“Kpep Nnyịn Ndibọn̄ Akam”
“Kiet ke otu mbet Esie ọdọhọ Enye ete, Ọbọn̄, kpep nnyịn ndibọn̄ akam.”—LUKE 11:1.
1-3. (a) Ntak emi mme mbet Jesus ẹkeyomde item kaban̄a akam-a? (b) Mme mbụme ewe idemede kaban̄a akam?
NDUSỤK owo ẹnyene ndammana inem inem uyo ikwọ. Mmọ eken ẹnyene ndammana enọ nte mme akwaikwọ. Edi man ẹsịm n̄kon̄ n̄kan ukeme mmọ, idem mme ọkwọikwọ ye mme ebre ndido ẹmi ẹyom item. Ukem oro ke edi ye akam. Mme mbet Jesus Christ ẹma ẹdifiọk ẹte ke mmimọ imoyom item edieke anade Abasi okop akam mmimọ.
2 Jesus nte ido edide ama esika ebịne Ete esie ke akam ke ndịbe, nte enye akanamde ke ofụri okoneyo mbemiso emekde mme apostle 12. (Luke 6:12-16) Okposụkedi enye akakpakde mme mbet esie n̄ko ndibọn̄ akam ke ndịbe, mmọ ẹma ẹsikop nte enye ọbọn̄de akam an̄wan̄wa ẹnyụn̄ ẹkụt ẹte ke enye ibietke mbon mbubịk ido ukpono ẹmi ẹkesibọn̄de akam man mme owo ẹkụt. (Matthew 6:5, 6) Nte owụtde ifiọk, ndien, mme anditiene Jesus ẹma ẹyom ntatara item esie kaban̄a akam. Ntre, nnyịn ikọt ite: “Edikem, nte Enye ọbọn̄de akam ke ebiet kiet, ke ini Enye odopde, kiet ke otu mbet Esie ọdọhọ Enye ete, Ọbọn̄, kpep nnyịn ndibọn̄ akam, kpa nte John [Andinịm owo baptism] onyụn̄ ekpepde mbet esie.”—Luke 11:1.
3 Didie ke Jesus ọkọbọrọ? Nso ke nnyịn ikeme ndikpep nto uwụtn̄kpọ esie? Ndien didie ke nnyịn ikeme ndibọ ufọn nto item esie kaban̄a akam?
Se Nnyịn Ikpepde
4. Ntak emi nnyịn ‘mîkpodopke ndibọn̄ akam,’ ndien ndinam emi ọwọrọ nso?
4 Nnyịn imekeme ndikpep ekese nto mme ikọ ye uwụtn̄kpọ Jesus nte owo oro ọbọn̄de akam. Ukpepn̄kpọ kiet edi, edieke okoyomde mfọnmma Eyen Abasi esibọn̄ akam kpukpru ini, otịm oyom mme anana mfọnmma mbet esie ẹyom Abasi kpukpru ini kaban̄a ndausụn̄, ndọn̄esịt, ye udia eke spirit ẹkan. Ke ntre, nnyịn ‘ikpodopke ndibọn̄ akam.’ (1 Thessalonica 5:17) Nte ededi, emi iwọrọke ke ana nnyịn ke ata ata usụn̄ isitọn̄ọ edọn̄ kpukpru ini. Utu ke oro, nnyịn ikpenyene edu ubọn̄ akam kpukpru ini. Nnyịn ikpoyom Abasi kaban̄a ndausụn̄ ke kpukpru ikpehe uwem man nnyịn ikeme ndinam n̄kpọ ye ikike inyụn̄ inyene unyịme esie kpukpru ini.—Mme N̄ke 15:24.
5. Nso ikeme ndidia ini oro nnyịn ikpadade ibọn̄ akam, ndien nso ke nnyịn ikpanam iban̄a emi?
5 Ke “ukperedem ini” ẹmi, ediwak n̄kpọ ekeme ndidia ini oro nnyịn ikpabiatde ke edibọn̄ akam. (2 Timothy 3:1) Edi edieke mme mfịna esịtufọk, edise mban̄a mbubehe, ye n̄kpọ ntre ẹbiọn̄ọde akam ofụri ini oro isibọn̄de inọ Ete nnyịn eke heaven, esịt nnyịn odobi akaha ye mme ekikere uwem emi. Ẹkpenyene ndinen̄ede utọ idaha ntre ye unana ubiatini, koro ndikpu ndibọn̄ akam adade osịm ediduọk mbuọtidem. Nnyịn ikpenyene ndisụhọde ubọk ke mme utom idịbi udia nnyịn mîdịghe inam ekikere uwem ada ukem ukem ye editịm n̄n̄wọn̄ọde esịt nnyịn ntiene Abasi kaban̄a ndausụn̄ ke ofụri esịt ndien ndien. Nnyịn ikpenyene ‘ndidu ke edidemede man ikeme ndibọn̄ akam.’—1 Peter 4:7, NW.
6. Ewe akam ke nnyịn ididụn̄ọde idahaemi, ndien ye nso uduak?
6 Ke se ẹsikotde akam uwụtn̄kpọ, Jesus ama ekpep mme mbet esie nte ẹbọn̄de akam, idịghe nnennen se ẹkpetịn̄de. Mbụk Luke okpụhọde esisịt ye eke Matthew koro emi akabuanade nsio nsio idaha. Nnyịn iyedụn̄ọde akam emi nte uwụtn̄kpọ utọ orụk akam oro nnyịn ikpọbọn̄de nte mme anditiene Jesus ye Mme Ntiense Jehovah.
Ete Nnyịn ye Enyịn̄ Esie
7. Mmanie ẹnyene ifet ndikot Jehovah nte “Ete nnyịn”?
7 “Ete nnyịn emi odude ke heaven.” (Matthew 6:9; Luke 11:2) Sia Jehovah edide Andibot ubonowo onyụn̄ odụn̄de ke ebietidụn̄ eke heaven, odot ẹkot enye nte “Ete nnyịn emi odude ke heaven.” (1 Ndidem 8:49; Utom 17:24, 28) Ndida ikọ oro “nnyịn” owụt ke mbon en̄wen n̄ko ẹnyene n̄kpet n̄kpet ebuana ye Abasi. Edi mmanie ẹnyene ifet oro mînyeneke-nyene adan̄a ndikot enye nte Ete mmimọ? Mme owo oro ẹbuanade ke ubon mme andituak ibuot nnọ enye kpọt ẹmi ẹma ẹkeyak idem ẹnọ, ẹnyụn̄ ẹna baptism. Ndikot Jehovah “Ete nnyịn” owụt ke nnyịn imenyene mbuọtidem ke Abasi inyụn̄ idiọn̄ọ ke n̄kukụre isọn̄ ndidu ke emem ye enye edi ndinyịme uwa ufak Jesus ọyọhọ ọyọhọ.—Mme Hebrew 4:14-16; 11:6.
8. Ntak ọkpọdọn̄de nnyịn ndibiat ini ke ndibọn̄ akam nnọ Jehovah?
8 Nnyịn ikpesịk ikpere Ete nnyịn eke heaven didie ntem! Nte nditọ oro akananam mîkpaha mba ndika mbịne ete mmọ, nnyịn ikpoyom ndibiat ini ke ndibọn̄ akam nnọ Abasi. Ntotụn̄ọ esịtekọm kaban̄a mme edidiọn̄ esie eke spirit ye eke obụkidem okponụk nnyịn ndikọm enye kaban̄a eti ido esie. Nnyịn ikpenyene ntụhọ nditop mbiomo ẹmi ẹfịkde nnyịn ndori enye, inyenede mbuọtidem nte ke enye eyesọn̄ọ nnyịn idem. (Psalm 55:22) Nnyịn imekeme ndinịm nte ke edieke nnyịn inamde akpanikọ, kpukpru n̄kpọ ke akpatre ẹyesan̄a mfọn mfọn koro enye ekerede aban̄a nnyịn.—1 Peter 5:6, 7.
9. Akam oro ẹbọn̄de ẹte yak ẹkpono enyịn̄ Abasi edi eben̄e kaban̄a nso?
9 “Yak ikpono enyin Fo.” (Matthew 6:9; Luke 11:2) Ikọ oro “enyịn̄” ke ndusụk ini ẹsiwụt owo oro ke idemesie, ndien “ndikpono” ọwọrọ “ndinam asana, ndisio nnịm san̄asan̄a m̀mê ndida ke edisana.” (Men Ediyarade 3:4 domo.) Ke nditịm ntịn̄, ndien, akam oro ẹbọn̄de ẹte yak ẹnam enyịn̄ Abasi asana edi eben̄e nte yak Jehovah anam n̄kpọ ndinam idemesie asana. Didie? Ke ndimen kpukpru esuene oro akanam ẹdoride ke enyịn̄ esie mfep. (Psalm 135:13) Ke afan̄ emi, Abasi eyesio idiọkido efep, onịm idemesie ke akwa, onyụn̄ anam mme idụt ẹfiọk ẹte ke enye edi Jehovah. (Ezekiel 36:23; 38:23) Edieke ọdọn̄de nnyịn ndikụt usen oro nnyụn̄ ntịm mfiọk ubọn̄ Jehovah, nnyịn kpukpru ini iyesisan̄a ikpere enye ke ukpono ukpono edu emi ikọ ikọ “yak ikpono enyịn̄ Fo” owụtde.
Obio Ubọn̄ Abasi ye Uduak Esie
10. Ọwọrọ nso ke ini nnyịn ibọn̄de akam ite yak Obio Ubọn̄ Abasi edi?
10 “Yak Ubon Fo edi.” (Matthew 6:10; Luke 11:2) Obio Ubọn̄ oro ẹtịn̄ ẹban̄a mi edi akakan ukara Jehovah, nte ẹwụtde ebe ke ukara Messiah eke heaven ke ubọk Jesus Christ ye “edisana ikọt,” kpa nsan̄a esie. (Daniel 7:13,14, 18, 27; Isaiah 9:6, 7; 11:1-5) Ndibọn̄ akam ndọhọ yak enye “edi” ọwọrọ nso? Emi ọwọrọ ke nnyịn iben̄e ite yak Obio Ubọn̄ Abasi edi edisobo kpukpru mme andibiọn̄ọ ukara Abasi mi ke isọn̄. Ke Obio Ubọn̄ oro ‘anuakde onyụn̄ amade kpukpru ubọn̄ isọn̄,’ enye eyenam isọn̄ akabade edi paradise ofụri ererimbot.—Daniel 2:44; Luke 23:43.
11. Edieke ọdọn̄de nnyịn ndikụt nte ẹnamde uduak Jehovah ke ofụri ekondo, nso ke nnyịn idinam?
11 “Yak inam uduak Fo; nte ẹnamde ke heaven, yak inam ke isọn̄ kpasụk ntre.” (Matthew 6:10) Emi edi eben̄e nte yak Abasi anam uduak esie kaban̄a isọn̄, emi esịnede edision̄o mme asua esie mfep! (Psalm 83:9-18; 135:6-10) Ke akpanikọ, emi ọwọrọ ke nnyịn imoyom ndikụt nte ẹnamde uduak Abasi ke ofụri ererimbot. Edieke oro odude nnyịn ke esịt, nnyịn iyenam uduak Jehovah kpukpru ini nte nnyịn ikekeme. Nnyịn ke esịt akpanikọ ikpekemeke ndinam utọ eben̄e ntre edieke nnyịn mîsịnke ofụri ukeme ndinam uduak Abasi ke n̄kan̄ nnyịn. Edieke nnyịn ibọn̄de akam ke usụn̄ emi, do, nnyịn ikpenyene ndikụt nte ke nnyịn inamke n̄kpọ oro atuahade ye uduak oro, utọ nte ndibụp owo oro mînịmke ke akpanikọ ndọ m̀mê ndinam mme ido ererimbot. (1 Corinth 7:39; 1 John 2:15-17) Utu ke oro, nnyịn kpukpru ini ikpenyene mbụme emi ke ekikere, ‘Nso idi uduak Jehovah ke n̄kpọ emi?’ Ih, edieke nnyịn imade Abasi ke ofụri esịt nnyịn, nnyịn iyeyom ndausụn̄ esie ke kpukpru mbubehe uwem.—Matthew 22:37.
Udia Nnyịn eke Usen ke Usen
12. Ndiben̄e sụk ‘udia usen’ enyene nso eti utịp ke uwem nnyịn?
12 “Nọ nnyịn udia eke ekemde nnyịn ke usen mfịn.” (Matthew 6:11) Mbụk Luke okot ete: “Nọ nnyịn udia eke ekemde nnyịn ke usen ke usen.” (Luke 11:3) Ndiben̄e Abasi nte yak ọnọ udia oro iyomde “ke usen mfịn” ọkọri mbuọtidem ke ukeme esie ndise mban̄a mme udọn̄ eke usen ke usen nnyịn. Nditọ Israel ẹkenyene ndiwobi manna ‘kpukpru owo nte ekemde ke usen oro,’ idịghe ke urua kiet m̀mê akande oro. (Exodus 16:4) Emi idịghe akam oro ẹbọn̄de ẹyom ndunụm ndunụm udia m̀mê ọkpọmiọk ọkpọmiọk inyene edi oro iyomde ẹkọk mfịna nnyịn eke usen ke usen nte mmọ ẹdemerede. Ndiben̄e sụk udia eke usen ke usen n̄ko an̄wam nnyịn ikûkabade idiọkitọn̄.— 1 Corinth 6:9, 10.
13. (a) Ke ntatara usụn̄ifiọk, nso ke ọwọrọ ndiben̄e udia eke usen ke usen? (b) Nso ikpedi edu nnyịn, idem edieke nnyịn inamde utom ọkpọsọn̄ edi inyenede esisịt n̄kpọ ndida ndu uwem?
13 Ke ntatara usụn̄ifiọk, ndiben̄e udia eke usen ke usen owụt ke nnyịn iyomke nda-ke-idem edi ke ise Jehovah kpukpru ini ndinọ udia, edin̄wọn̄ n̄kpọ, edisịnen̄kpọ, ye mme n̄kpọ uwem eken. Nte mbonubon esie ẹmi idide mme andituak ibuot oro ima ikeyak idem inọ, nnyịn imenyene mbuọtidem ke idem Ete nnyịn edi itiehe ifu ke ndibet enye ọnọ nnyịn udia ke utịbe utịbe usụn̄. Nnyịn imesinam utom inyụn̄ ida ifet ekededi oro ebederede ọnọ nnyịn ndinyene udia ye mme n̄kpọ uwem eken. Edi, nnyịn nte enende imesikọm Abasi ke akam sia nnyịn imokụt ima, ọniọn̄, ye odudu Ete nnyịn eke heaven ke mme n̄kpọ ẹmi. (Utom 14:15-17; men Luke 22:19 domo.) Nsịnifịk nnyịn ekeme ndisụn̄ọ ke uforo. Edi idem edieke nnyịn inamde utom ọkpọsọn̄ edi inyenede esisịt n̄kpọ, ẹyak nnyịn iwụt esịtekọm inyụn̄ iyụhọ ke se inyenede. (Philippi 4:12; 1 Timothy 6:6-8) Ke akpanikọ, owo Abasi emi enyenede uke uke udia ye edisịnen̄kpọ ekeme nditịm n̄kop inemesịt n̄kan ndusụk mbon oro ẹnyenede uforo ke n̄kan̄ obụkidem. Ntre idem edieke nnyịn inyenede esisịt n̄kpọ ke ntak mme idaha oro nnyịn mîkemeke ndinyan̄a, ẹyak nnyịn ikûtịmede esịt. Nnyịn imekeme ndisụk nnyene inyene ke n̄kan̄ eke spirit. Ke akpanikọ, inaha nnyịn ibuene ke mbuọtidem, idotenyịn, ye ima oro inyenede inọ Jehovah, emi itoro ye ekọm nnyịn akade ebịne ke akam ofụri esịt.
Ndidahadedo Ke Isọn Nnyịn
14. Nnyịn iben̄e edifen nnọ ke nso isọn oro ikamade, ndien Abasi akama nso ke ndifen mmọ?
14 “Nyụn̄ dahado ke isọn eke ikamade Fi, nte emi nnyịn ikadahadedo inọ mmọ eke ẹkamade nnyịn isọn.” (Matthew 6:12) Mbụk Luke owụt ke isọn oro ẹdi idiọkn̄kpọ. (Luke 11:4) Idiọkn̄kpọ oro nnyịn ikadade imana ọbiọn̄ọ nnyịn ndinam kpukpru n̄kpọ nte ekemde ye mfọnmma uduak Ete nnyịn. Ke ndusụk usụn̄, nte ededi, idiọkn̄kpọ ẹmi ẹdi isọn oro nnyịn ikamade, m̀mê mbiomo oro nnyịn inyenede inọ Abasi, tọn̄ọ nte nnyịn ikọtọn̄ọ ‘ndidu uwem nnyụn̄ nsan̄a ke spirit.’ (Galatia 5:16-25; men N̄wed Mbon Rome 7:21-25 domo.) Nnyịn ikama isọn ẹmi sia nnyịn idide mme anana mfọnmma owo mînyụn̄ ikemeke kemi ndidu uwem ekekem ye mme edumbet Abasi ọyọhọ ọyọhọ. Ẹnọ nnyịn ifet ndibọn̄ akam nyom edifen mme idiọkn̄kpọ emi. Ke idara, Abasi ekeme ndida ufọn uwa ufak Jesus nnam n̄kpọ kaban̄a mme isọn, m̀mê idiọkn̄kpọ ẹmi.—Rome 5:8; 6:23.
15. Nso edu ke nnyịn ikpenyene iban̄a ntụnọ oro ẹyomde?
15 Edieke nnyịn idoride enyịn Abasi ndidahadedo ke isọn oro nnyịn ikamade, m̀mê idiọkn̄kpọ, ana nnyịn ikabade esịt inyụn̄ inyịme ndibọ ntụnọ. (Mme N̄ke 28:13; Utom 3:19) Sia Jehovah amade nnyịn, enye esinọ nnyịn ntụnọ oro nnyịn iyomde ọkpọ ọkpọ man nnyịn ikeme ndinen̄ede mme mmemme nnyịn. (Mme N̄ke 6:23; Mme Hebrew 12:4-6) Nnyịn imekeme ndinem esịt, nte ededi, edieke nnyịn ndikọri ke mbuọtidem ye ifiọk anamde esịt nnyịn odu ke ọyọhọ n̄kemuyo ye mme ibet ye edumbet Abasi tutu nnyịn idehe-dei ikokoi inam idiọkn̄kpọ ke usụn̄ ekededi. Edi nso edieke nnyịn ifiọkde ke ndusụk idiọkn̄kpọ nnyịn edi ke n̄koinnam? Do nnyịn ikpenyene ndifụhọ idiọk idiọk ikponyụn̄ inyene ndibọn̄ akam ke ofụri esịt nyom edifen. (Mme Hebrew 10:26-31) Ke ndida item emi ikọbọde isịn ke edinam, nnyịn ikpenyene ndinen̄ede usụn̄ nnyịn usọp usọp.
16. Ntak ọfọnde ndikaiso mben̄e Abasi nte yak efen ndudue nnyịn-e?
16 Ndiben̄e Abasi edifen nnọ ke mme idiọkn̄kpọ nnyịn kpukpru ini enyene ufọn. Ndinam emi anam idiọkn̄kpọ nnyịn odu ke iso nnyịn onyụn̄ anam nnyịn inyene nsụhọdeidem. (Psalm 51:3, 4, 7) Nnyịn iyom Ete nnyịn eke heaven ‘efen mme idiọkn̄kpọ nnyịn, onyụn̄ eyet nnyịn isana ke kpukpru mme ukwan̄n̄kpọ.’ (1 John 1:8, 9) Akande oro, ndisiak mme idiọkn̄kpọ nnyịn ke akam an̄wam nnyịn ndikaiso n̄wana ọkpọsọn̄ en̄wan ndibiọn̄ọ mmọ. Ntre n̄ko ẹsiti nnyịn kpukpru ini ẹte ke nnyịn imoyom ufak, ẹnyụn̄ ẹti nnyịn ufọn iyịp Jesus oro ẹkeduọkde.—1 John 2:1, 2; Ediyarade 7: 9, 14.
17. Didie ke ndibọn̄ akam mben̄e edifen nnọ an̄wam nnyịn ke itie ebuana nnyịn ye mbon en̄wen?
17 Ndibọn̄ akam mben̄e edifen n̄ko an̄wam nnyịn ndinyene esịtmbọm, ndiwụt edikere mban̄a nnyụn̄ nnyene ntatido nnọ mbon oro ẹkemede ndikama nnyịn isọn ke n̄kpri m̀mê ikpọ n̄kpọ. Mbụk Luke ọdọhọ ete: “Dahado ke mme idiọkn̄kpọ nnyịn, koro nnyịn ke idem nnyịn idahadedo inọ kpukpru owo ẹmi ẹkamade nnyịn isọn.” (Luke 11:3b, 4) Ke akpanikọ, Abasi ekeme ndifen nnyịn n̄kukụre edieke edide nnyịn ima ‘idahadedo inọ mmọ eke ẹkamade nnyịn isọn,’ kpa mbon oro ẹnamde nnyịn idiọkn̄kpọ. (Matthew 6:12; Mark 11:25) Jesus ama adian do ete: “Koro edieke mbufo ẹdahadedo ẹnọ owo ke ndudue mmọ, Ete mbufo ke heaven eyenyụn̄ adahado ọnọ mbufo. Edi edieke mbufo mîdahakedo inọ owo ke ndudue mmọ, Ete mbufo idinyụn̄ idahakedo ke ndudue mbufo.” (Matthew 6:14, 15) Ndibọn̄ akam mben̄e edifen ke mme idiọkn̄kpọ nnyịn okponụk nnyịn ndime ime ye mbon en̄wen nnyụn̄ mfen mmọ. Apostle Paul ekewet ete: “Kpa nte Ọbọn̄ [Jehovah] ekefende mbufo, ẹfen mmọ en̄wen kpasụk ntre.”—Colossae 3:13; Ephesus 4:32.
Idomo ye Andidiọk
18. Ntak emi nnyịn mîkpedehe-dei iduọhọ Abasi iban̄a mme idomo ye mme mfịna oro ẹsịmde nnyịn-e?
18 “Kûnyụn̄ uda nnyịn usịn ke idomo.” (Matthew 6:13; Luke 11:4) Ikọ ẹmi iwụtke ke Jehovah esidomo nnyịn ndinam idiọk. N̄wed Abasi ke ndusụk ini etịn̄ ke Abasi ndinam m̀mê ndiyak mme n̄kpọ otịbe edi ke enye n̄kukụre ayak ada itie. (Ruth 1:20, 21; men Ecclesiastes 11:5 domo.) Edi mbet James ekewet ete ke “idomo iduọ ikemeke ndisịm Abasi, Enye ke Idemesie inyụn̄ idomoke owo man enye ọduọ.” (James 1:13) Ntre, ẹyak nnyịn ikûdedei iduọhọ Ete nnyịn eke heaven ke mme idomo ye mme mfịna idiọkn̄kpọ, koro Satan edi Andidomo emi odomode ndinụk nnyịn nsịn ke ndinam idiọk ndian Abasi.—Matthew 4:3; 1 Thessalonica 3:5.
19. Didie ke nnyịn ikpọbọn̄ akam kaban̄a idomo?
19 Ebede ke eben̄e oro, “Kûnyụn̄ uda nnyịn usịn ke idomo,” nnyịn ke akpanikọ iben̄e Jehovah ite okûyak nnyịn imem idem ke ini isobode idomo m̀mê mfịghe ndisọn̄ ibuot ye enye. Nnyịn imekeme ndikpe Ete nnyịn ubọk ite ekpeme ikpatisan̄ nnyịn man idomo ndomokiet oro ọsọn̄de akan nnyịn okûsịm nnyịn. Ke afan̄ emi, Paul ekewet ete: “Idomo ikosịmke mbufo ibọhọke se inade owo ndibiom; edi Abasi edi akpanikọ, idinyụn̄ iyakke ẹdomo mbufo ẹbe se ukeme mbufo edide; edi Enye eyesiak usụn̄ ubọhọ ọnọ mbufo ke ufọt idomo, man mbufo ẹkeme ndibiom enye.” (1 Corinth 10:13) Nnyịn imekeme ndibọn̄ akam ite Jehovah ada nnyịn usụn̄ man ẹkûdomo nnyịn ẹbe se nnyịn ikemede ndiyọ n̄ko nte yak enye osio usụn̄ ubọhọ ọnọ nnyịn ke ini nnyịn ikopde ọkpọsọn̄ mfụhọ. Idomo ẹsito Devil, anamidiọk ikpọkidem nnyịn, ye mme mmemme mbon en̄wen, edi ima ima Ete nnyịn ekeme ndikpeme nnyịn man ẹkûkan nnyịn ubọk.
20. Ntak emi ibọn̄de akam ite yak ẹnyan̄a nnyịn ẹsio ke ubọk “andidiọk”?
20 “Edi sio nnyịn ke ubọk andidiọk.” (Matthew 6:13) Ke akpanikọ Abasi ekeme ndibiọn̄ọ Satan, kpa “andidiọk,” ndikan nnyịn ubọk. (2 Peter 2:9) Ndien akananam udọn̄ kaban̄a edinyan̄a nsio Devil ke ubọk ikponke nte edide idahaemi, koro ‘enye asan̄ade ye akwa ifụtesịt, sia enye ọdiọn̄ọde ete ini imọ edi ibio.’ (Ediyarade 12:12) Nnyịn inanake ifiọk iban̄a mme n̄kari Satan, enye n̄ko inyụn̄ inanake ifiọk iban̄a mme mmemme nnyịn. Ntem, oyom nnyịn ibọn̄ akam inọ Jehovah ite yak enye ekpeme nnyịn osio ke odudu Asua emi ebietde ekpe. (2 Corinth 2:11; 1 Peter 5:8, 9; men Psalm 141:8, 9 domo.) Ke uwụtn̄kpọ, edieke nnyịn iyomde ndidọ ndọ, ekeme ndiyom nnyịn iben̄e Jehovah ndinyan̄a nnyịn nsio ke mme n̄kari Satan ye ke idomo ndikọri itie ebuana eke ererimbot oro ẹkemede ndida nsịm obukpo ido m̀mê edisọn̄ ibuot ye Abasi ke ndidọ owo oro mînịmke ke akpanikọ. (Deuteronomy 7:3, 4; 1 Corinth 7:39) Ndi nnyịn inyanarede ibịne inyene obụkidem? Do akam ekeme ndidi se ẹyomde man an̄wam nnyịn ndibiọn̄ọ mme idomo ubre mbre mfọniso m̀mê udia n̄wo. Sia enyenede udọn̄ ndibiat itie ebuana nnyịn ye Jehovah, Satan eyeda n̄kpọekọn̄ ekededi oro odude ke ubet idomo esie. Ntre nnyịn ikpakam ikaiso ibọn̄ akam inọ Ete nnyịn eke heaven, emi akananam mîdaha edinen owo isịn ke idomo, emi onyụn̄ anyanade owo OSIO ke ubọk andidiọk.
Akam Ọbọp Mbuọtidem ye Idotenyịn
21. Didie ke nnyịn ibọ ufọn ito edibọn̄ akam mben̄e Obio Ubọn̄?
21 Ete nnyịn eke heaven, emi anyan̄ade nnyịn osio andidiọk ke ubọk, okop inemesịt ke ndidiọn̄ nnyịn uwak uwak. Edi, ntak emi enye ayakde ndima ikọt esie ẹbọn̄ akam ẹte: “Yak Ubọn̄ Fo edi” ke utọ anyan ini ntre-e? Ọfọn, ke ediwak isua ẹmi ẹkebede, ndibọn̄ akam ke usụn̄ emi amanam udọn̄ ye esịtekọm oro nnyịn inyenede iban̄a Obio Ubọn̄ ọkọri. Utọ akam ntre eti nnyịn aban̄a akwa udọn̄ oro nnyịn inyene iban̄a eti ukara eke heaven emi. Enye n̄ko anam nnyịn inyene idotenyịn uwem ke idak ukara Obio Ubọn̄.—Ediyarade 21:1-5.
22. Nso ikpedi n̄kaiso edu nnyịn ke ndibọn̄ akam nnọ Ete nnyịn eke heaven, Jehovah?
22 Akam nte eyịghe mîdụhe ọbọp mbuọtidem ke Jehovah. Mbọbọ nnyịn ye enye okop nsọn̄idem ke ini enye ọbọrọde akam nnyịn. Ke ntre, ẹyak nnyịn ikûdedei ikpa mba ke ndiwọn̄ọde ntiene enye kpukpru usen ye itoro, ekọm, ye n̄kpeubọk. Ndien nnyịn ikpakam iwụt esịtekọm iban̄a un̄wam oro Jesus ọnọde ke ndibọrọ eben̄e oro mme anditiene enye ẹkeben̄ede ete: “Ọbọn̄ kpep nnyịn ndibọn̄ akam.”
Nte Afo Emeti?
◻ Nso ke nnyịn ikeme ndikpep nto mme ikọ ye uwụtn̄kpọ Jesus nte owo oro ọbọn̄de akam?
◻ Nso ke nnyịn ikpọbọn̄ akam iben̄e kaban̄a Ete nnyịn eke heaven ye enyịn̄ esie?
◻ Nso ke nnyịn iben̄e ke ini nnyịn ibọn̄de akam ite yak Obio Ubọn̄ Abasi edi, yak ẹnyụn̄ ẹnam uduak esie ke isọn̄?
◻ Nnyịn iben̄e nso ke ini ibọn̄de akam ite yak enọ nnyịn udia eke usen ke usen?
◻ Nso ke ọwọrọ ke ini nnyịn ibọn̄de akam ite yak ẹdahadedo ke isọn oro nnyịn ikamade?
◻ Ntak edide akpan n̄kpọ ndibọn̄ akam mban̄a idomo ye edinyan̄a nnyịn nsio ke ubọk Satan, kpa andidiọk-ọ?
[Ndise ke 16]
Mme anditiene Jesus ẹma ẹbụp enye ẹte ẹkpep mmimọ nte ebọn̄de akam. Nte afo ọmọdiọn̄ọ nte nnyịn ikemede ndibọ ufọn nto mme item esie kaban̄a akam?