Edat Esịt Ke Idotenyịn Obio Ubọn̄!

“Ẹdat esịt ke idotenyịn; ẹnyene ime ke ukụt.”—ROME 12:12.

1. Ntak emi nnyịn ikemede ndikop idatesịt ke ebuana ye Jehovah, ndien nso ke apostle Paul akakpak mme Christian ndinam?

“ABASI inemesịt.” (1 Timothy 1:11, NW) Emi etịn̄ mfọn mfọn aban̄a Jehovah didie ntem! Ntak-a? Koro kpukpru utom esie ẹda akwa inemesịt ẹsọk enye. Sia Jehovah edide Ntọn̄ọ kpukpru nti n̄kpọ ye mme n̄kpọ oro ẹnọde inemesịt, kpukpru enyene-ifiọk edibotn̄kpọ esie ẹkeme ndikop inemesịt ke ebuana mmọ ye enye. Nte odotde, apostle Paul ama akpak mme Christian ete ẹwụt esịtekọm ẹban̄a idara idara ifet mmọ ke ndidiọn̄ọ Jehovah Abasi, ẹwụt esịtekọm ke kpukpru utịbe enọ edibotn̄kpọ Esie, ẹnyụn̄ ẹdat esịt ke ima-mfọnido oro Enye owụtde mmọ. Paul ekewet ete: “Edat esịt ke Ọbọn̄ kpukpru ini; nyetọn̄ọ ntak ndọhọ, Ẹdat esịt!”—Philippi 4:4; Psalm 104:31.

2. Nso idotenyịn ada akwa idatesịt edi, ndien nso ke esịn udọn̄ ẹnọ mme Christian ndinam kaban̄a idotenyịn emi?

² Nte mme Christian ẹkop item oro Paul ọkọnọde mi? Ke akpanikọ mmọ ẹkop! Nditọete Jesus Christ eke spirit ke ẹdara ke ubọn̄ ubọn̄ idotenyịn oro Abasi ekebederede ọnọ mmọ. (Rome 8:19-21; Philippi 3:20, 21) Ih, mmọ ẹfiọk ẹte ke mmimọ iyebuana ke edisu akwa un̄wọn̄ọ aban̄ade ini iso ubonowo, eke mme odu uwem ye mme akpan̄kpa, ke ndinam utom ye Christ ke ukara Obio Ubọn̄ esie eke heaven. Kere adan̄a nte mmọ ẹdidarade ke mme ifetutom mmọ nte nsan̄a mme ada udeme nnyene, ẹnamde utom nte ndidem ye mme oku! (Ediyarade 20:6) Nso inemesịt edidi eke mmọ ntem nte mmọ ẹn̄wamde mme anam-akpanikọ ubonowo ndisịm mfọnmma ẹnyụn̄ ẹn̄wamde ndikpeme Paradise isọn̄ nnyịn oro ẹfiakde ẹwụk! Ke akpanikọ, kpukpru mme asan̄autom Abasi ẹnyene “idotenyịn nsinsi uwem; eke Abasi, emi mîkemeke ndisu nsu, ekebemde nsinsi ini iso ọn̄wọn̄ọ.” (Titus 1:2) Ke ikerede iban̄a ubọn̄ ubọn̄ idotenyịn emi, apostle Paul esịn udọn̄ ọnọ kpukpru Christian ete: “Ẹdat esịt ke idotenyịn.”—Rome 12:12.a

Ata Idatesịt—Edu Otode Esịt

3, 4. (a) Nso ke ikọ oro “ndidat esịt” ọwọrọ, ndien adan̄a ediwak ini didie ke mme Christian ẹkpekop idatesịt? (b) Nso idi ata idatesịt, ndien enye ọkọn̄ọ ke nso?

³ “Ndidat esịt” ọwọrọ ndikop nnyụn̄ n̄wụt idatesịt; enye iwọrọke ndidu ke idaha idatesịt m̀mê inemesịt kpukpru ini, m̀mê ndikop odudu. Ikọedinam oro edide ukem ye ikọ Hebrew ye Greek oro ẹdade ke Bible ndida nnọ “idatesịt,” “itoro,” ye “idara” ẹwụt nte etiede owo ke esịtidem ye enyọn̄ enyọn̄ ediwụt idatesịt. Ẹsịn udọn̄ ẹnọ mme Christian ẹte “ẹkaiso ndidat esịt,” “ẹdat esịt kpukpru ini.”—2 Corinth 13: 11, NW; 1 Thessalonica 5:16.

⁴ Edi didie ke owo ekeme ndidat esịt kpukpru ini? Emi ekeme nditịbe koro ata idatesịt edi edu otode esịt, ntotụn̄ọ edu esịtidem, edu eke spirit. (Deuteronomy 28:47; Mme N̄ke 15:13; 17:22) Enye edi mbun̄wụm spirit Abasi, emi Paul akasiakde adian ima. (Galatia 5:22) Nte edu esịtidem, enye ikọn̄ọke ke mme n̄kpọ oro ẹdude ke enyọn̄ idem, ikọn̄ọke idem ke nditọete nnyịn. Edi enye ọkọn̄ọ ke edisana spirit Abasi. Ndien enye ọwọrọ oto ntotụn̄ọ uyụhọ esịtidem oro aban̄ade edidiọn̄ọ oro owo ọdiọn̄ọde ete ke imọ imenyene akpanikọ, idotenyịn Obio Ubọn̄, ye nte ke imọ ke inam se inemde Jehovah esịt. Ntem, idatesịt idịghe ikpîkpu ndammana edu oro nnyịn idade imana; enye edi ubak “obufa edu,” kpa ntan̄ndian edu oro akanamde Jesus Christ edi isio.—Ephesus 4:24, NW, Colossae 3:10.

5. Ini ewe ndien didie ke enyọn̄ enyọn̄ uwụt idatesịt ẹkeme ndidu?

⁵ Okposụkedi idatesịt edide edu otode esịt, nte ededi ekeme ndiwụt enye enyọn̄ enyọn̄ ke ndusụk idaha. Ini ewe ẹdi ndusụk idaha, uwụt enyọn̄ enyọn̄ idatesịt emi? Mmọ ẹkeme ndidi idaha ekededi ọtọn̄ọde ke editie sụn̄sụn̄ ke iso osịm ataata edifụrọ ke idatesịt. (1 Ndidem 1:40; Luke 1:44; Utom 3:8; 6:15) Nte emi ọwọrọ, ndien, nte ke mbon oro mîdịghe mme ama nneme m̀mê oro mîsituakke inua imam kpukpru ini inyeneke idatesịt? Baba! Ata idatesịt iwụtke idem ke edikprak inua, edisak imam, edituak inua imam, m̀mê edinyịn edet kpukpru ini. Mme idaha ẹsinam idatesịt owụt idem ke nsio nsio usụn̄. Idịghe idatesịt ikpọn̄ esinam nnyịn itie inem inem ke Ufọkmbono Obio Ubọn̄ edi, utu ke oro, edikere mban̄a ye ima nditọete nnyịn.

6. Ntak emi mme Christian ẹkemede ndidat esịt kpukpru ini idem ke ini mmọ ẹsobode ndiọi idaha?

⁶ Idaha idatesịt ofụri ini edi edidu oro enye odude taktak ke esịtidem nte ikpehe obufa edu esịt akpanikọ Christian. Emi edi se inamde ẹkeme ndidat esịt kpukpru ini. Nte ededi, ke ndusụk ini n̄kpọ ekeme ndifịna nnyịn mîdịghe nnyịn imekeme ndisobo mme idaha oro mînemke. Edi nnyịn imekeme ndisụk nnyene idatesịt ke esịt nnyịn. Ndusụk mme akpa Christian ẹkedi ifụn, ẹnyenede mme eteufọk oro ẹsọn̄de ido. Nte mme utọ Christian oro ẹma ẹkeme ndikop idatesịt kpukpru ini? Ih, ke ntak idotenyịn Obio Ubọn̄ mmọ ye idatesịt oro odude ke esịt mmọ—John 15:11; 16:24; 17:13.

7. (a) Nso ke Jesus eketịn̄ aban̄a idatesịt ke idak ukụt? (b) Nso isin̄wam nnyịn ndiyọ ke idak ukụt, ndien anie okonịm mfọnn̄kan uwụtn̄kpọ ke afan̄ emi?

⁷ Ndondo oro ke apostle Paul ama ọkọdọhọ: “Ẹdat esịt ke idotenyịn,” enye ama adian do ete: “Ẹnyene ime ke ukụt.” (Rome 12:12) Jesus n̄ko ama etịn̄ aban̄a idatesịt ke idak ukụt ke ini enye ọkọdọhọde ke Matthew 5:11, 12 ete: “Ọfọfọn ọnọ mbufo ke adan̄aemi owo ẹdisụn̄ide mbufo, ẹnyụn̄ ẹnam mbufo isịnenyịn . . . Ẹdat esịt, ẹdara etieti [”ẹfrọ ke idatesịt,” NW]: koro utịp mbufo ke heaven omokpon.” Iyomke edidara ye edifrọ ke idatesịt edi ata enyọn̄ enyọn̄ edinam; enye akpan akpan edi ntotụn̄ọ uyụhọ esịtidem oro owo enyenede ke ndinem Jehovah ye Jesus Christ esịt ke ini ọsọn̄ọde ada ke idak idomo. (Utom 5:41) Ke akpanikọ, idatesịt edi n̄kpọ oro an̄wamde nnyịn ndiyọ ke idak ukụt. (1 Thessalonica 1:6) Ke emi, Jesus ama onịm mfọnn̄kan uwụtn̄kpọ. N̄wed Abasi asian nnyịn ete: “Ke ntak idatesịt oro ẹkenịmde enye ke iso enye ama ọyọ eto ndutụhọ.”—Mme Hebrew 12:2, NW.

Ndidat Esịt ke Idotenyịn Kpa ye Mme Mfịna

8. Mme mfịna ewe ke mme Christian ẹkeme ndisobo, edi ntak emi mme mfịna mîkemeke ndibọ idatesịt Christian nduọk-ọ?

⁸ Ndidi asan̄autom Jehovah inamke owo ọbọhọ mme mfịna. Mme mfịna ubon, nsọn̄ọn̄kpọ ndutịm uforo, unana nsọn̄idem, m̀mê n̄kpa mbonima ẹkeme ndidu. Ke adan̄aemi mme utọ n̄kpọ oro ẹkemede ndida mfụhọ ndi, mmọ imenke ntak idatesịt nnyịn ke idotenyịn Obio Ubọn̄ ifep, kpa ntotụn̄ọ idatesịt oro nnyịn inyenede ke esịt nnyịn.—1 Thessalonica 4:13.

9. Nso mme mfịna ke Abraham ekenyene, ndien nnyịn isan̄a didie ifiọk ite ke enye ama okop idatesịt ke esịt esie?

⁹ Ke uwụtn̄kpọ, kere ban̄a Abraham. Uwem ikedịghe inem inem n̄kpọ inọ enye kpukpru ini. Enye ama enyene mme mfịna ubon. Hagar, n̄wanesa esie, ye Sarah, n̄wanndọ esie, ikodụhe ke emem. Utọk ama esidu. (Genesis 16:4, 5) Ishmael ama asak Isaac nsahi, ọkọbọde enye. (Genesis 21:8, 9; Galatia 4:29) Ke akpatre, Sarah, edima an̄wan Abraham, ama akpa. (Genesis 23:2) Kpa ye mme mfịna ẹmi, enye ama okop idatesịt aban̄a idotenyịn Mfri Obio Ubọn̄, kpa Mfri Abraham, emi editode ke enye ofụri ubon ererimbot ẹdiọn̄ idemmọ. (Genesis 22:15-18) Ye idatesịt ke esịt esie, enye ama ọyọ ke utom Jehovah ke isua ikie ke ama ọkọwọrọ ọkpọn̄ Ur, obio esie. Ke ntre ẹwet ẹban̄a enye ẹte: “Enye [okodori] enyịn ke Obio eke enyenede nsọn̄ọnda, eke Andibọp enye ye Andinam enye edi[de] Abasi.” Ke ntak mbuọtidem Abraham ke edidi Obio Ubọn̄ Messiah, Ọbọn̄ Jesus, ke Abasi ama ekememek enye nte Edidem, ama ekeme ndidọhọ ete: “Abraham akadat esịt ndikụt eyo Mi; enye okokụt onyụn̄ adat esịt.”—Mme Hebrew 11:10; John 8:56.

10, 11. (a) Nso en̄wan ke nnyịn nte mme Christian in̄wana, ndien didie ke ẹnyan̄a nnyịn? (b) Nso inam unana ukeme nnyịn ke ndin̄wana en̄wan nte ọfọnde ama mbiọn̄ọ anamidiọk ikpọkidem nnyịn?

¹⁰ Nte mme anana mfọnmma owo, nnyịn n̄ko imenyene anamidiọk ikpọkidem nnyịn ndin̄wana mbiọn̄ọ, ndien en̄wan emi ke ndinam se inende ekeme ndikama mfụhọ etieti. Nnyịn ndin̄wana mbiọn̄ọ mme mmeme nnyịn iwọrọke, nte ededi, nte ke nnyịn inyeneke idotenyịn. Paul ama okop mfụhọ aban̄a en̄wan emi, ndien enye ama ọdọhọ ete: “Anie edinyan̄a mi osio ke ikpọkidem n̄kpa emi? Mmọkọm Abasi ke Jesus Christ Ọbọn̄ nnyịn.” (Rome 7:24, 25) Ebede ke Jesus Christ ye ufak oro enye ọkọnọde, ẹma ẹnyan̄a nnyịn.—Rome 5:19-21.

¹¹ Uwa ufak Christ an̄wam unana ukeme nnyịn ndin̄wana en̄wan oro nte ọfọnde ama. Nnyịn imekeme ndidat esịt ke ufak emi koro enye anam ẹkeme ndinyene edisana ubieresịt ye edifen mme idiọkn̄kpọ nnyịn. Ke Mme Hebrew 9:14, Paul etịn̄ aban̄a “iyịp Christ” oro enyenede odudu ‘ndinam ubieresịt nnyịn asana ọbọhọ utom n̄kpa.’ Ntre, iyomke ubieresịt Christian akpa mba ke ubiomikpe ye mme ntụk unam ndudue. Emi, adianade ye idotenyịn oro nnyịn inyenede, etịp n̄kpọ esịn ke ọkpọsọn̄ odudu ndinyene idara idara inemesịt. (Psalm 103:8-14; Rome 8:1, 2, 32) Ke ndiwụk ekikere ke idotenyịn nnyịn, kpukpru nnyịn iyenyene nsịnudọn̄ ndin̄wana en̄wan oro uforo uforo.

Ndinyene Idotenyịn Nnyịn ke Ekikere

12. Nso idotenyịn ke mme Christian oro ẹyetde aran ẹkeme nditie n̄kere?

¹² Edi akpan n̄kpọ nsụhọ oro ẹyetde aran ye mme erọn̄ en̄wen ndinyene “idotenyịn edinyan̄a” ke ekikere, ẹyarade enye nte ndụn ibuot oro ọnọde ukpeme. (1 Thessalonica 5:8) Mme Christian oro ẹyetde aran ẹkeme ndiwụk ekikere ke utịbe ifet edinyene uwem oro mîkemeke ndikpa ke heaven, ẹnyenede ifet ndidu ye Jehovah Abasi, ẹnyụn̄ ẹnyenede ọkpọkpọ itie ebuana ye Jesus Christ oro ẹnọde ubọn̄ ye mme apostle ye kpukpru owo 144,000 eken, ẹmi ẹkemụmde nsọn̄ọnda mmọ ẹkama ke ediwak isua ikie ẹmi ẹkebede. Nso eti ebuana oro inua mîkemeke nditịn̄ ke emi edi ntem!

13. Didie ke mbon oro ẹyetde aran ẹmi ẹsụk ẹdude ke isọn̄ ẹkere ẹban̄a idotenyịn mmọ?

¹³ Didie ke ibat ibat mbon oro ẹyetde aran ẹmi ẹsụk ẹdude ke isọn̄ ẹkere ẹban̄a idotenyịn Obio Ubọn̄ mmọ? Ẹkeme ndinam emi an̄wan̄a ke ikọ F. W. Franz, etieibuot Watch Tower Society, emi akanade baptism ke 1913: “Idotenyịn nnyịn edi n̄kpọ oro ọsọn̄de, ndien enye eyesu ọyọhọ ọyọhọ tutu ke idem akpatre owo ke otu owo 144,000 eke ekpri otuerọn̄ okosịm udomo oro ebede se nnyịn ikakam ikerede. Nnyịn mme nsụhọ oro ikodude ke isua 1914, ke ini emi nnyịn ikodoride enyịn kpukpru nnyịn ndika heaven, ikọduọkke eti ekikere idotenyịn nnyịn oro. Edi nnyịn imokop nsọn̄idem iban̄a enye ikan nte akanam ikopde, ndien nnyịn imowụt esịtekọm iban̄a enye adan̄a nte nnyịn inyenede ndibet enye. Enye edi n̄kpọ oro odotde nditie mbet, idem ekpedi edida ediwak miliọn isua. Ami mbat idotenyịn nnyịn ke ọsọn̄urua n̄kpọ n̄kan nte akanam edide ke mbemiso, ndien ami ndehede nyom nditaba idatesịt mi oro nyenede mban̄a enye. Idotenyịn ekpri otuerọn̄ n̄ko ọnọ nsọn̄ọ nte ke se akwa otuowo eke mme erọn̄ en̄wen ẹdoride enyịn ẹban̄a, ye unana edikpu ekededi, eyesu ke usụn̄ oro akande nnyama n̄kan ekikere nnyịn. Ntak edi oro nnyịn isọn̄ọde ida tutu osịm idaha emi, ndien nnyịn iyesọn̄ọ ida tutu Abasi ke akpanikọ owụt nte ke imọ idi akpanikọ kaban̄a ‘ọsọn̄urua ye ata ubọn̄ ubọn̄ un̄wọn̄ọ’ esie.”—2 Peter 1:4; Numbers 23:19; Rome 5:5.

Ndidat Esịt Idahaemi ke Idotenyịn Paradise

14. Nso idotenyịn ke oyom akwa otuowo ẹnyene ke ekikere?

¹⁴ Utọ idara idara ikọ mbuọtidem oro ọnọ mbon akwa otuowo eke mme erọn̄ en̄wen ikpọ ntak ndidat esịt. (Ediyarade 7:15, 16) Oyom utọ mbon oro ẹnyene idotenyịn edibọhọ Armageddon ke ekikere. Ih, ẹsak iso ẹse edikụt Obio Ubọn̄ Abasi owụtde unen itie edikara ofụri ekondo Jehovah onyụn̄ anamde ubọn̄ ubọn̄ enyịn̄ esie asana ke ndida akwa ukụt ndi, emi edinamde isọn̄ asana ọbọhọ mme anamidiọk emi Devil edide abasi mmọ. Nso n̄kpọ idatesịt ke edidi ntem ndibọhọ akwa ukụt oro!—Daniel 2:44; Ediyarade 7:14.

15. (a) Nso utom ukọkudọn̄ọ ke Jesus akanam ke ini enye okodude ke isọn̄, ndien ntak-a? (b) Nso nsọn̄idem ke mme andibọhọ Armageddon ediyom, ndien ntak ẹmi mmọ enyenede ukpụhọde ye mbon oro ẹnamde ẹset ke n̄kpa?

¹⁵ Kaban̄a akwa otuowo, Ediyarade 7:17 ọdọhọ ete: “Eyenerọn̄ . . . eyedi Andikpeme mmọ, eyenyụn̄ ada mmọ aka ke idịm mmọn̄ uwem: ndien Abasi eyekwọhọde kpukpru mmọn̄eyet ke enyịn mmọ efep.” Okposụkedi prọfesi emi enyenede edisu ke n̄kan eke spirit idahaemi, mme andibọhọ Armageddon ẹyekụt enye osude ke ataata usụn̄. Didie ke edi ntre? Ọfọn, nso ke Jesus akanam ke ini okodude ke isọn̄? Enye ama anam mbon oro ẹkebiomode ndo ẹkop nsọn̄idem, anam mbụn̄ọ asan̄a, esịrede utọn̄ mbon inan onyụn̄ atat nnan enyịn, enye ama onyụn̄ ọkọk udọn̄ọ akpamfia, akpauben̄, ye “kpukpru orụk udọn̄ọ ye kpukpru orụk mmemidem.” (Matthew 9:35; 15:30, 31) Nte oro idịghe se mme Christian ẹyomde mfịn? Akwa otuowo ẹyemen mme ndo ye mmemidem akani ererimbot emi ẹbe ẹdụk obufa ererimbot. Nso ke nnyịn idori enyịn ndikụt Eyenerọn̄ anamde aban̄a oro? N̄kpọ oro mme andibọhọ Armageddon ẹdiyomde ẹyenyene ata ukpụhọde ye mme n̄kpọ oro mbon oro ẹdinamde ẹset ẹdiyomde. Eyedi ẹyefiak ẹbot mbon oro ẹdinamde ẹset ye ofụri, eti, ọsọn̄idem ikpọkidem, okposụkedi mîdinyeneke kan̄a mfọnmma eke owo. Ke ntak utịben̄kpọ ediset ke n̄kpa, mmọ nte an̄wan̄ade ke oro ebede idiyomke ẹfiak ẹdiọn̄ akani ndo ekededi ebe ke utịbe utịbe ukọkudọn̄ọ. Ke n̄kan̄ eken, ke ntak san̄asan̄a ifiọk n̄kpọntịbe mmọ ke ndibọhọ Armageddon, utịbe utịbe utom ndudiọn̄ edi se ediwak owo ke otu akwa otuowo ẹdiyomde ẹdinyụn̄ ẹbọde. Nte an̄wan̄ade, akpan uduak ukọkudọn̄ọ Jesus ekedi man ẹwụt akwa otuowo nte n̄kpọ nsịnudọn̄ idara idara idotenyịn oro nte ke mmọ idibọhọke ikpọn̄îkpọn̄ edi ke ẹyekọk udọn̄ọ mmọ ke oro ebede.

16. (a) Ini ewe ke utịbe utịbe ukọkudọn̄ọ mme andibọhọ Armageddon edida itie, ndien ye nso utịp? (b) Ke ewe idotenyịn ke nnyịn idika iso ndikop idatesịt mban̄a ke ini Ukara Tọsịn Isua?

¹⁶ Utọ utịbe utịbe ukọkudọn̄ọ oro nte owụtde ifiọk edida itie ke otu mme andibọhọ Armageddon ke ekpri ibio ini ke Armageddon ebede ye ke akamba udomo mbemiso ediset ke n̄kpa ọtọn̄ọde. (Isaiah 33:24; 35:5, 6; Ediyarade 21:4; men Mark 5:25-29 domo.) Adan̄aoro mme owo ẹyeduọn̄ọ mme akrasi enyịn mmọ, eto isan̄, n̄kpọitie mbon n̄kpọnnam, ubọk-nnam edet, mme n̄kpọ un̄wam ndikop ikọ, ye mme n̄kpọ ntre. Nso n̄kpọ ndidat esịt ke emi edidi ntem! Utọ ntọn̄ọ ntọn̄ọ edinam Jesus eke edifiak n̄wụk oro editịm odot didie ntem ye udeme oro mme andibọhọ Armageddon ẹnyenede nte itiat idakisọn̄ obufa ererimbot! Ẹyesio mme udọn̄ọ ubiomo owo ndo ẹfep man mme andibọhọ ẹmi ẹkeme ndisan̄a n̄ka iso iso ye idatesịt, ẹsakde iso ye ọkpọsọn̄ udọn̄ ẹse utịbe utịbe edinam eke Ukara Tọsịn Isua oro anyanarede ana mmọ ke iso, ikopke mmemidem ke ubiak oro akani ererimbot akadade ọsọk mmọ. Ndien kpukpru mmọ ke idak Ukara Tọsịn Isua ẹyedat esịt ke idotenyịn edisan̄a nsịm ata uyọhọ mfọnmma uwem eke owo etisịm utịt tọsịn isua oro.

17. Nso idatesịt edidu nte utom edifiak n̄wụk Paradise akade iso?

¹⁷ Edieke oro edide idotenyịn fo, tie kere n̄ko idara edibuana ke ndifiak n̄wụk Paradise ke isọn̄. (Luke 23:42, 43) Nte eyịghe mîdụhe mme andibọhọ Armageddon ẹyen̄wam ke ndinam isọn̄ asana ndien ke ntre ẹnamde nti itie ẹdu ẹnọ mme akpan̄kpa oro ẹdinamde ẹset. Ẹyekpụhọ mme edinam ubụkowo ye mme edinam ndidara mbon oro ẹnamde ẹset, esịnede mbonima nnyịn oro ẹkekpade. Ndien kere ban̄a inem inem ebuana oro ẹdinyenede ye mme anam-akpanikọ irenowo ye iban eke ediwak isua ikie ẹmi ẹkebede. Anie akpan akpan ke afo ediyom ndineme nneme? Nte edidi Abel, Enoch, Noah, Job, Abraham, Sarah, Isaac, Jacob, Joseph, Moses, Joshua, Rahab, Deborah, Samson, David, Elijah, Elisha, Jeremiah, Ezekiel, Daniel, m̀mê John Andinịm owo baptism? Ọfọn, ndien, inem inem ini iso emi edi n̄ko ubak idotenyịn fo. Afo eyekeme ndinyene nneme ye mmọ, ekpep n̄kpọ oto mmọ, onyụn̄ anam utom ọtọkiet ye mmọ ke ndinam ofụri isọn̄ edi Paradise.

18. Nso n̄kaiso idatesịt ke nnyịn ikeme nditie n̄kere?

¹⁸ Kere, n̄ko, eti udia, nsasana mmọn̄, eti ofụm, ye isọn̄ nnyịn emi ẹfiakde ẹwụk ke mfọnmma idaha itieidụn̄ esie oro adade ukem ukem ke usụn̄ emi Jehovah okobotde enye ndidi. Adan̄aoro uwem ididịghe sụk ndebe ndebe mfọnmma idara, edi enyene-uwem ye inem inem edibuana ke mme utom idatesịt. Tie kere n̄kaowo eke ofụri ererimbot emi afai, ndomoidem, ufụp, utọk mîdụhe—kpa itie nditọete emi kpukpru owo ẹkọride ẹnyụn̄ ẹsion̄ode mbun̄wụm spirit. Emi edi n̄kpọ nduai-idem didie ntem!—Galatia 5:22, 23.

Idotenyịn Oro Anamde Uwem Odot Ndidu

19. (a) Ini ewe ke edinyene idatesịt oro ẹtịn̄de ke N̄wed Mbon Rome 12:12? (b) Ntak emi nnyịn ikpebierede nditre ndiyak mme mbiomo uwem ẹbọ idotenyịn nnyịn ẹduọk?

¹⁹ Se ẹketiede ẹbet oro ẹnyenede idịghe aba idotenyịn, ntre idatesịt oro Paul esịnde udọn̄ ọnọ ke N̄wed Mbon Rome 12:12 edi se anade ẹnyene idahaemi. (Rome 8:24) Ndikam n̄kere mban̄a edidiọn̄ ini iso oro Obio Ubọn̄ Abasi edidade edi edi ntak ọnọ nnyịn ndidat esịt ke idotenyịn oro idahaemi. Ntre biere nditre ndiyak mme mbiomo uwem ke idiọk ererimbot emi ọbọ fi ubọn̄ ubọn̄ idotenyịn oro ọduọk. Kûkop mmemidem unyụn̄ ukpa mba, atabade idotenyịn oro anade ke iso. (Mme Hebrew 12:3) Ndikpọn̄ usụn̄ Christian idikọkke mme mfịna fo. Ti, edieke owo etrede ndinam n̄kpọ Abasi ke ntak kpukpru mbiomo eke uwem idahaemi, enye osụk enyenyene mme mbiomo oro, edi enye ataba idotenyịn ndien ke ntre ataba ukeme edidara utịbe utịbe idotenyịn oro anade ke iso.

20. Nso utịp ke idotenyịn Obio Ubọn̄ enyene ke idem mbon oro enyịmede enye, ndien ntak-a?

²⁰ Ikọt Jehovah ẹnyene kpukpru ntak ndidu inem inem uwem. Nnyayama, okopodudu idotenyịn mmọ anam uwem odot ndidu. Ndien mmọ imụmke idara idara idotenyịn emi inịm inọ idemmọ ikpọn̄. Baba, mmọ ẹnyene udọn̄ ndibuana enye ye mmọ en̄wen. (2 Corinth 3:12) Ntre ke edi nte ke mbon oro ẹnyenede idotenyịn Obio Ubọn̄ ẹdi mbon oro ẹnyenede mbuọtidem, ndien mmọ ẹyom ndisịn udọn̄ nnọ mbon en̄wen ke ndineme eti mbụk otode Abasi ye mmọ. Emi anam uwem mbon oro ẹnyịmede etop oro ọyọhọ ye ata utịbe utịbe idotenyịn oro akanam ẹnọde ubonowo ke ofụri ofụri—kpa idotenyịn Obio Ubọn̄ oro edifiakde owụk Paradise ke isọn̄. Edieke mme owo mînyịmeke ndibọ enye, nnyịn isụk ikaka iso ikop idatesịt koro nnyịn imenyene idotenyịn oro. Mbon oro ẹtrede ndikop ẹdi mbon oro ẹtabade ‘idịghe nnyịn. —2 Corinth 4:3, 4.

21. Nso isan̄a ikpere, ndien didie ke nnyịn ikpese idotenyịn nnyịn?

²¹ Un̄wọn̄ọ Abasi edi: “Sese, mmanam kpukpru n̄kpọ ẹdi mbufa.” (Ediyarade 21:5) Obufa ererimbot ye kpukpru utịbe utịbe ye anana-utịt edidiọn̄ esie ke ekpere. Idotenyịn nnyịn—ndidu uwem ke heaven m̀mê ke Paradise isọn̄—edi ọsọn̄urua; sọn̄ọ mụm enye kama. Ke ndiọkeyo eke mme akpatre usen ẹmi, oro ẹdiọkde ẹkan nte akanam edide, kere ban̄a enye nte “ukwakubom ukpọn̄ nnyịn, eke mîdikpụhe nnyịn, edi ọsọn̄ọde omụm isọn̄.” Ye idotenyịn nnyịn ọkọn̄ọde ke Jehovah, “nsinsi itiat—kpa Itiat mme emana,” nnyịn ke akpanikọ imenyene okopodudu ye enyene-uwem ntak idahaemi ‘ndidat esịt ke idotenyịn’ oro ẹnịmde nnyịn ke iso.—Mme Hebrew 6:19; Isaiah 26:4, The Amplified Bible.

[Mme ikọ idakisọn̄]

◻ Nso idi akwa idotenyịn ubonowo?

◻ Nso idi ata idatesịt?

◻ Anaedi ini ewe ke utịbe utịbe ukọkudọn̄ọ eke mme andibọhọ Armageddon edida itie?

◻ Ntak emi nnyịn mîkpayakke mme mbiomo uwem ẹbọ idotenyịn nnyịn ẹduọk?

◻ Idatesịt ewe ke afo asak iso ese ke obufa ererimbot?

[Mme Mbụme Ndụn̄ọde]

[Ndise ke page 9]

Nte idatesịt ikpọyọhọke fi esịt ndikụt orụk ukọkudọn̄ọ oro Jesus akanamde?

[Ndise ke page 10]

Mbon oro ẹkopde idatesịt ke Obio Ubọn̄ ẹsịn udọn̄ ẹnọ mmọ en̄wen ke ndibuana idotenyịn mmọ