“Ẹkedep Mbufo ke Ekọmurua”
“Ẹkedep mbufo ke ekọmurua: mmọdo ẹnọ Abasi ubọn̄ ke ikpọkidem mbufo.”—1 CORINTH 6:20.
1, 2. (a) Nso ikeberede usụn̄ “ubọhọ n̄kpa”? (b) Nso ke ẹkenyene ndinam man uwa Christ enyene ufọn nte ibet onyịmede, nte emi nso ikadade iban̄a?
ANDIWET psalm ọkọdọhọ ete: “Abasi edi Abasi emi anyan̄ade nnyịn; ndien ubọhọ n̄kpa enyene Jehovah Ọbọn̄.” (Psalm 68:20) Uwa Jesus Christ ekeberede usụn̄ oro. Edi man uwa oro enyene ufọn nte ibet onyịmede, Christ ke idemesie ekenyene ndida ke iso Abasi.
2 Ẹma ẹbemiso ẹwụt emi ke Usen Usio-isop emi akwa oku okodụkde ke Ata Edisana Ebiet. (Leviticus 16:12-15) Paul ekewet ete: “Edi ke adan̄aemi Christ ekedide nte Akwa Oku . . . Enye inyụn̄ idaha iyịp ebot ye enan̄ isan̄a ibe idụk, edi ada iyịp Esiemmọ odụk ke edisana ebiet ini kiet kpọt, ke Enye ama ọkọbọ nsinsi ufak ọnọ owo. Koro Christ ikebehe idụk Edisana Ebiet emi ẹdade ubọk ẹnam, emi onyụn̄ edide mbiet ata Edisana Ebiet; edi ebe odụk ke ata heaven, man Enye ada ke iso Abasi kemi kaban̄a nnyịn.”—Mme Hebrew 9:11, 12, 24.
Odudu Oro Iyịp Enyenede
3. (a) Didie ke mme andituak ibuot nnọ Jehovah ẹse iyịp, ndien ntak-a? (b) Nso iwụt ke iyịp enyene odudu nte ibet onyịmede ndisio isop mme idiọkn̄kpọ?
3 Nso udeme ke iyịp Christ enyene ke edinyan̄a nnyịn? Toto ke eyo Noah, mme ata andituak ibuot ẹkeda iyịp ke edisana n̄kpọ. (Genesis 9:4-6) Iyịp enyene akpan itie ke ndutịm uwem, koro nte Bible ọdọhọde “uwem [“ukpọn̄,” NW] unam odude ke iyịp.” (Leviticus 17:11) Ntem Ibet Moses okoyom ete ke ini ẹwade unam, yak ẹduọk iyịp esie ke iso Jehovah. Ndusụk ini ẹma ẹsiyet iyịp ke nnụk itieuwa. Nte an̄wan̄ade, odudu uwa isio-isop okodu ke iyịp. (Leviticus 8:15; 9:9) “Ndien osụk esisịt ẹda iyịp ẹnam kpukpru n̄kpọ ẹsana, nte ido ibet edide; ndien ke ediduọk iyịp mîdụhe, edidahado inyụn̄ idụhe.”—Mme Hebrew 9:22.
4. (a) Nso uduak ke ẹkeyọhọ ke Jehovah ndikpan edida iyịp nnam n̄kpọ? (b) Nso ikedi akpan n̄kpọ ke usụn̄ nte ẹkewotde Jesus?
4 Eyịghe idụhe, ndien, nte ke idak Ibet, edida iyịp nnam n̄kpọ ke idiọk usụn̄ ekededi ekedi ufen n̄kpa! (Leviticus 17:10) Kpukpru nnyịn imofiọk ite ke ini ẹnamde n̄kpọ odu ke udomo oro mîwakke, m̀mê ẹkpande ọkpọsọn̄ ọkpọsọn̄ ndida enye nnam n̄kpọ, ekọmurua esie esidọk. Jehovah ndikpan edida enye nnam n̄kpọ ọsọn̄ọ owụt ete ke owo ikpesehe iyịp nte n̄kpọ oro enyenede esisịt ufọn, edi nte ọsọn̄urua, n̄kpọ oro enyenede ufọn. (Utom 15:29; Mme Hebrew 10:29) Emi asan̄a ekekem ye n̄kokon̄ uduak emi iyịp Christ ọkọyọhọde. Nte odotde, enye akakpa ke usụn̄ oro akanamde ẹduọk iyịp esie. Ntem, ama ana in̄wan̄în̄wan̄ nte ke ikokụreke ke Christ ndikawa idem esie nte owo edi ama an̄wan̄a ukpọn̄ esie ọduọk, ama awa ata uwem esie nte mfọnmma owo! (Isaiah 53:12) Christ ikọduọkke unen uwem oro ekemde ye ibet mi ke ntak unana mfọnmma, ntre iyịp esie oro ẹkeduọkde ama enyene akwa ufọn onyụn̄ edi se ẹnọde ke iso Abasi ndida nsio isop idiọkn̄kpọ ubonowo.
5. (a) Nso ke Christ akada odụk ke heaven, ndien ntak-a? (b) Didie ke ẹkewụt nte ke Abasi ama onyịme uwa Christ?
5 Christ ikpekemeke ndida ata iyịp esie ndụk ke heaven. (1 Corinth 15:50) Utu ke oro, enye akada se iyịp oro akadade aban̄a: ufọn uwa mfọnmma uwem esie nte owo nte ekemde ye ibet. Ke iso Abasi, enye nte ido edide ama ekeme ndinọ se idada iban̄a uwem oro nte ufak ke ibuot anamidiọk ibonowo. Jehovah ndinyịme ufak oro ama owụt idem ke Pentecost eke 33 C.E., ke ini edisana spirit ekedide edidoro mbet 120 ke Jerusalem. (Utom 2:1-4) Christ, yak idọhọ, idahaemi emedep ofụri ubonowo enyene. (Galatia 3:13; 4:5; 2 Peter 2:1) Ntre, mme ufọn ufak ẹma ẹkeme ndifiọrọ nsịm ubonowo.
Mme Akpa Andibọ Ufọn Ufak
6. Nso ndutịm ke Abasi akanam ọnọ edida mme ufọn ufak Christ nnam n̄kpọ?
6 Emi, nte ededi, iwọrọke ite ke ẹyenọ ubonowo mfọnmma ikpọkidem ke ebe oro, koro ibọhọke ẹkan idiọkn̄kpọ owo, mfọnmma eke ikpọkidem ikemeke ndidu. (Rome 7:8-24) Didie, n̄ko ini ewe ke ẹdikan idiọkn̄kpọ? Abasi ekebemiso anam ndutịm ọnọ owo 144,000 ndika heaven nte ‘mme oku Abasi ndikara isọn̄ nte ndidem’ ye Christ Jesus. (Ediyarade 5:9, 10; 7:4; 14:1-3) Ebede ke mmọ, ẹyeda mme ufọn ufak oro ẹnam n̄kpọ sụn̄sụn̄ ẹnọ ubonowo ke ufan̄ tọsịn isua.—1 Corinth 15:24-26; Ediyarade 21:3, 4.
7. (a) Obufa ediomi oro edi nso, mmanie ẹdi mme andibuana, ndien nso uduak ke enye anam? (b) Ntak akanade n̄kpa ada itie man obufa ediomi ekeme ndidu, ndien nso udeme ke iyịp Christ enyene?
7 Ke ndinam ndutịm nnọ oro, oku-ndidem 144,000 ẹdi se “ẹkefak[de] mmọ ẹsio ke otu owo.” (Ediyarade 14:4) Ẹnam emi ebe ke “obufa ediomi.” Ediomi emi edi ndutịm ẹtịmde ke ufọt Jehovah Abasi ye Israel Abasi eke spirit man mme andibuana ke enye ẹnam utom nte ndidem ye mme oku. (Jeremiah 31:31-34; Galatia 6:16; Mme Hebrew 8:6-13; 1 Peter 2:9) Edi, didie ke ediomi ke ufọt Abasi ye mme anana mfọnmma owo ekeme nditịbe? Paul anam an̄wan̄a ete: “Ọtọ nte ediomi [ke ufọt Abasi ye anana mfọnmma owo] odude, n̄kpa odụk-ediomi oro edide owo enyene ndida itie. Koro ediomi ọsọn̄ọ ke owo akpade, sia ediomi mîdụhe ke edinam ini ekededi ke adan̄aemi odụk-ediomi oro edide owo osụk odude uwem.”—Mme Hebrew 9:16, 17, NW.
8, 9. Didie ke ufak enyene ebuana ye obufa ediomi?
8 Ntre uwa ufak oro edi isọn̄ ọnọ obufa ediomi oro, emi Jesus edide Esịn-ufọt. Paul ekewet ete: “Abasi kiet odu, Ekpe-emem kiet ke ufọt Abasi ye owo onyụn̄ odu, emi ke Idemesie edide owo, kpa Christ Jesus; emi ọkọnọde Idemesie, ete idi ufak kpukpru owo. Ẹkenọ mbụk ẹban̄a n̄kpọ emi ke edikem ini.” (1 Timothy 2:5, 6) Ikọ oro akpan akpan aban̄a owo 144,000, ẹmi ẹdade ẹnam obufa ediomi oro.
9 Ke ini Abasi akanamde ediomi ye Israel eke obụk, ediomi emi ikọsọn̄ọke nte ibet onyịmede ibọhọke ke ẹma ẹkeduọk iyịp unam ke uwa. (Mme Hebrew 9:18-21) Ukem ntre, man obufa ediomi ọtọn̄ọ edinam, Christ ekenyene ndiduọk ‘iyịp ediomi.’ (Matthew 26:28; Luke 22:20) Ye Christ anamde utom nte Akwa Oku ye “esịne-ufọt obufa ediomi,” Abasi ada ufọn iyịp Jesus anam n̄kpọ ye mmọ oro ẹdade ẹdisịn ke obufa ediomi, ẹbatde mmọ nte ekemde ye ibet ke ndinen owo. (Mme Hebrew 9:15; Rome 3:24; 8:1, 2) Adan̄aoro ndien ke Abasi ekeme ndida mmọ nsịn ke obufa ediomi ndidi oku-ndidem eke heaven! Nte Esịne-ufọt ye Akwa Oku mmọ, Jesus an̄wam mmọ ndinyene edisana idaha ke iso Abasi.—Mme Hebrew 2:16; 1 John 2:1, 2.
Nditan̄ Mme N̄kpọ ke Isọn̄ Mbok
10, 11. (a) Didie ke ufak atara aka anyan ebe mme Christian oro ẹyetde aran? (b) Mmanie ẹdi akwa otuowo, ndien nso idaha ke mmọ ẹnyene ke iso Abasi?
10 Ndi mme Christian oro ẹyetde aran ikpọn̄îkpọn̄ ẹnyene ubọhọ-ufụn ebe ke ufak, edifen mme idiọkn̄kpọ mmọ? Baba, Abasi ke afiak ada kpukpru n̄kpọ eken ọnọ idemesie ke ndinam emem ebe ke iyịp oro ẹkeduọkde ke eto ndutụhọ, nte Colossae 1:14, 20 owụtde. Emi esịne mme n̄kpọ eke ẹdudu ke heaven (owo 144,000) ọkọrọ ye mme n̄kpọ eke ẹdude ke isọn̄. Eke ukperedem emi edi mbon oro ẹdude ẹnọ uwem eke isọn̄, kpa mme owo oro ẹdinyenede mfọnmma uwem ke Paradise ke isọn̄. Akpan akpan ọtọn̄ọde ke 1935 ẹma ẹsịn ọkpọsọn̄ ukeme nditan̄ utọ mbon oro mbok. Ediyarade 7:9-17 ọdọhọ ke mmọ ẹdi “akwa otuowo” emi edinyan̄a mmọ otode Abasi ye Eyenerọn̄. Osụk oyoyom mmọ ẹbọhọ “akwa ukụt” ẹnyụn̄ ‘ẹda mmọ ẹka ke idịm mmọn̄ uwem,’ koro Ediyarade 20:5 owụtde ete ke utọ mbon oro ẹyedu uwem ọyọhọ ọyọhọ, ẹnyenede mfọnmma uwem eke owo, etisịm utịt Tọsịn Isua Ukara Christ. Ẹyebat mmọ oro ẹbede akpatre udomo adan̄aoro ye mfọnmma idaha mmọ nte owo ke edinen man ẹdu uwem nsinsi ke isọn̄.—Ediyarade 20:7, 8.
11 Edi, ke ido ntịmidem, akwa otuowo ẹma “[ẹyeyet] ọfọn̄idem mmọ ẹnam afia ke iyịp Eyenerọn̄.” (Ediyarade 7:14) Christ inamke n̄kpọ nte Esịne-ufọt obufa ediomi inọ mmọ, kpa ye oro mmọ ẹbọ ufọn ẹto ediomi emi ebe ke utom Obio Ubọn̄ Abasi. Nte ededi, Christ osụk ananam n̄kpọ aban̄a mmọ, nte Akwa Oku, ebede ke enye Jehovah ekeme omonyụn̄ ada ufak oro anam n̄kpọ okosịm udomo oro ẹbatde mmọ ke edinen nte mme ufan Abasi. (Men James 2:23 domo.) Ke ini Tọsịn Isua Ukara, sụn̄sụn̄ ‘ẹyenyan̄a mmọ ẹsio ke itieufụn mbiara, [tutu ke akpatre mmọ ẹyenyene] ubọn̄ ubọn̄ ubọhọ-ufụn eke nditọ Abasi.’—Rome 8:21.
12. Ke nso isọn̄ ke Abasi akanam n̄kpọ ye iren anam-akpanikọ oro ẹkedude mbemiso eyo Christian?
12 Kaban̄a idaha mmọ ye Abasi, etie nte mbon eke akwa otuowo ẹkpụhọde esisịt ye mme andituak ibuot oro ẹkedude mbemiso eyo Christian. Nte ededi, Abasi akanam n̄kpọ ye mme andituak ibuot oro ẹkedude mbemiso eyo Christian mi ye ndutịm ufak ini iso ke ekikere. (Rome 3:25, 26) Mmọ ẹkebọ edifen mme idiọkn̄kpọ mmọ sụk ke inioro. (Psalm 32:1, 2) Utu ke ndikanam mmọ ẹbọhọ “ifiọk idiọkn̄kpọ” ofụri ofụri, uwa unam akananam mmọ “ẹti mme idiọkn̄kpọ.”—Mme Hebrew 10:1-3.
13. Mme ufọn ewe ke nnyịn inyene ikan mme asan̄autom Abasi oro ẹkedude mbemiso eyo Christian?
13 Emi ọkpụhọde ye mme ata Christian mfịn. Mmọ ẹtuak ibuot ke ntak ufak oro ẹma ẹkpekpe! Ebede ke Akwa Oku mmọ, mmọ “ẹsan̄a ẹkpere ebekpo mfọnido oro owo mîdotke ye ifụre utịn̄ikọ.” (Mme Hebrew 4:14-16, NW) Ndinam ẹtie ke emem ye Abasi idịghe ndusụk n̄kpọntịbe oro ẹdoride-dori enyịn ẹban̄a edi edi ata idem-n̄kpọ oro odude idahaemi! (2 Corinth 5:20) Ke ini mmọ ẹnamde ndudue, mmọ ẹkeme ndibọ ata edifen nnọ. (Ephesus 1:7) Mmọ ẹnyene ata edisana esịt oro ikpe mîbiomke. (Mme Hebrew 9:9; 10:22; 1 Peter 3:21) Mme edidiọn̄ ẹmi ẹdi ntabi-nse ubọn̄ ubọn̄ ubọhọ-ufụn eke nditọ Abasi oro mme asan̄autom Jehovah ẹdinyenede ke ini iso!
Utụn̄ọ Ọniọn̄ ye Ima Abasi
14, 15. Didie ke ufak owụt ata utụn̄ọ ọniọn̄ Jehovah, ọkọrọ ye edinen ido ye ima esie?
14 Nso utịbe utịbe enọ otode Abasi ke ufak oro edi ntem! Enye emem utom nditịm mfiọk, edi otụn̄ọ ekem ndinam ndịk omụm owo oro ọfiọkde n̄kpọ akan. Nnyịn ndidụn̄ọde se ufak anamde akam ayarade enye enyọn̄ enyọn̄. Kpa ye oro, nnyịn itiene apostle Paul ifiori ite: “Uwak ọniọn̄ ye ifiọk Abasi ẹditụn̄ọ adan̄a didie! Mme ikpe esie ẹkak owo ndidụn̄ọde adan̄a didie, onyụn̄ ayan̄a owo nditiene nde usụn̄ Esie.” (Rome 11:33) Ẹwụt ọniọn̄ Jehovah sia enye ekemede ndinyan̄a ubonowo nnyụn̄ n̄wụt unen itie edikara esie. Ebede ke ufak, “ẹma ẹyarade edinen ido eke Abasi . . . Abasi [okosio Christ] onịm ete edi uwa emem ke iyịp Esie, oto ke mbuọtidem.”—Rome 3:21-26.
15 Nsụkuyo ndomokiet idụhe oro ẹkemede ndisụk Abasi ke ndikefen mme idiọkn̄kpọ oro mme andituak ibuot mbemiso eyo Christian ẹkenamde ke edem. Akande oro, nsụkuyo ndomokiet idụhe oro ẹkemede ndisụk Jehovah ke ndibat mbon oro ẹyetde aran ke edinen nte nditọ esie m̀mê akwa otuowo nte mme ufan esie. (Rome 8:33) Ke atakde enye akwa n̄kpọ, Abasi ke mfọnmma usụn̄ anam se ibet onyịmede, m̀mê se inende, ke mme edinam esie, owụtde ọyọhọ ọyọhọ nte ke nsunsu ikọ Satan oro nte ke Jehovah edi ukwan̄ andikara edi nsu! N̄ko, ẹmewụt ima unana ibụk oro Abasi amade edibotn̄kpọ esie ke usụn̄ oro owo mîkemeke ndineni.—Rome 5:8-11.
16. (a) Ke ewe usụn̄ ke ufak ọnọ ibọrọ ndibiere eneni aban̄ade nsọn̄ọnda mme asan̄autom Abasi? (b) Didie ke ufak ọnọ nnyịn ntak mbuọtidem ke obufa ererimbot edinen ido emi edide?
16 Usụn̄ oro ẹkenọde ufak n̄ko ama ebiere eneni aban̄ade nsọn̄ọnda mme asan̄autom Abasi. N̄kopitem Jesus ikpọn̄îkpọn̄ ama anam oro. (Mme N̄ke 27:11; Rome 5:18, 19) Adianade ye oro edi usụn̄uwem mme Christian 144,000 ẹmi, kpa ye ubiọn̄ọ otode Satan, ẹnamde akpanikọ tutu osịm n̄kpa. (Ediyarade 2:10) Ufak anam mmọemi ẹkeme ndibọ se mîkemeke ndikpa nte utịp mmọ—kpa uwem oro owo mîkemeke ndisobo! (1 Corinth 15:53; Mme Hebrew 7:16) Emi anam ikọ Satan oro nte ke mme asan̄autom Abasi idịghe se ẹbuọtde idem okûwọrọ n̄kpọ! Ufak oro n̄ko ọmọnọ nnyịn enyene-iwụk ntak ndibuọt idem ke mme un̄wọn̄ọ Abasi. Nnyịn imekeme ndikụt ndutịm edinyan̄a eke “ọfọnde akan” ebe ke uwa ufak. (Mme Hebrew 8:6) Ke ntem ẹnọ ubiọn̄ edinen obufa ererimbot!—Mme Hebrew 6:16-19.
Kûtaba Uduak Esie
17. (a) Didie ke ndusụk owo ẹwụt ẹte ke mmimọ imataba uduak ufak oro? (b) Nso ikeme ndinụk nnyịn ndisana ke ido uwem kpukpru ini?
17 Man ọbọ ufọn oto ufak oro, oyom owo enyene ifiọk, enyene mbuọtidem, onyụn̄ odu uwem nte ekemde ye mme edumbet Bible. (John 3:16; 17:3) Ibat ibat owo, nte ededi, ẹnyịme ndinam ntre. (Matthew 7:13, 14) Idem ke otu mme ata Christian, ndusụk owo ẹkeme “ndibọ mfọnido Abasi emi owo mîdotke ẹnyụn̄ ẹtaba uduak esie.” (2 Corinth 6:1, NW) Ke uwụtn̄kpọ, ke ofụri isua ẹmi ẹma ẹsio ediwak tọsịn owo ẹfep ke ntak oburobụt ido idan̄. Nso n̄kpọ o-but ke edi mtem ke ikerede iban̄a se Jehovah ye Christ ẹnamde ẹnọ nnyịn! Ndi esịtekọm ẹnyenede ẹnọ ufak ikponụkke owo “[okûfre] ete, ẹma ẹyet imọ n̄kani mme idiọkn̄kpọ ẹfep, ẹnyụn̄ ẹnam imọ isana”? (2 Peter 1:9) Nte odotde, ndien, Paul eti mme Christian ete: “Ẹkedep mbufo ke ekọmurua; mmọdo ẹnọ Abasi ubọn̄ ke ikpọkidem mbufo.” (1 Corinth 6:20) Nditi emi ọnọ nnyịn okopodudu ntak ndikaiso nsana ke n̄kan̄ ido uwem!—1 Peter 1:14-19.
18. Didie ke Christian oro ọduọde odụk akwa idiọkn̄kpọ ekeme ndisụk mbọ ufọn nto ufak?
18 Nso edieke edide owo ama ọdọduọ odụk akwa idiọkn̄kpọ? Enye ekpenyene ndibọ ufọn nto edifen nnọ oro ufak anamde odu, ọbọde un̄wam oto mme ima ima esenyịn. (James 5:14, 15) Idem edieke ọkpọsọn̄ ntụnọ edide se ẹyomde, Christian oro akabarede esịt ikpenyeneke ndiduọ ke utọ nnen̄ede oro. (Mme Hebrew 12:5) Nnyịn imenyene utịbe utịbe un̄wọn̄ọ Bible emi: “Edieke nnyịn iyararede mme idiọkn̄kpọ nnyịn, Enye edi anam-akpanikọ onyụn̄ enen, ete ifen mme idiọkn̄kpọ nnyịn, inyụn̄ iyet nnyịn isana ke kpukpru mme ukwan̄n̄kpọ.”—1 John 1:9.
19. Nso ekikere ke Christian ekpenyene aban̄a idiọk edu uwem oro enye ekenyenede mbemiso ekpepde akpanikọ?
19 Ndusụk ini mme Christian nte mîdotke ẹsitek ifịk ke ntak akani idiọk edu uwem. Eyenete eren kiet oro okokopde iduọesịt ekewet ete, “Mbemiso ikedide ididu ke akpanikọ, ami ye n̄wan mi ima imen udọn̄ọ ndido idan̄ ẹkotde herpes. Ndusụk ini esitie nnyịn ke idem nte nnyịn isanake, nte n̄kpọ eke nnyịn ‘mîdotke’ ndidu ke edisana esop Jehovah.” Ih, idem ke ẹma ẹkekabade ẹdi Christian, ndusụk owo ẹkeme ndidọk ekese ndutụhọ oto mme ndudue ini edem. (Galatia 6:7) Edi, ntak ndomokiet idụhe owo ndikere ke imọ isanake ke iso Jehovah edieke edide enye ama akabade esịt. “Iyịp Christ” ekeme ‘ndiyet esịt nnyịn, anam ibọhọ utom n̄kpa.’—Mme Hebrew 9:14.
20. Didie ke mbuọtidem ke ufak ekeme ndibiomode Christian ekikere ubiomikpe oro mînyeneke ntak mfep?
20 Ih, mbuọtidem ke ufak ekeme ndin̄wam ndinam nnyịn ibọhọ mbiomo ubiomikpe oro mînyeneke ntak. Ekpri eyenete an̄wan kiet ama onyịme ete: “Ami mman̄wana ye ndedehe edu ufiọn̄ọ ndido idan̄ n̄kop uyụhọ ke se ibede isua 11 idahaemi. Akayak esisịt ami n̄kpọkpọn̄ esop ke idaha kiet, n̄kerede nte ke Jehovah tutu amama idiyomke owo oro edehede ntre ndisabade esop esie.” Ana nnyịn iti, nte ededi, ite ke Jehovah “ọmọfọn, omonyụn̄ ama ndidahado” adan̄a nte nnyịn ke ofụri esịt ikade iso ndin̄wana ye ukwan̄ido, iyakke idem inọ enye!—Psalm 86:5.
21. Didie ke ufak okpotụk ekikere nnyịn kaban̄a mbon oro ẹduede nnyịn?
21 Ufak ekpenyene n̄ko nditụk nte nnyịn inamde n̄kpọ ye mbon en̄wen. Ke uwụtn̄kpọ, didie ke afo esinam n̄kpọ ke ini ekemmọ Christian eduede fi? Nte afo ke unyịmesịt emesifen ọnọ ke usụn̄ ebietde eke Christ? (Luke 17:3, 4) Nte afo ‘emenyene esịtmbọm, onyụn̄ efen mmọ en̄wen, kpa nte Abasi okonyụn̄ efende fi ke Christ’? (Ephesus 4:32) Mîdịghe nte afo esima ndikama udu m̀mê ndikọri iyatesịt? Oro ke akpanikọ ekpedi editaba uduak ufak oro.—Matthew 6:15.
22, 23. (a) Nso utịp ke ufak ekpenyene ke utịtmbuba ye usụn̄uwem nnyịn? (b) Nso ubiere ke kpukpru Christian ẹkpenam ke se iban̄ade ufak?
22 Nte akpatre, akpana esịtekọm oro inyenede inọ ufak enyene akwa utịp ke utịtmbuba ye usụn̄uwem nnyịn. Paul ọkọdọhọ ete: “Ẹkedep mbufo ke ekọmurua; ẹkûdụk ufụn ẹnọ owo.” (1 Corinth 7:23) Ndi mme udọn̄ ndutịm uforo—ufọkidụn̄, utom, udia, edisịnen̄kpọ—ẹsụk ẹdedi akwa n̄kpọ ke uwem fo? Mîdịghe nte afo ke ebemiso oyom Obio Ubọn̄, ọbuọtde idem ke un̄wọn̄ọ oro Abasi ọn̄wọn̄ọde ndinọ fi se inanade? (Matthew 6:25-33) N̄kam ndi afo odụk ufụn ọnọ eteutom fo edi etre ndifak ifet oro ekemde nnọ ndutịm ukara Abasi? Ti ete, “Christ . . . [akayak] Idemesie ọnọ kaban̄a nnyịn, man Enye . . . anam nnyịn asakubọk ikọt esie, ẹmi isịnde esịt inam nti utom.”—Titus 2:14; 2 Corinth 5:15.
23 ‘Ekọm enyene Abasi ebe ke Jesus Christ’ kaban̄a n̄wọrọnda enọ emi—kpa ufak! (Rome 7:25) Ẹyak nnyịn ikûdedei itaba uduak ufak oro edi iyak enye edi ata odudu ke uwem nnyịn. Nnyịn ikpakam inọ Abasi ubọn̄ kpukpru ini, ke ekikere, ke ikọ, ye ke edinam, itide ye esịtekọm ite ke ẹkededep nnyịn ke ekọmurua.
Mme Mbụme Ndụn̄ọde
◻ Ntak ẹdade iyịp ke edisana n̄kpọ, ndien didie ke ẹkemen iyịp Christ ẹwụt ke iso Jehovah ke heaven?
◻ Nso udeme ke iyịp Christ enyene ke ndisọn̄ọ obufa ediomi?
◻ Didie ke ufak enyene ufọn ọnọ mbon oro ẹyetde aran ye akwa otuowo?
◻ Didie ke ikeme ndiwụt ite ke nnyịn itabake uduak ufak oro?
[Ndise ke page 16]
Odudu uwa usio-isop odu ke iyịp uwem esie
[Ndise ke page 17]
Owo oro owụtde esịtekọm ke edifen oro Abasi efende enye, onyịme ndifen nnọ mmọ en̄wen