Uwem ye Utom Jesus

Edida Nnọ ye Edimụm

EBE ufọt okoneyo nte Judas adade akwa otu mbonekọn̄, ikpo oku, mme Pharisee, ye mbon eken odụk in̄wan̄ Gethsemane. Mme oku ẹma ẹnyịme ndikpe Judas mbak silver 30 man ada Jesus ọnọ.

Mbemiso, ke ini ẹkesiode Judas ẹfep ke udia Passover, enye nte an̄wan̄ade akaka nnennen ebịne ikpọ oku. Mmọemi inikiet inikiet ẹma ẹkot ikpo owo mmọ ẹbon, ọkọrọ ye otu mbonekọn̄. Iso-ọfọn Judas ekebemiso ada mmọ aka ebiet emi Jesus ye mme apostle esie ẹkedude ẹnịm Passover. Ke okụtde ete ke mmọ ẹma ẹkpọn̄ do, akwa otuowo ẹmi ẹkamade n̄kpọekọn̄ ẹnyụn̄ ẹkamade utueneikan̄ ye nsaran̄ikan̄ ẹma ẹtiene Judas ẹwọrọ ke Jerusalem ẹnyụn̄ ẹsan̄a ẹbe ke Itịghede Kidron.

Nte Judas adade udịmowo oro usụn̄ ọdọk Obot Olive, enye onịm ke akpanikọ ete ke imọ imọfiọk ebiet emi idikụtde Jesus. Ke urua oro ekebede, nte Jesus ye mme apostle ẹkenamde isan̄ ndien ndien to ke Bethany sịm Jerusalem, mmọ ẹma ẹsiwak ndiwaha in̄wan̄ Gethsemane nduọk odudu nnyụn̄ nnyene nneme. Edi, idahaemi, ye ekemede ndidi ekịm ofụk Jesus ke idak eto olive, didie ke mbonekọn̄ oro ẹdidiọn̄ọ enye? Ekeme ndidi akanam mmọ ikwe enye. Judas ọnọ idiọn̄ọ, ọdọhọde ete: “Owo emi nditịmde Enye inua edi Enye; ẹmụm Enye, ẹda Enye ẹdaha sụn̄-n̄.”

Judas ada akwa otuowo usụn̄ odụk in̄wan̄ oro, ada okụt Jesus ye mme apostle esie, onyụn̄ aka nnennen ebịne enye. Enye ọdọhọ ete “Mmọkọm Fi, Rabbi,” onyụn̄ otịm enye inua ima ima.

Jesus ete enye, ‘Ufan, nso ke afo edi mi ndinam?’ Ndien, ke ọbọrọde mbụme esie enye ọdọhọ ete: “Judas, nte ada ntịminua ada Eyen Owo ọnọ?” Edi oro ekem andida enye nnọ! Jesus ọwọrọ edi un̄wana nsaran̄ikan̄ oro osụk asakde ye utueneikan̄ onyụn̄ obụp ete: “Mbufo ẹyom anie?”

Ẹbọrọ ete, “Iyom Jesus a-Nazareth.”

“Ami ndi Enye,” Jesus ọbọrọ, nte enye adade ke iso kpukpru mmọ uko uko. Ye n̄kpaidem ke ndikụt uko esie mînyụn̄ ifiọkke se ẹkpenamde, mmọ ẹkịbe ẹfiak edem ẹkeduọn̄ọ ke isọn̄.

Jesus akaiso sụn̄sụn̄ ete, “Mmọdọdọhọ mbufo nte, Ami ndi Enye. Ntem edieke mbufo ẹyomde Mi, ẹyak mmọemi ẹnyọn̄ọ eke mmọ.” Esisịt ini mbemiso ke ubetenyọn̄, Jesus ama asian Ete esie ke akam ete ke imọ ima ikpeme mme anam-akpanikọ apostle imọ ndien ndomo owo mmọ kiet isopke “ke mîbọhọke eyen nsobo.” Ntre, man ikọ esie okposu, enye ọdọhọ ete ẹyak mme anditiene imọ ẹnyọn̄ọ.

Nte mbonekọn̄ ẹfiakde ẹdọn̄ idem, ẹdaha ẹda, ẹnyụn̄ ẹtọn̄ọ ndibọp Jesus, mme apostle ẹfiọk se iyomde nditịbe. Mmọ ẹbụp ẹte, “Ọbọn̄, m̀mê nnyịn isio ofụt?” Mbemiso Jesus ọbọrọde, Peter, adabade kiet ke otu ofụt iba oro mme apostle ẹkedade edi, an̄wana ye Malchus, ofụn akwa oku. Ofụt Peter isịmke ibuot ofụn oro edi osịbe enye utọn̄ nnasia efep.

“Eyak ẹtre adan̄aoro,” ntre ke Jesus ọdọhọ nte enye akpande emi. Ke emende utọn̄ emi enye ọkọk unan oro. Ekem enye ekpep akpan ukpepn̄kpọ kiet, owụkde Peter ete: “Sịn ofụt fo ke efọk: koro kpukpru owo eke ẹmende ofụt ẹyekpan̄a ke ofụt. M̀mê ese ete n̄kemeke ndikpe Ete Mi ubọk, mbọ Enye se ibede legion mme angel duopeba idahaemi?”

Jesus onyịme ẹmụm imọ. Koro enye anam an̄wan̄a ete: “Edi se ẹwetde, ete, N̄kpo enyene ndiwọrọ ntem, edinam didie ndien osu?” Ndien enye adian do ete: “Nte ndin̄wọn̄ke cup emi Ete Mi ọkọnọde Mi?” Enye odu ke ọyọhọ n̄kemuyo ye se Abasi aduakde ọnọ enye!

Ekem Jesus etịn̄ ikọ ye otuowo. Enye obụp ete, “Nte mbufo ẹmewọn̄ọ ẹdi ye ofụt ye eto ndimụm Mi nte n̄kpọ eke ẹbịnede owo n̄wo? Mma ntie ye mbufo ke temple n̄kpep n̄kpọ ke usen ke usen, edi mbufo imụmke Mi. Edi kpukpru emi ọwọrọ, man se mme prọfet ẹkewetde osu.”

Ke ọtọ oro udịm mbonekọn̄ ye akwa owoekọn̄ ye ikpọ owo Jew oro ẹmụm Jesus ẹnyụn̄ ẹbọp enye. Ke ẹkụtde emi, mme apostle ẹkpọn̄ Jesus ẹfen̄e. Nte ededi, akparawa kiet​—iso-ọfọn edide mbet Mark​—osụhọ ye otuowo. Ekeme ndidi enye ama odu ke ufọk oro Jesus okonịmde Passover ndien ekem etienede otuowo ke ọtọ oro. Idahaemi, nte ededi ẹdiọn̄ọ enye, ẹnyụn̄ ẹdomo ndimụm enye. Edi enye ọkpọn̄ ọfọn̄ linen esie onyụn̄ efehe ọbọhọ ye mfefere mfefere ọfọn̄ ke idem. Matthew 26:47-56; Mark 14:43-52; Luke 22:47-53; John 17:12; 18:3-12.

◆ Ntak emi Judas okonịmde ke akpanikọ ete ke imọ iyekụt Jesus ke in̄wan̄ Gethsemane?

◆ Didie ke Jesus ekere aban̄a mme apostle esie?

◆ Nso ke Peter anam ndin̄wana nnọ Jesus, edi nso ke Jesus asian enye?

◆ Didie ke Jesus ayarade nte ke imọ imodu ke ọyọhọ n̄kemuyo ye uduak ete imọ?

◆ Ke ini mme apostle ẹkpọn̄de Jesus, anie osụhọ, ndien nso itịbe inọ enye?