Mme Uyen Christian—Ẹsọn̄ọ Ẹda ke Mbuọtidem

“ANA kpukpru owo ẹdụk.” Oro ekedi ntọt. Kpukpru nditọ ufọkn̄wed mbon Japan kiet ẹkenyene ndidu ke akwa mbono ke ufọkmbono. Uyen Christian kiet edide eyen ufọkn̄wed ikekemeke ndinyịme ye ndusụk ekikere oro ẹwụtde ke ikwọ ufọkn̄wed. Enye ama ekere ete, “Ọfọn, mmọfiọk nte ke ẹyebre ikwọ ufọkn̄wed oro. Edi ami ndinyeneke mfịna ndomokiet. Ami nnyesụhọde ntetie ke edem nte nsinamde.”

Ke ini uyen Ntiense Jehovah oro okodụkde ufọkmbono oro, nte ededi, enye ama okụt ete ke kpukpru mbon ikpehe ukpepn̄kpọ oro ẹketie ke akpatre n̄kpọitie ke edem. Ntre, enye ekenyene nditie ke iso mmọ. Ke ini nditọ ufọkn̄wed eken ẹkedahade ẹda ndikwọ ikwọ ufọkn̄wed, enye okosụk etetie ukpono ukpono. Edi mme andikpep ẹma ẹkop iyatesịt ẹban̄a emi. Mmọ ẹma ẹdomo ndinyịk enye adaha ada. Nte afo emekeme ndikere nte odude ke utọ idaha oro? Nso ke afo akpakanam?

Ntak Oyomde Ọkpọsọn̄ Mbuọtidem

Ekpedi eti n̄kpọ edieke mme owo ẹkpesion̄ode idem ẹkpọn̄ mme Christian ẹnyụn̄ ẹyakde mmọ ẹdu uwem nte ekemde ye ubieresịt mmọ oro Bible ọnọde ukpep. Ediwak ini, nte ededi, mme Christian ẹsinyene ndisobo mfịghe mfịghe idaha. Emi ikpakpaha nnyịn idem, koro Eyen Abasi, Jesus Christ, ọkọdọhọ ete: “Edieke mmọ ẹkesịnde Mi enyịn, ẹyesịn mbufo enyịn n̄ko.” (John 15:20) Ke ẹsiode nnennen ukọbọ ẹfep, mme asan̄autom Jehovah ẹsobo nsio nsio udomo mbuọtidem efen.

Oyom mme uyen Christian kpukpru ini ẹnyene ọkpọsọn̄ mbuọtidem man ẹsak iso ẹse mme idomo ke ufọkn̄wed. Ẹkeme ndinyịk mmọ ndinyene ebuana ye nditọ ubet ukpepn̄kpọ ẹmi ẹsemde ndedehe usem m̀mê ẹnyenede edu oro esuenede Abasi. Mme uyen Christian ẹkeme ndisobo ye nsọn̄uyo oro ọkọride-kọri, emi ẹdoride ke ufreidụt ye mfịghe nditiene mbuana ke mme n̄ka, mbre ukara ufọkn̄wed, m̀mê mme edinam eken oro ẹkemede ndida nditaha ndi ke n̄kan̄ eke spirit. Mme andikpep m̀mê ekemmọ nditọ ufọkn̄wed ẹkeme ndidomo ndinyịk mme uyen Christian ndikan̄ mbuọtidem. Ntre, ana mme uyen oro ẹten̄ede Abasi ẹberi edem ke spirit Jehovah man ẹnyene mbuọtidem oro ẹyomde ndinọ in̄wan̄în̄wan̄ ibọrọ kaban̄a idotenyịn mmọ.—Matthew 10:19, 20; Galatia 5:22, 23.

‘Du ke Mben̄eidem Ndinọ Ibọrọ’

Item apostle Peter odot ọnọ mme uyen ye ikpọ owo ẹdide Christian. Enye ọkọdọhọ ete: “Kpukpru ini ẹben̄e idem ndibọrọ kpukpru owo eke edibụpde mbufo ntak idotenyịn emi mbufo ẹnyenede; edi ẹkpeme ndibọrọ ke sụn̄sụn̄ ido ye ke ido uten̄e.” (1 Peter 3:15) Oyom nso man ẹdu ke mben̄eidem ndinọ utọ ibọrọ oro? Akpa, ana afo ọdiọn̄ọ se N̄wed Abasi ekpepde. Man ọsọn̄ọ ada ke ufọkn̄wed ke mme utọ n̄kpọ nte ufreidụt, mbre ukara, uda n̄kpọsọn̄ ibọk ke idiọk usụn̄, m̀mê ido uwem, ana afo ebemiso ọdiọn̄ọ ntak kaban̄a idaha Christian ndien ke esịt akpanikọ ana onịm enye ke akpanikọ.

Ke uwụtn̄kpọ, apostle Paul ama asian ekemmọ mme Christian ete: “Ẹkûbian̄a idem mbufo ke n̄kpọ emi. Idiọk nsan̄a ababiat eti ido.” (1 Corinth 15:33) Nte afo omonyịme ye oro? Nte Paul okowụtde, edi mmemmem n̄kpọ ndidi se ẹbian̄ade ke n̄kpọ aban̄ade ebuana. Owo ekeme nditie ufan ufan onyụn̄ ọfọn ido. Edi edieke enye mîtieneke ibuana ye ekikere fo kaban̄a utom Jehovah m̀mê idem ndinịm mme un̄wọn̄ọ Bible ke akpanikọ, enye edi idiọk nsan̄a. Ntak-a? Koro uwem esie ọkọn̄ọ ke isio isio edumbet, ndien mme n̄kpọ oro ẹdide ata akpan n̄kpọ ẹnọ Christian ẹkeme ndidi n̄kpọ oro ẹnyenede esisịt ufọn ẹnọ enye.

Emi idịghe n̄kpọ n̄kpaidem, koro Jesus ama etịn̄ aban̄a mme anditiene enye ete: “Mmọ idịghe eke ererimbot, kpa nte Ami mmendịghe eke ererimbot.” (John 17:16) Owo ikemeke ndidi ata Christian ndien ke ukem ini oro edi ubak ererimbot emi, emi Satan edide abasi. (2 Corinth 4:4) Nte afo omokụt nte utọ edidianade n̄kpọn̄ ererimbot ekpemede Christian osio ke idiọkn̄kpọ ye en̄wan oro ọnọmode ata ediwak owo mfịn? Ke edide ntre, do afo emekeme ndidiọn̄ọ ntak emi anade afo ọsọn̄ọ omụm edida san̄asan̄a fo akama, idem edieke emi ọwọrọde ke afo ukemeke ndibuana ke ndusụk edinam ufọkn̄wed.a

Ẹma ẹwụt nte edisọn̄ọ nda ke mbuọtidem ye edinịm mme udọn̄ n̄kpọ Obio Ubọn̄ akpa ke uwem edide akpan n̄kpọ ke n̄kpọ aban̄ade ekpri Christian an̄wan kiet. (Matthew 6:33) Ke ini ẹketọtde edidi ndomonse kaban̄a edinam ukụre ufọkn̄wed esie, enye ama okụt ete ke ẹkediomi enye ke ukem usen oro imo ikodiomide ndidụk mbono circuit eke Mme Ntiense Jehovah. Enye ama ewet ukpono ukpono leta anamde an̄wan̄a ntak emi enye mîdidụhe ke ndomonse oro onyụn̄ ayak enye ọnọ andikpep esie mbemiso ukpepn̄kpọ ọtọn̄ọde. Ke ukpepn̄kpọ ama okokụre andikpep oro ama eben̄e ndinyene nneme ye enye onyụn̄ ọdọhọ enye afiak anam ntak emi enye mîdidụhe ke ndomonse oro an̄wan̄a. Eyenan̄wan oro ọdọhọ ete: “Enye okoyom ndifiọk m̀mê ikọ mi ẹkesụk ẹdi ukem. Nte emi ekedi ekikere mi, mîdịghe nte leta oro ekesịne sụk mme ikọ ẹtode eka mi? Ke okụtde ọkpọkpọ ubiere mi ke n̄kpọ emi, enye ikọbiọn̄ọke mi.”

‘Ẹbọrọ Kpukpru Owo’

Mme uyen Christian ẹsiwak ndikụt nte ke edieke mmimọ inamde mbon ikpehe ukpepn̄kpọ ye nditọ ufọkn̄wed mmimọ ẹdiọn̄ọ ẹban̄a idaha mmimọ in̄wan̄în̄wan̄ mbemiso eneni edemerede, mfịghe isitịmke ikpon ke ini ẹsobode mfịna. Uyen Christian Japan kiet obụk ete ke ini imọ ikedide isua 11 ke emana, ufọkn̄wed imọ ama oyom kpukpru nditọ ufọkn̄wed ẹdụk usọrọ Ukabadeisua. Nditọ ufọkn̄wed emi ẹkedude ke ikpọ ubet ukpepn̄kpọ ẹma ẹfịk enye nditiene mbuana, edi enye ikodụhe do, ndien andikpep esie ama ọdiọn̄ọ idaha esie. Ntaka? Koro ke ekperede ini oro ufọkn̄wed oyomde nditọn̄ọ, Ntiense oro ye ete ye eka esie ẹma ẹsobo ye andikpep ẹnyụn̄ ẹnam nsio nsio ikpehe aban̄ade idaha Christian mmọ an̄wan̄a.

Ke adan̄aemi ẹbuanade ke utom an̄wautom, ndusụk uyen ẹdide Christian ẹsikop ndịk ndisobo ye nditọ ubet ukpepn̄kpọ m̀mê mme andikpep. Nte esitịbe ntre ọnọ fi? Ke edide ntre, ntak mûnamke usio-ukot unyụn̄ unam nditọ ubet ukpepn̄kpọ fo ẹdiọn̄ọ ẹte ke afo emesikwọrọ ikọ ke ufọk ke ufọk ye ntak emi afo esinamde ntre. Ntiense Jehovah kiet ọsọn̄de isua-14 ọkọtọt ete: “Kpukpru owo ke ufọkn̄wed ẹdiọn̄ọ idaha mi nte Christian. Ke akpanikọ, mmọ ẹdiọn̄ọ oro ọfọn tutu eyedi ke nsobode ye eyen ubet ukpepn̄kpọ mi ke ini mbuanade ke utom ukwọrọikọ, bụt inamke mi. Ekemmọ nditọ ufọkn̄wed ẹsiwak ndikpan̄ utọn̄, ndien ediwak ini mmọ ẹsibọ n̄wed ukpep Bible.” Eyen isua-12 ọtọt ete ke imọ imesidori enyịn ndisobo nditọ ubet ukpepn̄kpọ imọ ke ini imọ ibuanade ke utom ukwọrọikọ. Utu ke ndikop oyomonsia ke ekerede emi, enye kpukpru ini esinam ndomonse ke se enye enyenede nditịn̄ ke ini emi otịbede. Ntre, enye odu ke mben̄eidem ndinọ nti ntak mban̄a mbuọtidem esie.

Ke ediwak ufọkn̄wed, ẹdọhọ ke mme edinam ke n̄wed ama akasuana edi mbubehe ubieresịt owo. Edi ke ata idem n̄kpọ, mme andikpep ye nditọ ufọkn̄wed ẹsisịn mme owo ọkpọsọn̄ mfịghe nditiene mbuana ke mme utọ edinam oro. Christian kiet ọsọn̄de isua-20 ama okụt eti usụn̄ ndiyọ mfịghe emi. Enye ọdọhọ ete: “Ami mma nnam utom nte asiakusụn̄ unọ-un̄wam kpukpru ini ke akwa ufọkn̄wed. Kpukpru owo ẹma ẹfiọk ẹte ke mma nsịn idem ke edinam ido ukpono mi n̄kaha tutu eyede se mmen̄kemeke nditiene mbuana ke mme n̄kpọ efen.” Ekpri eyeneka an̄wan Ntiense emi ama etiene ukem edinam oro. Ndusụk uyen Christian ẹsibe nnennen nnennen ke utom usiakusụn̄ unọ-un̄wam ke mme isua ufọkn̄wed ẹdụk utom usiakusụn̄ ofụri ini nte mme anditan̄a Obio Ubọn̄ uyọhọ-ini ke ini mmọ ẹkụrede n̄wed.

Ẹkûdedei ẹfụmi nti utịp oro nti edu ye uko uko ikọ ntiense mbufo ẹnyenede. Utu ke ndidu ndopuyo ndopuyo, ntak mîwụtke ke mbufo ẹmesọn̄ọ ẹda ke mbuọtidem ke nditịn̄ ikọ ukpono ukpono edi ye uko? Ekpri eyenan̄wan Israel emi ẹkedade ẹka ntan̄mfep, okonyụn̄ edide edidu ke ufọk Naaman, akwa owoekọn̄ Syria ama anam oro. (2 Ndidem 5:2-4) Ẹma ẹtoro enyịn̄ Jehovah ke ntak usio-ukot oro ekpri eyenan̄wan oro akanamde. Ukem mbuọtidem oro ke n̄kan̄ fo ekeme ndida ukpono nsọk Abasi onyụn̄ ekeme ndin̄wam mbon en̄wen ndida idaha nte mme anditoro enyịn̄ Esie.

Akpanikọ edi nte ke nnyịn ikemeke ndikan̄ mbuọtidem nnyịn ndien isụk idi mme Christian. Jesus ọkọdọhọ ete: “Owo ekededi eke edinyịmede ke iso owo ete, idi okịm, Ami nyenyụn̄ nnyịme enye ke iso Ete Mi emi odude ke heaven. Edi owo ekededi eke edikan̄de Mi ke iso owo, ete, idịghe okịm, Ami nyenyụn̄ n̄kan̄ enye ke iso Ete Mi emi odude ke heaven.” (Matthew 10:32, 33) Ndisọn̄ọ nda ke mbuọtidem nte anditiene Jesus edi akwa mbiomo, nte enye idịghe?

Un̄wam Odu

Man ẹsọn̄ọ ẹda nte kiet ke otu Mme Ntiense Jehovah, oyom mbufo ẹnyene ọkpọsọn̄ mbuọtidem. Man ẹnyene enye, ana mbufo ye nsịnifịk ẹkpep Bible, ẹdụk mme mbonoesop Christian ẹnyụn̄ ẹbuana ke utom an̄wautom. Edieke mbufo ẹkerede ẹte ke n̄kpọ ẹsụk ẹnanana, nso ke mbufo ẹkeme ndinam? Mbet James ọkọdọhọ ete: “Edieke owo mbufo ekededi ananade eti ibuot, yak enye eben̄e Abasi, emi ọnọde kpukpru owo ke ntatubọk, mînyụn̄ itọhọke owo; ndien Abasi eyenọ enye.” (James 1:5) Ẹtịn̄ mfịna mbufo ẹnọ Jehovah ke akam; enye ekeme ndisọn̄ọ mbufo idem man ẹsak iso ẹse mme mfịna m̀mê mme idomo mbuọtidem mbufo.

Nso efen ke uyen Christian ekeme ndinam? Nwed Mme N̄ke asian nnyịn ete: “Kop uyo usọ emi okobonde fi: kûnyụn̄ usịn uka ke ndek, koro enye ọsọn̄de.” (Mme N̄ke 23:22) Apostle Paul ama ọsọn̄ọ item emi, koro enye ọkọdọhọde ete: “Nditọ, ẹsụk ibuot ẹnọ mme ete mbufo ye mme eka mbufo ke kpukpru n̄kpọ, koro emi enemde Ọbọn̄ esịt.” (Colossae 3:20) Mme ete ye eka ẹdide Christian ẹkeme ndin̄wam mbufo ndisọn̄ọ nda ke mbuọtidem. Ẹkpan̄ utọn̄ ẹnọ mme ekikere mmọ. Ye un̄wam mmọ, ẹdụn̄ọde N̄wed Abasi ye mme n̄wed ẹkọn̄ọde ke Bible, ẹyomde mme ekikere, item, ye mme ifiọkutom. Mbufo ye mme ete ye eka mbufo ẹyedara emi, ndien enye eyen̄wam mbufo ndikan bụt m̀mê ndịk.—2 Timothy 1:7.

Ẹbọ ọyọhọ ufọn ẹto ndutịm oro Jehovah Abasi anamde ebe ke esop Christian. Ẹtịm idem mfọn mfọn ẹnọ mme mbonoesop. Ẹneme ẹnọ mbiowo oro ẹmekde ye mbon en̄wen oro ẹma ẹkesosobo mme n̄kpọntịbe ẹbietde mmọ oro mbufo ẹsobode idahaemi. Solomon ọkọdọhọ ete: “Enyene-ibuot owo eyekop, onyụn̄ ọkọrọ ke se ekpepde; asian owo eyenyụn̄ enyene ikike.” (Mme N̄ke 1:5) Ntre ẹkpep n̄kpọ ẹto n̄kani owo ẹmi. Mbufo ẹmekeme ndikpep n̄kpọ, n̄ko, nto mme uyen Christian ẹmi ẹyọde mme mfịna ẹbietde eke mbufo uforo uforo.

Edinam Akpanikọ Ada Mme Edidiọn̄ Edi

Ke ndisọn̄ọ nda ke mbuọtidem, mbufo ẹyeda item Paul emi ẹsịn ke edinam “ẹsọn̄ọ ẹda, ẹkûyak n̄kpọ esehede mbufo; ẹyọhọ kpukpru ini ke utom Ọbọn̄.” (1 Corinth 15:58) Jehovah ọdiọn̄ọ onyụn̄ enyene ifiọk aban̄a mme mfịna oro mbufo ẹsobode. Enye ama ọsọn̄ọ ediwak owo oro ẹkesobode mme ukem mfịna oro idem, ndien enye eyesọn̄ọ mbufo idem. Edieke mbufo ẹberide edem ke Abasi, enye eyen̄wam mbufo koro andiwet psalm ọkọdọhọ ete: “Tọp mbiomo fo nọ Jehovah, ndien enye eyekama fi: enye idiyakke edinen owo esehede ke nsinsi.”—Psalm 55:22.

Peter ekewet ete: “Ẹtịn̄ enyịn ẹnyene esịt eke asanade, man ke nde eke ẹtịn̄de n̄kpọ ẹdian mbufo, mmọ eke ẹsuede eti uwem mbufo ke Christ ẹkpedia bụt.” (1 Peter 3:16) Edieke mbufo ẹsịnde ndikan̄ mbuọtidem ke ebuana ye ndinen mbet ye mme edumbet Abasi, mbufo ẹyenyene eti ubieresịt, emi edide ata edidiọn̄ otode Jehovah. Akande oro, mbufo ẹyenịm eti uwụtn̄kpọ ẹnọ mme uyen Christian oro ẹkemede ndidi mbuọtidem mmọ isọn̄ke idem. (1 Timothy 4:15, 16) Edu mbufo ẹkeme ndisịn udọn̄ nnọ mmọ ndisịn ukeme man ẹkabade ẹsọn̄ idem ke mbuọtidem ndien ke ntre ẹkeme ndiyọ mme idomo.

Mbufo ẹmekeme idem ndin̄wam mbon oro ke akpa ẹkebiọn̄ọde idaha Christian mbufo. Ẹti mme ọnọ-idotenyịn ikọ ẹmi: “Suan n̄kpasịp fo ke usenubọk; kûnyụn̄ ufara ubọk fo ke mbubịteyo: koro afo mûfiọkke ubak eke ediwọrọde usụn̄, m̀mê emi, m̀mê oro; unyụn̄ ufiọkke m̀mê mbiba ẹdifọn ukem ukem.” (Ecclesiastes 11:6) Anie ọfiọk nti utịp oro ẹdiwọrọde ẹto mbufo ndisuan n̄kpasịp ebe ke edinam mbuọtidem mbufo?

Ke otu mme n̄kpon n̄kan edidiọn̄ oro mbufo ẹdidọkde edi eti idaha ye Jehovah. Ke akpatre, nsọn̄ọnda ke mbuọtidem eyesụn̄ọ ke nsinsi uwem. (John 17:3; men James 1:12 domo.) Idụhe ubọhọ idomo ibio ini oro ẹnyenede ẹto ukan̄ mbuọtidem oro odotde ye editaba enọ oro.

Nso kaban̄a uyen oro ẹkesiakde ke ntọn̄ọ ntọn̄ọ ibuotikọ emi? Ọfọn, enye ama ọyọ ọkpọsọn̄ idomo esie. Ke mbono ufọkn̄wed ama okokụre, enye ke usọ ama odomo ndinam idaha esie an̄wan̄a mme andikpep. Okposụkedi owo mîkọbọrọke ikọ esie, enye ama enyene uyụhọ ndifiọk nte ke imọ ima inam esịt Jehovah adat. (Mme N̄ke 27:11) Enye ama akaiso ndisọn̄ọ nda ke mbuọtidem esie tutu enye okụre ufọkn̄wed. Ekem enye ama akabade edi asiakusụn̄. Ime mbuọtidem mbufo akpakam enyene ukem idara idara utịp oro. Enye eyenyene edieke mbufo ẹsọn̄ọde ẹda ke mbuọtidem.

[Mme Ikọ idakisọn̄]

[Ekebe ke page 25]

UN̄WAM ODUDE

◻ Kpan̄ utọn̄ nnọ ọniọn̄ otode mme abak-Abasi ete ye eka mbufo.

◻ Ẹbọ ọyọhọ ufọn ẹto mme ndutịm eke spirit ke esịt esop Christian.

◻ Ẹneme ye mbiowo oro ẹmekde ye mbon en̄wen oro ekemede ndidi ẹma ẹnyene mme mfịna ẹbietde eke mbufo.

◻ Ẹneme ye mme uyen Christian oro ẹyọde mme ukem ubiọn̄ọ oro uforo uforo.