Mme Mbụme Ẹtode Mme Andikot

Sia oku eke eset oro ekekotde Melchizedek ekedide ata owo, ntak emi Bible ọdọhọde ke enye ‘ikenyeneke orụk iman’?

Ẹtịn̄ ikọ emi ke Mme Hebrew 7:3. Tịmfiọk ufan̄ikọ oro ke udọn̄ikọ oro enye odude:

“Koro Melchizedek emi—emi ekedide edidem Salem, ye oku Abasi Ibom, emi osobode ye Abraham ke ini enye otode ndiwot ndidem afiak edi onyụn̄ ọdiọn̄de enye: emi Abraham onyụn̄ abaharede kpukpru n̄kpọ ke itie duop osio ubak kiet ọnọ enye; (ebemiso okot enye, ete, Edidem edinen ido, ẹnyụn̄ ẹkot enye, Edidem Salem n̄ko, oro ọwọrọ ete, Edidem emem; enye inyeneke ete, inyụn̄ inyeneke eka, inyụn̄ inyeneke orụk iman, inyụn̄ inyeneke editọn̄ọ eyo uwem ye utịt uwem, edi enam enye ebiet eyen Abasi)—osụk ada oku ke nsinsi.”—Mme Hebrew 7:1-3.

Nte ẹtịn̄de, Melchizedek ekedi ata owo, ata owo nte Abraham, emi enye ekenyenede ebuana nnennen nnennen. (Genesis 14:17-20; Mme Hebrew 7:4-10) Ke oro edide ntre, anaedi Melchizedek ama enyene ete ye eka, n̄ko anaedi enye ama enyene nditọ. Ntre, nte owo enye ama enyene orụk iman m̀mê n̄wetnnịm n̄kpọ oro owụtde nte ubon enyenede ebuana. Enye n̄ko ama enyene utịt uwem esie. Ekem Melchizedek ama akpa, ke n̄kemuyo ye ikọ apostle Paul ke N̄wed Mbon Rome 5:12, 14. Edi sia nnyịn mîfiọkke ini emi Melchizedek akakpade okonyụn̄ etrede ndinam utom nte oku, ke utọ usụn̄ oro ke enye akanam utom tutu osịm utịt oro owo mîkọfiọkke.

Ke Mme Hebrew, Paul etịn̄ aban̄a Melchizedek ke ini enemede aban̄a utom Jesus Christ nte Akwa Oku oro ọfọnde akan. Ke etịn̄de aban̄a Melchizedek nte mbiet, m̀mê uduot, eke Jesus ke itieutom oku emi, Paul ọkọdọhọ ete: “Jesus . . . ama akabade edi Akwa Oku ke nsinsi, nte utọ Melchizedek asan̄ade.” (Mme Hebrew 6:20) Ke nso usụn̄ifiọk?

Anaedi Paul ama ofiọk nte ke mbụk Bible inọhọ ọyọhọ ntọt aban̄ade ekpụk ubon Melchizedek—mme eteete esie m̀mê mme andito ubon esie ekededi. Ntọt oro ikam idịghe se ẹyomde ẹwet ẹnịm ke Bible. Ọkọn̄ọde ke se Paul ọkọfiọkde m̀mê se nnyịn ifiọkde, ntre, ekeme nditịn̄ nte enende nte ke Melchizedek ‘ikenyeneke orụk iman’ (New World Translation of the Holy Scriptures, American Standard Version), “inyeneke n̄wetnnịm n̄kpọ oro owụtde ntọn̄ọ ubon” (W. J. Conybeare), m̀mê ndinyene “n̄wetnnịm n̄kpọ oro owụtde nte mbonubon ẹnyenede ebuana.”—J. B. Phillips.

Ke nso usụn̄ ke Jesus eketie ntre? Ih, nnyịn imọfiọk ite ke Ete Jesus edi Jehovah Abasi ndien eka esie eke obụk ekedi Mary eke esien Judah. Edi, n̄kpọ odu oro anamde Melchizedek ebiet Jesus. Didie ke edi ntre? Jesus ikamanake ito esien Levi, kpa esien mme oku ke idụt Israel. Baba, Jesus ikakabakede idi oku ibe ke orụk iman. Ukem nte Melchizedek, “emi mîdaha item ibet obụkidem,” inam enye akabade edi oku, oro edi, ebe ke ndimana ndụk esien ye ubon oku. (Mme Hebrew 7:15, 16) Utu ke ndikabade ndi oku ebe ke ete eke owo emi ekedide oku ke idemesie, Jesus edi se “Abasi okokot san̄asan̄a ete, Akwa Oku nte utọ Melchizedek asan̄ade.”—Mme Hebrew 5:10.

N̄ko-n̄ko, Jesus ikenyeneke mme andito ke ubon esie ẹkedide mme oku m̀mê mme andida itie oku esie. Ke usụn̄ifiọk emi n̄ko, enye ikenyeneke orụk iman. Enye eyekaiso anam utom oku esie nte ọnọitem oro an̄wamde ke nsinsi. Paul ama etịn̄ aban̄a utom nsinsi emi, ọdọhọde ete:

“Koro [Jesus] odude uwem ke nsinsi, enyene idaha oku eke mîkemeke ndikpụhọde. Ke ntak emi Enye onyụn̄ ekeme ndinyan̄a mmọemi ẹsan̄ade ke Enye ekpere Abasi ọyọhọ ọyọhọ, sia Enye odude uwem ke nsinsi ndinam n̄kpeubọk nnọ mmọ.”—Mme Hebrew 7:24, 25.

Nnyịn ndikere mban̄a mme ikọ Paul ke Mme Hebrew 7:3 ke ntem ekpenyene ndidi se ikande sụk ikpîkpu mben̄e ifiọk oro imụmde isịn ke ibuot. Emi ekpenyene ndidemede esịtekọm nnyịn ke ima ima ndutịm oro Jehovah Abasi anamde ọnọ nnyịn ndibọ edifen mme idiọkn̄kpọ ke nsinsi ye usụn̄ oro enye anamde ndutịm ọnọ nnyịn ndibọ un̄wam ye ndausụn̄ ke nsinsi.