Mme Mbụme Ẹtode Mme Andikot
Ke N̄wed Mbon Philippi 2:9, Paul eketịn̄ aban̄a Jesus ete: “Abasi ekemenede Enye onịm ke enyọn̄, onyụn̄ ọnọ Enye enyịn̄ emi okon̄de akan [kpukpru enyịn̄ efen, NW].” Nso idi obufa enyịn̄ emi? Ndien edieke Jesus osụhọrede akan Jehovah, didie ke enyịn̄ Jesus okon̄ akan kpukpru enyịn̄ efen?
N̄wed Mbon Philippi 2:8, 9 okot ete: “Enye [Jesus] osụhọde idem, akabade osụk ibuot tutu osụn̄ọ ke n̄kpa, kpa n̄kpa [ke eto ndutụhọ, NW]. Ke ntak oro Abasi ekemenede enye onịm ke enyọn̄, onyụn̄ ọnọ Enye enyịn̄ emi okon̄de akan [kpukpru enyịn̄ efen, NW].”
Udọn̄ikọ emi iwọrọke ite ke sia edide Jehovah ikpọn̄îkpọn̄ enyene enyịn̄ emi okon̄de akan kpukpru enyịn̄ ofụri ofụri, ke enyene ndidi Jesus edi ukem owo nte Jehovah. Nte udọn̄ikọ oro ke N̄wed Mbon Philippi ibuot 2 owụtde, Jesus ọkọbọ n̄kokon̄ enyịn̄ esie ke enye ama ekeset. Mbemiso oro, enye ikenyeneke enyịn̄ oro. Ke n̄kan̄ eken, Jehovah edi akakan kpukpru ini, ndien idaha esie akananam ikpụhọkede. Akpanikọ oro nte ke Jesus ama ọbọ enyịn̄ oro okon̄de akan enyịn̄ oro enye ekenyenede mbemiso utom esie eke isọn̄ owụt nte ke enye idịghe ukem ye Jehovah. Ke ini Paul ọkọdọhọde ete ke ẹma ẹnọ Jesus enyịn̄ oro okon̄de akan kpukpru enyịn̄, ikọ esie ọkọwọrọ ke Jesus idahaemi enyene enyịn̄ oro okon̄de akan ke otu kpukpru mme edibotn̄kpọ Abasi.
Nso idi n̄kokon̄ enyịn̄ Jesus oro? Isaiah 9:6 an̄wam nnyịn ndinọ ibọrọ. Ke etịn̄de prọfesi aban̄a Messiah emi edide, Jesus, ufan̄ikọ oro ọdọhọ ete: “Ubọn̄ onyụn̄ odoro enye ke afara; ẹnyụn̄ ẹsio enye enyịn̄, Utịbe, Ọnọ-item, Ọkpọsọn̄ Abasi, Nsinsi Ete, Ọbọn̄ Emem.” (Sịghisịghi ubọkn̄wed edi eke nnyịn.) Mi “enyịn̄” Jesus enyene n̄kpọ ndinam ye n̄kokon̄ itie ye odudu ukara esie, emi edide usụn̄ nte “enyịn̄ emi okon̄de akan kpukpru enyịn̄ efen” emi ẹsiakde ke N̄wed Mbon Philippi 2:9, an̄wan̄ade nnyịn. Ẹnọ uyo ẹte kpukpru edọn̄ ẹtọn̄ọ ẹnọ Jesus ke ndidiọn̄ọ n̄kokon̄ itie odudu ukara oro Jehovah ọnọde enye—kpa itie odudu ukara emi okon̄de akan eke edibotn̄kpọ efen ekededi. Ikọ oro “efen” ke edikabade emi idụhe nnennen nnennen ke akpasarade udọn̄ikọ usem Greek, edi ifiọk oro ufan̄ikọ oro ọnọde owụt emi. “Enyịn̄” Jesus ikon̄ke ikan enyịn̄ esie edi okon̄ akan kpukpru enyịn̄ efen emi mme edibotn̄kpọ ẹnyenede.
Nnyịn ikop inemesịt didie ntem ndidiana ye kpukpru mme anam-akpanikọ angel ye mme owo ke nditọn̄ọ edọn̄ ke ndidiọn̄ọ enyịn̄ Jesus! Nnyịn inam emi ebe ke ndisụk idem nnọ Jesus ke n̄kokon̄ ye okopodudu itie emi Jehovah ọnọde enye.—‘ke ndinọ Abasi Ete ubọn̄.’—Philippi 2:11; Matthew 28:18.