Nte Afo Emeti?

Nte afo ọmọnọ ntịn̄enyịn ke mme nsiondi Enyọn̄-Ukpeme eke ndondo emi? Ke edide ntre, afo oyokụt nte edide inem n̄kpọ nditi se itienede mi:

◻Nso idi ndusụk mbụme oro Christian iba ẹkemede ndibụp idemmọ mbemiso mmọ ẹtọn̄ọde ndikere mban̄a ediomi ndọ?

‘Ndi ami mmenen̄ede mfiọk idaha eke spirit ye uten̄e Abasi owo enye eken? Nte mmekeme ndikụt nte nnamde n̄kpọ Abasi ye enye ke ofụri eyouwem? Ndi nnyịn imetịm imehe ye edu kiet eken? Ndi ami mmenyene mbuọtidem nte ke nnyịn iyekem ye kiet eken ke nsinsi? Ndi nnyịn imenyene ifiọk oro ekemde iban̄a mme edinam ini edem ye mme idaha kiet eken ke emi?’—8/15, page 31.

◻Nso ke ikọ Jesus ọkọwọrọ ke ini enye ọkọdọhọde mme anditiene enye ete: “Mbufo ẹdi inụn̄ isọn̄”? (Matthew 5:13)

Jesus okowụt ete ke mme anditiene enye ndikwọrọ mban̄a Obio Ubọn̄ Abasi nnọ mbon efen eyenyene odudu oro akpande mbiara, m̀mê eke unyan̄a uwem, ọnọ mme andikop. Ke akpanikọ, ẹyekpeme mbon oro ẹdade mme ikọ Jesus ẹsịn ke edinam ẹbiọn̄ọ mbiara eke ido uwem ye eke spirit ke ererimbot.—8/15, page 32.

◻Didie ke iren ye iban ẹmi ẹnamde uyomima ẹkeme ndifep afia oburobụt ido idan̄?

Edieke afo anamde uwọrọ an̄wa, owụt eti ibuot afo nditre ndidu ikpọn̄ ye owo emi edide nsan̄a fo ke mme idaha oro mîdotke. Edi se itịmde ifọn ikan ndikop inem nsan̄a ye kiet eken ke otu m̀mê ke mme an̄wan̄wa itie. Ẹnịm adan̄a ke edinam uwụt ima, owo kiet kiet okponode mme ntụk ye ubieresịt kiet eken.—9/1, page 17, 18.

◻Nso ke ifiọk edi?

Enye edi ukeme ndida n̄kụt n̄kpọ nnyụn̄ mfiọk se ibuanade ebe ke ndifiọk mme ebuana oro nsio nsio ikpehe ye ofụri n̄kpọ ẹnyenede, ke ntem ẹtịmde ẹfiọk enye. (Mme N̄ke 4:1)—9/15, page 13.

◻Nso ke Jehovah oyom oto nnyịn mfịn?

Ke ofụri ofụri, se Jehovah oyomde oto nnyịn edi ndikop uyo Eyen Esie nnyụn̄ ntiene uwụtn̄kpọ ye mme ukpepn̄kpọ esie. (Matthew 16:24; 1 Peter 2:21)—9/15, page 22.

◻Mmanie ikpọn̄ ẹkeme ndinyene emem?

Sia Jehovah edide “Abasi emi ọnọde emem,” sụk mme owo ẹmi ẹnyenede ima ẹnọ Abasi ẹnyụn̄ ẹnyenede ntotụn̄ọ ukpono ẹnọ ndinen edumbet esie ẹkeme ndinyene emem. (Rome 15:33)—10/1, page 11.

◻Joseph akasan̄a didie enyene ukeme eke ido uwem ndisịn n̄wan Potiphar kwa usen kwa usen?

Joseph ama ada itie ebuana esie ye Jehovah ke ọsọn̄urua akan inemesịt ibio ini. N̄ko, okposụkedi enye mîkodụhe ke idak ibet Abasi, Joseph ama enen̄ede ọfiọk mme nnennen edumbet ido uwem. (Genesis 39:9)—10/1, page 29.

◻Unyịme nnyịn ndifen nditọete nnyịn edi akpan n̄kpọ adan̄a didie?

Idotenyịn nnyịn ndika iso nnyene edifen Abasi ke akamba udomo ọkọn̄ọ ke nnyịn ndinyịme ndifen nnọ mmọ en̄wen. (Matthew 6:12, 14; Luke 11:4)—10/15, page 17.

◻Nso orụk idiọkn̄kpọ ke Matthew 18:15-17 eketịn̄ aban̄a, ndien nso iwụt oro?

Idiọkn̄kpọ oro Jesus eketịn̄de aban̄a ekenyene ndikpon n̄kem ndidi se ẹsede anamidiọk oro “nte owo mme idụt ye publican.” Mme Jew ikenyeneke ebuana ye mme Gentile, ndien mmọ ẹma ẹnen̄ede ẹfep mme ọbọ a-tax. Ntre se ẹtịn̄de ẹban̄a ke Matthew 18:15-17 ekedi akwa idiọkn̄kpọ, idịghe ọkpọkpọ ndudue m̀mê unan oro afo ekemede ndifen nnyụn̄ mfre mban̄a mfefere mfefere. (Matthew 18:21, 22)—10/15, page 19.

◻Nso ke ndinen̄ede mma Ikọ Abasi abuana?

Ndima Ikọ Abasi anam owo odu uwem ke n̄kemuyo ye se Ikọ Abasi oyomde. (Psalm 119:97, 101, 105) Emi oyom owo enen̄ede ekikere ye usụn̄ uwem esie kpukpru ini.—11/1, page 14.

◻Sia ibọde ekese n̄kpọ ntre ke ubọk Jehovah, nso ke nnyịn ikeme ndinọ akakan Edidem ye Andinọ enọ?

Bible ayarade ete ke mfọnn̄kan enọ oro nnyịn ikemede ndinọ Jehovah edi “uwa ekọm.” (Mme Hebrew 13:15) Ntak-a? Koro uwa emi enyene ebuana nnennen nnennen ye edinyan̄a uwem, edide akpan n̄kpọ oro ebehede Jehovah ke utịt ini emi. (Ezekiel 18:23)—11/1, page 21.

◻Nso ke ikọ Solomon ọkọwọrọ ke ini enye ekewetde ete: “Uyo mbon eti ibuot ẹbiet n̄kpọ ukịm-enan̄”? (Ecclesiastes 12:11)

Ikọ mbon oro ẹnyenede ọniọn̄ Abasi ẹnụk mme andikot m̀mê mme andikop ẹnam n̄kọri nte ekemde ye mme ikọ ọniọn̄ oro mmọ ẹkotde m̀mê ẹkopde.—11/15, page 21.

◻Nso idi mbufiọk otode Abasi?

Enye edi ukeme ndifiọk se idide eti ye idiọk ndinyụn̄ mmek eti usụn̄ ndisan̄a. Edikpep ye edida Ikọ Abasi nsịn ke edinam ọnọ mbufiọk.—11/15, page 25.

◻Oyom unyịme ndibọ mme mbiomo asan̄a ye nso? (1 Timothy 3:1)

Emi ekpenyene ndisan̄a ye eti ubiere. Owo ndomokiet ikpenyeneke ndibọ ediwak mbiomo tutu enye ataba idara esie ke utom Jehovah. Edu unyịmesịt odot itoro, edi unyịmesịt ekpenyene n̄ko ndiwụt nsụkidem ye “eti ibuot.” (Titus 2:12; Ediyarade 3:15, 16)—12/1, page 28.

◻Didie ke ẹkeme ndikan n̄kpọ-ata eke edidi ete ye eka?

Abasi ọnọ mme ete ye eka item ete ẹdi uwụtn̄kpọ, nsan̄a, mme eneme-nneme, ye mme andikpep. (Deuteronomy 6:6, 7)—12/1, page 32.