Se Mme Edibotn̄kpọ Oro “Ẹnyenede Ibuot Ke N̄kan̄ Ntụk” Ẹkemede Ndikpep Nnyịn

NDINAM ofụm ebịt, n̄kpọ oro akpande ice ndiboho, edisio inụn̄, ye usụn̄ ndida mfiọk se idude ke idak mmọn̄ ẹdi mme n̄kpọ ẹmi ẹsion̄ode ẹdi oro ubonowo enyenede ifiọk aban̄a ntatara ntatara ke isua ikie 20. Edi, mmọ ẹma ẹdodu ke otu mme unam ke ediwak tọsịn isua mbemiso. Ih, ubonowo ọbọ ufọn oto edikpep mban̄a mme utọ edibotn̄kpọ oro “ẹnyenede ibuot ke n̄kan̄ ntụk” mi. (Mme N̄ke 30:24-28; Job 12:7-9) Etie nte ndusụk unam ẹmekabade ẹdi mme andikpep ẹmi mîsioroke uyo ẹnọ ubonowo, ndien nnyịn imekeme ndidụn̄ọde mmọ ye akwa udọn̄.

Nte nnyịn imekeme ndibọ ufọn nto edikere mban̄a edu ndusụk unam? Ọfọn, Jesus Christ ekemen mme anditiene enye odomo ye erọn̄, urụkikọt, ibiom, ye idem n̄kukun̄kpọyọriyọ. Nso ke enye ekenyene ke ekikere ke ini enye ekemende mme anditiene enye odomo ye mme edibotn̄kpọ ẹmi? Ẹyak ise.

“Mme Erọn̄ Mi Ẹkop Mi Uyo”

Ẹtịn̄ ẹban̄a erọn̄ ke Bible ẹbe utịm ike 200. Nte Smith’s Bible Dictionary anamde an̄wan̄a, “erọn̄ edi idiọn̄ọ sụn̄sụn̄ ido, ime, ye nsụkibuot.” Ke Isaiah ibuot 53, ẹkemen Jesus ke idemesie ẹdomo ye erọn̄ ke prọfesi. Odot didie ntem enye ndimen mme anditiene enye ndomo ye ukem unam oro! Edi ewe ẹdi mme akpan edu erọn̄ oro Jesus ekenyenede ke ekikere?

Jesus ọkọdọhọ ete: “Mme erọn̄ Mi ẹkop Mi uyo, Ami mmonyụn̄ mfiọk mmọ, mmọ ẹnyụn̄ ẹtiene Mi.” (John 10:27) Enye ke ntem ama owụt sụn̄sụn̄ ido oro mme mbet esie ẹkenyenede ye ọkpọsọn̄ udọn̄ mmọ nditiene enye. Mme ata erọn̄ ẹsikpan̄ utọn̄ ẹnọ andikpeme mmọ ẹnyụn̄ ẹnyịme nditiene enye. Ekpemerọn̄ n̄ko esinyene n̄kpet n̄kpet ebuana ye otuerọn̄.

Otuerọn̄ ekeme ndisuana nyọhọ awawa mbiet ke ini ẹtade mbiet, edi erọn̄ kiet kiet esidu ekpere otu oro ke ofụri ofụri. Ntem ke ini mme unam mînyeneke ifụre m̀mê ẹkopde ndịk, n̄wed oro Alles für das Schaf (Kpukpru N̄kpọ Kaban̄a Mme Erọn̄) ọdọhọ ete ke “mmọ ẹkeme ndisọp nsop idem ọtọkiet.” Edieke mme erọn̄ ẹfehede man ẹbọhọ n̄kpọndịk, mmọ ẹnam ntre nte otuerọn̄, ẹtuakde ẹda ndusụk ini man ẹfiọk nte idaha etiede. “Ndifehe ke ikpehe ke ikpehe esin̄wam nditọerọn̄ ye mme unam eken oro mîsọn̄ke idem ndisan̄a ikpat kiet. Ndisan̄a ke otu esikam ọnọ mmọ san̄asan̄a ukpeme.” Nso ke nnyịn ikeme ndikpep nto edu emi?

Mme ata Christian isuanake iyọhọ mme ido ukpono ye mme n̄ka Christendom. Utu ke oro, ẹtan̄ mmọ ẹbok ke otuerọn̄ kiet. Christian kiet kiet enyene ọkpọkpọ ebuana ye otuerọn̄ Abasi emi, ndien emi otịp esịn ke edidianakiet esop Mme Ntiense Jehovah. Ini ekededi oro afanikọn̄ etịbede—edide edi ọkpọsọn̄ udọn̄ọ, ekọn̄, m̀mê oto-obot afanikọn̄—m̀mọ̀n̄ ke andituak ibuot kiet kiet esiyom ndausụn̄ ye ukpeme oto? Ke esop Jehovah, emi ọnọde ifụre eke spirit.

Didie ke ẹnam item Bible odu? Ebe ke mme utọ n̄wed nte Enyọn̄-Ukpeme ye nsan̄a n̄wedmbụk esie, Awake! Mme magazine ẹmi ye mme mbonoesop Christian ẹsikam ẹnọ mbon oro ẹyomde ntịn̄enyịn efen efen san̄asan̄a un̄wam, ukem nte nditọerọn̄ ye mme erọn̄ oro idem ememde ke otuerọn̄. Ke uwụtn̄kpọ, ẹnọ mme ete m̀mê eka oro ẹbọkde nditọ ikpọn̄ ye mbon oro ẹkopde mfụhọ ntịn̄enyịn. Ntre, owụt ọniọn̄ didie ntem ndikot magazine kiet kiet, ndidụk kpukpru mbonoesop, nnyụn̄ nda se ikpepde nsịn ke edinam! Nnyịn ke ntem iyewụt sụn̄sụn̄ ido ye ọkpọsọn̄ mbọbọ oro inyenede inọ otuerọn̄ Abasi.—1 Peter 5:2.

 “Ẹnyene Ibuot nte Urụkikọt, Ẹnyụn̄ Ẹfụre nte Ibiom” 

Smith’s Bible Dictionary ọdọhọ ete: “Ke ofụri Edem Usiahautịn ẹkeda urụkikọt nte idiọn̄ọ idiọkn̄kpọ, eke edu nsọn̄ibuot.” Ke n̄kan̄ eken, “ibiom mi” ekedi ikọ ima. (Ikwọ Solomon 5:2) Nso, ndien, ke Jesus ekenyene ke ekikere ke ini enye ekesịnde udọn̄ ọnọ mme anditiene enye ete “ẹnyene ibuot nte urụkikọt, ẹnyụn̄ ẹfụre nte ibiom”?—Matthew 10:16.

Jesus ọkọnọ item aban̄a ukwọrọikọ ye ukpepn̄kpọ. Mme mbet esie ẹkpedori enyịn ndisobo mbon oro ẹdikpan̄de utọn̄ ye mbon oro mîdikpan̄ke. Ibat ibat owo ẹdiwụt udọn̄, ke adan̄aemi mbon eken ẹdisịnde eti mbụk. Ndusụk owo ẹyekam ẹkọbọ mme ata asan̄autom Abasi ẹmi. (Matthew 10:17-23) Didie ke mme mbet ẹkenyene ndinam n̄kpọ mban̄a ukọbọ?

Ke Das Evangelium des Matthäus (Gospel Matthew), Fritz Rienecker etịn̄ aban̄a Matthew 10:16 ete: “Ọniọn̄ . . . ana asan̄a ye nsọn̄ọnda, edinam akpanikọ, ye in̄wan̄în̄wan̄ ido, mîdịghe ntre n̄kpọ ekededi ekeme nditịbe ọnọde mme asua eti ntak ndinam ikọ. Mme isụn̄utom Jesus ẹdu ke ufọt mme asua oro ẹsọn̄de ido, ẹmi mîwụtke edikere mban̄a ẹmi ẹnyụn̄ ẹkọbọde mme apostle ke kpukpru ifet ye unana ediwụt mbọm. Ntem, edi akpan n̄kpọ—ukem nte urụkikọt—ndidu ke ukpeme mban̄a mme asua, nnyụn̄ ndụn̄ọde idaha oro odude ye ọniọn̄; nnyụn̄ n̄kara idaha oro odude ye unana edisịn n̄kari m̀mê abian̄a, ndisana nnyụn̄ nnam akpanikọ ke ikọ ye ke edinam ndien ke ntre ẹwụtde idemmọ nte ibietde ibiom.”

Nso ke mme asan̄autom Abasi eyomfịn ẹkeme ndikpep nto mme ikọ Jesus ẹdude ke Matthew 10:16? Mfịn, mme owo ẹnam n̄kpọ ẹban̄a eti mbụk ke ukem usụn̄ oro mme owo ẹkenamde ke akpa isua ikie. Ke ini ẹsobode ukọbọ, oyom mme ata Christian ẹdian ọniọn̄ ebietde eke urụkikọt ye edisana ido ebietde eke ibiom. Akananam mme Christian idaha n̄kari m̀mê nsu inam n̄kpọ edi ẹdi mbon oro mînyeneke mbiara, ẹnyenede eti ido, ẹnyụn̄ ẹnamde akpanikọ ke nditan̄a etop Obio Ubọn̄ nnọ mbon en̄wen.

Ke ndinam an̄wan̄a: Mme nsan̄autom, mme uyen ke ufọkn̄wed, m̀mê idem mme andibuana ke ubon fo ẹkeme nditịn̄ ubiak ubiak ikọ mban̄a se afo onịmde ke akpanikọ nte Ntiense Jehovah. Usọp usọp edinam ekeme ndidi ndibọrọ ke ukem usụn̄ oro ebe ke nditịn̄ ukem ubiak ubiak n̄kpọ oro mban̄a mbuọtidem mmọ. Edi nte oro edi edifụre? Ikemeke-keme. Edieke afo owụtde mbon oro ẹkụtde ndudue ẹnọ fi nte ke utịn̄ikọ mmọ inyeneke odudu ke eti eduuwem fo, mmọ ẹkeme ndikam n̄kpụhọde. Afo ndien eyedi ọniọn̄ onyụn̄ anana nduduọhọ—‘enyene ibuot nte urụkikọt, edi ofụre nte ibiom.’

‘N̄kukun̄kpọyọriyọ Ẹbiet Ediwak Enan̄-Mbakara eke Ẹbụmerede Ẹdụk Ekọn̄’

Magazine oro GEO ọtọt ete ke 1784, “n̄kponn̄kan otu [n̄kukun̄kpọyọriyọ] oro akanam ẹfiọkde ke mbụk” ama osobo South Africa. Otu oro ama ofụk ikpehe isọn̄ okponde akan kilomita 5,200 ke n̄kan̄ mbinan̄, emi okponde utịm ikotion akam Hong Kong. Smith’s Bible Dictionary ọdọhọ ete ke n̄kukun̄kpọyọriyọ “ẹsisobo ikọn̄ idiọk idiọk ke mme idụt oro mmọ ẹdụkde.”

Ke ediyarade oro Abasi ọkọnọde enye aban̄a mme n̄kpọ oro ẹdidade itie ke “usen Ọbọn̄,” Jesus akada n̄kukụt oro aban̄ade otu n̄kukun̄kpọyọriyọ etịn̄ ikọ. Ẹma ẹtịn̄ ẹban̄a mmọ ẹte: “Uyom mba mmọ [n̄kukun̄kpọyọriyọ] onyụn̄ ebiet . . . ediwak enan̄-mbakara eke ẹbụmerede ẹdụk ekọn̄.” (Ediyarade 1:1, 10; 9:3-7) Nso ke mbiet n̄kpọ emi akada aban̄a?

Mme Ntiense Jehovah ẹfiọk ke anyanini nte ke mme n̄kukun̄kpọyọriyọ eke Ediyarade ibuot 9 ẹda ẹban̄a mme asan̄autom Abasi oro ẹyetde aran ke isọn̄ ke isua ikie emi.a Ẹnọ mme Christian emi akpan utom—ndikwọrọ etop Obio Ubọn̄ ke ofụri isọn̄ nnyụn̄ nnam mme mbet. (Matthew 24:14; 28:19, 20) Emi oyom mmọ ẹkan mme ubiọn̄ọ ẹnyụn̄ ẹsọn̄ọ ẹyịre ke utom mmọ. Nso ke ẹkpeda ẹdomo ye emi ẹkan n̄kukun̄kpọyọriyọ oro owo mîkemeke ndikan?

Okposụkedi ọniọn̄de esisịt akan sentimita 5 ke uniọn̄, n̄kukun̄kpọyọriyọ esisan̄a kilomita 100 osịm 200 ke usen. N̄kukun̄kpọyọriyọ otode desat akam ekeme ndisan̄a kilomita 1,000. GEO anam an̄wan̄a ete ke “mme mba esie ẹsifụn̄ utịm ike-18 ke sekọn kiet ye ke se iwakde isịm n̄kpọ nte hour 17 ke usen kiet—kpa n̄kpọ oro baba ekpri unam ndomokiet mîkemeke ndinam.” Nso akamba utom ke emi edi ntem ọnọ utọ ekpri edibotn̄kpọ emi!

Nte otu, Mme Ntiense Jehovah ẹnyene nsọn̄ọnda ke ndisuan eti mbụk Obio Ubọn̄. Mmọ ẹkwọrọ ikọ idahaemi ke se ibede idụt 230. Mme asan̄autom Abasi ẹmi ẹkan ediwak n̄kpọsọn̄ idaha man otodo ẹtiene ẹbuana ke ndinam utom emi. Nso utọ mme mfịna ke mmọ ẹsobo? Asari, ukpan oro ibet odoride, udọn̄ọ, mmemidem, ye ubiọn̄ọ otode mme iman ẹkam ẹdi ibat ibat kpọt. Edi idụhe n̄kpọ oro ekemede ndikpan mmọ ndika iso iso. Mmọ ẹsọn̄ọ ẹyịre ke utom oro Abasi ọnọde mmọ.

Ẹka Iso   Ndinyene Mme Edu Christian

Ih, Jesus ekemen mme anditiene enye odomo ye mme erọn̄, mme urụkikọt, mme ibiom, ye mme n̄kukun̄kpọyọriyọ. Emi enen̄ede odot ke eyo nnyịn. Ntak-a? Koro utịt editịm n̄kpọ emi emekpere, ndien mme mfịna ẹtetịm ẹsọn̄ ẹkan nte akanam edide.

Ke ẹnyenede mme ikọ uwụtn̄kpọ Jesus ke ekikere, mme ata Christian ẹsọn̄ọ ẹyịre ke otuerọn̄ Abasi ẹnyụn̄ ẹsụhọde idem ẹbọ item ẹto esop Jehovah. Mmọ ẹdu ke ukpeme ẹnyụn̄ ẹdu ke edidemede ẹban̄a mme idaha oro ẹkemede ndibiọn̄ọ utom Christian mmọ, ke adan̄aemi mmọ ẹdude uwem ẹnana nduduọhọ ke kpukpru n̄kpọ. Akan oro, mmọ ẹsọn̄ọ ẹyịre ke ndinam uduak Abasi ke ẹsobode mme ubiọn̄ọ. Ndien mmọ ẹka iso ndikpep n̄kpọ nto ndusụk edibotn̄kpọ oro “ẹnyenede ibuot ke n̄kan̄ ntụk.”

[Ikọ idakisọn̄]