‘Ke Enyịn̄ Edisana Spirit’

“Mbufo ẹka ẹkenam kpukpru mme idụt ẹdi mbet Mi, ẹnịm mmọ baptism ẹsịn ke enyịn̄ . . . edisana spirit.”—MATTHEW 28:19.

1. Nso obufa ikọ ke John Andinịm owo baptism akakama ke ebuana ye edisana spirit?

KE ISUA 29 eke Eyo Nnyịn, John Andinịm owo baptism ama esịn ifịk ke Israel ọdiọn̄ usụn̄ ọnọ Messiah, ndien ke ini utom ukwọrọikọ esie, enye ama etịn̄ n̄kpọ oro ekedide obufa aban̄a edisana spirit. Nte ededi, mme Jew ẹma ẹfọfiọk se N̄wed Abasi usem Hebrew etịn̄de aban̄a spirit. Ekeme ndidi idem ama akpa mmọ, nte ededi, ke ini John ọkọdọhọde ete: “Ami nda mmọn̄ nnịm mbufo baptism, man ẹkabade esịt: edi Enyeemi etienede Mi ke edem . . . eyenịm mbufo baptism ke edisana spirit.” (Matthew 3:11) ‘Baptism ke edisana spirit’ ekedi obufa ikọ.

2. Nso obufa ikọ oro aban̄ade edisana spirit ke Jesus akanam ẹdiọn̄ọ?

² Enyeemi ekedide ekedi Jesus. Ke ini uwem esie eke isọn̄, Jesus ikenen̄ekede inịm owo baptism ke edisana spirit, okposụkedi enye eketịn̄de aban̄a spirit ediwak ini. Akande oro, ke enye ama ekeset, enye ama etịn̄ aban̄a edisana spirit ke obufa usụn̄ efen n̄ko. Enye ama asian mme mbet esie ete: “Mbufo ẹka ẹkenam kpukpru mme idụt ẹdi mbet Mi, ẹnịm mmọ baptism ẹsịn ke enyịn̄ Ete ye Eyen ye edisana spirit.” (Matthew 28:19) Ikọ oro “ke enyịn̄” ọwọrọ “ke ndidiọn̄ọ.” Baptism mmọn̄ ke ndidiọn̄ọ Ete, Eyen, ye edisana spirit ekenyene ndidi isio ye baptism ke edisana spirit. Enye n̄ko ekedi obufa ikọ aban̄ade edisana spirit.

Ẹnịm Baptism ke Edisana Spirit

3, 4. (a) Ini ewe ke akpa edina baptism ke edisana spirit akada itie? (b) Ke ẹsiode edinịm mmọ baptism ẹfep, didie ke edisana spirit akanam n̄kpọ ye mme mbet Jesus ke Pentecost eke 33 E.N.?

³ Amaedi baptism ke edisana spirit, Jesus ama ọn̄wọn̄ọ ọnọ mme mbet esie esisịt ini mbemiso enye ọdọkde ke enyọn̄ ete: “Ẹyenịm mbufo baptism ke edisana spirit ke usen ifan̄ mîbehe kan̄a.” (Utom 1:5, 8) Esisịt ini ke oro ebede ẹma ẹsu un̄wọn̄ọ oro. Edisana spirit ama osụhọde edidoro n̄kpọ nte mbet 120 ẹmi ẹkesopde idem ke ubetenyọn̄ ke Jerusalem nte Jesus, ke heaven, akanamde akpa edinịm baptism esie ke edisana spirit. (Utom 2:1-4, 33) Ye nso utịp? Mme mbet ẹma ẹkabade ẹdi ubak idem Christ eke spirit. Nte apostle Paul anamde an̄wan̄a, “ke spirit kiet ke ẹma ẹnịm kpukpru [mmọ] baptism ẹsịn ke ikpọkidem kiet.” (1 Corinth 12:13) Ke ukem ini oro, ẹma ẹbon mmọ ke spirit, ẹnyụn̄ ẹyet mmọ aran nte ndidem ye mme oku ini iso ke Obio Ubọn̄ Abasi eke heaven. (Ephesus 1:13, 14; 2 Timothy 2:12; Ediyarade 20:6) Edisana spirit n̄ko ama anam n̄kpọ nte akpa ufịkn̄kpọ ye idiọn̄ọ ubọn̄ ubọn̄ inyene ini iso oro, edi ikokụreke ke oro.—2 Corinth 1:21, 22.

⁴ Isua ifan̄ ke edem edem, Jesus ama ọdọhọ Nicodemus ete: “Edieke owo mîtọn̄ọke ntak imana, enye ikemeke ndikụt Obio Ubọn̄ Abasi . . . Edieke owo mîmanake oto ke mmọn̄ ye spirit, enye ikemeke ndidụk ke Obio Ubọn̄ Abasi.” (John 3:3, 5) Idahaemi owo 120 ẹma ẹfiak ẹmana. Ebede ke edisana spirit, ẹma ẹbon mmọ nte nditọ Abasi eke spirit, nditọete Christ. (John 1:11-13; Rome 8:14, 15) Kpukpru utom edisana spirit emi ke idemmọ ẹkpa owo idem ẹkan mme utịben̄kpọ. Akande oro, ke mîbietke mme utịben̄kpọ ini kiet, edisana spirit iketreke ke mme apostle ẹma ẹkekpan̄a edi akaiso ifịk ifịk ke usụn̄ emi tutu osịm usen nnyịn. Edi ifet Mme Ntiense Jehovah ndinyene ke otu mmọ akpatre ke otu mme andibuana ke idem Christ ẹmi ẹnịmde baptism ke spirit, ndien mmọemi ẹnam n̄kpọ nte “asan̄autom emi anamde akpanikọ, onyụn̄ enyenede ọniọn̄” ndinọ udia eke spirit ke edikem ini esie.—Matthew 24:45-47.

Ẹnịm Baptism “ke Enyịn̄ . . . Edisana Spirit”

5, 6. Didie ke mme akpa baptism ke edisana spirit akada okosịm baptism mmọn̄?

⁵ Edi nso kaban̄a baptism mmọn̄ ke enyịn̄ Ete, Eyen, ye edisana spirit oro ẹken̄wọn̄ọde? Mme akpa mbet oro ẹkenịmde baptism ke spirit ikanaha utọ baptism mmọn̄ oro. Mmọ ẹma ẹnana baptism mmọn̄ oro John okonịmde, ndien sia Jehovah ama okonyịme oro ke ini oro, ikanaha ẹfiak ẹnịm mmọ baptism aba. Edi ke Pentecost eke 33 E.N., ediwak ukpọn̄ ẹma ẹna obufa baptism mmọn̄. Didie ke emi okotịbe?

⁶ Edinịm owo 120 baptism ke edisana spirit akasan̄a ye ọkpọsọn̄ uyom emi okodụride ediwak owo edi. Idem ama akpa mmọemi ndikop mme apostle ẹtịn̄de ikọ ke usem emana mmọ, oro edi, ke mme usem esenidụt emi mbon oro ẹkedude ẹkekopde. Apostle Peter ama anam an̄wan̄a ete ke utịben̄kpọ emi ekedi uyarade nte ke Jesus, emi ẹkenamde eset ke n̄kpa ndien emi ama okosụhọde kemi etetie ke ubọk nnasia Abasi ke heaven ama an̄wan̄a spirit ọduọk. Peter ama esịn udọn̄ ọnọ mme andikpan̄ utọn̄ nnọ enye ete: “Yak ofụri ufọk Israel ẹtịm ẹfiọk ẹte, Abasi ama anam Enye edi Ọbọn̄ ye Christ, kpa Jesus emi mbufo ẹkewotde.” Enye ndien ama eberi ke ndidọhọ ete: “Mbufo ẹkabade esịt, ẹnyụn̄ ẹna baptism, kpukpru mbufo, ke enyịn̄ Jesus Christ, man ẹfen mme idiọkn̄kpọ mbufo; ndien mbufo ẹyebọ edisana spirit nte enọ.” N̄kpọ nte ukpọn̄ 3,000 ẹma ẹnyịme.—Utom 2:36, 38, 41.

7. Ke nso usụn̄ ke owo 3,000 ẹmi ẹkenade baptism ke Pentecost eke 33 E.N. ẹkena baptism ke enyịn̄ Ete, Eyen, ye edisana spirit?

⁷ Nte ẹkeme ndidọhọ ke mmọemi ẹkena baptism ke enyịn̄ (ke ndidiọn̄ọ) Ete, Eyen, ye edisana spirit? Ih. Okposụkedi Peter mîkọdọhọke mmọ ẹna baptism ke enyịn̄ Ete, mmọ ẹma ẹdọdiọn̄ọ Jehovah nte Ọbọn̄ Andikara, sia mmọ ẹkedide mme Jew eke obụk, kpa mbon idụt emi ẹkeyakde ẹnọ Enye. Peter ama ọdọhọ ete: ‘Ẹna baptism ke enyịn̄ Eyen.’ Ntre baptism mmọn̄ okowụt ke mmọ ẹdiọn̄ọ Jesus nte Ọbọn̄ ye Christ. Mmọ kemi ẹkedi mme mbet esie ẹnyụn̄ ẹnyịme ẹte ke edifen mme idiọkn̄kpọ ọtọn̄ọde ke ini oro ebe ke enye. Ke akpatre, baptism ekedi ke ndidiọn̄ọ edisana spirit, ndien ẹma ẹnam enye ke ndinam n̄kpọ mban̄a un̄wọn̄ọ oro nte ke mmọ ẹyebọ spirit nte enọ mfọn.

8. (a) Ke adianade ye baptism mmọn̄, ewe baptism ke mme Christian ẹmi ẹyetde aran ẹkena? (b) Mmanie ke ẹsiode owo 144,000 ẹfep ẹkena baptism mmọn̄ ke enyịn̄ edisana spirit?

⁸ Mbon oro ẹkenade baptism ke mmọn̄ ke usen Pentecost eke 33 E.N. ẹma ẹna baptism n̄ko ke spirit, ẹyetde aran nte ndidem ye mme oku ini iso ke Obio Ubọn̄ eke heaven. Nte ekemde ye n̄wed Ediyarade, mmọemi ẹdi sụk owo 144,000. Ntre ibat mbon oro ẹnade baptism ke edisana spirit ndien ke akpatre ‘ẹfịkde idiọn̄ọ’ nte mme ada-udeme Obio Ubọn̄ ẹdi 144,000 kpọt. (Ediyarade 7:4; 14:1) Nte ededi, kpukpru mbufa mbet—inamke n̄kpọ m̀mê idotenyịn mmọ edi nso—ẹna baptism ke mmọn̄ ke enyịn̄ Ete, Eyen, ye edisana spirit. (Matthew 28:19, 20) Nso, ndien, ke edina baptism ke enyịn̄ edisana spirit ọwọrọ ọnọ kpukpru Christian, ẹdide eke otu “ekpri otuerọn̄” m̀mê eke “mme erọn̄ en̄wen”? (Luke 12:32; John 10:16) Mbemiso ibọrọde oro, ẹyak nnyịn itịmfiọk mme usụn̄ edinam ke eyo mme Christian.

Mbun̄wụm Spirit

9. Nso utom edisana spirit idi akpan n̄kpọ inọ kpukpru Christian?

⁹ Akpan edinam kiet oro aban̄ade edisana spirit edi ndin̄wam nnyịn ndikọri mme edu Christian. Edi akpanikọ, ke ntak unana mfọnmma nnyịn ikemeke nditre ndinam idiọkn̄kpọ. (Rome 7:21-23) Edi ke ini nnyịn ke esịt akpanikọ, ituade n̄kpọfiọk, Jehovah efen nnyịn ke ntak uwa Christ. (Matthew 12:31, 32; Rome 7:24, 25; 1 John 2:1, 2) Akande oro, Jehovah odori enyịn nnyịn ndin̄wana mbiọn̄ọ ntụhọ nnyịn ndinam idiọk, ndien edisana spirit esin̄wam nnyịn ndinam emi. Paul ọkọdọhọ ete, “ẹsan̄a ke spirit, ndien mbufo idinamke se idọn̄de obụkidem.” (Galatia 5:16) Paul ama akaiso ndiwụt nte ke spirit ekeme ndision̄o mme mfọnn̄kan edu ke idem nnyịn. Enye ekewet ete: “Mbun̄wụm spirit edi ima, ye idatesịt, ye emem, ye ime, ye mfọnido, ye eti ido, ye edinam akpanikọ, ye ifụre ifụre ido, ye mfara ke idem.”—Galatia 5:22, 23.

10. Didie ke mbun̄wụm spirit ọkọri ke idem Christian?

¹⁰ Didie ke spirit anam Christian ekeme ndinyene utọ mbun̄wụm oro? Emi isitịbeke inikiet inikiet sia nnyịn ikam idide mme Christian ẹmi ẹyakde idem ẹnọ ẹnyụn̄ ẹnade baptism. Nnyịn inyene ndinam utom man inyene enye. Edi edieke nnyịn ibuanade ye mme Christian ẹmi ẹwụtde edu ẹmi, edieke ibọn̄de akam inọ Abasi iyom spirit esie ndin̄wam nnyịn ikọri akpan edu ẹmi, edieke nnyịn ifepde ndiọi nsan̄a inyụn̄ ikpepde Bible kaban̄a item ye nti uwụtn̄kpọ, do mbun̄wụm spirit ẹyekọri ke idem nnyịn.—Mme N̄ke 13:20; 1 Corinth 15:33; Galatia 5:24-26; Mme Hebrew 10:24, 25.

Ẹmek ke Edisana Spirit

11. Ke nso usụn̄ ke ẹmek mbiowo ke edisana spirit?

¹¹ Paul, ke etịn̄de ikọ ọnọ mbiowo Ephesus, ama anam ẹdiọn̄ọ utom edisana spirit en̄wen ke ini enye ọkọdọhọde ete: “Ẹtịm ẹse idem mbufo, ye ofụri otuerọn̄, ẹmi edisana spirit okonịmde mbufo ke mme andikpeme mmọ, ete ẹbọk mbonufọk Abasi, ẹmi Enye ekedepde ke iyịp Esie.” (Utom 20:28) Ih, ẹsimek mme esenyịn esop, m̀mê mbiowo ke edisana spirit. Ke nso usụn̄? Sia anade ebiowo oro ẹmekde osịm mme n̄kpọ oro ẹyomde, ẹmi ẹwụtde ke Bible eke odudu spirit. (1 Timothy 3:1-13; Titus 1:5-9) Mmọ ẹkeme ndikọri mme n̄kpọ oro ẹyomde mi n̄kukụre ye un̄wam edisana spirit. N̄ko-n̄ko, otu mbiowo oro otorode obufa ebiowo esibọn̄ akam oyom ndausụn̄ edisana spirit ndifiọk m̀mê enye osịm mme n̄kpọ oro ẹyomde mi m̀mê isịmke. Ndien ẹnam ataata edimek ke idak ndausụn̄ asan̄autom emi anamde akpanikọ onyụn̄ enyenede ọniọn̄, emi ẹyetde aran.

Di se Spirit Adade Usụn̄

12. Didie ke spirit ekeme ndinyene odudu ke idem nnyịn ebe ke Bible?

¹² Mme Christian ẹfiọk ẹte ke ẹkewet Edisana N̄wed Abasi ke idak odudu edisana spirit. Ntre, mmọ ẹdụn̄ọde n̄wed ẹmi man ẹnyene eti ibuot oro spirit ọnọde, nte mme ntiense Jehovah ẹmi ẹkedude mbemiso eyo mme Christian ẹkenamde. (Mme N̄ke 2:1-9) Mmọ ẹkot n̄wed ẹmi, ẹtie ẹkere, ẹnyụn̄ ẹyak mmọ ẹkpeme uwem mmọ. (Psalm 1:1-3; 2 Timothy 3:16) Spirit an̄wam mmọ ke ntre ‘ndidụn̄ọde nditụn̄ọ n̄kpọ Abasi.’ (1 Corinth 2:10, 13; 3:19) Ndikpeme mme asan̄autom Abasi ke usụn̄ emi edi akpan utom oro spirit Abasi anamde ke ini nnyịn.

13, 14. Nso ke Jesus akakama ke ndise mban̄a mme mfịna ke esop, ndien didie ke enye anam ukem oro mfịn?

¹³ N̄ko-n̄ko, ke n̄wed Ediyarade, Jesus emi ẹkenamde eset ọnọ mme etop ẹsọk esop itiaba ke Asia Minor. (Ediyarade, ibuot 2 ye 3) Ke esịt mmọ enye ayarade ete ke imọ ima idụn̄ọde mme esop inyụn̄ idiọn̄ọ idaha eke spirit mmọ. Ndusụk, emi enye okokụtde, ẹma ẹnịm eti uwụtn̄kpọ ke mbuọtidem. Ke esịt mmọ efen, mbiowo ẹma ẹyak edisiak isio n̄ka, oburobụt ido, ye ndebe ndebe edu ẹbiat otuerọn̄. Esop ke Sardis, ke ẹsiode ibat ibat ukpọn̄ ẹmi ẹkenamde akpanikọ ẹfep ama akpa ke n̄kan̄ eke spirit. (Ediyarade 3:1, 4) Didie ke Jesus ekese aban̄a mme mfịna ẹmi? Ye edisana spirit. Ke ini ọnọde esop itiaba oro item, etop Jesus ke idaha kiet kiet okosịm utịt ye ikọ emi: “Yak owo eke enyenede utọn̄ okop se spirit ọdọhọde mme ufọk Abasi.”—Ediyarade 2:7, 11, 17, 29; 3:6, 13, 22.

¹⁴ Mfịn, n̄ko, Jesus ọmọdụn̄ọde mme esop. Ndien ke ini enye okụtde mme mfịna, enye osụk ese aban̄a mmọ ebe ke edisana spirit. Spirit ekeme ndin̄wam nnyịn ndifiọk nnyụn̄ n̄kan mme mfịna nnennen nnennen ebe ke ndikot Bible. Un̄wam ekeme n̄ko ndidi ebe ke n̄wed Bible emi asan̄autom emi anamde akpanikọ onyụn̄ enyenede ọniọn̄, emi ẹyetde aran ke spirit emịn̄de. Mîdịghe enye ekeme ndito mbiowo esop oro ẹmekde ke spirit. Edi sededi, edide item enyene owo kiet kiet m̀mê enyene esop ke ofụri ofụri, nte nnyịn imanam ikọ Jesus ẹmi: “Yak owo eke enyenede utọn̄ okop se spirit ọdọhọde mme ufọk Abasi”?

Spirit ye Utom Ukwọrọikọ

15. Didie ke spirit akanam n̄kpọ ye Jesus kaban̄a utom ukwọrọikọ?

¹⁵ Ke idaha kiet ke ini Jesus ọkọkwọrọde ikọ ke synagogue ke Nazareth, enye ama owụt utom efen oro spirit anamde. N̄wetnnịm n̄kpọ oro asian nnyịn ete: “Ndien ke Enye okûbọrede n̄wed, okụt itie emi ẹwetde ẹte, Spirit Jehovah odoro Mi ke idem, koro Enye emeyet Mi aran onịm, ete, n̄kwọrọ eti mbụk nnọ nditọ ubuene: Enye ọmọdọn̄ Mi, ete, n̄kwọrọ uwọrọ-ufụn nnọ mbuotekọn̄, nnyụn̄ n̄kwọrọ edikụt usụn̄ nnọ mme nnan, nnyụn̄ nsana mmọemi ẹfịkde nyak, nnyụn̄ n̄kwọrọ isua mfọnido Jehovah. Enye ọtọn̄ọ ndidọhọ mmọ, ete, Ikọ n̄wed Abasi emi omosu ke utọn̄ mbufo mfịn emi.” (Luke 4:17, 18, 21; Isaiah 61:1, 2) Ih, ẹkeyet Jesus aran ke edisana spirit ndikwọrọ eti mbụk.

16. Ke akpa isua ikie, didie ke edisana spirit ekenyene ebuana akamba akamba ke edikwọrọ eti mbụk?

¹⁶ Esisịt ini mbemiso n̄kpa esie, Jesus ama ebemiso etịn̄ aban̄a akwa utom ubịnikọt ukwọrọikọ oro mme anditiene enye ẹdinamde. Enye ọkọdọhọ ete: “Ndien ẹnyene ndibem iso n̄kwọrọ gospel nnọ kpukpru mme idụt.” (Mark 13:10) Ikọ ẹmi ẹma ẹnyene akpa edisu ke akpa isua ikie, ndien udeme emi edisana spirit ekenyenede ama otịm odot. Ekedi edisana spirit akada Philip usụn̄ ndikwọrọ ikọ nnọ eunuch otode Ethiopia. Edisana spirit akada Peter usụn̄ ebịne Cornelius, onyụn̄ edi edisana spirit ọkọnọ ndausụn̄ ete ẹsio Paul ye Barnabas ke Antioch ẹdọn̄ ẹka nte mme apostle. Ke ukperedem, ke ini Paul okoyomde ndikwọrọ ikọ ke Asia ye Bythinia, edisana spirit ke ndusụk usụn̄ ama akpan enye. Abasi okoyom utom unọ ikọ ntiense atara osịm Europe.—Utom 8:29; 10:19; 13:2; 16:6, 7.

17. Mfịn, didie ke edisana spirit enyene ebuana ke utom ukwọrọikọ?

¹⁷ Mfịn, edisana spirit enyene udeme akamba akamba ke utom ukwọrọikọ. Ke n̄kaiso edisu oro Isaiah 61:1, 2 osude, spirit Jehovah ama eyet nditọete Jesus aran onịm ndikwọrọ ikọ. Ke akpatre edisu oro Mark 13:10 osude, mbon oro ẹyetde aran mi, emi akwa otuowo ẹn̄wamde, ẹmekwọrọ eti mbụk ke ataata usụn̄ ke “kpukpru mme idụt.” (Ediyarade 7:9) Ndien spirit ọnọ kpukpru mmọ ibetedem ke ndinam emi. Nte ekedide ke akpa isua ikie, enye eberede mme efakutom onyụn̄ ada usụn̄ ke ofụri n̄kọri utom oro. Enye ọsọn̄ọ mme owo idem, an̄wamde mmọ ndikan bụt nnyụn̄ n̄kọri usọ unọ ukpep mmọ. Akande oro, Jesus ama asian mme mbet esie ete: “Ẹyenyụn̄ ẹda mbufo ẹwọrọ ke iso mme andikara ye ndidem kaban̄a Mi, kpan̄ mbufo ẹdi ntiense ẹnọ mmọ ye mme Gentile. Edi ke ini ẹdiyakde mbufo ẹnọ, ẹkûtịmede esịt ẹkere, m̀mê ẹdidọhọ didie, m̀mê ẹditịn̄ nso . . . Koro idịghe mbufo ẹtịn̄ ikọ, edi spirit Ete mbufo esịne mbufo ke esịt etịn̄.”—Matthew 10:18-20.

18, 19. Ke nso usụn̄ ke spirit adiana ye n̄wanndọ ke ndinọ mbon nsụhọdeidem ikot ete “ẹdibọ mmọn̄ uwem ke ikpîkpu”?

¹⁸ Ke n̄wed Ediyarade, Bible afiak ọsọn̄ọ etịn̄ nte edisana spirit abuanade ke utom ukwọrọikọ. Do apostle John ọtọt ete: “Spirit ye n̄wanndọ ẹdọhọ ẹte, Di. Owo eke onyụn̄ okopde, yak enye ọdọhọ ete, Di. Owo eke itọn̄ asatde, yak enye edi. Owo eke amade, yak edi edibọ mmọn̄ uwem ke ikpîkpu.” (Ediyarade 22:17) N̄wanndọ, emi nsụhọ ke otu owo 144,000 ẹmi ẹsụk ẹdude ke isọn̄ ẹdade ẹban̄a, ẹnọ kpukpru owo ikot ndin̄wọn̄ mmọn̄ uwem ke ikpîkpu. Edi tịmfiọk, ete ke spirit ọdọhọ n̄ko ete “Di.” Ke nso usụn̄?

¹⁹ Ke emi edide etop oro otu n̄wanndọ emi ọkwọrọde—emi akwa otuowo eke mme erọn̄ en̄wen ẹn̄wamde mfịn—oto Bible, emi ẹkewetde ke idak ndausụn̄ odudu edisana spirit. Ndien ukem spirit oro emeberede esịt ye ekikere otu n̄wanndọ emi ndidiọn̄ọ Ikọ Abasi eke odudu spirit nnyụn̄ nnam enye an̄wan̄a mmọ efen. Mbon oro ẹnade baptism nte mbufa mbet Jesus Christ ẹkop inemesịt ndibọ mmọn̄ uwem emi ke ikpîkpu. Ndien mmọ ẹkop nduaidem ndidiana ye spirit ye n̄wanndọ ke ndidọhọ mbon efen ẹte, “Di.” Mfịn, se iwakde ikan owo miliọn inan̄ ẹbuana ye spirit ke ndinam utom emi.

Ndidu Uwem Ekekem ye Baptism Nnyịn

20, 21. Didie ke nnyịn ikeme ndidu uwem ekekem ye baptism nnyịn ke enyịn̄ edisana spirit, ndien didie ke nnyịn ikpese baptism emi?

²⁰ Baptism ke enyịn̄ edisana spirit edi an̄wan̄wa uyarade nte ke nnyịn imọdiọn̄ọ edisana spirit inyụn̄ inyịme udeme oro enye enyenede ke mme un̄wọn̄ọ Jehovah. Enye ọwọrọ nte ke nnyịn iyediana kiet ye spirit, inamke n̄kpọ ndomokiet ndibiọn̄ọ edinam esie ke otu ikọt Jehovah. Ntem, nnyịn imọdiọn̄ọ inyụn̄ idiana kiet ye asan̄autom emi anamde akpanikọ onyụn̄ enyenede ọniọn̄. Nnyịn imadiana kiet ye ndutịm mbiowo esop. (Mme Hebrew 13:7, 17; 1 Peter 5:1-4) Nnyịn idu uwem ke eti ibuot eke spirit, idụhe ke eti ibuot obụkidem, imonyụn̄ iyak spirit obot edu nnyịn, inamde enye ototịm ebiet eke Christ. (Rome 13:14) Ndien nnyịn ke ofụri esịt imadiana ye spirit ye n̄wanndọ ke ndidọhọ ediwak miliọn owo ẹmi kan̄a ẹdiyerede ikot ite, “Di.”

²¹ Edi akpan n̄kpọ didie ntem ndina baptism ‘ke enyịn̄ edisana spirit’! Edi, nso edidiọn̄ ke emi ekeme ndida ndi ntem! Ibat mbon oro ke ntre ẹnade baptism akpakam akaiso ndikọri. Ndien kpukpru nnyịn ikpakam ikaiso ndidu uwem ekekem ye se baptism oro ọwọrọde, nte nnyịn inamde utom inọ Jehovah inyụn̄ ikade iso “[ndi]nyene ifiopesịt ke spirit.”—Rome 12:11.

Nso ke Afo Eti Aban̄a Edisana Spirit?

◻ Ke nso usụn̄ ke edisana spirit akanam utom ifịk ifịk ke Pentecost eke 33 E.N.?

◻ Didie ke nnyịn ikeme ndision̄o mbun̄wụm spirit?

◻ Ke mme usụn̄ ewe ke ẹmek mbiowo ke edisana spirit?

◻ Didie ke Jesus ese aban̄a mme mfịna ke esop ebe ke edisana spirit?

◻ Didie ke spirit enyene ebuana akamba akamba ke utom ukwọrọikọ?

[Ndise ke page 15]

Baptism oro Peter ọkọkwọrọde ekedi n̄ko ke enyịn̄ Ete ye edisana spirit

[Ndise ke page 17]

Spirit enyene ebuana akamba akamba ke edikwọrọ eti mbụk