Esịk Ẹkpere Jehovah

“Ẹkọbọ ke edibọn̄ akam.”—ROME 12:12.

1. Nso idi uduak Jehovah kaban̄a akam, ndien nso n̄kpọ nsịnudọn̄ ke apostle Paul ọkọnọ aban̄a edibọn̄ akam?

JEHOVAH edi “Abasi idotenyịn” ọnọ kpukpru mme anam-akpanikọ ikọt esie. Nte “Andikop akam,” enye esikpan̄ utọn̄ ke mme eben̄e oro mmọ ẹben̄ede ẹyom un̄wam ndinyene idara idara idotenyịn oro enye onịmde mmọ ke iso. (Rome 15:13; Psalm 65:2, NW) Ndien ebede ke Ikọ esie, kpa Bible, enye esịn udọn̄ ọnọ kpukpru mme asan̄autom esie ndidi mbịne enye ini ekededi oro mmọ ẹyomde. Enye odu do kpukpru ini, aduakde ndikop udọn̄ esịtidem mmọ. Ke akpanikọ, enye esịn udọn̄ ọnọ mmọ ete “ẹkọbọ ke edibọn̄ akam” ndien “ẹkûdop akam.”a (Rome 12:12; 1 Thessalonica 5:17) Edi uduak Jehovah nte kpukpru Christian ẹkot enye kpukpru ini ke akam, ẹn̄wan̄ade esịt mmọ ẹnọ enye ẹnyụn̄ ẹnamde ntre ke enyịn̄ edima Eyen esie, Jesus Christ.—John 14:6, 13, 14.

2, 3. (a) Ntak emi Abasi ọkọnọde nnyịn item ete ‘ikọbọ ke edibọn̄ akam’? (b) Nso nsọn̄ọ ke nnyịn inyene nte ke Abasi oyom nnyịn ibọn̄ akam?

² Ntak emi Abasi ọnọde nnyịn item emi? Koro mme mfịghe uwem ye mme mbiomo ẹkeme ndifịk nnyịn nnịm akamba akamba tutu nnyịn ifre ndibọn̄ akam. Mîdịghe mme mfịna ẹkeme ndikan nnyịn ubọk ẹnyụn̄ ẹnam nnyịn itre ndikop idatesịt ke idotenyịn inyụn̄ itre ndibọn̄ akam. Ke ikerede iban̄a mme n̄kpọ ẹmi, nnyịn imoyom mme n̄kpọ editi oro ẹsịnde udọn̄ ẹnọ nnyịn ndibọn̄ akam nnyụn̄ ntịm nsan̄a n̄kpere ebiet un̄wam ye ndọn̄esịt, kpa Jehovah Abasi nnyịn.

³ Mbet James ekewet ete: “Ẹsan̄a ẹkpere Abasi, ndien enye eyesan̄a ekpere mbufo.” (James 4:8) Ih, Abasi ikon̄ke ikaha inyụn̄ iyomke usụn̄ ikaha ndikop mme ikọ oro itịn̄de inọ enye, kpa ye idaha unana mfọnmma nnyịn. (Utom 17:27) N̄ko-n̄ko, enye inanake udọn̄ ye edikere mban̄a. Andiwet psalm ọdọhọ ete: “Enyịn Jehovah ese mbon eti ido, utọn̄ esie onyụn̄ ọbiọn̄ọ ọnọ eseme mmọ.”—Psalm 34:15; 1 Peter 3:12.

4. Didie ke ẹkeme ndinam an̄wan̄a nte Jehovah akpan̄de utọn̄ ke akam?

⁴ Jehovah esikop akam. Nnyịn imekeme ndida emi ndomo ye mboho emi ediwak owo ẹdude ọtọkiet ẹneme nneme. Afo odu do, ke akpan̄ utọn̄ okop mmọ en̄wen ẹtịn̄de ikọ. Utom fo edi eke andidada nse. Edi ekem owo kiet ọwọn̄ọde ese fi, okot fi enyịn̄, onyụn̄ etịn̄ ikọ ọnọ fi. Emi omụm udọn̄ fo ke san̄asan̄a usụn̄. Ukem ntre, Abasi kpukpru ini esikpan̄ utọn̄ ọnọ ikọt esie, inamke n̄kpọ m̀mê mmọ ẹdu ke m̀mọ̀n̄. (2 Chronicles 16:9; Mme Nke 15:3) Ntre enye esikop mme ikọ nnyịn, yak idọhọ, ekpeme onyụn̄ etịn̄ enyịn ese ye udọn̄. Ke ini nnyịn ikotde enyịn̄ Abasi ke akam, nte ededi, imesimụm n̄kpan̄utọn̄ esie, ndien enye idahaemi owụk ntịn̄enyịn ke idem nnyịn ke in̄wan̄în̄wan̄ usụn̄. Ebede ke odudu esie, Jehovah ekeme idem ndidiọn̄ọ nnyụn̄ mfiọk eben̄e oro owo eben̄ede ke ndopuyo ke ntotụn̄ọ esịt ye ekikere oro odịbede. Abasi ọn̄wọn̄ọ ọnọ nnyịn ete ke imọ iyesan̄a ikpere kpukpru mbon oro ẹkotde enyịn̄ imọ ke esịt akpanikọ ẹnyụn̄ ẹyomde ndisịk n̄kpere imọ.—Psalm 145:18.

Nam N̄kpọ Nte Ekemde ye Uduak Abasi

5. (a) Nso ke item oro “ẹkọbọ ke edibọn̄ akam” owụt kaban̄a akam nnyịn? (b) Didie ke Abasi esibọrọ mme akam?

⁵ Item oro ndikọbọ ke edibọn̄ akam owụt nte ke Jehovah ke ndusụk ini ekeme ndiyak nnyịn ikaiso ibọn̄ akam iban̄a n̄kpọ kiet ke esisịt ini mbemiso ibọrọ esie akabarede ana in̄wan̄în̄wan̄. Nnyịn imekeme idem ndikpa mba ke ndiben̄e Abasi mfọn m̀mê ima-mfọnido oro ekemede nditie nte ẹnen̄ede ẹyom edi oro ẹsiode ẹnịm ke anyanini. Ntre, Jehovah Abasi ekpe nnyịn ubọk ete ikûyak idem inọ utọ ntụhọ oro ekededi edi ikaiso ndibọn̄ akam. Nnyịn ikpenyene ndikaiso n̄kpe enye ubọk mban̄a mme n̄kpọ oro nnyịn iyomde, inyenede mbuọtidem nte ke enye eyekpono akam nnyịn eyenyụn̄ ọnọ nnyịn ata se nnyịn iyomde, idịghe sụk se nnyịn ikekemede nditịn̄. Jehovah Abasi nte eyịghe mîdụhe esinam mme n̄kpeubọk nnyịn ẹda ukem ukem nte ekemde ye uduak esie. Ke uwụtn̄kpọ, eben̄e nnyịn ekeme nditụk mbon efen. Nnyịn imekeme ndimen n̄kpọ emi ndomo ye ete emi eyen esie eben̄ede enye enan̄ukwak. Ete oro ọfiọk ete ke edieke imọ idepde enan̄ukwak inọ eyen oro, eyeneren esie enye eken eyeyom kiet n̄ko. Sia eyeneren kiet ekemede ndikpri n̄kaha ndiwat enan̄ukwak, ete ekeme ndibiere nditre ndidep ekededi ke ini oro. Ke ukem usụn̄ oro, ke un̄wana uduak esie ye ekemini mme n̄kpọ, Ete nnyịn eke heaven esibiere se inen̄erede ifọn ikan inọ nnyịn ye mmọ efen.—Psalm 84:8, 11; men Habakkuk 2:3 domo.

6. Nso uwụtn̄kpọ ke Jesus ọkọnọ aban̄a nte ẹbọn̄de akam, ndien edikọbọ ke edibọn̄ akam owụt nso?

⁶ Se idotde ẹfiọk edi uwụtn̄kpọ oro Jesus ọkọnọde aban̄ade ufọn oro mme mbet esie “ẹkpebọn̄[de] akam kpukpru ini, ẹkûnyụn̄ ẹkpa mba.” Ebeakpa kiet, sia mîkemeke ndinyene unenikpe, ama ọkọbọ ke eben̄e oro enye ekeben̄ede ebiereikpe kiet edide owo tutu enye ke akpatre ọbọ unenikpe. Jesus ama adian do ete: “Nte Abasi idinyụn̄ isioho usiene inọ ndimek ikọt Esie?” (Luke 18:1-7) Ndikọbọ ke akam owụt mbuọtidem nnyịn, ibetedem nnyịn ke Jehovah, unyịme nnyịn ndisịk n̄kpere enye nnyụn̄ nnam n̄kpeubọk, iyakde se ididide utịp isịn enye ke ubọk.—Mme Hebrew 11:6.

Mme Uwụtn̄kpọ Edisịk N̄kpere Jehovah

7. Didie ke nnyịn ikeme ndikpebe mbuọtidem Abel ke ndisịk n̄kpere Jehovah?

⁷ Bible ọyọhọ ye mme mbụk ẹban̄ade mme akam oro mme asan̄autom Abasi ẹkebọn̄de. “Ẹkewet [mmọemi] ndida n̄kpep nnyịn n̄kpọ, man nnyịn inyene idotenyịn oto ke ime ye ndọn̄esịt eke N̄wed Abasi ọnọde.” (Rome 15:4) Nnyịn ndidụn̄ọde ndusụk uwụtn̄kpọ mbon oro ẹkesịkde ẹkpere Jehovah eyesọn̄ọ idotenyịn nnyịn. Abel ama awa uwa oro ẹnyịmede ọnọ Abasi, ndien okposụkedi owo mîtịn̄ke iban̄a akam ndomokiet, enye nte eyịghe mîdụhe ama ekpe Jehovah ubọk ke akam man ẹkpenyịme uwa esie. Mme Hebrew 11:4 ẹdọhọ ete: “Oto mbuọtidem Abel ada uwa eke ọfọnde akan eke Cain awa ọnọ Abasi, emi otode ke esịt ẹtịn̄ ikọ ẹdian enye, ẹte, enye edi edinen owo.” Abel ama ọdiọn̄ọ aban̄a un̄wọn̄ọ Abasi ke Genesis 3:15, edi ke ẹmende ẹdomo ye se nnyịn idiọn̄ọde idahaemi, enye ọkọdiọn̄ọ ata esisịt n̄kpọ. Edi, Abel akanam n̄kpọ etiene ifiọk oro enye ekenyenede. Ntre mfịn, ndusụk mbon oro ẹnyenede udọn̄ obufa obufa ke akpanikọ Abasi inyeneke ekese ifiọk, edi mmọ ẹsibọn̄ akam ẹnyụn̄ ẹda n̄wakn̄kan ifiọk oro mmọ ẹnyenede ẹnam n̄kpọ, nte Abel akanamde. Ih, mmọ ẹnam n̄kpọ ke mbuọtidem.

8. Ntak emi nnyịn ikemede ndinịm ke akpanikọ nte ke Abraham ama esịk ekpere Jehovah, ndien ewe mbụme ke ikpobụp idem nnyịn?

⁸ Anam-akpanikọ asan̄autom Abasi efen ekedi Abraham, kpa “ete kpukpru mmọemi ẹbuọtde idem.” (Rome 4:11) Mfịn, ke akande nte akanam edide, nnyịn imoyom ọkpọsọn̄ mbuọtidem, ndien oyom nnyịn ibọn̄ akam ke mbuọtidem, nte Abraham ọkọbọn̄de. Genesis 12:8 ọdọhọ ke enye ama anam itieuwa “ọnọ Jehovah, onyụn̄ okot Jehovah ke enyịn̄.” Abraham ama ọdiọn̄ọ enyịn̄ Abasi onyụn̄ ada enye ke akam. Ediwak ini enye ke esịt akpanikọ ama ọkọbọ ke edibọn̄ akam, okotde “enyịn̄ Jehovah, Nsinsi Abasi.” (Genesis 13:4; 21:33) Abraham ke okokot enyịn̄ Abasi ke mbuọtidem emi ke ntak oro enye akakabarede ọwọrọ etop. (Mme Hebrew 11:17-19) Akam ama an̄wam Abraham ndikaiso n̄kop idatesịt akamba akamba ke idotenyịn Obio Ubọn̄. Nte nnyịn ke itiene uwụtn̄kpọ Abraham ke ndikọbọ ke edibọn̄ akam?

9. (a) Ntak emi akam David enyenede akamba ufọn ẹnọ ikọt Abasi mfịn? (b) Nso ikeme ndisụn̄ọ nto nnyịn ndibọn̄ akam nte David ọkọbọn̄de ndisịk n̄kpere Jehovah?

⁹ David ekedi n̄wọrọnda kaban̄a edikọbọ ke edibọn̄ akam, ndien mme psalm esie ẹwụt se mme akam ẹkpesịnede. Ke uwụtn̄kpọ, mme asan̄autom Abasi ẹkeme nte odotde ndibọn̄ akam mban̄a mme utọ n̄kpọ nte ubọhọ m̀mê edinyan̄a (Ps 3:7, 8; 60:5), ndausụn̄ (Ps 25:4, 5), ukpeme (Ps 17:8), edifen mme idiọkn̄kpọ (Ps 25:7, 11, 18), ye edisana esịt (Ps 51:10). Ke ini David okokụtde ukụt, enye ama ọbọn̄ akam ete: “Dat owo fo esịt.” (Ps 86:4) Nnyịn imekeme ndibọn̄ akam ukem ntre mban̄a idara eke esịt, ifiọkde ite ke Jehovah oyom ete nnyịn idat esịt ke idotenyịn nnyịn. David ama esịk ekpere Jehovah onyụn̄ ọbọn̄ akam ete: “Ukpọn̄ mi eyịre fi ke edem: ubọk nnasia fo omụm mi akama.” (Ps 63:8) Nte nnyịn iyesịk ikpere Jehovah, nte David ekesịkde ekpere? Edieke nnyịn inamde, enye eyemụm nnyịn akama ukem ntre.

10. Mme ukwan̄ ekikere ewe ke Asaph andiwet psalm ekenyene ke idaha kiet, edi nso ke enye ekedifiọk?

¹⁰ Edieke anade nnyịn isịk ikpere Jehovah, oyom nnyịn ifep edifụbe mme idiọkowo ufụp ke ntak uwem nnam-se-mmade ye uma inyene. Asaph andiwet psalm ke idaha kiet ama ekere ete ke ufọn idụhe ndinam n̄kpọ Jehovah, koro mme idiọkowo “ẹtie ke ifụre kpukpru ini.” Edi, enye ama edifiọk ete ke ekikere imọ ama akwan̄a ye nte ke mme idiọkowo ẹdu ke “mfọfiọnọ ebiet.” Enye ama ọfiọk ete ke n̄kpọ ndomokiet ifọnke ikan ndisịk n̄kpere Jehovah, ndien enye ama enyene nneme ye Abasi ke usụn̄ emi ete: “Ami nsụk ndodu ye afo kpukpru ini: afo omụm mi ubọk nnasia. Koro, sese, mmọ eke ẹdianarede ẹkpọn̄ fi anyanusụn̄, ẹyetak: . . . Edi amaedi ami, ọfọn mi ndikpere Abasi: mberedem ye Ọbọn̄ Jehovah, man mbụk kpukpru mme utịbe n̄kpọ fo.” (Psalm 73:12,13, 18, 23, 27, 28) Utu ke ndifụbe uwem nnam-se-mmade mme idiọkowo, kpa mbon oro mînyeneke idotenyịn, ẹyak nnyịn ikpebe Asaph ke ndisịk n̄kpere Jehovah.

11. Ntak emi Daniel edide eti uwụtn̄kpọ ke edisịk n̄kpere Jehovah, ndien didie ke nnyịn ikeme ndikpebe enye?

¹¹ Daniel ama ọkọbọ ofụri ofụri ke edibọn̄ akam, idem ke osobode n̄kpọndịk edidi se ẹtopde ẹsịn ke obube lion ke ntak okofụmide mme an̄wan̄wa ukpan oro ẹkekpande edibọn̄ akam. Edi Jehovah ‘ama ọdọn̄ angel esie edikịbi mme lion inua,’ ẹnyan̄ade Daniel. (Daniel 6:7-10, 22, 27) Ẹma ẹdiọn̄ Daniel akamba akamba ke enye ndikọkọbọ ke edibọn̄ akam. Nte nnyịn n̄ko imesikọbọ ke edibọn̄ akam, akpan akpan ke ini isobode ye ubiọn̄ọ oro ẹbiọn̄ọde ukwọrọikọ Obio Ubọn̄ nnyịn?

Jesus, Uwụtn̄kpọ Nnyịn

12. (a) Ke ntọn̄ọ utom esie, nso uwụtn̄kpọ ke Jesus okonịm kaban̄a akam, ndien didie ke emi ekeme ndinyene ufọn nnọ mme Christian? (b) Nso ke akam uwụtn̄kpọ Jesus ayarade aban̄a akam?

¹² Toto ke ntọn̄ọ utom esie eke isọn̄, Jesus ama esibọn̄ akam. Edu ubọn̄ akam esie ke ini ẹkenịmde enye baptism onịm eti uwụtn̄kpọ ọnọ mbon oro ẹbụhọde ke mmọn̄ baptism ke ini nnyịn. (Luke 3:21, 22) Owo ekeme ndibọn̄ akam nnyom un̄wam Abasi man anam se edibụhọ ke mmọn̄ baptism adade aban̄a. Jesus n̄ko ama an̄wam mbon efen ndisan̄a n̄kpere Jehovah ke akam. Ke idaha kiet ke ini Jesus okodude ke ebiet kiet ọbọn̄ akam, kiet ke otu mbet esie ama ọdọhọ enye ke oro ebede ete: “Ọbọn̄, kpep nnyịn ndibọn̄ akam.” Jesus adan̄aoro ama etịn̄ se ẹwakde ndidiọn̄ọ nte akam uwụtn̄kpọ, emi mme ibuot nneme ke adiana ke adiana ẹwụtde nte ke ẹkpenyene ndinọ enyịn̄ ye uduak Abasi uwọrọiso. (Luke 11:1-4) Ntem, ke akam nnyịn oyom nnyịn imụm nnennen ekikere ikama inyụn̄ ida ukem ukem, ifụmike ‘se idide akpan n̄kpọ ikan.’ (Philippi 1:9,10) Nte ededi, ini esidu oro ẹyomde san̄asan̄a n̄kpọ m̀mê ini oro ẹyomde ẹneme akpan mfịna. Nte Jesus, mme Christian ẹkeme ndika mbịne Abasi ke akam man ẹyom odudu ndise mban̄a ndusụk utom mîdịghe ẹsak iso ẹse mme akpan idomo ye n̄kpọndịk. (Matthew 26:36-44) Ke akpanikọ, ọkpọkpọ akam ekeme ndisịne ofụri ofụri ikpehe ke uwem.

13. Didie ke Jesus owụt nte edibọn̄ akam mban̄a mbon en̄wen edide akpan n̄kpọ?

¹³ Ebede ke eti uwụtn̄kpọ esie, Jesus ama owụt nte edibọn̄ akam ke ibuot mmọ en̄wen edide akpan n̄kpọ. Enye ama ọfiọk ete ke ẹyesua ẹnyụn̄ ẹkọbọ mme mbet imọ, idem nte ẹkenamde imọ. (John 15:18-20; 1 Peter 5:9) Enye, ke ntre, ama eben̄e Abasi ete “ekpeme mmọ ke idiọk esie.” (John 17:9, 11, 15, 20) Ndien ke ọfiọkde san̄asan̄a idomo oro akanade ke iso ebet Peter, enye ama asian enye ete: “Edi n̄kekpe ubọk nnọ fi, nte mbuọtidem okûbọhọ fi.” (Luke 22:32) Ọfọn didie ntem edieke nnyịn n̄ko ikọbọde ke ndibọn̄ akam ke ibuot nditọete nnyịn, ikerede iban̄a mmọ en̄wen inyụn̄ idịghe sụk mfịna m̀mê mme udọn̄ nnyịn!—Philippi 2:4; Colossae 1:9, 10.

14. Nnyịn isan̄a didie ifiọk ke Jesus ama esịk ekpere Jehovah ke ofụri ini utom esie eke isọn̄, ndien didie ke nnyịn ikeme ndikpebe enye?

¹⁴ Ke ofụri utom esie, Jesus ama ọkọbọ ke edibọn̄ akam, esịkde ekpere Jehovah ata etieti. (Mme Hebrew 5:7-10) Apostle Peter, ke Utom Mme Apostle 2:25-28, okot oto Psalm 16:8 onyụn̄ ada enye abuan ye Ọbọn̄ Jesus Christ ete: “David ọdọhọ aban̄a Enye ete, Mmokụt Jehovah ke iso Mi kpukpru ini; koro Enye odude Mi ke ubọk nnasia, mbak edisehede mi.” Nnyịn imekeme ndinam ukem oro. Nnyịn imekeme ndibọn̄ akam nnọ Abasi ite enye ekpere nnyịn, ndien nnyịn imekeme ndiwụt mbuọtidem ke Jehovah ke ndinyene enye ke ekikere kpukpru ini. (Men Psalm 110:5; Isaiah 41:10, 13 domo.) Do nnyịn iyefep kpukpru orụk mfịna, koro Jehovah eyen̄wam nnyịn, ndien nnyịn idisehekede tutu amama.

15. (a) Kaban̄a nso ke nnyịn mîkpedehede itre ndikọbọ ke edibọn̄ akam? (b) Nso item ke ẹnọ kaban̄a esịtekọm nnyịn?

¹⁵ Ẹyak nnyịn ikûdede itre ndikọm Jehovah ke kpukpru nti ido oro enye owụtde nnyịn, ih, “akwa mfọn Abasi,” emi esịnede enọ Eyen esie nte uwa ufak kaban̄a mme idiọkn̄kpọ nnyịn. (2 Corinth 9:14, 15; Mark 10:45; John 3:16; Rome 8:32; 1 John 4:9, 10) Ke akpanikọ, ke enyịn̄ Jesus, “ẹnọ Abasi Ete ekọm kpukpru ini ẹban̄a kpukpru n̄kpọ.” (Ephesus 5:19, 20; Colossae 4:2; 1 Thessalonica 5:18) Ana nnyịn itịm ikpeme man idiyak ekọm oro nnyịn inọde ke se nnyịn inyenede akabade edi idiọk ke ntak oro nnyịn isịnde idem ikaha ke se nnyịn mînyeneke m̀mê ke mme ọkpọkpọ mfịna nnyịn.

Nditop Mme Mbiomo Nnyịn Ndori Jehovah

16. Ke ini ndusụk mbiomo ẹfịnade nnyịn, nso ke nnyịn ikpanam?

¹⁶ Edikọbọ ke edibọn̄ akam owụt ntotụn̄ọ ukpono nnyịn. Ke ini nnyịn iyomde un̄wam Abasi, utịp oro enye enyenede ke idem nnyịn edi eti idem mbemiso enye ọnọ ibọrọ. Edieke ndusụk mbiomo ẹfịnade ekikere nnyịn, nnyịn imekeme ndisịk n̄kpere Jehovah ke nditiene item emi: “Top mbiomo fo nọ Jehovah, ndien enye eyekama fi.” (Psalm 55:22) Ebede ke nditop kpukpru mbiomo nnyịn—editịmede esịt, mme mfịna, edikpu, ndịk, ye ntre ntre—ndori Abasi ke idem, ye ọyọhọ mbuọtidem ke enye, nnyịn iyebọ ifụre eke esịt, kpa “emem Abasi, emi ayan̄ade ifiọk owo.”—Philippi 4:4, 7; Psalm 68:19; Mark 11:24; 1 Peter 5:7.

17. Didie ke nnyịn ikeme ndinyene emem Abasi?

¹⁷ Nte emem Abasi emi edi inikiet inikiet? Okposụkedi nnyịn ikemede ndinyene ndusụk ubọhọ usọp usop, se Jesus eketịn̄de aban̄a edibọn̄ akam nnyom edisana spirit edi akpanikọ ke nde emi n̄ko: “Ẹkaiso ẹben̄e, ndien ẹyenọ mbufo; ẹkaiso ẹyom, ndien mbufo ẹyekụt; ẹkaiso ẹkọn̄, ndien ẹyeberede ẹnọ mbufo.” (Luke 11:9-13, NW) Sia edisana spirit edide usụn̄ oro nnyịn ikemede nditop editịmede esịt nduọk, oyom nnyịn ikọbọ ke ndiben̄e nnyom emem Abasi ye un̄wam esie kaban̄a mme mbiomo nnyịn. Nnyịn imekeme ndinịm ke akpanikọ nte ke ebede ke ndikọbọ ke edibọn̄ akam, nnyịn iyenyene ubọhọ ye ifụre eke esịt oro nnyịn iyomde.

18. Nso ke Jehovah anam ọnọ nnyịn edieke nnyịn mîdiọn̄ọke nnennen se ikpọbọn̄de akam iban̄a ke ndusụk idaha?

¹⁸ Edi nso edieke nnyịn mîdiọn̄ọke nnennen se nnyịn ikpọbọn̄de akam iben̄e? Mmụm esịtidem nnyịn esiwak ndidu ye unana editetịn̄ koro nnyịn mîdiọn̄ọke idaha nnyịn ọyọhọ ọyọhọ, m̀mê ekikere ẹtịmerede nnyịn kaban̄a se nnyịn ikponịmde Jehovah ke iso. Edi mi ke edisana spirit ekeme ndinam n̄kpeubọk nnọ nnyịn. Paul ekewet ete: “Nnyịn [ifiọkke] ndibọn̄ akam nte nnyịn ikpọbọn̄de: edi spirit ke idemesie anam n̄kpeubọk ọnọ nnyịn ye mmụm eke owo mîkemeke nditịn̄.” (Rome 8:26) Didie ke edi ntre? Ke Ikọ Abasi mme prọfesi eke odudu spirit ye mme akam ẹdu ẹmi ẹnyenede ebuana ye idaha nnyịn. Enye, yak idọhọ, ayak mmọemi ẹnam n̄kpeubọk ẹnọ nnyịn. Enye onyịme mmọemi nte ẹdide se nnyịn ikpọbọn̄de akam iyom ama akam edi nnyịn imọdiọn̄ọ se mmọ ẹwọrọde ke idaha nnyịn, ndien nte odotde enye esinam mmọ.

Akam ye Idotenyịn Ndikaiso

19. Ntak emi akam ye mbuọtidem edikade iso ke nsinsi?

¹⁹ Akam oro ẹbọn̄de ẹnọ Ete nnyịn eke heaven ẹyeka iso ke nsinsi, akpan akpan kaban̄a esịtekọm oro ẹnyenede ẹnọ obufa ererimbot ye kpukpru mme edidiọn̄ esie. (Isaiah 65:24; Ediyarade 21:5) Nnyịn n̄ko iyekaiso ndidat esịt ke idotenyịn, koro idotenyịn ke ndusụk udomo eyedu ke nsinsi. (Men 1 Corinth 13:13 domo.) Nso mbufa n̄kpọ ke Jehovah edida edi ntem ke ini enye mîdidụhe aba ke idak Sabbath usen nduọkodudu esie oro enye odoride idemesie kaban̄a isọn̄, nnyịn ikemeke ndikam ntie n̄kere. (Genesis 2:2, 3) Ke nsinsi nsinsi, enye eyenyene ima ima n̄kpọ n̄kpaidem oro onịmde ke iso ọnọ ikọt esie, ndien ini iso akama ikpọ n̄kpọ ọnọ mmọ ke usụn̄ eke edinam uduak esie.

20. Nso ikpedi ubiere nnyịn, ndien ntak-a?

²⁰ Ye utọ aduai-owo idem idotenyịn oro odude ke iso ọnọ nnyịn, nnyịn ikpakam isịk ikpere Jehovah ke ndikọbọ ke edibọn̄ akam. Ẹyak nnyịn ikûdede itre ndinọ Ete nnyịn eke heaven ekọm ke kpukpru edidiọn̄ nnyịn. Ke edikem ini nnyịn iyenyene se idoride enyịn idara idara, idem ebede se nnyịn ikemede ndida n̄kụt m̀mê ndikekere, koro Jehovah ekeme “ndinam n̄kpọ [awak akan] se nnyịn iben̄ede inyụn̄ ikerede.” (Ephesus 3:20) Ke ikerede iban̄a emi, ndien, ẹyak nnyịn inọ Jehovah Abasi nnyịn, kpa “Andikop akam” kpukpru itoro ye ubọn̄ ye ekọm ke nsinsi nsinsi!

[Mme ikọ idakisọn̄]

Didie ke Afo Ọkpọbọrọ?

◻ Ntak oyomde nnyịn ikọbọ ke edibọn̄ akam?

◻ Nso ke nnyịn ikpep ito mme uwụtn̄kpọ akam mbemiso eyo mme Christian?

◻ Nso ke uwụtn̄kpọ Jesus ekpep nnyịn aban̄a akam?

◻ Didie ke nnyịn ikeme nditop mbiomo nnyịn ndori Jehovah ndien ye nso utịp?

[Ndise ke page 17]

Daniel ama ọkọbọ ke edibọn̄ akam kpa ye ndịghe edidi se ẹtopde esịn ke obube lion