Nte Akpanikọ Anamde Nnyịn Iwọrọ Ufụn
1 Ke idaha kiet, Jesus ama ọdọhọ mme Jew oro ẹkenịmde enye ke akpanikọ ete: “Mbufo ẹyefiọk akpanikọ, akpanikọ oyonyụn̄ anam mbufo ẹwọrọ ufụn.” (John 8:32) Enye eketịn̄ aban̄a uwọrọ ufụn oro akande ikpîkpu ifụre mbio obio, kpa uwọrọ ufụn emi kpukpru owo—mme imọ owo m̀mê ubuene, mme ọfiọkn̄wed m̀mê mme ọkọi—ẹkemede ndinyene. Jesus ekekpep akpanikọ oro edinamde mme owo ẹwọrọ ke ufụn idiọkn̄kpọ ye n̄kpa. Nte Jesus akanamde an̄wan̄a, ‘kpukpru owo eke ẹnamde idiọk-n̄kpọ ẹdi ifịn idiọk-n̄kpọ.’ (John 8:34) Ọdọn̄ nnyịn didie ntem ndikụt ini oro ‘ẹdinyan̄ade’ kpukpru mme okopitem owo “ẹsio ke itie ufụn mbiara, ẹsịn ke itie eyen-isọn̄ emi enyenede ubọn̄ eke nditọ Abasi”!—Rome 8:21.
2 Akpanikọ emi aban̄ade Jesus ye udeme oro enye enyenede ke ndisu uduak Abasi ada utọ uwọrọ ufụn oro edi. Enye esịne ifiọk aban̄ade uwa ufak oro enye ọkọnọde ke ibuot nnyịn. (Rome 3:24) Idem idahaemi, ndinyịme nnyụn̄ nsụk ibuot nnọ akpanikọ Bible anam iwọrọ ufụn ndịk, unana idotenyịn, ye kpukpru orụk ndiọi edinam.
3 Uwọrọ Ufụn Ndịk ye Unana Idotenyịn: Iyomke nnyịn inana idotenyịn ke ntak mme idaha ererimbot sia imọfiọk ntak emi idiọkido odude imonyụn̄ ifiọk nte ke mîbịghike ẹyesio enye ẹfep ke isọn̄. (Ps. 37:10, 11; 2 Tim. 3:1; Edi. 12:12) N̄ko-n̄ko, akpanikọ anam nnyịn iwọrọ ufụn nsunsu ukpepn̄kpọ oro aban̄ade idaha mme akpan̄kpa. Nnyịn imọfiọk ite ke mme akpan̄kpa ikemeke ndinọ nnyịn unan, ke mmọ ibọhọ nsinsi ndutụhọ, ye nte ke Abasi isinamke mme owo ẹkpa man ẹkam ẹdidụn̄ ye imọ ke obio mme spirit.—Eccl. 9:5; Utom 24:15.
4 Utọ akpanikọ emi ama ọsọn̄ọ ete ye eka kiet idem ke ini eyen mmọ akakpade ke mbabuat n̄kpọntịbe. Eka esie ọkọdọhọ ete: “Ukpọk ufan̄ oro owo mîkemeke ndisịri odu ke uwem nnyịn tutu nnyịn ifiak ikụt eyeneren nnyịn ebe ke ediset ke n̄kpa. Edi nnyịn imọfiọk ite ke ubiak oro ibọde edi ke ibio ini kpọt.”
5 Uwọrọ Ufụn Ndiọi Edinam: Akpanikọ Bible ekeme ndikpụhọde ekikere ye edu owo, osụn̄ọde ke edibọhọ mme mfịna oro ẹkemede ndifep. (Eph. 4:20-24) Ndinam akpanikọ nnyụn̄ nnam utom ọkpọsọn̄ ẹkeme ndinam ẹnyene se ẹdade ẹdu uwem. (N̄ke 13:4) Ndiwụt ima n̄waidem ofori itie ebuana nnyịn ye mbon en̄wen. (Col. 3:13, 14) Ndikpono itieibuot Christian anam mme mfịna ubon ẹsụhọde. (Eph. 5:33–6:1) Ndifep ukpammịn, oburobụt ido idan̄, un̄wọn̄, ye mme ibọk oro ẹnọde mbumehe ẹnam inyene eti nsọn̄idem.—N̄ke 7:21-23; 23:29, 30; 2 Cor. 7:1.
6 Akparawa kiet ikekemeke nditre mbumehe uda n̄kpọsọn̄ ibọk ke isua usụkkiet. Usen kiet enye ama osobo asuanetop kiet oro ọkọnọde ikọ ntiense efak. Enye ama ọbọ n̄wed, ndien ẹma ẹnam ndutịm ndika mbịne enye ke ufọk esie. Ẹma ẹtọn̄ọ ukpepn̄kpọ Bible. Ọfiọn̄ iba ke ukperedem, eren oro ama etre ndida n̄kpọsọn̄ ibọk ofụri ofụri, ndien ke ama ekekpep n̄kpọ ke ọfiọn̄ itiaita, enye ama ana baptism. Ndikụt enye ọwọrọde ufụn mbumehe emi ama anam eyeneka esie eren ye n̄wan eyeneka esie ẹtọn̄ọ ndikpep Bible.
7 N̄wam Mbon En̄wen Ẹwọrọ Ufụn: Ekeme ndidi uwọrọ ufụn oro Ikọ Abasi ọnọde idisọpke in̄wan̄a mbon oro ẹdude ke ufụn nsunsu ukpepn̄kpọ ke ofụri eyouwem mmọ. Ekeme ndiyom andikpep enen̄ede esịn ifịk onyụn̄ anam eti ntịmidem man ekeme ndisịm esịt mmọ. (2 Tim. 4:2, 5) Idịghe ini edi emi nditek ke ifịk ke utom nnyịn eke ‘edikwọrọ uwọrọ ufụn nnọ mbuot ekọn̄.’ (Isa. 61:1) Uwọrọ ufụn Christian edi ọsọn̄urua n̄kpọ. Ndinyene enye ọwọrọ nsinsi uwem.—1 Tim. 4:16.