Akpa Ikpehe: Se Nnyịn Mme Christian Inịmde

Afo ndikpep Bible ye Mme Ntiense Jehovah anam fi ọdiọn̄ọ akpanikọ. Imenịm ke se afo ekpepde anam fi enen̄ede ekpere Abasi onyụn̄ anam odori enyịn ndidu ata uwem ke Paradise ke ini Obio Ubọn̄ Abasi edikarade isọn̄ emi. Emenen̄ede enịm se Ikọ Abasi etịn̄de, omonyụn̄ enen̄ede adia ufọn mbono esop emi esidụkde. Ọmọdiọn̄ọ n̄ko nte Jehovah anamde n̄kpọ ye ikọt esie idahaemi.—Zech. 8:23.

Idahaemi afo oyomde ndina baptism mi, mbiowo ẹyetie ye afo ẹneme mme akpan n̄kpọ emi nnyịn mme Christian inịmde. (Heb. 6:1-3) Nte osụk esịnde idem ekpep n̄kpọ aban̄a Jehovah, iben̄e Enye ite ọdiọn̄ fi onyụn̄ ọnọ fi nsinsi uwem nte enye ọkọn̄wọn̄ọde.—John 17:3.

1. Nso inam oyom ndina baptism?

2. Anie edi Jehovah?

• “Jehovah edi ata Abasi ke heaven ke enyọn̄ ye ke isọn̄ ke idak. Efen idụhe.”—Deut. 4:39.

• “Afo, emi enyịn̄ fo edide Jehovah, afo ikpọn̄ edi Ata Edikon̄ ke ofụri isọn.”—Ps. 83:18.

3. Ntak ọfọnde afo esikot ata enyịn̄ Abasi?

• “Mbufo ẹbọn̄ akam ntem, ndien, ẹte: ‘Ete nnyịn emi odude ke heaven, yak ẹnam enyịn̄ fo asana.’”—Matt. 6:9.

• “Ẹyenyan̄a kpukpru owo eke ẹsemede ẹkot enyịn̄ Jehovah.”—Rome 10:13.

4. Nso idi ndusụk ikọ ke Bible emi anamde nnyịn idiọn̄ọ Owo emi Jehovah edide?

• “Jehovah, kpa Andibot utịt isọn̄, edi Abasi ke nsinsi nsinsi.”—Isa. 40:28.

• “Ete nnyịn emi odude ke heaven.”—Matt. 6:9.

• “Abasi edi ima.”—1 John 4:8.

5. Nso ke afo ekeme ndinam nnọ Jehovah Abasi?

• “Afo enyene ndima Jehovah Abasi fo ke ofụri esịt fo ye ke ofụri ukpọn̄ fo ye ke ofụri ekikere fo ye ke ofụri ukeme fo.”—Mark 12:30.

• “Edi Jehovah Abasi fo ke ana afo atuak ibuot ọnọ, onyụn̄ edi enye ikpọn̄ ke ana afo anam edisana utom ọnọ.”—Luke 4:8.

6. Ntak emi afo mûyomke ndikpọn̄ Jehovah?

• “Eyen mi, nyene ọniọn̄, nyụn̄ dat mi esịt, man n̄kụt se ndibọrọde owo eke osụn̄ide mi.”—N̄ke 27:11.

7. Afo esibọn̄ akam ọnọ anie, esinyụn̄ ọbọn̄ ke enyịn̄ anie?

• “Ke ata akpanikọ ke [ami Jesus] ndọhọ mbufo nte, edieke mbufo ẹben̄ede Ete n̄kpọ ekededi enye ọyọnọ mbufo ke enyịn̄ mi.”—John 16:23.

8. Nso ye nso ke ekeme ndisịn ke akam fo?

• “Mbufo ẹbọn̄ akam ntem, ndien, ẹte: ‘Ete nnyịn emi odude ke heaven, yak ẹnam enyịn̄ fo asana. Yak obio ubọn̄ fo edi. Yak uduak fo ada itie, nte edide ke heaven, yak edi ke isọn̄ kpasụk ntre. Nọ nnyịn udia eke ekemde nnyịn ke usen mfịn; nyụn̄ fen nọ nnyịn ke isọn eke nnyịn ikamade fi, kpa nte nnyịn n̄ko ifende inọ mmọ eke ẹkamade nnyịn isọn. Kûnyụn̄ uda nnyịn usịn ke idomo, edi nyan̄a nnyịn sio ke ubọk andidiọk.’”—Matt. 6:9-13.

• “Mbuọtidem emi nnyịn inyenede ke enye edi emi, ite, se ededi oro nnyịn iben̄ede nte ekemde ye uduak esie, enye ọbiọn̄ utọn̄ ke eben̄e nnyịn.”—1 John 5:14.

9. Nso n̄kpọ ikeme ndinam Jehovah okûkop akam owo?

• “Mmọ ẹyekot Jehovah ẹyom un̄wam, edi enye idiyereke mmọ . . . ke ntak idiọk edinam mmọ.”—Mic. 3:4.

• “Enyịn Jehovah ke ese ndinen owo, enye onyụn̄ okop n̄kpeubọk mmọ; edi Jehovah inenke iso ye mbon emi ẹnamde idiọk.”—1 Pet. 3:12.

10. Anie edi Jesus Christ?

• “Simon Peter ọbọrọ ete: ‘Afo edi Christ, Eyen odu-uwem Abasi.’”—Matt. 16:16.

11. Nso ikanam Jesus edi isọn̄?

• “Eyen owo [ikedịghe] man ẹnam n̄kpọ ẹnọ enye, edi man enye anam n̄kpọ ọnọ owo onyụn̄ ọnọ ukpọn̄ esie nte ufak ke ibuot ediwak owo.”—Matt. 20:28.

• “[Ami Jesus] nnyene nditan̄a eti mbụk obio ubọn̄ Abasi nnọ mme obio en̄wen n̄ko, koro ẹkesio mi ẹdọn̄ ẹte ndinam emi.”—Luke 4:43.

12. Nso idiwụt ke afo amama nte Jesus akakpade ọnọ fi?

• “Enye akakpa ọnọ kpukpru owo man mbon oro ẹdude uwem ẹkûdu aba ẹnọ idemmọ, edi ẹdu ẹnọ enye emi akakpade ọnọ mmọ onyụn̄ esetde.”—2 Cor. 5:15.

13. Nso utọ odudu ke ẹnọ Jesus?

• “Ẹnọ mi ofụri odudu ke heaven ye ke isọn̄.”—Matt. 28:18.

• “Abasi ekemenede enye enịm ke itie emi okon̄de onyụn̄ ọnọ enye enyịn̄ oro okon̄de akan kpukpru enyịn̄ efen.”—Phil. 2:9.

14. Ndi emenịm ke Otu Emi Ẹsede Ẹban̄a Utom Mme Ntiense Jehovah ẹdi “ofụn emi anamde akpanikọ onyụn̄ enyenede ọniọn̄,” emi Jesus ekemekde?

• “Anie ndien edi ofụn emi anamde akpanikọ onyụn̄ enyenede ọniọn̄ emi eteufọk esie ekemekde ete ese aban̄a mbonufọk imọ, onyụn̄ ọnọ mmọ udia ke nnennen ini?”—Matt. 24:45.

15. Ndi edisana spirit edi owo?

• “Angel oro ọbọrọ enye ete: ‘Edisana spirit oyodoro fi ke idem, odudu Ata Edikon̄ oyonyụn̄ ofụk fi. Ke ntak oro n̄ko eyen oro edimanade edikere edisana, Eyen Abasi.’”—Luke 1:35.

• “Ke ntre, edieke mbufo, okposụkedi emi ẹdiọkde, ẹfiọkde ndinọ nditọ mbufo nti enọ, adan̄a didie akan oro ke Ete mbufo ke heaven edinọ mbon oro ẹben̄ede enye edisana spirit!”—Luke 11:13.

16. Nso ke Jehovah akada edisana spirit esie anam?

• “Ẹkeda ikọ Jehovah ẹnam enyọn̄, ẹnyụn̄ ẹda ibifịk inua esie ẹnam kpukpru udịm mmọ.”—Ps. 33:6.

• “Mbufo ẹyebọ odudu ke ini edisana spirit edide edidoro mbufo ke idem, ndien mbufo ẹyetie ntiense ẹban̄a mi . . . tutu esịm ata utịt ikpehe isọn̄.”—Utom 1:8.

• “Owo isiakke ntịn̄nnịm ikọ N̄wed Abasi ndomokiet ke usụn̄ idemesie. Koro akananam ntịn̄nnịm ikọ itoho uduak owo, edi mme owo ẹtịn̄ ikọ eke otode Abasi nte edisana spirit adade mmọ usụn̄.”—2 Pet. 1:20, 21.

17. Nso idi Obio Ubọn̄ Abasi?

• “Abasi enyọn̄ oyowụk obio ubọn̄ eke owo mîdisoboke ifep tutu amama. Ndien idikpọn̄ke obio ubọn̄ oro inọ mbio efen. Enye ayanuak onyụn̄ osobo kpukpru mme obio ubọn̄ emi, ndien enye ayada ke nsinsi.”—Dan. 2:44.

18. Nso ufọn ke Obio Ubọn̄ Abasi edinam inọ fi?

• “Enye ọyọkwọhọde kpukpru mmọn̄eyet ke enyịn mmọ efep, n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba. N̄kani n̄kpọ ẹma ẹbe ẹfep.”—Edi. 21:4.

19. Nso inam fi ọdiọn̄ọ ke Obio Ubọn̄ Abasi ọyọsọp edi edinam isọn̄ emi ọfọn?

• “Mme mbet ẹka ẹbịne enye ke ndịbe ẹkedọhọ ẹte: ‘Sian nnyịn, Ini ewe ke mme n̄kpọ emi ẹditịbe, nso idinyụn̄ idi idiọn̄ọ edidu fo ye eke akpatre ini editịm n̄kpọ emi?’ Ndien Jesus ọbọrọ mmọ ete: ‘. . . Idụt ayadaha an̄wana ye idụt, obio ubọn̄ kiet oyonyụn̄ adaha an̄wana ye obio ubọn̄ en̄wen, ndien akan̄ ye unyekisọn̄ ẹyedu ke nsio nsio ebiet. Ẹyenyụn̄ ẹkwọrọ eti mbụk obio ubọn̄ emi ke ofụri isọn̄ nte ntiense ẹnọ kpukpru mme idụt; ndien adan̄aoro ke utịt edidi.’”—Matt. 24:3, 4, 7, 14.

• “Ndiọkeyo emi ọsọn̄de ndiyọ oyodu ke mme akpatre usen. Koro mme owo ẹyedi mme ama idem, mme ama okụk, ẹkohode idem, ẹseri iseri, ẹsụn̄i isụn̄i, ẹsọn̄ ibuot ye ete ye eka, ẹnana esịtekọm, inyeneke nsọn̄ọnda, inyeneke ndammana ima, inyịmeke ndidụk ediomi ekededi, mbon edidọk, ẹnana mfara ke idem, ẹtie obom obom, imaha eti ido, mme andida owo nnọ, ẹsọn̄ ibuot, ẹkohode idem, ẹma unọ idem inemesịt utu ke ndima Abasi, ẹnyene enyọn̄ enyọn̄ ido uten̄e Abasi edi idụhe uwem ekekem ye odudu esie.”—2 Tim. 3:1-5.

20. Nso idiwụt ke afo emenen̄ede ama Obio Ubọn̄ Abasi?

• “Ẹka iso, ndien, ndibem iso nyom obio ubọn̄ ye edinen ido esie.”—Matt. 6:33.

• “Jesus ọdọhọ mme mbet esie ete: ‘Edieke owo ekededi oyomde nditiene mi, yak enye akan̄ idemesie onyụn̄ emen eto ndutụhọ esie aka iso etiene mi.’”—Matt. 16:24.

21. Anie edi Satan, mmanie idi mme demon?

• “Mbufo ẹto ete mbufo kpa Devil . . . Enye ekedi owotowo toto ke editọn̄ọ esie.”—John 8:44.

• “Ntre ẹsio akwa dragon oro ẹduọk, kpa akani urụkikọt, enye emi ẹkotde Devil ye Satan, emi adade kpukpru mme andidụn̄ isọn̄ otụn usụn̄; ẹsio enye ẹduọk ke isọn̄, ẹnyụn̄ ẹsion̄o mme angel esie ẹduọn̄ọ ye enye.”—Edi. 12:9.

22. Nso ke Satan odori Jehovah ye mbon emi ẹnamde n̄kpọ Jehovah?

• “N̄wan oro ọbọrọ urụkikọt oro ete: ‘Nnyịn imekeme ndidia mme mfri eto in̄wan̄ emi. Edi amaedi mfri eto emi odude ke ufọt in̄wan̄, Abasi ọkọdọhọ ete, “Mbufo ẹkûdia enye, ẹkûnyụn̄ ẹtụk enye, mbak ẹdikpan̄a.”’ Ntem urụkikọt oro ọdọhọ n̄wan oro ete: ‘Mbufo idikpaha n̄kpa. Koro Abasi ọmọfiọk ete ke usen eke mbufo ẹdidiade, enyịn mbufo ẹyetara, mbufo ẹyenyụn̄ ẹtie nte Abasi, ẹfiọk eti ye idiọk.’”—Gen. 3:2-5.

• “Satan ọbọrọ Jehovah ete: ‘Ikpa ke ibuot ikpa, ye kpukpru se owo enyenede ke enye edinọ ke ibuot ukpọn̄ esie.’”—Job 2:4, 5.

23. Nso ke akpanam man owụt ke se Satan odoride Jehovah ye ikọt Jehovah edi nsu?

• “Nam n̄kpọ [Abasi] ke ofụri esịt.”—1 Chron. 28:9.

• “Tutu n̄kpa, ndiduọkke nsọn̄ọnda mi!”—Job 27:5.

24. Nso isinam owo akpa?

• “Mmọdo, nte idiọkn̄kpọ okotode owo kiet odụk ererimbot, n̄kpa onyụn̄ otode ke idiọkn̄kpọ oro odụk, ndien n̄kpa atara esịm kpukpru owo koro kpukpru mmọ ẹma ẹnam idiọkn̄kpọ.”—Rome 5:12.

25. Nso isitịbe owo ama akpa?

• “Koro mme odu-uwem ẹfiọkde ẹte ke mmimọ iyakpa; edi amaedi mme akpan̄kpa, mmọ ifiọkke baba n̄kpọ kiet.”—Eccl. 9:5.

26. Nso iditịbe inọ mbon emi ẹkpade?

• “Ndinen owo ye mme anam ukwan̄n̄kpọ ẹyeset ke n̄kpa.”—Utom 24:15.

27. Owo ifan̄ idika heaven iketiene Jesus ikara?

• “Sese! Eyenerọn̄ ke adada ke Obot Zion, owo tọsịn ikie ye aba ye inan̄ ẹnyụn̄ ẹda ye enye, kpa mmọ emi ẹwetde enyịn̄ esie ye enyịn̄ Ete esie ke ọkpọiso mmọ.”—Edi. 14:1.