“Ẹkûfehe Ndịk, Ekpri Otuerọn̄”
“Ẹkûfehe ndịk, ekpri otuerọn̄; koro edide eti uduak Ete mbufo ndida Obio Ubọn̄ oro nnọ mbufo.”—LUKE 12:32.
1. Nso ikedi ntak emi Jesus eketịn̄de mme ikọ ẹmi: “Ẹkûfehe ndịk, ekpri otuerọn̄”?
“ẸYOM Obio Ubọn̄ Abasi.” (Luke 12:31) Ke ini Jesus eketịn̄de mme ikọ ẹmi ọnọ mme mbet esie, enye ama etịn̄ edumbet oro akarade ekikere mme Christian ọtọn̄ọde ke eyo esie tutu osịm eke nnyịn. Ana Obio Ubọn̄ Abasi enyene ata akpa itie ke uwem nnyịn. (Matthew 6:33) Ke mbụk Luke, nte ededi, Jesus ama etịn̄ mme inem inem ikọ ye mme ikọ nsọn̄ọ ọnọ san̄asan̄a otu mme Christian. Enye ọkọdọhọ ete: “Ẹkûfehe ndịk, ekpri otuerọn̄; koro edide eti uduak Ete mbufo ndida Obio Ubọn̄ oro nnọ mbufo.” (Luke 12:32) Nte Eti Ekpemerọn̄, Jesus ama ọfiọk ete ke n̄kpọsọn̄ ini ke ẹna ẹbet mme n̄kpet n̄kpet mbet esie. Edi ntak ndomokiet ikodụhe mmọ ndikop ndịk edieke mmọ ẹkekade iso ndiyom Obio Ubọn̄ Abasi. Ntem, item Jesus ikedịghe ewụhọ nsọn̄ido. Utu ke oro, enye ekedi ima ima un̄wọn̄ọ oro ekedemerede mbuọtidem ye uko.
2. Mmanie ẹnam ekpri otuerọn̄, ndien ntak emi mmọ akpan akpan ẹnyenede san̄asan̄a ifetutom?
2 Jesus eketịn̄ ikọ ọnọ mme mbet esie, ndien enye okokot mmọ “ekpri otuerọn̄.” Enye eketịn̄ ikọ n̄ko ọnọ mbon oro Jehovah ‘edinọde Obio Ubọn̄ oro.’ Ke ẹmende ẹdomo ye akwa otuowo oro ẹdinyịmede Jesus ke ukperedem ini, otu emi ke akpanikọ ẹkedi esisịt ke ibat. Ẹkebat mmọ n̄ko ke ọsọn̄urua koro ẹkemekde mmọ kaban̄a utịbe utịbe ini iso, ndida nnam ubọn̄ ubọn̄ utom. Ete mmọ, Akwa Ekpemerọn̄, kpa Jehovah, okot ekpri otuerọn̄ ye ekikere mmọ ndibọ inyene eke heaven ke ebuana ye Obio Ubọn̄ Messiah Christ.
Ekpri Otuerọn̄
3. Nso ubọn̄ ubọn̄ n̄kukụt aban̄ade ekpri otuerọn̄ ke John okokụt?
3 Mmanie, ndien, ẹnam ekpri otuerọn̄ emi enyenede utọ utịbe utịbe idotenyịn oro? Mme anditiene Jesus Christ ẹmi ẹyetde aran ke edisana spirit. (Utom 2:1-4) Ke okụtde mmọ nte mbonikwọ eke heaven ye harp ke ubọk mmọ, apostle John ekewet ete: “N̄kụt, ndien sese, Eyenerọn̄ ke adada ke Obot Zion, tọsịn owo ikie ye aba ye inan̄ ẹnyụn̄ ẹda ye Enye, kpa mmọemi ẹkewetde enyịn̄ Esie ye enyịn̄ Ete Esie ke ọkpọiso mmọ. Mmọemi ẹdi owo ẹmi mîkasabakede idem ye iban; koro mmọ mîkọdọhọ ndọ. Ẹmi ẹdi mmọemi ẹtienede Eyenerọn̄ ẹka ọtọ nte Enye akaka. Ẹkefak mmọ ẹsio ke otu owo, ẹte mmọ ẹdi akpa mbun̄wụm ẹnọ Abasi ye Eyenerọn̄. Ndien owo ikwe mmọ abian̄a ke inua; mmọ inyụn̄ inyeneke ndo.”—Ediyarade 14:1, 4, 5.
4. Nso itieutom ke ekpri otuerọn̄ enyene ke isọn̄ mfịn?
4 Toto ke Pentecost 33 E.N., mmọemi ẹyetde aran ẹnyụn̄ ẹbonde ke spirit mi ẹmenam utom nte isụn̄utom Christ ke isọn̄. (2 Corinth 5:20) Mfịn, nsụhọ kpọt ke otu mmọ ẹdu, ẹnamde utom ọtọkiet nte otu asan̄autom emi anamde akpanikọ onyụn̄ enyenede ọniọn̄. (Matthew 24:45; Ediyarade 12:17) Ọtọn̄ọde akpan akpan ke isua 1935, “mme erọn̄ en̄wen,” kpa mme Christian ẹmi ẹnyenede idotenyịn eke isọn̄, emi ibat mmọ idahaemi edide ke mme miliọn, ẹmediana ye mmọ. Mmọemi ẹn̄wam ke ndikwọrọ eti mbụk ke ofụri isọn̄.—John 10:16.
5. Nso idi edu mbon oro ẹsụhọde ke ekpri otuerọn̄, ndien ntak mîyomke mmọ ẹfehe ndịk?
5 Nso idi edu mbon oro ẹsụhọde ke ekpri otuerọn̄ emi, ẹmi ẹdude kan̄a ke isọn̄? Ke ẹfiọkde ẹte ke mmimọ inyene ndibọ “Obio Ubọn̄ eke n̄kpọ mîkemeke ndinyen̄e,” mmọ ẹnam edisana utom mmọ ke mbak Abasi ye uten̄e. (Mme Hebrew 12:28) Mmọ ke nsụhọdeidem ẹfiọk ẹte ke ekemmọ edi ọsọn̄urua ifetutom oro osụn̄ọde ke idatesịt oro mînyeneke adan̄a. Mmọ ẹmekụt “pearl kiet emi okponde ekọmurua” oro Jesus eketịn̄de aban̄a ke ini enye eketịn̄de aban̄a Obio Ubọn̄. (Matthew 13:46) Nte akwa ukụt asan̄ade ekpere, ikọt Abasi oro ẹyetde aran ẹsọn̄ọ ẹda ye unana ndịk. Kpa ye se ikperede nditịbe nnọ ererimbot ubonowo ke “akwa usen Jehovah emi ọwọrọde etop,” mmọ ikopke ndịk oyomonsia iban̄a ini iso. (Utom 2:19-21) Ntak mmọ ẹkpekopde?
Ibat Osụhọde
6, 7. (a) Ntak emi ibat ekpri otuerọn̄ oro ẹsụk ẹdude ke isọn̄ enen̄erede ekpri? (b) Didie ke owo kiet kiet ekpese idotenyịn oro enye enyenede?
6 Ke mme isua ndondo emi ibat ekpri otuerọn̄ oro ẹsụk ẹdude ke isọn̄ emenen̄ede ekpri. Emi ama ana in̄wan̄în̄wan̄ ke ntọt Editi eke 1994. Ke n̄kpọ nte esop ikọt Jehovah 75,000 ke ofụri ererimbot, owo 8,617 kpọt ẹkewụt nte ke idi mme andibuana ke nsụhọ ebe ke ndidia mme n̄kpọ idiọn̄ọ oro. (Matthew 26:26-30) Ke edide isio ye oro, ofụri ibat mme andidụk ekedi 12,288,917. Mme Christian oro ẹyetde aran ẹfiọk ẹte ke ẹdori enyịn emi ndidi ntre. Jehovah omonịm ibat oro enyenede-nyene adan̄a, 144,000, ndinam ekpri otuerọn̄, ndien enye ke akatan̄ emi obok ọtọn̄ọde ke Pentecost 33 E.N. Nte owụtde ifiọk, ikot ekpri otuerọn̄ ekedisịm utịt ke ini ibat oro ekekperede ndiyọhọ, ndien uyarade edi nte ke ofụri ofụri editan̄ mbon oro ẹdiọn̄de mi ke san̄asan̄a usụn̄ mbok eketre ke 1935. Nte ededi, ẹma ẹtịn̄ prọfesi ẹte ke utịt ini mme erọn̄ en̄wen ẹyekọri ẹdi “akwa otuowo, eke baba owo kiet mîkemeke ndibat, eke ẹtode ke kpukpru obio ye esien ye idụt ye usem.” Ọtọn̄ọde ke 1935 se Jehovah atan̄de obok ke ofụri ofụri edi akwa otuowo emi, emi idotenyịn mmọ edide nsinsi uwem ke paradise isọn̄.—Ediyarade 7:9; 14:15, 16; Psalm 37:29.
7 Ata ediwak ke otu mbon ekpri otuerọn̄ oro ẹsụk ẹdude ke isọn̄ ẹdu idahaemi ke mme iduọk isua 70, 80, ye 90. Ibat ibat ẹbe ọyọhọ isua 100 mmọ ke uwem. Kpukpru mmọemi, se ededi oro isua emana mmọ edide, ẹfiọk ẹte ke ebede ke ediset eke heaven, ke akpatre mmimọ iyediana ye Jesus Christ iyenyụn̄ ikara ye enye ke uyama uyama Obio Ubọn̄ esie. Mbon akwa otuowo ẹdidi mme andidu ke isọn̄ ke idak Christ kpa Edidem. Yak owo kiet kiet adat esịt ke se Jehovah onịmde ọnọ mbon oro ẹmade enye. Inaha inọ nnyịn ndimek idotenyịn oro ikpenyenede. Oro enyene Jehovah ndibiere. Otu mbiba ẹmi ẹkeme ndidat esịt ke idotenyịn mmọ kaban̄a inem inem ini iso, edide enye edi ke Obio Ubọn̄ eke heaven m̀mê ke paradise isọn̄ ke idak Obio Ubọn̄ oro.—John 6:44, 65; Ephesus 1:17, 18.
8. Edifịk owo 144,000 idiọn̄ọ aka anyan adan̄a didie, ndien nso iditịbe ke ini enye okụrede?
8 Ekpri otuerọn̄ emi edide 144,000 edi “Israel Abasi,” emi adade itie Israel eke obụk ke mme uduak Abasi. (Galatia 6:16) Ke ntre, nsụhọ oro ẹnam mbon oro ẹsụhọde ke otu idụt eke spirit oro ẹsụk ẹdude ke isọn̄. Ke ẹfịk utọ mbon oro ẹsụhọde do idiọn̄ọ ndinyene akpatre unyịme Jehovah. Ke n̄kukụt, apostle John ama okụt emi otịbede, ndien enye ọkọtọt ete: “N̄kụt angel en̄wen otode ke edem usiahautịn ọdọk, emi enyenede ufịkn̄kpọ Abasi uwem; ndien enye ada ọkpọsọn̄ uyo okot mme angel inan̄ oro ẹyakde odudu ẹnọ mmọ ndibiat obot ye inyan̄, ete, Ẹkûbiat obot ye inyan̄ ye mme eto tutu idifịk ikọt Abasi nnyịn idiọn̄ọ ke ọkpọiso mmọ. Ndien n̄kop ibat mmọemi ẹfịkde mmọ idiọn̄ọ; tọsịn owo ikie ye aba ye inan̄, ẹmi ẹsiode ke kpukpru esien nditọ Israel [eke spirit] ẹfịk mmọ idiọn̄ọ.” (Ediyarade 7:2-4) Sia utom edifịk Israel eke spirit emi idiọn̄ọ nte an̄wan̄ade ekperede ndikụre, ẹwụt mme edinam nduaidem oro ẹdisọpde ẹda itie. N̄kpọ kiet edi, anaedi “akwa ukụt,” kpa ini emi ẹsanade ofụm nsobo mbinan̄ ẹyak ke isọn̄, enen̄ede ekpere.—Ediyarade 7:14.
9. Didie ke ekpri otuerọn̄ ese ibat akwa otuowo oro akade-kaiso ndikọri?
9 Mbon akwa otuowo oro ẹma ẹketatan̄ ẹbok ẹdi ke ediwak miliọn. Emi edemede esịt nsụhọ oro didie ntem! Okposụkedi mbon oro ẹdide eke ekpri otuerọn̄ ẹmi ẹsụk ẹdude ke isọn̄ ẹkade-kaiso ndisụhọde ke ibat, mmọ ẹmenọ iren mbon akwa otuowo oro ẹdotde ukpep ẹnyụn̄ ẹtịm mmọ idem ndibiom mme mbiomo oro ẹnyenede ebuana ye esop Abasi eke isọn̄ emi atarade-tara. (Isaiah 61:5) Nte Jesus okowụtde, mme andibọhọ akwa ukụt ẹyedu.—Matthew 24:22.
“Ẹkûfehe Ndịk”
10. (a) Nso en̄wan ke ẹdida ẹtiene ikọt Abasi, ndien enye edida ikosụn̄ọ ke nso? (b) Mme mbụme ewe ke ẹbụp nnyịn owo kiet kiet?
10 Ẹma ẹsio Satan ye mme demon esie ẹduọk ke n̄kann̄kụk isọn̄. Ke ẹdemede enye ye udịm esie ndin̄wana ke ofụri ukeme mmọ ye ikọt Jehovah. Ẹtịn̄ ẹban̄a en̄wan emi, oro ẹkebemde iso ẹtịn̄ ke Bible, nte en̄wan Gog eke Magog. Devil ada en̄wan esie etiene mmanie akpan akpan? Nte idịghe ye akpatre mme andibuana ke ekpri otuerọn̄, kpa Israel eke spirit Abasi, ẹmi ẹdụn̄de ke emem “ke ufọt ererimbot”? (Ezekiel 38:1-12) Ih, edi nsụhọ otu mbon oro ẹyetde aran ẹmi ẹnamde akpanikọ, ọkọrọ ye mme anam-akpanikọ nsan̄a mmọ, mme erọn̄ en̄wen, ẹyekụt nte en̄wan Satan anamde Jehovah Abasi anam n̄kpọ ke ndyọ ndyọ usụn̄. Enye eyesịbe odụk ke ndida nnọ ikọt esie, ndien emi eyenam “akwa usen Jehovah emi enyenede ndịk” ọtọn̄ọ. (Joel 2:31) Mfịn, asan̄autom emi anamde akpanikọ onyụn̄ enyenede ọniọn̄ ke anam akpan utom unyan̄a uwem, ọnọde ntọt aban̄a edisịbe ndụk oro Jehovah edisịbede odụk emi edide. (Malachi 4:5; 1 Timothy 4:16) Nte afo ke ọnọ utom oro ibetedem ifịk ifịk, abuanade ke ndikwọrọ eti mbụk Obio Ubọn̄ Jehovah? Nte afo eyekaiso ndinam ntre nte anditan̄a Obio Ubọn̄ oro mîkopke ndịk?
11. Ntak emi uko uko edu edide akpan n̄kpọ mfịn?
11 Ke ikerede iban̄a idaha ererimbot oro odude kemi, edi ekemini didie ntem ọnọ ekpri otuerọn̄ ndinam mme ikọ oro Jesus eketịn̄de ọnọ mmọ ete: “Ẹkûfehe ndịk, ekpri otuerọn̄”! Utọ uko uko edu oro edi akpan n̄kpọ ke ikerede iban̄a kpukpru se idade itie idahaemi ke n̄kemuyo ye uduak Jehovah. Nte owo kiet kiet, kpukpru mbon ekpri otuerọn̄ ẹfiọk ufọn ediyọ tutu osịm utịt. (Luke 21:19) Nte Jesus Christ, Ọbọn̄ ye Eteufọk ekpri otuerọn̄, ọkọyọde onyụn̄ anamde akpanikọ tutu osịm utịt uwem esie eke isọn̄, kpa ntre ke ana owo kiet kiet ke otu nsụhọ ọyọ onyụn̄ anam akpanikọ.—Mme Hebrew 12:1, 2.
12. Didie ke Paul, ukem nte Jesus, eketeme mme Christian oro ẹyetde aran ete ẹkûfehe ndịk?
12 Ana kpukpru mbon oro ẹyetde aran ẹtie nte apostle Paul. Tịmfiọk nte mme ikọ esie nte an̄wan̄wa anditan̄a ediset ke n̄kpa oro ẹyetde aran ẹdude ke n̄kemuyo ye item Jesus oro ọdọhọde ẹkûfehe ndịk. Paul ekewet ete: “Ti Jesus Christ, emi ekesetde ke n̄kpa, emi okotode ke ubon David, nte n̄kwọrọde ke gospel mi; emi n̄kụtde ukụt ke esịt, tutu ẹsịn mi ke n̄kpọkọbi nte anamidiọk: edi owo ikọbike ikọ Abasi. Ntre ke mme ime ye kpukpru n̄kpọ mban̄a mmọemi Abasi ekemekde, man mmọ n̄ko ẹnyene edinyan̄a emi odude ke Christ Jesus, ẹnyụn̄ ẹbọ nsinsi ubọn̄. Ikọ emi edi akpanikọ, ete, Koro edieke ima ikpa ye Enye, iyenyụn̄ idu uwem ye Enye; edieke imede ime, iyeda ubọn̄ ye Enye; edieke ikan̄de Enye, Enye eyekan̄ nnyịn; edieke nnyịn mînamke akpanikọ, Enye osụk edi anam-akpanikọ; koro Enye mîkemeke ndikpụhọde n̄kpọn̄ uduot Esie.”—2 Timothy 2:8-13.
13. Nso ke mme andibuana ke ekpri otuerọn̄ ẹtịm ẹnịm ke akpanikọ, ndien nso ke emi onụk mmọ ndinam?
13 Ukem nte apostle Paul, mbon oro ẹsụhọde ke otu ekpri otuerọn̄ oro ẹyetde aran ẹnyịme ndiyọ ndutụhọ nte mmọ ẹkwọrọde okopodudu etop oro odude ke Ikọ Abasi. Se mmọ ẹnịmde ke akpanikọ ẹtịm ẹnyene orụn̄ nte mmọ ẹkọn̄de mbuọtidem ke mme un̄wọn̄ọ Abasi kaban̄a edinyan̄a ye edinọ mmọ “anyanya uwem” edieke mmọ ẹnamde akpanikọ tutu osịm n̄kpa. (Ediyarade 2:10) Ebede ke ndinyene ediset ke n̄kpa ye edikpụhọde idaha ke ebe kiet, ẹyenam mmọ ẹkediana kiet ye Christ, man ẹtiene enye ẹkara nte ndidem. Nso edikan ke usụn̄uwem nsọn̄ọnda mmọ enyene ntem nte mbon oro ẹkande ererimbot!—1 John 5:3, 4.
San̄asan̄a Idotenyịn
14, 15. Didie ke idotenyịn ediset ke n̄kpa ekpri otuerọn̄ edi san̄asan̄a?
14 Idotenyịn ediset ke n̄kpa oro ekpri otuerọn̄ ẹnyenede edi san̄asan̄a. Ke mme usụn̄ ewe? N̄kpọ kiet edi, enye ebem ediset ke n̄kpa ofụri owo iso eke “nti owo ye mme idiọkowo.” (Utom 24:15) Ke akpanikọ, ediset ke n̄kpa mbon oro ẹyetde aran odụk ke akpan ndutịm kiet, nte ẹwụtde in̄wan̄în̄wan̄ ke mme ikọ ẹmi ẹkụtde ke 1 Corinth 15:20, 23: “Ẹma ẹnam Christ eset ke n̄kpa, nte akpa mbun̄wụm ke otu mmọemi ẹdede idap. Edi kpukpru owo ke idaha esie; Christ ebem iso eset nte akpa mbun̄wụm; ekem mmọemi ẹdide ikọt Christ ẹyediana ye Enye ke edidi Esie.” Ebede ke ndinyene orụk ime ye mbuọtidem oro Jesus ekenyenede, ekpri otuerọn̄ ẹfiọk se inade ibet mmọ nte mmọ ẹkụrede utom mmọ eke isọn̄, akpan akpan toto nte ata Ọbọn̄ ekedi temple esie ndikpe ikpe ke 1918.—Malachi 3:1.
15 Paul ọnọ nnyịn ntak efen ndise ediset ke n̄kpa emi nte edide san̄asan̄a. Nte ẹwetde ke 1 Corinth 15:51-53, enye ekewet ete: “Sese mmọn̄ ndọhọ ndịben̄kpọ nnọ mbufo. Idịghe kpukpru nnyịn iyede idap, edi ẹyenam kpukpru nnyịn ikpụhọde, ke idaha kiet, ke ediyịp enyịn kiet, ke adan̄aemi ẹdifride akpatre ukotowo. . . . Koro mbiara ikpọkidem emi enyene ndisịne se mîdibiarake, ikpọkidem n̄kpa emi onyụn̄ enyene ndisịne se mîdikpaha.” Mme ikọ ẹmi ẹnyene n̄kpọ ndinam ye mbon ekpri otuerọn̄ ẹmi ẹkpade ke ini edidu Christ. Ye unana edide ke n̄kpa ke anyan ikpehe ini, ẹsịne mmọ unana n̄kpa ke idem, “ke idaha kiet, ke ediyịp enyịn kiet.”
16, 17. Kaban̄a idotenyịn ediset ke n̄kpa mmọ, didie ke ẹdiọn̄ mme Christian oro ẹyetde aran mfịn akpan akpan?
16 Ke un̄wana ifiọk emi, nnyịn imekeme ndikụt ifiọk oro esịnede ke mme ikọ apostle John oro ẹkụtde ke Ediyarade 14:12, 13. Enye ekewet ete: “Mi ke ẹkụt ime nti ikọt Abasi, kpa mmọemi ẹnịmde mbet Abasi, ẹnyụn̄ ẹbuọtde idem ye Jesus. Ekem n̄kop uyo emi otode ke heaven ọdọhọde ete, Wet ete, Ọfọfọn ọnọ mme akpan̄kpa ẹmi ẹkpade ke Ọbọn̄, ọtọn̄ọde ke ini emi: Spirit ete, Edi ntre; man mmọ ẹduọk odudu ke ọkpọsọn̄ utom mmọ; koro se mmọ ẹkenamde ẹtiene mmọ ke edem.”
17 Nso a-san̄asan̄a utịp ana ntem ebet nsụhọ ekpri otuerọn̄! Ediset ke n̄kpa mmọ edidi usọp usọp, ke ndondo oro mmọ ẹdede ke n̄kpa. Nso utịbe utịbe ukpụhọde ke mmọ ẹdinyene ntem nte mmọ ẹtọn̄ọde utom mmọ ke obio mme spirit! Ye utọ edinọ ekpri otuerọn̄ ubọn̄ oro osụk akade-kaiso ntre n̄ko ye edisu oro mme akpan prọfesi Bible ẹkperede ndisu n̄kụre, ke akpanikọ oyom ete akpatre mbon oro ẹsụhọde ke otu ekpri otuerọn̄ “ẹkûfehe ndịk.” Ndien unana ndịk mmọ anam n̄kpọ ndisịn udọn̄ nnọ mbon akwa otuowo, ẹmi ẹkpenyenede ndikọri ukem edu unana ndịk oro nte mmọ ẹsakde iso ẹse edinyan̄a ke n̄kponn̄kan ini afanikọn̄ oro isọn̄ akanam ọfiọkde aban̄a.
18, 19. (a) Ntak emi ini nnyịn idude edide usọp usọp? (b) Ntak emi mîkpanaha mbon oro ẹyetde aran ye mme erọn̄ en̄wen ẹfehe ndịk?
18 Ndibụk mme edinam ekpri otuerọn̄ anam mmọ ye akwa otuowo ẹkaiso ẹbak ata Abasi. Ekem ini ikpe esie, ndien ini mfọn oro osụhọde edi se isọn̄de urua. Ke akpanikọ, ini oro osụhọde ọnọ mbon efen ndinam n̄kpọ enen̄ede edi esisịt. Nnyịn, nte ededi, ifeheke ndịk nte ke uduak Abasi eyekpu. Enye ke akpanikọ eyekụt unen!
19 Ẹmekokop n̄kpọsọn̄ uyo ẹtode heaven nte ẹdọhọde ẹte: “Obio Ubọn̄ ererimbot emi amakabade edi Obio Ubọn̄ Ọbọn̄ nnyịn ye Christ Esie. Enye eyenyụn̄ ada ubọn̄ ke nsinsi nsinsi.” (Ediyarade 11:15) Ke akpanikọ, Akwa Ekpemerọn̄, kpa Jehovah, ke ekpeme kpukpru erọn̄ esie ke “usụn̄ eti ido aban̄a enyịn̄ esie.” (Psalm 23:3) Ke ẹda ekpri otuerọn̄ usụn̄ ye unana ndudue ẹbịne utịp eke heaven mmọ. Ndien ẹyenyan̄a mme erọn̄ en̄wen ifụre ifụre ẹbe akwa ukụt man ẹdara nsinsi uwem ke ikpehe eke isọn̄ ke uyama uyama Obio Ubọn̄ Abasi ke idak ukara Christ Jesus. Ntem, ke adan̄aemi Jesus eketịn̄de mme ikọ ẹmi ọnọ ekpri otuerọn̄, ke akpanikọ kpukpru mme asan̄autom Abasi ke isọn̄ ẹnyene ntak ndikpan̄ utọn̄ nnọ mme ikọ esie emi: “Ẹkûfehe ndịk.”
Nte Afo Emekeme Ndinam An̄wan̄a?
◻ Ntak emi nnyịn ikpodoride enyịn nsụhọ ibat ekpri otuerọn̄ ndisụhọde?
◻ Nso idi idaha nsụhọ oro ẹyetde aran mfịn?
◻ Ntak emi mme Christian mîkpefeheke ndịk, kpa ye en̄wan Gog eke Magog oro asan̄ade ekpere?
◻ Ntak emi idotenyịn ediset ke n̄kpa owo 144,000 edide san̄asan̄a, akpan akpan mfịn?