Nso Ke Jehovah Oyom Oto Nnyịn Mfịn?
“Uyo [ama] oto ke ikpa-enyọn̄ ọwọrọ, ete, Emi edi edima Eyen Mi, emi [nnemde esịt] ye Enye; ẹkop uyo Esie.”—MATTHEW 17:5.
1. Ini ewe ke Ibet ọkọyọhọ uduak esie?
JEHOVAH ọkọnọ idụt Israel Ibet, enyenede ediwak ikpehe. Apostle Paul ekewet aban̄a mmọ ete: ‘Mmọ ẹkedi enyọn̄-enyọn̄ ido obụkidem, ẹmi ẹnọde owo ẹnịm, tutu esịm ini eke ẹdidiọn̄de kpukpru n̄kpọ.’ (Mme Hebrew 9:10) Ke ini Ibet akanamde nsụhọ nditọ Israel ẹnyịme Jesus nte Messiah, m̀mê Christ, enye ama osu uduak esie. Ntem, Paul ọkọdọhọ ete: “Christ anam ibet etre.”—Rome 10:4; Galatia 3:19-25; 4:4, 5.
2. Mmanie ẹkedu ke idak Ibet, ndien ini ewe ke enye mîkọbọpke mmọ aba?
2 Ndi emi ọwọrọ ete ke Ibet emi ibọpke nnyịn mfịn? Ke akpanikọ, ata ediwak ke otu ubonowo akanam idụhe ke idak Ibet oro, nte andiwet psalm akanamde an̄wan̄a: “[Jehovah etịn̄] ikọ esie ọnọ Jacob; etịn̄ mme ewụhọ esie ọnọ Israel. Enye ikanamke ntem ye baba idụt kiet: ndien ama edi mme ikpe esie, mmọ ifiọkke mmọ.” (Psalm 147:19, 20) Ke ini Abasi ọkọtọn̄ọde obufa ediomi ke isọn̄ uwa Jesus, idem idụt Israel ikenyeneke aba mbiomo edinịm Ibet oro. (Galatia 3:13; Ephesus 2:15; Colossae 2:13, 14, 16) Do, edieke ibet oro mîbọpke owo aba, nso ke Jehovah oyom oto mbon oro ẹyomde ndinam n̄kpọ esie mfịn?
Se Jehovah Oyomde
3, 4. (a) Ke ofụri ofụri, nso ke Jehovah oyom oto nnyịn mfịn? (b) Ntak emi nnyịn ikpetienede isan̄a ke nde ikpat Jesus?
3 Ke akpatre isua utom ukwọrọikọ Jesus, mme apostle esie, Peter, James, ye John ẹma ẹsan̄a ye enye ẹka edikon̄ obot, eyedi ke etịn̄e Obot Hermon. Ke ọtọ oro, mmọ ẹma ẹkụt ntịn̄nnịm n̄kukụt Jesus ke akwa ubọn̄ ẹnyụn̄ ẹkop uyo Abasi ọdọhọde ete: “Emi edi edima Eyen Mi, emi [nnemde esịt] ye Enye; ẹkop uyo Esie.” (Matthew 17:1-5) Ke ofụri ofụri, oro edi se Jehovah oyomde oto nnyịn—ndikop uyo Eyen esie nnyụn̄ ntiene uwụtn̄kpọ ye mme ukpepn̄kpọ esie. (Matthew 16:24) Ntem, apostle Peter ekewet ete: “Christ ke Idem Esie ama okụt ndutụhọ kaban̄a mbufo, onyụn̄ ọkpọn̄ uwụtn̄kpọ ọnọ mbufo, ete, mbufo ẹkpetiene ẹsan̄a ke nde ikpat Imọ.”—1 Peter 2:21.
4 Ntak emi nnyịn ikpetienede isan̄a ke nde ikpat Jesus? Sia ebede ke ndikpebe enye, nnyịn ikpebe Jehovah Abasi. Jesus ama etịm ọfiọk Ete, sia ama akabiat anana-ibat biliọn isua ye enye ke heaven mbemiso ekedide isọn̄. (Mme N̄ke 8:22-31; John 8:23; 17:5; Colossae 1:15-17) Ke ini okodude ke isọn̄, Jesus ama owụt edu Ete esie ke edinam akpanikọ. Enye ama anam an̄wan̄a ete: “Kpa nte Ete ekekpepde Mi, kpa ntre ke ntetịn̄.” Ke akpanikọ, Jesus ama ekpebe Jehovah ata nnennen tutu enye ekekeme ndidọhọ ete: “Owo eke okokụtde Mi okokụt Ete.”—John 8:28; 14:9.
5. Mme Christian ẹdu ke idak ibet ewe, ndien ini ewe ke ibet oro ekedidu?
5 Nso ibuana ke ndikop uyo Jesus nnyụn̄ n̄kpebe enye? Ndi oro ọwọrọ ndidu ke idak ibet? Paul ekewet ete: “Ami ke idem mi [ndụhe] ke idak ibet.” Enye eketịn̄ mi aban̄a “akani ediomi,” kpa Ibet ediomi oro ẹkenamde ye Israel. Paul ama enyịme ete ke imọ ikodu “ke idak ibet Christ.” (1 Corinth 9:20, 21; 2 Corinth 3:14) Ke akani Ibet ediomi ama eketre, “Obufa Ediomi” ama edidu ye “ibet Christ” esie oro kpukpru asan̄autom Jehovah mfịn ẹnyenede ndinịm.—Luke 22:20; Galatia 6:2; Mme Hebrew 8:7-13.
6. Didie ke ẹkeme ndinam “ibet Christ” an̄wan̄a, ndien didie ke nnyịn inịm enye?
6 Jehovah ikanamke ẹwewet “ibet Christ” nte n̄wedibet, ẹtịmde enye ẹdọn̄ ke nsio nsio ikpehe, nte ẹkenamde ye akani Ibet ediomi. Obufa ibet mme anditiene Christ emi idọn̄ọke anyan udịm n̄kpọ ẹnyenede ndinam ye se owo mînyeneke ndinam. Nte ededi, Jehovah ama enịm ọyọhọ ọyọhọ mbụk inan̄ ẹban̄ade uwem ye mme ukpepn̄kpọ Eyen esie ke Ikọ Esie. Akan oro, Abasi ama ọnọ ndusụk ke otu mme akpa anditiene Jesus odudu spirit man ẹnọ mme ntọt ẹwetde-wet kaban̄a ọkpọkpọ edu uwem, mme mbubehe esop, edu uwem ke esịt ubon, ye mme n̄kpọ eken. (1 Corinth 6:18; 14:26-35; Ephesus 5:21-33; Mme Hebrew 10:24, 25) Ke ini nnyịn inamde uwem nnyịn ekekem ye uwụtn̄kpọ ye mme ukpepn̄kpọ Jesus Christ inyụn̄ inamde item eke mme andiwet Bible akpa isua ikie oro ẹkenọde odudu spirit, nnyịn inịm “ibet Christ.” Jehovah oyom emi oto mme asan̄autom esie mfịn.
Nte Ima Edide Akpan N̄kpọ
7. Didie ke Jesus ọkọsọn̄ọ owụt se idide ata akpan n̄kpọ ke ibet esie ke akpatre Passover oro akadiade ye mme apostle esie?
7 Ke adan̄aemi ima ekedide akpan n̄kpọ ke idak Ibet, enye edi ọwọn̄, m̀mê ata akpan n̄kpọ, ke ibet Christ. Jesus ama owụt akpanikọ emi ke ini enye okosobode ye mme apostle esie ndidia Passover eke 33 E.N. Nte ekemde ye ibio ibio uwetn̄kpọ apostle John kaban̄a se ikadade itie okoneyo oro, mme ikọ oro Jesus eketịn̄de ke ofụri esịt ẹsịne editịn̄ ntụk ima utịm ike 28. Emi ama ọsọn̄ọ etịn̄ ọnọ mme apostle esie se idide ata akpan n̄kpọ, m̀mê edu, ibet esie. Ke edide akpan n̄kpọ, John ọkọtọn̄ọ mbụk aban̄ade n̄kpọntịbe akpan mbubịteyo oro ebe ke ndidọhọ: “Ke ini usọrọ Passover mîtọn̄ọke kan̄a, Jesus ọfiọk ete ekem ini nte Imọ idikpọn̄de ererimbot emi inyọn̄ itiene Ete; ndien ke edima emi Enye amade ikọt Esiemmọ ẹmi ẹdude ke ererimbot, Enye ama mmọ tutu akpatre.”—John 13:1.
8. (a) Nso uyarade ikodu kaban̄a n̄kaiso eneni ke ufọt mme apostle? (b) Didie ke Jesus ekekpep mme apostle ukpepn̄kpọ aban̄ade nsụhọdeidem?
8 Jesus ama ama mme apostle esie, idem okposụkedi enye okodomode ye unana edikụt akpan unen ke ndin̄wam mmọ ẹkan ebeubọk udọn̄ mmọ kaban̄a odudu ye idaha. Ediwak ọfiọn̄ mbemiso mmọ ẹkedide ẹdisịm Jerusalem, ‘mmọ ẹma ẹneni ye kiet eken ẹte, m̀mê anie ke otu mme imọ okpon akan.’ Ndien esisịt ini mbemiso ẹkedide obio oro ndidia Passover, eneni aban̄ade idaha ama afiak edemede. (Mark 9:33-37; 10:35-45) Se iketịbede esisịt ini ke mme apostle ẹma ẹkedụk ubetenyọn̄ ndibuana se ikedide akpatre Passover mmọ ọtọkiet ama owụt ke emi ekedi mfịna oro akakade-ka iso. Ke ini oro, idụhe owo emi akadade ifet oro ndinam ido edinam mfọnido eke ediyet mbon en̄wen ukot. Man ekpep mmọ ukpepn̄kpọ aban̄ade nsụhọdeidem, Jesus ke idemesie ama eyet mmọ ukot.—John 13:2-15; 1 Timothy 5:9, 10.
9. Didie ke Jesus akanam n̄kpọ aban̄a idaha oro ekedemerede ke ẹma ẹkedia akpatre Passover?
9 Kpa ye ukpepn̄kpọ oro, ke ẹma ẹkedia Passover ẹkụre Jesus onyụn̄ ọtọn̄ọde Editi n̄kpa esie oro akasan̄ade ekpere, tịm fiọk n̄kpọ efen efen emi akadade itie. Mbụk Gospel Luke ọdọhọ ete: “Ndomo-idem onyụn̄ etịbe ke otu mmọ, ete, m̀mê ẹkpebat anie ke otu mme imọ nte andikpon-n̄kan.” Utu ke ndiyat esịt ye mme apostle nnyụn̄ nsọn̄ọ nsua nnọ mmọ, Jesus ama ọnọ mmọ item ke ima aban̄a ufọn edidi isio ye mme andikara ererimbot oro ẹyomde odudu. (Luke 22:24-27) Enye ama ọnọ ndien se ẹkemede ndikot itiatinụk ibet Christ, ọdọhọde ete: “Mmọnọ mbufo obufa ibet nte, Mbufo ẹma kiet eken; nte, mbufo nde ẹma kiet eken kpa nte n̄kamade mbufo.”—John 13:34.
10. Nso ewụhọ ke Jesus ọkọnọ mme mbet esie, ndien nso ke oro akabuana?
10 Ekem ke mbubịteyo oro Jesus ama owụt adan̄a nte ima ebietde eke Christ akpatarade. Enye ọkọdọhọ ete: “Ibet Mi edi ntem, ete, mbufo ẹma kiet eken, kpa nte n̄kamade mbufo. Baba owo kiet inyeneke ima eke okponde akan enye emi, owo ndikpayak uwem esie nduọk kaban̄a mme ufan esie.” (John 15:12, 13) Ndi Jesus ọkọdọhọ ete ke mme anditiene enye ẹkpenyene ndinyịme ndikpa ke ibuot mme ekemmọ andinịm ke akpanikọ edieke idaha okoyomde emi? Ntre ke akan̄wan̄a John, andikokụt n̄kpọ emi ke enyịn, koro enye ekewet ke ukperedem ete: “Nnyịn ida emi ifiọk ima, koro Enye [Jesus Christ] akayakde uwem Esie ọnọ kaban̄a nnyịn: nnyịn nde ikponyụn̄ iyak uwem nnyịn inọ kaban̄a nditọ-ete.”—1 John 3:16.
11. (a) Didie ke nnyịn ikeme ndinịm ibet Christ? (b) Nso uwụtn̄kpọ ke Jesus ọkọnọ?
11 Ntre, ndien, nnyịn inamke ibet Christ n̄kukụre ebe ke ndikpep mbon en̄wen mban̄a enye. Ana nnyịn idu uwem inyụn̄ inam n̄kpọ nte Jesus. Edi akpanikọ, Jesus ekesida mme inem inem ikọ oro ẹtịmde ẹmek ke mme nneme esie. Edi, enye ama esikpep n̄kpọ ebe ke uwụtn̄kpọ n̄ko. Idem okposụkedi Jesus ekedide okopodudu edibotn̄kpọ eke spirit ke heaven, enye ama ada ifet oro anam n̄kpọ kaban̄a mme ufọn Ete esie ke isọn̄ onyụn̄ owụt nte nnyịn ikpodude uwem. Enye ama osụhọde idem, ọfọn ido, onyụn̄ ekere aban̄a, an̄wamde mbon oro ẹkebiomde edidobi mbiomo ẹnyụn̄ ẹfịkde. (Matthew 11:28-30; 20:28; Philippi 2:5-8; 1 John 3:8) Ndien Jesus ama akpak mme anditiene enye ete ẹma kiet eken, kpa nte imọ ikamade mmọ.
12. Ntak ẹkemede ndidọhọ ke ibet Christ isụhọkede ima oro oyomde ẹma Jehovah?
12 Nso itie ke ima ẹnyenede ẹnọ Jehovah—kpa n̄kponn̄kan ewụhọ ke Ibet—enyene ke ibet Christ? (Matthew 22:37, 38; Galatia 6:2) Ndi edi udiana itie? N̄wan̄ansa-o! Ima ẹnyenede ẹnọ Jehovah ye mme ekemmọ Christian ẹdi itai ye aban̄. Owo ikemeke ndinen̄ede mma Jehovah ye unana edima eyenete esie n̄ko, koro apostle John ọkọdọhọ ete: “Edieke owo ọdọhọde ete, Mmama Abasi, ndien enye asua eyen-ete esie, enye edi osu-nsu; koro owo emi mîmaha eyen-ete esie emi enye okokụtde ke enyịn ikemeke ndima Abasi emi enye mîkekwe.”—1 John 4:20; men 1 John 3:17, 18 domo.
13. Nso ikedi utịp ke mme mbet ndinịm obufa ibet Jesus?
13 Ke ini Jesus ọkọnọde mme mbet esie obufa ibet ete ẹma kiet eken kpa nte imọ ikamade mmọ, enye ama etịn̄ utịp oro emi edinyenede. Enye ọkọdọhọ ete: “Mbufo ẹma ẹma kiet eken, kpukpru owo ẹyeda oro ẹfiọk ẹte mbufo ẹdi mbet Mi.” (John 13:35) Nte Tertullian, emi okodude uwem ke se ibede isua ikie tọn̄ọ Jesus akakpa, ọkọdọhọde, ima nditọete eke mme akpa Christian ama enyene utịp oro. Tertullian ama okot oto mbon oro mîkedịghe mme Christian nte ẹketịn̄de ẹban̄a mme anditiene Christ ẹte: ‘Sese nte mmọ ẹmade kiet eken ẹnyụn̄ ẹben̄ede idem ndikpa nnọ kiet eken.’ Nnyịn imekeme ndibụp idem nnyịn ite, ‘Ndi ami mmowụt utọ ima oro nnọ mme ekemmọ Christian tutu enye ọsọn̄ọ nte ke ami ndi kiet ke otu mme mbet Christ?
Nte Nnyịn Isọn̄ọde Ima Nnyịn
14, 15. Nso ikeme ndinam edi ọkpọsọn̄ n̄kpọ ndinịm ibet Christ, edi nso ikeme ndin̄wam nnyịn ndinam ntre?
14 Edi akpan n̄kpọ nte mme asan̄autom Jehovah ẹwụt ima ebietde eke Christ. Edi ndi esisọn̄ fi ndima mme ekemmọ Christian ẹmi ẹwụtde mme edu ibụk? Ọfọn, nte nnyịn ima ikokụt, idem mme apostle ẹma ẹneni ẹban̄a ẹnyụn̄ ẹdomo ndimenede mme udọn̄ idem mmọ ke enyọn̄. (Matthew 20:20-24) Mbon Galatia n̄ko ẹma ẹtọhọ ke otu idemmọ. Ke ama okowụt nte ke ofụri Ibet odụk ọdọn̄ọ ke ima mbọhọidụn̄, Paul ama odụri mmọ utọn̄ ete: “Edi edieke mbufo ẹdomde ẹnyụn̄ ẹtade kiet eken, ẹkpeme mbak mbufo ẹdisobo ke ubọk kiet eken.” Ke ama okowụt ukpụhọde ke ufọt ubọkutom obụkidem ye mbun̄wụm spirit Abasi, Paul ama adian item emi: “Nnyịn ikûtan̄ idem, ikûyat kiet eken esịt, ikûnyụn̄ ifịbe ufụp ye kiet eken.” Ekem apostle oro ama akpak ete: “Ẹbiom mbiomo kiet eken; ntem ke mbufo ẹdinịm ibet Christ.”—Galatia 5:14–6:2.
15 Ke ndiyom ẹnịm ibet Christ, ndi Jehovah oyom n̄kpọ akaha oto nnyịn? Okposụkedi ekemede ndidi ọkpọsọn̄ n̄kpọ ndifọn ido ye mbon oro, ke nditịm ntịn̄, ẹtịn̄de uyat uyat ikọ ye nnyịn ẹnyụn̄ ẹnọde nnyịn unan ke n̄kan̄ eke ntụk, obiomo nnyịn ‘ndidi mme andikpebe Abasi, nte ndima nditọ; nnyụn̄ nsan̄a ke ima.’ (Ephesus 5:1, 2) Oyom nnyịn ika iso ise uwụtn̄kpọ Abasi, emi ‘akayararede ima eke amade nnyịn, ke emi Christ akpade ke ibuot nnyịn ke adan̄aemi nnyịn isụk idide mme idiọk owo kan̄a.’ (Rome 5:8) Ebede ke ndinam usio-ukot ndin̄wam mbon en̄wen, esịnede mbon oro ẹnamde n̄kpọ ye nnyịn ke idiọk usụn̄, nnyịn imekeme ndikop uyụhọ ndifiọk nte ke nnyịn ke ikpebe Abasi inyụn̄ inịm ibet Christ.
16. Didie ke nnyịn iwụt ima oro imade Abasi ye Christ?
16 Nnyịn ikpenyene nditi nte ke nnyịn iwụt ima nnyịn ebe ke se nnyịn inamde, idịghe sụk ke se nnyịn itịn̄de. Idem Jesus inikiet ama okụt nte ikpehe kiet ke uduak Abasi ọkọsọn̄de ndinyịme ke ntak kpukpru se ikabuanade. Jesus ama ọbọn̄ akam ete: “Ete, edieke Afo enyịmede, men Mi cup emi fep.” Edi enye ama ọsọsọp adian ete: “Edi okûdi nte Ami nnyịmede, yak edi nte Afo enyịmede.” (Luke 22:42) Kpa ye ofụri se Jesus okosobode, enye ama anam uduak Abasi. (Mme Hebrew 5:7, 8) N̄kopuyo edi uyarade ima nnyịn onyụn̄ owụt ke nnyịn imọfiọk ite ke usụn̄ Abasi edi mfọnn̄kan usụn̄. Bible ọdọhọ ete: “Ndima Abasi edi emi, ete, nnyịn inịm mbet Esie.” (1 John 5:3) Ndien Jesus ama asian mme apostle esie ete: “Mbufo ẹma ẹma Mi, ẹyenịm mbet Mi.”—John 14:15.
17. Akpan ewụhọ ewe ke Jesus ọkọnọ mme anditiene enye, ndien nnyịn isan̄a didie ifiọk ke enye abuana nnyịn mfịn?
17 Ke akande ndiwụk mme anditiene enye ete ẹma kiet eken, nso akpan ewụhọ ke Christ ọkọnọ mmọ? Enye okowụk ete mmọ ẹnam utom ukwọrọikọ emi enye ọkọnọde mmọ ukpep. Peter ọkọdọhọ ete: “Abasi onyụn̄ ọnọ nnyịn uyo ete ikwọrọ inọ mbio-obio, inyụn̄ idi ntiense.” (Utom 10:42) Jesus ama enen̄ede owụk ete: “Mbufo ẹka ẹkenam kpukpru mme idụt ẹdi mbet Mi, ẹnịm mmọ baptism ẹsịn ke enyịn̄ Ete ye Eyen ye Edisana Spirit: ẹnyụn̄ ẹkpep mmọ ẹnam kpukpru n̄kpọ eke n̄ketemede mbufo.” (Matthew 28:19, 20; Utom 1:8) Jesus ama ayarade ete ke mme utọ item oro ẹyebuana n̄ko mme anditiene imọ idahaemi ke “utịt ini,” koro enye ọkọdọhọ ete: “Ẹyenyụn̄ ẹkwọrọ gospel Ubọn̄ Abasi emi ke ofụri ekondo nte ntiense ẹnọ kpukpru mme idụt, ndien adan̄aoro ke utịt eyedi.” (Daniel 12:4; Matthew 24:14) Edi akpanikọ, edi uduak Abasi nte nnyịn ikwọrọ ikọ. Edi, ndusụk owo ẹkeme ndikere ke Abasi oyom n̄kpọ okpon akaha oto nnyịn ke ndiyom nnyịn inam utom emi. Edi ndi enen̄ede okpon akaha?
Ntak Ekemede Nditie nte Ọsọn̄
18. Nso ke nnyịn ikpeti ke ini nnyịn ibọde ufen ke ntak ndinam se Jehovah oyomde?
18 Nte nnyịn ima ikokụt, Jehovah ama oyom mme owo ẹnam nsio nsio n̄kpọ oro enye oyomde ke ofụri mbụk owo. Ndien kpa nte se ẹkedọhọde mmọ ẹnam ẹkedide nsio nsio, ntre ke mme orụk idomo oro mmọ ẹkesobode ẹkedi nsio nsio. Edima Eyen Abasi ama osobo ata n̄kpọsọn̄ idomo, ke akpatre ẹwotde ke ata ibak ibak usụn̄ ke ntak edinam se Abasi okoyomde. Edi ke ini nnyịn ibọde ufen ke ndinam se Jehovah oyomde oto nnyịn, nnyịn ikpenyene nditi nte ke idịghe enye edi ntak mme idomo nnyịn. (John 15:18-20; James 1:13-15) Nsọn̄ibuot Satan akada idiọkn̄kpọ, ndutụhọ, ye n̄kpa edi, ndien enye edi andinam mme idaha ẹmi ẹsiwakde ndinam edi ata ọkpọsọn̄ n̄kpọ ndinam se Jehovah oyomde oto mme asan̄autom esie.—Job 1:6-19; 2:1-8.
19. Ntak edide ifet ndinam se Abasi oyomde oto nnyịn ebe ke Eyen esie?
19 Ebede ke Eyen esie, Jehovah emeteme ke utịt ini emi ete mme asan̄autom Esie ẹtan̄a ke ofụri isọn̄ nte ke n̄kukụre usọbọ ndutụhọ ubonowo edi ukara Obio Ubọn̄. Ukara Abasi emi oyosio kpukpru mfịna ke isọn̄ efep—ekọn̄, ubiatibet, unana, usọn̄, udọn̄ọ, n̄kpa. Obio Ubọn̄ oro ayada n̄ko ubọn̄ ubọn̄ paradise isọn̄ edi, emi ẹdikam ẹnamde mme akpan̄kpa ẹset. (Matthew 6:9, 10; Luke 23:43; Utom 24:15; Ediyarade 21:3, 4) Nso ifet ke edi ntem nditan̄a eti mbụk aban̄ade mme utọ n̄kpọ oro! Do, nte an̄wan̄ade, mfịna ndomokiet idụhe ke se Jehovah oyomde nnyịn inam. Nnyịn imesisobo ubiọn̄ọ, edi Satan kpa Devil ye ererimbot esie ẹdi ntak kaban̄a emi.
20. Didie ke nnyịn ikeme ndisobo n̄kpọ-ata ekededi oro Devil enịmde?
20 Didie ke nnyịn ikeme ndisobo n̄kpọ-ata ekededi oro Satan enịmde uforo uforo? Ebe ke nditi mme ikọ ẹmi: “Eyen mi, nyene ibuot, nyụn̄ dat mi esịt, man n̄kụt se ndibọrọde owo eke osụn̄ide mi.” (Mme N̄ke 27:11) Jesus ama ọnọ Jehovah n̄kpọ ndibọrọ isụn̄i Satan ebe ke ndikpọn̄ ifụre uwem eke heaven ndidi ndinam uduak Ete esie ke isọn̄. (Isaiah 53:12; Mme Hebrew 10:7) Nte owo, Jesus ama ọyọ ofụri idomo oro ekesịmde enye, idem n̄kpa ke eto ndutụhọ. Edieke nnyịn itienede enye nte Uwụtn̄kpọ nnyịn, nnyịn n̄ko imekeme ndiyọ mme ndutụhọ inyụn̄ inam se Jehovah oyomde oto nnyịn.—Mme Hebrew 12:1-3.
21. Afo ekere didie aban̄a ima oro Jehovah ye Eyen esie ẹwụtde?
21 Nso ima ke Abasi ye Eyen esie ẹwụt nnyịn ntem! Ke ntak uwa Jesus, okopitem ubonowo enyene idotenyịn ndidu uwem ke nsinsi ke Paradise. Ntre ẹyak nnyịn ikûyak n̄kpọ ndomokiet ofụk idotenyịn nnyịn. Utu ke oro, ẹyak nnyịn iyak se Jesus akanamde ekeme ndidu otụk nnyịn ọkpọkpọ, nte okotụkde Paul, emi ọkọdọhọde ete: ‘Eyen Abasi ama ama mi, onyụn̄ ayak Idem Esie ọnọ aban̄a mi.’ (Galatia 2:20) Ndien nnyịn ikpakam iwụt ntotụn̄ọ esịtekọm inọ ima ima Abasi nnyịn, Jehovah, emi akananam mîyomke n̄kpọ ikaha ito nnyịn.
Didie ke Afo Ọkpọbọrọ?
◻ Nso ke Jehovah oyom oto nnyịn mfịn?
◻ Ke akpatre okoneyo oro enye okodude ye mme apostle esie, didie ke Christ ọkọsọn̄ọ owụt nte ima edide akpan n̄kpọ?
◻ Didie ke nnyịn ikeme ndiwụt ke imama Abasi?
◻ Ntak edide ifet ndinam se Jehovah oyomde oto nnyịn?
[Ndise ke page 23]
Nso ukpepn̄kpọ ke Jesus ọkọnọ ke ndiyet mme apostle esie ukot?
[Ndise ke page 25]
Kpa ye ubiọn̄ọ, ndibuana eti mbụk edi inem inem ifetutom