Nam N̄kpọ Jehovah ke Inemesịt
“Kpukpru mme idiọkn̄kpọ ẹmi ẹyedoro fi . . . Koro mûkanamke n̄kpọ Jehovah Abasi fo ke idara, ye ke inemesịt.”—DEUTERONOMY 28:45-47.
1. Nso uyarade idu nte ke mbon oro ẹnamde n̄kpọ Jehovah ẹkop idatesịt, inamke n̄kpọ m̀mê m̀mọ̀n̄ ke mmọ ẹnam n̄kpọ esie?
MME asan̄autom Jehovah ẹkop idatesịt, edide mmọ ẹnam uduak esie ke heaven m̀mê ke isọn̄. “Mme ntantaọfiọn̄ usenubọk” ẹdide angel ẹma ẹfiori ke idara ke ini ẹkenamde isọn̄, ndien nte eyịghe mîdụhe ediwak angel ke heaven ‘ẹkop uyo ikọ Abasi’ ye idatesịt. (Job 38:4-7; Psalm 103:20) Ikpọn̄îkpọn̄ edibon Eyen Jehovah ekedi idara idara “etubom anamutom” ke heaven onyụn̄ okop inemesịt ke ndinam uduak Abasi nte owo kpa Jesus Christ ke isọn̄. Akan oro, “ke ntak idatesịt oro ẹkenịmde enye ke iso enye ama ọyọ eto ndutụhọ, ikereke bụt, onyụn̄ osụhọde etetie ke ubọk nnasia ebekpo Abasi.”—Mme N̄ke 8:30, 31, NW; Mme Hebrew 10:5-10; 12:2, NW.
2. Nso ikebiere m̀mê nditọ Israel ẹkenyene edidiọn̄ m̀mê idiọkn̄kpọ?
2 Nditọ Israel ẹma ẹkop idatesịt ke ini mmọ ẹkenemde Abasi esịt. Edi nso edieke mmọ ẹkesọn̄de ibuot ye enye? Ẹma ẹdụri mmọ utọn̄ ẹte: “[Idiọkn̄kpọ] ẹyedoro fi ye nditọ fo ke idem ke nsinsi, ke idiọn̄ọ ye n̄kpọ ndyọ. Koro mûkanamke n̄kpọ Jehovah Abasi fo ke idara, ye ke inemesịt, ke ini kpukpru n̄kpọ ẹwakde; ndien afo eyenam n̄kpọ mme asua fo eke Jehovah edidọn̄de ẹtiene fi, ke biọn̄, ye ke nsatitọn̄, ye ke iferi, ye ke unana kpukpru n̄kpọ: ndien enye eyekọn̄ọ fi n̄kpọ ukwak ke itọn̄, tutu enye osobo fi ama.” (Deuteronomy 28:45-48) Mme edidiọn̄ ye idiọkn̄kpọ ẹma ẹnam ẹdiọn̄ọ in̄wan̄în̄wan̄ mbon oro ẹkedide ye mbon oro mîkedịghe mme asan̄autom Jehovah. Mme utọ idiọkn̄kpọ oro ẹma ẹsọn̄ọ n̄ko nte ke mme edumbet ye uduak Abasi idịghe se ẹkpedade ẹnam mbubru, m̀mê owo ndifụmi mmọ. Ke ntak emi nditọ Israel ẹkesịnde ndinam mme ntọt Jehovah ẹban̄ade nsobo ye ntan̄mfep, Jerusalem ama akabade edi “n̄kpọ isụn̄i [ọnọ] kpukpru mme idụt ererimbot.” (Jeremiah 26:6) Ẹyak nnyịn ke ntre inam item Abasi inyụn̄ inyene ufọn esie. Idatesịt edi kiet ke otu ediwak edidiọn̄ Abasi oro mbon uten̄e Abasi ẹnyenede.
Nte Ẹkpenamde N̄kpọ ke “Inemesịt”
3. Nso idi ndamban̄a esịt?
3 Nditọ Israel ẹkenyene ndinam n̄kpọ Jehovah “ke idara, ye ke inemesịt.” Ntre n̄ko ke ana mme asan̄autom Abasi eyomfịn ẹnam. Ndidat esịt ọwọrọ “ndidara; ndiyọhọ ye idatesịt.” Okposụkedi ẹsiakde ata esịt ke N̄wed Abasi, enye ke ataata usụn̄ isikereke n̄kpọ m̀mê ndikọk ibuot. (Exodus 28:30) Akpan utom esie edi ndisuan iyịp oro anamde mme nsen idem owo ẹkọri. Ke ata ekese idaha, nte ededi, Bible esitịn̄ aban̄a ndamban̄a esịt, emi akande sụk itie emi ima, se inụkde owo anam n̄kpọ, ye ifiọk, ẹtode. Ẹdọhọ ke enye ada ọnọ “akpan ikpehe ke ofụri ofụri, kpa esịtidem, ndien ke ntre ada ọnọ owo esịtidem nte owụtde idem ke kpukpru nsio nsio edinam esie, ke udọn̄ esie, ima, ntụk, ọkpọsọn̄ udọn̄, uduak, mme ekikere esie, ifiọk uda n̄kụt n̄kpọ, ndinyene n̄kpọ ke ekikere, ọniọn̄ esie, ifiọk, usọ, se enye onịmde ke akpanikọ ye n̄kọkibuot esie, ibuot uti n̄kpọ esie ye ukeme ufiọk n̄kpọ.” (Journal of the Society of Biblical Literature and Exegesis, 1882, page 67) Ndamban̄a esịt nnyịn abuana nte n̄kpọ etiede nnyịn ke idem ye mme ntụk nnyịn, esịnede idatesịt.—John 16:22.
4. Nso ikeme ndin̄wam nnyịn inam n̄kpọ Jehovah Abasi ke inemesịt?
4 Nso ikeme ndin̄wam nnyịn ndinam n̄kpọ Jehovah ke inemesịt? In̄wan̄în̄wan̄ edikere ye esịtekọm mban̄a mme edidiọn̄ ye mme ifetutom oro Abasi ọnọde nnyịn eyen̄wam. Ke uwụtn̄kpọ, nnyịn ye idatesịt imekeme nditie n̄kere ifet oro inyenede ndinam “edisana utom” nnọ Abasi akpanikọ. (Luke 1:74, NW) Ukem ifet oro odu ndikere enyịn̄ Jehovah nte Mme Ntiense esie. (Isaiah 43:10-12) Kaban̄a emi nnyịn imekeme ndidian idatesịt oro odude ke ndifiọk nte ke ebede ke nditiene Ikọ Abasi nnyịn ke inam se inemde enye esịt. Ndien nso idatesịt idu ntem ke ndinam ẹkụt un̄wana eke spirit ndien ke ntem in̄wamde ediwak owo ndiwọrọ ke ekịm!—Matthew 5:14-16; men 1 Peter 2:9 domo.
5. Idatesịt oro Abasi ọnọde oto nso?
5 Edi, ndinam n̄kpọ Jehovah ke inemesịt ikam ibuanake in̄wan̄în̄wan̄ ekikere kpọt. Ufọn odu ndinyene in̄wan̄în̄wan̄ ekikere. Edi idatesịt otode Abasi idịghe n̄kpọ oro nnyịn inyenede ebe ke ndikọri akpan edu. Enye edi mbun̄wụm spirit Jehovah. (Galatia 5:22, 23) Edieke nnyịn mînyeneke utọ idatesịt oro, ekeme ndiyom nnyịn inam edinen̄ede man ikpefep edikere m̀mê edinam n̄kpọ ke ndusụk usụn̄ oro mîkemke ye N̄wed Abasi oro ekemede ndiyat spirit Abasi esịt. (Ephesus 4:30) Nte ededi, nte mbon oro ẹyakde idem ẹnọ Jehovah, ẹyak nnyịn ikûkop ndịk nte ke unana edikop inemesịt ke ndusụk idaha edi uyarade unana unyịme Abasi. Nnyịn idi mme anana mfọnmma owo imonyụn̄ ikeme ndikop ubiak, itie mbọm mbọm, inyụn̄ ikam ikop mfụhọ ke ndusụk ini, edi Jehovah ọfiọk se ifịnade nnyịn. (Psalm 103:10-14) Ẹyak nnyịn ke ntre ibọn̄ akam iyom edisana spirit esie, itide ite ke edi Abasi ọnọ mbun̄wụm esie edide idatesịt. Ima ima Ete nnyịn eke heaven eyeyere mme utọ akam oro eyenyụn̄ anam nnyịn ikeme ndinam n̄kpọ esie ke inemesịt.—Luke 11:13.
Ke Ini Idatesịt Ananade
6. Edieke idatesịt ananade ke utom oro inamde inọ Abasi, nso ke nnyịn ikpanam?
6 Edieke idatesịt ananade ke utom nnyịn, ekeme ndidi nnyịn ke akpatre iyesụhọde ubọk ke ndinam n̄kpọ Jehovah m̀mê ikam itre ndinam akpanikọ nnọ enye. Ntem, eyewụt eti ibuot ndikere mban̄a mme udọn̄ nnyịn ke nsụhọdeidem ye ke akam inyụn̄ inam mme edinen̄ede oro ẹyomde. Man inyene idatesịt oro Abasi ọnọde, ana nnyịn inam n̄kpọ Jehovah ke ntak ima ye ke ofụri esịt, ukpọn̄, ye ekikere nnyịn. (Matthew 22:37) Inaha nnyịn inam n̄kpọ ye edu umia mbuba, koro Paul ekewet ete: “Edieke nnyịn idude uwem ke spirit, ẹyak nnyịn inyụn̄ ida odudu spirit isan̄a. Nnyịn ikûtan̄ idem, ikûyat kiet eken esịt, ikûnyụn̄ ifụbe ufụp ye kiet eken.” (Galatia 5:25, 26) Nnyịn idinyeneke ata idatesịt edieke nnyịn inamde n̄kpọ ke ntak nnyịn iyomde ndinam n̄kan mbon en̄wen m̀mê ke ntak iyomde itoro.
7. Didie ke nnyịn ikeme ndifiak ndemede inemesịt nnyịn?
7 Idatesịt odu ke ndidu uwem ekekem ye uyakidem nnyịn nnọ Jehovah. Ke ini nnyịn ikayakde idem inọ Abasi obufa obufa, nnyịn ke nsịnifịk ima isan̄a ke usụn̄uwem Christian. Nnyịn ima ikpep N̄wed Abasi inyụn̄ ibuana kpukpru ini ke mme mbonoesop. (Mme Hebrew 10:24, 25) Enye ama ọnọ nnyịn idatesịt nditiene mbuana ke utom ukwọrọikọ. Edi, nso edieke edide idatesịt nnyịn osụhọde? Ukpepn̄kpọ Bible, edidụk mbonoesop, edibuana ke utom ukwọrọikọ—ke akpanikọ, ọyọhọ edinyene ebuana ke kpukpru ikpehe Ido Ukpono Christ—ẹkpenyene ndinam uwem nnyịn enyene iwụk ke n̄kan̄ eke spirit onyụn̄ afiak edemede ima ye inemesịt oro nnyịn ikenyenede ke akpa. (Ediyarade 2:4) Do nnyịn idibietke ndusụk owo ẹmi ke ndusụk usụn̄ ẹnanade idatesịt ẹsinyụn̄ ẹwakde ndiyom un̄wam eke spirit. Mbiowo ẹsikop inemesịt ndin̄wam, edi ana nnyịn owo kiet kiet inam uyakidem nnyịn nnọ Abasi ọyọhọ. Idụhe owo en̄wen emi ekemede ndinam emi nnọ nnyịn. Ẹyak nnyịn ke ntre inam enye edi ido nnyịn nditiene nnennen ndutịm Christian man ikeme ndinam uyakidem nnyịn nnọ Jehovah ọyọhọ inyụn̄ inyene ata idatesịt.
8. Ntak emi in̄wan̄în̄wan̄ ubieresịt edide akpan n̄kpọ edieke anade ikop idatesịt?
8 Edieke anade inyene idatesịt emi edide mbun̄wụm spirit Abasi, oyom nnyịn inyene in̄wan̄în̄wan̄ ubieresịt. Adan̄a ini nte Edidem David eke Israel okodomode ndidịp idiọkn̄kpọ esie, enye ikenyeneke inemesịt. Ke akpanikọ, eketie nte nsek esie ama asat, ndien ekeme ndidi enye ama ọdọn̄ọ ke n̄kan̄ ikpọkidem. Nso ubọhọ ke enye ekenyene ntem ke ini editua n̄kpọfiọk ye edikabade esịt akadade itie! (Psalm 32:1-5) Nnyịn ikemeke ndikop idatesịt edieke idịpde ndusụk akwa idiọkn̄kpọ. Oro n̄ko ekeme ndinam nnyịn idu uwem oro akamade afanikọn̄. Ke akpanikọ, oro idịghe usụn̄ nte ẹkpenyenede idatesịt. Edi editua n̄kpọfiọk ye edikabade esịt esida ubọhọ ye edifiak nnyene spirit idatesịt edi.—Mme N̄ke 28:13.
Ndibet ke Idatesịt
9, 10. (a) Nso un̄wọn̄ọ ke Abraham ọkọbọ, edi didie ke ekeme ndidi ẹma ẹdomo mbuọtidem ye idatesịt esie? (b) Didie ke nnyịn ikeme ndibọ ufọn nto uwụtn̄kpọ Abraham, Isaac, ye Jacob?
9 Edi n̄kpọ kiet ndinyene idatesịt ke ini nnyịn ikebemde iso ikpep iban̄a uduak Abasi edi edi ata n̄kpọ efen ndikaiso nnyene idatesịt oro ke ediwak isua ẹma ẹkebe. Ẹkeme ndinam emi an̄wan̄a ke se iban̄ade anam-akpanikọ Abraham. Ke enye ama okodomo ndiwa eyen esie Isaac nte ewụhọ Abasi ekedide, angel ama ọnọ etop emi: “Jehovah ọdọhọ ete, Mmotomo idemmi, nte, Koro afo ama akanam n̄kpọ emi, mûkonyụn̄ usịnke mi eyen fo, eyen fo kierakiet; nte nyediọn̄ fi akamba, nyenyụn̄ nnam ubon fo ẹwak etieti nte ntantaọfiọn̄ enyọn̄, ye nte ntan emi odude ke mbeninyan̄; ubon fo eyenyụn̄ enyene enyịnusụn̄ mme asua mmọ: kpukpru mme idụt ke ererimbot ẹyenyụn̄ ẹkụt mfọn eke otode ke ubon [“mfri,” NW] fo, koro afo ama okokop uyo mi.” (Genesis 22:15-18) Nte eyịghe mîdụhe, Abraham ama okop akwa idatesịt ke un̄wọn̄ọ emi.
10 Ekeme ndidi Abraham ama odori enyịn ete ke Isaac edidi “mfri” emi mme edidiọn̄ oro ẹken̄wọn̄ọde ẹdidide ebe ke enye. Edi ekeme ndidi ediwak isua oro ẹkebede ye unana utịben̄kpọ ndomokiet ndida itie ebe ke Isaac ama esịn mbuọtidem ye idatesịt oro Abraham ye ubon esie ẹkenyenede ke udomo. Abasi ndikọsọn̄ọ un̄wọn̄ọ oro nnọ Isaac ndien ekem ọsọn̄ọ ọnọ eyen esie Jacob ama anam mmọ ẹnịm ẹte ke Mfri oro ndidi osụk edi ke ini iso, ndien emi ama an̄wam mmọ ndikaiso nnyene mbuọtidem ye idatesịt. Nte ededi, Abraham, Isaac, ye Jacob ẹma ẹkpan̄a ye unana edikụt nte mme un̄wọn̄ọ oro Abasi ọkọn̄wọn̄ọde ọnọ mmọ ẹsude, edi mmọ ikedịghe mme asan̄autom Jehovah oro ẹnanade idatesịt. (Mme Hebrew 11:13) Nnyịn nde imekeme ndikaiso nnam n̄kpọ Jehovah ke mbuọtidem ye idatesịt ke adan̄aemi itiede ibet edisu mme un̄wọn̄ọ esie.
Idatesịt Kpa ye Ukọbọ
11. Ntak emi nnyịn ikemede ndidat esịt kpa ye ukọbọ?
11 Nte mme asan̄autom Jehovah, nnyịn imekeme ndinam n̄kpọ Jehovah ke inemesịt, idem okposụkedi isobode ukọbọ. Jesus ama ọdọhọ ke ọfọfọn ọnọ mbon oro ẹkọbọde ke ntak imọ, ndien apostle Peter ọkọdọhọ ete: “Adan̄a nte mbufo ẹbuanade ke ndutụhọ Christ, ẹkam ẹdara; man mbufo ẹkpenyụn̄ ẹdat esịt etieti ke adan̄aemi ẹdiyararede ubọn̄ Esie. Edieke ẹsuenede mbufo kaban̄a enyịn̄ Christ, ọfọfọn ọnọ mbufo; koro Spirit ubọn̄ ye Spirit Abasi odoro mbufo ke idem.” (1 Peter 4:13, 14; Matthew 5:11, 12) Edieke afo ọyọde ukọbọ ye ufen ke ntak edinen ido, afo emenyene spirit ye unyịme Jehovah, ndien oro ke akpanikọ anam idatesịt okpon.
12. (a) Ntak emi ikemede ndisobo mme idomo mbuọtidem ye idatesịt? (b) Nso akpan ukpepn̄kpọ ke nnyịn ikeme ndikpep nto se iban̄ade Levite kiet emi okodude ke ntan̄mfep?
12 Nnyịn imekeme ndisobo mme idomo mbuọtidem ye idatesịt koro Abasi edi Ebiet Ubọhọ nnyịn. Ẹwụt emi ke Psalm 42 ye 43. Ke ndusụk ntak, owo Levite kiet okodu ke ntan̄mfep. Enye ama enen̄ede ataba utuakibuot ke edisana ebiet Abasi tutu editie enye ke idem nte uman edop, m̀mê ebet emi itọn̄ asatde, oro mmọn̄ ọdọn̄de ke nsat ebiet oro mmọn̄ mîdụhe. Itọn̄ Jehovah ye ifet edituak ibuot nnọ Abasi ke edisana ebiet Esie ‘ama asat,’ m̀mê ọdọn̄ enye. (Psalm 42:1, 2) Ifiọk n̄kpọntịbe owo ntan̄mfep emi ekpenyene ndinụk nnyịn ndiwụt esịtekọm mban̄a ebuana oro nnyịn isinyenede ye ikọt Jehovah. Edieke utọ idaha nte n̄kọbi-ntem ke ntak ukọbọ ibio ini akpande nnyịn ndidu ye mmọ, ẹyak nnyịn itie ikere idatesịt ini edem oro ikenyenede ọtọkiet ke edisana utom inyụn̄ ibọn̄ akam man iyọ ke adan̄aemi ‘ibetde Abasi’ ndifiak nnam nnyịn inam utom kpukpru ini ye mme andituak ibuot nnọ enye.—Psalm 42:4, 5, 11; 43:3-5.
“Ẹnam N̄kpọ Ẹnọ Jehovah ke Idatesịt”
13. Didie ke Psalm 100:1, 2 owụt ete ke ana idatesịt edi n̄wọrọnda ikpehe ke utom oro inamde inọ Abasi?
13 Ana idatesịt edi n̄wọrọnda ikpehe ke utom oro inamde inọ Abasi. Ẹma ẹwụt emi ke inem inem ikwọ ekọm emi andiwet psalm ọkọkwọde ete: “Mbufo ofụri ererimbot, ẹnam idara ẹnọ Jehovah. Ẹnam n̄kpọ ẹnọ Jehovah ke idatesịt: ẹda ikwọ ẹdi enye ke iso.” (Psalm 100:1, 2) Jehovah edi “Abasi inemesịt” onyụn̄ oyom mme asan̄autom esie ẹkop idatesịt ke ndiyọhọ se ibuanade ke uyakidem mmọ nnọ enye. (1 Timothy 1:11, NW) Mme owo ke kpukpru idụt ẹkpenyene ndidara ke Jehovah, ndien mme ikọ ekọm nnyịn ẹkpenyene ndisọn̄ uyo, nte ‘n̄kpo edikan’ eke udịmekọn̄ oro akande. Sia utom ẹnamde ẹnọ Abasi ọnọde nduọkodudu, emi ekpenyene ndisan̄a ye idatesịt. Ntem, andiwet psalm ama akpak mme owo ete ẹdi ke iso Abasi “ye ikwọ idatesịt.”—NW.
14, 15. Didie ke Psalm 100:3-5 enyene n̄kpọ ndinam ye idara idara ikọt Jehovah mfịn?
14 Andiwet psalm oro ama adian ete: “Ẹfiọk [ẹti, ẹdiọn̄ọ] ẹte ke edi Jehovah edi Abasi; edi enye akanam nnyịn, ndien nnyịn inyene enye, ikọt esie, ye ufene emi enye ọbọkde.” (Psalm 100:3) Sia Jehovah edide Andibot nnyịn, enye enyene nnyịn nte emi ekpemerọn̄ enyenede erọn̄ esie. Abasi otịm ekere aban̄a nnyịn tutu eyedi se nnyịn ke idatesịt itorode enye. (Psalm 23) Kaban̄a Jehovah, andiwet psalm ama ọkwọ n̄ko ete: “Ẹda ekọm ẹdụk ke inuaotop esie, ẹda itoro ẹdụk ke okụre esie: ekọm enye, ẹtoro enyịn̄ esie. Koro Jehovah ọmọfọn; ima esie ebịghi ke nsinsi; akpanikọ esie onyụn̄ ebịghi ke ofụri emana.”—Psalm 100:4, 5.
15 Mfịn, idara idara mme owo eke kpukpru idụt ke ẹdụk okụre edisana ebiet Jehovah man ẹnọ enye ekọm ye itoro. Nnyịn ke idatesịt itoro enyịn̄ Abasi ebe ke nditịn̄ eti ikọ mban̄a Jehovah, ndien nti edu esie ẹnụk nnyịn nditoro enye. Enye enen̄ede ọfọn, ndien ẹkeme ndiberi edem kpukpru ini ke ima-mfọnido esie m̀mê mbọm mbọm edikere mban̄a oro enye ekerede aban̄a mme asan̄autom esie, koro emi odu ke nsinsi. Jehovah anam akpanikọ ke ndiwụt mbon oro ẹnamde uduak esie ima “ke ofụri emana.” (Rome 8:38, 39) Ke akpanikọ, ndien, nnyịn imenyene eti ntak ‘ndinam n̄kpọ nnọ Jehovah ke idatesịt.’
Ẹdat Esịt ke Idotenyịn Mbufo
16. Mme Christian ẹkeme ndidara ke idotenyịn ewe?
16 Paul ekewet ete: “Ẹdat esịt ke idotenyịn.” (Rome 12:12) Mme anditiene Jesus Christ oro ẹyetde aran ẹdat esịt ke ubọn̄ ubọn̄ idotenyịn uwem eke heaven oro mîkemeke ndikpa emi Abasi ọnọde mmọ ebe ke Eyen esie. (Rome 8:16, 17; Philippi 3:20, 21) Mme Christian ẹmi ẹnyenede idotenyịn nsinsi uwem ke Paradise ke isọn̄ n̄ko ẹnyene ntak ndidat esịt. (Luke 23:43) Kpukpru mme anam-akpanikọ asan̄autom Jehovah ẹnyene ntak ndidat esịt ke idotenyịn Obio Ubọn̄, koro mmọ ẹyedi ubak ukara eke enyọn̄ oro mîdịghe ẹdụn̄ ke ikpehe esie eke n̄kan̄ isọn̄. Nso idara idara edidiọn̄ ke emi edi ntem!—Matthew 6:9, 10; Rome 8:18-21.
17, 18. (a) Nso ke ẹkebem iso ẹtịn̄ ke Isaiah 25:6-8? (b) Didie ke prọfesi Isaiah emi osu idahaemi, ndien nso kaban̄a edisu esie ke ini iso?
17 Isaiah n̄ko ama ebemiso etịn̄ aban̄a idara idara ini iso oro enyenede okopitem ubonowo. Enye ekewet ete: “Ke obot emi ke Jehovah mme udịm edinam akamba udia ọnọ kpukpru mme idụt, n̄kpọ eke ẹnyenede isek, ndia ke wine eke anade ke ntak, ke n̄kpọ eke ẹnyenede isek, ẹnyụn̄ ẹwakde ndia, wine ke ntak eke ẹtịmde ẹdụk. Ndien ke obot emi Enye eyemen iso ufụhọ-n̄kpọ emi ofụkde ofụri ekondo, ye ọfọn̄ ufụkiso emi ofụkde kpukpru mme idụt. Enye eyemen n̄kpa ke nsinsi; Ọbọn̄ Jehovah onyụn̄ ọkwọhọde kpukpru iso mmọn̄eyet efep; eyenyụn̄ osio esuene ikọt esiemmọ ke ofụri ererimbot efep: koro edi Jehovah ọdọhọ.”—Isaiah 25:6-8.
18 Udia eke spirit emi nnyịn ibuanade mfịn nte mme andituak ibuot nnọ Jehovah edi idara idara usọrọ ke akpanikọ. Ke akpanikọ, idatesịt nnyịn esiyọhọ ọduọhọ nte nnyịn inamde n̄kpọ Abasi ifịk ifịk ke ndidori enyịn mban̄a usọrọ ataata nti n̄kpọ oro enye ọn̄wọn̄ọde ndinam odu ke obufa ererimbot. (2 Peter 3:13) Ke isọn̄ uwa Jesus, Jehovah eyemen “ufụhọ-n̄kpọ” emi ofụkde ubonowo ke ntak idiọkn̄kpọ Adam efep. Nso n̄kpọ idatesịt ke emi edidi ntem ndikụt ẹsiode idiọkn̄kpọ ye n̄kpa ẹfep! Nso inem n̄kpọ ke emi edidi ntem ndidara mbonima nnyịn oro ẹsetde, ndikụt nte mmọn̄eyet mîdụhe aba, ye ke ndidụn̄ ke paradise isọn̄, emi owo mîdisueneke ikọt Jehovah aba edi ẹdinọde Abasi ibọrọ ndinọ akwa osụn̄i isụn̄i oro, Satan kpa Devil!—Mme N̄ke 27:11.
19. Didie ke nnyịn ikpanam n̄kpọ iban̄a idotenyịn oro Jehovah onịmde nnyịn ke iso nte Mme Ntiense esie?
19 Nte emi inamke fi ọyọhọ ye idatesịt ye esịtekọm ndifiọk se Jehovah edinamde ọnọ mme asan̄autom esie? Ke akpanikọ, mme utọ akwa idotenyịn oro ẹtịp n̄kpọ ẹsịn ke idatesịt nnyịn! Akan oro, eti idotenyịn nnyịn anam nnyịn isak iso ise okop-inemesịt, ima ima, atatido Abasi nnyịn ye ikọ ẹbietde mmọemi: “Sese, Abasi nnyịn edi emi; nnyịn imebet enye, ndien enye anyan̄a nnyịn: Jehovah edi emi; nnyịn imebet enye: iyedara inyụn̄ ibre mbre iban̄a edinyan̄a esie.” (Isaiah 25:9) Ye nyayama idotenyịn nnyịn oro ọsọn̄ọde owụhọ ke ekikere nnyịn, ẹyak nnyịn isịn ofụri ukeme ndinam n̄kpọ Jehovah ke inemesịt.
Didie ke Afo Ọkpọbọrọ?
◻ Didie ke nnyịn ikeme ndinam n̄kpọ Jehovah “ke inemesịt”?
◻ Nso ke ikeme ndinam edieke idatesịt ananade ke utom oro nnyịn inamde inọ Abasi?
◻ Ntak emi ikọt Jehovah ẹkemede ndinyene idatesịt kpa ye ukọbọ?
◻ Nso mme ntak ke inyene ndidat esịt ke idotenyịn nnyịn?
[Mme ndise ke page 17]
Ndibuana ke kpukpru ikpehe uwem Christian eyenam idatesịt nnyịn okpon