Usụn̄ Ima Idibehe Ifep Ke Nsinsi
“Mbufo ẹyom enọ eke ẹkponde ẹkan ke ofụri esịt. Nnyụn̄ mmana n̄wụt mbufo usụn̄ eke akande mmọ eken kpukpru.”—1 CORINTH 12:31.
1-3. (a) Didie ke ndikpep ndiwụt ima enen̄ede etie nte ndikpep obufa usem? (b) Mme n̄kpọ ewe ẹkeme ndinam edikpep ndiwụt ima ẹdi n̄kpọ-ata?
NDI akanam afo omodomo ndikpep obufa usem? Ke nsụhọde n̄kaha, edi n̄kpọ-ata! Nte ededi, ekpri eyen ekeme ndikpep usem ebe ke ikpîkpu edidu ke ebiet ẹsemde enye. Mfre esie esisọsọp omụm mme uyo ye se mme ikọ ẹwọrọde, tutu ke mîbịghike ekpri eyen emi etịn̄ ikọ udọn udọn, eyedi kpukpru ini. Idịghe ntre ye ikpọ owo. Nnyịn inam ndụn̄ọde ke n̄wed ukabadeikọ usem esenidụt kpukpru ini, man ikam idiọn̄ọ mme akpan ubak udịmikọ ifan̄ ke usem esenidụt oro. Nte ededi, nte ini akade, adianade ye editịm mmehe ye obufa usem emi, nnyịn itọn̄ọ ndikere n̄kpọ ke ido obufa usem emi ndien nditịn̄ enye etịm emem utom.
2 Ndikpep ndiwụt ima enen̄ede etie nte ndikpep obufa usem. Edi akpanikọ, mme owo ẹdada ndusụk udomo edu Abasi emi ẹmana. (Genesis 1:27; men 1 John 4:8 domo.) Kpa ye oro, ndikpep ndiwụt ima oyom ekese ukeme—akpan akpan mfịn, emi ima uduot owo ananade ntem. (2 Timothy 3:1-5) Emi esitịbe ndusụk ini ke esịt ubon. Ih, ediwak owo ẹkọri ẹwọrọ owo ke n̄kann̄kụk oro etiede nsọn̄ido nsọn̄ido emi owo mîsiwakke nditịn̄ mme ikọ ima—ke akam edide ẹsitetịn̄. (Ephesus 4:29-31; 6:4) Do, didie ke nnyịn ikeme ndikpep nte ẹwụtde ima—idem edieke owo mîwakke ndiwụt nnyịn?
3 Bible ekeme ndin̄wam. Ke 1 Corinth 13:4-8, Paul ikakabakede se ima edide ke eto eto usụn̄, edi ọkọnọ in̄wan̄în̄wan̄ edinam an̄wan̄a ke nte n̄kon̄n̄kan orụk ima emi anamde n̄kpọ. Ndikere mban̄a mme ufan̄ikọ ẹmi ayan̄wam nnyịn ndifiọk uduot edu Abasi emi onyụn̄ etịm nnyịn idem nte ọfọnde ndiwụt enye. Ẹyak nnyịn idụn̄ọde ndusụk ikpehe ima nte Paul anamde an̄wan̄a. Nnyịn ididọn̄ mmọ ntatara ntatara ke ikpehe ita: edu nnyịn ke ofụri ofụri; ekem, ke edide akpan n̄kpọ akan, itie ebuana nnyịn ye mbon en̄wen; ndien, ke akpatre, ime nnyịn.
Ima An̄wam Nnyịn Ikan Ntan̄idem
4. Nso ikike ke Bible ọnọ aban̄a ufụp?
4 Ke ama eketịn̄ ntọn̄ọikọ esie aban̄a ima, Paul ekewet ọnọ ẹsọk mbon Corinth ete: “Ima ifịbeke ufụp.” (1 Corinth 13:4) Ufụp ekeme ndiwụt idem ke isịnenyịn ke mfọnọn̄kpọ mbon en̄wen m̀mê ke se mmọ ẹnamde. Utọ ufụp oro akama nsobo—ke n̄kan̄ eke ikpọkidem, ke n̄kan̄ eke ntụk, ye ke n̄kan̄ eke spirit.—Mme N̄ke 14:30; Rome 13:13; James 3:14-16.
5. Didie ke ima ekeme ndin̄wam nnyịn ndikan ufụp ke ini etiede nte ke ẹfụmi nnyịn kaban̄a ndusụk ifetutom ukara Abasi?
5 Ye emi ke ekikere, bụp idemfo ete, ‘Ndi ami mmesisịn enyịn ke ini etiede nte ke ẹfụmi ndinọ mi ndusụk ifetutom ukara Abasi?’ Edieke ibọrọ edide ih, kûduọk idotenyịn. James andiwet Bible eti nnyịn ete ke ‘spirit emi efịbede ufụp’ esịne kpukpru mme anana-mfọnmma owo ke idem. (James 4:5) Ima oro enyenede ọnọ eyenete fo ekeme ndin̄wam fi ndinyene edu oro adade ukem ukem. Ekeme ndinam fi adara ye mbon oro ẹdarade inyụn̄ idịghe ndida nte esesuene imọ ke ini owo en̄wen ọbọde edidiọn̄ m̀mê itoro.—Men 1 Samuel 18:7-9 domo.
6. Nso idiọk idaha akadaha ada ke esop Corinth eke akpa isua ikie?
6 Paul adian ete ke ima “inamke inua, ikohokede idem.” (1 Corinth 13:5) Edieke nnyịn inyenede ndusụk ndammana ukeme ye usọ, ufọn idụhe ndida enye n̄wụt idem. Nte an̄wan̄ade, emi ekedi mfịna ọnọ ndusụk mbon oro ẹkenyenede udọn̄ ikpọ n̄kpọ ẹmi ẹkedọn̄de ikpat ndịbe ndịbe ẹdụk esop Corinth eset. Ekeme ndidi nte ke mmọ ẹma ẹnyene ata nti ukeme ke nditat mme ekikere m̀mê ata eti usụn̄ ndida nnam mme n̄kpọ. Ekeme ndidi mmọ ndidụri ntịn̄enyịn nnọ idemmọ ama etịp esịn ke esop oro ndinyene mme mbahade-nda otu. (1 Corinth 3:3, 4; 2 Corinth 12:20) Idaha oro ama ọsọn̄ ubọk tutu Paul ke ukperedem ekenyene ndisọn̄ọ nsua nnọ mbon Corinth mban̄a mmọ ‘ndime ime ye mbon ndisịme ke inemesịt,’ ẹmi Paul ọkọsọn̄ọde etịn̄ aban̄a nte “mme akakan apostle.”—2 Corinth 11:5, 19, 20.
7, 8. Da Bible wụt nte nnyịn ikemede ndida mme ndammana ukeme oro nnyịn inyenede nsịn udọn̄ nnọ edidianakiet.
7 Ukem idaha oro ekeme ndidemede mfịn. Ke uwụtn̄kpọ, ndusụk owo ẹkeme ndinyene edu ndinam inua mban̄a se mmọ ẹnamde ke utom ukwọrọikọ mmọ m̀mê mme ifetutom mmọ ke esop Abasi. Idem edieke nnyịn inyenede akpan usọ m̀mê ukeme oro mbon en̄wen ke esop ẹnanade, ndi oro ọnọ nnyịn ntak ndikohode idem? Kamse, nnyịn ikpenyene ndida mme ndammana ukeme ekededi oro nnyịn inyenede ndisịn udọn̄ nnọ edidianakiet—idịghe ndimenede idem nnyịn ke enyọn̄.—Matthew 23:12; 1 Peter 5:6.
8 Paul ekewet ete ke okposụkedi esop enyenede ediwak mme andibuana, “Abasi eketetịm obok ikpọkidem.” (1 Corinth 12:19-26) Ikọ Greek oro ẹkabarede “eketetịm obok” owụt edibuak ke n̄kemuyo, nte edibuak mme uduot. Ntre owo ndomokiet ke esop ikpokohokede idem iban̄a mme ukeme esie inyụn̄ idomo ndikara mbon en̄wen. Ntan̄idem ye udọn̄ ikpọ n̄kpọ inyeneke itie ke esop Abasi.—Mme N̄ke 16:19; 1 Corinth 14:12; 1 Peter 5:2, 3.
9. Mme ntọt uwụtn̄kpọ ewe ke Bible ọnọ aban̄a mme owo ẹmi ẹkeyomde mme udọn̄ idemmọ?
9 Ima “iyomke ufọn esiemmọ.” (1 Corinth 13:5) Owo emi enyenede ima ibian̄ake mbon en̄wen man enyene se enye oyomde. Bible ọdọn̄ọ mme ntọt uwụtn̄kpọ ke n̄kpọ emi. Ke ndinam an̄wan̄a: Nnyịn imokot iban̄a Delilah, Jezebel, ye Athaliah—iban ẹmi ẹkebian̄ade mme owo ke mme ntak ibụk mmọ. (Judges 16:16; 1 Ndidem 21:25; 2 Chronicles 22:10-12) Absalom eyen Edidem David ama odu n̄ko. Enye ama esika ebịne mbon oro ẹkedide Jerusalem kaban̄a ikpe onyụn̄ ọdọhọ ke abian̄a ete ke okụre edidem ikenyeneke ata udọn̄ ke mme mfịna mmọ. Ekem enye eyetịn̄ in̄wan̄în̄wan̄ ete ke se okụre oro okoyomde ekedi owo emi ọfọnde ido nte imọ! (2 Samuel 15:2-4) Ke akpanikọ, Absalom ikenyeneke udọn̄ ke mbon oro ẹkefịkde, edi ekenyene sụk ke idemesie. Ke anamde n̄kpọ nte edidem oro emekde idemesie, enye ama anam esịt ediwak owo otụn usụn̄. Edi nte ini akakade, ẹma ẹkan Absalom ata idiọk idiọk. Ke n̄kpa esie, owo ikakam ikwe ke odot ẹbụk enye ukpono ukpono.—2 Samuel 18:6-17.
10. Didie ke nnyịn ikeme ndiwụt ke nnyịn imekere iban̄a udọn̄ mbon en̄wen?
10 Emi edi ntọt ọnọ mme Christian mfịn. Edide idi eren m̀mê n̄wan, nnyịn imekeme ndinyene mme ndammana ukeme oro ekpekde-kpek mme owo. Ekeme ndidi mmemmem n̄kpọ ọnọ nnyịn ndinyene se iyomde, yak idọhọ ntre, ebe ke ndikara nneme mîdịghe ebe ke ndinam idem emem mbon oro ẹnyenede isio isio ekikere. Nte ededi, edieke nnyịn inen̄erede inyene ima, nnyịn iyekere iban̄a udọn̄ mbon en̄wen. (Philippi 2:2-4) Nnyịn ididaha mbon en̄wen didie didie m̀mê ndimenede mme ekikere oro ẹnyenede eyịghe ẹban̄a ke ntak ifiọkutom nnyịn m̀mê idaha nnyịn ke esop Abasi, nte n̄kpọ eke ẹdọhọde ke mme ekikere nnyịn kpọt ke ẹkeme ndikere mban̄a. Utu ke oro, nnyịn iyeti n̄ke Bible oro: “Iseri ebem nsobo iso: n̄kpon-esịt onyụn̄ ebem iduọ iso.”—Mme N̄ke 16:18.
Ima Anam Emem Emem Itie Ebuana Odu
11. (a) Ke mme usụn̄ ewe ke nnyịn ikeme ndiwụt ima oro ọfọnde ido onyụn̄ anamde se idotde? (b) Didie ke nnyịn ikeme ndiwụt ke nnyịn idarake se ikwan̄ade?
11 Paul ama ewet n̄ko ete ke ima “ọfọn ido” ye nte ke enye “inamke ido eke mîdotke.” (1 Corinth 13:4, 5) Ih, ima idiyakke nnyịn inam n̄kpọ ke nsọn̄ido, itịn̄ oburobụt ikọ, m̀mê inana ukpono. Utu ke oro, nnyịn iyekere iban̄a ntụk mbon en̄wen. Ke uwụtn̄kpọ, owo oro enyenede ima eyefep ndinam mme n̄kpọ oro ẹdifịnade ubieresịt mbon en̄wen. (Men 1 Corinth 8:13 domo.) Ima “idarake se ikwan̄ade, edi adadara se idide akpanikọ.” (1 Corinth 13:6) Edieke nnyịn imade ibet Jehovah, nnyịn idibọpke enyịn ibaha oburobụt ido m̀mê ndikop inemesịt ke mme n̄kpọ oro Abasi asuade. (Psalm 119:97) Ima ayan̄wam nnyịn ndinyene idatesịt ke mme n̄kpọ oro ẹnamde owo ọkọri utu ke mbon oro ẹnamde idem emem owo.—Rome 15:2; 1 Corinth 10:23, 24; 14:26.
12, 13. (a) Didie ke nnyịn ikpanam n̄kpọ ke ini owo eduede nnyịn? (b) Siak ndusụk uwụtn̄kpọ Bible ndiwụt ke idem edinen iyatesịt ekeme ndinam nnyịn inam n̄kpọ nte mîwụtke eti ibuot.
12 Paul ewet ete ke ima “isọpke iyatesịt” (“n̄kpọ isọpke itụk,” Phillips). (1 Corinth 13:5) Edi akpanikọ, edi ndammana n̄kpọ ọnọ nnyịn mme anana-mfọnmma owo ndidi se n̄kpọ etịmerede m̀mê ndiyat esịt ke ndusụk udomo ke ini owo eduede nnyịn. Nte ededi, ikpenenke nditọhọ ke anyan ini m̀mê ndika iso nyat esịt. (Psalm 4:4; Ephesus 4:26) Edieke owo mîkarake, idem edinen iyatesịt ekeme ndinam nnyịn inam n̄kpọ nte mîwụtke eti ibuot, ndien Jehovah ekeme ndida nnyịn nte ntak kaban̄a emi.—Genesis 34:1-31; 49:5-7; Numbers 12:3; 20:10-12; Psalm 106:32, 33.
13 Ndusụk owo ẹma ẹyak mme unana mfọnmma mbon en̄wen ẹtụk ubiere mmọ ndidụk mme mbono esop Christian m̀mê ndibuana ke utom ukwọrọikọ. Ke mbemiso, ediwak ke otu mmọ ẹmi ẹma ẹn̄wana eti en̄wan mbuọtidem, eyedi ẹyọde ubiọn̄ọ otode ubon, nsahi otode mme nsan̄autom, ye mme n̄kpọ ntre. Mmọ ẹkeyọ mme utọ n̄kpọ ubiọn̄ọ oro koro mmọ ẹkesede mmọ nte mme udomo nsọn̄ọnda, ndien ntre ke edi. Edi nso isitịbe ke ini ekemmọ Christian etịn̄de m̀mê anamde n̄kpọ oro mîwụtke ima? Ndi emi n̄ko idịghe udomo nsọn̄ọnda? Ke akpanikọ edi, koro edieke nnyịn ikade iso ndiyat esịt, nnyịn imekeme ‘ndinọ Satan ufan̄.’—Ephesus 4:27.
14, 15. (a) Nso ke ‘ndikama udu’ ọwọrọ? (b) Didie ke nnyịn ikeme ndikpebe Jehovah ke ndifen nnọ owo?
14 Ye eti ntak, Paul adian ete ke ima “ikamake udu.” (1 Corinth 13:5) Mi enye ada ikọ ubatokụk, nte an̄wan̄ade ndinọ ekikere mban̄a ediwet ndudue ke n̄wed isọn mbak ẹdifre. Ndi owụt ima ndimụm ikọ m̀mê edinam iyatesịt nsịn ke ibuot ke nsinsi, nte n̄kpọ eke ediyomde nnyịn itịn̄ iban̄a enye ke ini iso? Nnyịn ikeme ndidat esịt didie ntem nte ke Jehovah idụn̄ọkede nnyịn ke utọ usụn̄ unana mbọm oro! (Psalm 130:3) Ih, ke ini nnyịn ikabarede esịt, enye esisọhi mme idiọkn̄kpọ nnyịn efep.—Utom 3:19.
15 Nnyịn imekeme ndikpebe Jehovah ke afan̄ emi. Nnyịn ikpayakke n̄kpọ ọsọp otụk nnyịn akaha ke ini etiede nte owo esuene nnyịn. Edieke nnyịn isọpde ndiyat esịt, nnyịn imekeme ndinen̄ede nnọ idem nnyịn unan n̄kan nte owo oro eduede nnyịn akpakam ekemede ndinọ. (Ecclesiastes 7:9, 22) Utu ke oro, oyom nnyịn iti ite ke ima “enenịm se ifọnde ke akpanikọ kpukpru ini.” (1 Corinth 13:7) Edi akpanikọ, idụhe owo nnyịn oro oyomde ẹwo imọ, edi nnyịn ikponyụn̄ iyịkke mme uduak nditọete nnyịn nte mîdotke. Ke ebiet ekededi ikemede, ẹyak nnyịn ida ke nditọete nnyịn inyeneke idiọk uduak.—Colossae 3:13.
Ima An̄wam Nnyịn Ndime Ime
16. Ke mme idaha ewe ke ima ekeme ndin̄wam nnyịn inyene anyan ime?
16 Ekem Paul asian nnyịn ete ke “ima enyenyene anyan ime.” (1 Corinth 13:4) Enye anam nnyịn iyọ mme idomo idomo idaha, eyedi ke anyan ini. Ke uwụtn̄kpọ, ediwak Christian ẹmedụn̄ ke ubon oro abaharede ke n̄kan̄ ido ukpono ke ediwak isua. Mbon eken ẹdi mbon oro mîdọhọ ndọ, idịghe ke edimek, edi koro mmọ mîkemeke ndikụt nsan̄a oro odotde emi edide “owo Abasi.” (1 Corinth 7:39; 2 Corinth 6:14) Onyụn̄ odu mbon oro ẹn̄wanade ye mme udọn̄ọ ẹmi ẹkamade ọkpọsọn̄ mmemidem. (Galatia 4:13, 14; Philippi 2:25-30) Ke akpanikọ, ke anana-mfọnmma editịm n̄kpọ emi, idụhe owo emi mînyeneke idaha ke uwem emi oyomde ndusụk orụk ime.—Matthew 10:22; James 1:12.
17. Nso idin̄wam nnyịn ndime ime ke kpukpru n̄kpọ?
17 Paul ọsọn̄ọ ọnọ nnyịn ete ke ima “ememe kpukpru n̄kpọ . . . ododori enyịn aban̄a kpukpru n̄kpọ, ememe ime ke kpukpru n̄kpọ.” (1 Corinth 13:7) Ima oro inyenede inọ Jehovah ayanam nnyịn iyọ idaha ekededi kaban̄a edinen ido. (Matthew 16:24; 1 Corinth 10:13) Nnyịn iyomke-yom n̄kpa usụn̄ Abasi. Ke edide isio, uduak nnyịn edi ndidu emem emem, ifụre ifụre uwem. (Rome 12:18; 1 Thessalonica 4:11, 12) Nte ededi, ke ini mme idomo mbuọtidem ẹdahade ẹda, nnyịn imesiyọ mmọ ẹmi ke idatesịt nte ubak ekọmurua edidi mbet Christian. (Luke 14:28-33) Nte nnyịn iyọde, nnyịn imesidomo ndisọn̄ọ nnyene in̄wan̄în̄wan̄ ekikere, idoride enyịn iban̄a mfọnn̄kan utịp ke mme idomo idomo idaha oro.
18. Didie ke ẹyom ime idem ke mme ini mfọnọn̄kpọ?
18 Idịghe ukụt edi n̄kukụre idaha oro oyomde ime. Ndusụk ini, ime ọwọrọ ndibịghi, ndika iso ke usụn̄ oro ẹnịmde edide mme idomo idomo idaha ẹdu m̀mê idụhe. Ime esịne ndimụm eti edinam ofụri ini eke spirit n̄kama. Ke uwụtn̄kpọ, nte afo emesinyene ebuana oro ọwọrọde n̄kpọ ke utom ukwọrọikọ, nte ekemde ye mme idaha fo? Nte afo emesikot onyụn̄ etie ekere Ikọ Abasi onyụn̄ enyene nneme ye Ete fo eke heaven ebe ke akam? Nte afo emesidụk mme mbono esop kpukpru ini, ndien nte afo emesibọ ufọn oto nsịnudọn̄ otode mme ekemmọ andinịm ke akpanikọ? Ke edide ntre, do edide odu idahaemi ke ini mfọnọn̄kpọ m̀mê ini ndiọhọn̄kpọ, afo ke enyene ime. Kûkpa mba, “koro ke edikem ini nnyịn iyọdọk mbun̄wụm, edieke nnyịn mîyakke idem emem nnyịn.”—Galatia 6:9.
Ima—“Usụn̄ eke Akande Mmọ Eken Kpukpru”
19. Didie ke ima edi “usụn̄ eke akande mmọ eken kpukpru”?
19 Paul ama ọsọn̄ọ etịn̄ nte edide akpan n̄kpọ ndiwụt ima ebe ke ndikot edu Abasi emi “usụn̄ eke akande mmọ eken kpukpru.” (1 Corinth 12:31) Ke nso usụn̄ ke ‘akan mmọ eken kpukpru’? Ọfọn, Paul ndikosụk mbat mme enọ eke spirit ekedi oro, ẹmi ẹkedide ọsọ n̄kpọ ke otu mme Christian akpa isua ikie. Ẹma ẹnam ndusụk owo ẹkeme nditịn̄ ntịn̄nnịm ikọ, ẹma ẹnọ mbon en̄wen odudu ndikọk mme udọn̄ọ, ẹma ẹnọ ediwak owo odudu nditịn̄ ikọ ke usem. Mme akpa-owo-idem enọ ke akpan! Edi, Paul ọkọdọhọ mbon Corinth ete: “N̄kpesem usem mme owo ye eke mme angel, ndien nnyeneke ima, mmakabade nyomo uyom nte akpan̄kpan̄, nnyụn̄ nsioro uyo nte ekpri n̄kanika. N̄kponyụn̄ nnyene ukeme ndisiak uduak Abasi, ndinyụn̄ mfiọk kpukpru ndịbe-ndịbe n̄kpọ ye kpukpru ifiọk; n̄kponyụn̄ nnyene ọyọhọ mbuọtidem, tutu n̄keme ndimen ikpọ obot ke itie nduọk, ndien nnyeneke ima, ndịghe baba n̄kpọ kiet.” (1 Corinth 13:1, 2) Ih, idem mme edinam ẹmi ẹkpekam ẹnyenede ufọn ẹkabade ẹdi mme “utom n̄kpa” edieke uduak oro ẹdade ẹnam mmọ mîtoho ima ẹnyenede ẹnọ Abasi ye mbọhọidụn̄.—Mme Hebrew 6:1.
20. Ntak emi oyomde n̄kaiso ukeme edieke anade nnyịn ikọri ima?
20 Jesus ọnọ nnyịn ntak efen emi nnyịn ikpọkọride edu Abasi edide ima. Enye ọkọdọhọ ete: “[Edieke mbufo ẹmade, NW] kiet eken, kpukpru owo ẹyeda oro ẹfiọk ẹte mbufo ẹdi mbet Mi.” (John 13:35) Ikọ oro “edieke” anam edi mbubehe Christian kiet kiet m̀mê enye eyekpep ndiwụt ima m̀mê idikpepke. Kamse, ikpîkpu edidụn̄ ke esenidụt idinyịkke nnyịn ikpep ndisem usem idụt oro. Ikpîkpu edidụk mme mbono esop ke Ufọkmbono Obio Ubọn̄ m̀mê ndibuana ye mme ekemmọ Christian idinyụn̄ ikpepke nnyịn ke mbuari ndiwụt ima. Ndikpep “usem” emi oyom n̄kaiso ukeme.
21, 22. (a) Didie ke nnyịn ikpanam n̄kpọ edieke nnyịn mînyeneke ndusụk ikpehe ima oro Paul ekenemede aban̄a? (b) Ke nso usụn̄ ke ẹkeme ndidọhọ ke “ima idibehe ifep [ke] nsinsi”?
21 Ke ndusụk idaha, afo udunyeneke ndusụk ikpehe ima oro Paul ekenemede aban̄a. Edi kûyak idem emem fi. Sịn idem ndinam n̄kpọ mban̄a ke ime. Ka iso ndika mbịne Bible nyụn̄ da mme edumbet esie sịn ke edinam ke mme edinam fo ye mbon en̄wen. Kûdede ufre uwụtn̄kpọ oro Jehovah ke idemesie enịmde ọnọ nnyịn. Paul eketeme mbon Ephesus ete: “Ẹfọn ido ye kiet eken, ẹnyụn̄ ẹnyene esịt mbọm, ẹnyụn̄ ẹfen kiet eken, kpa nte Abasi okonyụn̄ efende mbufo ke Christ.”—Ephesus 4:32.
22 Idem nte afo ndikpep ndisem obufa usem edidide mmemmem ke akpatre, nte ini akade eyedi afo oyokụt ke ndiwụt ima ayakabade edi mmemmem. Paul ọsọn̄ọ ọnọ nnyịn ete ke “ima idibehe ifep [ke] nsinsi.” (1 Corinth 13:8) Ke mîbietke mme utịbe utịbe enọ eke spirit, tutu amama ima iditreke ndidu. Ntre ka iso ndikpep ndiwụt edu Abasi emi. Enye edi kpa nte Paul okotde enye, “usụn̄ eke akande mmọ eken kpukpru.”
Nte Afo Emekeme Ndinam An̄wan̄a?
◻ Didie ke ima ekeme ndin̄wam nnyịn ndikan ntan̄idem?
◻ Ke mme usụn̄ ewe ke ima ekeme ndin̄wam nnyịn ndisịn udọn̄ nnọ emem ke esop?
◻ Didie ke ima ekeme ndin̄wam nnyịn ndime ime?
◻ Didie ke ima edi “usụn̄ eke akande mmọ eken kpukpru”?
[Ndise ke page 19]
Ima ayan̄wam nnyịn ndifụmi mme ndudue mme ekemmọ andinịm ke akpanikọ
[Mme ndise ke page 23]
Ime ọwọrọ ndimụm edinam ofụri ini nnyịn eke ukara Abasi n̄kama