Afo Emekeme Ndikụt Inyene Ẹmi Ọsọn̄de Urua Akan Gold!
ẸKEME ndimen mme akpanikọ ẹdude ke Bible ndomo ye gold, silver, m̀mê mme n̄kpọuto eken oro ẹdịbede. Okposụkedi ekemede ndidi akananam afo mûdụn̄ọkede uyom ata gold m̀mê silver, anaedi afo ọmọfiọk ete ke ndinam ntre esiyom ata ọkpọsọn̄ utom ye nsịnifịk. Ndien ata ediwak ini idotenyịn anam-ndụn̄ọde oro esikpa mfụhọ.
Nte ededi, utọ idotenyịn oro akpade mfụhọ ntre isidehedei ida itie ke ini afo oyomde mme n̄kpọuto oro ẹdịbede ke Bible. Tịmfiọk un̄wọn̄ọ nsịnudọn̄ emi: “Ama oyom enye nte silver, onyụn̄ odụn̄ọde enye nte n̄kpọuto eke edịbede; ndien afo eyetịm ọfiọk uten̄e Jehovah, onyụn̄ osịme ifiọk Abasi.” (Mme N̄ke 2:4, 5) Edi ana afo odụn̄ọde.
“Dụn̄ọde Kokụt”
“Dụn̄ọde kokụt ete, baba prọfet kiet itoho ke Galilee iwọrọ.” Emi ekedi item oro ndusụk mme Pharisee ẹkedide Jew ke akpa isua ikie ẹkenọde Nicodemus, emi ekedide owo Pharisee n̄ko. “Dụn̄ọde kokụt.” Eti item, ke akpanikọ. Edidụn̄ọde n̄kokụt akpanikọ ekedi se ẹkemede ndinam—kpa n̄kpọ emi enen̄ede ọsọn̄ urua akan gold.
Nte ededi, ke n̄kpọntịbe enyeemi, mbon oro ẹkenọde item ẹte “dụn̄ọde kokụt” ẹma ẹkpu ndinam n̄kpọ ekekem ye item oro. Didie ke ekedi ntre?
Ikpọ oku ye mme Pharisee ẹma ẹdọn̄ mme isụn̄utom ẹte ẹkemụm Jesus Christ. Sia ẹkenen̄erede ẹma usụn̄ nte enye ekpepde n̄kpọ, mme isụn̄utom oro ẹma ẹfiak ẹnyọn̄ ubọk ubọk. Ke akpatre, mme Pharisee ẹma ẹbụp mmọ ẹte: “Nte mbufo n̄ko ẹmewaha ẹkpọn̄ usụn̄?” Nicodemus ama etịn̄ ikọ uyo ọsọn̄ ete: “Nte ibet nnyịn ebiere ikpe owo, ke ini mîkopke kan̄a uyo esie, mînyụn̄ ifiọkke se enye anamde?” Ikọ emi akanam ẹnọ item oro “dụn̄ọde kokụt.”—John 7:32, 45-52.
Didie ke mme oku ye mme Pharisee ẹkekpu ntem? Mmọ ikọfiọkke m̀mê ndinyịme nte ke okposụkedi ẹkebọkde Jesus ke Galilee, enye akamana ke Bethlehem. Prọfet Micah ama ebemiso etịn̄ ete: “Owo eyeto fi [Bethlehem] ke esịt ọnọ mi, eke edidide andikara ke Israel.” (Micah 5:2) Ntre mme andikara oro ẹma ẹkpu ndidụn̄ọde n̄kụt mme n̄kpọ oro ẹkedade ẹdiọn̄ọ Jesus nte prọfet, kpa owo oro akanade akabarede edi andikara ke Israel. Emi ama ada okosụn̄ọ ke ndiọi utịp, ndien enye anam an̄wan̄a nte edide akpan n̄kpọ ndidụn̄ọde nnyụn̄ nnyene ofụri akpanikọ mban̄a n̄kpọ. Edi didie ke ẹsiwak ndise akpanikọ?
Ẹmesiak Mmọn̄ ke Akpanikọ
Ewetn̄wed eke ọyọhọ isua ikie-19 ọkọdọhọ ete, “Ẹmekụt nte ata akpanikọ, ukem nte ata gold mîdotke se ẹsuande, koro mme owo ẹkụt nte edide ata mmemmem ndisiak mmọn̄ ke akpanikọ akan ndinam idemmọ asana.” Ikọ ẹmi ẹsụk ẹdi nnennen ikọ didie ntem kaban̄a afan̄ ido ukpono ererimbot! Owo oro ọnọde ibetedem ndisiak mmọn̄ ke akpanikọ emi edi “ete nsu,” Satan kpa Devil. (John 8:44; Ediyarade 12:9) Enye ada nsunsu ido ukpono ndisiak mmọn̄ ke mme ukpepn̄kpọ akpanikọ ke mme utọ akpan mbụme nte mmọemi: Anie edi Abasi? Nso idi ebuana Jesus ye enye? Nso idi uduak ẹnyenede ẹban̄a isọn̄ ye ubonowo?
Mme oku ye mme Pharisee ẹkpekedụn̄ọde ẹkụt akpanikọ oro. Mmọ ẹkpekekụt inyene ẹmi ọsọn̄de urua akan gold. Ih, mmọ ẹkpekenyene ofụri akpanikọ aban̄ade Jesus ke ‘ndikop kan̄a uyo esie, nnyụn̄ mfiọk se enye anamde,’ nte Nicodemus ọkọnọde ekikere. Ke ekpedide mmọ ẹma ẹnam akpanikọ ke ndinam emi, eyịghe idụhe Jesus akpakanam n̄kpọ an̄wan̄a mmọ, nte enye akanamde ye mme mbet esie. (Mark 4:34) Edi m̀mọ̀n̄ ke nnyịn ikeme ndikụt ata akpanikọ mfịn? Ke akpanikọ, nte n̄kpọ ubiọn̄ ndomokiet odu nte ke nnyịn imekeme ndidụn̄ọde uforo uforo nnyụn̄ nnyene ofụri akpanikọ?
[Ndise ke page 4]
Mme adaiso ido ukpono ẹkpekenyene ofụri akpanikọ aban̄ade Jesus ke ‘ndikop kan̄a uyo esie’