Uwem ye Utom Jesus

Item Ini Unyọn̄

USỌRỌ editi okụre, edi Jesus ye mme apostle esie ẹsụk ẹdu ke ubet enyọn̄. Okposụkedi Jesus edisọpde ndidaha, enye osụk enyenyene ediwak n̄kpọ nditịn̄. Enye ọdọn̄ mmọ esịt ete, “Ẹkûyak esịt otịmede mbufo: ẹbuọt idem ye Abasi.” Edi ekese n̄kpọ osụk ededi se ẹyomde. Enye adian ete, “Ẹnyụn̄ ẹbuọt idem ye Ami.”

Jesus akaiso ete, “Ediwak ufọk ẹdu ke ebiet ete Mi . . . mmọn̄ n̄ka n̄kotịm itie nnọ mbufo . . . man mbufo ẹnyụn̄ ẹdu ke ebiet eke Ami ndude. Mbufo ẹmenyụn̄ ẹfiọk usụn̄ ebiet eke Ami n̄kade.” In̄wan̄ake mme apostle nte ke Jesus etịn̄ aban̄a edidaha n̄ka heaven, ntre Thomas obụp ete: “Ọbọn̄, nnyịn ifiọkke ebiet eke akade; nnyịn idinyụn̄ [inam] didie ifiọk usụn̄?”

Jesus ọbọrọ ete, “Ami ndi usụn̄ ye akpanikọ ye uwem.” Ih, ibọhọke ke ndinyịme enye nnyụn̄ n̄kpebe usụn̄uwem esie ke owo ekededi ekeme ndidụk ufọk heaven eke Ete, nte Jesus ọdọhọde ete: “Owo baba kiet itieneke Ete, ibọhọke ebe ke Ami.”

Philip eben̄e ete, “Ọbọn̄, wụt nnyịn Ete, ndien oro eyesụk nnyịn esịt.” Philip nte an̄wan̄ade oyom Jesus ọnọ uyarade Abasi oro ẹkụtde ke enyịn, nte utọ oro ẹkenọde ke ini eset ke mme n̄kukụt ẹkenọde Moses, Elijah, ye Isaiah. Edi, ke akpanikọ, mme apostle ẹmi ẹnyene n̄kpọ oro otịmde ọfọn akan mme orụk n̄kukụt oro, nte Jesus ọdọhọde ete: “Nte mmodu ye mbufo adan̄a anyanini emi, ndien udiọn̄ọke Mi, Philip? Owo eke okokụtde Mi okokụt Ete.”

Jesus ke mfọnmma usụn̄ enen̄ede owụt edu Ete esie nte ke owo ndidụn̄ ye imọ nnyụn̄ nse se imọ inamde, ke nditịm ntịn̄, etie nte edinen̄ede n̄kụt Ete. Kpa ye oro, Ete omokpon akan Eyen, nte Jesus onyịmede ete: “Mme ikọ eke ntịn̄de nnọ mbufo, ntịn̄ke ke uyo Idemmi.” Jesus nte odotde amayak ofụri itoro ke ntak unọ ukpep esie ọnọ Ete esie eke heaven.

Edi n̄kpọ nsịnudọn̄ didie ntem ọnọ mme apostle ndikop Jesus ọdọhọde mmọ idahaemi ete: “Owo eke ọbuọtde idem ye Ami eyenyụn̄ anam utom eke Ami nnamde; enye eyenyụn̄ anam utom eke okponde akan oro”! Iko Jesus iwọrọke ite ke mme anditiene enye ẹyenam mme utịbe utom odudu oro okponde akan se enye akanamde. Baba, edi ikọ esie ọwọrọ ete ke mmọ ẹyenam utom ukwọrọikọ ke udomo ini oro ebịghide akan, ke ikpehe isọn̄ oro okponde akan, ẹnyụn̄ ẹkwọrọ ẹnọ mme owo ẹwakde ẹkan.

Jesus iditopke mme mbet esie iduọk ke enye ama ọnyọn̄. Enye ọn̄wọn̄ọ ete, “Nyenyụn̄ nnam n̄kpọ ekededi eke mbufo ẹdiben̄ede ke enyịn̄ Mi.” Adianade do, enye ọdọhọ ete: “Nyenyụn̄ mben̄e Ete, ndien enye eyenọ mbufo ibetedem efen, man enye edidu ye mbufo ke nsinsi; kpa spirit akpanikọ.” Ke ukperedem, ke ọdọkde aka heaven, Jesus an̄wan̄a edisana spirit, kpa ibetedem efen emi enye ọkọn̄wọn̄ọde, ofụk mme mbet esie.

Unyọn̄ Jesus asan̄a ekpere, nte enye ọdọhọde ete: “Osụk esisịt, ndien ererimbot idikwe Mi aba.” Jesus edidi edibotn̄kpọ eke spirit oro baba owo kiet mîdikemeke ndikụt. Edi Jesus ọtọn̄ọ ntak ọn̄wọn̄ọ ọnọ mme anam-akpanikọ apostle esie ete: “Mbufo ke ẹkụt Mi: sia Ami ndude uwem, mbufo ẹyedu uwem n̄ko.” Ih, ikụreke ke Jesus ndiwụt mmọ idem ke uduot eke owo ke enye ama ekeset ke n̄kpa edi ke edikem ini enye eyenam mmọ ẹset ke n̄kpa ẹkedu uwem ye enye ke heaven nte mme edibotn̄kpọ eke spirit.

Jesus kemi ọnọ mmemmem ewụhọ ete: “Owo eke enyenede mbet Mi, onyụn̄ onịmde mmọ, enye edi owo eke amade Mi: ndien owo eke amade Mi, Ete Mi eyema enye, Ami nyenyụn̄ mma enye, nnyụn̄ nyarade Idemmi nnọ enye.”

Ke ebiet emi apostle Judas, kpa enyeemi ẹkotde Thaddaeus, esịn uyo ete, “Ọbọn̄, nso itịbe Afo ediyararede Idem Fo ọnọ nnyịn edi mûduyarakede unọ ererimbot?”

Jesus ọbọrọ ete, “Edieke owo amade Mi, eyenịm uyo Mi; ndien Ete Mi eyema enye .. . Owo eke mîmaha Mi inịmke se ntịn̄de.” Utu ke ndibiet mme okopitem mbet esie, ererimbot ofofụmi mme ukpepn̄kpọ Christ. Ntre enye iyarakede idemesie inọ mmọ.

Ke ini utom ukwọrọikọ esie eke isọn̄, Jesus ama ekpep mme apostle esie ediwak n̄kpọ. Didie ke mmọ ẹditi kpukpru n̄kpọ ẹmi, akpan akpan sia mmọ ẹkpude ndimụm ata ekese n̄kpọ, idem tutu mi kan̄a? Ke idara, Jesus ọn̄wọn̄ọ ete: “Ibetedem, kpa edisana spirit, emi Ete edinọde edi ke enyịn̄ Mi, enye eyekpep mbufo kpukpru n̄kpo, onyụn̄ anam mbufo ẹti kpukpru se Ami n̄ketịn̄de nnọ mbufo.”

Ke afiakde ọsọn̄ọ mmọ esịt, Jesus ọdọhọ ete: “N̄kpọn̄ emem ye mbufo; nyak emem Mi nnọ mbufo . . . Ẹkûyak esịt ẹtịmede mbufo, ẹkûnyụn̄ eyak esịt mbufo ẹkop

ndịk.” Edi akpanikọ, Jesus ọmọn̄ ọnyọn̄, edi enye anam an̄wan̄a ete: “Edieke mbufo ẹmade Mi, mbufo ẹkpedara, sia nnyọn̄de ntiene Ete: koro Ete omokpon akan Mi.”

Ini oro osụhọde ọnọ Jesus ndidu ye mmọ omụhọ. Enye ọdọhọ ete, “Nditịn̄ke aba n̄kpọ n̄kaha ye mbufo, koro ọbọn̄ ererimbot emi ke edi, enye inyụn̄ inyeneke baba n̄kpọ kiet ke esịt Mi.” Satan kpa Devil, enyeemi ekekemede ndidụk Judas esịt nnyụn̄ mmụm enye, edi ọbọn̄ ererimbot emi. Edi mmemme idiọkn̄kpọ idụhe Jesus ke idem oro Satan ekpekemede ndida nnam n̄kpọ man ọwọn̄ọde enye ọkpọn̄ ndinam n̄kpọ Abasi. John 14:1-31; 13:27; Luke 22:3, 4; Exodus 24:10; 1 Ndidem 19:9-13; Isaiah 6:1-5.

▪ M̀mọ̀n̄ ke Jesus aka, ndien nso ibọrọ ke Thomas ọbọ kaban̄a usụn̄ do?

▪ Ke ibọrọ esie, nso nte an̄wan̄ade ke Philip oyom Jesus ọnọ?

▪ Ntak emi owo emi okụtde Jesus okụtde Ete n̄ko-o?

▪ Didie ke mme anditiene Jesus ẹnam utom oro okponde akan se enye akanamde?

▪ Ke nso usụn̄ifiọk ke Satan mînyeneke baba n̄kpọ kiet ke esịt Jesus?