Mme Akpan̄kpa Ẹdu M̀mọ̀n̄?
“ISỌN̄ edi urua; heaven edi ebietidụn̄ nnyịn,” ntre ke mbon Yoruba ke Edem Usoputịn Africa ẹdọhọ. Ẹtịn̄ ekikere emi ke ediwak ido ukpono. Enye ọnọ ekikere nte ke isọn̄ etie nte urua oro nnyịn ikade ke ibio ini ndien ekem inyọn̄. Nte ekemde ye edinịm ke akpanikọ emi, ke ikpade nnyịn ika heaven, ata ebietidụn̄ nnyịn.
Bible ekpep nte ke ndusụk owo ẹka heaven. Jesus Christ ama asian mme anam-akpanikọ apostle esie ete: “Ediwak ufọk ẹdu ke ebiet Ete Mi; . . . mmọn̄ n̄ka n̄kotịm itie nnịm nnọ mbufo. Ndien edieke n̄kade n̄kotịm itie ntre nnọ mbufo, nyefiak ndi ndida mbufo nnọ Idemmi; man mbufo ẹnyụn̄ ẹdu ke ebiet eke Ami ndude.”—John 14:2, 3.
Ikọ Jesus iwọrọke ite ke kpukpru nti owo ẹka heaven m̀mê nte ke heaven edi ebietidụn̄ ubonowo. Ẹtan̄ ndusụk owo ẹka heaven ke ebuana ye edikara isọn̄. Jehovah Abasi ama ọfiọk ete ke mme ukara owo idikwe unen tutu amama ke ndise mban̄a mme mbubehe ke isọn̄. Ke ntre, enye ama anam ndutịm ọnọ ukara eke heaven, m̀mê Obio Ubọn̄, emi ke akpatre edisede aban̄a isọn̄ onyụn̄ anam enye akabade edi Paradise oro enye ke akpa akaduakde enye edi. (Matthew 6:9, 10) Jesus edidi Edidem Obio Ubọn̄ Abasi. (Daniel 7:13, 14) Ẹyemek mbon en̄wen ke otu ubonowo man ẹkara ye enye. Bible ama ebem iso etịn̄ ete ke mbon oro ẹtan̄de ẹka heaven ẹdidi “Obio Ubọn̄ ye mme oku ẹnọ Abasi” ẹnyụn̄ “ẹda ubọn̄ ke isọn̄.”—Ediyarade 5:10.
Mmanie Ẹka Heaven?
Ke ikerede iban̄a akwa mbiomo oro mme andikara eke heaven ẹmi ẹdinyenede, idịghe n̄kpọ n̄kpaidem nte ke mmọ ẹnyene ndisịm mme n̄kpọ oro ẹyomde ketket. Ana mbon oro ẹkade heaven ẹnyene nnennen ifiọk aban̄ade Jehovah onyụn̄ ana ẹkop uyo esie. (John 17:3; Rome 6:17, 18) Ẹyom mmọ ẹnyene mbuọtidem ke uwa ufak Jesus Christ. (John 3:16) Edi, abuana se ikande oro. Ana Abasi ebe ke Eyen esie okot onyụn̄ emek mmọ. (2 Timothy 1:9, 10; 1 Peter 2:9) N̄ko-n̄ko, ana mmọ ẹdi mme Christian ẹmi ẹma ẹkena baptism oro ‘ẹtọn̄ọde ntak ẹmana,’ emi edisana spirit Abasi obonde. (John 1:12, 13; 3:3-6) Mmọ n̄ko ẹnyene ndimụm nsọn̄ọnda ye Abasi n̄kama tutu osịm n̄kpa.—2 Timothy 2:11-13; Ediyarade 2:10.
Ediwak miliọn owo oro ẹkedude uwem ẹnyụn̄ ẹkpade ikosịmke mme n̄kpọ oro ẹyomde ẹmi. Ediwak owo ẹkenyene esisịt ifet ndikpep n̄kpọ mban̄a ata Abasi. Mmọ eken akananam ikotke Bible ẹnyụn̄ ẹfiọk esisịt mîdịghe ifiọkke-fiọk n̄kpọ ndomokiet iban̄a Jesus Christ. Idem ke otu mme ata Christian ke isọn̄ mfịn, ibat ibat owo ke Abasi emek ọnọ uwem eke heaven.
Mmọdo, ibat mmọ oro ẹkade heaven edide ata esisịt ke ẹmende ẹdomo. Jesus eketịn̄ aban̄a utọ mmọ oro nte “ekpri otuerọn̄.” (Luke 12:32) Ke ukperedem, ẹma ẹyarade ẹnọ apostle John ẹte ke mmọ oro “ẹkefakde ẹsio ẹfep ke isọn̄” man ẹkara ye Christ ke heaven ẹdidi 144,000 kpọt. (Ediyarade 14:1, 3; 20:6) Ke ẹmende ẹdomo ye ediwak biliọn owo oro ẹma ẹkedụn̄ ke isọn̄, oro edi esisịt ibat ke akpanikọ.
Mbon Oro Mîkaha Heaven
Nso itịbe inọ mbon oro mîkaha heaven? Ndi mmọ ẹbọ ufen ke itie nsinsi ndutụhọ, nte ndusụk ido ukpono ẹkpepde? Baba, koro Jehovah edi Abasi ima. Ima ima ete ye eka isitopke nditọ mmọ idọn̄ ke ikan̄, ndien Jehovah itụhọkede mme owo ke utọ usụn̄ oro.—1 John 4:8.
Idotenyịn ata ediwak mmọ oro ẹma ẹkekpan̄a edi ediset ndidu uwem ke paradise isọn̄. Bible ọdọhọ ete ke Jehovah okobot isọn̄ “man ẹdụn̄ ke esịt.” (Isaiah 45:18) Andiwet psalm ọkọdọhọ ete: “Enyọn̄ edi heaven Jehovah: edi enye ada isọn̄ ọnọ nditọ owo.” (Psalm 115:16) Edi isọn̄ edidi nsinsi ebietidụn̄ ubonowo idịghe heaven.
Jesus ama ebem iso etịn̄ ete: “Ini ke edi eke kpukpru mme andidu ke udi ẹdikopde Enye uyo [eke Jesus, kpa “Eyen Owo”] ẹwọn̄ọ ẹdi.” (John 5:27-29) Christian apostle Paul ama ọsọn̄ọ ete: “Mmonyụn̄ ndori enyịn ke Abasi . . . nte, nti owo ye mme idiọkowo ẹyeset ke n̄kpa.” (Utom 24:15) Ke ọkọn̄ọde ke eto ndutụhọ, Jesus ama ọn̄wọn̄ọ ndinọ anamidiọk oro akakabade esịt uwem ebe ke ediset ndidụk paradise isọn̄.—Luke 23:43.
Nso, ndien, kemi idi idaha mme akpan̄kpa oro ẹdinamde ẹset ẹdidụk uwem ke isọn̄? N̄kpọntịbe kiet ke utom ukwọrọikọ Jesus an̄wam ndibọrọ mbụme emi. Ufan esie Lazarus ama akpa. Mbemiso Jesus akakade ndinam enye eset, Enye ama asian mme mbet Esie ete: “Lazarus, ufan nnyịn, ke ede; edi mmọn̄ n̄ka man ndemede enye ke idap.” (John 11:11) Ntem Jesus ekemen n̄kpa odomo ye idap, ntotụn̄ọ idap ye unana edidaba ndap.
Ndide ke N̄kpa
Mme itien̄wed Abasi efen ẹdu ke n̄kemuyo ye ekikere edide idap ke n̄kpa emi. Mmọ ikpepke ite ke mme owo ẹnyene ukpọn̄ oro mîkemeke ndikpa oro ebede aka obio mme spirit ke owo akpade. Utu ke oro, Bible ọdọhọ ete: “Mme akpan̄kpa . . . ifiọkke baba n̄kpọ kiet . . . Ima mmọ, ye usua mmọ, ye ufụp mmọ ẹmetak ẹma . . . Baba edinam, baba uduak, baba ifiọk, baba mbufiọk [idụhe] ke obio ekpo [udi] emi afo akade do.” (Ecclesiastes 9:5, 6, 10) Akan oro, andiwet psalm ama ọdọhọ ete ke owo “afiak ke ntan esie; ke kpasụk usen oro mme uduak esie ẹtak.”—Psalm 146:4.
Mme itien̄wed Abasi ẹmi ẹnam an̄wan̄a nte ke mmọ oro ẹdede ke n̄kpa ikemeke ndikụt m̀mê ndikop se nnyịn itịn̄de. Mmọ ikemeke ndida edidiọn̄ m̀mê afanikọn̄ ndi. Mmọ idụhe ke heaven, m̀mê mmọ ndidu ke obio mme eteete. Mmọ inyeneke uwem, idụhe uwem.
Ke ekemini Abasi, ẹyedemede mmọ oro ẹdede ke n̄kpa idahaemi ẹmi ẹnyụn̄ ẹdude ke ibuot uti n̄kpọ esie ẹnọ uwem ke paradise isọn̄. Enye edidi isọn̄ emi asanade ọbọhọ usabaden̄kpọ, mme afanikọn̄, ye mme mfịna oro ubonowo okụtde idahaemi. Nso ini idatesịt ke oro edidi ntem! Ke Paradise oro mmọ ẹyenyene idotenyịn edidu uwem ke nsinsi, koro Psalm 37:29 ọsọn̄ọ ọnọ nnyịn ete: “Nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.”
[Ekebe ke page 6, 7]
MMA NTRE NDITUAK IBUOT NNỌ MME AKPAN̄KPA
“Ke ini n̄kedide ekpri eyen, mma nsin̄wam ete mi ke mme uwa ofụri ini oro enye ekesiwade ọnọ ete esie oro ama akakpa. Ini kiet ke ete mi ama ọkọbọhọ enyene-ndịk udọn̄ọ, ebreidiọn̄ ama asian enye ete ke enye enyene ndiwa ebot, bia, ibọn̄, ye mmịn nnọ ete esie oro ama akakpa ke ndiwụt esịtekọm mban̄a edifiak n̄kop nsọn̄idem esie. Ama eteme ete mi n̄ko ete eben̄e mme eteete esie oro ẹma ẹkekpan̄a ete ẹbiọn̄ọ udọn̄ọ ye afanikọn̄ efen efen.
“Eka mi ama edep se ẹkeyomde ndida n̄wa uwa emi, emi akanade ẹnam ke udi eteete mi. Udi okodu ke mben ufọk nnyịn, nte ekemde ye ido edinam n̄kann̄kụk.
“Ẹma ẹnọ mme ufan, mme iman, ye mme mbọhọidụn̄ ikot ẹdise edinam uwa emi. Ete mi, esịnede ọfọn̄ ediye ediye man ekekem ye usọrọ emi, eketie ke akpakaha asakde iso ese itieuwa emi ediwak n̄kpọkpọrọ ebot oro ẹkedade ẹwa uwa ke ini edem ẹkebonode ke udịm. Utom mi ekedi nditọhọ mmịn ke ekpeme nsịn ke ekpri akrasi, emi n̄kayakde nnọ ete mi. Ekem, enye ama ọduọk enye ke isọn̄ nte uwa. Ete mi ama okot ete esie ke enyịn̄ utịm ikata onyụn̄ ọbọn̄ akam ọnọ enye ete anyan̄a imọ osio ke afanikọn̄ ke ini iso.
“Ẹma ẹnọ ibọn̄, ẹnyụn̄ ẹwot okukịm erọn̄, ẹtem, ndien kpukpru owo oro ẹkedude ẹma ẹta. Mma ntiene nta nnyụn̄ nnek ikwọ ye n̄kukwak ekọmọ. Ete mi ama enek ediye ediye ye ke odudu, okposụkedi enye ọkọsọn̄de. Ke ini ke ini enye ama ọbọn̄ akam ọnọ mme eteete esie ete ẹdiọn̄ kpukpru mmọ oro ẹkedude, ke adan̄aemi mme owo, ye ami ke esịt, ikọbọrọde Ise, emi ọwọrọde ‘Akpakam edi ntre.’ Mma nse ete mi ye ọkpọsọn̄ udọn̄ ye uma nnyụn̄ nyom ndikụt usen oro ndikponde n̄kem ndiwa uwa nnọ mme eteete oro ẹma ẹkekpan̄a.
“Kpa ye ediwak uwa oro ẹkewade, emem okosụk ananana ke ubon. Ke adan̄aemi nditọiren ita oro eka mi ekenyenede ẹkedude uwem, baba kiet ke otu nditọiban ita oro ẹkemanade ẹnọ enye ikodụhe uwem ibịghi; kpukpru mmọ ẹkekpan̄a nsek. Ke ini eka mi akafiakde oyomo idịbi, ete mi ama anam akamba uwa man eyen emi amana ke ifụre.
“Mama ama aman eyenan̄wan efen. Isua iba ke ukperedem eyen emi ama ọdọn̄ọ onyụn̄ akpa. Ete mi ama aka ebịne ebreidiọn̄, emi ọkọdọhọde ete ke asua ekedi ntak n̄kpa oro. Ebreidiọn̄ oro ama ọdọhọ ete man ‘ukpọn̄’ eyen oro osio usiene, ẹma ẹyom ifia oro asakde ikan̄, ekpeme mmịn kiet, ye eyen ebua ndida n̄wa uwa. Ẹkenyene ndinịm ifia oro asakde ikan̄ ke udi, ẹkenyene ndisịme mmịn oro ke udi, ndien ẹkenyene ndibụk eyen ebua oro ye uwem n̄kpere udi oro. Ẹkedọhọ ke emi ekedi man edemede ukpọn̄ ekpri eyenan̄wan oro ama akakpa mi ndisio usiene n̄kpa esie.
“Mma mmen ekpeme mmịn ye ifia oro asakde ikan̄ n̄ka udi, ndien ete mi ama emen eyen ebua, emi enye okobụkde nte ekemde ye se ebreidiọn̄ oro eketemede. Kpukpru nnyịn ima inịm ke akpanikọ ite ke ufan̄ usen itiaba ukpọn̄ ekpri eyenan̄wan emi akakpade mi eyesobo owo oro okowotde enye nsek. Ọfiọn̄ iba ama ebe, ndien owo ikọtọtke n̄kpa ndomokiet ke mbọhọ oro. Mma n̄kụt edikpu.
“N̄kedi isua 18 ke emana ini oro. Ibio ini ke oro ebede mma nsobo ye Mme Ntiense Jehovah, ẹmi ẹkewụtde mi ke N̄wed Abasi ẹte ke mme akpan̄kpa ikemeke ndinam mme oduuwem eti n̄kpọ m̀mê idiọk. Nte ifiọk Ikọ Abasi ekenyenede orụn̄ ke esịt mi, mma nsian ete mi ke n̄kemeke ndisan̄a ye enye aba n̄kawa uwa nnọ mme akpan̄kpa. Ke akpa enye ama ayat esịt ye ami ke ndikpọn̄ imọ, nte enye ọkọdọhọde. Edi ke ini enye okokụtde ete ke nnyịmeke ndikan̄ obufa mbuọtidem mi, enye ikọbiọn̄ọke utuakibuot mi nnọ Jehovah.
“Ke April 18, 1948, mma nyarade uyakidem mi ke mmọn̄ baptism. Tọn̄ọ ke ini oro, mmakaiso ndinam n̄kpọ Jehovah ke akwa idatesịt ye uyụhọ, n̄n̄wamde mbon efen ndibọhọ utuakibuot nnọ mme eteete oro ẹma ẹkekpan̄a, ẹmi mîkemeke ndin̄wam nnyịn m̀mê ndinọ nnyịn unan.”—Utịp usịn otode J. B. Omiegbe, Benin City, Nigeria.
[Ndise ke page 7]
Akwa idara eyedu ke ini ẹdinamde mme akpan̄kpa ẹset ke paradise isọn̄