Ibuot Duopenan̄

‘Ọyọbọ Edidiọn̄ Tutu Unanake Baba N̄kpọ Kiet’

1, 2. (a) Ewe edidiọn̄ ke nnyịn owo kiet kiet ikpama ndibọ? (b) Edisu ntịn̄nnịm ikọ ewe anam ikeme ndibọ ufọn emi?

NNYỊN idu uwem ke ini ubiereikpe ye ini edidiọn̄. Ini emi ido ukpono abiarade fapfap, ye ini emi ẹfiakde ẹtọn̄ọ ido ukpono akpanikọ. Imenen̄ede inịm ke akpama ndibọ mme edidiọn̄ ye ufọn oro edifiak ntọn̄ọ ido ukpono akpanikọ adade edi, ye enye oro enye edidade edi ke ini iso. Nso ikpanam enịm ke emekeme ndibọ mme edidiọn̄ emi? Ntịn̄nnịm ikọ oro okosude ọyọhọ ọyọhọ esisịt ini ke “mme akpatre usen” ẹma ẹketọn̄ọ ke 1914 akpanam enịm. (2 Timothy 3:1) Malachi ọkọdọhọ ete: “‘Sese! Mmosio isụn̄utom mi ndọn̄, enye oyonyụn̄ ọdiọn̄ usụn̄ mbemiso ami ndide. Ndien ata Ọbọn̄ [Jehovah] emi mbufo ẹyomde, eyedi temple Esie ke mbuari, ye isụn̄utom ediomi emi adatde mbufo esịt. Sese! Enye iditreke ndidi,’ Jehovah mme udịm ọdọhọ.”—Malachi 3:1.

² Ntịn̄nnịm ikọ emi enen̄ede ebehe fi, ndien enye odu ke Malachi emi edide akpatre ke otu n̄wed prọfet 12 oro. Nte idade nneme emi ikeberi, ti ete ke se Malachi ekewetde enen̄ede edi akpan n̄kpọ. N̄wed Malachi ọdọn̄ọ akpan n̄kpọ emi ẹdin̄wamde fi ye ikọt Jehovah eken ẹbọ edidiọn̄ “tutu mbufo inanake baba n̄kpọ kiet.” (Malachi 3:10) Ẹyak itịm idụn̄ọde se idude ke n̄wed Malachi ibuot 3.

INI EDINAM IKỌT ABASI ẸSANA

3. Nso iketịbe inọ ikọt Abasi eke eset oro akanamde ẹmek “Israel Abasi” ndida itie mmọ?

³ N̄kpọ nte isua ikie ition ke Malachi ama akakpa, Christ emi adade ke ibuot Jehovah (kpa “isụn̄utom ediomi” Abraham) ama edi ata ata temple ke Jerusalem ndibiere ikpe nnọ mbon oro ẹkedụkde ediomi ye Abasi. Edi Jehovah ama esịn idụt oro sia mmọ mîkodotke aba ndibọ mme edidiọn̄ esie. (Matthew 23:37, 38) Se iketịbede ke isua 70 E.N. owụt emi. Ntre, Abasi ama emek owo 144,000, emi ẹkotde “Israel Abasi,” osio ke kpukpru idụt man ẹda itie mmọ. (Galatia 6:16; Rome 3:25, 26) Edi ntịn̄nnịm ikọ Malachi emi ikosụho kan̄a ima. Enye ekenyene ndisu n̄ko ke eyo nnyịn emi, onyụn̄ enen̄ede enyene n̄kpọ ndinam ye mme edidiọn̄ ini iso emi Abasi ‘edin̄wan̄ade ọnọ mme owo tutu mmọ inanake baba n̄kpọ kiet.’

4. Ewe mbụme ke ẹkenyene ndibọrọ ke ẹma ẹkedori Jesus ke ebekpo ke 1914?

⁴ Ntịn̄nnịm ikọ Bible emi osude owụt ke ẹma ẹdori Jesus Christ nte Edidem Obio Ubọn̄ Jehovah ke heaven ke 1914. Ini ama edikem ndien Jesus ndinam ẹfiọk otu Christian oro ẹnemde Abasi esịt. Mmanie ikowụt ke imasana ke enyịn Abasi? Afo emekeme ndikụt ibọrọ mbụme emi ke ikọ Malachi emi ọdọhọde ete: “Edi anie edikeme ndiyọ usen emi enye edidide, anie edinyụn̄ ekeme ndisọn̄ọ nda ke ini enye ọbiọn̄ọrede? Koro enye editie nte ikan̄ owo emi etemde silver anam asana.” (Malachi 3:2) Ini ewe ke Jehovah ekedi “temple” esie edibiere ikpe ndien didie ke enye akanam emi?

5, 6. (a) Ke ini Jehovah ekedide edise temple esie eke spirit, nso ke enye okokụt ke otu ediwak mbon oro ẹkedọhọde ke ituak ibuot inọ enye? (b) Nso ke okoyom ẹnam ye ikọt Abasi oro ẹyetde aran?

⁵ Imọdiọn̄ọ ke idịghe ata ata temple ke Abasi ekedi sia ẹma ẹsobo akpatre temple oro ẹkesituakde ibuot ẹnọ Abasi ẹfep ke isua 70 E.N. Edi Jehovah ekedi temple eke spirit, oro edi, ndutịm emi ẹnamde man mme owo ẹkeme ndituak ibuot nnọ enye ke ntak uwa ufak Jesus. (Mme Hebrew 9:2-10, 23-28) Mme ufọkabasi Christendom ikemeke-keme ndidi temple emi sia mmọ ẹsịnede ke otu ido ukpono emi ẹduọkde iyịp, ẹsịnde idem ke ukara, ẹnyụn̄ ẹkpepde mme owo nsu utu ke ndinam ẹtuak ibuot ẹnọ Abasi ke nnennen usụn̄. Jehovah ama ‘awara akabade edi ntiense’ ke idiọkn̄kpọ mmọ, ndien ọmọfiọk ke ikpe oro enye ekebierede ọnọ mmọ ama enen. (Malachi 3:5) Edi ke Obio Ubọn̄ Abasi ama ọkọtọn̄ọ ndikara, ẹma ẹkụt mme ata Christian oro ẹnamde utom ke temple eke spirit ẹwụtde ke mmimọ imọsọn̄ọ ida ye Abasi kpa ye n̄kpọsọn̄ idomo. Okosụk oyoyom ẹnam mbon oro ẹyetde aran mi ẹsana n̄ko. Se prọfet 12 oro ẹkewetde ama owụt ke emi eyetịbe, sia ikọ mmọ ọdọn̄ọ ndinem un̄wọn̄ọ emi ẹban̄ade nte ẹnamde mme asan̄autom Abasi ẹsana ke ido uwem ye ke n̄kan̄ eke spirit. Malachi ama ebem iso etịn̄ ke mbon oro Jehovah ‘edidụhọrede nte emi ẹdụhọrede gold ye silver ẹyekabade ẹdi mbon oro ẹwade uwa enọ ke edinen ido ẹnọ Jehovah.’—Malachi 3:3.

⁶ Imenyene ata akamba uyarade nte ke ọtọn̄ọde ke 1918 ka iso, Jehovah ama ọtọn̄ọ ndinam mme Christian oro ẹyetde aran ẹsana—ke edu, ke utuakibuot, ye ke ukpepn̄kpọ.a Mmọ ye “akwa otuowo” emi ẹkedide ẹdidiana ye mmọ nte ini akakade ẹnen̄ede ẹbọ ufọn ẹto emi. (Ediyarade 7:9) Mmọ ẹka iso ẹdiana kiet ẹwa “uwa enọ ke edinen ido ẹnọ Jehovah,” kpa uwa oro ‘enemde Jehovah esịt.’—Malachi 3:3, 4.

7. Mme mbụme ewe ke ikpada idụn̄ọde itie ebuana nnyịn ye Abasi?

⁷ Se ẹtịn̄de mi aban̄a ikọt Abasi nte otu, edi nso kaban̄a nnyịn owo kiet kiet? Afo emekeme ndibụp idemfo ete: ‘Ndi enyene edu ye edinam oro akpanade n̄kpụhọde? Ndi mmokụt ke oyom nnam edu uwem mi asana nte Jehovah anamde mbon oro enye eyetde aran ẹsana?’ Nnyịn imokụt ke prọfet 12 oro ẹtịn̄ nti ekikere ye edu emi oyomde inyene ẹnyụn̄ ẹtịn̄ ndiọi edu ye edinam emi ikpefepde. Se mmọ ẹketịn̄de emi anam ọfiọk se Jehovah ‘oyomde oto fi.’ (Micah 6:8) Ikọ oro, “fi” owụt ke akpana nnyịn owo kiet kiet idụn̄ọde ise m̀mê odu ebiet ekededi emi oyomde ika iso inam ukpụhọde.

“ẸDOMO MI ẸSE”

8. Nso ke Jehovah ọdọhọ ikọt esie ẹnam?

⁸ Kere ban̄a n̄kpọ en̄wen emi Jehovah etịn̄de ke Malachi ibuot 3, ufan̄ikọ 10. Enye ọdọhọ nnyịn mi ete: “‘Ẹda kpukpru ọyọhọ mbak duop ẹdinịm ke ufọk ubonn̄kpọ, man udia okpodu ke ufọk mi; ẹnyụn̄ ẹda emi ẹdomo mi ẹse,’ Jehovah mme udịm ọdọhọ, ‘m̀mê ami ndiberekede window heaven nnọ mbufo nnyụn̄ n̄n̄wan̄a edidiọn̄ nnọ mbufo tutu mbufo inanake baba n̄kpọ kiet.’” Ẹtịn̄ ikọ emi ẹnọ ofụri ikọt Abasi. Edi, ndi emekere ke ẹtịn̄ n̄ko ẹnọ fi?

9. Nso orụk enọ ye ọyọhọ mbak duop ke afo ekeme ndinọ Jehovah?

⁹ Didie ke afo ekeme ndinọ Jehovah “ọyọhọ mbak duop”? Owo idọhọke fi awa ata ata uwa onyụn̄ ọnọ ata ata mbak duop nte emi Ibet okoyomde ẹnam. Abasi oyom ndamban̄a uwa idahaemi. Nte ikenemede ke Ibuot 13, Paul ọkọdọhọ ke ukwọrọikọ emi afo esikwọrọde edi uwa oro. (Hosea 14:2) Ekem Paul ama etịn̄ aban̄a orụk uwa en̄wen ete: “Ẹkûfre ndinam eti n̄kpọ ndinyụn̄ mbuana n̄kpọ [obụkidem] ye mbon en̄wen, koro orụk uwa emi enen̄erede enem Abasi esịt.” (Mme Hebrew 13:15, 16) Emi owụt ke “ọyọhọ mbak duop” emi ẹtịn̄de ẹban̄a ke Malachi 3:10 edi ata ata enọ ye ndamban̄a enọ. Nte Christian oro ama akana baptism, afo amayak idem ofụri ofụri ọnọ Jehovah. Edi ọyọhọ mbak duop edi ndusụk ke otu n̄kpọ fo oro ekemede ndinọ Jehovah, m̀mê oro adade anam utom esie. Emi esịne ini, odudu, inyene, ye se ededi oro etịpde esịn man ẹda ẹnam n̄kpọ Jehovah.

10. Ke nso eti usụn̄ ke afo ekeme ‘ndidomo Jehovah nse’?

¹⁰ Enen̄ede odot ọnọ Jehovah utọ ndamban̄a ọyọhọ mbak duop emi ke ima ye ke ofụri esịt. Oyom ọsọsọp anam oro. Idịghe ọmọfiọk ke akwa usen Jehovah ekpere etieti, “onyụn̄ enen̄ede enyene uten̄e.” (Joel 2:1, 2, 11) Mme owo ẹyekpan̄a etieti usen oro! Afo emekeme ndiyere ikot oro Abasi ọnọde fi. Jehovah ọdọhọ ‘odomo imọ ese.’ Nnyịn imọfiọk ke idụhe owo ndomokiet emi ekpedededei odomo Jehovah ete ise m̀mê Enye edi se ẹberide edem. (Mme Hebrew 3:8-10) Edi enyene eti usụn̄ emi afo ekemede ndisụhọde idem ndomo enye nse. Didie? Enye ọdọhọ ke iyọdiọn̄ fi. Ke ini okopde item Abasi, ọwọrọ omodomo enye idaha oro ese, nte n̄kpọ eke obụpde ete, ‘Ndi enye oyosụk ọdiọn̄ mi?’ Ndien enye iditreke ndidiọn̄ fi nte enye ọkọn̄wọn̄ọde. Mmọdo, Abasi ndiyak fi ‘odomo imọ ese’ ekpenyene ndisọn̄ọ mbuọtidem fo nte ke enye iditreke ndinen̄ede ndiọn̄ fi.

11, 12. Ewe mme edidiọn̄ oro Jehovah ọnọde ikọt esie ke afo etiene ọbọ?

¹¹ Afo omokụt ke ikọt Jehovah ẹsinọ enye se mmọ ẹnyenede ẹnyụn̄ ẹwa ndamban̄a uwa ẹnọ enye. Ndien Jehovah aman̄wan̄a ‘edidiọn̄ ọnọ mmọ tutu mmọ inanake baba n̄kpọ kiet.’ Ekeme ndidi omokụt ke nte Mme Ntiense Jehovah ẹdiọn̄de-diọn̄ ẹwak toto ke ntọn̄ọ ntọn̄ọ iduọk isua 1900 tutu esịm emi owụt ke Abasi enen̄ede ọdiọn̄ mmọ. Ekeme ndidi omokụt n̄ko ke “mme ntotụn̄ọ n̄kpọ Abasi” ẹnen̄ede ẹn̄wan̄a ikọt esie idahaemi. (1 Corinth 2:10; Mme N̄ke 4:18) Edi kere ise: Didie ke afo ke idemfo ọbọ mme edidiọn̄ emi?

¹² Ekeme ndidi ama odu ini emi afo ekesitienede aka ufọkabasi, mîdịghe ekeme ndidi ibịghike ọkọtọn̄ọ ndidụk mbono esop Mme Ntiense Jehovah. N̄kpọ ifan̄ ke Bible ẹken̄wan̄a fi ini oro? Men mme n̄kpọ oro ọfiọkde idahaemi onyụn̄ ekemede ndida N̄wed Abasi nsọn̄ọ domo ye se ọkọfiọkde ini oro. Mîdịghe, kere ban̄a ntotụn̄ọ n̄kpọ oro edide edifiọk, emi esịnede mme ntịn̄nnịm ikọ oro ẹsụk ẹsude idahaemi. Kere n̄ko adan̄a nte adade mme item Bible odu uwem. Emenen̄ede anam n̄kọri! Afo n̄ko emekeme nditịn̄ nte apostle Peter eketịn̄de ete: “Ẹdọdiọn̄ ẹsọn̄ọ ikọ mme prọfet ẹnọ nnyịn.” (2 Peter 1:19) Oro ọwọrọ ke afo edi owo oro “Jehovah ọnọde ukpep,” nte ke afo esịne ke otu ata mme Christian, ye nte ke omoyom ndinam n̄kpọ Jehovah ke nsinsi. (Isaiah 54:13) Ntem, afo emekeme ndidọhọ ke enye enen̄ede ọdiọn̄ fi.

ENYỊN̄ FO KE N̄WED UWEM

13. Nso ke owo akpanam man ẹwet enyịn̄ esie ke n̄wed editi Abasi?

¹³ Ẹtịn̄ ẹban̄a mme edidiọn̄ Jehovah en̄wen ke Malachi 3:16 ẹte: “Ke ini oro mbon oro ẹbakde Jehovah ẹneme nneme ye kiet eken, owo kiet kiet ye ufan esie, ndien Jehovah akpan̄ utọn̄ okop. Ndien ẹwet n̄wed editi ke iso esie ẹnọ mbon oro ẹbakde Jehovah ye mbon oro ẹkerede ẹban̄a enyịn̄ esie.” Mbon oro ẹyetde aran ye akwa otuowo ‘ẹbak Jehovah’ ẹnyụn̄ ẹten̄e enye. Ndi ukereke ke edi ata n̄kpọ ukpono ndidi kiet ke otu Mme Ntiense Jehovah, kpa mbon inemesịt emi ẹkerede ẹban̄a enyịn̄ Jehovah ẹnyụn̄ ẹtorode enye ke ofụri ererimbot? Fiọk ete ke Jehovah ifreke kpukpru se anamde ke utom esie!—Mme Hebrew 6:10.

14. Didie ke prọfet 12 oro ẹn̄wam fi ọfiọk mme ido ye edinam emi Jehovah asuade?

¹⁴ Edi nso ke afo akpanam man ẹwet enyịn̄ fo ke “n̄wed editi” emi ẹsụk ẹwetde idahaemi ke iso Jehovah? Kûfre nti item emi ẹdude ke n̄wed prọfet 12 oro. Mmọ ẹnam nnyịn ifiọk mme ido ye edu emi Jehovah asuade. Ke uwụtn̄kpọ, mme prọfet oro ẹnam ifiọk mme edinam emi mîkemke ye ndinen edumbet Abasi, emi ẹnyụn̄ ẹkemede ndibiat uwem nnyịn, utọ nte “use” ye “obukpo ido.” (Hosea 4:12; 6:9) Abasi asasua mbon emi ẹbian̄ade m̀mê ẹkaride n̄kari ye nsan̄andọ mmọ, m̀mê mbon eken ke ubon. (Malachi 2:15, 16) Jehovah ama ọnọ mme prọfet oro odudu spirit esie ẹsọn̄ọ ẹtịn̄ ke imọ isasua kpukpru orụk afai. (Amos 3:10) Enye ama anam mmọ ẹtịn̄ n̄ko ke inaha ẹtụk m̀mê ẹbian̄a owo ke mbubehe ekededi oro ẹnamde. (Amos 5:24; Malachi 3:5) N̄wed 12 oro ẹsọn̄ọ ẹtịn̄ ke ikpanaha mbon oro ẹnọde odudu ẹten̄e owo enyịn m̀mê ẹyom idiọk udori.—Micah 7:3, 4.

15. Nso idi ndusụk ufọn emi afo edibọde edieke anamde item prọfet 12 oro?

¹⁵ Idịghe sụk mme n̄kpọ oro anade ifep ke mme prọfet oro ẹtịn̄ ẹnọ nnyịn. Mmọ ẹtịn̄ n̄ko ufọn emi idibọde edieke idade mme edumbet Abasi idu uwem. Nnyịn iyenen̄ede ikpere Jehovah. (Micah 4:5) Esop nnyịn eyenen̄ede ọsọn̄ idem, ndien kpukpru owo ẹyesịn idem ẹnam se inende. Ndọ nnyịn ọyọfọn, kpukpru owo ke ubon nnyịn ẹyenyụn̄ ẹdiana kiet ẹsịn idem ẹnam n̄kpọ Abasi. (Hosea 2:19; 11:4) Mme owo ẹyekpono nnyịn sia isinamde se inende inyụn̄ idide mbon akpanikọ. Edieke ikpebede Jehovah, nnyịn iyesitua mme owo mbọm inyụn̄ ifọn ido ye mmọ, ndien nditọete nnyịn ẹyenyụn̄ ẹnam ukem oro ye nnyịn. (Micah 7:18, 19) Ih, ididu kpukpru ini ye mbon emi ẹmade Abasi, nditọete emi ẹmade akpanikọ ye emem, ndien akakan edi ke nnyịn ididi ufan Jehovah. (Zechariah 8:16, 19) Mmọn̄ọ, ndi ubọhọ mme edidiọn̄ emi idahaemi?

16. Nso ukpụhọde ke ẹkụt mfịn, ndien nso ke emi ediwọrọ ke akwa usen Jehovah?

¹⁶ Kpukpru se inemede emi ẹnen̄ede ẹnam ‘ẹkụt ukpụhọde ke ufọt ndinen owo ye ndiọi owo,’ oro edi, ke ufọt ata mme Christian ye mbon emi mîdịghe ata mme Christian. (Malachi 3:18) Ke adan̄aemi mme owo ke ererimbot ẹsịnde idem ẹnam se idiọkde, nnyịn ke idomo ofụri ukeme nnyịn ndida mme edumbet Jehovah ndu uwem. Ndien ọmọfiọk ke ẹyenyan̄a mbon oro ẹnamde se inende ke “akwa usen Jehovah,” edi ẹyesobo mme idiọkowo ẹfep.—Zephaniah 1:14; Matthew 25:46.

17. Didie ke afo edida n̄wed emi anam n̄kpọ ke ini iso?

¹⁷ Imokụt mi ke item prọfet 12 oro enyenyene ufọn kpukpru ini. Ọyọfọn afiak odụn̄ọde nti item oro ẹdude ke n̄wed emi ke ini enyenede mfịna m̀mê ke ini oyomde ndinam ubiere. Emi oyowụt ke omoyom Jehovah aka iso ekpep fi usụn̄ esie ndien ke amama ‘ndika iso nsan̄a ke usụn̄’ esie emi. (Micah 4:2) Edi fiọk ete ke edisan̄a ke usụn̄ emi ke nsinsi. N̄kọ akpama ẹwet enyịn̄ fo ke n̄wed editi Jehovah ke nsinsi? N̄wed prọfet 12 oro ẹyen̄wam fi anam emi.

EDINYAN̄A FI KE NTAK MBUỌTIDEM

18. Nso akpan n̄kpọ ke Joel 2:32 ọdọhọ ẹnam, ndien nso ke apostle Paul adian do?

¹⁸ Prọfet Joel ama etịn̄ akpan n̄kpọ emi akpanamde man enem Abasi esịt ke nsinsi, ete: “Kpukpru owo eke ẹsemede ẹkot enyịn̄ Jehovah ẹyebọhọ.” (Joel 2:32) Apostle Peter ye apostle Paul ẹma ẹkot ikọ emi ẹsịn ke uwetn̄kpọ mmọ. (Utom 2:21; Rome 10:13) Paul ama akam adian n̄kpọ en̄wen do ke ini okobụpde ete: “Mmọ ẹdinam didie ẹseme ẹkot enye emi mmọ mîbuọtke idem?” (Rome 10:14) Imọdiọn̄ọ ke afo omoyom ndikot enyịn̄ Jehovah nnyụn̄ mbuọt idem ye enye ke nsinsi.

19. Nso ke ndiseme n̄kot enyịn̄ Jehovah ọwọrọ?

¹⁹ Ndiseme n̄kot enyịn̄ Jehovah iwọrọke sụk ndifiọk enyịn̄ Abasi nnyụn̄ nsikot enyịn̄ emi. (Isaiah 1:15) Mme ufan̄ikọ oro ẹdude mbemiso Joel 2:32 ẹwụt ke emi abuana owo ndinen̄ede n̄kabade esịt nnyụn̄ nnyene mbuọtidem ke Jehovah eyefen ọnọ imọ. (Joel 2:12, 13) Ndiseme n̄kot enyịn̄ Abasi ọwọrọ n̄ko ndinen̄ede ndiọn̄ọ enye, mbuọt idem ye enye, n̄kop uyo esie, nnyụn̄ nnịm enye akpa ke uwem nnyịn. Ih, ndinam n̄kpọ Jehovah ekpenyene ndidi ebeiso n̄kpọ ke uwem nnyịn. Emi ayanam inen̄ede ikop inem uwem inyụn̄ idu uwem ke nsinsi, ndien kpukpru emi ẹdi edidiọn̄ Abasi.—Matthew 6:33.

20. Mme edidiọn̄ ewe ke edibọ edieke enyenede mbuọtidem?

²⁰ Jehovah ama anam Habakkuk ewet ete: “Edinen owo edidu uwem oto ke mbuọtidem esie.” (Habakkuk 2:4) Nyene emi ke ekikere kpukpru ini. Enye edi kiet ke otu ata akpan n̄kpọ emi Bible ekpepde. Paul ama okot ikọ prọfet Habakkuk emi ikata esịn ke mme n̄wed oro ẹkenọde enye odudu spirit ewet.b (Rome 1:16, 17; Galatia 3:11, 14; Mme Hebrew 10:38) Ndifiọk n̄kpọ emi ekpenyene ndinam fi ọbuọt idem ke uwa emi Jesus Christ akawade aban̄a mme idiọkn̄kpọ nnyịn. Jesus ọkọdọhọ ete: “Abasi ama enen̄ede ama ererimbot tutu enye ọnọ ikpọn̄-ikpọn̄ edibon Eyen esie, man owo ekededi eke ọbuọtde idem ye enye . . . enyene nsinsi uwem.” Ekem Jesus ama adian do ete: “Owo eke ọbuọtde idem ke Eyen enyene nsinsi uwem.” (John 3:16, 36) Uwa oro anam Andifak nnyịn ekeme ndikọk mme udọn̄ọ nnyịn. Ke Malachi ama ekewet se Jehovah eketịn̄de nte akwa usen Esie edinamde idiọk ererimbot Satan emi, enye ama adian do ete: “Utịn edinen ido ayasiaha ọnọ mbufo emi ẹbakde enyịn̄ mi, se ikọkde udọn̄ọ oyodu enye ke mba.” Ih, Jesus ọyọkọk kpukpru udọn̄ọ. Oro esịne udọn̄ọ eke spirit oro enye ọkọkde idem idahaemi. Nnyịn imokop inemesịt ndifiọk ke enye ọyọkọk kpukpru udọn̄ọ ke obufa ererimbot.—Malachi 4:2.

21. Ntak emi enyenede mbuọtidem ke Jehovah eyekeme ndinam uduak esie?

²¹ Enen̄ede oyom inyene mbuọtidem nte ke Abasi ayanam uduak esie. Ọkọsọsọn̄ ndibuọt idem ye owo ke eyo Micah. Micah ọkọdọhọ ete: “Ẹkûbuọt idem ye nsan̄a mbufo. Ẹkûberi edem ke akpan ufan mbufo.” Edi ikọsọn̄ke Micah ndibuọt idem ye Jehovah, ikponyụn̄ isọn̄ke fi n̄ko. Micah ọkọdọhọ ete: “Amaedi ami, nyodori enyịn ke Jehovah.” (Micah 7:5, 7) Jehovah itiehe nte owo, enye enyene odudu ye ima ndinam uduak esie man owụt ke imọ inyene unen ndikara ekondo, ndien emi ayada nsinsi edidiọn̄ ọsọk mbon emi ẹbuọtde idem ye enye.

22. Nso edidiọn̄ ke mbon emi ẹsemede ẹkot enyịn̄ Jehovah ke mbuọtidem ẹnyene?

²² Afo emekeme nditịn̄ nte Habakkuk ete: “Nyadat esịt ke Jehovah; ami nyadara ke Abasi edinyan̄a mi.” (Habakkuk 3:18) Prọfet Joel ama anam an̄wan̄a ntak emi mbon oro ẹsemede ẹkot enyịn̄ Jehovah ke mbuọtidem ẹkopde inemesịt. Enye ọkọdọhọ ke mmọ “ẹyebọhọ,” mîdịghe nte Paul ọdọhọde, ‘ẹyenyene edinyan̄a.’ (Joel 2:32; Rome 10:13) Ẹdibọhọ didie, mîdịghe didie ke ẹdinyan̄a mmọ? Afo ndinyene mbuọtidem ke Abasi ananam fi ọbọhọ mme n̄kari Satan ye ediwak afanikọn̄ emi mme idiọkowo ẹsisobode. (1 Peter 1:18) Akan oro, afo emenyene idotenyịn ke ẹyenyan̄a fi ke ini ẹdisobode idiọk editịm n̄kpọ emi. Emi ayanam ekeme ndinyene mme edidiọn̄ emi prọfet 12 oro ẹtịn̄de.

NTE UWEM EDITIEDE KE PARADISE

23, 24. (a) Didie ke prọfet 12 oro ẹfọi nnyịn ẹwụt nte Paradise editiede? (b) Didie ke se prọfet 12 oro ẹkewetde ẹtụk nte afo esede ini iso?

²³ “Mbon oro ẹbakde Jehovah” ẹyenyene edidiọn̄ ke nsinsi. (Malachi 3:16) Ndusụk ke otu prọfet 12 oro ẹtịn̄ nte uwem editiede ke Paradise isọn̄, ndien emi anam ikop inemesịt onyụn̄ anam enye ọdọn̄ nnyịn. Ke uwụtn̄kpọ, Micah ama ewet ete: “Mmọ ẹyetie ke idak vine mmọ ye ke idak eto fig mmọ, ndien ididụhe owo eke edinamde mmọ ẹdịghe.” (Micah 4:4) Ke akpanikọ, afo edidụn̄ ke ifụre ke ini Obio Ubọn̄ Abasi edikarade isọn̄, oyonyụn̄ adia utịp utom fo!

²⁴ Edi ata akpanikọ ke udọn̄ọ, mfụhọ, ye n̄kpa ididụhe aba. Kere nte esịt edidatde mbon oro Abasi edinamde eset onyụn̄ ọnọ mmọ ifet ndidu mfọnmma uwem! Mmọ ẹyekụt nte Hosea 13:14 edisude ntatara ntatara ke isọn̄. Itien̄wed oro ọdọhọ ete: “Nyafak mmọ nsio Udi ke ubọk; nnyanyan̄a mmọ nsio ke n̄kpa. O N̄kpa, ifọt fo enye? O Udi, odudu nsobo fo enye?” Paul ọkọdọhọ ke itien̄wed emi edisu mbon oro ẹsetde ẹka heaven ke idem.—1 Corinth 15:55-57.

25. Editie fi didie ke idem ke obufa ererimbot?

²⁵ Ikpanaha ọsọn̄ owo ndinịm ke ẹyenam mme owo ẹset ke isọn̄. (Zechariah 8:6) Ke ini Amos ye Micah ẹkebemde iso ẹtịn̄ ke ikọt Abasi emi ẹkedude ke ntan̄mfep ẹyefiak ẹnyọn̄ọ obio emana mmọ, ekeme ndidi ama ọsọn̄ ndinịm. Edi afo ọmọfiọk ke oro ama etịbe. (Amos 9:14, 15; Micah 2:12; 4:1-7) Kop se mbon oro ẹkenyọn̄ọde ntan̄mfep ẹdi ẹketịn̄de mi: “Eketie nnyịn nte idaba ndap. Ke ini oro imam ama ọyọhọ nnyịn mfụk, edeme nnyịn onyụn̄ ọyọhọ ye n̄kpo idara. . . . Jehovah amanam akwa n̄kpọ ọnọ nnyịn. Nnyịn imadara.” (Psalm 126:1-3) Nte editiede fi ke idem edi oro ke obufa ererimbot emi edibọde edidiọn̄ ‘tutu unanake baba n̄kpọ kiet.’

26. Nso idi idotenyịn mbon oro ẹdude uwem ye usen Jehovah ke ekikere?

²⁶ Ke ‘usen Jehovah’ ama okosobo idiọk ererimbot emi efep, “itie edidem ayakabade edi eke Jehovah” ọyọhọ ọyọhọ. (Obadiah 15, 21) Ndi oro ididịghe utịbe utịbe edidiọn̄ inọ kpukpru ikọt esie ke isọn̄? Afo n̄ko emekeme ndisịne ke otu mbon emi ikọ oro ẹtịn̄de ke Malachi ibuot 3 edisude ke idem, emi ọdọhọde ete: “Jehovah mme udịm ọdọhọ ete, ‘Mmọ ẹyekabade ẹdi okịm . . . Ndien nyatua mmọ mbọm, kpa nte owo atuade eyen esie emi anamde n̄kpọ ọnọ enye mbọm.’” (Malachi 3:17) Omokụt do ke edinam akpanikọ fo, emi ọnọde fi idotenyịn edinyan̄a, ayanam Abasi ‘ọdiọn̄ fi tutu unanake baba n̄kpọ kiet.’ Nso utịbe utịbe idotenyịn ke afo enyene ntem!

[Mme Ikọ Idakisọn̄]

DIDIE KE EMI OTỤK FI?

• Nso ufọn ke ọbọ ke emi Jehovah anamde ikọt esie ẹsana mfịn?​—Daniel 12:10; Malachi 3:12.

• Ntak emi oyomde ndidọdiọn̄ n̄wa uwa nnọ Abasi?—Hosea 14:2; 1 Peter 2:5.

DU UWEM YE USEN JEHOVAH KE EKIKERE

• Ntak emi afo ekerede ke enen̄ede ọfọn enyene se idude ke Habakkuk 2:4 ke ekikere?—Hosea 2:18, 20.

• Didie ke prọfet 12 oro ẹnam obufa ererimbot ọdọn̄ fi itọn̄?—Psalm 126:1-3.

• Ntak emi afo ebierede ndika iso ndu uwem ye usen Jehovah ke ekikere?​—Joel 2:1, 2; Habakkuk 2:2, 3.

[Ndise ke page 180]

Jehovah ke anam ikọt esie ẹsana nte otu. Edi ndi nnyịn owo kiet kiet imenyene ebiet emi anade inam ukpụhọde?

[Ndise ke page 187]

Joel

[Mme ndise ke page 189]

Mbon oro ẹmade akpanikọ ye se inende ẹdu ẹkanade mme asan̄autom Jehovah