Mmanie Ẹtọn̄ọ Ntak Ẹmana?

NTE kpukpru nti owo ẹka heaven? Ediwak owo ẹkere ntre, edi Jesus Christ ikonyịmeke. Ke etịn̄de ikọ ọnọ Nicodemus andikara mme Jew, emi akakade ebịne enye ke ndịbe ke okoneyo, Jesus ọkọdọhọ ete: “Baba owo kiet ikọdọkke ikodụk ke heaven.”—John 3:13.

Edi, Jesus ama owụt Nicodemus ete ke ini eyedi emi ndusụk owo ẹdinyenede ifet ndidụk ke Obio Ubọn̄ heaven. Kaban̄a ẹmi Jesus ọkọdọhọ ete: “Edieke owo mîmanake oto ke mmọn̄ ye spirit, enye ikemeke ndidụk ke Obio Ubọn̄ Abasi. Se itode ke obụkidem imana edi obụkidem: se inyụn̄ itode ke spirit imana edi spirit. Kûyịk ke emi ndọhọde fi nte, mbufo ẹnyene nditọn̄ọ ntak mmana.” Edi Nicodemus ama eyịk nte owo ekededi ekpekemede nditọn̄ọ ntak mmana.—John 3:1-9.

Ndusụk afo n̄ko emeyịk se ikọ Jesus ọkọwọrọde. Nte mme ikọ esie ẹkpeban̄a mbabuat ifiọk edikabade esịt oro ekese owo ẹmi ẹdọhọde nte iyọhọde ye edisana spirit Abasi esinyenede?

Mme Ntụk ye Ekikere

Ndusụk owo ẹdọhọ ẹte ke ndibiere mme owo ọtọn̄ọ ntak amana, se idide akpan n̄kpọ edi edinyene ntụk odudu spirit. Edi, esit ye ekikere ekeme ndibian̄a nnyin, akpan akpan ke ọkpọsọn̄ ntụk otụkde.—Jeremiah 17:9.

William Sargant, anam ndụn̄ọde mban̄a mme utịp ntụk ke ekikere, etịn̄ aban̄a ufọn “edidu ke ukpeme mban̄a mme edinịm ke akpanikọ oro ẹnyenede ke mme idaha ẹmi ntụk ẹdemerede ke ini emi mfre nnyịn ekemede ndibian̄a nnyịn.” Nte Sargant ọdọhọde, uwụtn̄kpọ kiet edi utịp ukwọrọikọ edifiak ndemede ye mme ndịghe ufen hell ikan̄. Anie mîkpoyomke nditọn̄ọ ntak mmana man aka heaven edieke n̄kukụre edimek efen ekpedide edibọ ufen nsinsi ndutụhọ? Sargant ọdọhọ ete ke idak mfiomo eke utọ ntụk oro, “eti ekikere edi se ẹtopde ẹduọk, ndammana n̄kọkibuot edi se ẹsịkde ẹnim kan̄a, ndien mbufa ekikere ye mme edinịm ke akpanikọ edi se ẹbọde ẹda ye unana mbat-ibuot.”—The Mind Possessed.

Ntre, ndien, didie ke owo ekeme ndifiọk m̀mê edinịm ke akpanikọ ke n̄kpọ aban̄ade editọn̄ọ ntak mmana edi se ẹkenyịmede ye “unana mbat-ibuot”? Usụn̄ ata ọniọn̄ edi ndiyak kpukpru n̄kpọ oro edisana spirit Abasi akanamde mme andiwet Bible ẹwet ọnọ ndausun̄. Ẹsịn udọn̄ ẹnọ mme Christian ndituak ibuot nnọ Abasi ‘ye odudu ikike mmọ’ onyụn̄ oyom mmọ ẹtịm ẹfiọk ẹte ke se mmimọ inịmde edi akpanikọ.—Rome 12:1, 2, NW; 1 Thessalonica 5:21.

Editọn̄ọ ntak mmana emeberede kiet ke otu mme ndyọ ndyọ ifet oro akanam ẹnọde owo onịm. Enye eyịre kiet ye ata n̄wọrọnda edinam ke ediyọhọ uduak Abasi. Ke adan̄aemi ofụri n̄kpọ ẹmi ẹdide akpanikọ, mme utọ mbụme nte mmọemi ẹdemerede: Mmanie ẹtọn̄ọ ntak ẹmana? Didie ke emi otịbe? Mme idotenyịn ewe ke ẹnịm mme utọ owo oro ke iso? N̄ko nte mmọ ikpọn̄ ke ẹdinyan̄a?

[Ndise ke page 3]

Nicodemus ama eyịk nte owo ekededi ekpekemede nditọn̄ọ ntak mmana