“To ke Ufọk Sịm Ufọk”
“KPUKPRU usen ke temple ye to ke ufọk sịm ufọk mmọ ẹkaiso ye unana ndopuyo ndikpep nnyụn̄ ntan̄a eti mbụk mban̄a Christ, kpa Jesus.” (Utom 5:42, NW) Mme Ntiense Jehovah ẹsiwak ndida itien̄wed emi ye enyeoro odude ke Utom Mme Apostle 20:20 ndisọn̄ọ isọn̄ N̄wed Abasi kaban̄a utom ukwọrọikọ mmọ eke enyịnusụn̄ ke enyịnusụn̄. Nte ededi, ke Germany, ndusụk mme andikụt ndudue nnọ Mme Ntiense Jehovah ẹmefan̄a usụn̄ oro New World Translation esịnde mme ufan̄ikọ ẹmi, ẹdọhọde ẹte ke enye esịn akpasarade usem Greek nte mînenke.
Nte utọ ikọ ẹmi enyene nsọn̄ọ? Ndomo esisịt. N̄kpọ kiet edi-o, ke nsụhọde n̄kaha mme edikabade Bible usem Germany itiokiet efen ẹsịn ufan̄ikọ ẹmi ukem ntre. Ke otu mmọemi ẹdi Zürcher Bibel emi ẹfiakde ẹdụn̄ọde ye “New Testaments” emi Rupert Storr, Franz Sigge, ye Jakob Schäfer ẹwetde (emi N. Adler afiakde odụn̄ọde). Ediwak edikabade eke Ikọmbakara ẹnyịme.
Eyen ukpepn̄kpọ Germany oro Hans Bruns owụt nte edikabade esie oro, “ke ufọk ke ufọk” ke Utom Mme Apostle 5:42 enende, ọdọhọde ete: “Nte ekemde ye akpasarade uwetn̄kpọ, etie nte mmọ ẹkesisan̄a ke ufọk ke ufọk.” Ih, owo idaha katʼ oiʹkon, kpa akpasarade itien̄wed utịn̄ikọ ke itien̄wed emi ke usụn̄ifiọk ediwụt akpan ebiet (“ke ufọkidụn̄”) edi ke usụn̄ifiọk eke edisasuan, ọwọrọde ke ata ata usụn̄ “ke ufọk kiet kiet.” (Ẹkụt orụk oro adade ọnọ uwak n̄kpọ, katʼ oiʹkous, ọwọrọde “ke kpukpru ufọk,” ke Utom Mme Apostle 20:20.) Nditọ ukpepn̄kpọ eken utọ nte Heinz Schürmann, ọsọn̄ọ edisasuan ukabade oro ẹkabarede mme ikọ ẹmi. Horst Balz ye Gerhard Schneider, mme andiwet n̄wed ukabade ikọ oro anamde Obufa Testament an̄wan̄a, ẹdọhọ ẹte ke ẹkeme ndisịn ikọ emi nte “ ke ufọk ke ufọk.” Ediwak n̄wed ndụn̄ọde Ikọmbakara n̄ko ẹtịn̄ ẹban̄a ufan̄ikọ emi ukem ntre.
Do, ini kiet efen, New World Translation amakan en̄wan mbon ukụt ndudue. Ke edide akpan n̄kpọ akan, ana in̄wan̄în̄wan̄ nte ọsọn̄idem ntak Bible odu ọnọ utom ukwọrọikọ eke ufọk-ke-ufọk. (Men Matthew 10:11-14; 24:14 domo.) Mme Ntiense Jehovah ẹnyene ifet ndikpebe nsan̄a mmọ eke akpa isua ikie ke afan̄ emi.