Ke Ini Jesus Edide ke Ukara Obio Ubọn̄

“Ndusụk owo . . . ke otu mmọemi ẹdade mi, [iditabike] n̄kpa, tutu mmọ ẹkụt Eyen Owo edide ndida ubọn̄.”—MATTHEW 16:28.

1, 2. Nso iketịbe esisịt ini ke Pentecost 32 E.N. ama ekebe, ndien nso ikedi uduak n̄kpọntịbe oro?

ESISỊT ini ke Pentecost 32 E.N. ama ekebe, ita ke otu mme apostle Jesus Christ ẹma ẹkụt n̄kukụt oro owo mîkemeke ndifre. Nte ekemde ye uwetn̄kpọ eke odudu spirit, “Jesus ada Peter, ye James, ye John eyeneka esie, ọdọk ke akwa obot ke idemmọ: ndien mbiet Esie okpụhọde ke iso mmọ.”—Matthew 17:1, 2.

² N̄kukụt edikpụhọde oro akada itie ke ata akpan ini. Jesus ama ọtọtọn̄ọ nditịn̄ nnọ mme anditiene enye nte ke imọ iyokụt ndutụhọ inyụn̄ ikpa ke Jerusalem, edi ama ọsọn̄ mmọ ndifiọk se mme ikọ esie ẹkewọrọde. (Matthew 16:21-23) N̄kukụt oro ama ọsọn̄ọ mbuọtidem mme apostle Jesus ita oro ke nditịm idem nnọ n̄kpa esie oro ekedide ye kaban̄a mme isua ọkpọsọn̄ utom ye idomo oro esop Christian ekenyenede ndisobo n̄ko. Nte nnyịn mfịn imekeme ndikpep n̄kpọ nto n̄kukụt emi? Ih, koro se enye akadade aban̄a enen̄ede ada itie ke eyo nnyịn.

3, 4. (a) Nso ke Jesus eketịn̄ usen itiokiet mbemiso edikpụhọde mbiet oro? (b) Tịn̄ se iketịbede ke ini edikpụhọde mbiet oro.

³ Usen itiokiet mbemiso edikpụhọde mbiet oro, Jesus ama asian mme anditiene enye ete: “Eyen Owo ọmọn̄ edidi ke ubọn̄ Ete Esie ye mme angel Esie, ndien ke ini oro Enye ọyọnọ owo kiet kiet nte utom esie edide.” Mme ikọ ẹmi ẹdisu ke “akpatre ini eyo emi.” Jesus ama aka iso etịn̄ ete: “Ke akpanikọ ke ndọhọ mbufo nte, ndusụk owo ẹdu ke otu mmọemi ẹdade mi, ẹmi mîditabike n̄kpa, tutu mmọ ẹkụt Eyen Owo edide ndida ubọn̄.” (Matthew 16:27, 28; 24:3; 25:31-34, 41; Daniel 12:4) Edikpụhọde mbiet oro akada itie ke ndisu mme ukperedem ikọ ẹmi.

⁴ Nso ke mme apostle ita oro ẹkenen̄ede ẹkụt? Se itienede emi edi se Luke etịn̄de aban̄a n̄kpọntịbe oro: “Nte [Jesus] ọbọn̄de akam, iso Esie okpụhọde, edisịnen̄kpọ Esie onyụn̄ akabade afia, esem odụk owo ke enyịn. Ndien sese, owo iba ẹdineme nneme ye Enye; mmọ ẹdi Moses ye Elijah; ẹmi ẹbiọn̄ọrede ke ubọn̄, ẹnyụn̄ ẹnemede nneme ẹban̄a n̄kpa emi Enye edikpade ke Jerusalem.” Ekem “ikpaenyọn̄ edi edifụk [mme apostle]: ndien ndịk anam mmọ nte mmọ ẹdụkde ke ikpaenyọn̄ oro. Uyo onyụn̄ oto ke ikpaenyọn̄ ọwọrọ, ete, Emi edi Eyen Mi, emi mmekde: ẹkop uyo Esie.”—Luke 9:29-31, 34, 35.

Ọsọn̄ọ Mbuọtidem

5. Nso utịp ke edikpụhọde mbiet oro ekenyene ke idem apostle Peter?

⁵ Apostle Peter ama etetịn̄ nte ke Jesus edi “Christ, Eyen Abasi uwem.” (Matthew 16:16) Mme ikọ Jehovah ẹtode ke heaven ẹma ẹsọn̄ọ ikọ oro, ndien n̄kukụt owụtde nte Jesus okpụhọrede mbiet ekedi edibem iso n̄wụt nte Christ edide ke odudu Obio Ubọn̄ ye ubọn̄, ndikpe ikpe nnọ ubonowo ke akpatre. Ke se iwakde ikan isua 30 ke edikpụhọde mbiet oro ama ekebe, Peter ama ewet ete: “Nnyịn ikeyịreke ikpîkpu mbụk, eke owo ẹdade mbufiọk ẹtịbi, ke adan̄aemi nnyịn inamde mbufo ẹfiọk odudu ye edidi Ọbọn̄ nnyịn Jesus Christ; edi nnyịn ke idem nnyịn iketie ise ubom Esie. Koro Enye ọkọbọ ukpono ye ubọn̄ ke ubọk Abasi Ete, ke adan̄aemi uyo otode ke akakan ubọn̄ oro esịm Enye ntem, ete, Emi edi Eyen Mi, Eyen ima Mi, emi esịt enemde Mi ye Enye: nnyịn ke idem nnyịn ikokop uyo oro, nte otode ke enyọn̄ ọwọrọ, ke ini nnyịn idude ye Enye ke edisana obot oro.”—2 Peter 1:16-18; 1 Peter 4:17.

6. Didie ke mme n̄kpọntịbe ẹkewụt idem ke edikpụhọde mbiet oro ama ekebe?

⁶ Mfịn, se mme apostle ita oro ẹkekụtde ọsọn̄ọ mbuọtidem nnyịn n̄ko. Nte ededi, mme n̄kpọ ke ẹtịbe sụn̄sụn̄ tọn̄ọde ke 32 E.N. Ke isua oro eketienede, Jesus ama akpa onyụn̄ eset, ọdọk eketie ke ubọk nnasia Ete esie. (Utom 2:29-36) Ke Pentecost isua oro, ẹma ẹnam obufa “Israel Abasi” edidu, ndien utom ukwọrọikọ ama ọtọn̄ọ, ọtọn̄ọde ke Jerusalem ndien ekem asuana esịm utịt isọn̄. (Galatia 6:16; Utom 1:8) Ke ekperede ndidi ke ndondo oro ẹma ẹdomo mbuọtidem mme anditiene Jesus. Ẹma ẹmụm mme apostle ẹnyụn̄ ẹmia mmọ idiọk idiọk ke ntak emi mmọ ẹkesịnde nditre ndikwọrọ ikọ. Ikebịghike ẹma ẹwot Stephen. Ekem ẹma ẹwot James, andikokụt edikpụhọde mbiet oro. (Utom 5:17-40; 6:8–7:60; 12:1, 2) Nte ededi, Peter ye John ẹma ẹdu uwem ẹnam n̄kpọ Jehovah ke ediwak isua efen efen. Ke akpanikọ, ke utịt utịt akpa isua ikie E.N., John ama ewet n̄kukụt efen efen aban̄a nte okụtde Jesus ke ubọn̄ eke heaven.—Ediyarade 1:12-20; 14:14; 19:11-16.

7. (a) Ini ewe ke edikpụhọde mbiet oro ọkọtọn̄ọ ndisu? (b) Ini ewe ke Jesus ọkọnọ ndusụk owo utịp nte ekemde ye utom mmọ?

⁷ Tọn̄ọ nte “usen Ọbọn̄” ọkọtọn̄ọ ke 1914, ediwak ke otu n̄kukụt oro John okokụtde ẹmesu. (Ediyarade 1:10) Nso kaban̄a Jesus ‘ndidi ke ubọn̄ Ete esie,’ emi edikpụhọde mbiet oro akadade aban̄a? N̄kukụt emi ọkọtọn̄ọ ndisu ke ini emana Obio Ubọn̄ Abasi eke heaven ke 1914. Ke ini Jesus, nte utịn, akadahade ada ke ofụri ekondo nte Edidem oro ẹdoride ke ebekpo, oro ekedi, yak idọhọ, ntọn̄ọ obufa usen. (2 Peter 1:19; Ediyarade 11:15; 22:16) Ndi Jesus ini oro ama ọnọ ndusụk owo utịp nte ekemde ye utom mmọ? Ih. Ọkpọsọn̄ uyarade odu nte ke esisịt ini ke oro ebede, ediset eke mme Christian oro ẹyetde aran ndụk uwem eke heaven ama ọtọn̄ọ.—2 Timothy 4:8; Ediyarade 14:13.

8. Mme n̄kpọntịbe ewe ẹdinịm utịt edisu n̄kukụt edikpụhọde mbiet oro idiọn̄ọ?

⁸ Nte ededi, ke mîbịghike Jesus eyedisịm ke “ubọn̄ Esie, asan̄a ye kpukpru mme angel” man edikpe ikpe ọnọ ofụri ubonowo. (Matthew 25:31) Ke ini oro, enye ayayarade idemesie ke ofụri akwa ubọn̄ esie onyụn̄ ọnọ “kpukpru owo” utịp nte ekemde ye utom mmọ. Mbon mbieterọn̄ ẹyebọ nsinsi uwem ke Obio Ubọn̄ oro ẹketịmde ẹnọ mmọ, ndien mbon mbietebot ẹyedaha ẹkedụk “ke nsinsi edisịbe mfep” (NW). Nso ubọn̄ ubọn̄ utịt ke oro edidi ntem ke edisu n̄kukụt edikpụhọde mbiet oro!—Matthew 25:34, 41, 46; Mark 8:38; 2 Thessalonica 1:6-10.

Mme Nsan̄a Jesus Oro Ẹnọde Ubọn̄

9. Nte nnyịn ikpodori enyịn Moses ye Elijah ndidu ye Jesus ke ini n̄kukụt edikpụhọde mbiet oro osude? Nam an̄wan̄a.

⁹ Jesus ikodụhe ikpọn̄ ke ini edikpụhọde mbiet oro. Ẹma ẹkụt Moses ye Elijah ẹdude ye enye. (Matthew 17:2, 3) Nte mmọ ẹma ẹnen̄ede ẹdu do? Baba, koro irenowo iba oro ẹma ẹkpa ke anyan ini ndien ke ẹkede idap ke ntan ẹbetde ediset ke n̄kpa. (Ecclesiastes 9:5, 10; Mme Hebrew 11:35) Nte mmọ ẹyedu ye Jesus ke ini enye edide ke ubọn̄ eke heaven? Baba, koro Moses ye Elijah ẹkedu uwem mbemiso idotenyịn eke heaven ekeberede ọnọ mme owo. Mmọ ẹdidi ubak ‘nti owo oro ẹdisetde’ ke isọn̄. (Utom 24:15) Ntre edikụt mmọ ke n̄kukụt edikpụhọde mbiet oro ekedi ndamban̄a n̄kpọ. Ada aban̄a nso?

10, 11. Mmanie ke Elijah ye Moses ẹda ẹban̄a ke nsio nsio idaha?

¹⁰ Ke mme idaha en̄wen, Moses ye Elijah ẹdi mme owo ẹdade ẹtịn̄ ikọ ke prọfesi. Nte esịne-ufọt Ibet ediomi, Moses akada aban̄a Jesus, kpa Esịne-Ufọt obufa ediomi. (Deuteronomy 18:18; Galatia 3:19; Mme Hebrew 8:6) Elijah akada aban̄a John Baptist, andidiọn̄ usụn̄ nnọ Messiah. (Matthew 17:11-13) N̄ko-n̄ko, ke udọn̄ikọ eke Ediyarade ibuot 11, Moses ye Elijah ẹda ẹban̄a nsụhọ oro ẹyetde aran ke utịt ini emi. Nnyịn isan̄a didie ifiọk oro?

¹¹ Ọfọn, kụbọde ka Ediyarade 11:1-6. Ke ufan̄ikọ 3 nnyịn ikot ite: “Nyonyụn̄ mmen odudu nnọ ntiense Mi iba, ndien mmọ ẹyesịne ọfọn̄ikpo ẹtịn̄ nte prọfet ke tọsịn usen kiet ye usen ikie iba ye ata.” Prọfesi emi ama osu ke idem nsụhọ Christian oro ẹyetde aran ke ini Ekọn̄ Ererimbot I.a Ntak ẹdide mme ntiense iba? Koro nsụhọ oro ẹyetde aran ẹnam utom oro, ke usụn̄ eke spirit, ebietde eke Moses ye Elijah. Ufan̄ikọ 5 ye 6 ẹka iso ẹdọhọ ẹte: “Edieke owo ekededi oyomde ndinam [ntiense iba ẹmi] ibak, ikan̄ oto mmọ ke inua ọwọrọ edita [mme] asua mmọ; edieke owo ekededi oyomde ndinam mmọ ibak, edi ke ido emi ke owo oro enyene ndikpa. Mmọ oro ẹnyene odudu ndisịri ikpaenyọn̄ mbiọn̄ọ edịm ndidep ke mme usen eke mmọ ẹtịn̄de prọfesi; mmọ ẹnyụn̄ ẹnyene odudu ke idịm mmọn̄, ndinam mmọn̄ akabade edi iyịp, ndinyụn̄ nda kpukpru idiọk udọn̄ọ mmia isọn̄ ufen, adan̄a ini nte mmọ ẹmama.” Ntem, ẹti nnyịn ẹban̄a mme utịben̄kpọ oro Elijah ye Moses ẹkenamde.—Numbers 16:31-34; 1 Ndidem 17:1; 2 Ndidem 1:9-12.

12. Ke udọn̄ikọ eke edikpụhọde mbiet oro, mmanie ke Moses ye Elijah ẹda ẹban̄a?

¹² Mmanie, ndien, ke Moses ye Elijah ẹkeda ẹban̄a ke edinam edikpụhọde mbiet oro? Luke ọdọhọ ete ke mmọ ẹkedu ye Jesus “ke ubọn̄.” (Luke 9:31) Nte an̄wan̄ade, mmọ ẹkeda ẹban̄a mme Christian ẹmi ẹma ẹkeyet aran ye edisana spirit nte ‘mme ẹnyene udeme’ ye Jesus ẹmi ke ntem ẹnyụn̄ ẹbọde utịbe utịbe idotenyịn ‘ndida ubọn̄’ ye enye. (Rome 8:17) Mbon oro ẹyetde aran ẹmi ẹnamde ẹset ẹyedu ye Jesus ke ini enye edidide ke ubọn̄ Ete esie ‘ndinọ owo kiet kiet nte ekemde ye utom esie.’—Matthew 16:27.

Mme Ntiense Ẹbietde Moses ye Elijah

13. Nso mme n̄kpọ ẹwụt Moses ye Elijah nte mbon oro ẹdotde ke prọfesi nte nsan̄a mme ada udeme ye Jesus oro ẹyetde aran ẹmi ẹnọde ubọn̄ ye enye?

¹³ Odu mme n̄wọrọnda n̄kpọ oro ẹwụtde Moses ye Elijah nte nnennen mme andida mban̄a nsan̄a mme ada udeme ye Jesus oro ẹyetde aran ke prọfesi. Moses ye Elijah ẹkenam utom nte mme anditịn̄ ikọ ke ibuot Jehovah ke ediwak isua. Mmọ mbiba ẹma ẹsobo iyatesịt andikara. Ke ini unana, ubon ẹtode esenidụt ẹkese ẹban̄a mmọ kiet kiet. Mmọ mbiba ẹma ẹtịn̄ prọfesi uko uko ẹnọ ndidem ẹnyụn̄ ẹsọn̄ọ ẹda ẹbiọn̄ọ mme nsunsu prọfet. Moses ye Elijah ẹma ẹkụt nte Jehovah okowụtde odudu esie ke Obot Sinai (emi n̄ko ẹkotde Horeb). Mmọ mbiba ẹma ẹmek mme andida itie mmọ ke n̄kan̄ edem usiahautịn Jordan. Ndien ke eyo Moses (ye Joshua) ye Elijah (ye Elisha) ẹma ẹkụt n̄wakn̄kan utịben̄kpọ, ke ẹsiode mbon oro ẹkedade itie ke eyouwem Jesus ẹfep.b

14. Didie ke mbon oro ẹyetde aran ẹnam n̄kpọ nte mme etịn̄ikọ ke ibuot Jehovah, ukem nte Moses ye Elijah?

¹⁴ Nte kpukpru oro itịghi nnyịn iban̄a Israel Abasi? Ih, eti. Jesus ọkọdọhọ mme anam-akpanikọ anditiene enye ete: “Mbufo ẹka ẹkanam kpukpru mme idụt ẹdi mbet Mi, ẹnịm mmọ baptism ẹsịn ke enyịn̄ Ete ye Eyen ye Edisana Spirit: ẹnyụn̄ ẹkpep mmọ ẹnam kpukpru n̄kpọ eke n̄ketemede mbufo: ndien sese, Ami ndodu ye mbufo kpukpru ini tutu esịm utịt ererimbot.” (Matthew 28:19, 20) Ke ndinam mme ikọ ẹmi, mme Christian oro ẹyetde aran ẹnam utom nte mme anditịn̄ ikọ ke ibuot Jehovah toto ke Pentecost 33 E.N. tutu esịm idahaemi. Ukem nte Moses ye Elijah, mmọ ẹmesobo iyatesịt mme andikara ẹmenyụn̄ ẹnọ mmọ ikọ ntiense. Jesus ọkọdọhọ apostle 12 esie ete: “Ẹyenyụn̄ ẹda mbufo ẹwọrọ ke iso mme andikara ye ndidem kaban̄a Mi, kpan̄ mbufo ẹdi ntiense ẹnọ mmọ ye mme Gentile.” (Matthew 10:18) Mme ikọ esie ẹsu ndien ndien ke mbụk esop Christian.—Utom 25:6, 11, 12, 24-27; 26:3.

15, 16. Mme mbiet n̄kpọ ewe ẹdu ke ufọt mbon oro ẹyetde aran ke n̄kan̄ kiet ye Moses ye Elijah ke n̄kan̄ eken kaban̄a mmọ (a) ndida nnọ akpanikọ uko uko? (b) ndibọ un̄wam nto mbon oro mîdịghe nditọ Israel?

¹⁵ Akan oro, mme Christian oro ẹyetde aran ẹnyene uko nte Moses ye Elijah ke ndida nnọ akpanikọ mbiọn̄ọ nsu ido ukpono. Ti nte Paul akasuade ọnọ nsunsu prọfet Jew oro Bar-Jesus okonyụn̄ adade mbufiọk edi enyenede iwụk ke ndiyarade nte mme abasi mbon Athens ẹdide nsu. (Utom 13:6-12; 17:16, 22-31) Ti, n̄ko, ete ke eyomfịn nsụhọ oro ẹyetde aran ayarade Christendom ndien utọ ukwọrọikọ oro otụhọde enye.—Ediyarade 8:7-12.c

¹⁶ Ke ini Moses ekefehede iyatesịt Pharaoh, enye ekedịbe ke ufọk owo oro mîkedịghe eyen Israel, Reuel, oro n̄ko ẹkekotde Jethro. Ke ukperedem, Moses ama ọbọ eti item kaban̄a ndutịm oto Reuel, emi eyen esie Hobab akadade Israel usụn̄ ebe ke wilderness.d (Exodus 2:15-22; 18:5-27; Numbers 10:29) Nte mbon oro mîdịghe mme andibuana ke Israel Abasi oro ẹyetde aran ẹsin̄wam mme andibuana ke Israel Abasi ke ukem usụn̄ oro? Ih, “akwa otuowo” eke “mme erọn̄ en̄wen,” ẹmi ẹwọrọde ẹwụt idem ke ererimbot ke ukperedem ini emi ẹmenọ mmọ ibetedem. (Ediyarade 7:9; John 10:16; Isaiah 61:5) Ke ebemde iso etịn̄ aban̄a inem inem, ima ima ibetedem oro “mme erọn̄” ẹmi ẹdinọde nditọete esie oro ẹyetde aran, Jesus ama etịn̄ ke prọfesi aban̄a mmọ ete: “Ami [n̄kokop] biọn̄, ndien mbufo ẹnọ Mi udia; itọn̄ akasat Mi, ndien mbufo ẹnọ Mi mmọn̄; n̄kedi esen, ndien mbufo ẹda Mi ẹka ufọk; n̄kedi iferi, ndien mbufo ẹsịne Mi ọfọn̄; n̄kọdọdọn̄ọ, ndien mbufo ẹdi ẹdise Mi; n̄kodu ke ufọk-n̄kpọkọbi, ndien mbufo ẹdi ke ọtọ Mi. . . . Ke akpanikọ ke ndọhọ mbufo, Adan̄a nte mbufo ẹkanamde n̄kpọ emi ẹnọ kiet ke otu nditọete Mi, kpa ata n̄kpri ẹmi, mbufo ẹkanam ẹnọ Mi.”—Matthew 25:35-40.

17. Didie ke mbon oro ẹyetde aran ẹkenyene ifiọk n̄kpọntịbe ebietde eke Elijah ke Obot Horeb?

¹⁷ N̄ko-n̄ko, Israel Abasi ama enyene ifiọk n̄kpọntịbe ebietde eke Elijah ke Obot Horeb.e Ukem nte Elijah ke ini enye ekefehede ọkpọn̄ iso Ọbọn̄an̄wan Jezebel, okop-ndịk nsụhọ oro ẹyetde aran ẹkekere ke utom mmimọ ama okụre ke utịt Ekọn̄ Ererimbot I. Ndien, n̄ko ukem nte Elijah, mmọ ẹma ẹsobo ye Jehovah, oro ekedide ndibiere ikpe nnọ mme esop oro ẹkedọhọde nte idide “ufọk Abasi.” (1 Peter 4:17; Malachi 3:1-3) Ke adan̄aemi Christendom mîkodotke, ẹma ẹkụt nsụhọ oro ẹyetde aran nte edide “asan̄autom emi anamde akpanikọ, onyụn̄ enyenede ọniọn̄” ndien ẹma ẹmek enye ndise mban̄a kpukpru inyene Jesus ke isọn̄. (Matthew 24:45-47) Ke Horeb, Elijah ama okop “sụn̄sụn̄ ekpri uyo” oro eketiede nte edi eke Jehovah, ọnọde enye utom efen efen ndinam. Ke mme ndobo ndobo isua ukụre ekọn̄, mme anam-akpanikọ asan̄autom Jehovah ẹma ẹkop uyo esie ke mme page Bible. Mmọ n̄ko ẹma ẹfiọk ẹte ke mmimọ imenyene utom ndinam.—1 Ndidem 19:4, 9-18; Ediyarade 11:7-13.

18. Didie ke ẹwụt mme n̄wọrọnda uyarade odudu Jehovah ebe ke Israel Abasi?

¹⁸ Ke akpatre, ndi ẹnọ mme n̄wọrọnda uyarade odudu Jehovah ebe ke Israel Abasi? Ke Jesus ama akakpa, mme apostle ẹma ẹnam ediwak utịben̄kpọ, edi ẹmi ẹma ẹtre sụn̄sụn̄. (1 Corinth 13:8-13) Idahaemi, nnyịn ikwe mme ataata utịben̄kpọ. Ke n̄kan̄ eken, Jesus ama ọdọhọ mme anditiene enye ete: “Ke akpanikọ ke ndọhọ mbufo, Owo eke ọbuọtde idem ye Ami oyonyụn̄ anam utom eke Ami nnamde; enye oyonyụn̄ anam utom eke okponde akan oro.” (John 14:12) Emi ama enyene akpa edisu nte mme mbet Jesus ẹkekwọrọde eti mbụk ke ofụri Obio Ukara Rome ke akpa isua ikie. (Rome 10:18) Ẹkam ẹnam utom oro okponde akan nte nsụhọ oro ẹyetde aran ẹdade usụn̄ ke edikwọrọ eti mbụk “ke ofụri ekondo nte ntiense ẹnọ kpukpru mme idụt.” (Matthew 24:14) Nso idi utịp? Isua ikie 20 omokụt ẹtan̄de n̄wakn̄kan ibat mme anam-akpanikọ asan̄autom Jehovah, emi ẹyakde idem ẹnọ ẹbok akan nte akanam edide ke mbụk. (Ediyarade 5:9, 10; 7:9, 10) Nso akwa uyarade odudu Jehovah ke emi edi ntem!—Isaiah 60:22.

Nditọete Jesus Ẹdi ke Ubọn̄

19. Ini ewe ke ẹkụt nditọete Jesus oro ẹyetde aran ke ubọn̄ ye enye?

¹⁹ Nte nsụhọ nditọete Jesus oro ẹyetde aran ẹkụrede utom mmọ ke isọn̄, ẹnọ mmọ ubọn̄ ye enye. (Rome 2:6, 7; 1 Corinth 15:53; 1 Thessalonica 4:14, 17) Ntem mmọ ẹkabade ẹdi ndidem ye mme oku oro mîkemeke ndikpa ke Obio Ubọn̄ eke heaven. Do, mmọ ye Jesus ‘ẹyeda esan̄ ukwak ẹkara [mme owo], nte emi ẹbomde eso obot-eso mbai-mbai.’ (Ediyarade 2:27; 20:4-6; Psalm 110:2, 5, 6) Mmọ ẹyetie ye Jesus ke mme ebekpo “ẹkpe ikpe ẹnọ esien Israel duopeba.” (Matthew 19:28) Ekondo emi omụmde mmụm ke etie ye ọkpọsọn̄ udọn̄ ebet mme n̄kpọntịbe ẹmi, ẹmi ẹdide ubak “ediyarade nditọ Abasi.”—Rome 8:19-21; 2 Thessalonica 1:6-8.

20. (a) Kaban̄a ewe idotenyịn ke edikpụhọde mbiet oro ọkọsọn̄ọ mbuọtidem Peter? (b) Didie ke edikpụhọde mbiet oro ọsọn̄ọ mme Christian idem mfịn?

²⁰ Paul eketịn̄ aban̄a ediyarade Jesus ke ini “akwa ukụt” ke ini enye ekewetde ete: “Enye [edi] ndida ubọn̄ ke idem nti ikọt Esie, ndinyụn̄ nnyene owo ndyọ ke idem kpukpru mmọemi ẹnịmde ke akpanikọ ke usen oro.” (Matthew 24:21; 2 Thessalonica 1:10) Nso ubọn̄ ubọn̄ idotenyịn ke oro edi ntem ọnọ Peter, James, John, ye kpukpru mme Christian oro ẹyetde aran ke spirit! Edikpụhọde mbiet oro ama ọsọn̄ọ mbuọtidem Peter. Ke akpanikọ, ndikot mban̄a enye ọsọn̄ọ mbuọtidem nnyịn n̄ko onyụn̄ ọsọn̄ọ mbuọtidem nnyịn nte ke Jesus ọyọsọp ndinọ “owo kiet kiet nte ekemde ye utom esie.” Mme anam-akpanikọ Christian oro ẹyetde aran ẹmi ẹdude uwem ẹsịm mfịn emi ẹkụt ẹsọn̄ọde mbuọtidem mmọ nte ke ẹyenọ mmọ ubọn̄ ye Jesus. Ifiọk oro nte ke ẹyenyan̄a mmọ ebe utịt idiọk editịm n̄kpọ emi ẹsịn ke ubọn̄ ubọn̄ obufa ererimbot ọsọn̄ọ mbuọtidem mme erọn̄ en̄wen. (Ediyarade 7:14) Nso nsịnudọn̄ ke emi edi ntem ndisọn̄ọ nda tutu esịm utịt! Ndien n̄kukụt emi ekeme ndikpep nnyịn ekese n̄kpọ efen efen nte nnyịn idikụtde ke ibuotikọ oro etienede.

[Mme Ikọ idakisọn̄]

Nte Afo Emeti?

◻ Mmanie ẹkedu ye Jesus ke ini edikpụhọde mbiet oro?

◻ Didie ke edikpụhọde mbiet oro ọkọsọn̄ọ mbuọtidem mme apostle?

◻ Ke ini Moses ye Elijah ẹkebiọn̄ọrede “ke ubọn̄” ọtọkiet ye Jesus ke edikpụhọde mbiet oro, mmanie ke mmọ ẹkeda ẹban̄a?

◻ Nso mbiet odu ke ufọt Moses ye Elijah ke n̄kan̄ kiet ye Israel Abasi ke n̄kan̄ eken?

[Ndise ke page 10]

Edikpụhọde mbiet oro ọsọn̄ọ mbuọtidem mme Christian eke eset ye eke idahaemi