oro ẹdide ‘mme ama idem, ye mme ama inyene; ẹnyụn̄ ẹbụrede idiọk mbụre, ẹseride iseri, ẹsụn̄ide isụn̄i, ẹsọn̄de ibuot ye ete ye eka, ẹnanade esịt ekọm, ẹnanade uten̄e Abasi, ẹnanade ima uduot owo; ẹnyụn̄ ẹbiatde un̄wọn̄ọ; ẹmade ebiari, ẹyakde idiọk itọn̄ akan mmọ ubọk, ẹtiede obom-obom, ẹnyụn̄ ẹsuade se ifọnde; mmọ ẹdi mme ada owo nnọ mme asua, ye mbon idiọk iwụk, ye mbon n̄kohode-idem; mmọ ẹma mbre ẹkan Abasi.’ (2 Timothy 3:1-5) Ke ndiọkeyo emi, uwem edi ọkpọsọn̄ n̄kpọ ọnọ nnyịn nte mme asan̄autom Jehovah. Usen emi Obio Ubọn̄ Jehovah edikpọride kpukpru idiọkido efep ọdọn̄ nnyịn didie ntem! Kan̄a ke emi, ẹyak nnyịn ibiere ndisan̄a ye Abasi ye nsinsi ini ke ekikere.
Ndinam Utom ye Nsinsi Ini ke Ekikere
18, 19. Nso iwụt nte ke mme anam-akpanikọ eke eset ẹma ẹnam n̄kpọ Abasi ye nsinsi ini ke ekikere?
18 Nte nnyịn isan̄ade ye Jehovah, ẹyak nnyịn inyene mbuọtidem Abel, Enoch, Noah, Abraham, ye Sarah ke ekikere. Ke ama akasiak mmọ, Paul ekewet ete: “Mmọ ẹmi kpukpru ẹkpan̄a ke mbuọtidem; mmọ ibọhọ se ẹken̄wọn̄ọde ẹnọ mmọ, edi ẹda nsan-nsan ẹkụt, ẹnyụn̄ ẹdara mme un̄wọn̄ọ oro, ẹnyụn̄ ẹnyịme ẹte mme imọ idi isen owo ye odudụn̄ ke isọn̄.” (Mme Hebrew 11:13) Mme anam-akpanikọ oro “[ẹkeyom] isọn̄ eke ọfọnde akan, oro edi, isọn̄ eke odude ke heaven.” (Mme Hebrew 11:16) Ke mbuọtidem, mmọ ẹdori enyịn ke itie oro ọfọnde akan ke idak ukara Obio Ubọn̄ Messiah Abasi. Nnyịn imekeme nditịm nnịm nte ke Abasi ayada uwem nsinsi ọdiọn̄ mmọ ke itie eke ọfọnde akan—kpa Paradise isọn̄ ke idak ukara Obio Ubọn̄.—Mme Hebrew 11:39, 40.
19 Prọfet Micah ama owụt ubiere ikọt Jehovah ndituak ibuot nnọ Abasi ke nsinsi. Enye ekewet ete: “Kpukpru mme idụt ẹyesan̄a ke enyịn̄ abasi mmọ; nnyịn iyonyụn̄ isan̄a ke enyịn̄ Jehovah Abasi nnyịn ke nsinsi-nsinsi.” (Micah 4:5) Tutu esịm n̄kpa esie, Micah ama anam n̄kpọ Jehovah ye nsọn̄ọnda. Ke ẹnamde enye eset ke n̄kpa ke obufa ererimbot, eyịghe idụhe nte ke prọfet oro ayaka iso asan̄a ye Abasi ke nsinsi nsinsi. Nso eti uwụtn̄kpọ ke oro edi ntem ọnọ nnyịn ẹmi idude uwem ke ata utịt ini emi!
20. Nso ikpedi ubiere nnyịn?
20 Jehovah owụt esịtekọm aban̄a ima enyịn̄ esie oro iwụtde. (Mme Hebrew 6:10) Enye ọfiọk ete ke edi ọkpọsọn̄ n̄kpọ ọnọ nnyịn ndimụm nsọn̄ọnda ke n̄kan̄ esie n̄kama ke ererimbot emi Devil akarade mi. Ke adan̄aemi ‘ererimbot ebede efep,’ nte ededi, “owo eke anamde se Abasi amade ododu ke nsinsi.” (1 John 2:17; 5:19) Do, ye un̄wam Jehovah, ẹyak nnyịn ibiere ndiyọ mme idomo oro isobode ke usen ke usen. Ekikere ye usụn̄ nnyịn ẹkpekam ẹwụhọ ke mme utịbe utịbe edidiọn̄ oro edima Ete nnyịn eke heaven ọn̄wọn̄ọde. Mmọ ẹmi ẹkeme ndidi eke nnyịn edieke ikade iso isan̄a ye Abasi ye nsinsi ini ke ekikere.—Jude 20, 21.
Didie ke Afo Ọkpọbọrọ?
◻ Nso idi uduak Abasi kaban̄a okopitem ubonowo?
◻ Ntak emi Jehovah mînamke n̄kpọ kan̄a ndida utịt nsọk ererimbot unana uten̄e Abasi?
◻ Ntak nditre ndidiọn̄ọ nnennen ini emi Abasi edinamde n̄kpọ mîkposụhọkede ifịk nnyịn?
◻ Nso idi ndusụk ufọn edisan̄a ye Abasi ye nsinsi ini ke ekikere?
[Mme ndise ke page 17]
Ndisan̄a ye Abasi oyom nnyịn inam n̄kpọ esie ifịk ifịk nte mme akpa mbet Christ ẹkenamde