Uwem ye Utom Jesus

Ọkpọn̄ Pilate Ebịne Herod Onyụn̄ Afiak Edi

KE INI mme Jew ẹdoride Jesus ikọ ẹte ke enye ọdọhọ ke imọ idi edidem, Pilate afiak odụk ufọkubọn̄ andikara ndibụp enye mbụme. Okposụkedi Jesus mîdomoke ndidịp nte ke imọ idi edidem, enye anam an̄wan̄a nte ke Obio Ubọn̄ imo idịghe n̄kpọndịk inọ Rome.

Jesus ọdọhọ Pilate ete, “Obio Ubọn̄ Mi idịghe eke ererimbot emi: edieke Obio Ubọn̄ Mi ekpedide eke ererimbot emi, ikot Mi ẹkpen̄wana en̄wan, mbak ẹdiyak Mi ẹsịn mme Jew ke ubọk: edi Obio Ubọn̄ Mi itoho do.” Jesus ke ntem onyịme utịm ikata nte ke imọ imenyene Obio Ubọn̄, okposụkedi mîdịghe eke isọn̄.

Edi, Pilate osụk akaiso akpak enye ete: “Nte Afo edi edidem nan̄a?” Oro edi, nte afo edi edidem okposụkedi Obio Ubọn̄ fo mîdịghe eke ererimbot emi.

Jesus anam Pilate ọfiọk nte ke enye ama anam nnennen ubiere, ọbọrọde ete: “Omotịm etịn̄ ete ndi Edidem. N̄kamana kaban̄a n̄kpọ emi, n̄konyụn̄ ndụk ke ererimbot kaban̄a n̄kpọ emi, man ndi ntiense nnọ akpanikọ. Kpukpru mmọ eke ẹdide eke akpanikọ ẹkop uyo Mi.”

Ih, edidu oro Jesus odude ke isọn̄ edi man etie ntiense ọnọ “akpanikọ,” akpan akpan akpanikọ aban̄ade Obio Ubọn̄ esie. Jesus eben̄e idem ndisọn̄ọ nda nnọ akpanikọ oro idem ọkpọkọm oro akpa enye uwem esie. Okposụkedi Pilate obụpde ete: “Nsidi akpanikọ?” enye idaha ibet n̄kaiso edinam an̄wan̄a. Se enye okopde ekem ndinọ ubiereikpe.

Pilate afiak etiene otuowo ẹbetde ke an̄wa ufọkubọn̄. Nte an̄wan̄ade ye Jesus ke n̄kan̄ esie, enye ọdọhọ ikpọ oku ye mbon oro ẹdude ye mmọ ete: “Ami n̄kwe Enye idiọk ke idem.”

Ke ẹyatde esịt ke ntak ubiere emi, otuowo ẹsọn̄ọ ẹyịre ẹte: “Enye obụbede mbio obio, ekpep mmọ n̄kpọ ke ofụri Judea, ọtọn̄ọ ke Galilee osịm ebiet emi.”

Anaedi ifiopesịt unana ekikere eke mme Jew anam idem akpa Pilate. Ntre, nte ikpọ oku ye n̄kani iren ẹkade iso ndifiori, Pilate ọwọn̄ọde ese Jesus onyụn̄ obụp ete: “Nte ukopke adan̄a ediwak n̄kpọ eke mmọ ẹtịn̄de ẹdian Fi?” Edi, Jesus idomoke ndibọrọ. Ndopuyo esie ke iso afai afai edori ikọ anam Pilate eyịk.

Ke ọfiọkde ete ke Jesus edi eyen Galilee, Pilate okụt usụn̄ ndisio idemesie mfep ke nduduọhọ. Andikara Galilee, Herod Antipas (eyen Akamba Herod), odu ke Jerusalem kaban̄a Passover, ntre Pilate ọnọ Jesus ẹsọk enye. Mbemiso emi, Herod Antipas ama anam ẹbịghi John Andinịm owo baptism ibuot, ndien ke emi Herod okop ndịk ke ini enye okopde aban̄a mme utịbe utom oro Jesus anamde, efehede ndịk nte ke Jesus ekenen̄ede edi John oro ẹnamde eset ke n̄kpa.

Idahaemi, Herod enen̄ede okop idatesịt ke idotenyịn ndikụt Jesus. Emi idịghe koro enye enyenede udọn̄ aban̄a mfọnọn̄kpọ Jesus mîdịghe nte ke enye oyom ndidomo ndifiọk m̀mê ikọ eke ẹdoride enye edi akpanikọ m̀mê idịghe. Utu ke oro, enye n̄kukụre oyom usụn̄ onyụn̄ odori enyịn ndikụt Jesus anamde ndusụk utịben̄kpọ.

Jesus, nte ededi, esịn ndiyụhọ udọn̄ Herod. Ke akpanikọ, nte Herod obụpde enye mbụme, enye itịn̄ke ndomo ikọ kiet. Sia idotenyịn esie akpade mfụhọ, Herod ye mbonekọn̄ ukpeme esie ẹda Jesus ẹnam mbubru. Mmọ ẹsịne enye nyayama nyayama ọfọn̄ ẹnyụn̄ ẹsak enye nsahi. Ekem mmọ ẹfiak ẹnọ enye ẹsọk Pilate. Nte utịp, Herod ye Pilate, ẹmi ke akpa ẹkesuade kiet eken, ẹkabade ẹdi ata ufan.

Ke ini Jesus afiakde edi, Pilate okot ikpọ oku, mme andikara Jew, ye mbio obio obon ọtọkiet onyụn̄ ọdọhọ ete: “Mbufo ẹkeda owo emi ẹsọk Mi nte owo eke abiatde mbio obio ibuot: ndien sese, n̄kodomo Enye ke iso mbufo, edi n̄kwe baba idiọkn̄kpọ kiet ke Idemesie mban̄a mme ikọ eke mbufo ẹdoride Enye. Herod inyụn̄ ikwe: koro ọnọ Enye ẹfiak ẹsọk nnyịn; ndien sese, Enye inamke baba n̄kpọ kiet eke odotde n̄kpa. Mmọdo nyemia Enye, nnyụn̄ nsana Enye nyak.”

Ntem, Pilate utịm ikaba etịn̄ ete ke Jesus iduehe isop. Ọdọn̄ enye ndisana Jesus nyak, koro enye ọfiọkde ete ke edi n̄kukụre ke ntak isịnenyịn anam mme oku ẹyak enye ẹnọ. Edi nte Pilate akade iso odomo ndisana Jesus nyak, enye ọbọ ọkpọsọn̄ n̄kpọ nsịnudọn̄ efen ndinam ntre. Ke adan̄aemi odude ke itie ikpe esie, n̄wan esie ọnọ etop edi, ọdọhọde enye ete: “Kûsan̄a n̄kpọ ye eti owo emi; koro mma n̄kụt ukụt etieti ke ndap [nte an̄wan̄ade otode Abasi] mfịn emi mban̄a enye.”

Edi, didie ke Pilate ekeme ndisana anana-ndudue owo emi nyak, nte enye Ọfiọkde ete ke akpana imo inam? John 18:36-38; Luke 23:4-16; Matthew 27:12-14, 18, 19; 14:1, 2; Mark 15:2-5.

◆ Didie ke Jesus ọbọrọ mbụme aban̄ade itie edidem esie?

◆ Nso idi “akpanikọ” emi Jesus akabiatde uwem esie eke isọn̄ nditie ntiense mban̄a?

◆ Nso idi ubiereikpe Pilate, didie ke mme owo ẹbọrọ, ndien nso ke Pilate anam Jesus?

◆ Anie edi Herod Antipas, ntak emi enye enen̄ede okop idatesịt ndikọt Jesus, ndien nso ke enye anam Jesus?

◆ Ntak emi Pilate enyenede udọn̄ ndisana Jesus nyak?