Edida Oro Jehovah Adade “Ndisịme” Ndinyan̄a Mmọemi Ẹnịmde ke Akpanikọ
“Sia Abasi okonịmde ke ọniọn̄ Esie, ete ererimbot ẹkûda eti ibuot eke mmọ ẹfiọk Imọ, ọfọn Abasi ke enyịn ndida ukwọrọikọ, emi owo esede ke ndisịme, nnyan̄a mmọemi ẹnịmde ke akpanikọ.”—1 CORINTH 1:21.
1. Ke nso usụn̄ifiọk ke Jehovah ada “ndisịme” anam n̄kpọ, ndien nnyịn isan̄a didie ifiọk nte ke ererimbot ikadaha eti ibuot eke mmọ ifiọk Abasi?
EMI-E? Nte Jehovah akpada ndisịme anam n̄kpọ? Inen̄ekede idi ntre! Edi enye ekeme onyụn̄ esida se itiede nte ndisịme inọ ererimbot anam n̄kpọ. Enye esinam ntre man anyan̄a mbon oro ẹfiọkde ẹnyụn̄ ẹmade enye. Ebede ke eti ibuot eke ererimbot, ererimbot ikemeke ndifiọk Abasi. Jesus Christ ama anam emi ana in̄wan̄în̄wan̄ ke ini enye eketịn̄de ke akam ete: “Edinen Ete, ererimbot ikọfiọkke Fi.”—John 17:25.
2. Didie ke ekeme nditie nte ke mme usụn̄ Jehovah ye mme usụn̄ eke ererimbot ẹsan̄a ikpat kiet, edi nso ẹdi akpanikọ?
2 Mme ikọ Jesus ẹwụt ẹte ke mme usụn̄ Jehovah ẹkpụhọde ye eke ererimbot. Ke enyọn̄ enyọn̄ ekeme nditie nte ke uduak Abasi ye eke ererimbot emi ẹsan̄a ikpat kiet. Ekeme nditie nte ke mme uduak ererimbot emi ẹnyene edidiọn̄ Abasi. Ke uwụtn̄kpọ, Bible ọdọhọ ke Abasi eyewụk edinen ukara emi edidade uwem emem, inemesịt, ye uforo isọk ubonowo ke isọn̄. (Isaiah 9:6, 7; Matthew 6:10) Kpasụk ntre, ererimbot ọsọn̄ọ atan̄a uduak esie ndinọ mme owo emem, uforo, ye eti ukara ebe ke inua-okot ndutịm obufa ererimbot. Edi mme uduak Abasi ye eke ererimbot idịghe ukem. Uduak Jehovah edi ndiwụt unen esie nte Akakan Andikara ererimbot. Enye edinam emi ebe ke ukara eke heaven emi edisọhide kpukpru ukara ke isọn̄ efep. (Daniel 2:44; Ediyarade 4:10b; 12:10) Ntre Abasi ibuanake baba n̄kpọ kiet ye ererimbot emi. (John 18:36; 1 John 2:15-17) Ntak edi oro Bible etịn̄de aban̄a orụk eti ibuot iba—“eti ibuot eke Abasi” ye “eti ibuot eke ererimbot.”—1 Corinth 1:20, 21, NW.
Akpan Ndo Emi Odude ke Eti Ibuot eke Ererimbot
3. Okposụkedi eti ibuot eke ererimbot ekemede nditie nte edi akpan n̄kpọ, ntak emi ndutịm obufa ererimbot emi owo ọn̄wọn̄ọde mîdinọhọ uyụhọ tutu amama?
3 Ye mbon oro mîdịghe eti ibuot eke Abasi ada usụn̄, eti ibuot eke ererimbot etie nte edi akpan n̄kpọ. Ikpọifiọk ererimbot ẹmi ẹtịmde ẹwọrọ etop ẹdu ẹmi ẹtụkde owo esịt. Ediwak tọsịn ikpọ ufọkn̄wed ẹsinọ ukpep otode se ediwak owo ẹbatde ke nta mbon ifiọk ke otu ubonowo. Mme ntatara itie ubonn̄wed ẹyọhọ ye akpakịp ifiọk n̄kpọntịbe eke owo ke ediwak isua ikie. Kpa ye emi, nte ededi, ndutịm obufa ererimbot oro mme andikara ererimbot ẹduakde ekpekeme n̄kukụre ndidi ukara emi mme anana-mfọnmma, n̄kpakpa owo ẹmi ẹyọhọde ye ntọi idiọkn̄kpọ ẹkarade. Ntem, utọ ndutịm oro ekpedi eke unana mfọnmma, ẹtọn̄ọde ntak ọyọhọ ye mme ndudue eke ini edem inyụn̄ idehede iyụhọ kpukpru se ubonowo oyomde.—Rome 3:10-12; 5:12.
4. Ndutịm obufa ererimbot emi ẹduakde odu ke idak nso, ndien ye nso utịp?
4 Ndutịm obufa ererimbot emi owo aduakde idụhe ke idak mmeme eke owo ikpọn̄îkpọn̄ edi n̄ko ke idak odudu ndiọi edibotn̄kpọ eke spirit—ih, Satan kpa Devil ye mme demon esie. Satan amanam ikike mme owo okịm man mmọ ẹdinịm “gospel ubọn̄ Christ” ke akpanikọ. (2 Corinth 4:3, 4; Ephesus 6:12) Mmọdo, ererimbot osobo udọn̄ọ ke adiana ke adiana. Enye osobo ubiak ye unan ke edidomo emi enye odomode ke mbrenyịn ndikara idemesie ye unana un̄wam Abasi ye unana ediwụt ukpono nnọ uduak Abasi. (Jeremiah 10:23; James 3:15, 16) Ntem, nte apostle Paul ọkọdọhọde, ‘ererimbot ikadaha eti ibuot eke mmọ ifiọk Abasi.’—1 Corinth 1:21.
5. Nso idi akpan ndo emi eti ibuot eke ererimbot emi enyenede?
5 Nso, ndien, idi akpan ndo emi odude ke eti ibuot eke ererimbot emi, esịnede mme ediomi esie kaban̄a ndutịm obufa ererimbot? Edi nte ke ererimbot ofụmi se owo tutu amama mîkemeke ndifụmi uforo uforo—kpa akakan itie edikara Jehovah Abasi. Enye ke ntan̄idem emesịn ndinyịme itie edikara Abasi. Ererimbot okokoi osio Jehovah efep ke kpukpru ediomi esie onyụn̄ eberi edem ke ukeme ye mme uduak esiemmọ. (Men Daniel 4:31-34; John 18:37 domo.) Bible anam an̄wan̄a nte ke “editọn̄ọ eti ibuot edi uten̄e Jehovah.” (Mme N̄ke 9:10; Psalm 111:10) Edi, ererimbot ikam ikpepke akpan n̄kpọ emi ẹyomde mi ẹto eti ibuot. Ye unana un̄wam Abasi, ke ntre, enye edikeme didie ndikụt unen?—Psalm 127:1.
Ukwọrọikọ Obio Ubọn̄ —Ndisịme m̀mê Eti N̄kpọ?
6, 7. (a) Mbon oro eti ibuot Abasi adade usụn̄ ẹkwọrọ nso, edi ererimbot ese mmọ didie? (b) Mme ọkwọrọ ederi Christendom ẹkwọrọ ikọ nte ekemde ye eti ibuot anie, ndien ye nso utịp?
6 Ke n̄kan̄ eken, mbon oro ẹfiọkde Abasi ẹsiwụt eti ibuot eke Abasi ẹnyụn̄ ẹmek enye ada mmimọ usụn̄. Nte Jesus ekebemde iso etịn̄, mmọ ẹkwọrọ “gospel Ubọn̄ Abasi emi ke ofụri ekondo.” (Matthew 24:14; 28:19, 20) Nte utọ ukwọrọikọ oro esịne ifiọk idahaemi, emi isọn̄ nnyịn ọyọhọde ye en̄wan, usabade-n̄kpọ, unana, ye ndutụhọ owo? Ye mbon ọniọn̄ eke ererimbot utọ ukwọrọikọ oro aban̄ade Obio Ubọn̄ Abasi mi etie nte ata ndisịme n̄kpọ, oro mîsịneke ifiọk. Mmọ ẹda mme andikwọrọ mban̄a Obio Ubọn̄ Abasi nte ẹdide mbon mfịna oro ẹbiọn̄ọde ukara ẹnyụn̄ ẹsụhọrede n̄kọri esie kaban̄a eti ukara ukaraidem. Ke emi mme ọkwọrọ ederi Christendom ẹnọ mmọ ibetedem, ẹmi ẹkwọrọde ikọ nte asan̄ade ekekem ye eti ibuot eke ererimbot emi mînyụn̄ isianke mme owo se oyomde mmọ ẹfiọk ẹban̄a obufa ererimbot Abasi ye ukara Obio Ubọn̄ esie, idem kpa ye oro emi ekedide akpan ukpepn̄kpọ Christ.—Matthew 4:17; Mark 1:14, 15.
7 Ewetmbụk oro H. G. Wells ama odụri ntịn̄enyịn owụt edikpu oro mme ọkwọrọ ederi Christendom ẹkpude. Enye ekewet ete: “Akwa uwọrọiso oro Jesus ọkọnọde ukpepn̄kpọ emi enye okokotde Obio Ubọn̄ Heaven edi n̄wọrọnda, ke ẹmende ẹdomo ye nte ẹbatde enye ke ekpri n̄kpọ ke edinam ye ukpepn̄kpọ ata ediwak ufọkederi Christian.” Edi, edieke anade mme owo ke emana emi ẹnyene uwem, ana mmọ ẹbemiso ẹkop n̄kpọ ẹban̄a Obio Ubọn̄ Abasi oro ẹma ẹkewụk, ndien man ẹnam oro, ana owo ọkwọrọ eti mbụk emi aban̄ade enye.—Rome 10:14, 15.
8. Ntak emi edikwọrọ eti mbụk Abasi edide mfọnn̄kan n̄kpọ ndinam mfịn, edi nso usụn̄ edinam mîdinọhọ nsinsi ufọn?
8 Edikwọrọ eti mbụk Abasi, ndien, edi mfọnn̄kan n̄kpọ ndinam mfịn. Emi edi ntre koro etop Obio Ubọn̄ ọnọde ata idotenyịn oro anamde esịt owo ọyọhọ ye idatesịt ke ukperedem ini emi ‘ndiọkeyo ẹdude.’ (2 Timothy 3:1-5; Rome 12:12; Titus 2:13) Ke adan̄aemi uwem ke ererimbot emi mînyeneke iwụk onyụn̄ omụhọde, uwem ke obufa ererimbot Abasi edidi ke nsinsi, asan̄ade ye idatesịt, ekese n̄kpọ, ye emem kpa mi ke isọn̄. (Psalm 37:3, 4, 11) Nte Jesus Christ ọkọdọhọde, “nso udori ke owo edikụt, edieke enye adiade ofụri ererimbot, ndien ada uwem esie osio isop?” Edieke owo atabade unen ndidu uwem ke obufa ererimbot Abasi, nso ufọn ke ererimbot emi oyomde ndibe mfep mi enyene? Utọ idatesịt emi owo oro okụtde idahaemi ke mme n̄kpọ obụkidem edi ikpîkpu, ukpọk ukpọk, onyụn̄ ebịghi ke ekpri ibio ini.—Matthew 16:26; Ecclesiastes 1:14; Mark 10:29, 30.
9. (a) Ke ini eren oro ẹkenọde ikot ẹte edidi mbet Jesus ekeben̄ede ndisịk emi nnịm, nso ke Jesus eketeme enye ete anam? (b) Didie ke ibọrọ Jesus okpotụk nnyịn?
9 Eren kiet emi Jesus okokotde ete edidi mbet imọ ọkọdọhọ ete: “Yak mbem iso n̄ka n̄kobụk ete mi.” Nso ke Jesus eketeme enye ete anam? Ke ọfiọkde ete ke eren emi eyesịk ata akpan utom onịm n̄kukụre man ebet tutu ke ete ye eka esie ẹkpade, Jesus ama ọbọrọ ete: “Yak mme akpan̄kpa ẹbụk mme akpan̄kpa mmọ; edi afo, ka kọkwọrọ Ubọn̄ Abasi.” (Luke 9:59, 60) Mbon oro ẹwụtde eti ibuot ke ndisụk ibuot nnọ Christ ikemeke ndiwọn̄ọde n̄kpọn̄ edinam utom emi ẹdọn̄de mmọ ete ẹkwọrọ etop Obio Ubọn̄. Eti ibuot eke otode Abasi anam mmọ ẹfiọk nte ke ẹbiere ikpe nsobo ẹnọ ererimbot emi ye mme andikara enye. (1 Corinth 2:6; 1 John 2:17) Mme andinọ itie edikara Abasi ibetedem ẹfiọk ẹte ke n̄kukụre ata idotenyịn ubonowo ọkọn̄ọ ke Abasi ndisịbe ndụk nnyụn̄ mbọ ukara n̄kara. (Zechariah 9:10) Ntre ke adan̄aemi mbon oro ẹnyenede eti ibuot eke ererimbot emi mînịmke Obio Ubọn̄ Abasi ke akpanikọ mînyụn̄ iyomke ukara eke heaven oro, mbon oro eti ibuot eke Abasi adade usụn̄ ẹsinam se idade ata ufọn isọk ekemmọ owo, ẹtịmde mmọ idem ẹnọ nsinsi uwem ke obufa ererimbot oro Jehovah ọn̄wọn̄ọde.—John 3:16; 2 Peter 3:13.
“Ndisịme Ikọ ke Enyịn Mbon Nsobo”
10. (a) Ke ini Saul eke Tarsus akakabarede esịt, nso utom ke enye okonyịme ndinam, ndien didie ke enye ekese emi? (b) Nso ke ẹkeda ẹfiọk mbon Greek eset, edi didie ke Abasi ekese eti ibuot mmọ?
10 Saul eke Tarsus, emi akakabarede edi Paul kpa apostle Jesus Christ, ama anam utom unyan̄a uwem emi. Nte owụt ifiọk ndikere nte ke ini Jesus Christ akanamde Saul akabade esịt, ke Enye ọkọdọhọ enye anam ndisịme utom? Paul ikekereke ntre. (Philippi 2:16) Ke ini oro ẹkebat mbon Greek nte ẹdide mbon oro ẹnyenede ifiọk ẹkan ke ererimbot. Mmọ ẹma ẹsinam inua ẹban̄a ikpọ mbon akwaifiọk ye mme ọfiọkn̄kpọ owo mmọ. Okposụkedi Paul ekesemde usem Greek, enye iketieneke akwaifiọk ye ukpepn̄kpọ mbon Greek. Ntak-a? Koro utọ eti ibuot eke ererimbot emi edi ndisịme ke n̄kan̄ Abasi.a Paul okoyom eti ibuot Abasi, emi okonụkde enye ndikwọrọ eti mbụk to ke ufọk sịm ufọk. Akakan Ọkwọrọikọ oro akanam odude, Jesus Christ, ama onịm uwụtn̄kpọ ama onyụn̄ eteme enye ete anam ukem utom oro.—Luke 4:43; Utom 20:20, 21; 26:15-20; 1 Corinth 9:16.
11. Ke edide akpan n̄kpọ akan, nso ke Paul eketịn̄ aban̄a utom ukwọrọikọ emi ẹkedọn̄de enye ye eti ibuot eke ererimbot?
11 Paul etịn̄ ntem aban̄a utom emi ẹkedọn̄de enye ndikwọrọ ikọ: “Christ okosio mi ọdọn̄ . . . ndika n̄kọkwọrọ eti mbụk, idịghe ye ifiọk utịn̄ikọ, man ẹdinam eto ndutụhọ Christ edi ikpîkpu. Koro utịn̄ikọ aban̄ade eto ndutụhọ [uwa ufak Jesus] edi ndisịme n̄kpọ ọnọ mmọ oro ẹtakde-tak, edi ye nnyịn ẹmi ẹnyan̄ade enye edi odudu Abasi. Koro ẹwet ntem ẹte: ‘Nyebiat eti ibuot mme ọfiọkn̄kpọ owo, nyenyụn̄ nsịn ọniọn̄ mbon ọniọn̄.’ Enye ọfiọkn̄kpọ owo [utọ nte owo akwaifiọk]? Enye andiwet n̄wed? Enye eneni eneni editịm n̄kpọ emi? Nte Abasi ikanamke eti ibuot mbon ererimbot akabade edi ndisịme? Koro sia, ke eti ibuot Abasi, ererimbot idaha eti ibuot esie ifiọk Abasi, Abasi ama okụt nte ọfọnde ndida ukwọrọikọ emi owo ẹsede ke ndisịme nnyan̄a mmọemi ẹnịmde ke akpanikọ.”—1 Corinth 1:17-21 NW.
12. Nso ke Jehovah anam ebe ke “ukwọrọikọ, emi owo ẹsede ke ndisịme,” ndien didie ke mbon oro ẹyomde “eti ibuot emi otode ke enyọn̄” ẹdinam n̄kpọ?
12 Okposụkedi etiede nte se isọn̄de ndinịm, kpa mbon oro ererimbot okotde ndisịme ẹdi mbon oro Jehovah adade anam n̄kpọ nte mme ọkwọrọikọ esie. Ih, ebede ke utom mme ọkwọrọikọ ẹmi, oro ẹsede ke ndisịme, Abasi anyan̄a mmọemi ẹnịmde ke akpanikọ. Jehovah otịm mme n̄kpọ man mme andikwọrọ “ndisịme” emi ẹditoro idemmọ, ndien mme owo eken nte enende ikemeke nditoro mmọemi mmọ ẹkekopde eti mbụk ẹto. Emi edi ntem mbak “owo baba kiet edibụre mbụre ke iso Abasi.” (1 Corinth 1:28-31; 3:6, 7) Edi akpanikọ, ọkwọrọikọ enyene akpan udeme, edi etop emi ẹkedọn̄de enye ẹte ọkwọrọ edi se inamde owo enyene edinyan̄a edieke owo oro onịmde etop oro ke akpanikọ. Mmọ oro ẹyomde “eti ibuot emi otode ke enyọn̄” idisehe etop ọkwọrọikọ ke ndek koro etiede nte enye edi ndisịme ye usụhọde owo, osobode ukọbọ, onyụn̄ asan̄ade to ke ufọk sịm ufọk. Utu ke oro, mbon ifụre ifụre ido ẹyekpono anditan̄a Obio Ubọn̄ nte ọkwọrọikọ emi Jehovah ọdọn̄de onyụn̄ edide ke enyịn̄ Abasi. Mmọ ẹyeda etop oro ọkwọrọikọ adade edi ebe ke ikọ inua ye n̄wed oro ẹmịn̄de-mịn̄ ke ata akpan n̄kpọ.—James 3:17; 1 Thessalonica 2:13.
13. (a) Didie ke mme Jew ye mme Greek ẹkese ukwọrọikọ oro aban̄ade Christ emi ẹkewotde? (b) Ewe otu mme owo ke owo mîkokotke ediwak mmọ ite ẹdidi mme anditiene Jesus, ndien ntak-a?
13 Ke akade iso ke nneme esie oro aban̄ade mme usụn̄ Abasi, Paul ọdọhọ ete: “Mme Jew ẹben̄e mme idiọn̄ọ, mme Greek ẹnyụn̄ ẹyom ifiọk; edi nnyịn ikwọrọ Christ nte owo emi ẹkewotde . . . ọwọrọ itiat iduọ ọnọ mme Jew, ye ndisịme ikọ ke enyịn mme Gentile; edi ọnọ mmọemi Abasi okokotde, ye mmọ ẹdide mme Jew ye ẹdide mme Greek, Christ emi edi odudu Abasi ye ifiọk Abasi. Koro ndisịme eke Abasi edi ọniọn̄ akan owo, mmeme eke Abasi onyụn̄ ọsọn̄ akan owo. Nditọete, ẹse edikot eke Abasi okokotde mbufo; ẹte, ikotke ediwak mmọemi owo ẹbatde ke mbon eti ibuot, ikọtke ediwak mme enyene-odudu, inyụn̄ ikotke ediwak mbọn̄: edi Abasi ekemek n̄kpọ oro ẹdide ndisịme ke ererimbot man Enye esuene mbon eti ibuot; Abasi okonyụn̄ emek n̄kpọ eke ẹdide mmeme ke ererimbot man Enye esuene n̄kpọsọn̄ n̄kpọ.”—1 Corinth 1:22-27; men Isaiah 55:8, 9 domo.
14. (a) Edieke ẹbụpde mmọ n̄weditoro mmọ, nso ke Mme Ntiense Jehovah ẹsinyan ubọk ẹwụt? (b) Ntak emi Paul ekesịnde ndinem mbon Greek esịt ke ndikpada eti ibuot eke ererimbot nnam n̄wụtidem ekededi?
14 Ke ini Jesus okodude ke isọn̄, mme Jew ẹma ẹbụp ẹyom idiọn̄ọ eke otode ke heaven. (Matthew 12:38, 39; 16:1) Edi Jesus ama esịn ndinọ idiọn̄ọ ekededi. Kpasụk ntre Mme Ntiense Jehovah mfịn iwụtke n̄weditoro baba kiet oro ẹkpetiede nte idiọn̄ọ. Utu ke oro, mmọ ẹnyan ubọk ẹwụt utom emi ẹdọn̄de mmọ ẹte ẹkwọrọ eti mbụk, nte ẹwetde ke mme utọ ufan̄ikọ Bible nte Isaiah 61:1, 2; Mark 13:10; ye Ediyarade 22:17. Mbon Greek eset ẹkeyom eti ibuot, kpa akwa ifiọkn̄wed ke mme n̄kpọ ererimbot emi. Ke adan̄aemi Paul ọkọbọde ukpep ke eti ibuot ererimbot emi, enye ama esịn ndinem mbon Greek esịt ke ndikpada enye n̄wụt idem ke usụn̄ ekededi. (Utom 22:3) Enye ekesem onyụn̄ ewet n̄kpọ ke usem Greek oro mme usụhọde owo ẹkesidade ẹneme nneme, utu ke n̄wọrọnda usem Greek. Paul akasian mbon Corinth ete: “Ke adan̄aemi n̄kedide ke ọtọ mbufo, nditọete, nsan̄ake ye akan ikọ m̀mê ifiọk n̄kwọrọ ndịben̄kpọ Abasi nnọ mbufo. . . . ikọ mi ye ukwọrọikọ mi ikọnyụn̄ isan̄ake ke nneminua ye ifiọk owo, edi edi spirit akada odudu anam n̄kpọ an̄wan̄a mbufo; man mbuọtidem mbufo okûkọn̄ọ ke ifiọk owo, edi ọkọn̄ọ ke odudu Abasi.”—1 Corinth 2:1-5.
15. Nso ke Peter eti mbon oro ẹsakde eti mbụk, ndien didie ke idaha emi odude mfịn edi ukem ye eke eyo Noah?
15 Ke ukperedem ini ẹmi, apostle Peter afiak eti mbon nsahi ẹmi ẹsakde eti mbụk aban̄ade obufa ererimbot Abasi emi edide ye utịt ererimbot emi asan̄ade ekpere nte ke “edi mmọn̄ ke ẹkeda ẹfụk ẹnyụn̄ ẹsobo” ererimbot eke eyo Noah. (2 Peter 3:3-7) Ke akasakde iso ese akama-nsobo utịt oro, nso ke Noah akanam? Ediwak oro ẹkere ẹte enye ekedi sụk ọbọp ubom. Edi Peter ọdọhọ ete ke ini Abasi akadade Ukwọ etiene ererimbot eset oro, Enye “[ama ekpeme] Noah, ọkwọrọ edinen ido, ye owo en̄wen itiaba.” (2 Peter 2:5) Ke eti ibuot mmọ emi edide eke ererimbot, mbon unana uten̄e Abasi oro ẹkedude uwem mbemiso Ukwọ nte eyịghe mîdụhe ẹma ẹsak se Noah ọkọkwọrọde ẹnyụn̄ ẹkot enye ndisịme, owo abian̄a, ye owo unana ifiọk. Mfịn, mme Christian akpanikọ ẹsak iso ẹse ukem idaha oro, sia Jesus ekemende emana nnyịn odomo ye eke eyo Noah. Kpa ye mbon nsahi, nte ededi, edikwọrọ eti mbụk Obio Ubọn̄ akan ikpîkpu utịn̄ikọ. Ukem nte ukwọrọikọ emi Noah ọkọkwọrọde, enye ọwọrọ edinyan̄a ọnọ ọkwọrọikọ ye mmọ oro ẹkpan̄de utọn̄ ẹnọ enye!—Matthew 24:37-39; 1 Timothy 4:16.
‘Ndikabade Ndi Ndisịme Man Ẹkabade Ẹdi Ọniọn̄’
16. Nso iditịbe inọ eti ibuot eke ererimbot emi ke Armageddon, ndien mmanie ẹdibọhọ ẹdụk obufa ererimbot Abasi?
16 Ibịghike, ke Armageddon, Jehovah Abasi eyebiat kpukpru “ifiọk mbon eti ibuot.” Enye eyesịn “ọniọn̄ mbon ọniọn̄” ẹmi ẹbemde iso ẹtịn̄ nte ndutịm obufa ererimbot mmọ edidade mme idaha ẹmi ẹfọnde ẹkan ọsọk ubonowo. “Ekọn̄ akwa usen Abasi, Andikara kpukpru n̄kpọ” eyesobo kpukpru eneni, akwaifiọk owo, ye eti ibuot eke ererimbot emi efep. (1 Corinth 1:19; Ediyarade 16:14-16) N̄kukụre mbon oro ẹdibọhọde ekọn̄ oro ẹnyụn̄ ẹnyene uwem ke obufa ererimbot Abasi ẹdi mbon oro ẹsụkde ibuot ẹnọ se ererimbot emi okotde ndisịme—ih, ubọn̄ ubọn̄ eti mbụk Obio Ubọn̄ Jehovah.
17. Didie ke Mme Ntiense Jehovah ẹkabade ẹdi “ndisịme,” ndien nso ke ikọt Abasi ẹmi ẹkwọrọde eti mbụk ẹbiere ndinam?
17 Mme Ntiense Jehovah, ke ẹdide se spirit esie adade usụn̄, ikopke bụt ndikwọrọ se ererimbot okotde ndisịme. Utu ke ndidomo ndidi ọniọn̄ ke enyịn ererimbot, mmọ ẹkabade ẹdi “ndisịme.” Didie? Ke ndinam utom ukwọrọikọ Obio Ubọn̄ man otodo mmọ ẹkpedi ọniọn̄, nte Paul ekewetde: “Edieke owo mbufo ekededi esede idem ke enyene-ibuot owo ke eyo emi, yak enye akabade edi ndisịme, man enye ọfiọk n̄kpọ.” (1 Corinth 3:18-20) Ikọt Jehovah ẹmi ẹkwọrọde eti mbụk ẹfiọk ufọn unyan̄a uwem emi etop mmọ enyenede ẹyenyụn̄ ẹkaiso ndikwọrọ enye ye unana edikpa mba tutu ererimbot emi ye eti ibuot esie ẹsịm utịt ke ekọn̄ Armageddon. Ibịghike, Jehovah Abasi eyewụt unen itie edikara ofụri ekondo esie onyụn̄ ada nsinsi uwem ọsọk kpukpru mbon oro ẹnịmde ke akpanikọ idahaemi ẹnyụn̄ ẹdade “ukwọrọikọ, emi owo ẹsede ke ndisịme” ẹnam n̄kpọ.
[Mme Ikọ idakisọn̄]
a Kpa ye mme eneni ye mme ndụn̄ọde mbon akwaifiọk eke mme ọfiọkn̄kpọ owo Greek eset, mme uwetn̄kpọ mmọ ẹwụt ẹte ke mmọ ikekwe ata ntak ndinyene idotenyịn. Prọfesọ J. R. S. Sterrett ye Samuel Angus ẹsio emi ẹwụt: “Idụhe n̄wed emi ọdọn̄ọde mbọm mbọm eseme akan oro kaban̄a mme mfụhọ uwem, ima ndibe mfep, abian̄a abian̄a idotenyịn, ye isọn̄esịt eke n̄kpa.”—Funk and Wagnalls New “Standard” Bible Dictionary, 1936, page 313.
Nso Ẹdi Mme Ibọrọ Fo?
◻ Nso orụk eti ibuot iba ẹdu?
◻ Nso idi akpan ndo emi odude ke eti ibuot eke ererimbot?
◻ Ntak emi edikwọrọ eti mbụk edide mfọnn̄kan n̄kpọ ndinam?
◻ Nso ke mîbịghike editịbe ọnọ kpukpru eti ibuot eke ererimbot?
◻ Ntak emi Mme Ntiense Jehovah mîkopke bụt ndikwọrọ se ererimbot okotde ndisịme?
[Ndise ke page 23]
Mme Greek ẹkeyom eti ibuot eke ererimbot ndien ekese ini ẹkese ukwọrọikọ Paul nte ndisịme