Ndikwọrọ Eti Mbụk ye Edinen̄ede Nnịm ke Akpanikọ
1 Ke ntọn̄ọ ntọn̄ọ akpa isua ikie, Jesus Christ ama ọdọn̄ mme anditiene enye ete ẹkwọrọ eti mbụk Obio Ubọn̄ ẹnyụn̄ “ẹka ẹkenam kpukpru mme idut ẹdi mbet.” (Matt. 24:14; 28:19, 20) Mme Ntiense Jehovah ẹda item emi ke akpan n̄kpọ, anamde etisịm utịt isua ikie 20, otu nditọete Christian nnyịn ọdọk ebe mbet 5,900,000 ke idụt 234. Nso akwa mfiori itoro ke emi edi ntem ọnọ Ete nnyịn eke heaven!
2 Idahaemi nnyịn imodụk ọyọhọ isua ikie 21. Asua nnyịn ke odomo ke etabi etabi usụn̄ ndibiọn̄ọ akpan utom nnyịn eke edikwọrọ Obio Ubọn̄ ye edinam mme mbet. Enye ada mme mfịghe ẹtode editịm n̄kpọ emi ke ukeme oro enye esịnde ndiwọn̄ọde ntịn̄enyịn nnyịn, mbiat ini nnyịn, nnyụn̄ nda ekese n̄kpọ ẹmi mîdịghe akpan n̄kpọ ndisụhọde ukeme nnyịn. Utu ke ndiyak editịm n̄kpọ emi ebiere se idide akpan n̄kpọ ke uwem, nnyịn ida Ikọ Abasi idomo ifiọk se idide akakan n̄kpọ—ndinam uduak Jehovah. (Rome 12:2) Oro ọwọrọ ndinam item N̄wed Abasi nte ‘ikwọrọ ikọ Abasi ke edide ekem ini ye ke mînyụn̄ idịghe ekem ini.’—2 Tim. 4:2, 5.
3 Nen̄ede Nịm ke Akpanikọ: Oyom mme Christian ‘ẹda ọyọhọ ọyọhọ ẹnyụn̄ ẹnen̄ede ẹnịm ofụri uduak Abasi ke akpanikọ.’ (Col. 4:12, NW) Ẹkabade ikọ oro “edinịm ke akpanikọ” nte “ọkpọsọn̄ mbukpek m̀mê ukpepn̄kpọ; ndidi se ẹnamde enịm ke akpanikọ.” Nte mme Christian ana nnyịn inịm ite ke ntịn̄nnịm ikọ Abasi edi akpanikọ ye nte ke nnyịn idahaemi imetịm ikpere utịt. Ana nnyin inen̄ede inịm ke akpanikọ ukem nte apostle Paul, emi ọkọdọhọde ete ke eti mbụk “[edi] odudu Abasi, emi ọwọrọde edinyan̄a ọnọ kpukpru owo eke ẹbuọtde idem.”—Rome 1:16.
4 Devil ada ndiọi owo ye mbon abian̄a, ẹmi ẹtụnde mmọ usụn̄, ndikara nnyụn̄ mbian̄a mmọ en̄wen. (2 Tim. 3:13) Sia ẹma ẹkebem iso ẹtọt nnyịn ẹban̄a emi, nnyịn imanam n̄kpọ ndisọn̄ọ edinịm ke akpanikọ nnyịn nte ke nnyịn imenyene akpanikọ. Utu ke ndiyak mme editịmede esịt eke uwem ẹnam ifịk nnyịn etek, nnyịn ikpenyene ndika iso nnịm mme ufọn n̄kpọ Obio Ubọn̄ akpa. (Matt. 6:33, 34) Nnyịn ikpenyeneke ndifre mban̄a nte ini nnyịn edide usọp usọp, ndusụk ikerede nte ke utịt editịm n̄kpọ emi ke oyoyom usụn̄. Enye enen̄ede asan̄a ekpere. (1 Pet. 4:7) Okposụkedi nnyịn ikemede ndikere nte ke ndisuan eti mbụk enyene esisịt utịp ke ndusụk idụt ke ikerede iban̄a ikọ ntiense oro ẹma ẹkenọnọ, ana utom edinọ ntọt oro aka iso.—Ezek. 33:7-9.
5 Mme akpan mbụme ke mme ukperedem usen ẹmi ẹdi: ‘Nte ami mmada utom edinam mbet oro Jesus ọkonọde ke akpan n̄kpọ? Ke ini n̄kwọrọde eti mbụk, nte ami mmesinen̄ede nnịm ke akpanikọ nte ke Obio Ubọn̄ oro edi ata idem n̄kpọ? Nte ami mmebiere ndibuana adan̄a nte n̄kekeme ke utom unyan̄a uwem emi?’ Sia ifiọkde adan̄a nte nnyịn ikade anyan ke utịt ini emi, ana nnyịn ikpeme idem nnyịn ye utom edikwọrọ ye edikpep owo n̄kpọ ẹmi ẹnọde inam. Ke edinam emi nnyịn iyanyan̄a idem nnyịn ye mmọ ẹmi ẹkopde uyo nnyịn. (1 Tim. 4:16) Didie ke kpukpru nnyịn ikeme ndinen̄ede nnịm ke akpanikọ nte mme asan̄autom?
6 Kpebe Mbon Thessalonica: Ke etide ọkpọsọn̄ utom nditọete ke Thessalonica, apostle Paul ọkọdọhọ mmọ ete: “Gospel nnyịn ikedịghe ke ọtọ mbufo nte ikọ ikpọn̄, edi ekedi ke odudu, ye ke Edisana Spirit, ye ke [edinen̄ede nnịm ke akpanikọ, NW]. Mbufo nde ẹmefiọk orụk owo eke nnyịn iwụtde idem ke otu mbufo, man ọfọn ye mbufo. Mbufo ẹma ẹnyụn̄ ẹkabade ẹdi mme andikpebe nnyịn ye mme andikpebe Ọbọn̄, ẹnyụn̄ ẹbọ Ikọ Abasi ye idatesịt Edisana Spirit ke ufọt ọkpọsọn̄ ukụt.” (1 Thess. 1:5, 6) Ih, Paul okotoro esop Thessalonica koro kpa ye ekese ukụt, mmọ ẹma ẹkwọrọ ikọ ifịk ifịk ẹnyụn̄ ẹnen̄ede ẹnịm ke akpanikọ. Nso ikan̄wam mmọ ndinam emi? Ke akamba udomo, ifịk ye edinịm ke akpanikọ oro mmọ ẹkekụtde nte apostle Paul ye mme nsan̄autom esie ẹwụtde ẹma ẹnyene eti utịp ke idemmọ. Didie ke ekedi ntre?
7 Uwem Paul ye eke mme nsan̄a ukaisan̄ esie ẹma ẹwụt ẹte ke mmọ ẹma ẹnyene spirit Abasi ye nte ke mmọ ẹma ẹnịm se mmọ ẹkekwọrọde ke ofụri esịt. Mbemiso ẹkekade Thessalonica, ẹma ẹnam Paul ye Silas n̄kpọ emiom emiom ke Philippi. Ye unana edikpe ikpe, ẹma ẹmia, ẹkọbi ẹnyụn̄ ẹfat mmọ ukot ke ebuka. Nte ededi, ubiak ubiak ifiọkutom emi ikanamke ifịk oro mmọ ẹkenyenede ẹban̄a eti mbụk etek. Abasi ndisịbe ndụk ama anam ẹsana mmọ ẹyak, adade ekesịm ekpeme ufọk-n̄kpọkọbi ye ikọtufọk esie ndikabade esịt, onyụn̄ anam usụn̄ odu ọnọ nditọete ẹmi ndika iso ke utom ukwọrọikọ mmọ.—Utom 16:19-34.
8 Ke odudu spirit Abasi, Paul ama esịm Thessalonica. Do enye ama anam utom ọkpọsọn̄ man enye enyene mme akpan n̄kpọ oro enye okoyomde ndien ekem enye ama esịn idem ọyọhọ ọyọhọ ke ndikpep mbon Thessalonica akpanikọ. Enye iketreke ndida kpukpru ifet ntan̄a eti mbụk. (1 Thess. 2:9) Ukwọrọikọ Paul ye enye ndinen̄ede nnịm ke akpanikọ ama enyene ọkpọsọn̄ utịp ke idem mbon n̄kann̄kụk oro tutu ndusụk mmọ ẹkpọn̄ akani ido ukpono ndem mmọ ẹnyụn̄ ẹkabade ẹdi mme asan̄autom ata Abasi, Jehovah.—1 Thess. 1:8-10.
9 Ukọbọ ikakpanke mbufa andinịm ke akpanikọ ẹmi ndikwọrọ eti mbụk. Ke obufa ido ukpono mmọ ye ọyọhọ ọyọhọ edinịm ke akpanikọ nte ke mmimọ iyenyene mme nsinsi edidiọn̄ ẹnụkde, mbon Thessalonica ẹma ẹtan̄a akpanikọ emi mmọ ke ifiopesịt ẹkebọde. Esop oro ama enyene ifịk tutu etop mbuọtidem ye ifịk mmọ asuana esịm mme ikpehe eken ke Macedonia idem ye Achaia. Ntem, ke ini Paul ekewetde akpa leta esie ọnọ ẹsọk mbon Thessalonica, ẹma ẹfọfiọk nti utom mmọ. (1 Thess. 1:7) Nso n̄wọrọnda uwụtn̄kpọ!
10 Ima Ẹnyenede Ẹnọ Abasi ye Owo Onụk: Ukem nte mbon Thessalonica, didie ke nnyịn ikeme ndimụm ọkpọkpọ edinen̄ede nnịm ke akpanikọ n̄kama ke ini nnyịn ikwọrọde eti mbụk mfịn? Kaban̄a mmọ, Paul ekewet ete: “Sia nnyịn mîtreke nditi utom mbuọtidem mbufo, ye ọkpọsọn̄ utom ima mbufo.” (1 Thess. 1:3, sịghisịghi ubọkn̄wed edi eke nnyịn.) Ana in̄wan̄în̄wan̄ nte ke mmọ ẹma ẹnyene ntotụn̄ọ, ima ofụri esịt ẹnọ Jehovah Abasi ye mme owo ẹmi mmọ ẹkekwọrọde ikọ ẹnọ. Ukem ima emi okonụk Paul ye mme nsan̄a esie ndinọ mbon Thessalonica ‘idịghe gospel Abasi ikpọn̄, edi ke edinyụn̄ nyak ukpọn̄ mmọ nde nnọ mmọ.’—1 Thess. 2:8.
11 Ukem ntre, ntotụn̄o ima inyenede inọ Jehovah ye ekemmọ owo onụk nnyịn ndiyom ndibuana ọyọhọ ọyọhọ ke utom ukwọrọikọ oro Abasi ọnọde nnyịn inam. Ye utọ ima oro, nnyịn imọfiọk ite ke ndisuan eti mbụk edi ọkpọkpọ mbiomo oro Abasi ọnọde. Ebede ke nditie n̄kere in̄wan̄în̄wan̄ ye esịtekọm mban̄a kpukpru se Jehovah anamde ọnọ nnyịn ke ndimen nnyịn n̄wụt “ata uwem,” onụk nnyịn ndisian mmọ en̄wen ukem utịbe utịbe akpanikọ ẹmi nnyịn inịmde ke ofụri esịt nnyịn.—1 Tim. 6:19.
12 Nte nnyịn iyọhọde ke utom ukwọrọikọ, ana ima oro nnyịn inyenede inọ Jehovah ye mme owo akaka iso ndikọri. Edieke edide ntre, eyedemede nnyịn ndisịn ifịk mbuana ke utom ukwọrọikọ eke enyịnusụn̄ ke enyịnusụn̄, ndinyụn̄ nda mme usụn̄ unọ ikọ ntiense eken oro ẹberede ẹnọ nnyịn nnam n̄kpọ. Nnyịn iyada mme ifet ẹmi ẹberede inọ mme iman, mme mbọhọidụn̄, ye mme ọdiọn̄ọ ikọ ntiense. Okposụkedi ata ediwak owo ẹkemede ndisịn eti mbụk oro nnyịn inọde ndusụk ẹdinyụn̄ ẹdomode ndibiọn̄ọ editan̄a Obio Ubọn̄ emi, nnyịn imenyene idatesịt ke esịt nnyịn. Ntak-a? Koro nnyịn ifiọkde ite ke nnyịn imanam ofụri ukeme nnyịn ndinọ ikọ ntiense mban̄a Obio Ubọn̄ nnyụn̄ n̄n̄wam mme owo ẹnyene edinyan̄a. Ndien Jehovah ọyọdiọn̄ ukeme nnyịn ndiyom mbon eti esịt. Idem ke ini mfịghe uwem ẹkande nnyịn ẹkụk Satan onyụn̄ oyomde ndibiat idatesịt nnyịn, nnyịn imekeme ndika iso nnen̄ede nnịm ke akpanikọ nnyụn̄ nnyene ifịk ke ndinọ mbon en̄wen ikọ ntiense. Ke ini kpukpru nnyịn inamde udeme nnyịn, emi edisụn̄ọ ke ndinyene mme ọsọn̄idem esop, ẹmi ẹnyenede ifịk ukem nte eke Thessalonica.
13 Kûdede Ukpa Mba ke Osobode Idomo: Oyom edinịm ke akpanikọ n̄ko ke ini nnyịn isobode nsio nsio idomo. (1 Pet. 1:6, 7) Jesus ama anam an̄wan̄a mme mbet esie nte ke edieke mmọ ẹditienede imọ, ke ‘kpukpru mme idụt ẹyesua mmọ.’ (Matt. 24:9) Paul ye Silas ẹma ẹkụt emi ke ini ẹkedude ke Philippi. Mbụk oro ke Utom ibuot 16 ọdọhọ ete ke ẹma ẹsịn Paul ye Silas ke ata esịt-esịt ufọk-n̄kpọkọbi ẹnyụn̄ ẹfat mmọ ukot ke ebuka. Ke ofụri ofụri, ata ufọk-n̄kpọkọbi eketie nte efe m̀mê barakọn̄ emi ẹkebọpde mme ufọk-n̄kpọkọbi ẹkanarede mben oro ẹmi ẹkenyenede un̄wana ye ofụm. Nte ededi, un̄wana ikodụhe ke esịt-esịt ufọk-n̄kpọkọbi oro ndien esisịt ofụm ekesidụk. Paul ye Silas ẹkenyene ndiyọ utọ ekịm, ufiop, ye utebe idiọk itie n̄kọbintem emi. Nte afo emekeme ndikere nte eketiede mmọ ke idem ndidi se ẹfatde ukot ke ebuka ke ata anyan ini ndien edem mmọ ayan̄arede onyụn̄ ọwọn̄ọde iyịp ke ntak umia?
14 Kpa ye mme idomo ẹmi, Paul ye Silas ẹma ẹsọn̄ọ ẹda. Mmọ ẹma ẹwụt edinịm ke akpanikọ ofụri esịt, ọsọn̄ọdẹ mmọ idem ndika iso nnam n̄kpọ Jehovah kpa ye idomo. Ẹwụt edinịm ke akpanikọ mmọ ke Ut ibuot 16 ufan̄ikọ 25, ke ebiet ọdọhọde ke ‘Paul ye Silas ẹma ẹbọn̄ akam ẹnyụn̄ ẹkwọ ikwọ ẹnọ Abasi.’ Ke akpanikọ, kpa ye oro mmọ ẹkedude ke esịt esịt ufọk-n̄kpọkọbi, mmọ ẹma ẹtịm ẹnịm ke akpanikọ ke mmimọ ima inyene unyịme Abasi tutu mmọ ẹkwọ ikwọ ke ọkpọsọn̄ uyo oro mbon ufọk-n̄kpọkọbi eken ẹkekopde! Ana nnyịn inyene ukem edinịm ke akpanikọ oro mfịn ke ini isobode mme idomo mbuọtidem.
15 Mme idomo ẹmi Devil anamde ẹsịm nnyịn ẹwak etieti. Ye ndusụk owo enye ekeme ndidi ukọbọ otode ubon. Ediwak nditọete nnyịn ẹsobo mme n̄kpọ-ata eke ibet. Ẹkeme ndisobo ubiọn̄ọ otode mbon nsọn̄ibuot. Mme mfịghe eke n̄kann̄kụk ye editịmede esịt mban̄a se ẹdidade idu uwem, ẹdu. N̄kpri owo ẹsobo mfịghe ubọkn̄ka ke ufọkn̄wed. Didie ke nnyịn ikeme ndiyọ mme idomo ẹmi uforo uforo? Nso ke ẹyom man iwụt edinịm ke akpanikọ?
16 Akpa ye akakan, oyom nnyịn isọn̄ọ imụm ọkpọkpọ n̄kpet n̄kpet itie ebuana ye Jehovah ikama. Ke ini Paul ye Silas ẹkedude ke esịt-esịt ufọk-n̄kpọkọbi, mmọ ikesemeke iban̄a idaha mmọ m̀mê ndiseme idem. Ke ndondo oro, mmọ ẹma ẹka ẹbịne Jehovah ke akam ẹnyụn̄ ẹtoro enye ke ikwọ. Ntak-a? Koro mmọ ẹma ẹnyene ọkpọkpọ n̄kpet n̄kpet itie ebuana ye Ete mmọ eke heaven. Mmọ ẹma ẹfiọk ẹte ke mmimọ ikọbọ ufen ke ntak edinen ido ye nte ke edinyan̄a mmimọ ekesịne Jehovah ke ubọk.—Ps. 3:8.
17 Ke ini nnyịn isobode idomo mfịn, ana nnyịn n̄ko iberi edem ke Jehovah. Paul esịn udọn̄ ọnọ nnyịn nte mme Christian ete ‘isian Abasi se nnyịn iyomde. Ndien emem Abasi, emi ayan̄ade ifiọk owo, eyekpeme nnyịn esịt ye ekikere ke Christ Jesus.’ (Phil. 4:6, 7) Edi n̄kpọ ndọn̄esịt didie ntem ndifiọk nte ke Jehovah idiyakke nnyịn isobo idomo ye unana un̄wam! (Isa. 41:10) Enye ododu ye nnyịn kpukpru ini adan̄a nte inamde n̄kpọ inọ enye ye ata edinịm ke akpanikọ.—Ps. 46:7.
18 Akpan un̄wam en̄wen ke ndiwụt edinen̄ede nnịm ke akpanikọ edi ndiyọhọ ye utom Jehovah. (1 Cor. 15:58) Ẹkẹsịn Paul ye Silas ke ufọk-n̄kpọkọbi ke ntak mmọ ẹkeyọhọde ye utom edikwọrọ eti mbụk. Nte mmọ ẹma ẹtre ndikwọrọ ikọ ke ntak mme idomo mmọ ẹmi? Baba, mmọ ẹma ẹka iso ndikwọrọ ikọ idem ke adan̄aemi ẹkedude ke ufọk-n̄kpọkọbi, ndien ke ẹma ẹkesana mmọ ẹyak, mmọ ẹma ẹka Thessalonica ẹkedụk synagogue mme Jew man ‘ẹsio ikọ ke n̄wed Abasi ẹda ẹbuen ikọ ye mmọ.’ (Utom 17:1-3) Ke ini nnyịn isọn̄ọde inịm Jehovah ke akpanikọ inyụn̄ inịmde nte ke nnyịn imenyene akpanikọ, n̄kpọ ndomokiet “idikemeke ndidianade nnyịn ke ima Abasi, emi odude ke Christ Jesus Ọbọn̄ nnyịn.”—Rome 8:35-39.
19 Mme Uwụtn̄kpọ Edinịm ke Akpanikọ Eyomfịn: Ediwak n̄wọrọnda uwụtn̄kpọ ẹdu kaban̄a mbon eyo nnyịn, ẹmi ukem nte Paul ye Silas, ẹnen̄erede ẹnịm ke akpanikọ. Eyenete an̄wan kiet oro ọkọbọhọde itienna ekikere Auschwitz obụk mbuọtidem ye edinịm ke akpanikọ ẹmi n̄kpọ mîkemeke ndisehede oro nditọete iren ye iban do ẹkewụtde. Enye obụk ete: “Inikiet ke ini akwa owo kiet okobụpde mbụme, enye ama ofụt ubọk asan̄a ekpere mi. Enye ama ofiori ete: ‘Nso ke nnyịn idinanam mbufo? Edieke nnyịn imụmde mbufo, mbufo idọn̄ke enyịn. Edieke nnyịn inọde mbufo ẹka ufọk-n̄kpọkọbi, ibeheke mbufo do. Edieke inọde mbufo ẹka itienna ekikere, oro ifịnake mbufo. Ke ini ibierede ikpe n̄kpa inọ mbufo, mbufo idọn̄ke enyịn. Nso ke nnyịn idinanam mbufo?’” Ọsọn̄ọ mbuọtidem didie ntem ndikụt mbuọtidem nditọete nnyịn ke mme utọ n̄kpọsọn̄ idaha oro! Kpukpru ini mmọ ẹkedori enyịn ke Jehovah ndin̄wam mmọ ẹyọ.
20 Ke akpanikọ nnyịn imeti nte nditọete nnyịn ẹkenịmde ke akpanikọ ke ini usua eke ekpụk okowụtde idem ke mme isua ndondo emi. Kpa ye oro ẹkụtde idemmọ ke mme idaha oro ẹkamade n̄kpọndịk, uduak nditọete ẹmi ẹkamade utom edi ndikụt nte ke ẹnọ nditọete mmọ iren ye iban udia eke spirit. Kpukpru mmọ ẹka iso ke edinam akpanikọ ẹnyụn̄ ẹnen̄ede ẹnịm ke akpanikọ nte ke ‘baba n̄kpọ ekọn̄ kiet eke ẹbotde ẹban̄a mmimọ idikwe unen.’—Isa. 54:17.
21 Ediwak nditọete nnyịn iren ye iban ẹmi nsan̄a ndọ mmọ mînịmke ke akpanikọ ke ẹwụt n̄ko mbuọtidem ye ime. Eyenete eren kiet ke Guadeloupe ama osobo ọkpọsọn̄ ubiọn̄ọ oto n̄wan esie oro mîkenịmke ke akpanikọ. Man anam idem emem enye onyụn̄ ọbiọn̄ọ enye ndidụk mme mbono esop Christian, enye ama etre nditem udia m̀mê ndiyet, ndikwọhọde, ndinyụn̄ n̄kịm mme ọfọn̄ esie oro ẹkewahade. N̄wan esie ama etre ndineme nneme ye enye ke anyan ini. Edi ebede ke ndiwụt uko ofụri esịt ke ndinam n̄kpọ Jehovah nnyụn̄ n̄ka mbịne enye ke akam nyom un̄wam, eyenete emi ama ekeme ndiyọ kpukpru oro. Ekebịghi adan̄a didie? Ke n̄kpọ nte isua 20—ndien ke oro ebede n̄wan esie ama anam ukpụhọde. Ke akpatre, enye ama ekeme ndinen̄ede ndat esịt koro n̄wan esie ama enyịme idotenyịn Obio Ubọn̄.
22 Ke akpatre, inaha nnyịn ifre edinen̄ede nnịm ke akpanikọ eke n̄kpri nditọete nnyịn iren ye iban ẹmi ẹkade ufọkn̄wed kpukpru usen ẹnyụn̄ ẹsobode mfịghe ubọkn̄ka ye mme n̄kpọ-ata eken. Kaban̄a mfịghe edinam se kpukpru owo ẹnamde ke ufọkn̄wed, ekpri eyenan̄wan kiet edide Ntiense ọkọdọhọ ete: “Ke ini afo odude ke ufọkn̄wed, kpukpru ini kpukpru owo ẹsịn udọn̄ ẹnọ fi ndisọn̄ ibuot esisịt. Nditọ ufọkn̄wed ẹyenen̄ede ẹkpono fi edieke afo anamde n̄kpọ ndiwụt nsọn̄ibuot.” Nso mfịghe ke n̄kpri owo nnyịn ẹsobo ntem! Ana mmọ ẹsọn̄ọ ẹbiere ke ekikere ye esịt ndibiọn̄ọ idomo.
23 Ediwak n̄kpri owo nnyịn ke ẹnam ọfọn ke ndimụm nsọn̄ọnda mmọ n̄kama kpa ye mme idomo. Uwụtn̄kpọ kiet edi eke ekpri eyenete nnyịn an̄wan emi odụn̄de ke France. Usen kiet ke ẹma ẹkedia udia uwemeyo ekụre, ndusụk nditọiren ẹma ẹdomo ndinyịk enye etịm mmimọ inua, edi enye ama ọbọn̄ akam onyụn̄ enen̄ede ọbiọn̄ọ, ntre nditọiren oro ẹma ẹkpọn̄ enye. Ekem, kiet ke otu mmọ ama afiak edi edidọhọ enye ke imọ imama uko esie. Enye ama ekeme ndinọ enye ikọ ntiense mban̄a Obio Ubọn̄, anamde n̄kokon̄ idaha uwem oro Jehovah enịmde ọnọ kpukpru mbon oro ẹyomde ndinyene mme edidiọn̄ esie an̄wan̄a enye. Ke isua ufọkn̄wed oro, enye n̄ko ama anam mme edinịm ke akpanikọ esie an̄wan̄a ofụri otu nditọ ukpepn̄kpọ oro.
24 Nso ọsọn̄urua ifet ke nnyịn inyene ntem ndidi se ẹbatde ẹsịn ke otu mbon oro Jehovah enemde esịt ndida man itịn̄ ye edinen̄ede nnịm ke akpanikọ iban̄a mme uduak esie! (Col. 4:12) Adianade do, nnyịn imenyene utịbe utịbe ifet ndiwụt nsọn̄ọnda nnyịn ke ini isobode en̄wan emi otode Asua nnyịn oro ebietde lion, Satan kpa Devil. (1 Pet. 5:8, 9) Kûdede ufre nte ke Jehovah ada etop Obio Ubọn̄ ndinọ nnyịn ye mbon ẹmi ẹkopde uyo nnyịn edinyan̄a. Mme ubiere oro nnyịn inamde ye usụn̄ uwem nnyịn eke usen ke usen ẹkpekam ẹwụt nte ke nnyịn inịm Obio Ubọn̄ akpa. Ẹyak nnyịn ika iso ikwọrọ eti mbụk ye edinen̄ede nnịm ke akpanikọ!