Ẹtiene Akakan Usụn̄ Ima
JEHOVAH ABASI edi ima. (1 John 4:8) Eyen esie, Jesus Christ, ọkọdọhọ ete ke nnyịn ikpenyene ndima Abasi ye mbọhọidụn̄ nnyịn. (Matthew 22:37-40) Kamse, Abasi anam n̄kpọ ye ofụri ekondo ọkọn̄ọde ke edu emi! Ntre man inyene nsinsi uwem ke ebiet ekededi, ana nnyịn itiene usụn̄ ima.
Abasi ama owụt ima ọnọ idụt Israel edi ke ukperedem enye ama esịn idụt oro ke ntak unana edinam akpanikọ. Enye ndien ama owụt esop eke mme mbet Jesus nte obufa esop Esie. Didie? Ebe ke ediyarade edisana spirit n̄wụt ke san̄asan̄a usụn̄ ọnọde mmọ odudu nditịn̄ ikọ ke usem nnyụn̄ ntịn̄ prọfesi. Ntem, ke Pentecost 33 E.N., owo 3,000 ẹdide Jew ye mme okpono Abasi ke ido mme Jew ẹma ẹkabade ẹdi mme andinịm ke akpanikọ ẹnyụn̄ ẹkpọn̄ akani esop oro ẹdụk obufa esop Abasi. (Utom 2:1-41) Sia ẹkenọde mme enọ eke spirit ebe ke mme apostle Jesus ke oro ebede, mme utọ uyarade oro ẹma ẹtre ke n̄kpa mmọ. (Utom 8:5-18; 19:1-6) Edi etisịm ini oro mme enọ oro ẹma ẹwụt nte ke mfọn Abasi ama odu ye Israel eke spirit.—Galatia 6:16.
Mme utịben̄kpọ oro ẹkesụn̄ọde ẹto mme enọ eke spirit ẹma ẹnyene ufọn. Nte ededi, ediwụt ima m̀mê anana-ibụk usụn̄ edikere mban̄a mmọ en̄wen edi akpan n̄kpọ akan edinyene mme enọ eke spirit. Apostle Paul ama owụt emi ke akpa n̄wed oro enye ekewetde ọnọ ẹsọk mbon Corinth (c. 55 E.N.). Do enye ama etịn̄ aban̄a ima nte edide enyeemi “akande mmọ eken kpukpru.” (1 Corinth 12:31) Ẹneme ẹban̄a usụn̄ oro ke 1 Corinth ibuot 13.
Ke Ima Mîdụhe, Nnyịn Idịghe N̄kpọ Ndomokiet
Paul ama ọkọkibuot ete: “N̄kpesem usem mme owo ye eke mme angel, ndien nnyeneke ima, mmakabade nyomo uyom nte akpan̄kpan̄, nnyụn̄ nsioro uyo nte ekpri n̄kanika.” (1 Corinth 13:1) Ke ima mîdụhe, nditịn̄ ikọ ke usem eke owo oro spirit ọnọde m̀mê ke usem mme angel eke heaven ediwọrọ ikpîkpu. Paul ekemek nditịn̄ ikọ ition oro anamde owo ọkọri ke ifiọk akan nditịn̄ tọsịn ikọ duop ke usem oro mîn̄wan̄ake owo. (1 Corinth 14:19) Owo eke mînyeneke ima editie nte ‘oyomo uyom akpan̄kpan̄’—oti, emi anamde uyat uyat uyom—m̀mê “ekpri n̄kanika” emi mînemke uyo ikwọ. Editịn̄ ikọ ke usem oro mîwụtke ima ikedịghe ọnọ-ndọn̄esịt, usụn̄ eke spirit oro ọbọpde-bọp ndida nnọ Abasi ubọn̄ nnyụn̄ n̄n̄wam ikọt esie. Mfịn, nnyịn iwụt ima ke nditịn̄ ikọ ke usụn̄ oro an̄wan̄ade ke utom Christian.
Ekem apostle oro ọdọhọ ete: “N̄kponyụn̄ nnyene ukeme ndisiak uduak Abasi, ndinyụn̄ mfiọk kpukpru ndịbe ndịbe n̄kpọ ye kpukpru ifiọk; n̄kponyụn̄ nnyene ọyọhọ mbuọtidem, tutu n̄keme ndimen ikpọ obot ke itie nduọk, ndien nnyeneke ima, ndịghe baba n̄kpọ kiet.” (1 Corinth 13:2) Utịbe utịbe editịn̄ prọfesi, edinyene san̄asan̄a ifiọk mban̄a ndisana ndịben̄kpọ, ye ifiọk oro spirit ọnọde ẹkeme ndinyene ufọn nnọ mbon en̄wen edi inyeneke inọ mme andinyene mme utọ enọ oro edieke mme andinyene enye mînyeneke ima. Paul ama ada san̄asan̄a ukeme edifiọk edisana ndịben̄kpọ an̄wam mbon en̄wen, ndien enọ ifiọk ama an̄wam enye ndibemiso ntịn̄ nte ke ẹyebọhọ unọmọ edisịp nsụn̄ikan̄. (Utom 27:20-44; 1 Corinth 4:1, 2) Edi, edieke enye ekpekenyenede ‘ofụri ifiọk ye mbuọtidem’ edi inyeneke ima, enye ikpedịghe baba n̄kpọ kiet ke enyịn Jehovah.
Mfịn, spirit Jehovah an̄wam Mme Ntiense esie ndifiọk mme prọfesi ye ndisana ndịben̄kpọ eke Bible onyụn̄ ada mmọ usụn̄ ke ndiyak utọ ifiọk oro nnọ mbon en̄wen. (Joel 2:28, 29) Spirit emi n̄ko ọnọ mbuọtidem oro ẹyomde man ẹkan mme n̄kpọ ubiọn̄ọ oro ẹtiede nte obot. (Matthew 17:20) Sia edide spirit anam mme n̄kpọ ẹmi, akwan̄a ndiyom ubọn̄ idemowo nto mmọ. Nnyịn idịghe baba n̄kpọ kiet ibọhọke nnyịn inam n̄kpọ ndinọ Abasi ubọn̄ ye ke ntak ima oro inyenede inọ enye ye ekemmọ owo.—Galatia 5:6.
Udori Idụhe ke Uwa Oro Mîsan̄ake ye Ima
Paul ọkọdọhọ ete: “N̄kponyụn̄ nyak ofụri inyene mi nnọ ẹda ẹbọk nditọ ubuene, n̄kponyụn̄ nyak ikpọkidem mi nnọ ẹfọp ke ikan̄, ndien nnyeneke ima, idoroke mi baba n̄kpọ kiet.” (1 Corinth 13:3) Ke ima mîdụhe, Paul ikpenyeneke udori edieke enye ọnọde kpukpru se enye enyenede ẹda ẹbọk mmọ en̄wen. Abasi ọnọ nnyịn utịp ke ntak ima oro asan̄ade ye enọ nnyịn, idịghe kaban̄a udomo n̄kpọ obụkidem oro m̀mê ke ntak oro iyomde ubọn̄ nte mme andinọ, nte abian̄a abian̄a Ananias ye Sapphira. (Utom 5:1-11) Paul ama onịm eti uwụtn̄kpọ ke ndinọ idemesie ke ima ke ebuana ye utom edin̄wam mme andinịm ke akpanikọ ke Judea.—1 Corinth 16:1-4; 2 Corinth 8:1-24; 9:7.
Idem edikpa n̄kpa usụn̄ Abasi ke ima mîdụhe nte usụn̄ edidi ntiense nnọ akpanikọ iwọrọke baba n̄kpọ kiet inọ Abasi. (Mme N̄ke 25:27) Jesus ama etịn̄ aban̄a uwa esie edi ikobụreke mbụre iban̄a enye. Utu ke ndibụre mbụre enye ama ọnọ idemesie unyịme unyịme ke ntak ima. (Mark 10:45; Ephesus 5:2; Mme Hebrew 10:5-10) Nditọete esie eke spirit ‘ẹnọ ikpọkidem mmọ nte oduuwem uwa’ ke utom Abasi idịghe ke edikpa n̄kpa usụn̄ Abasi oro ẹnọde idem ubọn̄ edi ke anana-mbụre usụn̄ oro ọnọde Jehovah ubọn̄ onyụn̄ owụtde ima oro mmọ ẹnyenede ẹnọ enye.—Rome 12:1, 2.
Ndusụk Usụn̄ Oro Ima Edinamde Nnyịn Inam N̄kpọ
Paul ekewet ete: “Ima enyenyene anyanime, onyụn̄ ọfọn ido.” (1 Corinth 13:4a) Ye ediwak owo, anyanime Abasi tọn̄ọ nte Adam akanam idiọkn̄kpọ ọwọrọ edikabade esịt oro adade osịm edinyan̄a. (2 Peter 3:9, 15) Edieke nnyịn inyenede ima, nnyịn iyekpep mmọ en̄wen akpanikọ ye ime. Nnyịn iyefep iyatesịt inyụn̄ iwụt edikere mban̄a ye edifen nnọ. (Matthew 18:21, 22) Ima ọfọn ido n̄ko, ndien nnyịn isan̄a ikpere Abasi ke ntak mfọnido esie. Mbun̄wụm spirit esie edide mfọnido anam nnyịn ikûyom se ikponde ikaha ito mbon en̄wen ikan nte enye oyomde oto nnyịn. (Ephesus 4:32) Ima akam anam nnyịn ifọn ido ye mbon oro mîwụtke esịtekọm.—Luke 6:35.
Paul ama adian do ete: “Ima ifụbeke ufụp; ima inamke inua, ikohokede idem.” (1 Corinth 13:4b) Ufụp edi ubọkutom obụkidem oro edikpande owo ndidụk Obio Ubọn̄ Abasi. (Galatia 5:19-21) Ima anam nnyịn ikûfụbe se owo efen enyenede m̀mê nti idaha esie. Edieke enye ọbọde ifetutom oro nnyịn iyomde, ima eyenam nnyịn idara ye enye, inọ enye ibetedem nnyịn, inyụn̄ ikọm Abasi nte ke ẹkeme ndida enye nnam n̄kpọ ke ufọn esop.
Sia ima ‘mînamke inua,’ enye inụkke nnyịn ndibụre mbụre mban̄a se Abasi ayakde nnyịn inam ke utom esie. Ndusụk mbon Corinth ẹma ẹbụre mbụre nte n̄kpọ eke ẹdọhọde ke mmọ ẹketịbi mme ẹnọ eke spirit ẹdi, edi mmọemi ẹketo Abasi, kpa nte edide ye mme ifetutom ke esop esie mfịn. Utu ke ndibụre mbụre mban̄a idaha nnyịn ke esop Abasi, do, ẹyak nnyịn ikpeme mbak nnyịn ididuọ. (1 Corinth 1:31; 4:7; 10:12) Ima “ikohokede idem,” edi esịt owo oro mînyeneke ima ekeme ndiyọhọ ye edikụt idem ke akpan n̄kpọ. Mme owo oro ẹnyenede ima isikereke ke imọfọn ikan mbon efen.—1 Corinth 4:18, 19; Galatia 6:3.
Inamke Ido eke Mîdotke, Idịghe Ibụk, Iyatke Esịt
Ima “inamke ido eke mîdotke, iyomke ufọn esiemmọ, isọpke iyatesịt.” (1 Corinth 13:5a) Enye esịn udọn̄ ọnọ nti edu, ido uten̄e Abasi, edikpono odudu edikara, ye eti edu ke mme mbonoesop Christian. (Ephesus 5:3-5; 1 Corinth 11:17-34; 14:40; men Jude 4, 8-10 domo.) Sia ima esinamde kpukpru owo ẹkere ke imedi se ẹyomde, nte edide ye kpukpru mbak idem owo, esop oro ima odude edi ebiet emem ye ubọhọ. (1 Corinth 12:22-25) Utu ke ‘ndiyom ufọn esiemmọ’ ke ibụk ibụk usụn̄, ima onụk nnyịn ndiwa unen nnyịn ke ndusụk ini nnyụn̄ n̄wụt udọn̄ ke idem mbon efen ye ke mfọnọn̄kpọ mmọ. (Philippi 2:1-4) Ima anam nnyịn ‘ikabade idi kpukpru n̄kpọ inọ kpukpru owo, man nnyịn ikpekeme ndinyan̄a ndusụk mmọ’ ebe ke utom ukwọrọikọ nnyịn.—1 Corinth 9:22, 23.
Ima “isọpke iyatesịt.” Ibụmede iyatesịt ẹdi ubọkutom anamidiọk obụkidem, edi ima anam nnyịn ‘ikûsọp ndiyat esịt.’ (James 1:19; Galatia 5:19, 20) Idem edieke odotde nnyịn ndiyat esịt, ima iyakke nnyịn ikaiso iyat esịt, ke ntre inọde Devil ufan̄. (Ephesus 4:26, 27) Ana mbiowo akpan akpan ẹfep iyatesịt edieke ekemmọ mme andinịm ke akpanikọ ẹkpude ndida ndusụk ekikere oro ẹnọde nsịn ke edinam.
Paul ama etịn̄ n̄ko aban̄a ima ete: “Ikamake udu.” (1 Corinth 13:5b) Ima inịmke ibat ndudue, nte ediwet n̄kpọ nsịn ke n̄wed ibatokụk. Enye okụt se ifọnde ke idem ekemmọ mme andinịm ke akpanikọ inyụn̄ isioho usiene kaban̄a ata ndudue m̀mê enyeoro ẹkerede-kere. (Mme N̄ke 20:22; 24:29; 25:21, 22) Ima an̄wam nnyịn “ibịne ido eke ẹnamde emem odu.” (Rome 14:19) Paul ye Barnabas ẹma ẹnyene ndutan̄a uyo ẹnyụn̄ ẹdianade kiet ye eken ke utom Abasi, edi ima ama ọkọk unan oro onyụn̄ ọbiọn̄ọ mmọ ndikọhọ ekikọhọ.—Leviticus 19:17, 18; Utom 15:36-41.
Oyom Edinen Ido ye Akpanikọ
Kaban̄a ima, Paul ama akaiso ete: “Ima idarake se ikwan̄ade, edi adadara se idide akpanikọ.” (1 Corinth 13:6) Ndusụk owo ẹsinen̄ede ẹkop idatesịt ke edinam idiọkn̄kpọ tutu eyedi se “mmọ mîdehe idap, ke mînamke idiọk.” (Mme N̄ke 4:16) Edi ke esop Abasi nnyịn idomoke idem ye kiet eken m̀mê ndidat esịt edieke owo ọduọde odụk idiọkn̄kpọ. (Mme N̄ke 17:5; 24:17, 18) Edieke ẹkpekenyenede ima oro ekemde ẹnọ Abasi ye edinen ido ke esop Corinth, owo ikpọkọyọhọ obukpo ido do. (1 Corinth 5:1-13) Ke otu mme n̄kpọ eken, ima oro inyenede inọ edinen ido ekpeme nnyịn ọbiọn̄ọ edise television, senima, m̀mê mme mbre oro ẹwụtde ukwan̄ido.
Ima “adadara se idide akpanikọ.” Mi akpanikọ okpụhọde ye ukwan̄ido. Emi nte an̄wan̄ade ọwọrọ nte ke ima esịn nnyịn idara iban̄a odudu oro akpanikọ enyenede ndinụk mme owo ẹnam edinen ido. Nnyịn ikụt idatesịt ke mme n̄kpọ oro ẹbọpde-bọp mme owo onyụn̄ anamde akpanikọ ye edinen ido ẹkaiso ẹkọri. Ima ọbiọn̄ọ nnyịn ndisu nsu, ọnọ nnyịn idatesịt ke ini ẹwụtde ke edinen owo iduehe, onyụn̄ anam nnyịn ikop idatesịt ke edikan emi akpanikọ Abasi akande.—Psalm 45:4.
Nte Ima Anamde ye Kpukpru N̄kpọ
Ke akade iso nditịn̄ se ima edide, Paul ekewet ete: “Ima ememe kpukpru n̄kpọ, ononịm se ifọnde ke akpanikọ kpukpru ini, ododori enyịn aban̄a kpukpru n̄kpọ, ememe ime ke kpukpru n̄kpọ.” (1 Corinth 13:7) ‘Ke ndime kpukpru n̄kpọ,’ ima ọbọbiọn̄ọ iyatesịt nte emi eti ọkọm ọbiọn̄ọde edịm. Edieke owo ekededi eduede nnyịn ndien ekem eben̄e edifen nnọ, ima an̄wam nnyịn ndiyọ ubiak, ifende inọ andidue oro utu ke nditịn̄ mban̄a mme n̄kpọ oro ke ikọedem. Ke ima nnyịn in̄wana ‘ndida eyenete nnyịn nnyene.’—Matthew 18:15-17; Colossae 3:13.
Ima “ononịm se ifọnde ke akpanikọ kpukpru ini” ke Ikọ Abasi onyụn̄ anam nnyịn iwụt esịtekọm iban̄a udia eke spirit oro ẹnọde ebe ke “asan̄autom emi anamde akpanikọ, onyụn̄ enyenede ọniọn̄.” (Matthew 24:45-47) Okposụkedi nnyịn mîdịghe se ekemede ndibian̄a mmemmem mmemmem, ima ọbiọn̄ọ nnyịn ndinyene esịt eyịghe onyụn̄ ọbiọn̄ọ nnyịn ndinyene ukwan̄ ekikere mban̄a ekemmọ mme andinịm ke akpanikọ. (Ecclesiastes 7:21, 22) Ima n̄ko “ododori enyịn aban̄a kpukpru n̄kpọ” oro ẹwetde ke N̄wed Abasi, utọ nte akpanikọ oro ẹban̄ade Obio Ubọn̄ Abasi. Ke idide se ima onụkde, nnyịn imodori enyịn inyụn̄ ibọn̄ akam iyom se ifọnde ikan ke mme idaha oro ẹtiede idomo idomo. Ima onụk nnyịn n̄ko ndisian mmọ en̄wen ntak idotenyịn emi nnyịn inyenede. (1 Peter 3:15) Adianade do, ima “ememe ime ke kpukpru n̄kpọ,” esịnede idiọkn̄kpọ oro ẹnamde nnyịn. (Mme N̄ke 10:12) Ima oro inyenede inọ Abasi an̄wam nnyịn n̄ko ndiyọ ukọbọ ye mme idomo eken.
Paul ama adian do ete: “Ima idibehe ifep [ke] nsinsi.” (1 Corinth 13:8a) Enye ikemeke ndibe mfep m̀mê ndikpu kpa nte Jehovah mîkemeke ndikpu. Sia nsinsi Abasi nnyịn edide mfọnmma uwụtn̄kpọ ima, edu emi idibehe ifep tutu amama. (1 Timothy 1:17; 1 John 4:16) Ima eyekara ekondo kpukpru ini. Ẹyak nnyịn ke ntre ibọn̄ akam ite Abasi an̄wam nnyịn ikan ibụk ibụk edu inyụn̄ iwụt mbun̄wụm spirit esie emi mîdibehe ifep mi.—Luke 11:13.
Mme N̄kpọ Oro Ẹdibede Ifep
Ke ebemde iso osio owụt, Paul ekewet ete: “Amaedi edisiak uduak Abasi [“enọ utịn̄ prọfesi,” NW], mmọ ẹyekabade ẹdi ikpîkpu; edi usem, mmọ ẹyedobo; onyụn̄ edi ifiọk, kpa oro eyekabade edi ikpîkpu.” (1 Corinth 13:8b) “Enọ utịn̄ prọfesi” ama an̄wam mme andinyene enye nditịn̄ mbufa prọfesi. Okposụkedi mme utọ enọ oro ẹma ẹkebe ẹfep ke ẹma ẹkewụk esop Christian nte esop Abasi, odudu prọfesi esie ibehe ifep tutu amama, ndien Ikọ esie ọdọn̄ọ kpukpru prọfesi oro nnyịn iyomde idahaemi. Ukeme oro spirit ọnọde nditịn̄ ikọ ke usem ama ebe efep n̄ko, ndien san̄asan̄a ifiọk ama ‘akabade edi ikpîkpu,’ nte ẹkebemde iso ẹtịn̄. Edi ọyọhọ Ikọ Jehovah ọnọ se oyomde nnyịn ifiọk man inyene edinyan̄a. (Rome 10:8-10) Akande oro, ikọt Abasi ẹyọhọ ye spirit esie ẹnyụn̄ ẹsion̄o mbun̄wụm esie.
Paul ama akaiso ete: “Koro nnyịn ifiọk n̄kpọ ubak ubak, inyụn̄ isiak uduak Abasi ubak ubak; edi adan̄aemi se iyọhọde edidide, se idide ubak ubak eyebe efep.” (1 Corinth 13:9, 10) Mme enọ ifiọk ye prọfesi ikọyọhọke. Nte an̄wan̄ade, utọ prọfesi oro ikọnọhọ ọyọhọ mbụk, ndien prọfet kiet kiet eketịn̄ ubak ubak aban̄a ini iso, ananade ọyọhọ ifiọk aban̄a se enye ekebemde iso etịn̄. Idahaemi, nte ededi, ifiọk prọfesi ke ọyọhọ sụn̄sụn̄. Ke uwụtn̄kpọ, mme akpanikọ oro ẹsude prọfesi Bible ẹsọn̄ọ nte ke Jesus ama ọbọ odudu edikara ubonowo ke 1914. Ọtọn̄ọde ke ini oro, nnyịn idu ke “utịt ini” ndien ke inyene n̄kaiso n̄kọri ke ifiọk eke spirit ye edifiọk prọfesi eke Bible. (Daniel 12:4) Ntem, nnyịn ke isan̄a ikpere edinyene ọyọhọ ifiọk ndien anaedi “se iyọhọde” emekpere.
N̄kponn̄kan Edu Osụk Ododu
Ke etịn̄de aban̄a n̄kọri esop, Paul ekewet ete: “Ke ini n̄kedide eyenọwọn̄, ntịn̄ ikọ nte eyenọwọn̄, n̄kere ekikere nte eyenọwọn̄, nnyụn̄ nneni eneni nte eyenọwọn̄; edi mma n̄kabade n̄kpon, mmokụre ye ido uyen.” (1 Corinth 13:11) Sia eyenọwọn̄ esinamde n̄kpọ etiene esisịt ifiọk ye n̄kọri ikpọkidem esie, ẹkeme ndinam enye oyok, nte n̄kpọ eke edide ẹfụn̄ ẹka mi ẹfụn̄ ẹka ko. Edi akamba owo enen̄ede ọkọri ke ikpọkidem, enyene akamba ifiọk, ndien nte ido edide enye isọpke iyok. Enye ama ọkpọn̄ mme ekikere, edu, ye usụn̄ unam n̄kpọ ini uyen. Ukem ntre, ke esop Abasi eke isọn̄ ama ọkọkọri ọkpọn̄ ini uyen esie, Enye ama ebiere ete ke enye iyomke enọ spirit edide utịn̄ prọfesi, edisem usem, ye ifiọk. Okposụkedi mme andibuana ke esop oro eke eyomfịn, emi idahaemi odude ke isua usọn̄ esie, n̄ko mîkwe ufọn mme utọ enọ oro, mmọ ẹdat esịt ndinam n̄kpọ Abasi ke idak ndausụn̄ spirit esie.
Paul ama adian do ete: “Idahaemi nnyịn imokụt n̄kpọ ntre ntịmede ntịmede, nte owo okụtde n̄kpọ ke ukụtiso: edi adan̄aoro iyekụt n̄kpọ iso ye iso; idahaemi mmọfiọk n̄kpọ ubak ubak, edi adan̄aoro nyefiọk ọyọhọ ọyọhọ, kpa nte ẹfiọkde mi.” (1 Corinth 13:12) Ke ini esop okodude ke ini uyen, ikedịghe ekemini Abasi ndiyarade ndusụk n̄kpọ. Ntem, mmọ ẹkekụt n̄kpọ mbukpọn̄ mbukpọn̄, nte n̄kpọ eke mme Christian ẹsede n̄kpọ ke ukụtiso oro ẹdade ukwak ẹnam emi mînyeneke nsemnsem iso. (Utom 1:6, 7) Edi nnyịn imokpon ikan mbukpọn̄ mbukpọn̄ ekikere. Edisu prọfesi ye uduot prọfesi ẹyarade in̄wan̄în̄wan̄, koro emi edi ekemini Abasi ndiyarade. (Psalm 97:11; Daniel 2:28) Okposụkedi Paul ọkọdiọn̄ọde Abasi, ata akpatre ifiọk aban̄ade Jehovah ye ata n̄kpet n̄kpet itie ebuana ye Enye edidi ke ini ẹdinamde mme apostle oro ẹset ẹdụk uwem eke heaven, ntem ọbọde ọyọhọ ọyọhọ utịp usụn̄uwem Christian esie.
Ke adade mfọnmma uwụtn̄kpọ ima esie okosịm utịt, Paul ekewet ete: “Ntem ke mbuọtidem, ye idotenyịn, ye ima ẹsụk ẹdu, mmọ mbita; edi andikpon n̄kan ke otu mmọ edi ima.” (1 Corinth 13:13) Kpa ye oro mme utịbe utịbe enọ eke spirit mîdụhe aba, esop kemi enyene ata ọyọhọ ifiọk ye ntak ndinyene mbuọtidem, idotenyịn, ye ima oro okponde akan. Enye enyene mbuọtidem nte ke kpukpru se Abasi ọkọn̄wọn̄ọde ẹtie nte n̄kpọ eke ẹdide ẹma ẹsosu ẹma. (Mme Hebrew 11:1) Mme ikpehe mbuọtidem ẹyetre nte mme n̄kpọ oro ẹkebemde iso ẹtịn̄ ke Ikọ Abasi ẹsude. Mme n̄kpọ ẹban̄ade idotenyịn ẹyetre ke ini nnyịn ikụtde mme n̄kpọ oro ikodoride enyịn. Edi ima eyedu ke nsinsi. Ntem, ẹyak kpukpru Mme Ntiense Jehovah ẹkaiso ẹtiene akakan usụn̄ ima.