Akwa Temple Jehovah Eke Spirit
“Nnyịn imenyene Akwa Oku emi edide ntem, . . . emi edide asan̄autom ke edisana ebiet ye ata Ataya, emi Jehovah okowụkde, mîdịghe owo.”—MME HEBREW 8:1, 2.
1. Nso ima ima ndutịm ke Abasi akanam ọnọ anam idiọkn̄kpọ ubonowo?
JEHOVAH ABASI, ke akwa ima oro enye enyenede ọnọ ubonowo, ama ọnọ uwa ndimen mme idiọkn̄kpọ ererimbot mfep. (John 1:29; 3:16) Emi ama oyom edikpụhọde uwem akpa edibon Eyen esie ke heaven nsịn ke idịbi eyenan̄wan Jew oro mîfiọkke erenowo emi ekekerede Mary. Angel Jehovah ama otịm anam an̄wan̄a Mary ete ke eyen oro enye ediyomode ‘edikere edisana, Eyen Abasi.’ (Luke 1:34, 35) Ẹma ẹsian Joseph, emi okoyomde ndidọ Mary, ẹban̄a utịbe utịbe usụn̄ oro ẹkeyomode Jesus, enye ama onyụn̄ ọfiọk ete ke enye ‘edinyan̄a ikọt esie osio ke mme idiọkn̄kpọ mmọ.’—Matthew 1:20, 21.
2. Nso ke Jesus akanam ke edide n̄kpọ nte isua 30 ke emana, ndien ntak-a?
2 Nte Jesus ọkọkọride, anaedi enye ama ọfiọk ndusụk akpanikọ ẹmi ẹban̄ade utịbe utịbe emana esie emi. Enye ama ọfiọk ete ke Ete esie eke heaven ama onịm utom unyan̄a uwem ọnọ imọ ndinam ke isọn̄. Ntre, nte eren emi ama ọkọkọri ọwọrọ owo n̄kpọ nte isua 30 ke emana, Jesus ama aka ebịne prọfet Abasi John ndina baptism ke Akpa Jordan.—Mark 1:9; Luke 3:23.
3. (a) Mme ikọ Jesus oro, “Afo umaha uwa ye enọ” ẹkewọrọ nso? (b) Nso n̄wọrọnda uwụtn̄kpọ ke Jesus okonịm ọnọ kpukpru mbon oro ẹyomde ndikabade ndi mbet esie?
3 Jesus ama ọbọn̄ akam ke ini baptism esie. (Luke 3:21) Nte an̄wan̄ade, ọtọn̄ọde ke idaha emi ke uwem esie ka iso, enye ama osu mme ikọ eke Psalm 40:6-8, nte apostle Paul okowụtde ke ukperedem ete: “Afo umaha uwa ye enọ, Afo emeben̄e ikpọkidem ọnọ Mi.” (Mme Hebrew 10:5) Ntem Jesus ama owụt nte ke imọfiọk ite ke Abasi ‘ikoyomke’ ẹka iso ẹwa mme uwa unam ke temple Jerusalem. Utu ke oro, enye ama ọfiọk ete ke Abasi ama eben̄e mfọnmma ikpọkidem eke owo ọnọ imọ, Jesus, ndinọ nte uwa. Emi eyemen n̄kaiso ediyom ẹnam mme uwa unam ekededi efep. Ke owụtde udọn̄ ofụri esịt esie ndisụk idem nnọ uduak Abasi, Jesus ama akaiso ọbọn̄ akam ete: “Sese, mmedi (Ẹwet ẹban̄a Mi ke ikpan̄wed) ndinam uduak Fo, O Abasi.” (Mme Hebrew 10:7) Nso eti uwụtn̄kpọ uko ye ọyọhọ ediyak idem nnọ ke Jesus okonịm ntem ke usen oro ọnọ kpukpru mbon oro ẹdikabarede ẹdi mme mbet esie ke ukperedem!—Mark 8:34.
4. Didie ke Abasi okowụt ke imọ imonyịme Jesus ndiwa idemesie?
4 Nte Abasi ama onyịme akam oro Jesus ọkọbọn̄de ke ini baptism? Yak kiet ke otu ndimek apostle Jesus ọnọ nnyịn ibọrọ: “Ekem ke ini Jesus akanade baptism ama, kpa idaha oro Enye ọwọrọ ke mmọn̄ ọdọk: ndien sese, enyọn̄ eberede ọnọ Enye, Enye onyụn̄ okụt Spirit Abasi osụhọrede nte ibiom edidoro Enye ke idem; ndien sese, uyo oto ke enyọn̄ ọdọhọ ete, Emi edi edima Eyen Mi, emi esịt enemde Mi eti-eti ye Enye.”—Matthew 3:16, 17.
5. Itieuwa ke ata temple akada aban̄a nso?
5 Abasi ndinyịme edinọ oro Jesus ọkọnọde ikpọkidem esie nte uwa ọkọwọrọ ete, ke usụn̄ eke spirit, itieuwa oro okponde akan temple Jerusalem ama ọwọrọ ada. Ataata itieuwa emi ẹkesidoride mme unam man ẹwa akada aban̄a itieuwa eke spirit oro, emi ke nditịm ntịn̄, ekedide “uduak” m̀mê ndutịm Abasi ndinyịme uwem eke owo Jesus nte uwa. (Mme Hebrew 10:10) Ntak edi oro apostle Paul ekekemede ndiwet nnọ mme ekemmọ Christian ete: “Nnyịn imenyene itie-uwa eke mmọ ẹmi ẹsan̄ade utom ke Ataya [m̀mê, temple] mînyeneke unen ndidia n̄kpọ ke esịt.” (Mme Hebrew 13:10) Ke ikọ efen, mme ata Christian ẹbọ ufọn ẹto uwa usio-isop idiọkn̄kpọ oro ọfọnde akan, emi ata ediwak mme oku Jew ẹkesịnde.
6. (a) Nso ikọwọrọ ida ke ini baptism Jesus? (b) Nso ke udorienyịn̄ oro Messiah, m̀mê Christ, ọwọrọ?
6 Ndikeyet Jesus aran ke edisana spirit ọkọwọrọ ete ke Abasi kemi ama ọtọn̄ọ ofụri ndutịm temple eke spirit esie, ye Jesus anamde utom nte Akwa Oku. (Utom 10:38; Mme Hebrew 5:5) Ẹma ẹnọ mbet oro Luke odudu spirit ndiwụt isua akpan n̄kpọntịbe emi nte edide “ọyọhọ isua efụt emi Tiberius Caesar adade ubọn̄.” (Luke 3:1-3) Oro asan̄a ekekem ye isua 29 E.N.—nnennen urua 69 eke mme isua, m̀mê isua 483, ọtọn̄ọde ke ini oro Edidem Artaxerxes ọkọnọde ewụhọ ete ẹfiak ẹbọp ibibene Jerusalem. (Nehemiah 2:1, 5-8) Nte ekemde ye prọfesi, “Messiah Ọbọn̄” okowụt idem ke isua oro ẹkebemde iso ẹtịn̄. (Daniel 9:25) Ediwak mme Jew nte an̄wan̄ade ẹma ẹdiọn̄ọ emi. Luke ọtọt ete ke ‘mbio obio ẹketie ke idotenyịn’ ẹbet edidi Messiah, m̀mê Christ, mme udorienyịn̄ ẹmi ẹtode mme ikọ Hebrew ye Greek ẹmi ẹwọrọde ukem n̄kpọ nte, “enyeemi ẹyetde aran.”—Luke 3:15.
7. (a) Ini ewe ke Abasi ekeyet “Ata Edisana” aran, ndien emi ọkọwọrọ nso? (b) Nso n̄kpọ efen ikotịbe inọ Jesus ke ini baptism esie?
7 Ke ini baptism Jesus, ẹma ẹyet ebietidụn̄ Abasi eke heaven aran, m̀mê ẹdianade ẹnịm san̄asan̄a, nte “Ata Edisana” ke ndutịm akwa temple eke spirit emi. (Daniel 9:24) “Ata Ataya [m̀mê, temple], emi Jehovah okowụkde, mîdịghe owo” ama edidu ke edinam. (Mme Hebrew 8:2) N̄ko, ebede ke baptism esie ke mmọn̄ ye edisana spirit, owo oro Jesus Christ ama afiak amana nte Eyen Abasi eke spirit. (Men John 3:3 domo.) Emi ọkọwọrọ ete ke edikem ini Abasi eyefiak okot Eyen esie ọnọ uwem eke heaven, ke ebiet emi enye edinamde utom ke ubọk nnasia Ete esie nte Edidem ye Akwa Oku “ke nsinsi, nte utọ Melchizedek asan̄ade.”—Mme Hebrew 6:20; Psalm 110:1, 4.
Ata Edisana eke Heaven
8. Ewe mbufa ikpehe ẹkedidu kemi ke ebekpo Abasi ke heaven?
8 Ke usen baptism Jesus, ebekpo Abasi eke heaven ama enyene mbufa ikpehe. Ndida mfọnmma uwa eke owo nsio isop mme idiọkn̄kpọ ererimbot odori nsọn̄uyo ke edisana idaha Abasi emi edide isio ye idiọkn̄kpọ owo. Ẹma ẹwụt mbọm Abasi n̄ko ke emi edide enye kemi ama owụt unyịme esie ndisụhọde esịt, m̀mê nditie ke emem. Ntem ebekpo Abasi ke heaven ama akabade etie nte ata esịt esịt ikpehe temple, emi akwa oku ekesidụkde ini kiet ke isua ye iyịp unam ndisio isop idiọkn̄kpọ ke ndamban̄a usụn̄.
9. (a) Nso ke ukara oro okodude ke ufọt Edisana ye Ata Edisana akada aban̄a? (b) Didie ke Jesus okodụk ebe ukara temple Abasi eke spirit?
9 Ikpehe oro akabaharede Edisana ye Ata Edisana akada aban̄a ikpọkidem Jesus. (Mme Hebrew 10:19, 20) Enye ekedi n̄kpọ ubiọn̄ọ oro ọkọbiọn̄ọde Jesus ndidụk n̄kosịm iso Ete esie ke adan̄aemi enye ekedide owo ke isọn̄. (1 Corinth 15:50) Ke ini n̄kpa Jesus, “ukara temple [ama] asiaha mbak iba, ọtọn̄ọde ke enyọn̄ osịm ke isọn̄.” (Matthew 27:51) Emi ke ndamban̄a usụn̄ okowụt nte ke ẹma ẹmen n̄kpọ ubiọn̄ọ oro ọkọbiọn̄ọde Jesus ndidụk heaven ẹfep kemi. Usen ita ke ukperedem, Jehovah Abasi ama anam n̄wọrọnda utịben̄kpọ. Enye ama anam Jesus eset ke n̄kpa, idịghe nte owo oro enyenede ikpọkidem ye iyịp, edi nte ubọn̄ ubọn̄ edibotn̄kpọ eke spirit “odude uwem ke nsinsi.” (Mme Hebrew 7:24) Usen 40 ke ukperedem, Jesus ama ọdọk aka heaven onyụn̄ okodụk ata “Edisana Ebiet,” ‘ndida ke iso Abasi kaban̄a nnyịn.’—Mme Hebrew 9:24.
10. (a) Nso ikotịbe ke Jesus ama ọkọnọ Ete esie eke heaven ufọn uwa esie? (b) Nso ke ediyet aran ke edisana spirit ọkọwọrọ ọnọ mme mbet Christ?
10 Nte Abasi ama onyịme ufọn iyịp Jesus oro ẹkeduọkde nte usio-isop mme idiọkn̄kpọ ererimbot? Ke akpanikọ enye ama onyịme. Uyarade ndiwụt emi ama edi ke usen 50 nnennen ke Jesus ama ekeset, ke usen usọrọ Pentecost. Ẹma ẹn̄wan̄a edisana spirit Abasi ẹduọk ke idem mbet Jesus 120 ẹmi ẹkesopde idem ọtọkiet ke Jerusalem. (Utom 2:1, 4, 33) Ukem nte Akwa Oku mmọ, Jesus Christ, ẹma ẹyet mmọ aran kemi ndinam n̄kpọ nte “ndisana oku, ndiwa uwa spirit” ke idak akwa ndutịm temple Abasi eke spirit. (1 Peter 2:5) N̄ko-n̄ko, mbon oro ẹyetde aran mi ẹnam obufa idụt, “edisana obio” Israel eke spirit Abasi. Ọtọn̄ọde ke ini oro, kpukpru prọfesi nti n̄kpọ ẹban̄ade Israel, utọ nte un̄wọn̄ọ “obufa ediomi” oro ẹwetde ke Jeremiah 31:31, ẹkenyene n̄kpọ ndinam ye esop Christian oro ẹyetde aran, kpa ata “Israel Abasi.”—1 Peter 2:9; Galatia 6:16.
Mme N̄kpọ Eken Ẹban̄ade Temple Abasi eke Spirit
11, 12. (a) Nso ke okụre mme oku akada aban̄a ke se iban̄ade Jesus, ndien nso ke enye edi ke se iban̄ade mme anditiene enye oro ẹyetde aran? (b) Nso ke akpan̄kpan̄ mmọn̄ ada aban̄a, ndien didie ke ẹda enye ẹnam n̄kpọ?
11 Okposụkedi Ata Edisana akadade aban̄a “ata heaven” ke idemesie, emi Abasi odude ke ebekpo, kpukpru ikpehe eken ẹban̄ade temple Abasi eke spirit ẹnyene ebuana ye mme n̄kpọ ke isọn̄. (Mme Hebrew 9:24) Ke temple ke Jerusalem, esịt okụre mme oku ama odu emi itieuwa ye akamba akpan̄kpan̄ mmọn̄ ẹkedude, emi mme oku ẹkesidade ẹnam idemmọ asana mbemiso ẹnamde edisana utom. Mme n̄kpọ ẹmi ẹda ẹban̄a nso ke ndutịm temple Abasi eke spirit?
12 Ke se iban̄ade Jesus Christ, esịt esịt okụre mme oku akada aban̄a anana idiọkn̄kpọ idaha esie nte mfọnmma Eyen Abasi edide owo. Ebede ke ndibuọt idem ke uwa Jesus, ẹda mme anditiene Christ oro ẹyetde aran nte ndinen owo. Ntem, Abasi ekeme ndinam n̄kpọ ye mmọ nte enende nte n̄kpọ eke mmọ mînyeneke idiọkn̄kpọ. (Rome 5:1; 8:1, 33) Ntem, okụre emi n̄ko ada aban̄a edinen idaha eke owo oro ẹnọde emi mme andibuana kiet kiet ke ndisana oku ẹnyenede ke iso Abasi. Ke ukem ini oro, mme Christian oro ẹyetde aran ẹsụk ẹdi mme anana-mfọnmma owo ẹnyụn̄ ẹdu ke idak idiọkn̄kpọ. Akpan̄kpan̄ mmọn̄ ke okụre ada aban̄a Ikọ Abasi, emi Akwa Oku adade ndiyet mme oku ẹsan̄a sụn̄sụn̄. Ebede ke ndinyịme edinam asana emi, mmọ ẹnyene uku uku idaha oro ọnọde Abasi ukpono onyụn̄ odụride mbon an̄wa edi edisana utuakibuot esie.—Ephesus 5:25, 26; men Malachi 3:1-3 domo.
Edisana
13, 14. (a) Nso ke Edisana eke temple ada aban̄a ke se iban̄ade Jesus ye mme anditiene enye oro ẹyetde aran? (b) Nso ke uwụk utuenikan̄ o-gold ada aban̄a?
13 Akpa ikpehe ke temple emi ada aban̄a idaha oro ọfọnde akan eke okụre. Ke se iban̄ade mfọnmma owo oro Jesus Christ, enye ada aban̄a enye ndifiak mmana nte Eyen Abasi eke spirit oro ẹkebemde iso ẹnịm ẹnọ enye ndifiak nnyọn̄ n̄ka uwem eke heaven. Ke ẹma ẹkebat ke ndinen, ọkọn̄ọde ke mbuọtidem mmọ ke iyịp Christ oro ẹkeduọkde, mme anditiene ẹmi ẹyetde aran n̄ko ẹkụt san̄asan̄a edinam eke spirit Abasi emi. (Rome 8:14-17) Ebede ke “mmọn̄ [oro edi, baptism mmọ] ye spirit,” ‘ẹfiak ẹbon’ mmọ nte nditọ Abasi eke spirit. Ke ntre, mmọ ẹnyene idotenyịn ediset nnyene uwem eke heaven nte nditọ Abasi eke spirit, amakam edi mmọ ẹsọn̄ọ ẹda ẹnam akpanikọ tutu osịm n̄kpa.—John 3:5, 7; Ediyarade 2:10.
14 Mme andituak ibuot oro ẹkesidude ke an̄wa ikesikwe mme oku oro ẹkesinamde utom ke esịt esịt Edisana ke temple eke isọn̄. Kpasụk ntre, mme Christian oro ẹyetde aran ẹdu ke idaha eke spirit oro ata ediwak mme andituak ibuot nnọ Abasi, emi idotenyịn mmọ edide ndidu uwem ke nsinsi ke paradise isọn̄, mîtieneke ibuana mînyụn̄ itịmke ifiọk. Uwụk utuenikan̄ o-gold ke ataya ada aban̄a idaha unyene ifiọk emi mme Christian oro ẹyetde aran ẹdude. Edinam edisana spirit Abasi, nte aran ke utuenikan̄, esịn un̄wana ke Bible. Ifiọk oro mme Christian ẹnyenede nte utịp, mmọ imụmke emi ikama ke idemmọ. Utu ke oro, mmọ ẹnam item Jesus, emi ọkọdọhọde ete: “Mbufo ẹdi un̄wana ererimbot. . . . Yak un̄wana mbufo ayama ke iso owo, man mmọ ẹkụt nti utom mbufo, ẹnyụn̄ ẹtoro Ete mbufo emi odude ke heaven.”—Matthew 5:14, 16.
15. Nso ke uyo oro okodorode ke edisana okpokoro ada aban̄a?
15 Man ẹsọn̄ọ ẹdu ke idaha un̄wana emi, ana mme Christian oro ẹyetde aran ẹdia n̄kpọ kpukpru ini ke se uyo oro okodorode ke edisana okpokoro akadade aban̄a. Akpan ebiet emi udia eke spirit mmọ otode edi Ikọ Abasi, emi mmọ ẹdomode ndikot nnyụn̄ ntie n̄kere kpukpru usen. Jesus n̄ko ama ọn̄wọn̄ọ ndinọ mmọ “udia ke edikem ini” ebe ke “asan̄autom [esie] emi anamde akpanikọ, onyụn̄ enyenede ọniọn̄.” (Matthew 24:45) “Asan̄autom” emi edi ofụri otu mme Christian oro ẹyetde aran ke isọn̄ ke akpan ikpehe ini kiet ekededi. Christ amada otu oro ẹyetde aran mi ndimịn̄ ntọt edisu mme prọfesi Bible nnyụn̄ nnọ ekemini ndausụn̄ ke nte ẹbuande mme edumbet Bible ke uwem eke usen ke usen ke eyomfịn. Ntem, mme Christian oro ẹyetde aran ẹdia n̄kpọ ẹto kpukpru utọ ndutịm eke spirit oro ye esịtekọm. Edi uwem eke spirit mmọ ndisụk n̄kaiso ndu ọkọn̄ọ ke se ikponde ikan edibọ ifiọk Abasi nsịn ke esịt ye ekikere mmọ. Jesus ọkọdọhọ ete: “Udia Mi edi ndinam uduak Andidọn̄ Mi, nnyụn̄ mma utom Esie.” (John 4:34) Kpasụk ntre, mme Christian oro ẹyetde aran ẹnyene uyụhọ ebe ke ndisịn idem kpukpru usen ndinanam uduak Abasi oro ẹyararede.
16. Nso ke utom itie ufọp incense ada aban̄a?
16 Ke usenubọk ye ke mbubịteyo, oku ama ọfọp incense ọnọ Abasi ke itie ufọp incense ke Edisana. Ke ukem ini oro, mme andituak ibuot oro mîkedịghe mme oku ẹma ẹsibọn̄ akam ẹnọ Abasi ke adan̄aemi ẹdade ke an̄wa okụre temple esie. (Luke 1:8-10) “Incense,” nte Bible anamde an̄wan̄a, ‘edi akam nti ikọt Abasi.’ (Ediyarade 5:8) David andiwet psalm ekewet ete: “Yak akam mi ada ke iso fo nte incense.” (Psalm 141:2) Mme Christian oro ẹyetde aran n̄ko ẹda ifet oro mmọ ẹnyenede ndika mbịne Jehovah ke akam ebe ke Jesus Christ ke n̄kpọuto. Akam ofụri esịt ẹmi ẹtode esịt ẹtie nte enem-utebe incense. Mme Christian oro ẹyetde aran n̄ko ẹtoro Abasi ke mme usụn̄ efen, ẹdade n̄kpọkinua mmọ ndikpep mbon en̄wen n̄kpọ. Ime oro mmọ ẹnyenede ke ini ẹsobode nsọn̄ọn̄kpọ ye nsọn̄ọnda mmọ ke ẹdude ke idak idomo edi n̄kpọ oro enemde Abasi esịt akpan akpan.—1 Peter 2:20, 21.
17. Nso ikabuana ke edisu eke ntịn̄nnịm uwụtn̄kpọ emi akwa oku ke akpa ini okodụkde Ata Edisana ke Usen Usio-Isop?
17 Ke Usen Usio-Isop, akwa oku Israel ekenyene ndidụk Ata Edisana nnyụn̄ mfọp incense ke n̄kpọ ufọp incense o-gold emi mbubek ikan̄ ọdọn̄ọde. Ekenyene ndinam emi mbemiso enye adade iyịp uwa idiọkn̄kpọ odụk. Ke edisu ntịn̄nnịm uwụtn̄kpọ emi, owo oro Jesus ama omụm ọyọhọ nsọn̄ọnda akama ye Jehovah Abasi mbemiso ọnọde uwem esie nte nsinsi uwa kaban̄a mme idiọkn̄kpọ nnyịn. Ntem enye ama owụt ete ke mfọnmma owo ekeme ndimụm nsọn̄ọnda esie n̄kama ye Abasi inamke n̄kpọ m̀mê nso mfịghe ke Satan ada etiene enye. (Mme N̄ke 27:11) Ke ini ẹdomode, Jesus ama ọbọn̄ akam ‘ye ọkpọsọn̄ eseme ye mmọn̄eyet ọnọ Abasi, ẹmi ẹkeyerede enye ke ntak uten̄e Abasi esie.’ (Mme Hebrew 5:7) Ke usụn̄ emi enye ama ọnọ Jehovah ubọn̄ nte edinen ye Andikara ekondo emi enyenede unen. Abasi ama ọnọ Jesus utịp ebe ke ndinam enye eset ke n̄kpa odụk uwem eke heaven oro mîkemeke ndikpa. Ke n̄kokon̄ idaha emi, Jesus ọnọ ntịn̄enyịn ke udiana ntak oro akanamde enye edi isọn̄, oro edi, ndinam mbon oro ẹnamde idiọkn̄kpọ ẹmi ẹkabarede esịt ẹdu ke emem ye Abasi.—Mme Hebrew 4:14-16.
Ubọn̄ Temple Abasi eke Spirit Oro Okponde Akan
18. Didie ke Jehovah ọkọnọ temple esie eke spirit n̄wọrọnda ubọn̄?
18 Jehovah ama ebemiso etịn̄ ete: “Ubọn̄ ekperedem ufọk eyekpon akan eke akpa.” (Haggai 2:9) Ebede ke ndinam Jesus eset nte Edidem ye Akwa Oku emi mîkemeke ndikpa, Jehovah ama ọnọ temple esie eke spirit n̄wọrọnda ubọn̄. Jesus kemi odu ke idaha ndida ‘nsinsi edinyan̄a nsọk kpukpru owo ẹmi ẹkopde uyo esie.’ (Mme Hebrew 5:9) Akpa mbon oro ẹkewụtde utọ n̄kopuyo oro ẹkedi mbet 120 ẹmi ẹkebọde edisana spirit ke Pentecost ke 33 E.N. N̄wed Ediyarade ama ebemiso etịn̄ ete ke nditọ Israel eke spirit emi ke akpatre ẹdidi owo 144,000. (Ediyarade 7:4) Ke ẹkpade, ediwak mmọ ẹkenyene ndidu ke ikpîkpu udi ubonowo ye unana ifiọk, ẹbetde ini emi Jesus edidude ke odudu ubọn̄. Ubatini prọfesi oro odude ke Daniel 4:10-17, 20-27 anyan ubọk owụt 1914 nte ini emi Jesus ọtọn̄ọde ndikara ke ufọt mme asua esie. (Psalm 110:2) Ke ediwak isua mbemiso oro, mme Christian oro ẹyetde aran ẹma ẹtie ẹbet isua oro ye ọkpọsọn̄ udọn̄. Akpa ekọn̄ ererimbot ye mme n̄kpọnnam oro ẹketienede ẹsịm ubonowo ẹma ẹnọ uyarade ke akpanikọ nte ke ẹma ẹdori Jesus ke ebekpo nte Edidem ke 1914. (Matthew 24:3, 7, 8) Esisịt ini ke oro ebede, ini onyụn̄ edide edisịm ‘ikpe nditọn̄ọ ke ufọk Abasi,’ Jesus ama osu un̄wọn̄ọ oro ọkọn̄wọn̄ọde ọnọ mbet esie oro ẹyetde aran emi ẹma ẹkede ke n̄kpa ete: “Nyefiak ndi ndida mbufo nnọ Idem Mi.”—1 Peter 4:17; John 14:3.
19. Didie ke nsụhọ ke otu owo 144,000 ẹdibe ẹdụk Ata Edisana eke heaven?
19 Idịghe kpukpru owo 144,000 ẹmi ẹdide mme andibuana ke edisana itie oku ke ẹfịk akpatre idiọn̄ọ ẹnyụn̄ ẹtan̄ ẹka ebietidụn̄ mmọ eke heaven. Nsụhọ ke otu mmọ ke ẹsụk ẹdu uwem ke isọn̄ ke idaha eke spirit emi Edisana akadade aban̄a, emi “ukara,” m̀mê n̄kpọ ubiọn̄ọ, edide ikpọkidem mmọ, abaharede ọkpọn̄ edisana iso Abasi. Nte mmọemi ẹkpade ke edinam akpanikọ, ẹnam mmọ ẹset kpa ke ebe oro nte mme edibotn̄kpọ eke spirit oro mîkemeke ndikpa man ẹkediana ye mmọ eken ke otu 144,000 oro ẹma ẹkedodu ke heaven.—1 Corinth 15:51-53.
20. Nso akpan utom ke nsụhọ ke edisana itie oku ẹnam idahaemi, ndien ye nso utịp?
20 Ye ata ediwak oku ẹnamde utom ye Akwa Oku ke heaven, temple Abasi eke spirit emenyene ubọn̄ efen efen. Kan̄a kemi, mbon oro ẹsụhọde ke edisana itie oku emi ke ẹnam eti utom ke isọn̄. Ebede ke ukwọrọikọ mmọ, Abasi ke ‘enyen̄e kpukpru mme idụt’ ye mme etop ubiereikpe esie, nte ẹkebemde iso etịn̄ ke Haggai 2:7. Ke ukem ini oro, ediwak miliọn mme andituak ibuot ẹmi ẹtịn̄de ẹban̄a nte “ndiye n̄kpọ kpukpru mme idụt” ke ẹbụn̄ọ ẹdụk okụre temple Jehovah eke isọn̄. Didie ke mmọemi ẹdot ke ndutịm Abasi kaban̄a utuakibuot, ndien nso ubọn̄ ini iso ke nnyịn ikeme ndidori enyịn mban̄a akwa temple eke spirit esie? Ẹyedụn̄ọde mme mbụme ẹmi ke ibuotikọ efen.
Mme Mbụme Ndụn̄ọde
◻ Nso n̄wọrọnda uwụtn̄kpọ ke Jesus okonịm ke 29 E.N.?
◻ Nso ndutịm ikọtọn̄ọ ndidu ke edinam ke 29 E.N.?
◻ Edisana ye Ata Edisana ẹda ẹban̄a nso?
◻ Didie ke ẹkenọ akwa temple eke spirit ubọn̄?
[[Ndise ke page 17]
Ke ini ẹkeyetde Jesus aran ke edisana spirit ke 29 E.N., akwa temple Abasi eke spirit ama ọtọn̄ọ edinam