Ẹka Iso Ẹbọp Kiet Eken Ẹnam Ọkọri

¹ Apostle Paul ama anam kpukpru se enye ekekemede man ọsọn̄ọ ekemmọ mme andinịm ke akpanikọ idem. (Utom 14:19-22) Ukem ntre, esifịna nnyịn ke ini nditọete nnyịn ẹsobode n̄kpọsọn̄ idaha, ndien nnyịn imesiyom ndin̄wam mmọ. Bible owụt ke kpukpru owo ẹkpenyene ndiwụt udọn̄ ke idem mbon efen, idịghe sụk mbiowo kpọt. (Rome 15:1, 2) Kere ban̄a usụn̄ iba emi nnyịn ikemede ndinam ima ima item emi: “Ẹka iso ẹdọn̄ kiet eken esịt ẹnyụn̄ ẹbọp kiet eken ẹnam ọkọri.”—1 Thess. 5:11.

² Ẹdiọn̄ọ Se Mbon Efen Ẹyomde: Ikọ Abasi ọtọt nte ke Dorcas ‘ọkọyọhọ ye nti edinam ye mme enọ mbọm.’ (Utom 9:36, 39) Enye ama ọfiọk mbon oro ẹkeyomde un̄wam onyụn̄ anam se enye ekekemede man an̄wam mmọ. Nso eti uwụtn̄kpọ ke enye ekenịm ntem ọnọ nnyịn! Afo emekeme ndifiọk ke owo oro ama ọkọsọn̄ oyom ẹmen imọ ẹka mbono esop. Mîdịghe ekeme ndidi odu asiakusụn̄ oro mîsinyeneke owo ndisan̄a ye enye ke an̄wautom ke uwemeyo ufọturua. Kam kere nte owo oro edibọde nsịnudọn̄ edieke ọfiọkde se enye oyomde onyụn̄ an̄wamde enye ke ata ata usụn̄!

³ Nneme eke Spirit: Nnyịn imekeme n̄ko ndida ikọ inua nnyịn mbọp mbon efen nnam mmọ ẹkọri. (Eph. 4:29) Ebiowo kiet oro enyenede mbufiọk ọkọdọhọ ete: “Edieke afo oyomde ndisịn udọn̄ nnọ mbon efen, neme ban̄a mme n̄kpọ eke spirit. Man ọtọn̄ọ nneme oro ọbọpde-bọp, afo emekeme ndibụp mmemmem mbụme nte, ‘Afo akasan̄a didie ọbọ akpanikọ?’” Wụt ata udọn̄ ke idem n̄kpri owo oro ẹdude ke esop. Wụt udọn̄ ke idem mbon oro ẹkopde mmemidem ye ke idem mbon oro ẹkopde bụt. (N̄ke 12:25) Kûyak nneme aban̄ade unọ idem inemesịt ererimbot adia ini oro akpadade eneme nneme eke spirit ye ekemmọ mme andinịm ke akpanikọ.—Rome 1:11, 12.

⁴ Nte ededi, nso ke afo ekeme nditịn̄ man ọbọp mbon efen anam mmọ ẹkọri? Ndi afo ama okụt edumbet oro akanamde ima ye esịtekọm oro afo enyenede ọnọ Jehovah etetịm otụn̄ọ ke ndondo emi ke ini akanamde ọkpọkpọ ukpepn̄kpọ ye edikot Bible fo? Ndi enyene se afo okokopde ke Ukpepn̄kpọ Enyọn̄-Ukpeme m̀mê ke utịn̄ikọ an̄wa oro okotụkde fi? Mîdịghe ndi ifiọkutom oro ọsọn̄ọde mbuọtidem ama otụk fi esịt? Edieke afo adade mme utọ n̄kpọ eke spirit oro ke ọsọn̄urua n̄kpọ, afo eyenyene n̄kpọ ndineme oro ekemede ndisịn udọn̄ nnọ mbon efen.—N̄ke 2:1; Luke 6:45.

⁵ Nnyịn ikpakam ika iso ndibọp kiet eken nnam mmọ ẹkọri ebe ke ndinọ ata ata un̄wam nnyụn̄ nda edeme nnyịn nnam n̄kpọ ke eti usụn̄.—N̄ke 12:18.