Uwem ye Utom Jesus
Akpatre Passover Jesus Amasan̄a Ekpere
NTE Tuesday, Nisan 11, asan̄ade ekpere, Jesus omokụre edinọ mme apostle esie ukpep ke Obot Olive. Nso ukak ukak usen oro ọyọhọde ye utom ke emi edi ntem! Idahaemi, iso-ọfọn ke adan̄aemi afiakde ọnyọn̄ Bethany ke okoneyo oro, enye asian mme apostle esie ete: “Mbufo ẹfiọk ẹte, usen iba ẹma ebe, passover edi, ndien ẹma ẹda Eyen Owo ẹnọ, ẹte ẹwot Enye.”
Ke ndan̄nsiere, Wednesday, Nisan 12, Jesus nte an̄wan̄ade ọduọk odudu ke ndobo ndobo ebiet ye mme apostle esie. Ke edem usen oro ekebede, enye ama asua ọnọ mme adaiso ido ukpono an̄wan̄wa, ndien enye ọmọfiọk ete ke mmọ ke ẹyom usụn̄ ndiwot imọ. Ntre ke Wednesday enye isioho idemesie iwụt an̄wan̄wa, sia enye mîyomke n̄kpọ ndomokiet otịmerede usọrọ Passover oro enye oyomde ndidia ye mme apostle esie ke mbubịteyo ndan̄nsiere oro.
Mi kan̄a, ikpọ oku ye mbiowo obio ẹbono ọtọkiet ke esịt okụre akwa oku emi ekerede Caiaphas. Ke ẹyatde esịt ẹban̄a esuene oro Jesus ekesuenede mmọ edem usen oro, mmọ ke ẹnam ndutịm ndida n̄kari mmụm enye nnyụn̄ nnam ẹwot enye. Edi mmọ ẹkaiso ẹdọhọ ẹte: “Ikûnam ke ini usọrọ, mbak ndutịme editịbe ke otu mbio obio.” Mmọ ẹkop ndịk ẹban̄a mbio obio, sia mbio obio ẹmade Jesus.
Ke adan̄aemi mme adaiso ido ukpono oro ẹdụkde idiọk odu ndiwot Jesus, esenowo emen mmọ. Ke n̄kpaidem mmọ, enye edi kiet ke otu mme apostle Jesus, Judas Iscariot, kpa enyeemi Satan ekesịnde enye idiọk ekikere ke esịt ndida Eteufọk esie nnọ! Mmọ ẹkop inemesịt didie ntem ke ini Judas obụpde mmọ ete: “Mbufo ẹnyịme ndinọ mi nso, ndien nyeda Enye nyak nnọ mbufo?” Mmọ ke idatesịt ẹnyịme ndikpe enye mbak silver 30, kpa ekọmurua ofụn nte ekemde ye Ibet ediomi Moses. Ọtọn̄ọde ke ini oro kaiso, Judas oyom eti ifet ndida Jesus nyak nnọ mmọ ke ini otuowo mîdụhe.
Nisan 13 ọtọn̄ọ ke Wednesday ke utịn ama okosop. Jesus ama oto Jericho edibehe ke Friday, ntre emi edi akpatre ye ọyọhọ okoneyo itiokiet oro enye abiatde ke Bethany. Ke ndan̄nsiere, Thursday, ẹyeyom ẹnam akpatre ntịmidem ẹnọ Passover, emi edidade itie ke utịn ama okosop, ke ini emi ana ẹwot eyenerọn̄ Passover ndien ekem ẹfọp enye ofụri. M̀mọ̀n̄ ke mmọ ẹdinịm usọrọ emi, ndien mmanie ẹdinam ntịmidem?
Jesus inọhọ ọyọhọ mbụk ntre, iso-ọfọn mbak Judas editịn̄ ọnọ ikpọ oku man ẹdimụm Jesus ke ini usọrọ Passover. Edi idahaemi, iso-ọfọn ke uwemeyo Thursday, Jesus etie ke Bethany osio Peter ye John ọdọn̄ utom, ọdọhọde ete: “Ẹka ẹkenam passover ẹben̄e ẹnịm ẹnọ nnyịn, man nnyịn idia.”
Mmọ ẹbụp ẹte, “Ke m̀mọ̀n̄ ke oyom inam n̄kpọ iben̄e inịm?”
Jesus anam an̄wan̄a ete, “Ke ini mbufo ẹdidụkde ke obio, owo eke obiomde aban̄ mmọn̄ eyesobo ye mbufo; ẹtiene enye ẹdụk ke ufọk eke enye edidụkde. Ẹnyụn̄ ẹdọhọ enyeneufọk ẹte, Andikpep ọdọhọ fi ete, Ubet isen odu m̀mọ̀n̄, eke ndidiade passover ye mbet Mi? Ndien enye eyewụt mbufo akwa ubet enyọn̄, emi ẹma ẹkediọn̄ ẹma: ẹtịm n̄kpọ do ẹben̄e.”
Nte eyịghe mîdụhe enyeneufọk oro edi mbet Jesus emi iso-ọfọn ama akananam n̄kpọ aban̄a eben̄e Jesus ndida ufọk esie nnịm akpan edinam emi. Ke usụn̄ ekededi, ke ini Peter ye John ẹbehede ke Jerusalem, mmọ ẹkụt kpukpru n̄kpọ kpa nte Jesus ekebemde iso etịn̄. Ntre mmọ mbiba ẹkụt ẹte ke eyenerọn̄ odu ye nte ke ẹnam kpukpru ndutịm oro ẹyomde man ẹse ẹban̄a udọn̄ mme adia Passover ẹmi ẹdide owo 13, Jesus ye mme apostle esie 12. Matthew 26:1-5, 14-19; Mark 14:1, 2, 10-16; Luke 22:1-13; Exodus 21:32.
◆ Jesus nte an̄wan̄ade anam nso ke Wednesday, ndien ntak-a?
◆ Nso mbono ke ẹnịm ke okụre akwa oku, ndien ke nso ntak ke Judas aka ebịne mme adaiso ido ukpono?
◆ Mmanie ke Jesus osio ọdọn̄ ẹka Jerusalem ke Thursday, ndien kaban̄a nso uduak?
◆ Nso ke mbon oro ẹsiode ẹdọn̄ mi ẹkụt oro inikiet efen ayararede mme utịbe utịbe odudu Jesus owụt?