Ẹka Iso Ẹsan̄a Ye Abasi
“Ẹsan̄a ke Spirit, ndien mbufo idinamke se idọn̄de obụkidem.”—GALATIA 5:16.
1. (a) Enoch akasan̄a ye Abasi ke ufọt mme ewe idaha ndien adan̄a anyan ini didie? (b) Noah akasan̄a ye Abasi ebịghi adan̄a didie, ndien nso ndodobi mbiomo ke enye ekenyene?
BIBLE asian nnyịn ete ke Enoch ama aka iso “asan̄a ye Abasi.” Kpa ye n̄kpọsọn̄ ikọ ye mbukpo ido eke mme owo oro ẹkedude ẹkan enye ẹkụk, enye ama ọkọbọ ke ndisan̄a ye Abasi tutu esịm utịt uwem esie ke isua 365 ke emana. (Genesis 5:23, 24; Jude 14, 15) Noah n̄ko ama “asan̄a ye Abasi.” Enye akanam ntre ke adan̄aemi ọbọkde ubon esie, ke adan̄aemi ọyọde ererimbot oro mme ọsọn̄ibuot angel ye mme afai afai nditọ mmọ ẹkekarade, ye ke adan̄aemi esede aban̄a kpukpru ntọt oro ẹkeban̄ade edibọp akamba ubom oro okokponde akan nsụn̄ikan̄ eset ekededi. Enye ama aka iso asan̄a ye Abasi ke Ukwọ ama ekebe, idem ke ini nsọn̄ibuot ye Jehovah akafiakde edemede ke Babel. Ke akpanikọ, Noah ama aka iso asan̄a ye Abasi tutu ke n̄kpa esie ke edide isua 950 ke emana.—Genesis 6:9; 9:29.
2. ‘Ndisan̄a ye Abasi’ ọwọrọ nso?
2 Ke ini ọdọhọde ke iren mbuọtidem ẹmi ẹma ‘ẹsan̄a’ ye Abasi, Bible ada ikọ oro etịn̄ ikọ ke ndamban̄a usụn̄. Enye ọwọrọ ete ke Enoch ye Noah ẹma ẹkama idemmọ ke usụn̄ oro ọkọnọde uyarade edinyene ọkpọsọn̄ mbuọtidem ke Abasi. Mmọ ẹma ẹnam se Jehovah okowụkde mmọ ẹnyụn̄ ẹnam uwem mmọ ẹdu ke n̄kemuyo ye se mmọ ẹkediọn̄ọde ẹban̄a enye oto mme edinam esie ye ubonowo. (Men 2 Chronicles 7:17 domo.) Idịghe mmọ n̄kukụre ndikenyịme ke ibuot se Abasi eketịn̄de onyụn̄ anamde edi mmọ ẹma ẹnam kpukpru se enye okoyomde—idịghe ndusụk kpọt edi kpukpru mmọ ke udomo oro mmọ ẹkekemede nte mme anana-mfọnmma owo. Ntem Noah, ke uwụtn̄kpọ, ama anam nnennen se Abasi eketemede enye. (Genesis 6:22) Noah ikanamke n̄kpọ ibe ndausụn̄ oro ẹkenọde enye, enye ikonyụn̄ idaha edem ke ntak unana edinọ ntịn̄enyịn. Nte owo emi ekenyenede n̄kpet n̄kpet itie ebuana ye Jehovah, enyenede ifụre ndibọn̄ akam nnọ Abasi onyụn̄ amade ndausụn̄ Abasi, enye akasan̄a ye Abasi. Nte afo ke anam oro?
Usụn̄ Uwem Oro Odude ke N̄kemuyo
3. Nso idi ata akpan n̄kpọ inọ kpukpru mme asan̄autom Abasi oro ẹyakde idem ẹnọ ẹnyụn̄ ẹnade baptism?
3 Edi n̄kpọ inemesịt ndikụt mme owo ẹtọn̄ọde ndisan̄a ye Abasi. Nte mmọ ẹnamde nti usio-ukot ke n̄kemuyo ye uduak Jehovah, mmọ ẹnọ uyarade mbuọtidem, emi ke mîdụhe owo ikemeke ndinem Abasi esịt. (Mme Hebrew 11:6) Nnyịn ikop idatesịt didie ntem nte ke isua kiet kiet, ke ẹbaharede ukem ukem ke isua ition ẹmi ẹkebede, se ibede owo 320,000 ẹma ẹyak idemmọ ẹnọ Jehovah ẹnyụn̄ ẹnọ idemmọ ndina baptism mmọn̄! Edi edi n̄ko akpan n̄kpọ ọnọ mmọ ye kpukpru nnyịn ndika iso nsan̄a ye Abasi.—Matthew 24:13; Ediyarade 2:10.
4. Okposụkedi mmọ ẹkewụtde ndusụk udomo mbuọtidem, ntak emi ata ediwak nditọ Israel ẹmi ẹkekpọn̄de Egypt mîkodụkke Isọn̄ Un̄wọn̄ọ?
4 Ke eyo Moses, ama oyom mbuọtidem man ubon eyen Israel enịm Passover ke Egypt onyụn̄ esịme iyịp ke obubọk enyịnusụn̄ ye ke enyọn̄ usụn̄ufọk. (Exodus 12:1-28) Nte ededi, mbuọtidem ediwak owo ama oyok ke ini mmọ ẹkekụtde udịmekọn̄ Pharaoh asan̄ade ekpere mmọ ke edem ke Ididuot Inyan̄. (Exodus 14:9-12) Psalm 106:12 owụt ete ke ini mmọ ẹma ẹkesan̄a ke nsat isọn̄ inyan̄ ke ifụre ẹbe ẹnyụn̄ ẹkụt mmọn̄ osobode udịmekọn̄ Egypt, mmọ ẹma ẹfiak “ẹbuọt idem ke ikọ [Jehovah].” (NW) Esisịt ini ke oro ebede ke wilderness, nte ededi, nditọ Israel ẹma ẹtọn̄ọ ndikụni mban̄a edin̄wọn̄ mmọn̄, udia, ye ndausụn̄. Idiọk etop oro owo 10 ke otu mbon uyep 12 oro ẹkenyọn̄de Isọn̄ Un̄wọn̄ọ ẹdi ẹkenọde ama anam mmọ ẹkop ndịk. Ke mme utọ idaha oro, nte Psalm 106:24 (NW) ọdọhọde, “mmọ ikọbuọtke idem ke ikọ [Abasi].” Mmọ ẹma ẹyom ndifiak nnyọn̄ Egypt. (Numbers 14:1-4) Se ededi mbuọtidem oro mmọ ẹkedide ẹdinyene ekedi n̄kukụre ke ini mmọ ẹkụtde ndusụk n̄wọrọnda ediwụt odudu Abasi. Mmọ ikakaha iso isan̄a ye Abasi. Nte utịp, nditọ Israel oro ikodụkke Isọn̄ Un̄wọn̄ọ.—Psalm 95:10, 11.
5. Didie ke 2 Corinth 13:5 ye Mme N̄ke 8:5, 6 ẹnyene ebuana ye edisan̄a ye Abasi?
5 Bible eteme nnyịn ete: “Ẹdomo idem mbufo ẹse m̀mê mbufo ẹdu ke mbuọtidem: ẹtịm ẹdomo idem mbufo ẹfiọk.” (2 Corinth 13:5) Ndidu “ke mbuọtidem” ọwọrọ ndisọn̄ọ nyịre ke ofụri ukpepn̄kpọ Christian. Emi edi akpan n̄kpọ edieke anade nnyịn ikụt unen ke ndisan̄a ye Abasi ke kpukpru usen uwem nnyịn. Man isan̄a ye Abasi, ana nnyịn n̄ko iwụt eti mbuọtidem, iberide edem ofụri ofụri ke Jehovah. (Mme N̄ke 3:5, 6) Ata ediwak afia ye n̄kpọ iduọ ẹdu oro ẹkemede nditap mbon oro ẹkpude ndinam ntre. Nso idi ndusụk mmọ?
Fep Afia Edibuọt Idem ke Idemfo
6. Kpukpru mme Christian ẹdiọn̄ọ nso ẹban̄a use ye efịbe, ndien didie ke mmọ ẹkere ẹban̄a idiọkn̄kpọ ẹmi?
6 Owo kiet kiet eke ekpepde Bible, ayakde uwem esie ọnọ Jehovah, onyụn̄ anade baptism ọfiọk ete ke Ikọ Abasi obiom use ye efịbe ikpe. (1 Thessalonica 4:1-3; Mme Hebrew 13:4) Utọ mbon oro ẹnyịme nte ke emi enen. Mmọ ẹyom ndidu uwem ekekem ye enye. Kpa ye oro, oburobụt ido idan̄ ke aka iso ndidi kiet ke otu afia Satan oro okụtde unen akan. Ntak-a?
7. Ke Unaisọn̄ Moab, didie ke iren nditọ Israel ẹkenam ido oro mmọ ẹkefiọkde ẹte ke ọdiọk?
7 Ke ntọn̄ọ ntọn̄ọ, ekeme ndidi mbon oro ẹnamde utọ oburobụt ido oro iketiehe-tie idiomi ndinam ntre. Eyedi oro ekedi ntre ye nditọ Israel ke Unaisọn̄ Moab. Ye irenowo nditọ Israel oro ẹkekpade mba ke uwem ke wilderness, ekeme ndidi iban Moab ye Midian oro ẹketapde mmọ ẹketie ufan ufan ke akpa ẹnyụn̄ ẹwụt mfọnido. Edi nso iketịbe ke ini nditọ Israel ẹkenyịmede ikot ndidụk nsan̄a ye mme owo oro ẹkenamde n̄kpọ Baal ndien mînamke eke Jehovah, mme owo oro ẹkeyakde nditọ iban mmọ (idem mbon oro ẹtode mme ọwọrọiso ubon) ẹnyene ebuana idan̄ ye irenowo oro mîkọdọhọ-dọ mmọ? Ke ini irenowo oro ẹketode itienna Israel ẹketọn̄ọde ndise mme utọ nsan̄a oro nte se ifọnde, ẹma ẹtap mmọ ndinam mme n̄kpọ oro mmọ ẹkefiọkde ẹte ke ẹdiọk, ndien emi ama atak mmọ uwem mmọ.—Numbers 22:1; 25:1-15; 31:16; Ediyarade 2:14.
8. Ke eyo nnyịn, nso ikeme ndida Christian n̄kesịn ke oburobụt ido idan̄?
8 Nso ikeme ndinam owo ọduọ odụk ukem afia oro ke eyo nnyịn? Okposụkedi enye ekemede ndidiọn̄ọ nte oburobụt ido idan̄ ọdiọkde, edieke enye n̄ko mîfiọkke n̄kpọndịk oro odude ke ndibuọt idem ke idemesie, enye ekeme ndiduọ ndụk idaha oro n̄kpọ etabi edinam idiọkn̄kpọ akande eti ibuot esie ubọk.—Mme N̄ke 7:6-9, 21, 22; 14:16.
9. Mme ewe ntọt N̄wed Abasi ẹkeme ndikpeme nnyịn mbiọn̄ọ edinam oburobụt ido?
9 Ke in̄wan̄în̄wan̄ usem, Ikọ Abasi odụri nnyịn utọn̄ ete ikûbian̄a idem ikere ke nnyịn imenen̄ede isọn̄ idem tutu idiọk nsan̄a idibiatke nnyịn. Oro esịne edise mme edinam ekebe ndise oro ẹwụtde uwem mme oburobụt owo ye edikot mme magazine oro ẹdemerede mme oburobụt udọn̄. (1 Corinth 10:11, 12; 15:33) Idem edidụk nsan̄a ye mme ekemmọ andinịm ke akpanikọ ke mme idaha oro mîfọnke ekeme ndida nsịm ikpọ mfịna. Ntụk oro odude ke ufọt eren ye n̄wan ọsọn̄ odudu etieti. Ke ntre esop Jehovah ke ima ọnọ item ọbiọn̄ọ edidu ikpọn̄ ye ke ebiet emi mme owo mîkwe ye owo isio uduot oro nnyịn mîdọhọ m̀mê oro mîdịghe owo ubon nnyịn. Man ika iso isan̄a ye Abasi, ana nnyịn isịn afia edibuọt idem ke idem nnyịn inyụn̄ inam ntọt item oro enye ọnọde nnyịn.—Psalm 85:8.
Kûyak Ndịk Owo Akara Fi
10. Didie ke ‘uten̄e owo enyịn’ ọkọk afia?
10 Ẹwụt n̄kpọndịk efen ke Mme N̄ke 29:25, emi ọdọhọde ete: “Uten̄e owo ọkọk afia enịm.” Afia atautop esiwak ndisịne ekpọ oro omụmde n̄kpọ ọsọn̄ ke itọn̄ m̀mê urụk oro awan̄ade ke ukot unam. (Job 18:8-11) Ukem ntre uten̄e owo enyịn ekeme ndibaba ukeme oro owo enyenede nditịn̄ ikọ ifụre ifụre ye edikama idem ke usụn̄ oro enemde Abasi esịt. Udọn̄ ndinem mbon en̄wen esịt edi ndammana n̄kpọ, ndien edisọn̄ esịt mfụmi ekikere mbon en̄wen idịghe edu Christian. Edi oyom ẹda ukem ukem. Ke ini ekikere kaban̄a se mbon en̄wen ẹkemede ndinam anamde owo anam se Abasi akpande m̀mê esịn ndinam se Ikọ Abasi etemede, ẹma ẹtap owo oro.
11. (a) Nso idi ukpeme ndibiọn̄ọ owo ndiyak ndịk owo akara enye? (b) Didie ke Jehovah akan̄wam mme asan̄autom esie ẹmi ẹken̄wanade ndikan ndịk owo?
11 Ukpeme ndibọhọ utọ afia oro ikọn̄ọke ke ndammana ukeme owo, edi ọkọn̄ọ ke ‘ndibuọt idem ye Jehovah.’ (Mme N̄ke 29:25b) Ye mbuọtidem ke Abasi, idem owo emi esikopde bụt ke obot ekeme ndinyene uko ye nsọn̄ọnda. Adan̄a nte mme mfịghe editịm n̄kpọ Satan emi ẹkande nnyịn ẹkụk, oyoyom nnyịn idu ke ukpeme ibiọn̄ọ afia ndịk owo. Okposụkedi prọfet Elijah ọkọwọrọde eti etop kaban̄a utom uko, ke ini Jezebel ekedịghede ndinam ẹwot enye, enye ke ndịk ama efehe. (1 Ndidem 19:2-18) Ke idak mfịghe, apostle Peter ke ndịk ama akan̄ ete imọ idiọn̄ọke Jesus Christ, ndien ediwak isua ke ukperedem enye ama ayak ndịk anam enye anam n̄kpọ ke usụn̄ oro ekedide isio ye mbuọtidem. (Mark 14:66-71; Galatia 2:11, 12) Nte ededi, Elijah ye Peter ẹma ẹbọ un̄wam eke spirit, ye mbuọtidem ke Jehovah, ẹka iso ndinam n̄kpọ ke usụn̄ oro Abasi enyịmede.
12. Nso uwụtn̄kpọ eyomfịn ẹwụt nte ẹken̄wamde mme owo ndifep ediyak ndịk anam mmọ ẹtre ndinem Abasi esịt?
12 Ediwak mme asan̄autom Jehovah ke eyo nnyịn n̄ko ẹmekpep nte ẹkande afia ndịk. Uyen kiet edide Ntiense ke Guyana ama enyịme ete: “En̄wan ndibiọn̄ọ mfịghe ubọkn̄ka ke ufọkn̄wed ọsọn̄ ubọk.” Edi enye ama adian ete: “Mbuọtidem mi ke Jehovah onyụn̄ ọsọn̄ n̄ko.” Ke ini andikpep esie akadade enye anam n̄kpọ nsahi ke iso ofụri otu nditọ ubet ukpepn̄kpọ ke ntak mbuọtidem esie, enye ke ndopuyo ama ọbọn̄ akam ọnọ Jehovah. Ekem ke odude ikpọn̄ enye ke mbufiọk ama ọnọ andikpep oro ikọ ntiense. Ke ini enye akakade ekese obio emana esie ke Benin, akparawa kiet emi ekekpepde mme n̄kpọ oro Jehovah oyomde ama ebiere ndibiat edisọi n̄kpọ oro ete esie akanamde ọnọ enye. Akparawa oro ama ọfiọk ete ke edisọi mbiet oro inyeneke uwem, ndien enye ikabakke enye, edi enye n̄ko ama ọfiọk ete ke mbio obio oro ẹdikopde iyatesịt ẹkeme ndiwot imọ. Enye ama ọbọn̄ akam ọnọ Jehovah, ndien ekem ke okoneyo enye ama emen edisọi n̄kpọ oro odụk ikọt onyụn̄ akabiat enye. (Men Judges 6:27-31 domo.) Ke ini n̄wan kiet ke Dominican Republic ọkọtọn̄ọde ndinam n̄kpọ Jehovah, ebe esie ama ọdọhọ enye emek imọ m̀mê Jehovah. Eren oro ama edịghe ndisio enye ndọ. Nte ndịk ayanam enye ọkpọn̄ mbuọtidem esie? Enye ama ọbọrọ ete: “Edieke unana edinam akpanikọ akabuanade, n̄kpokop bụt, edi bụt inamke mi ndinam n̄kpọ Jehovah Abasi!” Enye ama aka iso ndisan̄a ye Abasi, ndien nte ini akakade ebe esie ama adiana ye enye ke ndinam uduak Jehovah. Ye ọyọhọ mbuọtidem ke Ete nnyịn eke heaven, nnyịn n̄ko imekeme ndifep ndiyak ndịk owo anam nnyịn itre ndinam n̄kpọ oro nnyịn ifiọkde ite ke eyenem Jehovah esịt.
Fep Ndida Item ke Usụhọde
13. Ẹdụri nnyịn utọn̄ ẹban̄a ewe n̄kpọ etabi ke 1 Timothy 6:9?
13 Okposụkedi ẹnamde ndusụk afia oro mme atautop ẹkamade man omụm unam ekededi oro ke iduenyịn ebede akpan ebiet kiet, mme afia eken ẹsitap mme unam ebe ke abian̄a abian̄a ediye udia. Ye ediwak owo, inyene etie ntre. (Matthew 13:22) Ke 1 Timothy 6:8, 9, Bible esịn udọn̄ ọnọ nnyịn ndiyụhọ ye se idiade ye se idade ifụk iferi. Ekem enye odụri owo utọn̄ ete: “Mmọ eke ẹyomde ndidi mbon inyene ẹduọ ẹsịne ke idomo ye afia ye ediwak ndisịme ye idiọk udọn̄, eke ẹdụride owo ẹsụhọde ke nditaha ye nsobo.”
14. (a) Nso ikeme ndikpan owo ndinam item oro nte iyụhọ ke se idiade ye se idade ifụk iferi? (b) Didie ke ukwan̄ edikabade se inyene edide ekeme ndinam owo ada item oro ẹwetde ke 1 Timothy 6:9 ke usụhọde? (c) Ke nso usụn̄ ke “mbumek enyịn” ekeme ndinam ndusụk owo ẹkûkụt afia oro anade ebet mmọ?
14 Kpa ye ntọt emi, ẹsitap ediwak owo sia mmọ mîdaha item emi isịn ke edinam ke idemmọ. Ntak-a? Nte ekeme ndidi nte ke ntan̄idem esinụk mmọ ndika iso nyịre ke usụn̄ uwem oro oyomde ekese n̄kpọ akan “se idiade ye se idade ifụk iferi” emi Bible esịnde udọn̄ ọnọ nnyịn ete iyụhọ ke oro? Nte ekeme ndidi mmọ ẹda item Bible ke usụhọde koro mmọ ẹkabarede se idide inyene etiene se mme ata enyene n̄kpọ owo ẹnyenede? Bible ke in̄wan̄în̄wan̄ usụn̄ owụt nte ekikere edinyene n̄kpọ edide isio ye ediyụhọ ye se owo adiade ye se adade ofụk iferi. (Men Mme Hebrew 13:5 domo.) Nte “mbumek enyịn”—kpa udọn̄ ndinyene mme n̄kpọ oro mmọ ẹkụtde, idem ke nditaba mme n̄kpọ eke spirit—anam mmọ ẹsịk mme udọn̄ utuakibuot akpanikọ ẹnịm ke udiana itie? (1 John 2:15-17; Haggai 1:2-8) Mbon oro ẹnen̄erede ẹnam item Bible ẹnyụn̄ ẹsan̄ade ye Abasi ebe ke ndinam utom Jehovah edi akpan n̄kpọ ke uwem mmọ ẹkop inemesịt didie ntem!
Ndiyọ Mme Editịmede Esịt eke Uwem Uforo Uforo
15. Mme ewe idaha nte an̄wan̄ade ẹnam editịmede esịt odu ọnọ ikọt Jehovah, ndien nso afia ke ana nnyịn idu ke ukpeme ke ini idude ke idak utọ mfịghe oro?
15 Se idide ọsọ n̄kpọ ikan ekikere edinyene n̄kpọ edi editịmede esịt mban̄a edinyene mme n̄kpọ udu uwem. Ediwak ke otu ikọt Jehovah ẹdu uwem ye esisịt inyene kpọt. Mmọ ẹsinam utom ọkpọsọn̄ ke ediwak hour man ẹkam ẹnyene akpan edisịnen̄kpọ, itie emi ubon edede idap ke okoneyo, ye ke nsụhọde n̄kaha udia usen. Mbon en̄wen ẹn̄wana ye mme mfịna ke ntak udọn̄ọ m̀mê usọn̄ eke idemmọ m̀mê eke mbon ubon. Ekpedi mmemmem n̄kpọ didie ntem ndiyak mme utọ idaha oro ẹbaba mme udọn̄ n̄kpọ eke spirit ẹwot ke uwem mmọ!—Matthew 13:22.
16. Didie ke Jehovah an̄wam nnyịn ndiyọ mme mfịghe ke uwem?
16 Ke ima, Jehovah asian nnyịn aban̄a ubọhọ oro ẹdinyenede ke idak Obio Ubọn̄ Messiah. (Psalm 72:1-4, 16; Isaiah 25:7, 8) Enye n̄ko an̄wam nnyịn ndiyọ mme mfịghe uwem idahaemi ebe ke ndinọ nnyịn item ke nte ikpenịmde mme n̄kpọ oro ẹdide akpan n̄kpọ ẹnọ nnyịn ke nnennen itie. (Matthew 4:4; 6:25-34) Ebede ke n̄wetnnịm n̄kpọ aban̄ade nte enye akan̄wamde ikọt esie ke eset, Jehovah ọsọn̄ọ nnyịn idem. (Jeremiah 37:21; James 5:11) Enye ọsọn̄ọ nnyịn idem ye ifiọk oro nte, ke inamke n̄kpọ se ededi idiọk idaha oro esịmde nnyịn, ima oro enye enyenede ọnọ ikọt esie oro ẹsọn̄ọde ẹda isehekede. (Rome 8:35-39) Ye mbon oro ẹkọn̄de mbuọtidem mmọ ke Jehovah, enye ọn̄wọn̄ọ ete: “Ndikpụhu fi, ndinyụn̄ n̄kpọn̄ke fi.”—Mme Hebrew 13:5.
17. Nọ uwụtn̄kpọ ẹban̄ade nte mme owo ẹmi ẹkedude ke ata idiọk idaha ẹkekemede ndika iso nsan̄a ye Abasi.
17 Ke ifiọk emi ọsọn̄ọde mmọ idem, mme ata Christian ẹka iso ndisan̄a ye Abasi utu ke ndiwọn̄ọde mbịne mme usụn̄ ererimbot. Ọsọ ekikere ererimbot kiet ke otu mme ubuene ke ediwak idụt edi nte ke ndimen n̄kpọ owo oro enyenede ekese man ekeme ndinọ ubon fo udia idịghe inọ. Edi mbon oro ẹsan̄ade ke mbuọtidem ẹsịn ekikere oro. Mmọ ẹda unyịme Abasi ke ọsọn̄urua n̄kpọ akan kpukpru n̄kpọ en̄wen ẹnyụn̄ ẹdori enyịn ke enye ndinọ edinam akpanikọ mmọ utịp. (Mme N̄ke 30:8, 9; 1 Corinth 10:13; Mme Hebrew 13:18) Ebeakpa kiet ke India ama okụt ete ke ndinyịme ndinam utom ọkọrọ ye edin̄wana idem ama an̄wam enye ndiyọ. Utu ke ndiyat esịt mban̄a idaha esie ke uwem, enye ama ọfiọk ete edieke imọ inịmde Obio Ubọn̄ Abasi ye edinen ido esie akpa ke uwem imọ, Jehovah ọyọdiọn̄ mme ukeme imọ ndinyene mme n̄kpọ udu uwem nnọ idem imọ ye eyen imọ. (Matthew 6:33, 34) Ediwak tọsịn owo ke ofụri isọn̄ ẹwụt oro, inamke n̄kpọ se ededi idiọk idaha oro mmọ ẹkemede ndisobo, Jehovah edi ebiet ubọhọ ye ọkpọsọn̄ ebiet mmọ. (Psalm 91:2) Nte oro edi akpanikọ aban̄a fi?
18. Nso idi ukpọhọde edifep mme afia ererimbot Satan?
18 Adan̄a nte nnyịn idude uwem ke editịm n̄kpọ emi odude ke emi, mme n̄kpọ ẹtabi ẹyedu ndifep. (1 John 5:19) Bible anam ẹdiọn̄ọ mmọ ẹmi onyụn̄ owụt nnyịn nte ẹkpefepde mmọ. Mbon oro ẹnen̄erede ẹma Jehovah ẹnyụn̄ ẹnyenede eti mbak ediyat enye esịt ẹkeme ndise mban̄a mme utọ n̄kpọ etabi oro uforo uforo. Edieke mmọ ‘ẹkade iso ndisan̄a ke spirit,’ mmọ idiyakke idem isịn ke mme usụn̄ ererimbot. (Galatia 5:16-25) Ye kpukpru mbon oro ẹnen̄erede ẹbọp uwem mmọ ẹkanade itie ebuana mmọ ye Jehovah, mmọ ẹnyene akwa idotenyịn ndisan̄a ye Abasi, ndidara n̄kpet n̄kpet itie ebuana ye enye ke nsinsi.—Psalm 25:14.
Nso Idi Ibọrọ Fo?
◻ Didie ke owo ndibuọt idem ke idemesie ekeme ndidi afia?
◻ Nso ikeme ndikpeme nnyịn mbiọn̄ọ edidi se ndịk owo akarade?
◻ Nso ikeme ndinam nnyịn ikpu ndinam item ẹnọde ẹban̄a n̄kpọndịk oro odude ke edibịne inyene?
◻ Nso ikeme ndinam nnyịn ifep ndidi se editịmede esịt ọkọkde afia ọnọ?
[Mme ndise ke page 16, 17]
Ediwak owo ẹka iso ẹsan̄a ye Abasi ke ofụri eyouwem