Yak Edidem Emi Spirit Abasi Adade Usụn̄ Ọdiọn̄ Fi!
“Spirit Jehovah oyodoro enye ke idem.”—ISA. 11:2.
1. Nso ke mme owo ẹtịn̄ ẹban̄a mfịna ererimbot?
ATAIFIỌK kiet emi ekerede Stephen Hawking okobụp ke 2006 ete: “Ndi owo oyosụk ekeme ndidu uwem ke isọn̄ emi ke isua ikie ke iso ye kpukpru ọkpọsọn̄ ndutịme emi odude mi ke ukara, ke obio, ye nte ẹsabarede n̄kann̄kụk idahaemi? Ibuotikọ kiet ke magazine oro ẹkotde New Statesman ọdọhọ ete: “Nnyịn ikemeke nditre ubuene inyụn̄ ikemeke ndisịn emem ke ererimbot. Edi etie nte ikam inanam mme owo ẹbuene inyụn̄ inam ẹn̄wana ekọn̄. Idịghe nte ke iwawan̄ ubọk itie. Imanam kpukpru se ikemede, imodomo nsio nsio orụk ukara ise, itọn̄ọ Esop Ediomi Mme Idụt man isịn emem ke ererimbot, ekem ibot ikpọ enyene-ndịk n̄kpọekọn̄ ndida nsịn mme owo ndịk ke idem mbak ẹkûn̄wana aba ekọn̄. Iman̄wana ata ediwak ekọn̄ man itre ekọn̄, inyụn̄ iwụt ke imọfiọk se ikpanamde man ekọn̄ etre,” edi ufọn idụhe.
2. Didie ke Jehovah ediwụt ke imọ ikpọn̄-ikpọn̄ inyene unen ndikara isọn̄ ke mîbịghike?
2 Utọ ikọ emi ikpaha mme asan̄autom Jehovah idem. Bible ọdọhọ ke owo ikobotke owo man enye akara idemesie. (Jer. 10:23) Jehovah ikpọn̄-ikpọn̄ enyene unen ndikara nnyịn. Enye ikpọn̄-ikpọn̄ enyene unen nditịn̄ nte ikpodude uwem, nditịn̄ se idide uduak uwem nnyịn, nnyụn̄ n̄wụt se ikpanamde man uduak emi osu. N̄ko, ke mîbịghike, enye ọmọn̄ etetre ukara owo emi ama okokpu mi. Enye n̄ko oyosobo kpukpru mbon oro ẹsịnde ukara esie ẹnyụn̄ ẹnamde mme owo ẹka iso ẹdụk ufụn ẹnọ idiọkn̄kpọ, unana mfọnmma, ye “abasi editịm n̄kpọ emi,” Satan kpa Devil.—2 Cor. 4:4.
3. Ewe ntịn̄nnịm ikọ ke Isaiah eketịn̄ aban̄a Messiah?
3 Ke Paradise, Jehovah ayada Obio Ubọn̄ Messiah akara ubonowo ke ima. (Dan. 7:13, 14) Isaiah ama etịn̄ ntịn̄nnịm ikọ aban̄a Edidem Obio Ubọn̄ emi ete: “N̄kọk eyetịbe ke etak Jesse; nsehe eke edin̄wụmde mfri oyonyụn̄ asiaha ke orụn̄ esie. Ndien spirit Jehovah oyodoro enye ke idem, spirit ọniọn̄ ye asian, spirit item ye odudu, spirit ifiọk ye uten̄e Jehovah.” (Isa. 11:1, 2) Didie ke edisana spirit Abasi anam ‘n̄kọk etak Jesse’—oro edi Jesus Christ—odot ndikara ubonowo? Mme edidiọn̄ ewe ke ukara esie edida idi? Ndien nso ke ana inam man ibọ mme edidiọn̄ oro?
Abasi Anam Jesus Odot Ndikara
4-6. Nso idin̄wam Jesus akara ke ọniọn̄ ye esịtmbọm, onyụn̄ edi eti Akwa Oku, ye Ebiereikpe?
4 Jehovah oyom enyene-ọniọn̄ ye enyene-esịt mbọm Edidem, kpa Akwa Oku, ye Ebiereikpe, ada ubonowo ekesịm mfọnmma. Ntak edi oro enye emekde Jesus Christ onyụn̄ adade edisana spirit esie anam enye odot ndinam ikpọ n̄kpọ emi. Ẹyak ineme ndusụk ntak emi ẹdinamde Jesus ekeme ndinam utom emi Abasi ọnọde enye edifọn edifọn.
5 Jesus etịm ọfiọk Abasi. Ikpọn̄-ikpọn̄ edibon Eyen Abasi emi ọfiọk Ete esie ebịghi akan nte owo ekededi ọfiọkde, eyedi ke ata ediwak biliọn isua. Ini oro ke Jesus ekenen̄ede ọkọ ifiọk Jehovah tutu edi se Bible okotde enye “mbiet Abasi oro enyịn mîkwe.” (Col. 1:15) Jesus ke idemesie ọkọdọhọ ete: “Owo eke okụtde mi okụt Ete n̄ko.”—John 14:9.
6 Jesus edi udiana Jehovah, ntre enye enen̄ede enyene ifiọk aban̄a kpukpru edibotn̄kpọ, esịnede owo. Colossae 1:16, 17 ọdọhọ ete: “Ẹkebot kpukpru n̄kpọ eken ke heaven ye ke isọn̄ oto ke enye [Eyen Abasi], se ẹkemede ndikụt ye se owo mîkemeke ndikụt, . . . N̄ko, enye odu mbemiso kpukpru n̄kpọ eken ndien ẹkenam kpukpru n̄kpọ eken ẹdidu oto ke enye.” Jesus emi edide “ata anamutom” Abasi ama etiene obot kpukpru mme n̄kpọ eken. Ntre, enye ọfiọk kpukpru n̄kpọ aban̄a ekondo ye owo. Ke akpanikọ, ẹkot Christ ọniọn̄!—N̄ke 8:12, 22, 30, 31.
7, 8. Didie ke spirit Abasi akan̄wam Jesus ke utom ukwọrọikọ esie?
7 Ẹma ẹda edisana spirit Abasi ẹyet Jesus aran. Jesus ọkọdọhọ ete: “Spirit Jehovah odoro mi ke idem, koro enye ama eyet mi aran enịm ete ntan̄a eti mbụk nnọ mme ubuene, enye ama osio mi ọdọn̄ ete n̄kwọrọ ubọhọ-ufụn nnọ mbuotekọn̄ nnyụn̄ n̄kwọrọ edifiak n̄kụt usụn̄ nnọ mme nnan, nnyụn̄ nnam mmọ emi ẹfịkde ẹnyọn̄ọ ke ifụre, nnyụn̄ n̄kwọrọ isua mfọnido Jehovah.” (Luke 4:18, 19) Etie nte ini Jesus akanade baptism ke edisana spirit akanam enye eti se enye ekekpepde ke heaven mbemiso enye ekedide isọn̄, emi esịne se Abasi okoyomde enye anam nte Messiah ke ini utom ukwọrọikọ esie ke isọn̄.—Kot Isaiah 42:1; Luke 3:21, 22; John 12:50.
8 Sia ẹkenọde Jesus edisana spirit, enye okonyụn̄ ọfọnde ama anana ndo, enye ekedi akakan owo oro akanam odude uwem, afiak edi akakan Andikpep. Ke nditịm ntịn̄, mme andikpan̄ utọn̄ nnọ enye ẹma ‘ẹsikop n̄kpaidem ẹban̄a usụn̄ nte enye ekekpepde owo n̄kpọ.’ (Matt. 7:28) Kam se, Jesus ama etịn̄ se ikedide ata akpan ntak mfịna ubonowo—idiọkn̄kpọ, unana mfọnmma, ye unana ifiọk Abasi. Enye n̄ko ama ekeme ndifiọk se isịnede owo ke esịt onyụn̄ anam n̄kpọ ye mmọ etiene emi.—Matt. 9:4; John 1:47.
9. Didie ke nditie n̄kere mme n̄kpọ oro Jesus akanamde ke isọn̄ anam etetịm enịm ke enye odot ndikara?
9 Jesus okodu uwem nte owo. Enye ndikedi owo ye enye ndikenen̄ede n̄kpere mme anana-mfọnmma owo anam Jesus enen̄ede odot ndidi Edidem. Apostle Paul ekewet ete: “[Jesus] ekenyene ndikabade ntie nte ‘nditọete’ esie ke kpukpru usụn̄, man enye akpakabade edi akwa oku emi okopde mbọm onyụn̄ anamde akpanikọ ke mme n̄kpọ oro ẹban̄ade Abasi, man enye akpawa uwa usio-isop kaban̄a idiọkn̄kpọ mme owo. Koro ke emi enye ama okokụt ndutụhọ ke ini ẹdomode enye ẹse, enye ekeme ndin̄wam mbon oro ẹdomode ẹse.” (Heb. 2:17, 18) Sia ẹma ‘ẹkedomo Jesus ẹse,’ enye ekeme nditua mbon oro ẹsobode idomo mbọm. Ẹma ẹnen̄ede ẹkụt adan̄a nte Jesus akatuade mme owo mbọm ke ini enye akanamde utom ukwọrọikọ ke isọn̄. Mbon udọn̄ọ, mbon oro ẹbiomode ndo, mbon oro ẹfịkde—idem n̄kpri nditọwọn̄—ẹma ẹsima ndisan̄a n̄kpere enye. (Mark 5:22-24, 38-42; 10:14-16) Mbon nsụhọdeidem ye mbon oro ẹkeyomde ndifiọk Abasi n̄ko ẹma ẹsisan̄a ẹkpere enye. Edi, mbon ntan̄idem ye mbon iseri, ye mbon oro ‘ima Abasi mîkodụhe mmọ ke esịt’ ẹma ẹsịn Jesus, ẹsua enye ẹnyụn̄ ẹkọbọ enye.—John 5:40-42; 11:47-53.
10. Nso n̄kponn̄kan n̄kpọ ke Jesus akanam ndiwụt ke imama nnyịn?
10 Jesus ama ayak uwem esie ọnọ ke ibuot nnyịn. Etie nte n̄kponn̄kan n̄kpọ emi owụtde ke Jesus odot ndikara edi emi enye ekenyịmede ndikpa ke ibuot nnyịn. (Kot Psalm 40:6-10.) Christ ọkọdọhọ ete: “Idụhe owo emi enyenede ima eke okponde akan emi, owo ndikpayak ukpọn̄ esie nnọ ke ibuot mme ufan esie.” (John 15:13) Jesus ama ayak uwem esie ọnọ ke ibuot ubonowo, itiehe nte mme anana-mfọnmma mme andikara nnyịn, emi ẹsiwakde nditụk mbon emi mmọ ẹkarade man ẹforo.—Matt. 20:28.
Ẹnọ Jesus Odudu Ndinam Mme Owo Ẹdia Ufọn Ufak
11. Ntak ikemede ndinyene ọyọhọ mbuọtidem ke Jesus nte Andifak nnyịn?
11 Odot didie ntem Jesus emi edide Akwa Oku ndidi owo emi edinamde nnyịn idia ufọn ufak! Ke akpanikọ, ke ini Jesus akanamde utom ukwọrọikọ mi ke isọn̄, enye ama anam ifiọk se imọ idinamde nte Andifak nnyịn ke ini emi enye edikarade ke tọsịn isua, emi iditienede idu edieke ikade iso inam akpanikọ. Enye ama esikọk ediwak mbon udọn̄ọ ye mbon oro ẹbiomode ndo, anam mme akpan̄kpa ẹset, ọnọ ata akpakịp owo udia ẹdia, idem onyụn̄ anamde inyan̄ ye ofụm ẹna sụn̄-n̄. (Matt. 8:26; 14:14-21; Luke 7:14, 15) N̄ko, enye ikanamke mme n̄kpọ emi sia enye okoyomde ndiwụt ke imenyene odudu, edi akanam ke ntak mbọm ye ima. Ke ini owo akpamfia ekekpede enye ubọk ete edieke amade, emekeme ndinam mi nsana; enye ọkọdọhọ ete: “Mmama. Sana.” (Mark 1;40, 41) Ntre ke Jesus edinyụn̄ itua kpukpru mbon oro enye edikarade ke tọsịn isua mbọm.
12. Didie ke Isaiah 11:9 edisu?
12 Christ ye mme nsan̄a ukara esie ẹyeka iso ẹnọ nnyịn ukpep oro Jesus ọkọtọn̄ọde ke n̄kpọ nte isua 2,000 emi ẹkebede. Ntem ke ikọ Isaiah 11:9 edisu: “Ifiọk Jehovah ọyọyọhọ isọn̄ kpa nte mmọn̄ ofụkde inyan̄.” Ukpep oro Abasi edinọde nnyịn eyesịne nte nnyịn ikpekpemede isọn̄ ye mme n̄kpọ-obot eken, nte ẹkedọhọde Adam anam. Etisịm utịt tọsịn isua, ata akpa uduak Abasi oro ẹtịn̄de ke Genesis 1:28 oyosu, ini oro ke idinen̄ede ibọ ufọn uwa ufak Christ.
Ẹnọ Enye Odudu Ndibiere Ikpe
13. Didie ke Jesus okowụt ke imọ imama edinen ido?
13 Christ edi “Owo emi Abasi ekenịmde ete edi ebiereikpe ọnọ mme odu-uwem ye mme akpan̄kpa.” (Utom 10:42) Enem didie ntem ndifiọk ke Jesus idibọhọ ubọkedem, nte ke edinen ido ye akpanikọ ẹditie nte ubọpisịn esie. (Isa. 11:5) Enye ama owụt ke imọ isasua idiọkitọn̄, mbubịk, ye mme idiọkido eken, onyụn̄ ọsọn̄ọ asua ọnọ mbon oro ẹkesọn̄de esịt ẹsịn nditua mbon ukụt mbọm. (Matt. 23:1-8, 25-28; Mark 3:5) N̄ko, Jesus ama owụt ke imọ isehe nte owo etiede ke enyọn̄ idem, “koro enye ọfiọkde se isịnede owo ke esịt.”—John 2:25.
14. Didie ke Jesus owụt ke imama edinen ido ye unenikpe idem idahaemi, ndien mme mbụme ewe ke ikpobụp idem nnyịn?
14 Jesus aka iso owụt ke imama edinen ido ye edinen ikpe ke ndise enyịn ke utom ukwọrọikọ ye edikpep mme owo n̄kpọ, oro ẹnamde ke ofụri ererimbot. Idụhe owo m̀mê ukara m̀mê idiọk spirit emi ekemede nditre nnyịn ndinam utom emi nte Abasi oyomde. Ntre, nnyịn imekeme ndinen̄ede nnyene mbuọtidem nte ke Armageddon ama okụre, ke unenikpe Abasi ọyọyọhọ isọn̄. (Kot Isaiah 11:4; Matthew 16:27.) Bụp idemfo ete: ‘Nte mmesinam n̄kpọ ye mme owo emi nsobode ke an̄wautom nte Jesus ekesinamde? Ndi mmesinam ofụri ukeme mi ke utom Jehovah idem ọkpọkọm n̄kopke nsọn̄idem, mme idaha mi mînyụn̄ iyakke nnam se n̄kpamade ndinam?’
15. Nditi nso idin̄wam nnyịn inam ofụri se ikemede ke utom Abasi?
15 Se idin̄wamde nnyịn isịn ofụri ukeme inam utom emi edi nditi kpukpru ini nte ke utom ukwọrọikọ emi inamde mi edi utom Abasi. Enye owụk nnyịn ete inam emi, Enye anam Eyen esie ada usụn̄ ke utom emi, Enye onyụn̄ ọnọ mbon oro ẹnamde utom emi edisana spirit Esie. Ndi amabat ifet emi afo enyenede ndidi nsan̄autom Abasi ye eke Eyen esie emi spirit Abasi adade usụn̄, ke akpan n̄kpọ? Anie efen ke mîbehe Jehovah anam se ibede miliọn owo itiaba, emi ẹbatde ediwak mmọ nte mbon emi ‘mîfiọkke n̄wed ẹnyụn̄ ẹdide mme usụhọde owo,’ ẹkwọrọ etop Obio Ubọn̄ ẹnọ mme owo ke idụt 236?—Utom 4:13.
Yak Christ Ọdiọn̄ Fi
16. Nso ke Genesis 22:18 etịn̄ aban̄a edidiọn̄ Abasi?
16 Jehovah ọkọdọhọ Abraham ete: “Kpukpru mme idụt isọn̄ ẹyebọ edidiọn̄ eke otode mfri fo koro afo okokopde uyo mi.” (Gen. 22:18) Emi ọwọrọ ke mbon oro ẹdarade se Abasi anamde ẹkeme ndinen̄ede ndori enyịn ndibọ mme edidiọn̄ oro Mfri emi edide Messiah edidade edi. Ndien mmọ ẹsịn idem mfịn ẹnam utom Abasi ẹnyụn̄ ẹnyene mme edidiọn̄ emi ke ekikere.
17, 18. Nso ke Jehovah ọn̄wọn̄ọ ke Deuteronomy 28:2, ndien didie ke un̄wọn̄ọ emi ebehe nnyịn?
17 Ini kiet, Abasi ama etịn̄ ọnọ idụt Israel emi ekedide ata nditọ Abraham ete: “Kpukpru mme edidiọn̄ emi [ẹken̄wọn̄ọde ke Ibet Ediomi] ẹyetiene fi ẹnyụn̄ ẹsịm fi, koro afo okopde uyo Jehovah Abasi fo.” (Deut. 28:2) Ẹkeme nditịn̄ ntem mban̄a mme asan̄autom Abasi mfịn. Edieke oyomde Jehovah ọdiọn̄ fi, ka iso “kop uyo” esie. Do, mme edidiọn̄ esie “ẹyetiene fi ẹnyụn̄ ẹsịm fi.” Edi, nso ke “ndikop uyo” Abasi ọwọrọ?
18 Ndikop uyo Abasi enen̄ede ọwọrọ ndiyak se ẹtịn̄de ke Bible ye udia eke spirit oro enye ọnọde otụk nnyịn. (Matt. 24:45) Emi n̄ko ọwọrọ ndikop uyo Eyen esie. Jesus ọkọdọhọ ete: “Idịghe kpukpru mbon oro ẹkotde mi, ‘Ọbọn̄, Ọbọn̄,’ ẹdidụk obio ubọn̄ heaven, edi edi enye emi anamde uduak Ete mi emi odude ke heaven edidụk.” (Matt. 7:21) Ntre, ndikop uyo Abasi ọwọrọ ndisụhọde idem nnyịme nditiene ndutịm esop Abasi emi mbiowo kpa ‘irenowo emi ẹnọde nte enọ’ ẹdude.—Eph. 4:8.
19. Didie ke ikeme ndibọ edidiọn̄ Abasi?
19 Otu Ukara emi ẹdade ke ibuot ofụri esop Abasi ẹsịne ke otu ‘irenowo emi ẹnọde nte enọ.’ (Utom 15:2, 6) Ke nditịn̄ ibio ibio, ẹdibiere ikpe inọ nnyịn ke akwa ukụt emi osụk edide mi itiene nte inamde n̄kpọ ye nditọete Christ eke spirit. (Matt. 25:34-40) Ntre, usụn̄ kiet emi ikemede ndinyene edidiọn̄ Abasi edi ndibere ye mbon emi Abasi eyetde aran.
20. (a) Nso inen̄ede idi ata akpan utom ‘irenowo emi ẹnọde nte enọ’? (b) Didie ke ikeme ndiwụt ke imadara nditọete emi?
20 Kọmiti N̄kọk Itieutom, mme esenyịn oro ẹsan̄ade-san̄a, ye mbiowo esop ẹsịne kpa ke otu ‘irenowo emi ẹnọde nte enọ’ mi, ndien ẹkeda edisana spirit ẹmek kpukpru mmọ. (Utom 20:28) Ata akpan utom nditọete emi edi ndisọn̄ọ ikọt Abasi idem “tutu kpukpru nnyịn ikabade idi kiet ke mbuọtidem ye ke nnennen ifiọk Eyen Abasi, ikpon iwọrọ owo, isịm ọyọhọ idaha emi Christ ekesịmde.” (Eph. 4:13) Imọfiọk ke mmọ ẹdi mme anana mfọnmma owo kpa nte nnyịn idide. Kpa ye oro imekeme ndibọ edidiọn̄ edieke iwụtde ke imadara ima ima ukpeme oro mmọ ẹnọde.—Heb. 13:7, 17.
21. Ntak emi oyomde isụk ibuot inọ Eyen Abasi idahaemi?
21 Ibịghike, Christ ọmọn̄ ososobo idiọk editịm n̄kpọ Satan. Ke ini oro editịbede, uwem nnyịn edisịne Jesus ke ubọk koro Abasi ọnọ enye odudu ndida “akwa otuowo” emi Bible eketịn̄de aban̄a n̄ka “obube mmọn̄ uwem.” (Edi. 7:9, 16, 17) Ntre, ẹyak nnyịn isịn ofụri ukeme nnyịn isụk ibuot idara idara ye ke ofụri esịt inọ Edidem emi spirit Jehovah adade usụn̄.
Nso ke Ekekpep ke . . .
• Utom 10:42?
[Ndise ke page 17]
Ẹma ẹnen̄ede ẹkụt adan̄a nte Jesus akatuade mme owo mbọm ke ini enye akanamde eyen Jairus an̄wan eset
[Mme Ndise ke page 18]
Jesus Christ ke ese enyịn ke akakan utom ukwọrọikọ oro akanam ẹnamde