Uduot Mbuọtidem Fo—ke Ẹdomo Idahaemi

“Ẹnịm ẹte edi n̄kpọ ọyọhọ idatesịt, nditọete mi, ke ini nsio nsio idomo ẹsịmde mbufo; ke ẹfiọkde ẹte mbuọtidem mbufo emi ẹma ẹdomo ẹwụt anam ime ọwọrọ.”—JAMES 1:2, 3.

1. Ntak emi mme Christian ẹkpedoride enyịn ẹban̄a mme udomo mbuọtidem mmọ?

MME ata Christian imaha ndutụhọ, mmọ inyụn̄ ikopke inemesịt ito ubiak m̀mê esuene. Edi, mmọ ẹti mme ikọ eke enyọn̄ emi oro James eyeneka Jesus ekewetde. Christ ama anam an̄wan̄a mbet esie nte ke mmọ ẹkeme ndidori enyịn ndisobo ukọbọ ye mme mfịna eken ke ntak oro mmọ ẹsọn̄ọde ẹyịre ye mme idaha Abasi. (Matthew 10:34; 24:9-13; John 16:33) Kpa ye oro, idatesịt ekeme ndito mme utọ udomo oro. Didie ke edi ntre?

2. (a) Didie ke mme udomo mbuọtidem nnyịn ẹkeme ndida n̄kesịm idatesịt? (b) Didie ke ime ekeme ndinam utom esie mma ke se iban̄ade nnyịn?

² Akpan ntak oro nnyịn inyenede idatesịt ke ini isobode mme idomo m̀mê mme udomo edi nte ke mmọ ẹmi ẹkeme ndin̄wụm eti mfri. Nte James ọdọhọde, ndiyọ mme udomo m̀mê mfịna “anam ime ọwọrọ.” Nnyịn imekeme ndibọ ufọn nto edifori ọsọn̄urua edu Christian oro. James ekewet ete: “Yak ime anam utom esie ama, man mbufo ẹfọn ẹma ẹnyụn̄ ẹsọn̄ ke ukpọn̄ ẹkûnana baba n̄kpọ kiet.” (James 1:4) Ime enyene n̄kpọ ndinam, “utom.” Utom esie edi ndinam nnyịn ikem ke kpukpru nde, an̄wamde nnyịn ndidot ọyọhọ ọyọhọ nte mme Christian. Ntem, ebede ke ndiyak mme idomo ẹsịm utịt ye unana edidomo ndida mme usụn̄ oro mîkemke ye N̄wed Abasi ntre enye usọp usọp, ẹdomo mbuọtidem nnyịn ẹnyụn̄ ẹnam ọfọn. Edieke nnyịn inanade ime, mbọm, mfọnido, m̀mê ima ke ndinam n̄kpọ ye mme idaha m̀mê ye ekemmọ owo, ime ekeme ndinam nnyịn itetịm ifọn ikan. Ih, nte asan̄ade edi: Mme udomo ẹnam ime ọwọrọ; ime ofori mme edu Christian; mmọ ẹmi ẹdi ntak idatesịt.—1 Peter 4:14; 2 Peter 1:5-8.

3. Ntak emi nnyịn mîkpafiakke edem ke ntak ndịk mme idomo m̀mê mme udomo mbuọtidem?

³ Apostle Peter n̄ko ama owụt ntak mîyomke nnyịn ikop ndịk m̀mê ifiak edem ke ntak mme udomo mbuọtidem nnyịn. Enye ekewet ete: “Mbufo ẹnyụn̄ ẹdadara ke ini oro etieti, okposụkedi nte akpanade nte nsio nsio idomo ẹnam mbufo ẹdu ke mfụhọ ke emi ke ekpri ini; man mbuọtidem mbufo emi ẹma ẹdomo ẹwụt, emi ọsọn̄de urua akan mbiara gold eke ẹdade ikan̄ ẹdomo, ọkpọwọrọ edi n̄kpọ itoro ye ubọn̄ ye ukpono ọnọ mbufo ke adan̄aemi Jesus Christ ediyararede idem.” (1 Peter 1:6, 7) Mme ikọ ẹmi ẹnen̄ede ẹnọ nsịnudọn̄ idahaemi koro “akwa ukụt”—ini itoro, ubọn̄, ukpono, ye edibọhọ—etịm ekpere akan nte ndusụk owo ẹkemede ndikere onyụn̄ etịm ekpere akan ini emi nnyịn ikakabarede idi mme andinịm ke akpanikọ.—Matthew 24:21; Rome 13:11, 12.

4. Didie ke eyenete kiet ekekere aban̄a mme udomo oro enye ye mme Christian eken oro ẹyetde aran ẹkesobode?

⁴ Ke ibuotikọ oro ekebede, nnyịn ima ikere iban̄a mme udomo oro nsụhọ oro ẹyetde aran ẹkesobode ọtọn̄ọde ke 1914 ka iso. Ndi mmọ ẹmi ẹkedi isọn̄ kaban̄a idatesịt? A. H. Macmillan ama ọnọ ekikere anyan ini emi: “Mma n̄kụt ediwak n̄kpọsọn̄ idomo ẹsịmde esop emi ye mme udomo mbuọtidem mbon oro ẹdude ke enye. Ye un̄wam spirit Abasi enye ama ọbọhọ odu onyụn̄ aka iso ndikọri. Mma n̄kụt ọniọn̄ edibet Jehovah ke ime ndinam mme n̄kpọ N̄wed Abasi an̄wan̄a nnyịn utu ke ndiyat esịt mban̄a obufa ekikere. . . . Inamke n̄kpọ m̀mê nso ukpụhọde ke nnyịn ikpenyene ndinam mban̄a mme ekikere nnyịn ke ini ke ini, oro idikpụhọkede enọ ufak eke mbọm ye un̄wọn̄ọ Abasi kaban̄a nsinsi uwem. Ntre ufọn ikodụhe ndiyak mme idotenyịn oro mîsụho m̀mê mme ukpụhọde ekikere ẹnam mbuọtidem nnyịn emem.”—Enyọn̄-Ukpeme (Ikọmbakara), August 15, 1966, page 504.

5. (a) Mme ufọn ewe ẹketo nsụhọ ndisobo mme idomo? (b) Ntak nnyịn ikpenyenede udọn̄ ke n̄kpọ aban̄ade udomo idahaemi?

⁵ Mme Christian oro ẹyetde aran oro ẹkebọhọde ikpehe ini udomo eke 1914-1919 ẹma ẹbọhọ odudu ukara ererimbot ye ediwak edinam ido ukpono Babylon. Nsụhọ ẹma ẹka iso nte ikọt oro ẹnamde asana ẹnyụn̄ ẹnen̄erede, ke unyịme ẹwade mme uwa ekọm ẹnọ Abasi ẹnyụn̄ ẹnyenede nsọn̄ọ nte ke mmimọ nte ikọt ikedi se enye enyịmede. (Isaiah 52:11; 2 Corinth 6:14-18) Ikpe ama ọtọn̄ọ ke ufọk Abasi, edi idikụreke ke ikpehe ini kiet oro ẹnịmde. Edidomo ye edisat ikọt Jehovah nsion̄o akaka iso. Ke ẹdomo n̄ko mbuọtidem mbon oro ẹdoride enyịn ndibọhọ “akwa ukụt” oro asan̄ade ekpere nte ubak “akwa otuowo.” (Ediyarade 7:9, 14) Ẹnam emi ke usụn̄ ebietde se nsụhọ ẹkesobode ọkọrọ ye ke mme usụn̄ en̄wen.

Didie ke Ẹkeme Ndidomo Fi?

6. Nso idi orụk ọkpọsọn̄ idomo kiet emi ediwak owo ẹsobode?

⁶ Ediwak Christian ẹkekere ẹban̄a n̄kpọ-ata eke edisobo mme udomo ke orụk ibụmede en̄wan iso ye iso. Mmọ ẹti mbụk emi: “[Mme adausụn̄ mme Jew] ẹkot mme apostle ẹdi, ẹnyụn̄ ẹmia mmọ, ẹnyụn̄ ẹwụk mmọ ẹte, ẹkûtịn̄ ikọ ke enyịn̄ Jesus, ẹnyụn̄ ẹyak mmọ ẹnyọn̄ọ. Ntre ke mmọ oro ẹwọrọ ẹkpọn̄ esop, ẹdara koro ẹbatde ẹte mmọ ẹmedot ndibọ esuene kaban̄a enyịn̄ Jesus.” (Utom 5:40, 41) Ndien mbụk ikọt Abasi eyomfịn, akpan akpan ke mme ini ekọn̄ ererimbot, anam an̄wan̄a nte ke ediwak ke otu Mme Ntiense Jehovah ẹma ẹnen̄ede ẹsobo umia, ye se iketịmde idiọk ikan oro, ke ubọk mme andikọbọ.

7. Nso udomo ke ndusụk Christian eke eyomfịn ẹwụt mbuọtidem ẹkesịm?

⁷ Kaban̄a mme Christian ndidi mbon oro ẹkọbọde, ererimbot isịnke ubahade ke otu nsụhọ oro ẹyetde aran ye akwa otuowo eke “mme erọn̄ en̄wen.” (John 10:16) Ke ofụri isua ẹmi, ẹmedomo mme andibuana ke otu mbiba ẹmi idiọk idiọk ebe ke n̄kpọkọbi ye idem n̄kpa usụn̄ Abasi ke ntak ima oro mmọ ẹnyenede ẹnọ Abasi ye mbuọtidem mmọ ke enye. Otu mbiba ẹmi ẹmeyom spirit Abasi, inamke n̄kpọ m̀mê nso idi idotenyịn mmọ. (Men Enyọn̄-Ukpeme, June 15, 1996, page 31, domo.) Ke mme iduọk isua 1930 ye 1940 ke Germany okodude ke idak Nazi, ediwak asan̄autom Jehovah, esịnede nditọwọn̄, ẹma ẹwụt n̄wọrọnda mbuọtidem, ẹma ẹnyụn̄ ẹdomo ediwak ẹsịm akpatre idaha. Ke mme ini ata ndondo emi, ikọt Jehovah ẹmesobo ukọbọ ke mme utọ idụt nte Burundi, Eritrea, Ethiopia, Malawi, Mozambique, Rwanda, Singapore, ye Zaire. Ndien mme orụk udomo ẹmi ẹkaka iso.

8. Didie ke mme ikọ eyenete kiet ke Africa ẹwụt ẹte ke n̄kpọ efen efen abuana ke edidomo mbuọtidem nnyịn akan ediyọ ukọbọ edide ke orụk umia?

⁸ Nte ededi, nte ima ikokokụt, ke ẹdomo mbuọtidem nnyịn n̄ko ke mme ata n̄kari n̄kari usụn̄. Ndusụk udomo ẹmi inen̄ekede idi nnennen nnennen inyụn̄ idịghe mmemmem ndisọp mfiọk. Kere nte afo akpanamde n̄kpọ aban̄a ndusụk se itienede emi. Eyenete kiet ke Angola emi enyenede nditọ duop okodu ke esop oro ke esisịt ini ẹkesịbede ẹkpọn̄ edinyene nneme ye nditọete oro ẹkamade utom. Nte ini akade mbon en̄wen ẹma ẹkeme ndisika esop oro. Ẹma ẹbụp enye m̀mê enye ekesinam didie ọnọ ubon esie udia. Ikedịghe mmemmem n̄kpọ inọ enye ndibọrọ, ndien ofụri se enye eketịn̄de ekedi nte ke n̄kpọ ama ọsọn̄. Ndi enye ama ekeme ndinọ nditọ esie udia ke nsụhọde n̄kaha ini kiet ke usen? Enye ọkọbọrọ ete: “Nte ededi, ikememke utom. Nnyịn ima ikpep ndida se nnyịn inyenede ndu uwem.” Ndien ye ata nsọn̄uyo, enye ama ọdọhọ ete: “Edi ndi emi idịghe se nnyịn idoride enyịn iban̄a ke ukperedem ini ẹmi?” Utọ mbuọtidem oro edi n̄wọrọnda ke ererimbot, edi idịghe esen n̄kpọ ke otu mme anam-akpanikọ Christian, ẹmi ẹnyenede ọyọhọ mbuọtidem nte ke mme un̄wọn̄ọ Obio Ubọn̄ ẹyesu.

9. Didie ke ẹdomo nnyịn ke ebuana ye 1 Corinth 11:3?

⁹ Ẹdomo akwa otuowo n̄ko ke ebuana ye mme ndutịm ukara Abasi. Ẹnọ esop Christian ofụri ererimbot ndausụn̄ nte ekemde ye mme edumbet Abasi ye mme idaha ukara Abasi. Emi ọwọrọ akpa kan̄a ndidiọn̄ọ Jesus nte Adausụn̄, enye emi ẹmekde ndidi Ibuot esop. (1 Corinth 11:3) Unyịme unyịme nsụkibuot nnọ enye ye Ete esie owụt idem ke mbuọtidem nnyịn ke mme edimek eke ukara Abasi ye mme ubiere oro ẹnyenede ebuana ye nnyịn ndidiana kiet nnam uduak Jehovah. N̄ko-n̄ko, ke esop n̄kann̄kụk kiet kiet, odu irenowo ẹmi ẹmekde ndida usụn̄. Mmọ ẹdi mme anana mfọnmma owo ẹmi nnyịn ikemede ndisọp n̄kụt mme ndudue mmọ; kpa ye oro ẹteme nnyịn ẹte ikpono mme utọ esenyịn oro inyụn̄ isụk ibuot. (Mme Hebrew 13:7, 17) Ndi afo ndusụk ini emesikụt nte oro edide n̄kpọ-ata? Ndi emi enen̄ede edi udomo ọnọ fi? Ke edide ntre, ndi afo ke ọbọ ufọn oto udomo mbuọtidem fo enye emi?

10. Nso udomo ke nnyịn isak iso ise kaban̄a utom ukwọrọikọ?

¹⁰ Ẹdomo nnyịn n̄ko ke ebuana ye ifet ye mbiomo edibuana kpukpru ini ke utom ukwọrọikọ. Man nnyịn ibe udomo emi, ana nnyịn ifiọk ite ke ndinyene ọyọhọ ebuana ke utom ukwọrọikọ abuana se ikande esisịt, m̀mê ekpri udomo, ukwọrọikọ. Ti ikọ unyịme Jesus kaban̄a ubuene ebeakpa oro ọkọnọde ofụri se enye ekenyenede. (Mark 12:41-44) Nnyịn imekeme ndibụp idem nnyịn ite, ‘Ndi ami ke nnọ idem mi ukem ntre ke ebuana ye utom ukwọrọikọ mi?’ Kpukpru nnyịn inyene ndidi Mme Ntiense nnọ Jehovah ke ofụri usen, idude ke mben̄eidem ke kpukpru ifet ndiyak un̄wana nnyịn ayama.—Matthew 5:16.

11. Didie ke mme ukpụhọde ke ifiọk m̀mê item ke edu uwem ekeme ndidi udomo?

¹¹ Udomo efen oro nnyịn ikemede ndisobo enyene ebuana ye udomo nte nnyịn iwụtde esịtekọm ke n̄kaiso un̄wana oro ẹsịnde ke akpanikọ Bible ye kaban̄a item oro otu asan̄autom emi anamde akpanikọ ọnọde. (Matthew 24:45) Ndusụk ini emi oyom mme edinen̄ede ke ọkpọkpọ edu uwem, utọ nte ke ini akakabarede ana in̄wan̄în̄wan̄ nte ke mbon oro ẹdade un̄wọn̄ ẹnyene nditre edieke mmọ ẹyomde ndika iso ndu ke esop.a (2 Corinth 7:1) Mîdịghe udomo ekeme ndidi ke nnyịn ndinyịme ediyom oro oyomde nnyịn ikpụhọde ikwọ oro imade m̀mê ndusụk orụk unọ idem inemesịt eken.b Nte nnyịn iyeyịk ọniọn̄ oro odude ke item oro ẹnọde? Mîdịghe ndi nnyịn iyayak spirit Abasi ofori nte nnyịn ikerede n̄kpọ onyụn̄ an̄wam nnyịn ndimen obufa edu Christian nsịne?—Ephesus 4:20-24; 5:3-5.

12. Nso ke ẹyom man ẹsọn̄ọ mbuọtidem ke owo ama akana baptism?

¹² Ke mme iduọk isua duop, ibat mbon akwa otuowo ọmọkọri, ndien ke ẹma ẹkena baptism mmọ ẹka iso ndisọn̄ọ itie ebuana mmọ ye Jehovah. Emi abuana se ikande edidụk mbono Christian, edika mbono esop ifan̄ ke Ufọkmbono Obio Ubọn̄, m̀mê edibuana ke ini ke ini ke utom an̄wautom. Ke ndinam an̄wan̄a: Owo ekeme ndidu ke an̄wa Akwa Babylon, kpa ukara ererimbot eke nsunsu ido ukpono, edi nte enye enen̄ede ọkpọn̄ enye? Nte enye ke osụk ọsọsọn̄ọ eyịre ye mme n̄kpọ oro ẹwụtde edu Akwa Babylon—edu oro esuenede ndinen idaha Abasi? Ndi enye ada edisana ido idan̄ ye edinam akpanikọ ke ndọ mfefere mfefere? Ndi enye odori nsọn̄uyo ke ọkpọkpọ udọn̄ ye udọn̄ n̄kpọ obụkidem akan mme udọn̄ n̄kpọ eke spirit? Ih, nte enye anana ndo ke ererimbot?—James 1:27.

Ufọn Otode Mbuọtidem Oro Ẹma Ẹkedomo

13, 14. Nso ke ndusụk owo ẹnam ke ẹma ẹketọn̄ọ ndisan̄a ke usụn̄ utuakibuot akpanikọ?

¹³ Edieke edide nnyịn ima inen̄ede ifen̄e iwọn̄ọ ke Akwa Babylon inyụn̄ iwọn̄ọ n̄ko ke ererimbot, ẹyak nnyịn ikûse mme n̄kpọ oro ẹdude ke edem. Ke n̄kemuyo ye edumbet oro ẹwetde ke Luke 9:62, owo nnyịn ekededi ndise edem ọkpọwọrọ nditaba edidi andidu ke idak Obio Ubọn̄ Abasi. Jesus ọkọdọhọ ete: “Baba owo kiet emi akabarede ese edem, ke enye ama ekesịn ubọk ke ufụn̄isọn̄, ikemke ndinam utom Ubọn̄ Abasi.”

¹⁴ Edi ndusụk owo ẹmi ẹkekabarede ẹdi Christian ke ini edem anyan ini toto ke ini oro ẹma ẹkabade ẹbiet eyo emi. Mmọ ibiọn̄ọke edu ererimbot. (2 Peter 2:20-22) Mme n̄kpọ ererimbot oro ẹtịmerede owo ẹmeda udọn̄ ye ini mmọ, ke ntem ẹbiọn̄ọde n̄kọri mmọ. Utu ke nditịm n̄wụk ekikere ye esịt mmọ ke Obio Ubọn̄ Abasi ye edinen ido esie, ẹnịmde mme utọ n̄kpọ oro akpa ke uwem, mmọ ẹmewọn̄ọde ẹka ndibịne mme utịtmbuba uma inyene obụkidem. Ibọhọke ẹnụk mmọ ndifiọk unana mbuọtidem ye ndebe ndebe idaha mmọ ẹnyụn̄ ẹkpụhọde usụn̄ uwem mmọ ebe ke ndiyom item Abasi, mmọ ẹdu ke itiendịk editaba ọsọn̄urua itie ebuana mmọ ye Jehovah ye esop esie.—Ediyarade 3:15-19.

15. Nso ke oyom man ẹka iso ẹdi se Abasi enyịmede?

¹⁵ Nnyịn ndidi se ẹnyịmede nnyụn̄ ndu ke udịm kaban̄a edibọhọ akwa ukụt oro etịmde ekpere ọkọn̄ọ ke nnyịn ndika iso nsana, ‘iyetde ọfọn̄idem nnyịn ke iyịp Eyenerọn̄.’ (Ediyarade 7:9-14; 1 Corinth 6:11) Edieke nnyịn mîkaha iso inyene edisana, nnennen idaha ke iso Abasi, owo idinyịmeke edisana utom nnyịn. Ke akpanikọ, owo nnyịn kiet kiet ekpenyene ndifiọk nte ke uduot mbuọtidem oro ẹdomode ayan̄wam nnyịn ndiyọ nnyụn̄ mfep iyatesịt Abasi.

16. Ke mme usụn̄ ewe ke nsu ẹkeme ndidi udomo mbuọtidem nnyịn?

¹⁶ Ndusụk ini, ndutịm usuanetop ye mme ukara ẹsitịn̄ nsu ẹdian ikọt Abasi, ẹyụtde mme ukpepn̄kpọ ye usụn̄ uwem Christian nnyịn. Emi ikpenyeneke ndikpa nnyịn idem, koro Jesus ama owụt in̄wan̄în̄wan̄ ete ke ‘ererimbot ayasua nnyịn koro nnyịn mîdịghe eke ererimbot.’ (John 17:14) Nte nnyịn iyayak mbon oro Satan ekịmde mmọ enyịn ẹsịn nnyịn ndịk ke idem ẹnyụn̄ ẹnam idem emem nnyịn ẹnyụn̄ ẹnam nnyịn ikop bụt iban̄a eti mbụk? Nte nnyịn iyayak mme nsu ẹsude ẹdian akpanikọ ẹfịna edidụk mbono esop nnyịn kpukpru ini ye utom ukwọrọikọ nnyịn? Mîdịghe nte nnyịn iyọsọn̄ọ ida inyụn̄ inyene uko inyụn̄ inen̄ede ibiere ikan nte akanam edide ndika iso ntan̄a akpanikọ aban̄ade Jehovah ye Obio Ubọn̄ esie?

17. Un̄wọn̄ọ ewe ekeme ndidemede nnyịn ndika iso n̄wụt mbuọtidem?

¹⁷ Nte ekemde ye prọfesi Bible oro osude, nnyịn idu uwem idahaemi ke ata utịt ini. Mme idotenyịn nnyịn oro ẹkọn̄ọde ke Bible kaban̄a obufa ererimbot edinen ido ke akpanikọ ẹmọn̄ ẹkabade ẹdi mme inem inem ata idem n̄kpọ. Tutu usen oro edi, kpukpru nnyịn ikpakam iwụt mbuọtidem oro mîsehekede ke Ikọ Abasi inyụn̄ isọn̄ọ mbuọtidem nnyịn ebe ke nditre ndikpa mba ke ndikwọrọ eti mbụk Obio Ubọn̄ ke ofụri ererimbot. Kere ban̄a ediwak tọsịn mbufa mbet oro ẹsinade baptism kpukpru urua. Ndi oro idịghe ntak ekemde ọnọ nnyịn ndifiọk nte ke ime Jehovah kaban̄a ubiereikpe esie ekeme ndida n̄kesịm edinyan̄a nnọ ediwak owo efen efen? Nte nnyịn idatke esịt nte ke Abasi amayak utom ukwọrọikọ unyan̄a uwem Obio Ubọn̄ aka iso? Ndien nte nnyịn ikopke idatesịt nte ke ediwak miliọn owo ẹmenyịme akpanikọ ke ẹnyụn̄ ẹwụt mbuọtidem mmọ?

18. Nso idi ubiere fo kaban̄a edinam uduak Jehovah?

¹⁸ Nnyịn ikemeke nditịn̄ m̀mê udomo mbuọtidem nnyịn idahaemi edibịghi adan̄a didie. Edi imetịm ifiọk emi: Jehovah emenịm usen unam ibat ọnọ idiọk ikpaenyọn̄ ye isọn̄ ẹmi ẹdude ke emi. Kan̄a ke emi, ẹyak nnyịn ibiere ndikpebe ata n̄kokon̄ uduot mbuọtidem oro ẹma ẹkedomo oro Andinam mbuọtidem nnyịn ọfọn ama, Jesus, okowụtde. Ẹnyụn̄ ẹyak nnyịn itiene uwụtn̄kpọ nsụhọ oro ẹyetde aran oro ẹsọn̄de ye eke mbon eken ẹmi ẹnamde utom uko uko ke otu nnyịn.

19. Nso ke afo ekeme nditịm nnịm ke ayakan ererimbot emi?

¹⁹ Nnyịn ikpenyene ndibiere nditan̄a nsinsi eti mbụk ye unana edikpa mba nnọ kpukpru idụt, ekpụk, usem, ye mme owo ke edidianakiet ye angel oro efede ke ufọt enyọn̄. Yak mmọ ẹkop ikọ angel oro: “Mbufo ẹten̄e Abasi, ẹnyụn̄ ẹnọ Enye ubọn̄; koro ekem ini ikpe Esie.” (Ediyarade 14:6, 7) Ke ini ẹnọde ubiereikpe Abasi oro, nso ididi utịp kaban̄a uduot mbuọtidem nnyịn oro ẹma ẹkedomo? Nte ididịghe ubọn̄ ubọn̄ edikan—edinyan̄a nsio ke editịm n̄kpọ emi odude ke emi nsịn ke edinen obufa ererimbot Abasi? Ebede ke ndiyọ mme udomo mbuọtidem nnyịn, nnyịn iyekeme ndidọhọ, nte apostle John ọkọdọhọde: “Emi edi edikan eke akakande ererimbot, kpa mbuọtidem nnyịn.”—1 John 5:4.

[Mme Ikọ idakisọn̄]

Nte Afo Emeti?

◻ Didie ke edi nte ke mme udomo mbuọtidem nnyịn ẹkeme ndidi ntak idatesịt?

◻ Nso idi ndusụk udomo mbuọtidem nnyịn oro owo mîkemeke ndisọp mfiọk?

◻ Didie ke nnyịn ikeme ndibọ ufọn ebe ke ndiyọ mme udomo mbuọtidem nnyịn uforo uforo?

[Ndise ke page 17]

A. H. Macmillan (iso iso ufien) ke ekperede ini emi ẹkesịnde enye ye mme akamautom Watch Tower Society ke ufọk-n̄kpọkọbi ke ufịk

Enye ekedi andidụk mbono ke Detroit, Michigan, 1928

Ke mme akpatre isua esie, Brọda Macmillan okosụk owowụt mbuọtidem

[Ndise ke page 18]

Ukem nte ubon emi, ediwak Christian ke Africa ẹmewụt uduot mbuọtidem oro ẹma ẹkedomo