Uwem ye Utom Jesus

Jesus Okụre Kpukpru Se Abasi Ọdọn̄de

KE INI Edidem-An̄wanaekọn̄ oro, Jesus Christ osiode Satan ye idiọk ererimbot esie efep, nso ntak ndidat esịt ke emi edidi ntem! Emem emem ọ-Tọsịn Isua Ukara Jesus ọtọn̄ọ ke akpatre!

Ke idak ndausụn̄ Jesus ye nsan̄a ndidem esie, mme andibọhọ Armageddon ẹyekpọri mme n̄wụre ẹtode edinen ekọn̄ oro. Anaedi mme andibọhọ eke isọn̄ ẹyenyene nditọ n̄ko nte ini akade, ndien mmọemi ẹyebuana ke idara idara utom edidiọn̄ isọn̄ akabade edi ediye in̄wan̄ inemesịt.

Nte ini akade Jesus eyeda ediwak million mbon oro ẹdude ke udi edi man ẹdidara ediye Paradise emi. Enye edinam emi ke ndisu un̄wọn̄ọ esie: ‘Ini ke edi eke kpukpru mme andidu ke udi ẹdiwọn̄ọde ẹdi.’

Ke otu mbon oro Jesus anamde eset edidi akani anamidiọk oro akakpade ke n̄kan̄ esie ke eto ndutụhọ. Ti ete ke Jesus ama ọn̄wọn̄ọ ọnọ enye ete: “Ke akpanikọ ke ndọhọ fi mfịn emi, Afo eyedu ye ami ke Paradise.” (NW) Baba, owo ididaha eren oro ika heaven man akakara nte edidem ye Jesus, m̀mê Jesus ndifiak n̄kabade ndi owo nnyụn̄ ndụn̄ ke Paradise isọn̄ ye enye. Utu ke oro, Jesus edidu ye akani anamidiọk oro ke usụn̄ifiọk nte ke Enye eyenam enye eset odụk uwem ke Paradise onyụn̄ okụt ete ke ẹse ẹban̄a mme udọn̄ esie, eke ikpọkidem ye eke spirit, nte ẹwụtde ke page emi.

Kere ban̄a oro! Ke idak ima ima ntịn̄enyịn Jesus, ofụri ekpụk ubonowo—mme andibọhọ Armageddon, nditọ mmọ, ye ediwak million ke mme itie tọsịn mme akpan̄kpa oro ẹnamde ẹset oro ẹkopde uyo esie—ẹyekọri ẹsịm mfọnmma owo. Jehovah, ebede ke ubọn̄ ubọn̄ Eyen esie, Jesus Christ, eyedu ye ubonowo ke n̄kan̄ eke spirit. “Ndien,” nte uyo oro John okokopde oto heaven ọdọhọde, “Enye eyekwọhọde kpukpru mmọn̄eyet ke enyịn mmọ efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba.” Owo ndomokiet ke isọn̄ idikwe ukụt m̀mê ndidọn̄ọ.

Etisịm utịt Tọsịn Isua Ukara Jesus, idaha eyetie ukem nte Abasi ke akpa akaduakde ke ini enye akasiande akpa owo iba oro, Adam ye Eve, ete ẹtọt ẹnyụn̄ ẹyọhọ isọn̄. Ih, isọn̄ eyeyọhọ ye ndinen mfọnmma orụk owo. Emi edi koro ẹyeda ufọn uwa ufak Jesus ẹnam n̄kpọ ye kpukpru owo. N̄kpa otode idiọkn̄kpọ Adam ididụhe aba!

Ntem, Jesus eyekụre kpukpru se Jehovah ọkọdọn̄de enye. Ntre, ke utịt tọsịn isua, enye eyeyak Obio Ubọn̄ ye mfọnmma ẹkpụk ubonowo ọnọ Ete esie. Adan̄aoro Abasi eyekpọhọde Satan ye mme demon esie ke editụn̄ọ ukpe itie unana edinam oro ebietde n̄kpa. Kaban̄a nso uduak?

Ọfọn, etisịm utịt tọsịn isua, n̄wakn̄kan mbon oro ẹdude uwem ke Paradise ẹdidi mbon oro ẹnamde ẹset, ẹmi akananam owo mîdomoke mbuọtidem mmọ. Mbemiso ẹkpan̄ade, mmọ ikọfiọkke mme uduak Abasi ndien ke ntre ikekemeke ndiwụt mbuọtidem ke mmọ. Ndien, ke ẹnamde ẹset ẹnyụn̄ ẹkpepde mme akpanikọ Bible, ama edi mmemmem n̄kpọ ọnọ mmọ ke Paradise, ye unana ubiọn̄ọ ekededi, ndinam n̄kpọ Abasi. Edi edieke ẹnọde Satan ufan̄ ndidomo nditre mmọ ndikaiso nnam n̄kpọ Abasi, ndi mmọ ẹyenam akpanikọ ke idak idomo? Man ẹbọrọ mbụme emi, ẹyekpọhọde Satan ẹyak.

Ediyarade oro ẹkenọde John ayarade nte ke Tọsịn Isua Ukara Jesus ebede, Satan eyekụt unen ke ndiwọn̄ọde ediwak ibat owo n̄kpọn̄ edinam n̄kpọ Abasi. Edi adan̄aoro, ke ini akpatre udomo okụrede, ẹyesobo Satan, mme demon esie, ye kpukpru mbon oro enye okụtde unen ke ndibian̄a ẹfep ke nsinsi. Ke n̄kan̄ eken, mme anam-akpanikọ andibọhọ oro ẹdomode ọyọhọ ọyọhọ ẹyekaiso ẹdu uwem ndidara mme edidiọn̄ Ete mmọ eke heaven ke nsinsi.

Nte an̄wan̄ade, Jesus ama enyene, eyenyụn̄ akaiso ndinyene, akpan udeme ke ndiyọhọ ubọn̄ ubọn̄ uduak Abasi. Nso inem inem ini iso ke nnyịn ikeme ndidara ntem nte utịp ke kpukpru se enye anamde nte akwa Edidem Abasi eke heaven! Edi, nnyịn ikemeke ndifre kpukpru se enye akanamde ke adan̄aemi enye ekedide owo.

Jesus unyịme unyịme ama edi isọn̄ onyụn̄ edikpep nnyịn n̄kpọ aban̄a Ete esie. Ke akande emi, enye ama anam owụt mme ọsọn̄urua edu Abasi. Esịt nnyịn esidemede ke ini ikerede akwa uko ye odudu esie, anana-mbiet ọniọn̄ esie, akwa ukeme esie nte andikpep, ndausụn̄ unana-ndịk esie, ye ima ima edikere mban̄a ye ediwụt mbọm esie. Ke ini nnyịn itide nte enye okokụtde ukụt oro owo mîkemeke nditịn̄ nte enye ọkọnọde ufak, emi ebede ke enye ikpọn̄ nnyịn ikeme ndinyene uwem, ke akpanikọ esịt nnyịn edemede ye esịtekọm oro inyenede inọ enye!

Ke akpanikọ, nso owo ke nnyịn ikụt ntem ke ndụn̄ọde uwem Jesus emi! Akwa idaha esie ana in̄wan̄în̄wan̄ onyụn̄ okpon. Ẹdemede nnyịn nditịn̄ mme ikọ Pontius Pilate, andikara Rome oro: “Se Enye owo oro do.”

Ebede ke nnyịn ndinyịme enọ uwa ufak esie, ẹkeme ndimen mfịghe idiọkn̄kpọ ye n̄kpa oro idade ito Adam ẹfep, ndien Jesus ekeme ndikabade ndi “Nsinsi Ete” nnyịn. Ana kpukpru mbon oro ẹdinyenede nsinsi uwem ẹnyene ifiọk idịghe eke Abasi ikpọn̄îkpọn̄ edi n̄ko eke Eyen esie, Jesus Christ. Edi idotenyịn nnyịn nte ke ndikot nnyụn̄ ndụn̄ọde udịm udịm ibuotikọ ẹmi ke uwem ye utom Jesus ama an̄wam fi ndinyene utọ ọnọ-uwem ifiọk oro! 1 John 2:17; 1:7; John 5:28, 29; 3:16; 17:3; 19:5, 6; Luke 23:43; Genesis 1:28; 1 Corinth 15:24-28; Ediyarade 20:1-3, 6-10; 21:3, 4; Isaiah 9:6.

◆ Nso ididi idara idara ifet inọ mme andibọhọ Armageddon ye nditọ mmọ?

◆ Mmanie ke adianade ye mme andibọhọ Armageddon ye nditọ mmọ ẹdidara Paradise, ndien ke nso usụn̄ifiọk ke Jesus edidu ye mmọ?

◆ Mme idaha ẹditie didie ke utịt tọsịn isua, ndien nso ke Jesus edinam adan̄aoro?

◆ Ntak emi ẹdikpọhọrede Satan ke editụn̄ọ ukpe, ndien nso iditịbe inọ enye ye kpukpru mbon oro ẹtienede enye ke akpatre?

◆ Didie ke Jesus ekeme ndikabade ndi “Nsinsi Ete” nnyịn?