Nte Mme N̄kpọ Ẹtiede ke Enyọn̄ Enyọn̄ Ẹkeme Ndibian̄a Owo
EWET mbre owo Ireland oro Richard Sheridan ọkọdọhọ ete, “Owo ibuọtke idem ke nte mme n̄kpọ ẹtiede ke enyọn̄ enyọn̄.” Emi edi akpanikọ kaban̄a mme eto ọkọrọ ye mme owo.
Usen kiet ke utịt utịt March ke isua 33 E.N., Jesus Christ ama okụt eto fig nte enye ye mme mbet esie ẹketode Bethany ẹsan̄a ẹka Jerusalem. Eto oro ọkọyọhọ ye ikọn̄, edi edisan̄a n̄kpere n̄kan ama ayarade ete ke enye ikenyeneke mfri ndomokiet. Jesus ke ntre ama ọdọhọ enye ete: “Owo okûdia aba mfri eke otode fi tutu amama.”—Mark 11:12-14.
Ntak emi Jesus okosụn̄ide eto oro sia, nte Mark anamde an̄wan̄a, ‘mîkekemke ini fig’? (Mark 11:13) Ọfọn, ke ini eto fig esehede ikọn̄, nte ido edide enye n̄ko esin̄wụm akpa mfri fig. Ekedi esen n̄kpọ eto fig ndinyene ikọn̄ ke ini oro ke isua. Edi sia enye ekenyenede ikọn̄, Jesus nte enende ama odori enyịn ndikụt fig ke enye. (Se ndise eke enyọn̄ emi.) Sia eto oro okon̄wụmde mfri ikpọn̄ oro ọkọwọrọ ete ke enye ikemeke ndision̄o mfri. Nte enye eketiede ke enyọn̄ enyọn̄ ama abian̄a owo. Sia ẹkesikpede tax ke ibuot eto mfri, eto oro mîn̄wụmke mfri ekedi eto oro obiomde owo mbiomo ke n̄kan̄ ndutịm uforo ndien ama oyom ẹsịbe ẹfep.
Jesus akada eto fig oro mîn̄wụmke mfri do ndiwụt akpan ukpepn̄kpọ kaban̄a mbuọtidem. Ke ndan̄nsiere, mme mbet esie ẹma ẹdu ke n̄kpaidem ndikụt nte ke eto oro ama eyeyemede. Jesus ama anam an̄wan̄a ete: “Ẹnyene mbuọtidem ye Abasi. . . . Kpukpru n̄kpọ ekededi eke mbufo ẹbọn̄de akam ẹben̄e, ẹnịm ẹte mmimọ ima ibọ inyene, ndien eyewọrọ ọnọ mbufo.” (Mark 11:22-24) Ke adianade ye ediwụt ufọn oro odude ke ndibọn̄ akam ke mbuọtidem, eto fig oro ekeyemerede do ama owụt in̄wan̄în̄wan̄ se iditịbede inọ idụt oro ananade mbuọtidem.
Ọfiọn̄ ifan̄ ke mbemiso Jesus ama emen idụt mme Jew odomo ye eto fig oro mîkon̄wụmke mfri ke isua ita emi ẹdinyụn̄ ẹsịbede ẹduọk edieke etrede ndin̄wụm mfri. (Luke 13:6-9) Ke ndisụn̄i eto fig oro ke akam ayakde usen inan̄ mbemiso n̄kpa esie, Jesus ama owụt nte idụt mme Jew mîsion̄oke mfri oro ekemde ye edikabade esịt ndien ke ntem ama odot nsobo. Okposụkedi idụt oro—ukem nte eto fig—ke enyọn̄ enyọn̄ eketiede nte okop nsọn̄idem, editịm nse ama ayarade unana mbuọtidem oro akadade okosụn̄ọ ke edisịn Messiah.—Luke 3:8, 9.
Ke Ukwọrọikọ esie ke Obot, Jesus ama odụri owo utọn̄ ọbiọn̄ọ mme “prọfet abian̄a” onyụn̄ ọdọhọ ete: “Mbufo ẹyeda mfri mmọ ẹfiọk mmọ. Nte owo etet grape ke n̄kukịm, m̀mê etet fig ke mbarekpe? Ntre ke kpukpru eti eto ẹn̄wụm eti mfri; edi mbiara eto on̄wụm idiọk mfri. Eti eto ikemeke ndin̄wụm idiọk mfri, mbiara eto inyụn̄ ikemeke ndin̄wụm eti mfri. Ẹkpi kpukpru eto eke mîn̄wụmke eti mfri ẹduọk, ẹmen, ẹtop, ẹsịn ke ikan̄. Ntre ke mbufo ẹdida mfri mmọ ẹfiọk mmọ.” (Matthew 7:15-20) Mme ikọ Jesus ẹmi ye mbụk aban̄ade eto fig emi ẹkesụn̄ide ẹwụt in̄wan̄în̄wan̄ ete ke oyom nnyịn idu ke ukpeme ke n̄kan̄ eke spirit, koro nte mme n̄kpọ ẹtiede ke enyọn̄ enyọn̄ ke n̄kan̄ ido ukpono ẹkeme ndibian̄a owo nde.