Akam Mmanie ke Ẹsibọrọ?
JEHOVAH edi Abasi oro esibọrọde akam. Ke akpanikọ, Ikọ esie, kpa Bible, okot enye “Andikop akam.” (Psalm 65:2, NW) Enye esinyịme ndibọrọ akam. Edi akam mmanie ke enye esinen̄ede ọbọrọ?
Abasi esibọrọ akam mbon oro ẹnemde enye esịt. Mmọ ẹnyene ukpono ukpono edu eke andiwet psalm emi ọkọdọhọde ete: “Kpa nte ebet en̄wekde oyom idịm mmọn̄, kpa ntre ke ukpọn̄ mi en̄wek oyom fi, O Abasi. Itọn̄ Abasi, kpa eke Abasi uwem, amasat mi ukpọn̄.” (Psalm 42:1, 2) Edi, nso uyarade idu do ndiwụt nte ke Jehovah esibọrọ akam mme ata andituak ibuot nno enye?
Uyarade Nte ke Abasi Esibọrọ Akam
Bible esịne ntatara n̄wetnnịm n̄kpọ owụtde nte ke Jehovah esibọrọ akam mme anam-akpanikọ asan̄autom esie. Ke uwụtn̄kpọ, ke ini Edidem Jehoshaphat eke Judah ọkọbọn̄de akam oyom edinyana, Abasi ama ọbọrọ akam esie onyụn̄ ọnọ enye edikan ebe ke ndinam mme asua esie ẹsobo kiet eken. (2 Chronicles 20:1-26) Ukem oro, ke ini Edidem Hezekiah okosobode ọkpọsọn̄ udịmekọn̄, enye ke nsụhọdeidem ama ọbọn̄ akam ọnọ Abasi oyom un̄wam. Hezekiah ama okụt edinyan̄a Jehovah ke ini angel kiet okosobode mbonekọn̄ Assyria 185,000 ke okoneyo kiet.—Isaiah 37:14-20, 36-38.
Ntak emi Abasi ọkọbọrọde mme akam oro-o? Ke idaha mbiba, ndidem oro ẹkekpe ubọk ẹte ke ndikpu ke en̄wan oro eyetụk enyịn̄ Jehovah idiọk idiọk. (2 Chronicles 20:6-9; Isaiah 37:17-20) Mmọ ẹkekere ẹban̄a etop esie. The International Standard Bible Encyclopedia ọdọhọ ete, “Akakan uduak akam idịghe sụk ke ufọn andiben̄e edi ke ukpono enyịn̄ Abasi.” Ke ntre, mme anam-akpanikọ asan̄autom Jehovah ẹkeme ndidori enyịn nte ke enye eyen̄wam mmimọ “kaban̄a enyịn̄ esiemmọ.” N̄wetnnịm n̄kpọ oro owụtde nte ke ẹma ẹsibọrọ mme utọ akam oro ọnọ ikọt Abasi uko nte ke enye esikop akam mmọ.—Psalm 91:14, 15; 106:8; Mme N̄ke 18:10.
Idem ọkpọkọm idaha oro abuanade enyịn̄ Jehovah, nte ededi, Abasi esibiere m̀mê ikpọbọrọ ndusụk akam m̀mê ikpọbọrọke. Enye ekeme ndinyene nti ntak nditre ndibọrọ ndusụk akam. Edieke nnyịn ikerede ke owo ikopke akam nnyịn, ọfọn ndikere ntak emi oro ekemede ndidi ntre.
Ntak Emi Owo Mîsibọrọke Ndusụk Akam
Jehovah inikiet ama asian nditọ Israel ete, “Ndien n̄ko ke ini mbufo ẹwakde ndibọn̄ akam, ami n̄kopke.” Ke owụtde ntak, enye ama akaiso ete: “Iyịp ọmọyọhọ mbufo ke ubọk.” (Isaiah 1:15) Didie ke owo ekededi okpofụmi ibet Jehovah ndien enye osụk eyere akam esie? N̄ke Bible kiet ọmọnọ in̄wan̄în̄wan̄ ibọrọ, ọdọhọde ete: “Owo eke ọwọn̄ọrede utọn̄ esie man okûkop mbet, idem akam esie edidi n̄kpọ ndek.”—Mme N̄ke 28:9.
Bible ọnọ ntak en̄wen oro owo mîsikopke ndusụk akam, ke ini enye ọdọhọde ete: “Mbufo ẹben̄e, edi inọhọ mbufo, koro mbufo ẹben̄ede ke idiọk usụn̄, man ẹda ẹdep n̄kpọ mbre.” (James 4:3) Baba, Jehovah idibọrọke akam ẹbọn̄de ndiyụhọ ndiọi uduak. Ana nnyịn n̄ko iti ite ke, Abasi yak idọhọ, isibọhọ ẹwụhọ otode mme owo. Enye edi Owo emi ebierede nte enye edibọrọde akam nnyịn.
Akam ẹmi anade ẹbọrọ ẹdi mmọ oro ẹbọn̄de ẹnọ Abasi ke edisana esịt, ye nnennen uduakesịt, ye ke edimek usụn̄ esie—ebe ke Jesus Christ. (John 14:6, 14) Edi idem mbon oro akam mmọ ẹnyenede mme n̄kpọ oro ẹyomde mi ndusụk ini ẹsikere ẹte ke owo ikopke mmo. Ntak emi Abasi mîsibọrọke ndusụk akam mme asan̄autom esie ndondo oro-o?
Jehovah ọdiọn̄ọ mfọnn̄kan ini ndibọrọ akam. Okposụkedi eyeneren eben̄ede enan̄ukwak, ekeme ndidi ete esie ididepke inọ enye tutu eyen oro okpon ekem ndiwat enye ifụre ifụre. Oro ekeme ndidi akpanikọ ye ndusụk akam mmọ oro ẹmade Abasi. Ke ọfiọkde se ifọnde ikan inọ mmọ, enye ọnọ se ẹyomde ke ata eti ini.
Edi, mme asan̄autom Jehovah inyeneke kpukpru n̄kpọ oro mmọ ẹbọn̄de akam ẹyom. Sia ẹdide mme anana mfọnmma, mmọ ẹkeme ndiyom ndusụk n̄kpọ oro mîdifọnke ye mmọ. Ima ima Ete mmọ eke heaven idinọhọ mmọ n̄kpọ ekededi oro ọnọde unan, koro enye edi Andinọ “kpukpru eti edinọ ye kpukpru enọ eke ẹfọnde ẹma.” (James 1:17) Kpasụk ntre, ekeme ndidi Abasi idinọhọ n̄kpọ oro mînyeneke ufọn ke usụn̄ ukere n̄kpọ esie. (Men 2 Corinth 12:7-10 domo.) Enye esibọrọ akam oro ẹdude ke n̄kemuyo ye ekikere ye uduak esie kaban̄a ikọt esie.—1 John 5:14, 15.
Ẹma “Ẹyere” Jesus
Jesus Christ ekedi owo oro ekesibọn̄de akam. (Matthew 6:9-13; John 17:1-26) Enye ama enyene ọyọhọ mbuọtidem nte ke Ete esie eke heaven eyekop onyụn̄ ọbọrọ akam imọ. Jesus inikiet ama ọdọhọ ete: “Ete, . . . Ami [mmo]nyụn̄ mfiọk nte okop uyo Mi kpukpru ini.” (John 11:41, 42) Edi nte Jesus ikokụtke edikpu ke utịt utom esie eke isọn̄? Nte enye adan̄aoro ikofiorike ite: “Abasi Mi, Abasi Mi, nsinam Afo ọkpọn̄de Mi?”—Matthew 27:46.
Ke ini Jesus eketịn̄de mme ikọ oro, enye nte an̄wan̄ade okosu prọfesi aban̄ade n̄kpa esie. (Psalm 22:1) Ke usụn̄ifiọk oro enyenede-nyene adan̄a, ekeme n̄ko ndidi Jesus okowụt nte ke Jehovah ama emen ukpeme Esie efep onyụn̄ ayak Eyen esie akpa ubiak ubiak ye esuene esuene n̄kpa man ẹdomo nsọn̄ọnda esie ẹsịm utịt. Ndidụn̄ọde mme n̄kpọntịbe eke akpatre usen uwem Jesus eke isọn̄ oro owụt nte ke Abasi ama okop akam esie.
Ke okoneyo oro ẹkemụmde enye, Jesus ama ọbọn̄ akam ke in̄wan̄ Gethsemane. Enye ama ekpe ubọk utịm ikata ete: “O Ete Mi, edieke usụn̄ odude, yak cup emi ebe ọkpọn̄ Mi.” (Matthew 26:39, 42, 44) Jesus ikemen̄eke ndinọ uwem esie nte ufak ubonowo oro onịmde ke akpanikọ. Baba, edi enye nte an̄wan̄ade ama ekere ntotụn̄ọ ntotụn̄ọ aban̄a esuene oro n̄kpa ke eto ndutụhọ nte owo isụn̄i ekemede ndida nsọk ima ima Ete esie. Ndi Jehovah ama okop akam Jesus?
Ediwak isua ke ukperedem, apostle Paul ama ewet ete: “Ke mme usen emi Enye odude ke obụkidem Enye ọkọbọn̄ akam onyụn̄ anam n̄kpeubọk ye ọkpọsọn̄ eseme ye mmọn̄eyet ọnọ Abasi emi ekemede ndinyan̄a Enye nsio ke n̄kpa, Abasi onyụn̄ eyere Enye, koro Enye eten̄ede Abasi.” (Mme Hebrew 5:7; Luke 22:42, 44) Ih, ke okoneyo ọkpọsọn̄ ubiak oro ekebemde n̄kpa esie iso, ẹma “ẹyere” Jesus. Edi didie?
Jehovah ama ọdọn̄ angel “ọbiọn̄ọde [Jesus] ke iso ndisọn̄ọ Enye idem.” (Luke 22:43) Ke ẹsọn̄ọde idem, Jesus ama ekeme ndisak iso nse n̄kpa ke eto ndutụhọ. Nte an̄wan̄ade, Jehovah ndien ama ọnọ enye nsọn̄ọ nte ke n̄kpa esie ke eto ididaha esuene isọk enyịn̄ Abasi edi ke edidi n̄kpọ oro ẹdidade ẹnam enye asana ke akpatre. Ke akpanikọ, n̄kpa Jesus ke eto ndutụhọ ama eberede usụn̄ ọnọ mme Jew ẹmi ke n̄kan̄ eken ẹkenyenede isụn̄i ke idak Ibet, ndidi se ẹnyan̄ade ẹsio ke ubiomikpe n̄kpa.—Galatia 3:11-13.
Ke usen ita ẹbede, Jehovah ama anam Jesus eset onyụn̄ odorode enye ikọ isụn̄i ekededi oro okodorode enye ke idem efep ebe ke ndimenede enye nnọ itie oro ọfọnde akan ke heaven. (Philippi 2:7-11) Nso utịbe utịbe usụn̄ ndibọrọ akam Jesus aban̄ade “cup emi”! Ẹma ẹbọrọ akam oro ke usụn̄ Jehovah. Ndien Jesus ama enyene mme utịbe utịbe edidiọn̄ koro enye ọkọdọhọde Ete eke heaven ete: “Okûdi nte Ami nnyịmede, yak edi nte Afo onyịmede.”—Luke 22:42.
Nte Jehovah Ọbọrọde Akam Mfịn
Ukem nte Jesus, mbon oro ẹyomde ndinem Jehovah esịt mfịn kpukpru ini ẹkpenyene ndiben̄e nte yak uduak Abasi ada itie. Oyom mmọ ẹnyene mbuọtidem nte ke Jehovah edibọrọ akam mmimọ ke usụn̄ oro edidade ufọn oro ọfọnde akan isọk mmọ. Ke akpanikọ, enye ‘eyenam n̄kpọ awak akan se nnyịn iben̄ede inyụn̄ ikerede.’—Ephesus 3:20.
Akparawa an̄wan Christian kiet emi okodụn̄de ye ete ye eka esie ẹmi mînịmke ke akpanikọ ama okụt nte itien̄wed oro edide akpanikọ. Ke leta otode Watch Tower Society, ẹma ẹdọhọ enye ekere ke akam aban̄a ifet edibọ san̄asan̄a utom isụn̄utom. Okposụkedi udọn̄esịt esie ekedide ndidu ke ufọk man an̄wam ete ye eka esie ẹkabade ẹdi mme Christian, enye ama obụp Abasi ke akam ete: “Nso idi uduak fo? Nte edi ndinyịme ikot emi kpa ye ubiọn̄ọ ete ye eka mi, mîdịghe nte enye edi ndin̄wam ete ye eka mi ebe ke ndika iso ndụn̄ ye mmọ?” Kpukpru ini emi enye ọkọbọn̄de akam, ubieresịt esie ama ọdọhọ enye onyịme ikot oro. Enye ama ebiere ete ke emi edi ibọrọ otode Jehovah.
Abasi ama ọsọn̄ọ eyenan̄wan emi idem ndiyịre ke ubiere esie. Ke ini ẹkedọhọde enye ọwọrọ aka Isuo Awaji, Japan, ete ye eka esie ẹma ẹdịghe ẹnyụn̄ ẹnam ubiọn̄ọ mmọ ọsọn̄ ubọk akan. Nte ededi, ke mîkemeke ndinam enye okpụhọde ekikere esie, eka esie ama ebiere ndikpep Bible man ọdiọn̄ọ ntak emi eyenan̄wan esie akanamde utọ ubiere oro. Ọfiọn̄ ita ke ukperedem ete ye eka esie ẹma ẹka ẹkese enye. Ke ẹkụtde nte Mme Ntiense Jehovah en̄wen ẹkekamade enye mfọn mfọn, emi ama otụk ete esie ke idem ntotụn̄ọ ntotụn̄ọ ndien enye ama atua ke ini owo ndomokiet mîkodụhe. Ikebịghike enye ama ọtọn̄ọ ndikpep Bible. Ke akpatre ete ye eka akparawa an̄wan emi ẹma ẹna baptism ẹnyụn̄ ẹtọn̄ọ ndinam n̄kpọ Jehovah ke edinam akpanikọ. Nte Jehovah Abasi ikọdiọn̄ke Christian an̄wan emi uwak uwak?
Ẹbọrọ Akam Mmọ
Nte afo emeti mme ikọ n̄wan oro ẹkesiakde ke ntọn̄ọ ntọn̄ọ ibuotikọ oro ekebemde iso? Enye akananam ikekereke nte ke ẹma ẹbọrọ akam imọ. Edi, enye ke ukperedem ama edifiọk ete ke Abasi ke ọkọbọrọ akam esie. N̄wan oro ama onịm n̄wetnnịm n̄kpọ ke mme akpan n̄kpọ aban̄ade akam esie. Usen kiet enye ama odụn̄ọde n̄wed n̄wetnnịm n̄kpọ esie onyụn̄ edifiọk ete ke Jehovah ama okop n̄wakn̄kan akam esie, idem ye mbon oro enye ke idemesie ama ekefre! Enye ke ntre ama ọdiọn̄ọ nte ke Abasi ke ekekere aban̄a imọ onyụn̄ ọbọrọ akam imọ ke ima ima usụn̄ oro ọnọde imọ n̄kpọnn̄kan ufọn.
Edieke afo ekerede ke owo ibọrọke akam fo, bụp idemfo ete: ‘Ndi ami mmenyene ọkpọkpọ itie ebuana ye Jehovah, kpa “Andikop akam”? Edieke mmenyeneke, nte ami ke nnam usio-ukot ndikpep n̄kpọ mban̄a enye nnyụn̄ n̄kabade ndi kiet ke otu asan̄autom esie oro ayakde idem ọnọ’? Enye esibọrọ akam mbon oro ẹmade enye ẹnyụn̄ ẹnamde uduak esie. Mmọ “e[si]kọbọ ke edibọn̄ akam” ndien ẹsiyere mmọ mfọn mfọn, kpa nte ẹkeyerede Jesus. (Rome 12:12) Ntre, ‘n̄wan̄a esịt fo’ nọ Jehovah nyụn̄ nam uduak esie. (Paslm 62:8) Do ẹyekop akam fo.
Mfịn, ediwak miliọn owo ke ẹbọn̄ akam ẹyom n̄kpọ oro edide san̄asan̄a n̄kpọ. Ih, ndien ke ẹkop akam mmọ. Ẹyak nnyịn ise ntak emi nnyịn ikemede ndinịm ke akpanikọ nte ke ẹyebọrọ mme utọ akam oro.