Ẹsịn Udọn̄ Ẹnọ Kiet Eken Nte Usen Oro Asan̄ade Ekpere
“[Ẹkaiso] ẹsịn udọn̄ ẹnọ kiet eken, ẹdọdiọn̄ ẹnam ẹmi adan̄a nte mbufo ẹkụtde usen oro nte asan̄ade ekpere.”—MME HEBREW 10:25.
1, 2. Ewe usen asan̄a ekpere, ndien nso ikpedi edu ikọt Jehovah?
MBON oro ẹbuanade mfịn ke ndidọhọ ẹte, ‘Di dibọ mmọn̄ uwem,’ isioho idemmọ inịm nsannsan. Nte akwa usen edikan Jehovah asan̄ade ekpere, mmọ ẹda item Bible oro ẹsịn ke edinam: “Eyak nnyịn inyụn̄ ikere nte ikpedemerede kiet eken inọ ima ye nti utom; ikûnyụn̄ isịn ndisop idem ọtọkiet, nte edu ndusụk owo edide, edi inọ kiet eken item [“isịn udọn̄ inọ kiet eken,” NW]; ndien mbufo ẹkpedọdiọn̄ ẹnam ntem, adan̄a nte ẹkụtde ẹte usen oro ke asan̄a ekpere.”—Mme Hebrew 10:24, 25.
2 N̄wed Abasi ama etịn̄ prọfesi aban̄a “usen” oro nte “usen Ọbọn̄ [“Jehovah,” NW].” (2 Peter 3:10) Adan̄a nte Jehovah edide Ata Edikon̄, Abasi oro okopde odudu akan, idụhe usen oro ẹkpekemede ndidi n̄wọrọnda akan usen esie. (Utom 2:20) Emi ọwọrọ ndiwụt unen itie edikara esie nte Abasi ke ofụri ekondo. Akwa anana mbiet usen oro ke asan̄a ekpere.
3. Didie ke usen Jehovah akasan̄a ekpere ọnọ mme Christian ke akpa isua ikie, ndien nso kaban̄a nnyịn mfịn?
3 Apostle Paul ama asian mme Christian ke akpa isua ikie eke Eyo Nnyịn ete ke usen Jehovah ke akasan̄a ekpere. Mmọ ẹkesak iso ẹse edidi usen oro, edi ke ini oro, usen oro ama oyom usụn̄ akan isua 1,900. (2 Thessalonica 2:1-3) Kpa ye akpanikọ oro, akana ẹsịn udọn̄ ẹnọ mmọ koro usen oro iditreke-tre ndidi, ndien edieke mme Christian ẹsọn̄ọde ẹda ẹkaiso ke mbuọtidem, mmọ ẹyekụt eti usen oro. (2 Timothy 4:8) Ko ke ini oro, ẹkeda nte ke usen oro ke akasan̄a ekpere. Ye nnyịn mfịn, usen Jehovah ke akpan amasan̄a ekpere. Kpukpru utịbe utịbe edisu prọfesi Bible ẹyarade idara idara akpanikọ emi ẹwụt. Ibịghike, ẹyenam enyịn̄ Abasi nnyịn, Jehovah, asana ke nsinsi.—Luke 11:2.
Bọ Nsịnudọn̄ to Enyịn̄ Abasi
4. Nte ekemde ye Ediyarade 19:6, anie enyene ndikabade ndi Edidem, ndien didie ke ẹfiọk enyịn̄ esie?
4 Enyịn̄ Abasi ẹkpenyene ndidi n̄kpọ ndemede udọn̄ ọnọ ofụri ekondo ubonowo. Today’s English Version ọdọhọ ete: “Ẹtoro Abasi! Koro Ọbọn̄, Ata Ọkpọsọn̄ Abasi nnyịn, edi Edidem!” (Ediyarade 19:6) Nte edikabade Bible eke ọyọhọ isua ikie-20 emi ọdọhọde, enye edi Ọbọn̄, kpa ata ọkpọsọn̄ Abasi. Edikabade oro, ọkọrọ ye ediwak edikabade eke eyomfịn, isịnke enyịn̄ Abasi oro ọkọtọn̄ọde ndikara nte Edidem mi. Nte ededi, esịn enyịn̄ Abasi oro ke ikọ nduaidem oro, “Hallelujah!” (“Ẹtoro Jah” m̀mê, “Ẹtoro Jehovah”) emi ẹkụtde ke Revised Standard Version, New International Version, ye edikabade eke Moffatt ke Ediyarade 19:6. Ke ediwak ikpehe ke eyo nnyịn, ẹma ẹsio enyịn̄ Abasi oro efep ofụri ofụri ke mme edikabade Bible. Nte nnyịn idikụtde, nte ededi, enyịn̄ oro ama edi akwa n̄kpọ nsịnudọn̄ ọnọ ikọt Abasi ke eset ye ke eyo nnyịn.
5, 6. (a) Ntak okoyomde Moses ọfiọk enyịn̄ Abasi emi enye akadade ke ibuot esie? (b) Nso utịp ke anaedi ama enyene ke idem nditọ Israel ke ini Moses ọkọsọn̄ọde etịn̄ aban̄a enyịn̄ Abasi?
5 Nnyịn imeti nte ke ini Ata Edikon̄ Abasi ọkọdọn̄de Moses etiene nditọ Israel ẹmi ẹkedude ke ufụn ke isọn̄ Egypt, mbụme oro ekedemerede ke esịt mbon oro ẹkedọn̄de Moses aka ebịne ekedi m̀mê anie ọdọn̄ enye. Moses ama ọfiọk ete ke mme Jew oro ẹkebọde ufen ẹyeyom ndifiọk enyịn̄ Abasi oro enye akadade ke ibuot esie. Kaban̄a emi nnyịn ikot ke Exodus 3:15 ite: “Ndien Abasi ọtọn̄ọ ntak ọdọhọ Moses ete, Ntem ke afo edidọhọ nditọ Israel ete, Jehovah Abasi mme ete mbufo, Abasi Abraham, ye Abasi Isaac, ye Abasi Jacob, ọdọn̄ mi utom ke ọtọ mbufo; emi edi enyịn̄ mi ke nsinsi, emi onyụn̄ edi se ẹdade ẹti mi ke kpukpru emana.”
6 Ke ini ẹkesọn̄ọde ẹtịn̄ etop emi ẹnọ mmọ, anaedi nditọ Israel ẹma ẹtịm ẹkop nsịnudọn̄. Ata Abasi kierakiet, kpa Jehovah, ọkọwọn̄ọ edifak mmọ. Ndien emi ekedi n̄kpọ nsịnudọn̄ didie ntem ke ndinyene idotenyịn editịm mmehe ye Abasi ke adan̄aemi enye edinamde ẹfiọk se ọkpọ ọkpọ enyịn̄ esie ọwọrọde—idịghe ndinịm idemesie nsannsan ke iseri!—Exodus 3:13; 4:29-31.
7. (a) Nnyịn isan̄a didie ifiọk ke mme mbet Jesus ẹma ẹmehe ye enyịn̄ Abasi? (b) Didie ke ẹkekpọnọde enyịn̄ Abasi ẹnịm n̄kan̄ kiet?
7 Mme mbet Ọbọn̄ Jesus Christ n̄ko ẹma ẹkop akwa nsịnudọn̄ ke enyịn̄ Abasi oro, Jehovah, ye se enye adade aban̄a. (John 17:6, 26) Ke ini utom ukwọrọikọ esie ke isọn̄, enye ke akpanikọ ikọkpọnọkede enyịn̄ Abasi oro inịm n̄kan̄ kiet, ikonyụn̄ idịghe uduak esie ndinam enyịn̄ esie, Jesus, ebe iso. Akakam edi ke nsọn̄ibuot ye ata ido ukpono Christian oro ẹkebemde iso ẹtịn̄ ama ọkọtọn̄ọ ke ẹkekpọnọde enyịn̄ Abasi ẹnịm n̄kan̄ kiet, ih, ẹsiode ata edisosio ẹfep ofụri ofụri ke nneme mme Christian. (Utom 20:29, 30) Inikiet ekededi oro ẹtọn̄ọde ndinọ enyịn̄ Eyen Abasi akwa uwọrọiso, ẹfụkde eke Ete, mbon oro ẹdọhọde nte idide Christian ẹyekụt ke utuakibuot mmimọ nnọ Ete anana akpan owo oro enye akade ebịne, anana edidianakiet eke ubon, ndien ke ntre itịmke idi n̄kpọ nsịnudọn̄.
8. Nso idi n̄kaiso utịp ke idem ikọt Abasi ke ndida enyịn̄ oro Mme Ntiense Jehovah?
8 Ntem, ekedi ata n̄kpọ idara oro inua mîkemeke nditịn̄ ke ini Nditọ Ukpepn̄kpọ Bible oro ẹbuanade ye Watch Tower Society ẹkedade enyịn̄ oro, Mme Ntiense Jehovah ke 1931. Ikedịghe n̄kukụre enye ndidi n̄kpọ idara edi enye ekedi ata n̄kpọ nsịnudọn̄. Ke ntak emi, Nditọ Ukpepn̄kpọ Bible oro ẹkesụk ẹnọde enyịn̄ obufa obufa mi ẹma ẹkeme ndisịn udọn̄ nnọ kiet eken.—Men Isaiah 43:12 domo.
9. Didie ke mme ata Christian ẹse Enyeemi mmọ ẹdide Ntiense ẹnọ?
9 Mmọdo, mme ata Christian mfịn ẹkụt nte odotde ndifiọk Enyeemi mmọ ẹdide Ntiense emi ẹkebemde iso ẹtịn̄, ukem nte Jesus Christ Adaiso mmọ ọkọfiọkde ke ini okodude ke isọn̄. (Ediyarade 1:1, 2) Ih, mmọ ẹdiọn̄ọ enye ikpọn̄ nte enyeemi enyịn̄ esie edide Jehovah.—Psalm 83:18.
Ẹyọhọ ye Idatesịt ye Edisana Spirit
10-12. (a) Nso ikenyene ndidi utịp anamutom odudu ke idem mme anditiene Jesus? (b) Didie ke mme okop-idatesịt Ntiense Jehovah ẹyom ndinam n̄kpọ ye kiet eken?
10 Jesus Christ ọkọdọhọ mme apostle esie ke ikọ unyọn̄ esie ete: “Eka ẹkenam kpukpru mme idụt edi mbet mi, ẹnịm mmọ baptism ẹsịn ke enyịn̄ Ete ye Eyen ye edisana spirit: ẹnyụn̄ ẹkpep mmọ ẹnam kpukpru n̄kpọ eke n̄ketemede mbufo: ndien sese, ami ndodu ye mbufo kpukpru ini tutu osịm utịt ererimbot.”—Matthew 28:19, 20.
11 Fiọk ete ke ẹkenyene ndinịm mme Christian oro ẹnọde ukpep obufa obufa baptism ke enyịn̄ edisana spirit. Edisana spirit emi idịghe owo edi edi anamutom odudu Jehovah Abasi, emi enye adade anam utom ebe ke Jesus Christ. Ke Pentecost, Jehovah Abasi, ebede ke Jesus, ama an̄wan̄a anamutom odudu emi ọduọk ke idem mme anditiene Jesus Christ oro ẹkeyakde idem ẹnọ. (Utom 2:33) Mmọ ẹma ẹyọhọ ye edisana spirit emi, ndien kiet ke otu mme uyarade, m̀mê mbun̄wụm spirit edi idatesịt. (Galatia 5:22, 23; Ephesus 5:18-20) Idatesịt edi edu emi edemerede owo udọn̄. Akana mme mbet ẹyọhọ ye idatesịt edisana spirit. Akam oro apostle Paul ọkọbọn̄de otịm odot: “Abasi idotenyịn akpakam ọyọhọ mbufo ye kpukpru idatesịt ye emem ke mbuọtidem mbufo, man mbufo ẹnyene uwak idotenyịn oto ke odudu edisana spirit.”—Rome 15:13.
12 Ke ẹyọhọde ye spirit oro ọnọde idatesịt mi, Mme Ntiense Jehovah mfịn, esịnede “akwa otuowo” ẹyeyom, ih, ẹyenụk mmọ ndisịn udọn̄ nnọ kiet eken ke ufọt editịm n̄kpọ emi mîtiehe ufan ufan mi. Nte odotde, apostle Paul ama etịn̄ aban̄a ‘nsịnudọn̄ edem mbiba.’—Ediyarade 7:9, 10; Rome 1:12; 14:17.
Kpukpru Ntak Ndikop Nsịnudọn̄
13. Mme ntak ewe ke nnyịn inyene ndikop nsịnudọn̄ ndinyụn̄ nsịnudọn̄ nnọ kiet eken?
13 Ke ndikụt idemmọ ke ufọt editịm n̄kpọ emi, emi andibiọn̄ọ kpukpru n̄kpọ oro enende edide andikara idem onyụn̄ edide abasi, mme Christian ẹyeyom ndisịn udọn̄ nnọ kiet eken ke esịt esop Christian ofụri ererimbot, emi ọyọhọde ye edisana spirit Jehovah Abasi. (Mme Hebrew 10:24, 25; Utom 20:28) Nnyịn imenyene kpukpru ntak ndikop nsịnudọn̄. Ih, nnyịn iwụt esịtekọm didie ntem ndinyene nnennen ifiọk aban̄ade Jehovah ye eke Eyen Esie ye anamutom odudu emi mmọ ẹdade ẹnam utom, oro edi, edisana spirit! Nnyịn iwụt esịtekọm didie ntem iban̄a idotenyịn oro mmọ ẹnọde! Utuakibuot nnyịn ke ntem ọyọhọ ye idatesịt. Apostle Paul ọkọdọhọ mme Christian oro enye ekewetde n̄wed esie ọnọ ẹsọk ete ke mmọ ẹkpenyene ndisịn udọn̄ nnọ kiet eken nnyụn̄ mbọp kiet eken ke ata edisana mbuọtidem mmọ. Mmọ ẹkenyene ndinam emi ‘adan̄a nte mmọ ke ndamban̄a usụn̄ ẹkụtde nte usen oro asan̄ade ekpere.’ Akande oro, ke ini mme ukara ukaraidem ererimbot emi ẹsọhide Ido Ukpono Christ inua inua ẹfep, ọkọrọ ye nsunsu ido ukpono eken, idahaoro eyeyom ete nnyịn idọdiọn̄ isịn udọn̄ inọ kiet eken.
14. Mmanie ẹkpesịn udọn̄ ẹnọ kiet eken, ndien didie?
14 Ke adan̄aemi mbiowo ẹdade iso ke ndisịn udọn̄ nnọ otuerọn̄ ke esop mmọ kiet kiet, oyom kpukpru Christian ẹsịn udọn̄ ẹnọ kiet eken, kpa nte Mme Hebrew 10:25 etemede. Ke akpanikọ, emi edi se ẹyomde ẹto Christian. Edieke afo edide andibuana ke esop, nte afo emesinọ nsịnudọn̄ emi? Afo emekeme ndikere ete, ‘Didie ke n̄keme ndinọ? Nso ke n̄keme ndinam?’ Akpa, ke ndikam ndu ke mme mbonoesop ye ndinọ ndutịm Christian ibetedem, nte kpukpru nditọete iren ye iban eken ibọhọ nsịnudọn̄, idem nte afo ke idemfo ekemede ndikop nsịnudọn̄ ke ini okụtde mmọ ke edinam akpanikọ ẹdụkde mbonoesop? Mmọ ẹkeme n̄ko ndibọ nsịnudọn̄ ẹto uwụtn̄kpọ mbuọtidem ediyọ fo. Ke afo ndikaiso ke usụn̄uwem Christian kpa ye mme mfịna uwem ye nsọn̄ọn̄kpọ, udehe-dei ukpa mba, afo emekeme ndinịm eti uwụtn̄kpọ.
Biọn̄ọ Unana Nsịnudọn̄ Otode Devil
15. Ntak emi Devil asan̄ade ye “akwa ifụtesịt,” ndien ye mmanie?
15 Idịghe nnyịn ikpọn̄ ifiọk ke usen Jehovah ekpere. Satan kpa Devil ọfiọk n̄ko. Ediyarade 12:12 asian nnyịn ete ke mbọm odu idahaemi ke isọn̄ ‘koro Devil ama osụhọde etiene mbufo, asan̄ade ye akwa ifụtesịt, sia enye ọdiọn̄ọde ete ini imọ edi ibio.’ Nte Ediyarade 12:17 owụtde, akwa ifụtesịt esie edi ye “[mmọ]emi ẹnịmde mme item Abasi, ẹnyụn̄ ẹyịrede ẹmụm ikọ ntiense Jesus ẹkama.” Eyịghe idụhe iban̄a emi—Devil oyom ndinam idem emem nnyịn! Ndien enye ọfiọk nte ẹkemede nditọn̄ọ ndinam emi. Enye ọdiọn̄ọ mme mmeme ye mfịna nnyịn, ndien enye anam n̄kpọ etiene emi.
16. Ntak emi Satan adade unana nsịnudọn̄ nte n̄kpọekọn̄?
16 Ntak emi Devil adade unana nsịnudọn̄ nte n̄kpọekọn̄? Koro enye esiwak ndikụt unen. Idem owo oro ama ọkọyọ ata ubiọn̄ọ ye ukọbọ ekeme ndiduọ ke afia unana nsịnudọn̄. Satan oyom ndisụn̄i Jehovah Abasi nnyụn̄ ndomo ndiwụt nte ke imekeme ndiwọn̄ọde mme owo n̄kpọn̄ edinam n̄kpọ Esie. (Mme Nke 27:11; men Job 2:4, 5; Ediyarade 12:10 domo.) Edieke enye ekemede ndinam idem emem fi, enye ekeme ndinam etek ubọk ke utom oro anamde ọnọ Abasi; enye ekeme idem ndinam fi etre, akabarede edi owo oro mînamke utom aba ke ndikwọrọ eti mbụk Obio Ubọn̄.—2 Corinth 2:10, 11; Ephesus 6:11; 1 Peter 5:8.
17. Didie ke ndiọi utịp unana nsịnudọn̄ ẹkewụt idem ke eyo Moses?
17 Ẹkeme ndikụt idiọk utịp unana nsịnudọn̄ ke se iban̄ade nditọ Israel ke Egypt eset. Ke Moses ama eketịn̄ ikọ ọnọ Pharoah, idiọk andikara oro ama ototịm anam mbiomo ye mfịghe oro enye okodoride mmọ ọsọn̄ ubọk. Abasi ama ọdọhọ Moses ọsọn̄ọ etịn̄ ọnọ nditọ Israel nte ke imọ ke akpanikọ iyefak mmọ, inam mmọ edi ikọt Imọ, isio usụn̄ ubọhọ inọ mmọ inyụn̄ ida mmọ idi ke isọn̄ un̄wọn̄ọ. Moses ama asian nditọ Israel aban̄a emi. Edi Exodus 6:9 (NW) ọtọt ete: “Mmọ ikpan̄ke utọn̄ inọ Moses oto unana nsịnudọn̄ ye ọkpọsọn̄ ufụn.” Edinam emi ama anam Moses okop mmemidem nditịn̄ ikọ nnọ Pharaoh nte Jehovah okowụkde enye, tutu Jehovah anam Moses onịm ke akpanikọ onyụn̄ esịn udọn̄ ọnọ enye.—Exodus 6:10-13.
18. Ntak ọkpọsọn̄ udọn̄ odude ọnọ ikọt Abasi ndibiọn̄ọ unana nsịnudọn̄ oro Devil adade edi?
18 Satan kpa Devil otịm ọfiọk idiọk utịp oro unana nsịnudọn̄ ekemede ndinyene ke idem asan̄autom Abasi. Nte Mme N̄ke 24:10 (NW), ọdọhọde ete: “Nte afo omowụt idemfo nte ananade nsịnudọn̄ ke usen ukụt? Odudu fo eyekabade ekpri.” Sia nnyịn idude uwem ke ata utịt ini, nnyịn inyene ndikop odudu nnyụn̄ nsọn̄idem ke n̄kan̄ eke spirit. Ndin̄wana ye unana mfọnmma, mmeme, ye ndudue nnyịn oro ekemede ndidụri nnyịn mfiak edem ọdiọk ekem; edi ye Satan odomode ndida ndudue emi nnam n̄kpọ, nnyịn imoyom un̄wam.
Sọn̄ọ Beri Edem ke Uwa Christ
19. Nso idin̄wam nnyịn ndibiọn̄ọ unana nsịnudọn̄, ndien ntak-a?
19 Akwa un̄wam ke afan̄ emi edi enọ ufak oro Jehovah anamde odu ebe ke Jesus Christ. Nnyịn imekeme ndidi mme andikan ke ndisọn̄ọ mberi edem ke ufak oro. Edi n̄kpọ ndịk ndisụhọde ndutịm emi itie. Ih, nnyịn iyesụk idue, m̀mê inam idiọkn̄kpọ adan̄a nte isụk idide mme anana mfọnmma. Edi nnyịn inyeneke ndinana udọn̄ nnyụn̄ ntre, ikerede ke idotenyịn idụhe, ndien ke ntre iduọde idụk afia Satan. Nnyịn imọfiọk ite ke imenyene ọyọhọ uwa idiọkn̄kpọ. Ufak emi ekeme ndisio idiọkn̄kpọ efep. Edieke nnyịn idide eke “akwa otuowo,” ana nnyịn inyene ọyọhọ mbuọtidem inyụn̄ inịm ke akpanikọ ite ke imekeme ndiyet ọfọn̄idem nnyịn inam afia ke iyịp Eyenerọn̄.—Ediyarade 7:9, 14.
20. Didie ke Ediyarade 12:11 owụt ke ẹkeme ndikan akwa andinam owo anana nsịnudọn̄ oro, kpa Devil?
20 Ke Ediyarade 12:10 ẹkot Satan nte “enyeemi odoride nditọete nnyịn ikọ . . . emi odoride mmọ ikọ ke iso Abasi ke uwemeyo ye okoneyo.” Didie ke nnyịn ikeme ndikan utọ idiọk andidori owo ikọ ye ubi ubi andinam owo anana udọn̄ oro? Edi 12 Ufan̄ikọ 11 eke ibuotn̄wed oro ọnọ ibọrọ ete: “Mmọ ẹma ẹkan enye oto ke iyịp Eyenerọn̄ onyụn̄ oto ke se mmọ ẹtịn̄de nte ntiense. Mmọ imaha uwem mmọ tutu osịm n̄kpa.” Ntre oyom ikọt Jehovah ẹnyene ọyọhọ mbuọtidem ke uwa ufak, kpa iyịp Eyenerọn̄. Sọn̄ọ mmụm nsịnudọn̄ oro otode unọ ikọ ntiense kama, kpukpru ini buana eti mbụk Obio Ubọn̄ ye kpukpru owo oro afo ekemede.
21. Didie ke nnyịn ke unana edifiọk ikeme ndibuana ke utom Devil ndinam nditọ nnyịn ẹnana udọn̄?
21 Ndusụk ini, idem ye unana edifiọk, nnyịn imekeme ndibuana ke utom Devil ke ndinam nditọete nnyịn ẹnana udọn̄. Didie? Ke ndikabade n̄kụt ndudue n̄kaha nnọ mmọ en̄wen, ndiyom ekese nto mmọ en̄wen, m̀mê ndikụt idem ke edinen n̄kaha. (Ecclesiastes 7:16) Kpukpru nnyịn imenyene adan̄a ukeme ye mmeme. Ẹyak nnyịn ikûda mmọ inam n̄kpọ nte Devil anamde. Utu ke oro, ẹyak nnyịn itịn̄ ikọ nsịnudọn̄ nsịnudọn̄ iban̄a nditọete nnyịn ye ikọt Jehovah nte otu kiet oro ẹtịmde. Ẹyom nnyịn ikaiso isọn̄ọ kiet eken esịt inyụn̄ itre ndibụn̄ kiet eken esịt.
Ndinọ Nsịnudọn̄ nte Usen oro Asan̄ade Ekpere
22, 23. (a) Ntak emi nnyịn mîkpayakke inọ mbiowo kpọt ndidi ebiet ubọ nsịnudọn̄? (b) Didie ke ẹkeme ndisịn udọn̄ nnọ mme esenyịn ke esop Christian?
22 Nnyịn ikpenyene ndinam edi ata ubiere nnyịn kpukpru ini ndisịn udọn̄ nnọ kiet eken nte usen oro asan̄ade ekpere. Sịn udọn̄ nọ kiet eken ke uwụtn̄kpọ mbuọtidem fo ye ke ikọ ndọn̄esịt. Kpebe Jehovah ye Ọbọn̄ Jesus Christ ke afan̄ emi. Kûyak unọ mme mbiowo esop ikpọn̄ ndidi ebiet ubọ nsịnudọn̄. Kamse, mbiowo ke idemmọ ẹyom nsịnudọn̄. Mmọ ẹnyene mmeme ye ndo kpa nte otuerọn̄ eken, ndien mmọ ẹnyene ndiyọ ukem mme mfịna ke ndinọ se ubon mmọ ẹyomde ke idiọk ererimbot emi. Ke adianade ye oro, mmọ ẹnyene se Paul eketịn̄de aban̄a nte ọkpọsọn̄ ekikere kaban̄a kpukpru esop. (2 Corinth 11:28, 29) Ekemmọ edi ọkpọsọn̄ utom—mmọ ẹyom nsịnudọn̄.
23 Afo emekeme ndisịn udọn̄ akamba akamba ọnọ mbon oro ẹdude ke idaha usenyịn ke esop Christian ebe ke ndidiana ye mmọ. Do afo eyenam item oro ke Mme Hebrew 13:17: “Ekop uyo mme andida mbufo usụn̄, ẹnyụn̄ ẹsụk ibuot ẹnọ mmọ; koro mmọ ẹkpemede ẹyom ufọn ukpọn̄ mbufo, nte mmọemi ẹnyenede ndinọ Abasi ibat; man mmọ ẹnam utom ke idara, ẹkûnam ke mfụhọ; koro emi mîdorike udori inọ mbufo.”
24. Ke eyo unana nsịnudọn̄ emi, nso ke ana nnyịn isinam, ndien ntak-a?
24 Nnyịn idu uwem ke ini unana nsịnudọn̄. Esịt mme owo ke akpanikọ otịmede aban̄a ndịk ye edikama enyịn nse mme n̄kpọ eke ediwọrọde ọnọ ekondo, nte Jesus ekebemde iso etịn̄. (Luke 21:25, 26) Ye ata ekese mfịna oro ekemede ndida mfụhọ ye iduọesịt ndi, ẹkaiso “ẹsịn udọn̄ ẹnọ kiet eken, ẹdọdiọn̄ ẹnam emi, adan̄a nte mbufo ẹkụtde usen oro nte asan̄ade ekpere.” (NW) Ẹnam eti item apostle Paul ke 1 Thessalonica 5:11: “[Ẹkaiso] ẹsọn̄ọ kiet eken esịt, ẹnyụn̄ ẹnam kiet eken ọkọri, kpa nte mbufo ẹnanam.”
Didie ke Afo Ọkpọbọrọ?
◻ Ntak emi mme Christian ẹkpesịnde udọn̄ ẹnọ kiet eken, idem akande nte ẹkesinamde ke akpa?
◻ Didie ke ifiọk enyịn̄ Abasi edi n̄kpọ nsịnudọn̄ ọnọ ikọt Jehovah?
◻ Ke mme usụn̄ ewe ke nnyịn owo kiet kiet ikeme ndisịn udọn̄ nnọ kiet eken?
◻ Ntak anade nnyịn itre ndibuana ke utom Devil ndinam nditọete nnyịn ẹnana udọn̄-ọ?
[Ndise ke page 17]
Mbiowo ẹda iso ke ndisịn udọn̄ nnọ otuerọn̄ ke mme esop mmọ