Bible—N̄wọrọnda N̄wed

Ẹkot enye n̄wed oro anyamade akan ke ererimbot, ntre ke onyụn̄ edi. Ẹkot ẹnyụn̄ ẹma Bible ẹkan n̄wed efen ekededi. Kemi, ẹdọhọ ke ẹsuan idem biliọn inan̄ (edide ofụri ofụri m̀mê ubak ubak) ke se iwakde ibe usem 2,000.

Nte ededi, se ikam idide n̄kpọ udọn̄ ikan edisuan oro ẹsuande Bible edi edidọhọ oro enye ọdọhọde ke se ẹwetde oto Abasi. ‘Ẹda odudu Spirit Abasi ẹwet kpukpru n̄wed Abasi,’ ntre ke Christian apostle Paul ekewet. (2 Timothy 3:16) Nso ke emi ọwọrọ? Ubak udịmikọ oro “odudu Spirit Abasi” (Greek, the·oʹpneu·stos) ke ataata usụn̄ ọwọrọ “Abasi ọkọduọk ibifịk.” Ikọ Greek oro enyenede ebuana, pneuʹma, ọwọrọ “spirit.” Ntem, se ẹdọhọde edi nte ke edisana spirit Abasi okonụk mme ewetn̄wed ẹdide owo, okotde ibifịk ọduọk mmọ, yak idọhọ ntre, man otodo ke akpatre ẹkpekeme ndinen̄ede n̄kot se ẹsiode ẹdi Ikọ Abasi, idịghe eke owo. Ke akpanikọ, ediwak owo oro ẹkpepde Bible ẹkop n̄kpaidem ẹban̄a nte kpukpru n̄wed esie ẹdude ke n̄kemuyo, nte enye enende ke n̄kan̄ ifiọk ntaifiọk, edinam akpanikọ ye in̄wan̄în̄wan̄ edu mme andiwet enye, ndien nte ata akpan n̄kpọ, mme prọfesi esie oro ẹsude—kpukpru ẹmi ẹnam ediwak miliọn mme andikot enye ẹmi ẹkerede n̄kpọ ẹnịm ke akpanikọ nte ke n̄wed emi oto ebiet emi okon̄de akan owo.a

Edi Abasi eketịm ekpeme ediwet oro ẹkewetde Bible adan̄a didie? Ndusụk owo ẹdọhọ ke enye eketịn̄ ikọ kiet kiet ke Bible ọnọ ẹwet. Mbon en̄wen ẹte ke enye n̄kukụre ọkọnọ mme ekikere ẹdude ke Bible ke odudu spirit, idịghe mme ikọ. Nte ededi, ke nditịm ntịn̄, edinọ odudu spirit ikemeke ndidi usụn̄ kiet kpọt, koro Abasi akada ‘mme prophet etịn̄ ikọ . . . ke nsio nsio usụn̄ ọnọ mme ete nnyịn.’ (Mme Hebrew 1:1; men 1 Corinth 12:6 domo.) Ke ibuotikọ oro etienede, nnyịn iyodụn̄ọde mme usụn̄ emi Abasi akadade etịn̄ ikọ ọnọ n̄kpọ nte mme ewetn̄wed 40 ẹdide owo ẹmi ẹkewetde Bible.

[Mme Ikọ idakisọn̄]