UKPEPN̄KPỌ 37
Se Bible Etịn̄de Aban̄a Utom ye Okụk
Ndi akananam emetie ekere m̀mê edinanam didie inyene utom m̀mê okụk? Esisọn̄ ndusụk ini ndin̄wana n̄kpọ nse mban̄a idem nnyịn mfiak nsịn ofụri esịt nnyịn ke n̄kpọ Jehovah. Edi Bible etịn̄ se ikemede ndin̄wam nnyịn.
1. Nso ke Bible etịn̄ aban̄a utom?
Abasi oyom nnyịn ikop inem utom. Bible ọdọhọ ke “idụhe se ifọnde ikan owo ndidat esịt ke utom esie.” (Ecclesiastes 3:22) Jehovah esisịn idem anam utom. Edieke ikpebede enye, inyụn̄ isịnde idem inam utom, enye esikop inemesịt—esịt esinem nnyịn n̄ko.
Utom edi akpan n̄kpọ. Edi ikpanaha iyak utom edi akpan n̄kpọ ọnọ nnyịn akan n̄kpọ Jehovah. (John 6:27) Enye ọn̄wọn̄ọ ke iyese iban̄a nnyịn ima ida n̄kpọ imọ nte ata akpan n̄kpọ ke uwem nnyịn.
2. Didie ke ikpada okụk?
Bible etịn̄ ke okụk esikpeme owo. Edi Bible onyụn̄ etịn̄ n̄ko ke idịghe okụk okụk esinam owo okop inemesịt. (Ecclesiastes 7:12) Imosụk ise Bible odụride nnyịn utọn̄ ete ikûma okụk, edi ‘iyụhọ ye se inyenede.’ (Kot Mme Hebrew 13:5.) Ikpoyụhọ ye se inyenede, nnyịn iditiehe ikpa ekikere iban̄a se nnyịn mînyeneke. Nnyịn idinyụn̄ idụkke isọn emi nnyịn mîkpodụkke. (Mme N̄ke 22:7) Ikpoyụhọ ye se inyenede, nnyịn idibreke nsa okụk, idinyụn̄ iduọhọ idụk ubọk mbon emi ẹsikamade mbubehe ẹbian̄a owo ẹte ke owo eyenyene okụk usọp usọp.
3. Didie ke ikeme ndida okụk nnyịn n̄n̄wam mbon en̄wen?
Jehovah edi Abasi emi esitatde ubọk ọnọ owo n̄kpọ; enye ke nnyịn isikpebe ima itat ubọk ‘inyịme ndibuana se inyenede ye mbon en̄wen.’ (1 Timothy 6:18) Imekeme ndinọ okụk yak ẹda ẹnam n̄kpọ Abasi ke esop, inyụn̄ ida okụk nnyịn in̄wam mbon emi ẹnyenede mfịna, akpan akpan mme Christian nte nnyịn. Se isidide akpan n̄kpọ inọ Jehovah esidi ntak emi inọde owo n̄kpọ, isidịghe m̀mê n̄kpọ oro okpon m̀mê ikponke. Ikpatat ubọk inọ owo n̄kpọ ke ofụri esịt, esịt eyenem nnyịn onyụn̄ enem Jehovah n̄ko.—Kot Utom 20:35.
SỊN IDEM KPEP
Se ufọn ididiade edieke idiọn̄ọde nte ikpadade utom inyụn̄ iyụhọde ye se inyenede.
4. Yak utom fo ọnọ Jehovah ubọn̄
Akpana nte idade utom owụt ke idi ufan Jehovah. Se VIDIO emi, ekem ẹbọrọ mbụme emi ẹnyụn̄ ẹneme ẹban̄a mmọ.
Ke vidio oro, nso ikanam ama se Jason ekesinamde ke itieutom?
Nso ke enye akanam man utom idida ini ata akpan n̄kpọ?
Kot Colossae 3:23, 24, ekem ẹbọrọ mbụme emi ẹnyụn̄ ẹneme ẹban̄a enye:
Ntak ọfọnde ikere iban̄a nte idade utom?
Utom edi akpan n̄kpọ. Edi ikpanaha iyak utom edi akpan n̄kpọ akan n̄kpọ Jehovah
5. Edieke iyụhọde ye se inyenede edifọn nnyịn
Ediwak owo ẹsisịn ibuot esịn itọn̄ ẹn̄wana okụk. Edi enyene se Bible ọdọhọde nnyịn inam. Kot 1 Timothy 6:6-8, ekem ẹbọrọ mbụme emi ẹnyụn̄ ẹneme ẹban̄a enye:
Nso ke Bible ọdọhọ inam?
Imekeme ndikop inemesịt, ọkpọkọm se inyenede edi ata ekpri. Se VIDIO emi, ekem ẹbọrọ mbụme oro etienede ẹnyụn̄ ẹneme ẹban̄a enye.
Nso ikanam ubon oro ẹkop inemesịt, kpa ye oro mmọ mînyeneke okụk awak?
Nso iditịbe edieke owo enyenede okụk edi ke esesịn ibuot esịn itọn̄ oyom? Uwụtn̄kpọ Jesus owụt se inamde utọ n̄kpọ oro enen̄ede ọdiọk. Kot Luke 12:15-21, ekem ẹbọrọ mbụme emi ẹnyụn̄ ẹneme ẹban̄a enye:
Nso ke uwụtn̄kpọ Jesus oro ekpep fi?—Se ufan̄ikọ 15.
Kot Mme N̄ke 10:22 ye 1 Timothy 6:10, ẹnyụn̄ ẹmen itie Bible iba oro ẹdomo. Ekem ẹbọrọ mbụme emi ẹnyụn̄ ẹneme ẹban̄a mmọ:
Ekere ke nso idi ata akpan n̄kpọ, ndi ndisịn ibuot nsịn itọn̄ nyom okụk m̀mê ndinam se idinamde Jehovah ama fi? Nso inam ọdọhọ ntre?
Nso isitịbe inọ owo emi ọdiọkde itọn̄ okụk?
6. Jehovah eyese aban̄a nnyịn
Ini utom mîsan̄ake ọfọn ye ini okụk mîdụhe ke isidiọn̄ọ m̀mê imenen̄ede ibuọt idem ke Jehovah. Se VIDIO emi ke oyokụt se ikemede ndinam ini utọ n̄kpọ oro etịbede ọnọ nnyịn. Ekem ẹbọrọ mbụme emi ẹnyụn̄ ẹneme ẹban̄a mmọ.
Ke vidio oro, nso ye nso iketịbe inọ brọda oro ke itieutom?
Nso ke enye akanam man ọyọ?
Kot Matthew 6:25-34, ekem ẹbọrọ mbụme emi ẹnyụn̄ ẹneme ẹban̄a enye:
Nso ke Jehovah ọn̄wọn̄ọ ndinam nnọ mbon emi ẹdade n̄kpọ esie nte ata akpan n̄kpọ ke uwem mmọ?
NDUSỤK OWO ẸSIDỌHỌ ẸTE: “Ana nnam utom nse mban̄a ubon mi. Idịghe kpukpru urua ke ana owo osụk aka mbono esop.”
Ewe itie Bible inam fi enịm ke ndida n̄kpọ Jehovah nte ata akpan n̄kpọ ofọn akan?
SE IKPEPDE
Ọfọn owo esịn idem anam utom man enyene okụk ese aban̄a idemesie, edi ikpanaha iyak utom edi akpan n̄kpọ akan n̄kpọ Jehovah.
Se M̀mê Emeti
Nso idin̄wam fi esịn idem anam utom edi okûda utom nte ata akpan n̄kpọ?
Didie ke ndiyụhọ ye se enyenede an̄wam fi?
Nso idiwụt ke afo emenịm ke Jehovah eyese aban̄a ikọt esie nte enye ọn̄wọn̄ọde?
KPEP N̄KPỌ EN̄WEN
Se m̀mê Bible ọdọhọ ke okụk edi idiọkn̄kpọ.
“Ndi Okụk Edi Ntak Kpukpru Idiọkn̄kpọ Ererimbot Emi?” (Odu ke jw.org)
Se nte ikemede ndida okụk nnyịn nnam se Abasi amade.
Ndi ọdiọk owo ndibre nsa okụk?
“Se Bible Etịn̄de Aban̄a Mbre Mfoniso” (Ẹdemede!, March 2015)
Se se ikanamde owo kiet etre ubre-nsa okụk ye uyịpinọ.
“Mma Mma Mbuba Uwat Enan̄-Mbakara Etieti” (Enyọn̄-Ukpeme, November 1, 2011)