Afo Edi “N̄kpọ Ndise”!
1 Apostle Paul ekewet ete: “Ẹma ẹnam nnyịn ikabade idi n̄kpọ ndise inọ ererimbot ye mme angel ye owo.” (1 Cor. 4:9) Nso ke emi ọwọrọ, ndien didie ke enye okpotụk nnyịn ke utom ukwọrọikọ nnyịn mfịn?
2 Eyedi ikọ oro “n̄kpọ ndise” eti owo Corinth aban̄a edinam ediberi mbuba afai emi mbon Rome, emi ẹkesinamde mbon oro ẹbierede ikpe n̄kpa ẹnọ ẹsan̄a ke udịm ke iso ediwak tọsịn mme andida nse mbemiso ẹwotde mmọ afai afai. Kpasụk ntre, ediwak owo—mme owo ye mme angel—ẹma ẹkụt ufen oro ẹkenọde mme Christian akpa isua ikie ke nditie ntiense nnọ Obio Ubọn̄. (Heb. 10:32, 33) Mmọ ndimụm nsọn̄ọnda n̄kama ama otụk ediwak mme andida nse, ukem nte ediyọ nnyịn anamde ke eyomfịn. Nnyịn idi n̄kpọ ndise inọ mme anie?
3 Idi inọ Ererimbot ye Mme Owo: Ndutịm usuanetop esitọt ndusụk ini aban̄a mme utom ikọt Jehovah. Ke adan̄aemi nnyịn imade nti etop oro ẹban̄ade utom nnyịn oro ẹdide akpanikọ mînyụn̄ isịneke asari, nnyịn n̄ko imodori enyịn ndikụt nte mbon oro ẹkụtde ndudue ẹnọ nnyịn ẹsuande idiọk etop ke ini ke ini. Kpa ye oro nnyịn inyene ndika iso n̄wụt ite idi ata mme asan̄autom Abasi “ke idiọk etop eke ẹsiode nnyịn ye ke eti etop.” (2 Cor. 6:4, 8) Ye mbon oro ẹnyenede esịt akpanikọ emi ẹdade ẹse, etịm an̄wan̄a nte ke nnyịn idi ata mbet Jesus Christ.
4 Idi inọ Mme Angel: Mme edibotn̄kpọ eke spirit n̄ko ẹkụt nnyịn. Devil ye mme demon esie ẹse—edi ye “akwa ifụtesịt”—ẹyom nditre utom ‘edimụm ikọ ntiense Jesus n̄kama.’ (Edi. 12:9, 12, 17) Mme anam-akpanikọ angel Abasi ẹse ẹnyụn̄ ẹkop idatesịt idem ke ini anamidiọk kiet akabarede esịt. (Luke 15:10) Enye ekpenyene ndisọn̄ọ nnyịn idem ndidiọn̄ọ nte ke mme angel ẹse utom ukwọrọikọ nnyịn nte edide ata usọp usọp, enyene-ufọn utom emi ẹnamde ke isọn̄ mfịn!—Edi. 14:6, 7.
5 Ke ini afo osobode ubiọn̄ọ m̀mê ekerede ete ke utom ukwọrọikọ fo inyeneke utịp, ti ete ke afo edi n̄kpọ ndise ọnọ ofụri ekondo. Ime edinam akpanikọ fo etịn̄ ekese. Ke akpatre, “eti en̄wan mbuọtidem” fo ayanam fi ‘ọsọn̄ọ omụm nsinsi uwem akama.’—1 Tim. 6:12.