Nte Afo Emeti?
Nte afo ama adara ndikot mme nsiondi Enyọn̄-Ukpeme eke ndondo emi? Ke edide ntre, afo nte eyịghe mîdụhe eyekụt nte enemde ndifiak nti mme n̄kpọ ẹtienede mi:
▫ Nso uyarade oro anamde ẹnịm ke ẹkenọ ẹbe ke nsio nsio usụn̄ oro edisana spirit akanamde n̄kpọ ke akpa isua ikie? Mme edinam oro ẹma ẹnọ uyarade oro ẹkụtde ke enyịn nte ke Abasi ikadaha aba esop Israel oro ọkọsọn̄de ke isua 1,500 nte san̄asan̄a ikọt esie inam n̄kpọ, edi unyịme esie kemi okodu ye obufa esop Christian, emi ikpọn̄îkpọn̄ edibon Eyen esie ọkọtọn̄ọde. (Men Mme Hebrew 2:2-4 domo.)—8/15, page 5.
▫ Nso inam n̄wọrọnda n̄kọri oro Mme Ntiense Jehovah ẹnyenede odu? Emi ke akpan oto edidiọn̄ Abasi. Enye edi utom Abasi. Se Mme Ntiense Jehovah ẹkpepde ke utom ukwọrọikọ mmọ ọkọn̄ọ ke Bible. Akpan n̄kpọ efen ke mmọ ndikụt unen edi ọyọhọ edidiọn̄ọ oro mmọ ẹdiọn̄ọde Christ Jesus nte enyeemi ẹkemekde nte Ibuot esop Christian.—9/1, page 19.
▫ Ntak emi Jehovah okowụtde David mbọm ke ebuana ye akwa idiọkn̄kpọ esie ye Bath-sheba? Emi ekedi akpan akpan ke ntak ediomi Obio Ubọn̄ oro Abasi akanamde ye David, edi n̄ko ekedi ke ntak David ekenyenede edu utua owo mbọm ye edikabade esịt akpanikọ esie. (1 Samuel 24:4-7; 2 Samuel 7:12; 12:13; Psalm 51:1, 2, 17)—9/15, page 10, 11.
▫ Nso utọ uyarade ita ke N̄wed Abasi Christian usem Greek ọnọ ndisọn̄ọ itie Messiah Jesus? Udịm ubon Jesus edi akpa uyarade. (Matthew 1:1-16; Luke 3:23-38) Uyarade efen edi prọfesi oro osude. Ata ediwak prọfesi ẹdu, utọ nte enyeoro ẹkụtde ke Daniel 9:25, owụtde Jesus nte Messiah. Ọyọhọ uyarade ita edi ikọ ntiense emi otode Abasi; enye ama ọnọ emi utịm ikata ke uyo esie. (Matthew 17:5; Luke 3:21, 22; John 12:28)—10/1, page 10, 12.
▫ Nso ke ikọ Jesus ọkọwọrọ ke ini enye ọkọdọhọde, nte ẹwetde ke Matthew 24:37 ete: “Koro nte mme usen Noah ẹkedide, kpasụk ntre ke edidi Eyen Owo eyenyụn̄ edi”? Noah ama ọbọp ubom onyụn̄ ọnọ mme idiọkowo ntọt ke ediwak isua mbemiso Ukwọ ekedide onyụn̄ ọkpọride idiọk editịm n̄kpọ ererimbot oro efep. Kpasụk ntre, edidu Christ oro enyịn mîkwe ebịghi ke ufan̄ ini emi esịnede ediwak isua, kpa ini emi ẹnọde ikọ ntiense ke ofụri ekondo, mbemiso enye n̄ko edisịmde utịt ke akwa nsobo.—10/1, page 16.
▫ Nso idi ndusụk akpan n̄kpọ kaban̄a eti ukpepn̄kpọ Bible ubon? Ana ededep ifet ẹnọ ukpepn̄kpọ emi. Nnyịn ikpenyeneke ndiyak mme edinam TV m̀mê mme n̄kpọ eken ẹmen enye efep. Ana ẹkere ẹban̄a mme akpan udọn̄ eke ubon. Da mme mbụme oro anamde ẹfiọk ekikere owo nditịm mfiọk nte ke nditọ ẹnen̄ede ẹfiọk se ẹkpepde. (Matthew 17:25) Nam idaha oro edi ifụre ifụre. Sịn ufiop, nyụn̄ nam kpukpru owo ẹnyene ebuana ke ukpepn̄kpọ oro.—10/15, page 17.
▫ Mme Christian ẹkpekere ọkpọsọn̄ adan̄a didie ẹban̄a m̀mê ẹsịn n̄kpọ oro ẹdade iyịp ẹnam ke udia oro ẹnamde? Mme Christian ẹkpenyene ndikpeme mbiọn̄ọ edidu ke editịmede esịt mban̄a ikpîkpu n̄kpọ oro ẹkerede-kere m̀mê étè étè ikọ, ndien oyom eti ibuot idem ke se iban̄ade edidụn̄ọde n̄wed oro ẹwetde ẹdian m̀mê ndibụp mme anyamunam mbụme. Nte ededi, edieke ẹfiọkde nte ke ẹda iyịp ẹnam n̄kpọ ntatara ntatara ke n̄kann̄kụk—edide ke udia m̀mê ke ibọkusọbọ—mme Christian ẹkpenyene ndibiere ndinịm ewụhọ Abasi ndibet iyịp. (Utom 15:28, 29)—10/15, page 30, 31.
▫ Didie ke n̄wed Mme N̄ke owụt nte mme usụn̄ unọ ukpep oro ẹkekamade ke Israel ọkọtụn̄ọde ke n̄kan̄ eke spirit? N̄wed Mme N̄ke owụt ete ke uduak ekedi ndikpep “ọkọi” mme utọ n̄kokon̄ edu nte ọniọn̄, ntụnọ, asian, ikike, eti ubiere, mbufiọk, ifiọk ye ukeme ukere n̄kpọ—kpukpru emi ke ‘nditen̄e Jehovah.’ (Mme N̄ke 1:1-7; 2:1-14)—11/1, page 12.
▫ Nso ekikere oro adade ukem ukem kaban̄a unọ ukpep ke n̄kparawa owo ẹkpenyene mfịn? Mme Christian ẹkenyene ndida unọ ukpep nte usụn̄ ndisịm se ẹyomde. Uduak mmọ ke ukperedem ini ẹmi edi ndinam n̄kpọ Jehovah nte mmọ ẹkekeme ndinyụn̄ nsịn ifịk nte ẹkekeme ke utom uyọhọ-ini edieke mmọ ẹkemede.—11/1, page 18.
▫ Ntak emi Jehovah okoyomde idụt Israel ekpe ọyọhọ mbak duop? Akpa, man mmọ ẹkeme ndiwụt esịtekọm oro mmọ enyenede ẹnọ eti ido Jehovah ke ataata edinam. Ọyọhọ iba, man mmọ ẹtịp n̄kpọ ẹsịn ke ndin̄wam mme Levite, ẹmi ndien ẹdikemede nditịn̄ enyịn ke mme utom mmọ, ẹsịnede edikpep Ibet. (Se 2 Chronicles 17:7-9.)—12/1, page 9.
▫ Nso idi ọyọhọ mbak duop oro ẹdọhọde mme Christian ẹda ẹdi? (Malachi 3:10) Ọyọhọ mbak duop aban̄a udeme n̄kpọ oro edide eke nnyịn oro nnyịn idade isọk Jehovah m̀mê idade inam n̄kpọ ke utom esie. Emi edi idiọn̄ọ ima oro nnyịn inyenede inọ enye ye edidiọn̄ọ oro nnyịn idiọn̄ọde ite ke nnyịn inyene enye.—12/1, page 15.